Kapítulo Ocho

Isaías Ta Premirá e Fin Dramátiko di Religion Falsu

Isaías 47:1-15

1, 2. (a) Pakiko ta difísil pa algun hende kere ku pronto lo tin un kambio radikal den e ambiente religioso di mundu? (b) Kon nos por sa ku e palabranan di Isaías kapítulo 47 ta apliká den futuro? (c) Pakiko “Babilonia e Grandi” ta un nòmber adekuá pa e totalidat di religion falsu?

“RELIGION Ta Hasi un Come-back.” Esei tabata e mensahe ku un artíkulo den The New York Times Magazine a proklamá. E artíkulo a indiká ku aparentemente ainda religion tin un gara firme riba kurason i mente di miónes di hende. P’esei kisas ta difísil pa kere ku pronto un kambio radikal ta bai tuma lugá den e ambiente religioso di mundu. Pero Isaías kapítulo 47 ta indiká e kambio ei.

² E palabranan di Isaías a kumpli 2.500 aña pasá. Sin embargo, e buki di Revelashon ta sita e palabranan di Isaías 47:8 i ta apliká nan pa futuro. Ei Beibel ta predisí fin di e organisashon simbolisá pa un muhé di mala bida yamá “Babilonia e Grandi,” e imperio mundial di religion falsu. (Revelashon 16:19) E nòmber “Babilonia” ta kuadra pa e religionnan falsu di mundu, pasobra ta na Babilonia di antigwedat religion falsu a kuminsá. For di einan el a plama bai rònt mundu. (Génesis 11:1-9) Den práktikamente tur religion, inkluso di kristiandat, bo ta haña e doktrinanan religioso ku a originá na Babilonia, manera inmortalidat di alma, fièrnu di kandela i e adorashon di trinidat.a E profesia di Isaías ta laga nos komprendé kiko ta bai para di religionnan?

Babilonia Lo Baha den Stòf

 3. Deskribí e grandesa dje Potensia Mundial Babilóniko.

³ Skucha e deklarashon divino sensashonal aki: “Baha bou i kai sinta den stòf, o yu muhé bírgen di Babilonia. Kai sinta riba tera kaminda no tin trono, o yu muhé dje kaldeonan. Pasobra lo bo no bolbe eksperimentá ku hende ta yama bo delikado i ekskisito.” (Isaías 47:1) Pa añanan largu Babilonia a okupá e trono di dominashon mundial. E tabata “e adorno di reinonan”—un sentro religioso, komersial i militar masha próspero. (Isaías 13:19) Tempu ku Babilonia tabata na tòp di su gloria, su imperio a yega te n’e frontera ku Egipto. I ora Babilonia derotá Yerúsalèm na aña 607 promé ku Era Komun, ta parse ku ni Dios ta kapas pa para su konkistanan! Pues e ta mira su mes komo un “yu muhé bírgen,” unu ku nunka lo ser invadí pa otro nashonnan.b

 4. Kiko lo pasa ku Babilonia?

⁴ Pero e “bírgen” orguyoso aki lo ser tumbá for di su trono komo e potensia mundial indiskutibel i obligá pa “kai sinta den stòf,” loke ta un humiashon p’e. (Isaías 26:5) Lo e no ta ‘delikado ni ekskisito mas,’ manera un reina malkriá. P’esei Yehova ta ordená: “Tuma un mulina di man i mula hariña. Hisa bo velo. Kita e saya hanchu. Saka e pia sunú. Krusa riunan.” (Isaías 47:2) Despues ku Babilonia a sklabisá henter e nashon di Huda, awor e mes lo ser tratá komo katibu! E medonan i e pèrsonan ku ta bah’é for di su posishon di poder lo obligu’é sirbi nan ku tareanan humiante.

 5. (a) Kon nan lo kita Babilonia su ‘velo i saya hanchu’? (b) E òrdu p’e “krusa riunan” por ta referí na kiko?

⁵ Asina nan lo kita Babilonia su ‘velo i saya hanchu.’ Lo no keda niun rastro di e grandesa i dignidat ku e tabata gosa di dje un tempu. Nan lo mand’é “krusa riunan.” Tal bes en bèrdat lo fòrsá algun babilonio pa hasi trabou di katibu na aire liber. Òf podisé e profesia kier men ku lo lastra algun di nan literalmente dor di riunan ora di hiba nan den eksilio. Sea kual sea e kaso, Babilonia lo no biaha mas ku e grandesa di un reina ku ta krusa riu kargá den un stul òf den un garoshi. Na lugá di esei, lo e ta manera un katibu ku tin ku pone desensia un banda dor di hisa su shimis i saka e sunú di su pianan pa por pasa dor di riu. Esta un humiashon!

 6. (a) Den ki sentido lo saka e sunú di Babilonia? (b) Kiko ta nifiká ku Dios no ta “topa niun hende den forma bondadoso”? (Mira nota na pia di página.)

⁶ Yehova ta sigui hasi bofon di dje: “Bo tin ku saka bo sunú. Tambe, mester mira bo reproche. Vengansa ta loke lo mi tuma, i lo mi no topa niun hende den forma bondadoso.” (Isaías 47:3)c Sí, Babilonia lo pasa bèrgwensa i desonra. E maldat i krueldat ku e ta kometé kontra e pueblo di Dios lo keda revelá abiertamente. Ningun ser humano por stroba Dios di tuma vengansa!

 7. (a) Kon e eksiliadonan hudiu lo reakshoná ora nan tende ku Babilonia a kai? (b) Kon Yehova lo kumpra su pueblo bèk?

⁷ Despues ku e pueblo di Dios pasa 70 aña prezu den e poderoso Babilonia, nan lo alegrá ora esaki kai. Nan lo grita: “Tin Unu ku ta kumpra nos bèk. Yehova di ehérsitonan ta su nòmber, e Santu di Israel.” (Isaías 47:4) Bou di e Lei di Moises, si un israelita bende su mes komo katibu pa por paga su debenan, un rekomprador (un famia yegá) lo por kumpr’é bèk for di sklabitut. (Levítiko 25:47-54) Dor ku lo bende e hudiunan komo katibu ku Babilonia, un hende lo tin ku kumpra nan bèk, òf libra nan. Por lo general un konkista ta nifiká djis un kambio di doño pa un katibu. Pero Yehova lo motivá e rei konkistadó Siro pa libra e hudiunan for di sklabitut. Lo e duna Egipto, Etiopia i Seba na Siro komo “reskate” na lugá di e hudiunan. (Isaías 43:3) Ku bon motibu e Redentor di Israel ta ser yamá “Yehova di ehérsitonan.” E aparente forsa militar poderoso di Babilonia lo ta ñaña na komparashon ku Yehova su trupanan angelikal invisibel.

E Preis di Krueldat

 8. Den ki sentido Babilonia lo ‘drenta skuridat’?

⁸ Yehova ta reanudá su denunsia profétiko kontra Babilonia: “Kai sinta den silensio i drenta den e skuridat, o yu muhé dje kaldeonan; pasobra lo bo no bolbe eksperimentá ku hende ta yama bo Señora di Reinonan.” (Isaías 47:5) Ta solamente skuridat i desgrasia lo keda Babilonia. Lo e no dominá otro reinonan mas komo un señora kruel.—Isaías 14:4.

 9. Pakiko Yehova tabata rabiá ku e hudiunan?

⁹ Awor bon, pakiko Dios ta pèrmití Babilonia kousa daño na Su pueblo anto? Yehova ta splika: “Mi tabata rabiá ku mi pueblo. Mi a profaná mi herensia, anto mi a duna nan den bo man.” (Isaías 47:6a) Yehova tin tur motibu pa ta indigná ku e hudiunan. Anteriormente, el a spièrta nan ku desobedensia di su Lei lo hiba na ekspulshon for di nan tera. (Deuteronomio 28:64) Ora nan a kai den idolatria i inmoralidat seksual, komo prueba di su amor, Yehova a manda profeta pa yuda nan bolbe na adorashon puru. Pero “kontinuamente nan tabata burla dje mensaheronan dje Dios berdadero i tabata despresiá su palabranan i hasi mofa di su profetanan, te ora e furia di Yehova a subi kontra su pueblo, te ora ku no tabatin kurashon.” (2 Krónikanan 36:16) P’esei Dios ta pèrmití Babilonia profaná su herensia, Huda, dor di laga nan invadí e tera i kontaminá Su tèmpel santu.—Salmo 79:1; Ezekiel 24:21.

10, 11. Pakiko Yehova ta rabiá ku Babilonia, ounke ta e mes a pèrmitié konkistá su pueblo?

¹⁰ En bista di esei, Babilonia no ta simplemente kumpliendo ku e boluntat di Dios ora e hasi e hudiunan katibu? Nò, pasobra Dios ta bisa: “Bo no a mustra miserikòrdia na nan. Riba e hòmber bieu bo a hasi bo yugo masha pisá. I bo a sigui bisa: ‘Pa tempu indefiní lo mi resultá di ta Señora, pa semper.’ Bo no a tuma e kosnan aki na pechu; bo no a kòrda e fin dje asuntu.” (Isaías 47:6b, 7) Dios no a manda Babilonia aktua asina kruel, sin mustra fabor “ni sikiera na hende bieu.” (Lamentashonnan 4:16; 5:12) Ni e no a animá nan pa hasi mofa di e prezunan hudiu pa haña plaser sadista.—Salmo 137:3.

¹¹ Babilonia no a komprendé ku e dominio ku e tin riba e hudiunan ta temporal. El a ignorá e atvertensianan di Isaías di ku na su debido tempu Yehova lo libra su pueblo. E ta komportá su mes komo si fuera e tin derecho di sigui dominá e hudiunan ketu bai i ser señora riba e nashonnan bou di dje pa semper. E no ta hasi kaso di e mensahe ku lo bin un “fin” na su dominio opresivo!

E Kaida di Babilonia Profetisá

12. Pakiko Babilonia ta ser yamá un “muhé amante di plaser”?

¹² Yehova ta deklará: “Awor tende esaki, muhé amante di plaser, esun ku ta sinta den siguridat, esun ku ta bisa den su kurason: ‘Ami ta, i no tin ningun otro. Lo mi no sinta manera un biuda, i lo mi no konosé pèrdida di yu.’” (Isaías 47:8) Babilonia tin e fama di ta gusta plaser. E historiadó Herodoto di siglo 5 promé ku Era Komun ta konta di un “kustumber masha bergonsoso” di e babilonionan, esta, ku tur hende muhé mester bende nan kurpa na onor di nan diosa di amor. Un historiadó di antigwedat, Kursio, tambe a skirbi: “E kustumbernan di e stat a surpasá tur sushedat; ningun korupshon sistemátiko por ofresé mas insentivo i tentashon pa pashonnan desenfrená.”

13. Kon Babilonia su ansha pa plaser lo pone ku e ta kai mas lihé?

¹³ Babilonia su ansha pa plaser lo pone ku e ta kai mas lihé. Riba e anochi promé ku e kai, su rei huntu ku su dignatarionan lo selebrá un bankete, i bebe te bira burachi. Dor di esei nan lo no sa mes ku e ehérsitonan medo-pèrso ta invadiendo e stat. (Daniel 5:1-4) ‘Sintá den siguridat,’ Babilonia lo imaginá ku su murayanan i kanal di awa aparentemente impenetrabel lo proteh’é kontra e enemigu. E ta bisa su mes ku “no tin ningun otro” ku un dia lo por okupá su posishon supremo. E no ta imaginá su mes ku lo e por bira “un biuda,” pèrdiendo tantu su gobernante di imperio komo su ‘yunan,’ esta su habitantenan. Pero no tin niun muraya ku por proteh’é kontra Yehova Dios su brasa di vengansa! Yehova lo bisa despues: “Maske Babilonia subi na shelu, i maske e hasi e haltura di su forsa inalkansabel, di mi parti e sakeadónan lo bai serka dje.”—Yeremías 51:53.

14. Den ki sentido Babilonia lo “pèrdè yu i bira biuda”?

¹⁴ Kiko lo pasa ku Babilonia? Yehova ta kontinuá: “Pero e dos kosnan aki lo bini di ripiente riba bo, den un solo dia: lo bo pèrdè yu i bira biuda. Den nan midí kompleto nan tin ku bini riba bo, pa motibu di e abundansia di bo brueria, pa motibu di e pleno poder di bo enkantonan—na gran kantidat.” (Isaías 47:9) Sí, di ripiente Babilonia lo pèrdè su posishon supremo komo potensia mundial. Den e teranan oriental di antigwedat, e pió eksperensianan ku un muhé por a pasa aden ta di bira biuda i pèrdè yu. Nos no sa kuantu “yu” Babilonia ta pèrdè riba e anochi ku el a kai.d Sin embargo, na su debido tempu, e stat ei lo keda totalmente bandoná. (Yeremías 51:29) Tambe lo e bira biuda den e sentido di ku su reinan lo ser bahá for di nan trono.

15. Ademas di e manera kruel ku Babilonia a trata e hudiunan, pa ki otro motibu Yehova ta furioso kuné?

¹⁵ Sin embargo, e manera kruel ku Babilonia a trata e hudiunan no ta e úniko motibu pakiko Yehova ta bira furioso. ‘E abundansia di su brueria’ tambe ta pone Yehova rabia. E Lei ku Dios a duna Israel ta kondená e práktika di spiritismo; pero Babilonia ta praktiká esei na un manera ferviente. (Deuteronomio 18:10-12; Ezekiel 21:21) E buki Social Life Among the Assyrians and Babylonians (Bida Sosial di Asiria i Babilonia) ta bisa ku e babilonionan tabata biba ku miedu konstante di e kantidat innumerabel di demoño ku, segun nan, tabata rondoná nan.”

Konfiando den Maldat

16, 17. (a) Kon Babilonia ta ‘konfia den su maldat’? (b) Pakiko e fin di Babilonia ta inevitabel?

¹⁶ E miradónan di destino di Babilonia lo salb’é? Yehova ta kontestá: “Bo a sigui konfia den bo maldat. Bo a bisa: ‘No tin niun hende ta mira mi.’ Bo sabiduria i bo konosementu—esei ta loke a desviá bo; i bo ta sigui bisa den bo kurason: ‘Ami ta, i no tin ningun otro.’” (Isaías 47:10) Babilonia ta pensa ku su sabiduria mundano i religioso, su poder militar i su krueldat astuto por pèrmitié mantené su posishon komo potensia mundial. E ta kere ku ningun hende no por ‘mir’é,’ esta, ten’é responsabel pa su malechonan. Ni e no ta mira un rival na horizonte. “Ami ta, i no tin ningun otro,” e ta bisa su mes.

¹⁷ Sin embargo, pa medio di un otro profeta Yehova ta duna e spièrtamentu: “Un hende por skonde den lugánan sekreto sin ku ami mes ta mir’é?” (Yeremías 23:24; Hebreonan 4:13) P’esei Yehova ta deklará: “Riba bo kalamidat tin ku bini; lo bo no konosé ningun enkanto kontra dje. I riba bo atversidat lo kai; lo bo no por evit’é. I riba bo lo bini di ripiente un ruina ku bo no ta kustumbrá di konosé.” (Isaías 47:11) Ni e diosnan di Babilonia ni e “enkanto” mágiko di su spiritistanan no por evitá e binidero kalamidat—unu ku e no a yega di eksperimentá nunka!

E Konseheronan di Babilonia Ta Frakasá

18, 19. Kon e konfiansa ku Babilonia tin den su konseheronan lo resultá di ta desastroso?

¹⁸ Ku un tono hopi sarkástiko, Yehova ta ordená: “Para ketu awor, ku bo enkantonan i ku e abundansia di bo brueria, den kua bo a traha duru desde bo hubentut; pa asina kisas lo bo por saka probecho, asina kisas lo bo por hinka miedu den hende.” (Isaías 47:12) Yehova ta reta Babilonia p’e “para ketu,” òf pa e no hasi kambio, ma pa e sigui konfia den arte mágiko. Al fin i al kabo, ku hopi esfuerso el a dediká su mes komo nashon pa desaroyá e práktika di spiritismo desde su “hubentut.”

¹⁹ Pero Yehova ta hasi bofon di dje, bisando: “Bo a kansa dje multitut di bo konseheronan. Laga nan lanta para awor, i salba bo, e adoradónan di shelu, e miradónan di strea, esnan ku ta divulgá konosementu ora di luna nobo relashoná ku e kosnan ku lo bini riba bo.” (Isaías 47:13)e Babilonia lo presensiá e frakaso total di su konseheronan. Bèrdat e astrologia di Babilonia ta algu ku a desaroyá durante siglonan di opservá strea. Pero riba e anochi di su kaida, e frakaso tristu di su astrólogonan lo mustra klaramente ku miramentu di destino no ta yuda ku nada.—Daniel 5:7, 8.

20. Kiko lo sosodé ku e konseheronan di Babilonia?

²⁰ Yehova ta konkluí e sekshon aki di e profesia, bisando: “Mira! Nan a bira manera stòmpi di maishi. Un kandela sigur lo kima nan. Nan lo no libra nan alma for dje poder dje vlam. Lo no tin brio di karbon pa hende keinta nan mes, ni lus di kandela pa kai sinta dilanti dje. Asina nan lo bira sigur pa bo, esnan ku ken bo a traha duru komo bo enkantadónan desde bo hubentut. Realmente nan lo kana dual, kada un na su propio region. Lo no tin niun hende pa salba bo.” (Isaías 47:14, 15) Sí, kandela ta warda e konseheronan falsu aki. No un kandela agradabel rònt di kua hende por keinta nan kurpa, sino un kandela destruktivo ku lo demostrá ku e konseheronan falsu ta mes inútil ku yerba seku. Nada straño anto ku e konseheronan di Babilonia lo hui den pániko! Unabes ku Babilonia a pèrdè su último apoyo, lo no tin ningun hende ku por salb’é. Lo e sufri e mesun kalamidat ku el a kousa Yerúsalèm.—Yeremías 11:12.

21. Kon i na ki tempu e palabranan profétiko di Isaías ta kumpli?

²¹ Na aña 539 promé ku Era Komun, e palabranan inspirá aki a kuminsá kumpli. E ehérsitonan di e medo i e pèrsonan bou di e liderato di Siro ta kapturá e stat i ta mata e rei ku ta na mando, Bèlsasar. (Daniel 5:1-4, 30) Den un solo anochi nan ta tumba Babilonia for di su posishon di dominashon mundial. Dje manera ei ta yega un fin na e dominio dje rasa semítiko i awor mundu ta kai bou di dominio dje rasa ario. Babilonia mes ta kuminsá un periodo largu di dekadensia. Pa siglo 4 di nos Era Komun e no ta nada mas ku un “monton di piedra.” (Yeremías 51:37) Di e manera ei e profesia di Isaías a kumpli kompletamente.

Un Babilonia Moderno

22. Ki lès tokante orguyo e kaida di Babilonia ta siña nos?

²² E profesia di Isaías ta duna hopi kos pa pensa ariba. Pa kuminsá, e ta enfatisá kon peligroso orguyo i arogansia ta. E kaida di e Babilonia orguyoso ei ta duna un ehèmpel di e proverbio bíbliko: “Orguyo ta promé ku kaida, i un spiritu halsá promé ku trompekamentu.” (Proverbionan 16:18) Tin biaha orguyo ta dominá nos naturalesa imperfekto, pero si nos “hincha di orguyo” nos por kai “den reproche i un las di Diabel.” (1 Timoteo 3:6, 7) Ta bon anto pa nos sigui e konseho di Santiago: “Humiá boso den e bista di Yehova i lo e halsa boso.”—Santiago 4:10.

23. E profesia di Isaías ta yuda nos konfia den ken?

²³ Tambe e palabranan profétiko aki ta yuda nos konfia den Yehova, kende ta mas poderoso ku tur su opositornan. (Salmo 24:8; 34:7; 50:15; 91:14, 15) Esaki ta un rekordatorio ku por konsolá nos den e tempu difísil aki. Konfiansa den Yehova ta fortifiká nos determinashon pa permanesé sin kulpa den su bista, sabiendo ku “e futuro dje hòmber [sin kulpa] lo ta pasífiko.” (Salmo 37:37, 38) En bista di Satanas su “obranan mañoso,” semper ta sabí pa akudí na Yehova i no konfia den nos mes abilidatnan.—Efesionan 6:10-13, nota na pia di página.

24, 25. (a) Pakiko no tin lógika den astrologia, pero pakiko hopi hende ta akudí na dje tòg? (b) Ki motibunan kristiannan tin pa evitá superstishon?

²⁴ E profesia ta spièrta nos kontra práktikanan spiritista, spesialmente astrologia. (Galationan 5:20, 21) Ora Babilonia a kai, astrologia no a pèrdè su popularidat. Interesantemente, e buki Great Cities of the Ancient World (Gran Statnan di e Mundu Antiguo) ta remarká ku e konstelashonnan ku e babilonionan a pone riba mapa a “move” for di nan posishon original. Esei ta “demostrá e ridikules di henter e idea [di astrologia].” Tòg, astrologia ta sigui gosa di gran aseptashon, i hopi korant tin un sekshon di horoskop.

²⁵ Kiko ta pone tantu hende asina—hopi di nan bon eduká—buska señal den streanan òf partisipá den otro aktividatnan ilógiko i superstisioso? The World Book Encyclopedia ta bisa: “Tanten ku hende tin miedu di otro i ta sinti nan insigur tokante futuro, superstishon ta sigui forma parti di bida.” Miedu i insiguridat ta pone algun hende bira superstisioso. Pero kristiannan ta evitá superstishon. Nan no tin miedu di hende; Yehova ta sostené nan. (Salmo 6:4-10) I nan no ta sinti nan insigur tokante futuro; nan konosé e propósito revelá di Yehova i nan ta konvensí ku “te na tempu indefiní e konseho mes di Yehova lo keda para.” (Salmo 33:11) Si nos armonisá nos bida ku e konseho di Yehova, esei lo por garantisá nos un futuro largu i sigur.

26. Kon “e rasonamentunan di hende sabí” a resultá di ta “enbano”?

²⁶ Den añanan resien algun hende a hasi intento pa konosé futuro den maneranan mas “sientífiko.” Asta tin un ramo ku yama futurologia, definí komo “un estudio ku ta trata ku posibilidatnan pa futuro basá riba tendensianan aktual.” Por ehèmpel, na 1972 un grupo di akadémiko i empresario konosí komo e Klup di Roma a predisí ku pa 1992 tur reservá di oro, merkurio, zink i petroli lo a kaba. Wèl, ounke mundu a haña su mes ku problemanan teribel desde 1972, e pronóstiko ei a faya por kompleto. Ainda tera tin reserva di oro, merkurio, zink i petroli. Sí, hende a dediká tur su energia pa purba predisí futuro, pero semper su pronóstikonan ta resultá inkonfiabel. Berdaderamente, “e rasonamentunan di hende sabí ta enbano”!—1 Korintionan 3:20.

Fin di Babilonia e Grandi Ta Serka

27. Na ki tempu i den ki manera Babilonia e Grandi a kai meskos ku Babilonia a kai na aña 539 promé ku Era Komun?

²⁷ E religionnan di awendia a sigui ku hopi di e doktrinanan di Babilonia di antigwedat. P’esei ta na su lugá ku e imperio di religion falsu yama Babilonia e Grandi. (Revelashon 17:5) E imperio internashonal ei di religion a sufri un kaida kaba meskos ku esun ku Babilonia di antigwedat a sufri na aña 539 promé ku Era Komun. (Revelashon 14:8; 18:2) Na 1919, e restu di e rumannan di Kristu a sali for di koutiverio spiritual i a libra nan mes di tur influensia religioso di kristiandat, un parti dominante di Babilonia e Grandi. Desde e tempu ei kristiandat a pèrdè un influensia konsiderabel den hopi pais kaminda un tempu e tabata fuerte.

28. Kon Babilonia e Grandi ta broma, pero kiko ta sper’é?

²⁸ Sin embargo, e kaida ei ta djis un señal di e destrukshon final di religion falsu. Interesantemente, e profesia di Revelashon tokante e destrukshon di Babilonia e Grandi ta pone nos kòrda e palabranan profétiko registrá na Isaías 47:8 i 9. Meskos ku Babilonia di antigwedat, Babilonia e Grandi di awendia ta bisa: “Mi ta sintá komo reina, i mi no ta biuda, i nunka lo mi mira lamentashon.” Pero “den un solo dia su plaganan lo bini, morto i lamentashon i hamber, i lo e ser kimá kompletamente ku kandela, pasobra Yehova Dios, ku a husgu’é ta fuerte.” Pues e palabranan profétiko registrá den Isaías kapítulo 47 ta sirbi komo un spièrtamentu pa esnan ku ainda ta afiliá na religion falsu. Si nan kier evitá di ser destruí huntu kuné, nan tin ku obedesé e mandato inspirá pa Dios: “Sali for di dje”!—Revelashon 18:4, 7, 8.

[Nota]

[Plachi na página 111]

Babilonia, amante di plaser, lo baha den stòf

[Plachi na página 114]

E astrólogonan di Babilonia lo ta inkapas pa predisí kaida di e stat

[Plachi na página 116]

Kalènder astrológiko di Babilonia, durante e promé mil aña promé ku Era Komun

[Plachi na página 119]

Pronto e Babilonia di awendia lo pasa pa historia