Bon Amigu—Mal Amigu

UN MUCHA muhé ku nos lo yama Sarah, tur angustiá a deshogá su kurason serka un amigu. El a konta e persona aki ku un hòmber ku e tabata konsiderá su amigu a resultá di ta un asesino. Sarah a puntra: ‘Si un hende ku mi tabata konfia por a hasi un kos asina, kon mi por konfia otro hende?’ Sarah su amigu a bira puntr’é si e tabata sa ki klase di norma i balor e hòmber tabatin. Sarah a kontestá: “Kiko bo ke men?” Sarah ni sikiera tabata sa kiko “norma i balor” ke men. Kiko di abo? Abo konosé bo amigunan su norma- i balornan?

E kontesta riba e pregunta ei literalmente por nifiká bida òf morto, manera e eksperensia di Sarah ta mustra. Un proverbio bíbliko ta ekspres’é asin’aki: “Esun ku anda ku hende sabí lo ta sabí, ma un kompañero di hende bobo lo sufri daño.” (Proverbionan 13:20) Sin embargo, meskos ku Sarah, tin hopi hende ku ta skohe amigu simplemente a base di si nan ‘sanger ta bai bon ku e persona’ òf nò, esta, kon nan ta sinti ora nan ta den kompania di e persona. Ta mas ku klaru ku nos gusta ta den kompania di hende ku ta laga nos sinti bon. Pero si esei ta e úniko kriterio ku nos ta usa pa skohe amigu, sin ku nos ta pensa mashá riba e persona su berdadero kualidatnan interno, nos por haña nos ku un gran desepshon. Kon bo por sa si un persona tin bon norma i balor?

E Nesesidat di Normanan Moral Haltu

Pa kuminsá, nos mes mester tin bon norma i balor. Nos mester sa kiko ta korekto i kiko ta inkorekto, bon i malu, i tur ora bai nos tin ku tene duru na prinsipionan moral haltu. Un otro proverbio bíbliko ta bisa: “Manera heru ta mula heru, asina un hende ta mula kara di su amigu.” (Proverbionan 27:17) Ora dos amigu tin fortalesa moral firme manera heru, nan por yuda otro madurá, i e lasonan di amistat entre nan lo ta mas fuerte.

Pacôme, di Fransia, ta bisa: “Pa mi, un berdadero amigu ta unu ku ta skucha mi i ta papia bondadoso ku mi, pero ku por skual mi tambe ora mi hasi kos di bobo.” Sí, nos mihó amigunan—sea ku nan ta hóben òf bieu—ta esnan ku ta yuda nos keda kana den e direkshon korekto i ku ta korigí nos ora nos ta na punto di hasi kosnan ku no ta sabí. Beibel ta bisa: “Fiel ta e heridanan di un amigu.” (Proverbionan 27:6) Pa fortalesé nos mes moralmente i spiritualmente, nos tin ku asosiá ku otro hende ku ta stima Dios i su prinsipionan. Céline, di Fransia, ta kòrda: “Tempu ku no tabatin niun hende na mi skol ku tabatin e mesun norma- i kreensianan kristian ku mi, mi a siña e importansia di tin berdadero amigu den e kongregashon kristian. Nan a yuda mi masha hopi pa keda balansá.”

Kon pa Evaluá Posibel Amigunan

Si bo ta interesá den bira amigu di un persona ku bo a topa, lo bo ke puntra bo mes: ‘Ken ta su amiga- òf amigunan?’ E klase di amigunan íntimo ku un persona tin ta revelá hopi di e persona mes. Puntra tambe, kiko personanan madurá i respetá den komunidat ta opiná di dje? Ademas, ta sabí pa konsiderá no solamente kon posibel amigunan ta trata nos pero tambe kon nan ta trata otro hende, spesialmente hende ku nan no tin ningun ganashi kuné. A ménos ku un persona ta desplegá bon kualidat na tur momentu i ku tur hende—kualidatnan manera onestidat, integridat, pasenshi i konsiderashon—ki garantia bo tin ku semper lo e trata abo bon?

Pa siña konosé un hende su berdadero karakter ta rekerí pasenshi, abilidat, i tambe tempu pa opservá e persona den bida di tur dia. Beibel ta deklará: “Un plan den kurason di un hende ta manera awa hundu, ma un hende di komprondementu ta saka esaki afó.” (Proverbionan 20:5) Nos tin ku papia ku posibel amigunan tokante temanan serio, temanan ku ta revelá nan berdadero personalidat, motivashon i, sí, nan norma- i balornan. Ki klase di persona nan ta? Nan ta bondadoso òf seku? Básikamente positivo i alegre òf negativo i deskonfiá? Interesá den bienestar di otro hende òf egoista? Konfiabel òf traishonero? Si un persona ta papia na un manera krítiko di otro hende ku bo, kiko lo strob’é di papia malu di bo tras di bo lomba? Hesus a bisa: “For di abundansia di kurason boka ta papia.” (Mateo 12:34) P’esei ora un hende ta papia, nos mester skucha pa sa ki sorto di hende e ta.

E Kosnan Mas Importante Ku Amigunan Mester Tin en Komun

Tin hende ta pensa ku nan amigunan mester tin eksaktamente e mesun gustu ku nan. Un mucha hòmber chikí a bisa firmemente: “Ami nunka no por ta amigu di un hende ku no gusta cheesecake.” Ta bèrdat ku amigunan mester tin sufisiente kos en komun pa nan por komprondé otro, i ta masha importante pa nan tin e mesun normanan moral i spiritual básiko. Pero nan no tin nodi tin un personalidat i antesedente idéntiko. De echo, diferensianan den eksperensia di bida por fortalesé un amistat i trese benefisionan mutuo.

Dos di e mihó ehèmpelnan di amistat den Beibel—esun di Jonatan ku David i di Rut ku Noemí—tabata basá riba e deboshon na Dios i na su prinsipionan ku e personanan aki tabatin en komun.a Un punto interesante ta ku den ámbos kaso e amistat a surpasá e diferensia grandi den edat i antesedente. Pues nan ta siña nos un kos mas tokante amistat: Hendenan hóben i grandi tin hopi di ofresé otro komo amigu.

Kon pa Benefisiá di Diferensia di Edat

Si nos tin amigunan ku ta mas grandi òf mas yòn ku nos, esei por benefisiá ámbos banda. Konsiderá loke algun hóben a bisa basá riba nan eksperensia personal:

Manuela (Italia): “Poko tempu pasá mi a sera amistat ku un pareha adulto. Mi a habri mi kurason pa nan, i loke a hasi mi felis ta ku nan tambe a habri nan kurason pa mi. Nan no a balotá mi djis pasobra mi ta yòn. Esaki a motivá mi pa hala mas serka nan. Nan amistat ta yuda mi masha hopi ora mi tin problema. Mi ta haña ku ora mi papia tokante mi problemanan ku hende di mi mes edat, tin biaha mi amiganan ta duna mi konseho ku no ta bon pensá. Pero mi amigunan mas grandi tin eksperensia, disernimentu i un sierto ekilibrio ku nos komo hóben ainda no tin. Ku nan yudansa mi ta logra tuma mihó desishon.”

Zuleica (Italia): “Na enkuentronan sosial nos ta inkluí no solamente hóbennan sino tambe algun hende ku ta mas grandi ku nos. Personalmente, mi a ripará ku ora hende grandi ku hóbennan ta huntu, nos tur ta sinti nos realmente animá na final di e anochi. Nos ta pasa bon pasobra kada hende ta mira kos un tiki diferente.”

Hende grandinan, boso tambe por mustra interes den hóbennan. Manera e komentarionan ariba ta mustra, hopi hóben ta apresiá mashá e eksperensia amplio ku boso tin i ta disfrutá di boso kompania. Amelia, un biuda di 80 i piku aña, a bisa: “Mi ta tuma e inisiativa pa keda den kontakto ku e hóbennan. Nan energia i vitalidat ta lanta mi ánimo!” E bon resultado di tal animashon mutuo por tin efektonan di largu alkanse. Hopi adulto hóben i felis ta bisa ku gran parti di nan éksito ta bin dor di amigunan ku nan tabatin den nan hubentut ku tabata por lo ménos un tiki mas grandi ku nan i ku a sirbi komo bon ehèmpel pa nan i a duna nan bon konseho.

Kon pa Mehorá Bo Amistatnan

Pa bo tin bon amistat, no nesesariamente bo tin ku haña amigu nobo. Si ya kaba bo tin amigunan ku ta digno, pakiko no wak kiko bo por hasi pa fortalesé bo amistat ku nan? Foral amigunan di hopi tempu kaba ta un tesoro masha presioso, i nos mester trata nan komo tal. Nunka konsiderá nan fieldat komo di ménos importansia.

Mas ku tur kos, kòrda ku berdadero felisidat—i berdadero amistat—ta bin di duna di bo mes, bo tempu i bo rekursonan. E rekompensanan ta surpasá e esfuerso i sakrifisionan ku esaki ta enbolbé. Sin embargo, si bo ta pensa riba bo so ora di skohe amigu, nunka lo bo tin éksito. P’esei ora bo ta konsiderá hende ku lo por bira bo amigu, no limitá bo na esnan ku bo ta atmirá òf esnan ku bo por saka ganashi for di nan. Mustra interes den esnan ku otro hende kisas lo por pasa por haltu òf ku podisé tin problema pa sera amistat. Gaëlle, di Fransia, ta bisa: “Ora nos ta forma un grupo pa bai hasi algu i nos konosé algun hóben ku ta solitario, nos ta invitá nan pa bai ku nos. Nos ta bisa: ‘Bo no tin nodi keda kas bo so. Bo por ban ku nos. Laga nos siña konosé otro.’”—Lukas 14:12-14.

Di otro banda, ora bon hende ta ofresé bo nan amistat, no sea lihé pa rechas’é. Elisa, na Italia, ta remarká: “Podisé un tiki renkor por lanta kabes ora ku bo ta sinti ku den pasado nan a laga bo afó. Kisas bo ta kuminsá pensa: ‘Eigenlijk, amistat no ta dje importante ei pa mi.’ Di e manera ei bo ta sera bo mes, soledat ta kuminsá i bo ta pensa solamente riba bo mes. En bes di buska amigu, bo ta krea un barera.” Pero na lugá di laga temornan infundá òf interes egoista pone bo evitá di sera amistat nobo, habri bo kurason pa otro hende. Nos lo mester ta profundamente gradisidu ora ku hende ta sufisientemente interesá den nos ku nan ke ta nos amigu.

Bo Por Tin Berdadero Amigu

Pero pa nos tin berdadero amigu, nos tin ku hasi mas ku simplemente deseá, spera i lesa artíkulonan manera esakinan. Siña sera amistat ta manera siña kore baiskel. Nos no por siña ningun di dos for di buki so. Nos tin ku sali pafó i praktiká, asta si esei ta nifiká kai un par di biaha. Beibel ta mustra ku e relashonnan di mas firme ta profundamente ankrá den un amistat mutuo ku Dios. Pero Dios no por bendishoná nos esfuerso pa sera amistat si nos no ta hasi e esfuerso ei. Abo ta desididu pa bo tin berdadero amigu? No entregá! Pidi Dios su yudansa den orashon, tuma inisiativa sin egoismo i ser un amigu.

[Nota]

[Kuadro/Plachi na página 11]

Un Palabra na Mayornan

Meskos ku asina hopi otro lès, siñamentu tokante amistat ta kuminsá na kas. Den un situashon ideal, bida di famia lo satisfasé gran parti di un mucha chikí su nesesidat di kompaño. Pero asta bou di tal sirkunstansianan ideal, kontaktonan pafó di e famia tin un gran influensia riba un mucha su pensamentu, sintimentu i komportashon. Wak por ehèmpel kon lihé hopi yu chikí di imigrante ta siña papia un idioma nobo simplemente via kontakto ku otro mucha.

Komo mayor, boso tin e privilegio di yuda boso yunan skohe nan amigunan na un manera sabí. Mucha chikí i adolesente no ta plenamente prepará ainda pa hasi un bon evaluashon sin e guia di mayornan. Sin embargo, tin un problema. Hopi hóben ta hopi mas será ku otro hóbennan ku nan ta será ku nan mayornan òf ku kualke otro hende grandi.

Un faktor ku ta pone tinernan akudí serka mucha di nan pareu en bes di serka nan mayornan, segun algun eksperto, ta debí ku hopi mayor ta duda di nan propio outoridat moral. Mayornan mester karga e responsabilidat ku Dios a duna nan i tuma e inisiativa pa ta—i pa keda—enbolbí ku nan yunan. (Efesionan 6:1-4) Pero kon? Dr. Ron Taffel, un terapista di famia, ta topa hopi mayor ku no sa sigur kon nan tin ku trata ku nan yunan adolesente. El a skirbi ku hopi mayor “ta entregá na un seri di último estilonan di lanta yu ku ta ser promové dor di medionan di komunikashon,” en bes di realmente aktua komo mayor di nan yunan. Dikon mayornan ta rekurí na e kosnan aki? “Nan no konosé nan propio yunan sufisientemente bon pa komprondé nan i trata ku nan.”

Pero no tin nodi ta asina. Mayornan tin ku komprondé ku yunan lo akudí na nan amigunan si na kas nan no ta haña loke nan tin mester. I ta kiko nan tin mester? Segun Taffel, “nan tin mester di loke hóbennan semper tabatin mester: kuido, apresio, siguridat, reglanan bon kla i un splikashon kla di loke ta ferwagt di nan i e sintimentu di ta pertenesé na e famia. E tragedia di nos tempu ta ku adultonan no ta satisfasé e nesesidatnan básiko aki di mayoria adolesente i adolesentenan no ta sinti nan realmente ‘na kas’ serka nan propio famia.”

Kon boso por yuda boso yunan kultivá bon amistat? E promé paso pa pensa ariba ta boso propio manera di biba i boso amistatnan. E metanan i e estilo di bida di boso i di boso amigunan ta noble i inegoista? Nan ta spiritual i no materialista? Douglas, un ansiano kristian i tata, a bisa: “Echo ta bisa mas ku palabra, i bo yunan lo imitá e aktitutnan i akshonnan ku nan ta opservá den bo, den bo amigunan i den e yunan di bo amigunan.”

Asta hopi bestia, riba instinto i ku frekuensia ferosmente, ta protehá nan yunan for di otro kriaturanan peligroso. Un eksperto di ber a informá: “Mama ber ta famoso pa e echo ku nan ta protehá nan yunan for di tur kos ku nan ta sinti ta un menasa.” Akaso mayornan humano mester hasi ménos? Ruben, di Italia, ta bisa: “Mi mayornan a rasoná ku mi for di e Skritura. Nan a yuda mi komprondé ku tabata mihó pa mi evitá sierto tipo di asosiashon. Mi promé reakshoná tabata: ‘Lag’i nèk! Mi no por tin ni amigu!’ Pero tempu a duna nan rason, i grásias na nan pasenshi, mi a ser protehá.”

Tambe, komo mayor, tuma e inisiativa pa pone boso yunan den kontakto ku personanan ku ta bon ehèmpel i ku lo yuda nan fiha bon meta pa nan mes. Francis, un yònkuman eksitoso i felis, ta kòrda: “Mi mama a ripará ku nos, su yu hòmbernan, mayoria biaha tabata hasi kos nos ku nos. P’esei el a yuda nos dor di invitá amigunan ku tabata aktivo den e sirbishi kristian di tempu kompletu pa bin nos kas. Di e manera ei nos a siña konosé nan i sera amistat ku nan, ei mes den nos propio kas.” Mediante e tipo di esfuersonan ei di boso parti, boso yunan su bida na kas por bira un kuna kaminda bon amistatnan ta nase i krese.

[Plachi na página 9]

Opservá kon posibel amigunan ta komportá nan mes

[Plachi na página 10]

Amistatnan sin motibunan egoista ta prosperá apesar di diferensia di edat i antesedente