Laga Nos Defende Nos Fe

“Santificá Cristo como Señor den boso curason, semper cla pa presentá un defensa dilanti tur hende cu ta exigí di boso un motibu p’e speransa den boso.”—1 PEDRO 3:15.

 1, 2. Pakico oposicion no ta sorprendé Testigonan di Jehova, pero kico nan ta deseá?

DEN mayoria pais, Testigo di Jehova por lo general ta conocí como hende onesto i moralmente limpi. Hopi ta mira nan como bon bisiña cu no ta causa ningun problema. Tog, pa ironia, net e cristiannan stimador di pas aki a sufri persecucion inhustu, tantu den tempu di guera como den tempu di pas. E oposicion ei no ta sorprendé nan. En realidad, nan ta verwagt e. Al fin i al cabo, nan sa cu cristiannan fiel den e promé siglo E.C. tabata “obheto di odio.” Pues, pakico esnan cu ta purba ser berdadero siguidó di Cristo awe mester verwagt cu nan lo ser tratá di un manera diferente? (Mateo 10:22) Ademas, Bijbel ta bisa: “Tur esnan cu ta deseá di biba deboto na Dios den asociacion cu Cristo Jesus lo ser persiguí tambe.”—2 Timoteo 3:12.

² Testigonan di Jehova no ta busca persecucion, ni no ta gosa dje contratempunan cu esei por trece, manera boet, encarcelacion of trato cruel. Nan ta deseá na “hiba un bida calmu i ketu” di manera cu nan por predicá e bon nobo dje Reino di Dios sin strobansa. (1 Timoteo 2:1, 2) Nan ta apreciá e libertad religioso cu nan tin den mayoria pais pa cumpli cu nan adoracion, i nan ta haci concientemente loke nan por pa ta “pacífico cu tur hende,” incluso cu gobernantenan humano. (Romanonan 12:18; 13:1-7) Pakico anto, nan ta “obheto di odio”?

 3. Kico ta un motibu pakico hende a odia Testigonan di Jehova inhustamente?

³ Básicamente, hende a odia Testigo di Jehova inhustamente p’e mésun motibunan cu a persiguí e promé cristiannan. Na promé lugá, Testigonan di Jehova ta actua segun nan creencianan religioso den maneranan cu ta haci nan impopular cerca algun hende. Por ehempel, nan ta predicá e bon nobo dje Reino di Dios celosamente. Pero hopi bes hende ta malinterpretá nan celo, ya cu nan ta mira nan predicacion como “combertimentu agresivo di hende.” (Compará cu Echonan 4:19, 20.) Tambe nan ta neutral pa cu política i guera dje nacionnan, i algun biaha hende a malinterpretá esaki como deslealtad na patria di parti di Testigonan di Jehova.—Mikéas 4:3, 4.

 4, 5. (a) Di ki manera Testigonan di Jehova tabata blanco di acusacion falsu? (b) Ken hopi bes tabata e instigadónan principal di persecucion contra Jehova su sirbidónan?

⁴ Na di dos lugá, Testigonan di Jehova tabata blanco di acusacion falsu: puru mentira i presentacion trocí di nan creencianan. Como resultado, den algun pais nan tabata obheto di atake inhustificá. Ademas, dor cu nan ta busca tratamentu médico sin sanger, cu ta na armonia cu nan deseo pa obedecé e mandamentu di Bijbel pa ‘abstené di sanger,’ a catalogá nan incorectamente como “asesino di yu” i “un culto cu ta cometé suicidio.” (Echonan 15:29) Pero echo ta cu Testigonan di Jehova ta duna balor haltu na bida, i ta busca pa obtené e mihó cuido médico disponibel pa nan mes i pa nan yunan. E acusacion cu masha hopi yu di Testigo di Jehova ta muri tur aña como resultado di nenga transfusion di sanger ta totalmente infundá. Ademas, dor cu e berdad di Bijbel no tin e mésun efecto riba tur miembro di famia, hende a acusá Testigonan tambe di ta kibra famia. Sin embargo, esnan cu conocé Testigonan di Jehova sa cu nan ta duna hopi balor na bida di famia i ta purba sigui e mandamentunan bíblico pa esposo i esposa stima i respetá otro i pa yu obedecé nan mayornan sea nan ta creyente of no.—Efesionan 5:21–6:3.

⁵ Den hopi caso, e instigadónan principal di persecucion contra Jehova su sirbidónan a resultá di ta opositornan religioso cu a usa nan influencia riba autoridadnan político i medionan di comunicacion pa suprimí actividad dje Testigonan. Con nos, como Testigo di Jehova, mester reaccioná na tal tipo di oposicion, sea esei ta resultado di nos creencia i prácticanan of debí na acusacion falsu?

“Laga Tur Hende Sa cu Boso Ta Razonabel”

 6. Pakico ta importante pa nos tin un punto di bista balansá di esnan pafó dje congregacion cristian?

⁶ Pa cuminsá, nos mester tin e punto di bista corecto—Jehova su punto di bista—di esnan cu no ta compartí nos conviccionnan religioso. Di lo contrario, nos lo por pone otro hende reaccioná hostil of papia malu di nos innecesariamente. Apostel Pablo a skirbi: “Laga tur hende sa cu boso ta razonabel.” (Filipensenan 4:5) P’esei, Bijbel ta animá nos pa nos tin un punto di bista balansá di esnan pafó dje congregacion cristian.

 7. Kico mantené nos mes “sin mancha di mundu” ta encerá?

⁷ Di otro banda, e Scritura ta spierta nos masha cla pa “mantené [nos] mes sin mancha di mundu.” (Santiago 1:27; 4:4) Aki, e expresion “mundu,” mescos cu na hopi parti den Bijbel, ta referí na e masa di humanidad apartá for di cristiannan berdadero. Nos ta biba meimei dje sociedad di hende aki; nos ta bini den contacto cu nan na trabou, na scol i den bario. (Juan 17:11, 15; 1 Corintionan 5:9, 10) Tog, nos ta mantené nos mes sin mancha di mundu dor di rechasá actitud, manera di papia i conducta cu ta na conflicto cu Dios su camindanan hustu. Tambe ta vital pa nos reconocé e peliger di asociacion íntimo cu e mundu aki, foral cu esnan cu ta mustra falta di respet abierto p’e normanan di Jehova.—Proverbionan 13:20.

 8. Pakico e conseho pa permanecé sin mancha di mundu no ta duna nos ningun base pa menospreciá otro hende?

⁸ Sin embargo, e conseho pa permanecé sin mancha di mundu no ta duna nos ningun base pa despreciá sin mas esnan cu no ta Testigo di Jehova. (Proverbionan 8:13) Corda e ehempel dje lidernan religioso hudiu cu nos a considerá den e artículo anterior. E forma di religion cu nan a desaroyá no a gana fabor cerca Jehova; ni e no a contribuí na bon relacion cu hende no-hudiu. (Mateo 21:43, 45) For di nan punto di bista halsá di nan mes, e hombernan fanático aki a menospreciá hende gentil. Nos sí no ta adoptá un punto di bista trocí asina di hende no-Testigo ni no ta trata nan cu desprecio. Mescos cu apostel Pablo, nos deseo ta pa tur hende cu tende e mensahe bíblico dje berdad gana e fabor di Dios.—Echonan 26:29; 1 Timoteo 2:3, 4.

 9. Ki efecto un punto di bista balansá i bíblico mester tin riba nos manera di papia tocante esnan cu no ta compartí nos creencianan?

⁹ Un punto di bista bíblico balansá mester influenciá nos manera di papia tocante hende no-Testigo. Pablo a instruí Tito pa recordá e cristiannan riba e isla di Creta “pa no papia malu di ningun hende, pa no busca guera, pa ta razonabel, desplegando tur suavedad pa cu tur hende.” (Tito 3:2) Tuma nota cu cristiannan no mester a papia malu di “ningun hende,” ni sikiera dje hendenan no-cristian na Creta, di cua algun tabata conocí pa nan gañamentu, golosidad i flohera. (Tito 1:12) Pues lo no ta bíblico pa nos usa expresionnan di menosprecio ora di referí na esnan cu no ta compartí nos creencianan. Un actitud di superioridad lo no atraé otro hende n’e adoracion di Jehova. Mas bien, ora nos ta mira i trata otronan na armonia cu e principionan razonabel dje Palabra di Jehova, nos ta “dorna e siñansa” di Dios.—Tito 2:10.

Ki Ora pa Keda Ketu, ki Ora pa Papia

10, 11. Con Jesus a demostrá cu e tabata sa ki ora tabata (a) “tempu pa keda ketu”? (b) “tempu pa papia”?

¹⁰ Tin ‘tempu pa keda ketu i tempu pa papia,’ segun Eclesiástes 3:7. E desafio ta sinta anto, aki den: sa ki ora pa ignorá opositornan i ki ora pa papia pa defendé nos fe. Nos por siña hopi for dje ehempel di un persona cu semper tabata perfecto den mustra discrecion: Jesus. (1 Pedro 2:21) E tabata sa ki ora tabata “tempu pa keda ketu.” Por ehempel, ora e sacerdote principal i e ancianonan a acusá Jesus falsamente dilanti Pilato, e “no a contestá.” (Mateo 27:11-14) E no kier a bisa nada cu por a interferí cu e realisacion dje boluntad di Dios p’e. En bes di esei, el a scoge pa laga su obranan papia pa nan mes. E tabata sa cu ni e berdad lo a cambia nan mente i curason orguyoso. Di manera cu el a ignorá nan acusacion, i a nenga di kibra su silencio determiná.—Isaías 53:7.

¹¹ Sin embargo, Jesus tabata sa tambe ki ora tabata “tempu pa papia.” Na cierto ocasion, el a debatí francamente i abiertamente cu esnan cu a critik’é, i a refutá nan acusacionnan falsu. Por ehempel, ora e escriba i fariseonan a purba desacredit’é dilanti un multitud dor di acus’é cu e ta expulsá demoño pa medio di Beelzebub, Jesus a scoge pa no laga e acusacionnan falsu ei para. Cu un lógica devastador i un ilustracion poderoso, el a tumba e mentira. (Marco 3:20-30; mira tambe Mateo 15:1-11; 22:17-21; Juan 18:37) Di igual manera, ora cu a lastra Jesus hiba dilanti Sanedrin, despues di su traicion i aresto, Sumo Sacerdote Caifas a exigí astutamente: “P’e Dios bibu mi ta poné bo bou di huramentu pa bisa nos si bo ta e Cristo e Yu di Dios!” Esaki tambe tabata “tempu pa papia,” pasobra si el a keda ketu, hende lo por a interpretá esei como si fuera e ta desmentí cu e ta e Cristo. Di manera cu Jesus a contestá: “Mi ta.”—Mateo 26:63, 64; Marco 14:61, 62.

12. Kico tabata e circunstancianan cu a impulsá Pablo i Barnabas pa papia cu frankesa na Iconio?

¹² Considerá tambe e ehempel di Pablo i Barnabas. Echonan 14:1, 2 ta bisa: “Den Iconio nan a drenta huntu den e snoa dje hudiunan i a papia di tal manera, cu un multitud grandi di tantu hudiu como griego a bira creyente. Pero e hudiunan cu no a kere a instigá i a influenciá di mal manera e alma di hende dje nacionnan contra e rumannan.” The New English Bible ta bisa: “Pero e hudiunan no-combertí a excitá e gentilnan i a venená nan mente contra e cristiannan.” Dor cu e opositornan hudiu no kier a rechasá e mensahe nan mes, nan a cuminsá un campaña di difamacion pa trata na bira opinion público dje poblacion gentil contra e cristiannan.a Ki un odio profundo nan lo mester tabatin contra cristianismo! (Compará cu Echonan 10:28.) Pablo i Barnabas a haña cu esaki tabata “tempu pa papia,” pa no laga difamacion público kibra e ánimo dje disipelnan nobo. “P’esei nan [Pablo i Barnabas] a dedicá basta tempu papiando cu frankesa pa medio di autoridad di Jehova,” kende a mustra su aprobacion dor di duna nan poder pa efectuá señalnan milagroso. Resultado di esaki tabata cu “algun tabata na fabor dje hudiunan pero otronan na fabor dje apostelnan.”—Echonan 14:3, 4.

13. Ora di trata cu difamacion, generalmente ki ora ta “tempu pa keda ketu”?

¹³ Con anto, nos mester reaccioná ora hende difamá nos? Tur cos ta dependé dje circunstancianan. Algun situacion ta exigí pa nos aplicá e principio cu tin “tempu pa keda ketu.” Esaki ta specialmente e caso ora opositornan decididu purba hinca nos den discusionnan sin sentido. Nos no mag lubidá cu algun hende simplemente no kier conocé e berdad. (2 Tesalonicensenan 2:9-12) No ta bale la pena trata na razoná cu esnan kende nan curason ta fihá orguyosamente den incredulidad. Mas cu esei, si nos tin cu debatí cu tur acusadó falsu cu atacá nos, nos lo por desviá for di un actividad muchu mas importante i recompensador: esun di yuda hende di curason onrado cu realmente kier siña e berdad di Bijbel. Pues ora nos haña nos confrontá cu oponentenan cu ta decididu pa plama mentira tocante nos, e conseho inspirá ta: “Evitá nan.”—Romanonan 16:17, 18; Mateo 7:6.

14. Den ki maneranan nos lo por defendé nos fe dilanti otro hende?

¹⁴ Esaki naturalmente no kier men cu nos no ta defendé nos fe. Al fin i al cabo, tin “tempu pa papia” tambe. Cu bon motibu nos ta interesá den hende sincero cu ta tende hopi crítica difamatorio tocante nos. Nos ta dispuesto pa duna un splicacion cla di nos conviccionnan sincero na otro hende; sí, gustosamente nos ta haci uso dje oportunidad. Pedro a skirbi: “Santificá Cristo como Señor den boso curason, semper cla pa presentá un defensa dilanti tur hende cu ta exigí di boso un motibu p’e speransa den boso, pero haciendo esei huntu cu un genio suave i respet profundo.” (1 Pedro 3:15) Ora hende cu interes genuino pidi nos proba e creencianan cu nos ta atesorá, ora nan puntra nos tocante e acusacionnan falsu cu opositornan ta lanta, ta nos responsabilidad pa defendé nos fe, dunando contesta lógico for di Bijbel. Ademas, nos conducta excelente por ta un gran testimonio. Segun cu observadónan cu mente habrí ta ripará cu di berdad nos ta purba biba na armonia cu e normanan hustu di Dios, nan por mira mesora cu e acusacionnan contra nos ta falsu.—1 Pedro 2:12-15.

Kico di Publicidad Calumniador?

15. Mencioná un ehempel dje manera cu Testigonan di Jehova tabata blanco di informacion trocí den medionan di comunicacion.

¹⁵ Na algun ocasion, Testigonan di Jehova tabata blanco di informacion trocí den medionan di comunicacion. Por ehempel, dia 1 di augustus 1997, un korant ruso a publicá un artículo calumniador cu a pretendé, entre otro, cu Testigonan di Jehova ta rekerí pa nan miembronan ‘rechasá nan esposa, esposo i mayornan categóricamente si esakinan no ta comprendé i no ta compartí nan fe.’ Ken cu conocé Testigonan di Jehova bon, sa cu e acusacion ei ta falsu. Bijbel ta indicá cu cristiannan mester trata miembronan di famia no-creyente cu amor i respet, i Testigonan ta trata na sigui e instruccion ei. (1 Corintionan 7:12-16; 1 Pedro 3:1-4) Sin embargo, a imprimí e artículo ei, i asina a malinformá hopi lector. Con nos por defendé nos fe ora hende ta acusá nos falsamente?

16, 17, i cuadro na página 16. (a) Kico E Toren di Vigilancia a bisa un biaha tocante reaccioná riba informacion falsu den medionan di comunicacion? (b) Bou di ki circunstancia Testigonan di Jehova lo por reaccioná riba informenan negativo den medionan di comunicacion?

¹⁶ Aki atrobe, tin ‘tempu pa keda ketu i tempu pa papia.’ E Toren di Vigilancia a yega di bisa esaki: “Ta e circunstancianan, e instigadó dje crítica i su meta, lo determiná si nos ta ignorá informacion falsu den medionan di comunicacion of si nos ta defendé e berdad via e medionan apropiado.” Den algun caso, lo por ta mihó pa ignorá informenan negativo i asina no duna mas publicidad n’e mentiranan.

¹⁷ Den otro casonan kisas ta “tempu pa papia.” Tal bes a malinformá un periodista of reportero responsabel tocante Testigonan di Jehova i kisas e ta aceptá gustosamente informacion corecto tocante nos. (Mira e cuadro “Ta Corigí un Falsedad.”) Si informenan negativo den medionan di comunicacion lanta prehuicio cu ta stroba nos trabou di predicá, representantenan di sucursal di Sociedad Watch Tower lo por tuma iniciativa pa defendé e berdad usando e medio apropiado.b Por ehempel, por asigná ancianonan cualificá pa presentá e echonan, manera den un programa di television, caminda, si Testigonan di Jehova keda sin presentá, esei lo por nificá cu nan no tin contesta. Testigonan individual ta haci bon di cooperá cu e instruccion di Sociedad Watch Tower i su representantenan den e asuntunan ei.—Hebreonan 13:17.

Ta Defendé e Bon Nobo Legalmente

18. (a) Pakico nos no tin mester di permit di gobiernu humano pa predicá? (b) Ki curso nos ta sigui ora hende nenga nos permit pa predicá?

¹⁸ Nos autorisacion pa predicá e bon nobo dje Reino di Dios ta bini di shelu. Jesus, kende a comisioná nos pa haci e trabou aki, a ricibí ‘tur autoridad den shelu i riba tera.’ (Mateo 28:18-20; Filipensenan 2:9-11) P’esei, nos no tin mester di permit di gobiernu humano pa predicá. Tog, nos ta reconocé cu libertad religioso ta yuda plama e mensahe di Reino. Den paisnan caminda nos tin e libertad pa practicá nos adoracion, nos lo usa e sistema legal pa proteh’é. Caminda nan a nenga nos e libertad ei, nos lo haci esfuerso pa obtené esei den cuadro di ley. Nos obhetivo no ta pa logra un reforma social, sino pa “defendé i establecé e bon nobo legalmente.”c—Filipensenan 1:7.

19. (a) Kico lo por ta e resultado di ‘paga bek na Dios e cosnan di Dios’? (b) Kico ta nos determinacion?

¹⁹ Como Testigo di Jehova, nos ta reconocé Jehova como e Soberano Universal. Su ley ta supremo. Nos ta obedecé gobiernu humano pa motibu di nos concenshi. Asina nos ta “paga bek e cosnan di César na César.” Pero nos lo no permití nada stroba nos cumpli cu un responsabilidad muchu mas importante, esta, ‘paga bek na Dios e cosnan di Dios.’ (Mateo 22:21) Nos ta comprendé completamente cu dor di haci esei nos lo bira “obheto di odio” di parti dje nacionnan, pero nos ta aceptá esaki como parti dje gastu di ser disipel di Jesus. E registro legal di Testigonan di Jehova den siglo 20 ta un testimonio di nos determinacion pa defendé nos fe. Cu yudansa i apoyo di Jehova, nos lo sigui “sin stop siñando i declarando e bon nobo.”—Echonan 5:42.

[Nota]

Bo Ta Corda?

◻ Pakico Testigonan di Jehova ta “obheto di odio”?

◻ Con nos mester mira esnan cu no ta compartí nos creencianan religioso?

◻ Ki ehempel balansá Jesus a pone ora di trata cu opositor?

◻ Ora hende difamá nos, con nos por aplicá e principio cu tin ‘tempu pa keda ketu i tempu pa papia’?

[Kuadro na página 16]

Ta Corigi un Falsedad

“Na Yacuiba, Bolivia, un grupo local di evangelista a pidi un planta di television pasa un película cu sin duda ta apóstatanan a producí. En bista dje mal efectonan dje programa ei, e ancianonan a dicidí pa bishitá dos planta di television i ofrecé pa paga pa nan pasa pa público e videonan Los testigos de Jehová... la organización tras el nombre i La Biblia: Libro de hechos y profecías. Despues cu doño di un radioemisora a mira e videonan di Sociedad, e falsedad den e programa dje apóstatanan a indign’é i el a ofrecé pa pasa propaganda grátis pa Testigonan di Jehova relacioná cu nan binidero congreso di distrito. E asistencia tabata hopi mas haltu cu custumber, i hopi persona di curason onrado a cuminsá haci pregunta sincero ora e Testigonan tabata bishitá nan den e ministerio.”—Anuario de los testigos de Jehová 1997, página 61-2.

[Plachi na página 17]

Na algun ocasion, Jesus a refutá abiertamente e acusacionnan falsu di esnan cu a critik’é