Conseho Sabí di un Mama

“Scucha, mi yu, na e disiplina di bo tata, i no bandoná e ley di bo mama.”—Proverbionan 1:8.

NOS mayornan—nos tata cu mama—por ta fuentenan balioso di animacion, apoyo i conseho. E buki bíblico di Proverbionan ta conta nos di un cierto rey hóben, Lemuel, cu a ricibí un “mensahe di peso” como “coreccion” cerca su mama. E palabranan aki ta registrá na Proverbionan capítulo 31, i nos tambe por beneficiá dje conseho sabí dje mama aki.—Proverbionan 31:1.

Conseho Apropiado pa un Rey

Lemuel su mama ta cuminsá cu diferente pregunta cu ta lanta nos interes: “Kico mi ta bisando, o mi yu, i kico, o yu di mi barica, i kico, o yu di mi votonan?” E echo cu e mama a ripití su rogamentu tres bes ta demostrá con intensamente interesá e tabata pa su yu presta atencion na su palabranan. (Proverbionan 31:2) Su interes den e bienestar spiritual di su yu, ta sirbi como un excelente ehempel pa mayornan cristian awe.

Relacioná cu e bienestar di su yu homber, kico por preocupá un mama mas cu e paranda i entrega desenfrená na, manera nan ta bisa popularmente, biña, muher i cantica? Lemuel su mama a papia stret: “No duna bo energia vital na hende muher.” E ta catalogá conducta inmoral como “loke ta hiba na eliminá reynan.”—Proverbionan 31:3.

No mester pasa bebementu di mas por alto. “No ta pas pa reynan, o Lemuel, no ta pas pa reynan bebe biña,” e ta spierta. Con un rey por husga bon i cu mente cla i no “lubidá loke ta decretá i troce e caso di cualkier dje yunan di afliccion” si constant e ta burachi?—Proverbionan 31:4-7.

Al contrario, dor di keda liber di tal bicio, e rey lo por “husga cu husticia i defendé e causa di esun afligí i di e pober.”—Proverbionan 31:8, 9.

Aunke kisas hóbennan cristian no ta “rey” awe, e conseho sabí di Lemuel su mama ta mésun oportuno, si no ta mas. Abusu di alcohol, uso di tabaco i inmoralidad sexual ta plamá entre hóbennan djawendia, i ta vital pa hóbennan cristian paga tinu ora nan mayornan ta duna nan “mensahe di peso.”

Un Esposa Capas

Mamanan tin derecho di ta preocupá cu e prospectonan matrimonial di nan yu hombernan cu ta birando adulto. Siguientemente, Lemuel su mama ta dirigí su atencion riba e cualidadnan di un esposa ideal. Sin duda, un yoncuman lo beneficiá mashá si e considerá un hende muher su punto di bista riba e asuntu importante aki.

Den versículo 10, “un esposa capas” ta ser igualá cu coralnan precioso i raro, cu den tempu bíblico bo por a obtené solamente cu hopi esfuerso. Mescos tambe, haña un esposa capas ta exigí esfuerso. En bes di bula casa purá, un yoncuman lo haci bon di tuma su tempu pa scoge. E ora ei, lo ta mas probabel cu lo e duna gran balor na e preciosidad cu e haña.

Relacioná cu un esposa capas, Lemuel a ser bisá: “E curason di su doño a pone confiansa den dje.” (Versículo 11) Cu otro palabra, e no tin cu insistí cu su esposa mester haña su aprobacion pa delaster un cos. Claro cu parehanan casá mester consultá cu otro promé cu nan tuma decisionnan grandi, manera ora ta trata di haci compra costoso of di criamentu di nan yunan. Comunicacion den e áreanan aki ta contribuí na un relacion estrecho entre nan.

Naturalmente, un esposa capas tin hopi cos di haci. Den e versículonan 13 pa 27 tin un lista di conseho i principio cu esposanan di tur edad por usa na beneficio di nan famia. Por ehempel, cu e aumento di costo di paña i accesorio, un esposa capas ta siña pa ta ábil i económico pa asina su famia por ta bon bistí i presentabel. (Versículonan 13, 19, 21, 22) Pa baha gastu di cuminda, e ta planta loke e por i ta haci compra cu cuidou.—Versículonan 14 i 16.

Ta obvio cu e muher aki no ta come “pan di flohera.” E ta traha duru i ta coordiná su trabounan di cas eficasmente. (Versículo 27) E ta faha “su heup cu fortalesa.” Esaki ta nificá cu e ta prepará pa haci trabou duru. (Versículo 17) E ta lanta promé cu solo sali p’e cuminsá su dia di trabou, i e ta traha diligentemente te den anochi. Ta como si fuera e lampi cu ta iluminá su trabou ta semper cendé.—Versículonan 15 i 18.

Riba tur cos, e esposa capas ta un persona spiritual. E ta teme Dios i ta ador’é cu respet profundo i temor. (Versículo 30) Tambe e ta yuda su casá entrená nan yunan pa haci mescos. Versículo 26 ta bisa: “Cu sabiduria” e ta instruí su yunan, i “e ley di bondad amoroso ta riba su lenga.”

Un Esposo Capas

Pa Lemuel atraé un esposa capas, lo e mester a cumpli cu e responsabilidadnan di un esposo capas. Lemuel su mama a record’é di vários di nan.

Un esposo capas lo haña un bon informe for di “e ancianonan dje tera.” (Proverbionan 31:23) Esei ta nificá cu lo e tabata un persona capacitá, onrado, digno di confiansa i temeroso di Dios. (Exodo 18:21; Deuteronomio 16:18-20) Como tal, lo e tabata “conocí den porta di stad,” unda hombernan prominente tabata reuní pa trata e asuntunan dje stad. Pa ta “conocí” como un homber temeroso di Dios, lo e mester tabata razonabel i traha armoniosamente huntu cu e ancianonan dje “tera,” cu kisas ta nificá e distrito of region.

Sin duda, papiando di su mes experencia, Lemuel su mama ta recordá su yu homber dje importancia di mustra aprecio pa su futuro casá. Niun hende riba tera lo ta mas kerí p’e. P’esei, imaginá bo e emocion profundo den su stem ora e ta confesá dilanti tur hende: “Tin hopi yu muher cu a demostrá capacidad, pero abo—bo a subi mas haltu cu nan tur.”—Proverbionan 31:29.

Ta parce cu Lemuel a apreciá e conseho sabí di su mama. Por ehempel, den versículo 1 nos ta ripará cu e ta referí na e palabranan di su mama como si fuera nan ta di dje mes. Pues, el a tuma e “coreccion” di su mama na pechu i a beneficiá for di su conseho. Laga nos tambe beneficiá for dje “mensahe di peso” aki dor di aplicá su principionan den nos bida.

[Plachinan na página 31]

Un esposa capas no ta come “pan di flohera”