Sirbi Yehova den “e Dianan Malu”

ERNST, kende ta riba 70 aña a lamentá: “Kada bes mi ta haña mi ku mas problema di salú.”a E lamento akí ta zona konosí? Si bo ta sinti ku bo salú ta bayendo atras i ku bo ta pèrdiendo energia pa motibu di edat, abo sigur lo komprondé e palabranan di Eklesiástes kapítulo 12. Den versíkulo 1, e tempu di behes ta ser yamá “dianan malu.” Ma esei no ke men ku bo tin ku hiba un bida di sufrimentu. Apesar di bo edat, bo por tin un bida felis, sirbiendo Yehova.

Kerido rumannan di edat, boso no ta so den boso pruebanan. Den pasado, hopi sirbidó di Yehova tambe a konfrontá problemanan similar den nan behes. Por ehèmpel, Isak, Yakòb i Ahias a pèrdè nan bista. (Gén. 27:1; 48:10; 1 Rei. 14:4) Rei David tabata keda sinti friu maske kuantu nan a tap’é. (1 Rei. 1:1) Barzilai, ku tabata masha riku, no tabata por a sinti smak di kuminda ni disfrutá di muzik. (2 Sam. 19:32-35) I tantu Abraham komo Noemí a pèrdè nan kasá despues di tabatin hopi aña kasá.—Gén. 23:1, 2; Rut 1:3, 12.

Kiko a yuda kada un di nan keda fiel na Yehova i no pèrdè nan goso? Abraham, den su behes, “a bira poderoso pa medio di su fe” den e promesanan di Dios. (Rom. 4:19, 20) Nos tambe tin mester di un fe fuerte. I fe no ta dependé di nos edat, kapasidat ni sirkunstansianan di bida. Por ehèmpel, patriarka Yakòb a sigui kere firmemente den e promesanan di Dios asta ora e tabata débil, siegu i na kama. (Gén. 48:1-4, 10; Heb. 11:21) Awe tambe nos tin ehèmpelnan similar. Ines, di 93 aña, ta sufri di debilidat muskular. Apesar di esei, e ta bisa: “Tur dia mi ta pensa riba Paradeis; esei ta yena mi ku speransa. Pa mi, kada dia ta un regalo di Yehova.” Esta un bunita aktitut!

Pa nos fortalesé nos fe, nos tin ku hasi orashon, studia Beibel i bai nos reunionnan. Profeta Daniel na edat avansá tabatin e kustumber di hasi orashon tres biaha pa dia i nunka no a stòp di studia e Palabra di Dios. (Dan. 6:10; 9:2) Aunke Ana tabata biuda i di edat avansá, “nunka e no tabata falta tèmpel.” (Luk. 2:36, 37) Si boso ta bai reunion asina ku e kurpa ta duna i ta partisipá den nan, boso lo haña mas ánimo i boso lo ta un animashon tambe pa tur presente. No lubidá ku Yehova semper ta balorá boso orashonnan, aunke ya boso no por hasi dje hopi ei mas p’e.—Pro. 15:8.

Kisas hopi di boso, rumannan fiel, tin masha gana di por tin boso bista pa lesa òf e forsa pa bai reunion, pero boso ta ripará ku esei ta birando mas difísil òf asta imposibel. Kiko boso por hasi? Wèl, konsentrá riba loke sí boso por hasi. Por ehèmpel, si boso no por bai reunion, kisas boso por skucha nan via telefòn. Ingrid, un ruman di 79 aña ku no ta mira bon, ta prepará e reunionnan ku yudansa di e revista na lèter grandi ku un ruman hòmber di kongregashon ta prent p’e.

Probablemente boso tin algu ku otronan lo tin gana di dje: tempu. Dikon boso no ta probechá di e tempu ei pa skucha grabashonnan di lesamentu di Beibel, di nos publikashonnan, di oudiodrama òf di diskurso? Tambe boso por yama boso rumannan na telefòn i kòmbersá ku nan riba temanan spiritual. Asina boso lo disfrutá di “un interkambio di estímulo.”—Rom. 1:11, 12.

Christa, di mas ku 80 aña, ta lamentá: “Ta teribel ora ku bo no por ta aktivo mas manera ántes.” Pues, si boso ta sinti meskos kuné, kiko boso por hasi pa keda ku boso goso? Peter, di 75 aña ta rekomendá: “Tene un punto di bista positivo. Stòp di keda pensa riba loke bo no por hasi mas, i disfrutá di loke sí bo por hasi.”

Kon boso por sigui prediká apesar di boso edat? Heidi no por bai di kas pa kas mas manera ántes, pero ku kasi 90 aña el a siña usa kòmpiuter pa skirbi karta. Algun ruman di edat ta prediká miéntras ku nan ta sinta na un parada di bùs òf den un parke. I esnan ku ta biba den un kas di kuido tin nan mes “teritorio”: e personal médiko ku ta traha einan i e otro habitantenan.

Rei David, te den su behes, ainda a hasi hopi pa adorashon berdadero. El a hasi donashon di plaka i a organisá e trabounan pa konstruí e tèmpel. (1 Kró. 28:11–29:5) Di e mesun manera, boso tambe por keda na haltura di e progreso di e trabou mundial di prediká i apoyá esei te kaminda boso sirkunstansianan ta permití. Kon asina? Wèl, kisas boso por animá e pioneronan i otro publikadónan zeloso di boso kongregashon. Podisé boso por duna nan un regalitu, invitá nan pa un pasaboka òf kuminda simpel òf kompartí algun palabra di animashon ku nan. Otro kos ku boso por hasi ta di pidi Yehova den orashon pa yuda e hóbennan, famianan, sirbidónan di tempu kompleto, rumannan ku ta malu i esnan ku tin responsabilidat di peso den e organisashon.

Nos kerido rumannan di edat, boso i boso sirbishi ta masha balioso pa Yehova. No pensa nunka ku lo e benta boso afó. (Sal. 71:9) Nos Tata den shelu ta stima boso mashá. Pronto, nos tur su edat lo sigui subi, ma sin “e dianan malu” ku behes ta trese kuné awe. Mas bien, nos lo ta yen di energia, nos lo tin salú perfekto i nos lo sigui sirbi nos Dios amoroso, Yehova, pa semper!