Tin un Tempu pa Tur Kos
Beibel ta bisa: “Tin un tempu stipulá pa tur kos. I tin un tempu pa tur evento bou di shelu.” E eskritor di e palabranan ei, Salomon, e rei sabí di antigwedat, a sigui bisa ku tin un tempu pa nase i un tempu pa muri, un tempu pa konstruí i un tempu pa basha abou, un tempu pa stima i un tempu pa odia. Finalmente el a bisa: “Ki probecho e trahadó tin di loke e ta traha duru p’e?”—Eklesiastés 3:1-9.
ORA algun hende lesa e palabranan ei, nan ta yega na e konklushon ku Beibel ta siña ku tin un tempu predeterminá pa tur kos; ku otro palabra, nan ta kere ku Beibel ta apoyá kreensia di destino. Pero, esei realmente ta e kaso? Beibel ta apoyá e idea ku destino ta determiná tur kos den bida? Siendo ku “tur Skritura ta inspirá pa Dios,” loke nos ta lesa un kaminda den Beibel mester ta armonia ku loke Beibel ta bisa otro kaminda. P’esei, laga nos wak kiko otro versíkulonan di Beibel, e Palabra di Dios, tin di bisa di e asuntu akí.—2 Timoteo 3:16.
Tempu i Suseso Imprevisto
Mas aleu, Salomon a skirbi den e buki di Eklesiastés: “Atrobe mi a mira bou di solo: ku e kareda no ta pa esun mas lihé, i e bataya no ta pa e guereronan, ni pan no ta pa e sabínan, ni rikesa pa esnan ku tin disernimentu, ni fabor pa e hendenan ku abilidat.” Dikon? El a splika: “Pasobra tempu i [“suseso imprevisto,” NW] ta alkansá nan tur.”—Eklesiastés 9:11.
Salomon no a indiká ku tur kos den bida ta predeterminá; mas bien, el a mustra ku hende no por pronostiká ku eksaktitut e resultado di loke nan ta purba di hasi, “pasobra tempu i suseso imprevisto ta alkansá nan tur.” Hopi biaha, un kos ta pasa ku un hende djis pasobra e tabata na e lugá robes na e momento robes.
Tuma por ehèmpel e deklarashon: “E kareda no ta pa esun mas lihé.” Kisas bo ta kòrda òf a yega di lesa tokante e famoso kareda di 3000 meter pa hende muhé, ku a tuma lugá durante e Weganan Olímpiko di 1984 na Los Angeles, California, Merka. Algu inusual a sosodé durante e kareda ei. Dos koredó tabatin e speransa di gana e medaya di oro; ún tabata representá Inglatera i e otro Merka. Sinembargo, na mitar di e kareda, nan a dal den otro riba pista. Un di nan a kai i a sali for di e kareda; e otro a keda asina desanimá ku el a terminá e kareda na di shete lugá.
Ta destino a determiná e resultado ei? Algun hende kisas ta bisa ku sí. Pero ta klaru ku ta debí na e choke—un aksidente ku ningun hende por a premirá—nan tur dos a pèrdè e kareda. Awor, ta destino a determiná pa nan dal den otro? Atrobe, algun hende kisas ta bisa ku sí. Sinembargo, komentaristanan a bisa ku e aksidente a sosodé debí na e kompetensia intenso ku tabatin entre dos atleta fuerte, kendenan tabata purba gana e kareda. Manera Beibel ta bisa: “Tempu i suseso imprevisto ta alkansá nan tur.” No ta importá kon bon prepará un hende ta; semper por tin faktornan inesperá ku por kambia e resultado di un asuntu. I esei no tin nada di haber ku destino.
Kiko Beibel ke men anto ora e bisa ku “tin un tempu stipulá pa tur kos”? Tin algu ku nos por hasi pa influensiá e resultado final di nos bida—nos futuro?
E Mihó Tempu pa Kada Aktividat
E eskritor di Beibel no tabata papia tokante destino di hende individual ni di e resultado final di hende su bida. Mas bien, e tabata papia tokante Dios su propósito i ki efekto esaki lo tin riba humanidat. Kon nos por sa esei? Básikamente, esei ta loke e konteksto ta bisa nos. Despues di a menshoná vários kos ku ta parse di tin “un tempu stipulá,” Salomon a skirbi: “Mi a mira e tarea ku Dios a duna e yunan di hende pa okupá nan mes kuné. El a traha tur kos apropiá na su tempu.”—Eklesiastés 3:10, 11.
Dios a duna hende hopi tarea òf kos pa hasi i Salomon a menshoná un kantidat di nan. Ademas, Dios a duna nos boluntat liber pa skohe kiko nos ke hasi. Sinembargo, pa kada tarea òf trabou tin un tempu apropiá òf faborabel ku ta duna e mihó resultado. Tuma por ehèmpel e palabranan di Salomon na Eklesiastés 3:2: “Un tempu pa planta i un tempu pa ranka ku rais ku tur, loke ku a wòrdu plantá.” Kunukeronan sa ku tin un tempu apropiá pa kada kos ku nan ke planta. Kiko si un kunukero ta ignorá e echo simpel ei i ta planta na e tempu robes? E por kulpa destino si e no haña un bon kosecha, maske el a traha duru pa logr’é? Klaru ku nò! Simplemente, e no a planta na e tempu apropiá. E kunukero lo a haña bon resultado si el a sigui e areglo natural di kosnan ku e Kreador a establesé.
Pues, loke Dios a determiná no ta e destino di kada hende ni e resultado final di tur aktividat, sino sierto prinsipionan ku ta goberná aktividatnan humano na armonia ku Su propósito. Pa hende por tin éksito den loke nan ta hasi, nan mester konosé i traha na armonia ku Dios su propósito i tempu stipulá. Loke ta predeterminá i ku ningun persona no por kambia ta Dios su propósito relashoná ku e tera i e futuro di humanidat i no e destino di kada hende. Yehova a deklará pa medio di profeta Isaias: “Mi palabra ku ta sali for di mi boka . . . lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.”—Isaias 55:11.
Pues, kiko ta Dios su “palabra,” òf propósito, relashoná ku e tera i futuro di humanidat ku lo no keda “sin kumpli”?
Dios Su Propósito i Su Tempu pa Kumpli Kuné
Salomon a duna un indikashon di esaki. Despues ku el a bisa ku “[Dios] a traha tur kos apropiá na su tempu,” el a agregá: “Tambe el a pone eternidat den nan kurason, sin ku hende por haña sa e trabou ku Dios a hasi for di prinsipio te na fin.”—Eklesiastés 3:11.
Hopi kos a ser bisá tokante e versíkulo akí. Pero e simpel echo ta, ku ta yega un momento ku nos tur, den profundidat di nos kurason, ta deseá di sa kiko ta e propósito di bida i nos destino final. Atraves di historia, hende tabatin difikultat pa aseptá ku bida ta konsistí di traha duru so, hasiendo loke mester ser hasí, i ku finalmente nan ta muri. Hende ta úniko entre tur e kriaturanan bibu pasobra nan no ta pensa tokante nan bida aktual so pero tambe tokante nan futuro. Nos asta ta anhelá pa sigui biba pa semper. Dikon? Manera e Skritura ta splika: Dios a “pone eternidat den [nos] kurason.”
Pa satisfasé e anhelo ei, hopi bes hende ta puntra nan mes si tin bida despues di morto. Tin hende ta kere ku nos tin algu ku ta sigui biba despues ku nos muri. Otronan ta kere den reenkarnashon, esta ku hende ta nase di nobo den otro kurpa kada bes ku nan muri. Ademas, tin otro hende ta pensa ku destino òf Dios a predeterminá tur kos den bida i ku nos no por hasi nada pa evitá esei. Lamentablemente, ningun di e splikashonnan akí no ta duna satisfakshon. Segun Beibel, e motibu ta ku hende, mediante nan propio esfuerso, nunka lo “haña sa e trabou ku Dios a hasi for di prinsipio te na fin.”
E konflikto difísil i persistente akí, esta, ku hende tin e deseo pa haña kontesta pero ku nan no ta kapas di hañ’é, a preokupá filósofonan i otro hende atraves di siglonan. Sinembargo, siendo ku ta Dios mes a pone den nos kurason e deseo pa biba pa semper, no ta lógiko pa akudí na dje pa nos haña loke ta nesesario pa satisfasé e deseo ei? Al fin i al kabo, Beibel ta bisa di Yehova: “Bo ta habri bo man, i ta satisfasé e deseo di tur ser bibu.” (Salmo 145:16) Ora nos studia Dios su Palabra, Beibel, nos por haña splikashon satisfaktorio tokante bida i morto i tokante Dios su propósito eterno relashoná ku e tera i humanidat.—Efesionan 3:11.
[Komentario na página 5]
“E kareda no ta pa esun mas lihé.”—Eklesiastés 9:11
[Komentario na página 6]
Si un kunukero no planta na e tempu apropiá, e por kulpa destino pa e mal kosecha?
[Komentario na página 7]
Nos ta pensa tokante bida i morto pasobra Dios a ‘pone eternidat den nos kurason’