Kapítulo Shete
Bolbe na e Adorashon di Yehova
1. Kon yama e dos diosnan prinsipal di Babilonia, i kiko ta ser predisí tokante nan?
ORA ku Israel bai den eksilio na Babilonia, lo e ta rondoná pa adorashon falsu. Den e tempu di Isaías, ainda e pueblo di Yehova ta den nan propio tera, i nan tin e tèmpel i e saserdosio. Pero tòg hopi miembro di e nashon dediká na Dios a sukumbí na idolatria. Ta vital anto pa prepará nan di antemano pa e diosnan falsu di Babilonia no intimidá nan òf atraé nan pa sirbi e diosnan aki. P’esei, papiando profétikamente di dos dje diosnan prinsipal di Babilonia, Isaías ta bisa: “Bèl a dobla su mes, Nebo ta di bùk; nan ídolonan ta pa bestianan salbahe i pa animalnan doméstiko, nan karganan, pidanan di ekipahe, un karga pisá pa e animalnan kansá.” (Isaías 46:1) Bèl ta e dios prinsipal dje kaldeonan. Nebo ta ser venerá komo un dios di sabiduria i konosementu. E echo ku vários nòmber personal di e babilonionan ta kontené nòmber di e dos diosnan aki ta indiká ku hopi hende tin rèspèt pa nan. Djis pa menshoná algun: Bèlsasar, Nabopolasar, Nabukodonosor i Nebuzaradan.
2. Kon e impotensia di e diosnan di Babilonia ta ser enfatisá?
2 Isaías ta bisa ku Bèl a “dobla su mes” i ku Nebo ta “di bùk.” E diosnan falsu aki lo sufri un humiashon. Ora Yehova ehekutá su huisio kontra Babilonia, e diosnan aki lo ta inkapas pa yuda nan adoradónan. Nan lo no por salba ni nan mes! Bèl i Nebo lo no okupá e lugá di onor den proseshonnan mas, manera durante e selebrashon di Aña Nobo babilóniko. Mas bien, esnan ku ta adorá nan lo tin ku hisa nan bai kuné manera gewoon ekipahe. Na lugá di alabá nan i adorá nan, hende lo hasi bofon di nan i menospresiá nan.
3. (a) Kiko lo shòk e babilonionan? (b) Kiko nos por siña awe for di loke a sosodé ku e diosnan di Babilonia?
3 E babilonionan lo haña un shòk ora nan haña sa ku nan diosnan stimá ta djis un karga pa bestia kansá transportá! Di igual manera awe, e diosnan di e mundu aki (e kosnan den kua hende ta pone nan konfiansa i pa kua nan ta gasta nan energia i asta duna nan bida) ta un ilushon. Rikesa, armamentu, plaser, gobernante, patria òf su símbolonan i hopi otro kos a bira opheto di deboshon. Na Yehova su debido tempu hende lo mira kon inútil e diosnan ei ta.—Daniel 11:38; Mateo 6:24; Echonan 12:22; Filipensenan 3:19; Kolosensenan 3:5; Revelashon 13:14, 15.
4. Den ki sentido e diosnan di Babilonia ta di “bùk” i ‘doblá’?
4 A kontinuashon e profesia ta resaltá e frakaso total di e diosnan babilóniko: “Nan tin ku bùk; kada un di nan tin ku dobla meskos; simplemente nan no por perkurá eskape pa e karga pisá, sino ku nan propio alma tin ku bai den koutiverio.” (Isaías 46:2) E diosnan di Babilonia ta parse manera di “bùk” i ‘doblá,’ komo si fuera heridá den bataya òf yen di krekeché di behes. Nan no por ni sikiera aliviá e karga ni ofresé eskape n’e pober bestianan ku ta transportá nan. Pues, ounke e pueblo ku ta den pakto ku Yehova ta prezu na Babilonia, nan mester onra e diosnan ei? Nò! Meskos tambe ta e kaso ku e sirbidónan ungí di Yehova. Maske nan tabata den koutiverio spiritual, nan no a duna onor na e diosnan falsu di “Babilonia e Grandi,” ku no por a prevení su kaida na 1919 ni lo no por salb’é for di e kalamidat ku lo bini riba dje durante e “tribulashon grandi.”—Revelashon 18:2, 21; Mateo 24:21.
5. Kon kristiannan djawe ta evitá di ripití e fayonan di e babilonionan ku a adorá ídolo?
5 Awe kristiannan berdadero no ta bùig na ningun tipo di ídolo òf imágen. (1 Huan 5:21) Ni krusifiho, ni rosario ni imágen di santu no ta hala nos mas serka di e Kreador. Nan no por intermediá pa nos. Den e promé siglo, Hesus a siña su disipelnan e manera korekto pa adorá Dios ora el a bisa: “Ami ta e kaminda i e bèrdat i e bida. Ningun hende no ta yega n’e Tata sino pa medio di mi. Si boso pidi algu den mi nòmber, lo mi hasié.”—Huan 14:6, 14.
“Kargá for di Matris”
6. Den ki manera Yehova ta diferente for di e diosnan dje nashonnan?
6 Despues ku Yehova a mustra bon kla ku no tin sentido pa adorá e diosnan falsu di Babilonia, e ta bisa su pueblo: “Skucha mi, o kas di Yakòb, i boso tur ku a resta dje kas di Israel, boso ku for di barika mi a transportá, esnan kargá for di matris.” (Isaías 46:3) Tin un gran diferensia entre Yehova i e imágennan tayá di Babilonia! E diosnan di Babilonia no por hasi nada pa nan adoradónan. Si nan kier move, ta un bestia di karga mester transportá nan. En kambio, ta Yehova a karga su pueblo. El a sostené nan “for di matris,” for di tempu ku e nashon a ser formá. E grato rekuerdonan di e okashonnan ku Yehova a karga e hudiunan mester animá nan pa evitá idolatria i pone nan konfiansa den dje komo nan Tata i Amigu.
7. Kon e manera tierno ku Yehova ta kuida su adoradónan ta mihó ku e manera ku mayornan humano ta kuida nan yunan?
7 Yehova tin mas palabra di kariño pa su pueblo: “Asta te na un hende su behes mi ta e Mesun; i te na un hende su kabei blanku ami mes lo sigui sostené. Ami mes lo aktua sigur, pa mi mes por karga i pa mi mes por sostené i perkurá eskape.” (Isaías 46:4) E kuido ku Yehova ta duna su pueblo ta superior ku esun di e mama òf tata di mas atento. Segun ku yunan ta krese, kisas mayornan ta sinti nan kada bes ménos responsabel pa nan. Ora e mayornan bira grandi, hopi bes ta e yunan ta kuida nan. Pero esei hamas ta e kaso ku Yehova. E nunka ta stòp di perkurá pa su yunan humano—ni ora nan bira bieu. E adoradónan di Dios djawe ta konfia i ta stima nan Kreador i ta haña hopi konsuelo for di e palabranan aki di e profesia di Isaías. Nan no tin nodi preokupá tokante e dianan òf añanan ku a sobra nan pa biba den e sistema di kosnan aki. Yehova ta primintí di “sigui sostené” esnan ku ta di edat avansá, dunando nan e forsa nesesario pa wanta fielmente. Lo e karga nan, fortalesé nan i perkurá eskape pa nan.—Hebreonan 6:10.
Tene Kuidou ku e Ídolonan Moderno
8. Ki piká imperdonabel algun kompatriota di Isaías a kometé?
8 Imaginá kon desapuntá e babilonionan lo keda despues ku nan a pone nan konfiansa den ídolo ku lo resultá di ta kompletamente inútil! Israel mester kere ku e diosnan ei ta di kompará ku Yehova? Klaro ku nò. Yehova tin derecho di puntra: “Ku ken boso por asosiá mi òf igualá mi òf kompará mi pa nos por parse otro?” (Isaías 46:5) No tin esküs pa algun kompatriota di Isaías ku a bai adorá estatua muda, sin bida i impotente! Pa un nashon ku konosé Yehova, ta realmente un bobedat pa konfia den imágen sin bida i indefenso, ku man di hende a traha.
9. Deskribí kon ilógiko algun adoradó di ídolo ta rasoná.
9 Wak e rasonamentu ilógiko di adoradó di ídolo. E profesia ta kontinuá: “Tin esnan ku ta saka oro na bòshi for di saku, i ku e brasa dje balansa nan ta pisa plata. Nan ta kontratá esun ku ta traha ku metal, i e ta traha un dios di dje. Nan ta kai na suela dilanti dje, sí, nan ta bùig abou.” (Isaías 46:6) E adoradónan no ta ekonomisá ora di traha nan dios falsu, komo si fuera un ídolo karu tin mas poder di salba ku unu trahá di palu. Pero maske kuantu esfuerso nan dediká na dje òf maske kon kostoso e materialnan ta, un ídolo sin bida ta keda un ídolo sin bida, i nada mas.
10. Kon e Skritura ta deskribí ku idolatria ta apsolutamente sin sentido?
10 E profesia ta sigui enfatisá e bobedat di idolatria: “Nan ta kargu’é riba skouder, nan ta hib’é i deposit’é den su lugá pa e por para ketu. E no ta move for di su lugá kaminda e ta pará. Un hende ta asta sklama na dje, pero e no ta kontestá; e no ta salba un hende for di su angustia.” (Isaías 46:7) Ta hopi ridíkulo pa hasi orashon na un imágen ku no por tende ni aktua! E salmista ta deskribí bon kon inútil e ophetonan di adorashon ei ta: “Nan ídolo ta plata i oro, e trabou di man di hende terenal. Nan tin boka, pero no por papia; nan tin wowo, pero no por mira; nan tin orea, pero no por tende. Nan tin nanishi, pero no por hole. Nan tin man, pero no por fula. Nan tin pia, pero no por kana; ningun zonido no ta sali for di nan garganta. Hende ku ta traha nan lo bira meskos ku nan, tur hende ku ta konfia den nan.”—Salmo 115:4-8.
“Tuma un Kurashi”
11. Kiko lo yuda esnan ku ta vasilá, pa “tuma un kurashi”?
11 Despues ku Yehova a demostrá ku idolatria no tin ningun sentido, e ta duna su pueblo motibunan pakiko nan mester sirbié: “Kòrda esaki, pa boso por tuma un kurashi. Tum’é na pechu, kibradónan di lei. Kòrda e promé kosnan di hopi tempu pasá, ku ami ta e Divino i no tin ningun otro Dios, ni ningun manera ami.” (Isaías 46:8, 9) Esnan ku ta vasilá entre adorashon berdadero i idolatria mester kòrda historia. Nan mester tene na mente e loke Yehova a hasi. Esaki lo yuda nan tuma un kurashi i hasi loke ta korekto. Lo e yuda nan bolbe na e adorashon di Yehova.
12, 13. Kontra kiko kristiannan tin ku lucha, i kon nan por sali viktorioso?
12 Ainda e animashon aki ta nesesario awe. Meskos ku e israelitanan, kristiannan sinsero tin ku lucha kontra tentashon i nan mes imperfekshon. (Romanonan 7:21-24) Ademas, nan ta den un bataya spiritual kontra un enemigu invisibel ku ta sumamente poderoso. Apòstel Pablo ta bisa: “Nos tin un lucha, no kontra sanger i karni, sino kontra e gobièrnunan, kontra e outoridatnan, kontra e gobernantenan mundial dje skuridat aki, kontra e mal forsanan spiritual den e lugánan selestial.”—Efesionan 6:12.
13 Satanas i su demoñonan lo hasi tur loke ta posibel pa alehá kristiannan for di e adorashon berdadero. Pa kristiannan por hiba un bataya eksitoso, nan tin ku sigui e konseho di Yehova i tuma un kurashi. Kon? Apòstel Pablo ta splika: “Bisti e armadura kompleto ku ta bini di Dios pa boso por para firme kontra e [mañanan] di Diabel.” Yehova no ta manda su sirbidónan bai mal ekipá den bataya. Nan armadura spiritual ta inkluí un “eskudo grandi di fe, ku kua [nan] por paga tur e flechanan di kandela dje malbado.” (Efesionan 6:11, 16) E israelitanan tabata kibradó di lei pa motibu ku nan a ignorá e provishonnan spiritual ku Yehova a hasi pa nan. Si nan a meditá riba e obranan poderoso ku Yehova a hasi bes tras bes na nan fabor, hamas nan lo a kai den e adorashon repugnante di ídolo. Laga nos saka un lès for di nan ehèmpel i sea determiná pa nunka vasilá den e lucha pa hasi loke ta korekto.—1 Korintionan 10:11.
14. Na ki abilidat Yehova ta señalá p’e mustra ku e ta e úniko Dios berdadero?
14 Yehova ta “Esun ku ta deklará e final desde prinsipio, i for di hopi tempu atras e kosnan ku no a ser hasí; Esun bisando: ‘Mi propio konseho lo keda para, i tur loke ta mi deleite lo mi hasi.’” (Isaías 46:10) Ku kua otro dios por kompará Yehova den e aspekto aki? E abilidat pa predisí futuro ta un prueba sobresaliente ku e Kreador ta e Dios berdadero. Sin embargo, e abilidat pa mira kosnan adelantá no ta sufisiente pa garantisá ku e kosnan profetisá ta kumpli. E deklarashon “mi propio konseho lo keda para” ta enfatisá kon inkambiabel Dios su propósito establesí ta. Komo ku Yehova su poder ta ilimitá, nada den universo no por strob’é di kumpli ku su boluntat. (Daniel 4:35) P’esei, nos por ta sigur ku e profesianan ku mester kumpli ainda en bèrdat lo ser realisá na Dios su debido tempu.—Isaías 55:11.
15. Isaías ta hala nos atenshon na ki ehèmpel remarkabel di Yehova su abilidat di predisí futuro?
15 Isaías ta hala nos atenshon awor na un ehèmpel magnífiko di Yehova su abilidat di predisí susesonan ku lo tuma lugá den futuro i despues perkurá pa nan kumpli: “Esun ku ta yama for di salimentu di solo un para yagdó, for di un pais leu e hòmber pa ehekutá mi konseho. Sí, mi a papi’é; lo mi lagu’é bini tambe. Ami a form’é, lo mi hasié tambe.” (Isaías 46:11) Komo “Esun ku ta deklará e final desde prinsipio,” Yehova Dios lo intervení den asuntunan humano pa por kumpli ku su konseho. Lo e yama Siro “for di salimentu di solo,” es desir for di Pèrsia den ost, kaminda e kapital preferí di Siro, Pasargada, lo ta. Siro lo ta manera “un para yagdó,” lo e baha di ripiente i na un manera inesperá riba Babilonia.
16. Kon Yehova ta konfirmá ku e loke el a predisí relashoná ku Babilonia lo kumpli sigur?
16 E palabranan “sí, mi a papi’é; lo mi lagu’é bini tambe,” ta konfirmá ku loke Yehova ta predisí relashoná ku Babilonia lo kumpli sigur. Hende imperfekto tin tendensia di hasi promesanan impulsivo, pero e Kreador sí nunka no ta keda sin kumpli ku su palabra. Debí ku Yehova ta e Dios “ku no por gaña,” nos por ta sigur ku si el a “form’é,” lo e “hasié tambe.”—Tito 1:2.
Kurason sin Fe
17, 18. Ken por ser denominá komo e “poderosonan di kurason” (a) den pasado? (b) awe?
17 Un biaha mas Yehova ta dirigí su atenshon profétikamente n’e babilonionan, bisando: “Skucha mi, boso poderosonan di kurason, boso ku ta leu for di hustisia.” (Isaías 46:12) E ekspreshon “poderosonan di kurason” ta referí na esnan ku ta terko i ku ta persistí den oponé e boluntat di Dios. Sin duda, e babilonionan ta leu for di Dios. Nan odio kontra Yehova i su pueblo ta motivá nan pa destruí Yerúsalèm i su tèmpel i pa hiba su habitantenan den eksilio.
18 Awe, esnan ku tin un kurason yen di duda i ku no kier kere, ta nenga di tende e mensahe di Reino ku ta ser prediká den henter e tera habitá. (Mateo 24:14) Nan no kier rekonosé Yehova komo e Soberano legítimo. (Salmo 83:18; Revelashon 4:11) Ku kurason “leu for di hustisia,” nan ta oponé su boluntat. (2 Timoteo 3:1-5) Meskos ku e babilonionan, nan ta nenga di skucha Yehova.
E Salbashon di Dios Lo No Ta Lat
19. Den ki manera Yehova lo efektuá un akto di hustisia pa Israel?
19 E palabranan di konklushon di Isaías kapítulo 46 ta resaltá algun aspekto di Yehova su personalidat: “Mi a trese mi hustisia serka. E no ta leu, i mi propio salbashon lo no ta lat. I lo mi duna salbashon den Síon, na Israel, mi bunitesa.” (Isaías 46:13) E liberashon divino di Israel lo ta un akto di hustisia. Dios lo no laga su pueblo kaba na nada den eksilio. E salbashon di Síon lo bini n’e debido tempu. ‘Lo e no ta lat.’ Despues ku e israelitanan sali liber di koutiverio, nan lo bira un espektákulo p’e nashonnan bisiña. E echo ku Yehova a libra su nashon lo ta un testimonio di su poder di salba. Pa tur hende lo ta masha bisto ku e diosnan di Babilonia, Bèl i Nebo, ta inútil i impotente.—1 Reinan 18:39, 40.
20. Dikon kristiannan por ta sigur ku Yehova su “salbashon lo no ta lat”?
20 Na 1919, Yehova a libra su pueblo for di koutiverio spiritual. E no tabata lat. E suseso ei, i tambe e susesonan den pasado ora Babilonia a kai na man di Siro, ta animá nos awe. Yehova a primintí di trese un fin n’e mal sistema di kosnan aki, inkluso su adorashon falsu. (Revelashon 19:1, 2, 17-21) Desde e punto di bista humano, algun kristian kisas ta haña ku nan salbashon a tarda. Sin embargo, e echo ku Yehova a mustra pasenshi te ora e debido tempu p’e kumpli ku e promesa ei yega, realmente ta un akto di hustisia. Al fin i al kabo, “[Yehova] no ta deseá pa ningun hende ser destruí, sino ta deseá pa tur alkansá repentimentu.” (2 Pedro 3:9) P’esei, nos por ta sigur ku meskos ku den e tempu di Israel di pasado, “salbashon lo no ta lat.” Sí, segun ku e dia di salbashon ta yega mas serka, Yehova ta sigui ekstendé e invitashon amoroso: “Boso buska Yehova, miéntras ku por hañ’é. Yam’é miéntras ku e ta resultá di ta serka. Laga e malbado bandoná su kaminda, i e hende perhudisial su pensamentunan; i lagu’é bolbe na Yehova, kende lo tene miserikòrdia kuné, i na nos Dios, pasobra lo e pordoná den un gran manera.”—Isaías 55:6, 7.
[Plachi na página 94]
E diosnan di Babilonia no ta protehá e stat kontra destrukshon
[Plachi na página 98]
Kristiannan djawe mester tene kuidou ku ídolonan moderno
[Plachi na página 101]
Tuma un kurashi pa hasi loke ta korekto