Hóbennan cu un Futuro Sigur

“MES horibel i repugnante cu cualkier [caso di violacion] por ta”—asina e hues presidente di un huicio recien a describí e crímen. Un gèng di ocho tiener, entre 14 pa 18 aña di edad, a sinta warda un señora turista den un área den stad di Londen, a viol’é vários bes i despues a tir’é den un canal di awa ei cerca maske el a bisa cu e no por landa. Ta di comprendé cu mama di un dje tienernan a declará cu el a keda hororisá ora el e mira na television e reportahenan di noticia di loke su yu homber a haci.

Lamentablemente, e incidente aki ta reflehá loke ta pasando den sociedad awe. Brutalidad a bira gewoon, sea cu ta den actividad criminal, pleitu doméstico of e conflictonan étnico n’e paisnan Balkan, Africa central i occidental, i otro partinan. Hóbennan ta lanta meimei di condicionnan asina, of hopi bes nan ta tende di nan. No ta nada straño anto, cu hopi hóben ta bira duru, ta “sin cariño natural” i “sin dominio propio.”—2 Timoteo 3:3.

“Feros”

Ora apostel cristian Pablo a skirbi su segundo carta na su compañero anciano Timoteo, Roma tabata e poder mundial dominante. Crueldad i salbahismo a prevalecé den e arenanan romano. Tog, Pablo a spierta cu den futuro, tempu lo a bira “duru pa trata cuné.” (2 Timoteo 3:1) Interesante ta cu e palabra griego cu ta describí e tempu aki como “duru pa trata cuné” ta encerá e pensamentu di cu e ta “feros.” Un incidente durante Jesus su ministerio terenal, mas cu 30 aña promé cu Pablo su carta, ta mustra kico tabata responsabel pa parti dje ferosidad den su tempu.

Jesus a caba di yega cu boto n’e costa oost di Laman di Galilea. Ora el a baha na cantu, el a hañ’é confrontá cu dos homber. Nan aparencia salbahe i nan gritamentu a mustra cla cu algu tabata sumamente robes cu nan. Nan tabata “feros den extremo,” eigenlijk, poseí pa demoño.a Loke nan a grita tabata bini di spiritunan malbado cu a controlá nan accionnan violento. “Kico nos tin di haci cu bo, Yu di Dios?” e hombernan a grita. “Bo a bini aki pa tormentá nos promé cu e tempu señalá?” E spiritunan malbado cu a poseí e dos hombernan ei tabata sa masha bon cu Dios ya caba a fiha un tempu pa ehecutá su huicio riba e demoñonan. Esaki lo a nificá nan destruccion eterno. Pero tanten nan tabata ehercé nan abilidadnan superhumano pa instigá violencia feros. Solamente Jesus su accion milagroso di expulsá e demoñonan ei a trece alivio p’e dos hombernan.—Mateo 8:28-32; Hudas 6.

Ora hende awe, incluyendo hóbennan, ta actua den un manera loco, ta bon pa nos corda e incidente ei. Di con? Pasobra den e siglo 20 aki, nos ta enfrentá un peliger similar, manera e último buki di Bijbel, Revelacion, ta splica: “Ai dje tera i di laman, pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.” (Revelacion 12:12) Ripará, por fabor, cu e humiyacion aki di Satanas ta ser compañá cu “gran rabia” pasobra e sa cu su tempu ta corticu.

Bou di Atake

Manera e páginanan dje revista aki a mencioná hopi bes, aña 1914 a mira e entronisacion di Cristo Jesus como Rey dje Reino celestial di Dios. Mesora Jesus a tuma accion contra Dios su enemigu principal, Satanas. Pues, Diabel i su demoñonan a ser sacá for di shelu, i awor nan ta concentrá nan atencion riba e tera aki. (Revelacion 12:7-9) Awor cu su área di influencia ta masha restringí, Satanas “ta cana rond manera un leon cu ta grita, buscando un hende pa devorá.” (1 Pedro 5:8) Ken ta víctima fácil p’e? No ta di comprendé cu esei lo ta foral esnan cu falta experencia den bida i den relacionnan humano? Pues hóbennan djawe a bira e blanco di Diabel. Via hopi di nan música i actividadnan di tempu liber, nan ta ser manipulá fácilmente dor di Diabel.—Efesionan 6:11, 12.

Asta ora hóbennan ta purba haci algu cu nan bida, nan ta haña nan strobá. Desde fin di Guera Mundial II, hende den hopi pais cu anteriormente a pasa necesidad den guera a purba compensá esei dor di duna nan famia un estilo di bida ricu. Posesion material, tempu liber i entretenimentu sin restriccion a bira metanan principal. Como consecuencia, hopi a sufri. Pablo a spierta Timoteo: “Esnan cu ta determiná di bira ricu ta cai den tentacion i un las i hopi deseo insensato i perhudicial . . . Pasobra amor pa placa ta rais di tur sorto di cos perhudicial, i percurando pa realisá e amor aki algun . . . a hinca nan mes tur caminda cu hopi dolor.” (1 Timoteo 6:9, 10) En general, nos ta haña e hendenan dje sociedad materialista djawe ta sufri di hopi dolor económico, financiero i emocional. Entre nan tin hopi hóben, víctimanan dje táctica aki di Dios su enemigu principal.

Sin embargo, felismente tin bon noticia. I e ta trata di hóbennan, esnan cu tin dilanti nan un futuro sigur. Con esaki por ta?

Busca i Lo Bo Haña

Hopi hóben tin idealnan haltu. Nan ta rechasá e normanan deteriorando cu ta comun entre adultonan. Nan ta repugná cu e inhusticia i actitud sin heful di políticonan i comerciantenan hambrá pa poder. Si bo ta yong, kisas ta asina bo ta sinti.

Tuma Cedric, un yoncuman rond di 18 aña, kende su experencia no ta único.b Como mucha, e tabatin miedu di hopi cos, incluyendo miedu di morto. E tabata puntra su mes kico ta e propósito di bida. Ora e tabatin 15 aña i ainda no por a haña contesta pa su preguntanan, el a conformá su mes cu contemplá e nificacion di bida den compania di otro hóbennan idealista. “Nos tabata huma droga i sinta papia oranan largu,” e ta corda. “Bo a kere cu tur hende tabata pensa mescos cu bo, pero ningun hende tabatin contesta.”

Cedric, mescos cu hopi hóben, a anhelá excitacion. Usa droga so no a satisfac’é. Pronto el a hañ’é enbolbí den hortamentu i traficacion di droga. Asina mes el a sigui busca retonan nobo. El a cuminsá horta riba pedido. E ta admití: “Esei tabata duná mi un kick. Pero nunca mi a horta algu for dje hende comun. Si mi a joyride un auto, mi tabata lagu’é despues den bon condicion. Si mi a drenta pa horta den un negoshi, esei tabata solamente caminda mi tabata sa cu nan tabatin seguro. Esei a yudá mi hustificá mi accionnan.” Manera bo por a verwagt, Cedric a cai cerá.

Cedric ta corda: “Mark, un otro prezu, a papia cu mi. Riparando cu mi tabatin un tatuahe di un crus grandi riba mi brasa, el a puntrá mi di con mi tabatin e. El a pensa cu esei mester tabatin balor religioso pa mi.” Un par di siman despues, Mark a duna Cedric un ehemplar dje buki Bo por biba pa semper den Paradijs riba tera.c “‘Bo por biba pa semper’—e par di palabranan ei a tocá mi mesora. Esei ta loke semper nos a papia di dje, pero nunca nos por a descubrí e berdad di esei.” Despues di hopi combersacion cu un Testigo di Jehova cu tabata bishitá e prizon, Cedric a bin realisá cu loke el a aspirá tabata alcansabel—pero solamente na e manera di Dios.

“Una bes mi a stop di asociá cu mi amigunan di ántes, mi a haci progreso rápido,” Cedric ta comentá. Su progreso den comprendimentu i den haña berdadero felicidad no tabata fácil. E ta bisa: “Ainda mi ta trahando pa haci mas progreso. Mi tin cu tene cuidou cu e manera cu mi ta pensa.” Sí, awor Cedric ta comprendé cu ser un idealista a hib’é den un trampa di Diabel, pensando cu e por a alcansá su metanan solamente dor di participá den actividadnan cu ta drei rond di excitacion.

Felismente, Cedric tin basta tempu for di prizon, i e ta disfrutá regularmente di compañerismo cu otronan cu a haña loke nan tabata busca. Awor e ta un Testigo di Jehova i ta compartí nan speransa di biba den Paradijs aki riba tera. Tambe e ta anticipá e fin di influencia satánico den tur su diferente formanan.

Claro cu no ta hóbennan manera Cedric so tin un futuro sigur; otronan a ser criá dor di mayornan piadoso, cu a inculcá den nan yunan un amor pa berdad di Bijbel.

Entrenamentu Piadoso Ta Duna Recompensa

“Entrená un mucha homber conforme cu e caminda p’e; asta ora e bira bieu lo e no desviá for di dje,” rey sabí di antigwedad, Sálomon, a skirbi. (Proverbionan 22:6) Esaki a resultá di ta cierto den e caso di hopi hóben cu di henter alma a scoge pa sigui e norma di Bijbel.

Sheila, Gordon i Sarah a haci esaki. Nan ta corda cu nan mayornan a duna hopi importancia na obedecé e mandamentu di Cristo pa ‘bai i haci disipel’ dor di predicá e bon nobo di Reino. (Mateo 24:14; 28:19, 20) “Den cualkier decision cu nos mester a tuma, ami cu Mama tabatin custumber di puntra otro: ‘Con lo e afectá e trabou di predicá?’” Sheila ta corda. “Nos a keda sin haci hopi proyecto dor cu nos a razoná asina,” e ta admití, agregando, “pero ki bendicionnan nos tabatin!” Asta despues cu nan a pasa henter un dia bishitando cas di hende cu e bon nobo, Sheila cu su mama a lastra bai cas cantando. “Mi goso tabata completo,” e ta bisa. “Te ainda mi por sintié.”

Gordon ta corda hopi diasabra anochi dushi. “Mi tabata ser invitá na cas dje ancianonan di congregacion, caminda nos tabatin kwesnan di Bijbel agradabel i combersacionnan spiritual. Nos a ser animá pa memorisá versículonan for di Bijbel, papia libremente riba tópiconan bíblico, conta experencia di predicacion i tende con e trabou di Reino tabata expandé,” Gordon ta corda. “Tur e cosnan aki a yudá mi pone un bon fundeshi i cultivá amor pa Jehova Dios.”

Sarah tin recuerdonan felis di anochinan cu el a pasa cu Testigonan cu tabata di bishita. “Nos tabata come huntu. Despues, pa terminá e dia, nos tabata toca piano, compañando esnan cu tabata canta canticanan tocante e Reino di Dios. Música realmente a yuda nos mashá, foral durante nos añanan escolar, pasobra esei a permití nos haci cosnan huntu como famia.”

Naturalmente, no ta tur hóben cu ta busca pa agradá Jehova tin circunstancianan di famia ideal. Sin embargo, asociacion íntimo cu otro famianan Testigo den e congregacion ta duna nan siguridad i ta laga nan sinti como parti di un famia.

Atesorá un Fundeshi Sigur pa e Futuro

Hóbennan awe tin cu scoge. Nan por sigui cu e mundu malbado aki den su rumbo bela yen pa ser destruí den e binidero “tribulacion grandi” cu Jesus a predicí di dje. Of nan por “pone nan confiansa den Dios mes i . . . warda su propio mandamentunan,” manera e salmista Asaf a canta bou di inspiracion. Obedencia na Dios lo prevení nan di bira “un generacion terco i rebelde, un generacion cu no a prepará nan curason i kende nan spiritu no tabata digno di confiansa cu Dios.”—Mateo 24:21; Salmo 78:6-8.

Den e mas di 80.000 congregacionnan di Testigo di Jehova rond mundu, lo bo haña hopi hóben cu bo por admirá. Nan a haci caso di Pablo su conseho n’e hóben Timoteo “pa traha na loke ta bon, pa ta ricu den obranan excelente, pa ta generoso, cla pa compartí, atesorando pa nan mes cu siguridad un fundeshi excelente pa futuro.” Como resultado, nan tin awor “un gara firme riba e berdadero bida.” (1 Timoteo 6:18, 19) Asistí na nan reunionnan i asina haña sa mas tocante e cristiannan berdadero aki. Anto bo tambe por tin e speransa di un futuro sigur.

[Nota]

[Plachi na página 7]

Spiritunan malbado a haci e hombernan cu Jesus a cura “feros den extremo”

[Plachi na página 8]

Edificando “un fundeshi excelente pa futuro”