Dios Su Poder Ta Bisto den e Streanan
“Hisa bo wowo wak ariba i mira ta ken a krea e streanan aki; Esun ku ta guia nan ehérsito segun nan kantidat, ta e ta yama nan tur na nan nòmber; pa motibu di [“e abundansia di energia dinámiko, pasobra e tambe ta vigoroso den poder,” NW] ningun di nan no ta falta.”—ISAIAS 40:26.
NOS solo ta djis un strea di tamaño promedio. Asina mes, su masa ta 330.000 biaha mas tantu ku esun di e tera. Mayoria di e streanan ku ta den bisindario di e tera ta mas chikitu ku solo. Sin embargo, tin otro streanan, manera esun ku yama V382 Cygni, ku tin un masa ku ta por lo ménos 27 biaha mas tantu ku nos solo.
Kuantu energia nos solo ta emití? Imaginá bo kon kayente un kandela lo mester ta si asta ora bo ta 15 kilometer leu for di dje, ainda bo por sinti su kalor. Solo ta keda na un promedio di mas o ménos 150 mion kilometer for di tera. Apesar di esei, riba un dia ku solo ta kima fuerte, e por kima un hende su kueru te ku e ta saka blar! Ta remarkabel ku ta solamente un parti chikiritiku di e energia di solo ta alkansá e tera. No opstante, e frakshon aki di e poder di solo ta sufisiente pa sostené bida riba e planeta.
De echo, sientífikonan a kalkulá ku tur e energia ku nos solo so ta emití ta sufisiente pa sostené rònt di 31 bion planeta manera e tera. Bo por midi e enorme kantidat di energia ei den e manera aki tambe: Segun e Website Sentro di Pronostikashon di Wer den Espasio (SWPC), si hende por a kolektá tur e energia ku solo ta produsí pa solamente un sekònde, esaki lo por a sirbi pa ‘suministrá Merka ku sufisiente energia ku nan por usa durante e próksimo 9.000.000 añanan. E kalkulashon aki ta basá riba e kantidat di energia ku Merka ta usa aktualmente.’
Solo ta emití energia for di su sentro—un planta nuklear ku ta pone atomnan dal kontra otro i asina produsí un abundansia di energia. Solo ta asina grandi i su sentro asina denso ku ta tuma miónes di aña pa e energia ku e ta produsí den e sentro yega na superfisie. Segun e Website SWPC: “Si Solo stòp di produsí energia awe, ta te aki 50.000.000 aña Tera lo sinti efektonan notabel!”
Awor pensa riba esaki: Ora bo wak den laira riba un anochi kla, bo ta mira míles di strea; kada un ta emití un inmenso kantidat di energia meskos ku nos solo. I sientífikonan ta kalkulá ku tin míles i míles di miónes di strea den universo!
Di unda tur e streanan aki a bini? Aktualmente, mayoria di investigadó ta kere ku mas o ménos un 14 mil mion aña pasá, pa un motibu ku ainda nan no ta komprondé, diripiente e universo a bini na eksistensia. Beibel ta bisa simplemente: “Na prinsipio Dios a krea e shelunan i tera.” (Génesis 1:1) Sin duda, Esun ku a krea e inmenso mashinnan di energia ku nos ta yama strea por ser deskribí komo “vigoroso den poder.”—Isaias 40:26, NW.
Kon Dios Ta Usa Su Poder?
Yehova Dios ta usa su poder pa sostené esnan ku ta hasi su boluntat. Apòstel Pablo, por ehèmpel, a usa su energia pa siña hende tokante Dios. Ounke Pablo no tabata un persona sobrehumano, e por a hasi masha bon trabou apesar di oposishon severo. Kon bin? El a rekonosé ku el a risibí “poder” mas ayá di loke ta normal for di Dios.—2 Korintionan 4:7-9.
Ademas, Yehova Dios a usa su poder pa destruí esnan ku deliberadamente a violá su normanan moral. Hesukristu a referí na e destrukshon di Sodoma i Gomora i na e Diluvio den tempu di Noe komo ehèmpelnan den kua Yehova a usa su poder pa destruí solamente hende malbado. Hesus a profetisá ku pronto Yehova lo usa su poder atrobe pa destruí esnan ku ta ignorá Su normanan.—Mateo 24:3, 37-39; Lukas 17:26-30.
Ki Efekto Esaki Tin Riba Bo?
Despues di a meditá riba e poder di Dios ku ta bisto den e streanan, probablemente bo ta sinti manera Rei David, kende a bisa: “Ora mi kontemplá bo shelunan, e obra di bo dedenan, e luna i e streanan ku abo a establesé, ta kiko hende ta, ku bo ta kòrda di dje? I e yu di hende, ku bo ta hasi kaso di dje?”—Salmo 8:3, 4.
Sí, ora nos kompará nos mes ku e universo inmenso, nos por sinti nos mes masha insignifikante. Sin embargo, e poder di Dios no mester laga nos sinti nos impotente. Yehova a inspirá profeta Isaias pa skirbi e palabranan alentador aki: “E [Yehova] ta duna forsa na esun kansá, i e ta oumentá poder pa esun ku ta falta poder. Hóbennan mes ta bira kansá i fatigá, i hóbennan ku vigor ta trompeká pisá, ma esnan ku spera riba SEÑOR lo haña forsa renobá; nan lo bula bai ariba ku hala manera águila, nan lo kore sin bira fatigá, nan lo kana sin kansa.”—Isaias 40:29-31.
Si bo ta deseá di hasi Dios su boluntat, bo por ta sigur ku lo e duna bo su spiritu santu ku lo yuda bo sigui hasi esei. Pero bo tin ku pidi pa e spiritu santu. (Lukas 11:13) Ku e apoyo di Dios bo por soportá kualke prueba i haña fortalesa pa hasi loke ta bon.
[Komentario na página 7]
Ku e apoyo di Dios, bo por haña fortalesa pa hasi loke ta bon
[Plachinan na página 7]
Kuminsando ariba na man robes, direkshon di oloshi: galaksia Whirlpool, konstelashon di strea Pleyades, Neblina Orion, galaksia Andromeda
[Plachinan na página 7]
E masa di solo ta 330.000 biaha mas tantu ku esun di e tera
[Rekonosementu pa Potrèt na página 7]
Pleyades: NASA, ESA i AURA/Caltech; tur e otronan ariba: National Optical Astronomy Observatories