Solushon Permanente pa Pobresa

APESAR di e informenan negativo di rònt mundu tokante pobresa, tin hende ku ta keda optimista ku nos por hasi algu konkreto. Por ehèmpel, segun e titular den Manila Bulletin, Banko di Desaroyo Asiátiko a informá ku “Asia por eliminá pobresa den 25 aña.” E banko a rekomendá kresementu ekonómiko komo un manera pa saka hende for di nan pobresa profundo.

Otro organisashonnan i gobièrnunan a bini ku un lista largu di sugerensianan i plannan pa purba resolvé e problema. Entre nan tin: programa di seguro sosial, mihó edukashon, kanselá debe ku paisnan den desaroyo tin serka nashonnan industrialisá, eliminá barera di importashon pa asina e paisnan ku tin porsentahe grandi di hende pober por bende nan produktonan mas fásilmente, i bibienda ekonómiko pa hende pober.

Na aña 2000, e Asamblea General di Nashonnan Uní a pone metanan ku mester wòrdu alkansá pa aña 2015. Den esakinan tabatin eliminashon di hamber i pobresa ekstremo i tambe e desigualdat eksesivo di entrada den vários pais. Pa elevá ku e metanan ei por ta, hopi ta duda ku por alkansá nan den e mundu desuní aki.

Pasonan Práktiko pa Trata ku Pobresa

Mirando ku no tin muchu speransa riba eskala mundial pa berdadero adelanto, unda bo por akudí pa yudansa? Manera nos a menshoná anteriormente, tin un fuente di sabiduria práktiko ku por yuda hende for di awor. Kua fuente? Esei ta Beibel, e Palabra di Dios.

Kiko ta hasi Beibel diferente for di tur otro fuente di informashon? E ta bini di e outoridat supremo, nos Kreadó. Den su páginanan nos Kreadó a inkluí hoyanan di sabiduria—prinsipionan práktiko ku ta aplikabel pa tur hende, na tur lugá i na tur tempu. Aplikashon dje prinsipionan aki por yuda hende pober disfrutá di un bida mas satisfasiente for di awor. Laga nos wak un par di ehèmpel.

Tene un punto di bista apropiá di plaka. Beibel ta bisa: “Sabiduria ta protekshon meskos ku plaka ta protekshon. Ma e bentaha di konosementu ta ku sabiduria ta preservá bida di esnan ku ta pose’é.” (Eklesiastés 7:12) Kiko ta e punto? Plaka no ta tur kos. Ta bèrdat ku e ta duna sierto siguridat. E ta permití nos kumpra sierto kosnan ku nos tin mester, pero e tin su limitashonnan. Tin kosnan di mas balor ku plaka no por kumpra. Ora nos ta rekonosé e echo aki, esei lo yuda nos tene kos material den nan perspektiva korekto, evitando asina e frustrashonnan di esnan kende nan bida ta drei rònt di akumulá mas tantu plaka posibel. Plaka no por kumpra bida, pero ora nos ta aktua sabí esei por protehá bida awor i asta habri e posibilidat di bida sin fin.

Biba segun bo forsa. Nos deseonan no nesesariamente ta meskos ku nos nesesidatnan. Mester duna prioridat na nos nesesidatnan. Nos por konvensé nos mes fásilmente ku nos mester di algu, siendo ku en realidat e ta un deseo i no un nesesidat. E promé kosnan ku e persona sabí lo kubri ku su entrada ta su nesesidatnan inmediato manera kuminda, paña, dak riba kabes, etcetera. Despues, promé ku e gasta sèn riba kualkier otro kos, lo e determiná si loke el a sobra por kubri e kosnan adishonal ei. Den un di su ilustrashonnan, Hesus a rekomendá pa un persona “sinta kalkulá e gastunan promé, pa mira si e tin sufisiente.”—Lukas 14:28.

Na Filipina, Eufrosina, un mayor soltero di tres yu, tabatin e desafio di gana su pan di kada dia i sigui un presupuesto estrikto ya ku su kasá a bai lag’é un par di aña pasá. Den esei el a siña su yunan mira kiko mester a haña prioridat den e presupuesto. Por ehèmpel, e yunan por mira algu ku nan tin gana di dje. En bes di djis bisa nò, e ta rasoná ku nan bisando: “Wèl, si boso kier boso por haña e kos ei, pero ta boso tin ku disidí. Ta pa ún kos e plaka ta yega. Sea nos ta kumpra e kos aki ku boso kier, òf nos ta kumpra poko karni ku bèrdura pa kome banda di nos aros e siman aki. Awor, kua di nan boso kier? Ta boso ta disidí.” Por lo general, e muchanan ta kapta e punto mesora i nan tur ta preferá di haña kuminda en bes di otro kos.

Keda satisfecho. Un otro prinsipio di Beibel ta bisa: “Si nos tin kuminda i paña pa bisti, ku esakinan nos mester ta kontentu.” (1 Timoteo 6:8) Plaka riba su mes no ta trese felisidat. Hopi hende riku ta infelis, miéntras ku hopi hende pober ta masha felis. E últimonan aki a siña keda satisfecho ku djis e simpel kosnan nesesario den bida. Hesus a papia di un ‘wowo simpel’ ku ta enfoká riba e kosnan mas importante. (Mateo 6:22, NW) Esaki ta yuda un persona keda kontentu ku loke e tin. Hopi hende pober ta sinti nan basta satisfecho pasobra nan a kultivá un bon relashon ku Dios i tin un bida di famia felis—kosnan ku plaka no por kumpra.

Esakinan ta djis un par di ehèmpel di e sugerensianan práktiko di Beibel ku por yuda hende pober trata ku nan situashon. Tin hopi mas. Por ehèmpel, evitá bisionan manera humamentu i wega di plaka, kuanan ta malgastá bo rekursonan; wak kiko ta e kosnan mas importante den bida, partikularmente metanan spiritual; kaminda tin poko oportunidat di trabou, purba ofresé un servisio ku otro hende tin mester. (Proverbionan 22:29; 23:21; Filipensenan 1:9-11) Beibel ta rekomendá bo apliká tal “sabiduria práktiko i abilidat di pensa” pasobra “nan lo resultá di ta bida pa bo alma.”—Proverbionan 3:21, 22, NW.

Ounke e sugerensianan di Beibel por duna algun alivio na esnan ku ta lucha ku pobresa, ainda ta keda pregunta tokante futuro. Hende pober ta destiná pa keda den gara di pobresa pa semper? E desigualdatnan entre hende hopi riku i esnan sumamente pober lo kaba un dia? Laga nos analisá un solushon ku hopi hende no ta na altura di dje.

Beibel Ta Duna Motibu pa Speransa

Hopi hende ta rekonosé ku Beibel ta un bon buki. Sin embargo, hopi bes nan no sa mes ku e ta duna informashon spesífiko ku ta mustra ku pronto kambionan grandi lo tuma lugá.

E propósito di Dios ta pa tuma akshon pa resolvé problemanan di humanidat, manera pobresa. Ya ku gobièrnunan humano a resultá di ta inkapas òf no dispuesto pa hasi esei, e intenshon di Dios ta pa remplasá nan. Kon? Wèl, Beibel ta bisa enfátikamente na Daniel 2:44: “E Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.”

Despues ku Dios eliminá e “reinonan” òf gobièrnunan aki, e Gobernante nombrá pa Dios mes lo aktua. E Gobernante ei no ta un hende sino un ser selestial poderoso manera Dios mes, ku ta poseé e kapasidat pa trese e kambionan drástiko ku ta nesesario pa eliminá e desigualdatnan aktual. Dios a skohe su mes Yu pa hasi esaki. (Echonan 17:31) Salmo 72:12-14 ta deskribí loke e Gobernante aki lo hasi, bisando: “E lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é. E lo tin kompashon di e pober i di esun den nesesidat, i e lo salba bida di esnan den nesesidat. E lo reskatá nan bida for di opreshon i violensia; i nan sanger lo ta presioso den su bista.” Ki un futuro maravioso ta warda nos! Por fin lo bin un alivio! E Gobernante ku Dios a nombra lo aktua na fabor di hende pober i esnan di kondishon humilde.

N’e tempu ei hopi problema relashoná ku pobresa lo ser resolvé. Salmo 72:16 (NW) ta bisa: “Lo yega di tin abundansia di grano riba tera; riba tòp dje serunan lo tin sobreabundansia.” Nunka mas lo tin hamber komo resultado di skarsedat di kuminda, falta di plaka òf mal maneho.

Otro problemanan tambe lo ser resolvé. Por ehèmpel, awe un porsentahe haltu di habitante di tera no tin nan mes kas. Sin embargo, Dios ta primintí: “Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome; pasobra manera e dianan di un palu, asina e dianan di mi pueblo lo ta; i mi skohínan lo disfrutá di e obra di nan mannan pa hopi tempu.” (Isaias 65:21, 22) Kada ken lo tin su mes kas i disfrutá di su trabou. Pues Dios ta primintí un solushon total i permanente pa pobresa. Nunka mas lo tin e brecha inmenso entre riku ku pober, ni niun hende ku ta biba den kondishonnan miserabel.

Ora bo tende di e promesanan di Beibel aki pa promé bes, kisas bo ta sinti ku nan no ta realístiko. Sin embargo, ora bo analisá Beibel mas djaserka, bo ta mira ku tur e promesanan di Dios di den pasado a bira realidat. (Isaias 55:11) Pues e punto no ta si nan lo kumpli. Mas bien, e berdadero pregunta ta, Kiko bo tin ku hasi pa benefisiá di dje ora nan tuma lugá?

Abo Lo T’ei?

Siendo ku e gobièrnu ta di Dios, nos mester ta e tipo di hende ku Dios lo aseptá komo siudadano bou di e gobernashon ei. El a splika nos bon kla kon nos por bini na remarke pa esei, i e instrukshonnan ei nos ta haña den Beibel.

E Gobernante nombrá, e Yu di Dios, ta hustu. (Isaias 11:3-5) Pues esnan ku ta haña oportunidat di biba bou di e gobièrnu aki tambe mester ta hustu. Proverbionan 2:21 i 22 ta bisa: “E rektonan lo biba den e tera, i e perfektonan lo keda den dje; ma e malbadonan lo wòrdu kòrtá kitá for di tera, i e traidónan lo wòrdu ranká for di dje ku rais ku tur.”

Tin un manera ku nos por haña sa kon nos por kumpli ku e rekisitonan aki? Sí, tin. Dor di studia Beibel i apliká su instrukshonnan, abo tambe lo por disfrutá di e futuro maravioso aki. (Juan 17:3) Testigunan di Yehova lo ta kontentu pa yuda bo ku e studio ei. Nos ta invitá bo pa probechá di e oportunidat aki pa bo tambe por ta den un sosiedat ku nunka mas lo pasa den pobresa ni inhustisia.

[Plachi na página 5]

Eufrosina: “Un presupuesto estrikto ta yuda mi famia haña loke nan tin mester”

[Plachi na página 6]

Plaka no por kumpra un bon relashon ku Dios ni un famia felis