Traha pa Conserba bo Famia pe Drenta den e Mundo Nobo di Dios
“Bo mes, O Jehova, lo wárdanan; lo bo conserba cada un, desde e generacion aki te na tempo indefinitivo.”—SALMO 12:7.
1, 2.(a) Con a bai cu algun famía bao di presion dje último dianan? (b) Kico famía cristian por haci pa sobrebiba?
“AWE mi curazón ta yen di gozo!” Esei ta e sclamacion di un anciano cristian yamá Juan. Pakico e tabata asina hubiloso? El a bisa: “Mi yiu homber di 14 aña i mi yiu muher di 12 aña a bautiza.” Pero, no tabata pa esei so cu el a hubila. El a sigi: “Mi yiu homber di 17 aña i mi yiu muher di 16 aña a sirbi como pionero auxiliar durante e aña cu a pasa.”
2 Hopi famía dje pueblo di Jehova Dios també tin bon resultado ora nan ta aplica principio bíblico. Pero, algun ta experimenta problema. Un pareha cristian a skirbi: “Nos tin cinco yiu i ta cada bez mas difícil pa trata cu nan. E sistema bieu a hiba un yiu caba. Ta parce cu nos yiunan tiener ta e blancu principal dje atake di Satanás awe.” També tin pareha cu ta experimenta problema matrimonial serio, cu aveces ta termina den separacion of divorcio. No obstante, famía cu ta cultiva calidad cristian por sobrebiba e “tribulacion grandi” i ser conserbá pa drenta den e binidero mundo nobo di Dios. (Mateo 24:21; 2 Pedro 3:13) Kico, anto, bo por haci pa segura conserbacion di bo famía?
Mehora Comunicacion
3, 4. (a) Ki importante ta comunicacion den e bida di famía, i pakico hopi bez problema ta presenta tocante dje? (b) Pakico esposo mester haci esfuerzo pa ser bon scuchador?
3 Bon comunicacion ta e sanger vital di un famía saludable; ora cu tin falta di esei, tension i presion ta aumenta. Segun Proverbio 15:22: “Unda cu no tin papiamento confidencial, tin frustracion di plan.” E sigiente informe di un consehero matrimonial ta interesante: “E keho mas común di esposa cu mi ta conseha tá: ‘E no ta papia cu mi,’ i ‘E no ta scuchámi.’ I ora mi ta informa nan casá di nan keho, nan no ta tendémi tampoco.”
4 Kico ta e causa di tal falta di comunicacion? Entre otro cosnan, homber i muher ta diferente, i hopi bez nan moda di comunica ta mashá diferente. Un artículo a bisa cu esposo “tin e tendencia di ser directo i práctico” den nan conbersacion, pero “loke [esposa] kier mas cu tur otro cos ta un hende pa scúchanan cu compasion.” Si esei ta causa problema den bo matrimonio, traha pa mehora e situacion. Tal bez esposo cristian tin cu traha duro pa bira un mihor scuchador. Segun Santiago: ‘Tur hende homber mester ta lihé pa scucha, tardá pa papia.’ (Santiago 1:19) Siña pa no duna ordu, duna conseho, tira speech, ora bo esposa simplemente kier “compasion.” (1 Pedro 3:8) Segun Proverbio 17:27: ‘Ken cu ta frena su lenga ta sabí.’
5. Menciona algun manera pa esposo mehora expresion di nan pensamento i sintimento.
5 En cambio, tin un “tempo pa papia,” i kizás bo tin cu siña mehora expresion di bo pensamento i sintimento. (Eclesiastés 3:7) Por ehempel, bo ta generoso elogiando logramento di bo esposa? (Proverbio 31:28) Bo ta mustra gratitud pe trabao duro cu e ta haci dunando apoyo na bo atendiendo ne famía? (Compara cu Colosense 3:15.) Of kizás bo tin cu mehora bo “expresion di cariño.” (Cantar de Cantares 1:2) Tal bez bo ta kere cu esei ta co’i kens na principio, pero e por yuda bo esposa hopi pe sintié sigur di bo amor pe.
6. Kico esposa por haci pa mehora comunicacion den e famía?
6 Kico di esposa cristian? Un esposa a bisa cu su esposo sa cu e ta stimé, pues, no ta necesario pe bisé. Sin embargo, homber també ta gusta tende palabra di aprecio, encomendacion, i elogio. (Proverbio 12:8) Bo tin cu mehora tal expresion asina? En cambio, kizás bo tin cu presta mas atencion na con bo ta scucha. Si bo esposo tin dificultad pa expresa su problema, miedu, of ansiedad abiertamente, bo a siña con pa usa bondad i tacto pa yudé comunicá?
7. Kico por causa discusion den e famía, i con bo por preveni esei?
7 Ta di comprende cu asta pareha cu normalmente ta comunica bon por wel experimenta de bez en cuando un falta di comunicacion. Emocion por neblina razonamento, of un conbersacion calmo por bira un discusion cayente. (Proverbio 15:1) “Nos tur ta trompica hopi bez”; pero, un discusion den e famía apenas ta nifica e fin di boso matrimonio. (Santiago 3:2) Sin embargo, “gritamento i zundramento” ta inapropiado i destructivo di cualkier relacion. (Efesio 4:31) Sea lihé pa haci paz despues di a zundra otro. (Mateo 5:23, 24) Si boso dos ta aplica e palabra di Pablo den Efesio 4:26 na principio, hopi bez boso por evita pleitamento: “No laga solo drenta cu boso den un estado provocá.” Sí, resolve problema mientras cu nan ta chikito i fácil pa resolve; no spera te cu bo emocion ta cla pa pega na candela. Dedica algun minut tur dia pa trata cu asunto di preocupacion i esei por yuda hopi pa mehora comunicacion i evita malcomprendimento.
‘Reglamento Mental di Jehova’
8. Pakico algun hoven por desviá for dje berdad?
8 Ta parce cu algun mayornan ta gusta laga yiu pa nan cuenta. Yiu ta bai reunion i por bai den e sirbishi di feld, pero hopi bez nan no ta establece un relacion personal cu Dios. Cu tempo “deseo di carni i deseo di wowo” por aleha yiu asina for dje berdad. (1 Juan 2:16) Lo ta mashá tristu pa mayornan sobrebiba Armagedón pero perde nan yiunan debí na negligencia di pasado!
9, 10. (a) Kico criamento di yiu “den e disiplina i reglamento mental di Jehova” ta encerra? (b) Pakico ta importante pa permiti yiu expresa nan sintimento libremente?
9 P’sei, Pablo a skirbi: “Boso, tatanan, no irrita boso yiunan, sino sigi críanan den e disiplina i reglamento mental di Jehova.” (Efesio 6:4) Pa bo haci esei, bo mes tin cu conoce cabalmente e ley di Jehova Dios. Bo mester pone bon ehempel den cosnan tal como scogimento di diverticion, estudio personal, asistencia na reunion, i sirbishi di feld. E palabra di Pablo ta indica també cu mayornan mester (1) conoce a fondo nan yiunan i cu nan mester (2) mantene bon comunicacion cu nan. Solamente asina nan por sa unda nan tin mester di “reglamento mental.”
10 Ta natural pa hovenan haci esfuerzo pa haya cierto independencia. Pero, bo tin cu keda alerto pa distingi indicacion claro di influencia di mundo den nan papiamento, pensamento, moda di bistí i di cabei, i den nan scogimento di amigo. Un tata sabí a bisa loke ta pará skirbí den Proverbio 23:26: “Mi yiu, en berdad dunámi bo curazón.” Bo yiunan tin e confianza di expresa na bo nan pensamento i sintimento? Ora yiu no ta tene miedu di recibi squal mesora, nan por keda mas incliná di revela nan berdadero sintimento en cuanto actividad despues di scol, enamoracion, mas educacion, of e berdad bíblico mes.
11, 12. (a) Con boso por usa e ora di come pa mehora comunicacion den e famía? (b) Esfuerzo persistente di mayornan pa mehora comunicacion cu yiu por resulta den kico?
11 Den hopi país famía tin e costumber di come hunto. Pues, e ora di come por percura un bon oportunidad pa tur miembro di famía participa den conbersacion edificante. Demasiadamente, e television i otro obstáculo ta stroba e famía di come hunto. No obstante, pa ora tras ora bo yiunan tabata casi como rehén den scol i bao di influencia di pensamento mundano. E ora di come ta un bon tempo pa comunica cu bo yiunan. Segun un mama: “Nos ta probecha di ora di come pa papia tocante cosnan cu a sosode durante e dia.” Sin embargo, e ora di come no tin cu bira un tempo di duna disiplina bochornoso of saca confesion. Mantene un ambiente trankilu i gozoso!
12 Ta un desafío pa bo logra haci bo yiunan comunica cu bo i kizás por exigi pacenshi sin fin. Pero, cu tempo bo por mira resultado conmovedor. Un mama preocupá ta corda: “Nos yiu homber di 14 aña di edad a keda desconsolá i alehá. Cu nos oracion i persistencia, el a cuminza comunica i papia!”
Estudio di Famía Edificante
13. Pakico entrenamento desde infancia ta tanto importante, i con bo por logra esei?
13 “Reglamento mental” també ta inclui instruccion formal den e Palabra di Dios. Mescos cu Timoteo, tal entrenamento mester cuminza “desde infancia.” (2 Timoteo 3:15) Entrenamento den infancia ta fortalece yiu pa prueba di nan fe cu por bini durante añanan di scol—celebracion di cumpliaña, ceremonia patriótica, of fiesta religioso. Si bo yiunan no ta prepará pa enfrenta tal prueba, nan fe por sucumbi. Pues, probecha di literatura cu e Sociedad Watch Tower a prepara pa muchanan, tal como e buki Scuchando e Gran Maestro i Mi buki di relato bíblico.a
14. Con bo por tene estudio cu e famía cu regularidad, i kico bo a haci pa tene estudio regularmente cu bo famía?
14 Un otro sector cu ta merece nos atencion ta estudio di famía, cu fácilmente por bira un estudio irregular, fastioso of rutinario cu tanto e mayornan como yiu ta considera un carga pisá. Con bo por mehora e situacion? Promé, bo tin cu ‘cumpra tempo’ pe estudio, i no laga ni television ni otro diverticion ocupa su lugar. (Efesio 5:15-17) Un cabez di famía a admiti: “Nos tabatin dificultad teniendo nos estudio di famía regularmente. Nos a purba diferente tempo te cu nos a haya un ora un poco mas laat den anochi cu a conbinínos. Awor nos ta studia regularmente cu e famía.”
15. Con bo por adapta bo estudio di famía na necesidad dje famía?
15 Sigientemente, considera e necesidad particular dje famía. Hopi famía ta gusta prepara nan les simanal di Toren di Vigilancia hunto. Pero, de bez en cuando, bo famía por tin cierto asunto cu mester ta considerá, incluyendo problema cu ta enfrenta yiunan na scol. E buki Loke hovenan sa puntra—contesta práctica i artículo di Toren di Vigilancia i di Despertad! por satisface tal necesidad. Segun un tata: “Si nos ta ripara cierto actitud di nos yiu hombernan cu tin cu ser corrigí, nos ta concentra riba un capítulo den e buki Loke hovenan sa puntra cu ta trata cu e asunto.” Su esposa a agrega: “Nos ta purba di keda flexibel. Si nos a decidi di studia un cierto tema, i un otro necesidad ta presenta, anto nos ta cambia pa trata cuné.”
16. (a) Con bo por keda sigur cu bo yiunan ta comprende loke nan ta siña? (b) Kico bo mester evita generalmente durante estudio di famía?
16 Con bo por keda sigur cu bo yiunan realmente ta comprende loke nan ta siña? Jesús, e Gran Maestro, a haci pregunta tocante punto di bista, tal como: “Kico bo ta pensa?” (Mateo 17:25) Haci mescos i purba di averigua loke bo yiunan realmente ta pensa. Anima cada yiu pa contestá usando nan mes palabra. Naturalmente, si bo ta rabia of ta keda escandalizá na nan expresion francu, nan por nenga di papia francamente cu bo atrobé. Pues, keda calmo. No conberti estudio di famía na un ocasion pa castiga e yiunan. Estudio mester ta gozoso, edificante. Un tata a bisa: “Si mi ta descubri cu un yiu tin un problema, mi ta trata cuné na un otro tempo.” Un mama a agrega: “Ora nos ta trata cu e yiu su so, e no ta sinti bergüenza i ta mas dispuesto pa papia libremente cu si nos a consehé durante estudio di famía.”
17. Kico bo por haci pa estudio di famía ser interesante, i kico a duna bon resultado den bo famía?
17 Por ta un desafío pa bo logra haci bo yiunan participa den estudio di famía, specialmente si nan ta di diferente edad. Yiu mas chikito por ta mas nervioso, inketu, of no por concentra riba e les. Kico bo por haci? Purba di mantene e ambiente dje estudio trankilu. Si bo yiunan no por concentra, haci estudio mas cortico pero mas frecuente. Bo entusiasmo també ta yuda. “Esun cu ta presidi, hacié cu berdadero empeño.” (Romano 12:8) Percura pa tur participa. Yiu chikito por duna comentario riba plachi of contestá pregunta senciyo. Kizás tiener por investiga mas a fondo of haci aplicacion práctico dje informacion.
18. Con mayornan por inculca e Palabra di Dios na tur ocasion, i cu cua resultado?
18 Pero, no limita instruccion spiritual na un ora pa siman. Inculca e Palabra di Dios den bo yiunan na tur ocasion. (Deuteronomio 6:7) Aparta tempo pa scúchanan. Conseha i consolánan ora ta necesario. (Compara cu 1 Tesalonicense 2:11.) Sea compasivo i misericordioso. (Salmo 103:13; Malaquías 3:17) Haciendo esei, bo yiunan lo ser un fuente di ‘placer’ pa bo i lo bo yuda conserbánan pa nan drenta den e mundo nobo di Dios.—Proverbio 29:17.
“Un Tempo pa Hari”
19, 20. (a) Cua papel recreo ta hunga den e bida dje famía? (b) Menciona algun manera cu mayornan por planeá recreo pa nan famía.
19 Tin “un tempo pa hari i un tempo pa dal salto.” (Eclesiastés 3:4) E palabra hebreo pa “hari” por ta traducí també como “celebra,” “hunga,” “diverti,” of “goza.” (2 Samuel 6:21; Job 41:5; Huez 16:25; Éxodo 32:6; Génesis 26:8) Wega por ta probechoso, i ta importante pa mucha i hovenan. Den tempo bíblico mayornan a planeá diverticion i recreo pa nan famía. (Compara cu Lucas 15:25.) Bo ta haci mescos?
20 Un esposo cristian a bisa: “Nos ta probecha di parque público. Nos ta invita algun ruman hoven i ta hunga wega di bala i ta tene picnic. Nan ta gusta e diverticion i ta goza e compañerismo saludabel.” Un otro tata a bisa: “Nos ta planea cosnan pa haci cu nos yiunan. Nos ta bai lamá, ta hunga bala, i ta tuma vacacion. Pero, nos ta mantene diverticion den su debido lugar. Mi ta enfatizá e necesidad di mantene balanza.” Recreo saludabel, tal como haci biahe na dierentuin i museo, por ta un yudanza grandi pa kita yiu for di placer di mundo.
21. Kico mayornan por haci pe yiunan no kere cu nan ta perde algo ora nan no ta celebra dia di fiesta mundano?
21 També ta importante pa bo yiunan no kere cu nan ta perde algo ora nan no ta celebra cumpliaña ni dia di fiesta no cristian. Si bo ta programá diverticion di bo famía, nan por spera cu anhelo hopi tempo gozoso durante e aña. Sí, bon tata no tin mester di dia di fiesta como un ocasion pa expresa nan amor na moda material. Mescos cu e Tata celestial, ‘e sa con pa duna bon regalo na su yiunan,’ espontáneamente.—Mateo 7:11.
Segura un Futuro Eterno pa bo Famía
22, 23. (a) Famía temeroso di Dios por keda sigur di kico mientras cu e tribulacion grandi ta yega cerca? (b) Kico famía por haci afin di ser conserbá pa drenta den e mundo nobo di Dios?
22 E salmista a pidi: “Bo mes, O Jehova, lo wárdanan; lo bo conserba cada un for dje generacion aki te na tempo indefinitivo.” (Salmo 12:7) Siguramente e presion di Satanás lo aumenta—specialmente riba famía di Testigo di Jehova. Sin embargo, ta posibel pa wanta su atake cu ta bira cada bez mas intenso. Cu e yudanza di Jehova Dios i cu determinacion fuerte i trabao duro di parti di esposo, esposa, i yiunan, esta, famía—incluyendo bo famía—bo por tene e speranza di sobrebiba e tribulacion grandi.
23 Esposo i esposa, trece paz i armonía den boso matrimonio, cumpliendo cu e papel cu Dios a asigná na boso. Mayornan, sigi pone bon ehempel pa boso yiunan, cumprando tempo pa dúnanan entrenamento i disiplina cu nan mester asina tanto. Papia cu nan. Scúchanan. Nan bida ta den e wega! Yiunan, scucha i obedece boso mayornan. Cu e yudanza di Jehova Dios boso por logra i segura pa boso mes un futuro eterno den e binidero mundo nobo di Dios.
[Nota]
a Buki grabá riba caset ta disponibel també den algun idioma.
Bo ta Corda?
◻ Con esposo i esposa por mehora nan comunicacion?
◻ Con mayornan por cria yiu den e “reglamento mental di Jehova”? (Efesio 6:4)
◻ Menciona algun manera pa haci estudio di famía edificante i mas interesante.
◻ Kico mayornan por haci pa planeá recreo i diverticion pa nan famía?
[Kuadro na página 16]
Música—Un Influencia Fuerte
Segun e autor di un buki tocante criamento di yiu: “Si mi ta para dilanti un auditorio . . . i consehánan pa bebe burrachi, tuma cocaína, marijuana, of cualkier droga cu ta afecta nan mente, e auditorio lo keda turdí. . . . [No obstante,] hopi bez mayornan ta duna yiu placa pa cumpra disco of caset cu ta apoya abiertamente tal cosnan.” (E buki na inglés Criamento di yiu positivo den un mundo negativo, di Zig Ziglar) Por ehempel, na América hopi hoven ta repiti palabra di cantica di “rap” cu ta trata abiertamente cu relacion sexual. Bo ta yuda bo yiunan scoge música decente pa nan evita tal trampa di Diabel?
[Plachi na página 15]
E ora di come por ta ocasion gozoso cu ta promove unidad i comunicacion den e famía