Edukashon i Rikesa Por Garantisá Bo un Futuro Sigur?

Hopi hende ta pensa ku si bo tin un bon edukashon i bo ta riku, lo bo tin un futuro sigur. Nan ta pensa ku si un persona bai universidat lo e bira un mihó trahadó, un mihó miembro di famia i un mihó siudadano. Nan ta pensa tambe ku si bo tin un bon edukashon lo bo haña un bon trabou, i ku hende ku ta gana hopi plaka lo ta felis.

UN DESISHON KU HOPI HENDE TA TUMA

Wak kiko Zhang Chen, un hòmber di China a bisa: “Mi tabata kere ku mi mester a bai universidat pa sali for di pobresa i ku un bon trabou lo a garantisá un bida felis.”

Hopi hende ke studia na universidatnan konosí, kisas asta na otro pais, pa nan haña un mihó bida i pa nan tin un futuro sigur. Esaki tabata mashá komun te ora ku COVID-19 a hasié difísil pa hende biaha. Mas o ménos dies aña pasá un organisashon a hasi un estudio, i nan a mustra ku mas ku mitar di tur studiante ku ta studia na otro pais ta di Asia.

Hopi biaha mayornan ta hasi sakrifisio grandi pa nan yunan bai universidat na otro pais. Qixiang, di Taiwan, a bisa: “Mi mayornan no tabata riku, pero nan a manda ami i mi tres rumannan bai studia na Merka.” Pa paga pa e tipo di edukashon ei Qixiang su famia, meskos ku hopi otro famia, mester a hinka nan mes den un debe grandi.

KIKO TA E RESULTADO?

Un di e hende muhénan ei ta sintá anochi lat dilanti kòmpiuter, kansá i yen di strès. — Hopi hende ku ta pone nan konfiansa den enseñansa superior i rikesa ta keda desapuntá

Ta bèrdat ku edukashon por mehorá nos bida den algun manera, pero no ta semper e ta trese e resultado ku un studiante ta spera. Por ehèmpel, despues di traha duru hopi aña i fia plaka pa paga pa edukashon, hopi hende no por haña e trabou ku nan tabata ke. Rachel Mui a skirbi den e revista di Singapur Business Times: “Mas i mas hende ku gradua di universidat no por haña un trabou.” Jianjie, un hòmber bon studiá ku ta biba na Taiwan, a bisa: “Hopi hende ta haña nan fòrsá pa aseptá un trabou ku nan no a studia p’e.”

Asta hende ku logra haña un trabou ku nan a studia p’e por realisá ku nan bida no a resultá manera nan a spera. Ora Niran di Tailandia a bini bèk for di universidat na Europa, e sí a haña un trabou ku el a studia p’e. Pero nota kiko el a bisa: “Manera mi a ferwagt, mi edukashon a yuda mi haña un trabou ku bon salario. Pero, pa mi por a haña e bon salario ei, mi mester a traha mas tantu ora i mas duru. Ku tempu, e kompania a kita hopi hende for di trabou, inkluyendo ami. Mi a realisá ku ningun trabou por garantisá bo un futuro sigur.”

Asta hende ku tin hopi plaka i ku ta parse di tin un bida sigur tin ku trata ku problema di famia, malesa i un ekonomia instabil. Katsutoshi di Hapon a bisa: “Mi tabatin hopi plaka, pero ainda mi no tabata felis pasobra otro hende tabata yalurs riba mi i tabata trata mi malu.” Lam, un señora ku ta biba na Vietnam, a bisa: “Hopi hende ta purba di gana hopi plaka, pasobra nan ta pensa ku esei lo yuda nan tin un bida sigur. Pero hopi bes esei ta trese mas preokupashon i nan ta asta bira malu i deprimí.”

EDUKASHON I PLAKA SO NO TA SUFISIENTE

Ta bèrdat ku hende mester di un edukashon básiko i plaka pa nan por perkurá pa nan mes i nan famia. Sinembargo, e kosnan akí no ta sufisiente pa garantisá bo un futuro sigur. Dikon nò? Wak kiko e Skritura Santu ta bisa.

ENSEÑANSA SUPERIOR NO SEMPER TA GARANTISÁ ÉKSITO

“No semper hende ku ta kore duru ta gana un kareda. . . . No ta tur hende inteligente ta riku, i no semper hende ku konosementu tin éksito, pasobra kalamidat i suseso inesperá ta alkansá tur hende.” —EKLESIÁSTES 9:11, NW.

Asta e hendenan mihó studiá kisas lo no tin éksito den bida, pasobra tin hopi kos ku ta fuera di nan kontrol. Sin importá kuantu edukashon un persona tin, si tin problema ekonómiko òf polítiko den su pais òf si hende tin prehuisio kontra dje, lo ta difísil pa e ta eksitoso.

RIKESA POR TA TEMPORAL

“No kansa bo kurpa pa rikesa; stòp di preokupá pa esei. Ora bo pone bo bista riba dje, e no t’ei mas. Pasobra rikesa siguramente ta kria hala pa su mes, manera un águila ku ta bula bai laira.” —PROVERBIONAN 23:4, 5.

Plaka por trese un grado di siguridat, pero e siguridat ei ta temporal. Bo por pèrdè tur bo plaka den un fregá di wowo. Desaster natural, manera temblor, kandela di mondi i orkan por laga un persona sin plaka i sin kaminda di biba.

PLAKA HOPI BES TA KOUSA PROBLEMA

“Hende riku ku nunka no tin basta no por drumi trankil.”—PREDIKADOR [EKLESIÁSTES] 5:12, BPK.

Esei ta loke a pasa ku Franklin, un hòmber ku ta biba na Hong Kong. E tabata bon studiá, i e tabatin un bon trabou. Despues, el a bira manager. El a bisa: “E strès a kuminsá afektá mi salú, mi a kuminsá preokupá asina tantu ku mi no por a drumi.” Dado momento e no tabata por mas. El a bisa: “Mi a kuminsá puntra mi mes dikon mi ta hasiendo esaki, i mi a kuminsá pensa mas tokante e propósito di bida.”

“No mata kurpa pa bira riku.”—PROVERBIONAN 23:4, BPK.

Meskos ku Franklin, hopi hende a realisá ku tin kos mas importante den bida ku enseñansa superior i rikesa. En bes di enfoká riba kos material, algun hende ta buska un mihó futuro dor di purba di ta un bon hende i hasi kos bon pa otro hende. Esei lo garantisá bo un futuro sigur? E siguiente artíkulo lo kontestá e pregunta ei.