Ami Mes Lo Buska Mi Karnénan

 1. Dikon Yehova a kompará su mes ku un mama?

DEN tempu di Profeta Isaías, Yehova a hasi e siguiente pregunta: “Un muhé por lubidá su yu ku e ta kria na pechu?” Dios a bisa su pueblo ku si asta e muhénan ei lubidá, ‘e sí lo no lubidá nan.’ (Isa. 49:15) Yehova no sa kompará su mes ku un mama, pero e biaha akí sí el a hasi esei. Yehova a kompará e amor ku e ta sinti pa su sirbidónan ku e amor fuerte ku un mama tin pa su yu. El a hasi esei pa laga su sirbidónan sa ku e ta stima nan masha hopi mes. Mayoria di mama por komprondé loke un ruman ku yama Jasmin a bisa: “Ora un mama ta kria su yu na pechu, nan ta forma un relashon masha será ku ta dura pa semper.”

 2. Kon Yehova ta sinti ora un di su yunan drif bai for di dje?

² Yehova sa ora un di su yunan stòp di prediká i bai reunion, i esei ta hasié masha tristu. Pues, imaginá bo kuantu doló e ta sinti ora e mira ku tur aña míles di su sirbidónan ta bira inaktivo.b

 3. Kiko Yehova ke?

³ Mayoria di e rumannan stimá ei ku a bira inaktivo ta bolbe na e kongregashon, i nos ta risibí nan ku brasa habrí! Yehova ke pa nan bolbe, i nos tambe ke esei. (1 Ped. 2:25) Pero, kon nos por yuda e rumannan inaktivo bolbe? Promé ku nos kontestá e pregunta ei, ta bon pa nos sa dikon algun di nos rumannan ta stòp di bai reunion i di prediká.

 4. Kiko trabou por hasi ku algun ruman?

⁴ Algun di nos rumannan a permití nan trabou bira e kos di mas importante den nan bida. Hung,c un ruman ku ta biba na Asia, a atmití: “Mi tabata dediká demasiado tempu i energia na mi trabou. M’a gaña mi mes pensando ku si mi gana mas plaka, lo mi por sirbi Yehova mihó. Pues m’a traha mas tantu. M’a kuminsá falta mas i mas reunion te ku m’a stòp di bai reunion kompletamente. Ta parse ku Satanas ta usa e mundu pa hala hende tiki tiki for di Yehova.”

 5. Kiko a pasa ku un ruman debí na tur e problemanan ku e tabatin?

⁵ Algun di nos rumannan ta sinti ku nan ta hoga den nan problemanan. Anne di Gran Bretaña tin sinku yu. El a splika: “Mi yu di mas chikitu a nase ku un desabilidat físiko. Despues, mi di tres yu a ser ekspulsá i mi di kuater yu a haña un malesa mental. M’a bira asina deprimí ku m’a stòp di bai reunion i di prediká. Ku tempu, m’a bira inaktivo.” Nos kurason ta kibra ora nos tende ku Anne ku su famia, meskos ku hopi otro ruman, ta pasa den problema difísil asina!

 6. Dikon un ruman ku no ta sigui e konseho na Kolosensenan 3:13 por kore e rísiko di drif bai for di Yehova su pueblo?

⁶ Lesa Kolosensenan 3:13. Algun di Yehova su sirbidónan a rabia debí na loke un ruman den kongregashon a hasi. Apòstel Pablo a atmití ku tin biaha nos tin “motibu [bálido] pa keha” un ruman. Kisas un ruman a asta trata nos na un manera inhustu. Si nos no tene kuidou, nos por kuminsá karga renkor. I ku tempu rabia, por pone un ruman drif bai for di Yehova su pueblo. Wak loke a pasa ku Pablo, un ruman na Suramérika. Un hende a gaña riba dje i a akus’é di a hasi algu malu. Pablo tabata inosente, pero e ansianonan a kere ku e tabata kulpabel i el a pèrdè privilegio den kongregashon. Kiko el a hasi? El a bisa: “M’a rabia asina tantu ku tiki tiki m’a drif bai for di e kongregashon.”

 7. Kiko por pasa un ruman ku tin sintimentu di kulpa?

⁷ Si den pasado un ruman a kometé un piká serio, e por keda ku sintimentu di kulpa pa basta tempu. Kisas e ta pensa ku nunka mas Dios por stim’é. Asta si el a arepentí, e por sinti ku e no ta digno mas pa ta un di Yehova su sirbidónan. Un ruman ku yama Francisco a sinti asina. El a bisa: “M’a ser reprendé debí ku m’a kometé inmoralidat seksual. Aunke na promé instante m’a sigui bai reunion, m’a bira asina deprimí i m’a sinti ku mi no ta meresé di ta entre Yehova su pueblo. Mi konsenshi a sigui molestiá mi, i mi tabata konvensí ku Yehova no a pordoná mi. Ku tempu, m’a stòp di prediká i bai reunion.” Bo kurason ta hasi doló pa bo rumannan ku ta pasa den situashon manera e kuaternan ku nos a menshoná? Mas importante ainda, kiko bo ta kere Yehova ta sinti pa nan?

 8. Akaso Yehova ta lubidá e rumannan ku un tempu tabata sirbié? Splika.

⁸ Yehova nunka ta lubidá e rumannan ku tabata sirbié pero ku a stòp temporalmente; ni nunka e ta lubidá e trabou ku nan a hasi den su sirbishi. (Heb. 6:10) Profeta Isaías a skirbi un ilustrashon masha bunita ku ta mustra ku Yehova ta stima i kuida su pueblo. El a skirbi: “Manera un wardadó di karné lo e kuida su tou, lo e kohe e lamchinan den su brasa, i tene nan serka di su kurason.” (Isa. 40:11) Kon Yehova, e Gran Wardador, ta sinti ora un di su karnénan dual for di e tou? Hesus a laga su disipelnan sa kon Yehova ta sinti ora el a puntra nan: “Kiko boso ta pensa? Si un hende tin 100 karné i ún di nan dual, lo e no laga e 99 karnénan riba seru i bai buska esun ku a dual? I si akaso e hañ’é, mi ta sigurá boso ku e ta alegrá mas pa motibu di esun ei ku pa motibu di e 99 karnénan ku no a dual.”—Mat. 18:12, 13.

 9. Kon un bon wardadó ta trata su karnénan? (Wak e plachi riba portada.)

⁹ Dikon nos por kompará Yehova ku un wardadó di karné? Pasobra un wardadó ta stima su karnénan mashá. Por ehèmpel, David a bringa kontra un leon i un ber pa protehá su tou. (1 Sam. 17:34, 35) Un bon wardadó siguramente sa si un di su karnénan pèrdè. (Huan 10:3, 14) Un wardadó asina lo laga su 99 otro karnénan den kurá òf lo pidi un otro wardadó pa kuida nan pa hasi sigur ku nan ta safe. Despues lo e bai buska esun karné pèrdí ei. Hesus a usa e ilustrashon ei pa siña nos un bèrdat importante: “Mi Tata ku ta den shelu no ta deseá pa ni ún di e chikitunan akí bai pèrdí.”—Mat. 18:14.

10. Di akuerdo ku Ezekiel 34:11-16, kiko Yehova a primintí ku lo e hasi pa su karnénan pèrdí?

¹⁰ Yehova ta stima kada un di nos, inkluso “e chikitunan” ku a dual for di su tou. Pa medio di Profeta Ezekiel, Dios a primintí ku lo e buska su karnénan pèrdí i yuda nan haña un amistat será kuné atrobe. Anto el a bisa kiko lo e hasi pa reskatá nan. Lo e hasi meskos ku loke un wardadó israelita lo a hasi si un di su karnénan ta pèrdí. (Lesa Ezekiel 34:11-16.) Promé, e wardadó lo buska e karné. Esei por rekerí hopi tempu i esfuerso. Di dos, ora e haña e karné pèrdí ei, lo e hib’é bèk na e tou. Di tres, si e karné ta heridá i hambrá, e wardadó, ku hopi amor, lo yuda e karné suak, lo e mara su heridanan, karg’é i dun’é kuminda. Ansiano ta wardadó di “e tou di Dios.” Nan mester hasi e mesun tres kosnan ei pa yuda kualke ruman ku a dual for di e kongregashon. (1 Ped. 5:2, 3) E ansianonan mester buska nan, yuda nan bolbe na e kongregashon i demostrá ku nan ta stima nan yudando nan bira amigu di Yehova atrobe.d

11. Kiko un bon wardadó tabata sa?

¹¹ Un bon wardadó tabata sa ku karné por pèrdè. I si un karné dual for di e tou, e wardadó lo no a maltrat’é. Wak e ehèmpel ku Dios a pone ora el a yuda algun di su sirbidónan den tempu bíbliko.

12. Kon Yehova a trata Yonas?

¹² Profeta Yonas a hui for di su asignashon. Pero Yehova no tabata lihé pa pèrdè speransa den Yonas. Manera un bon wardadó, Yehova a reskat’é i a yud’é haña e forsa ku e tabatin mester pa kumpli ku su asignashon. (Yon. 2:7; 3:1, 2) Mas despues, Dios a usa un mata di kalbas pa yuda Yonas komprondé ku bida di kada hende ta balioso p’e. (Yon. 4:10, 11) Kiko nos ta siña? Ansiano no mester ta lihé pa pèrdè speransa den e rumannan ku a bira inaktivo. Mas bien, nan mester purba di komprondé kiko a pone e karné dual for di e tou. I ora e karné ei bolbe serka Yehova, e ansianonan ta sigui demostrá nan amor p’e i interes den dje.

13. Kiko nos por siña for di e manera ku Yehova a trata e eskritor di Salmo 73?

¹³ E eskritor di Salmo 73 a bira desanimá ora el a mira ku e malbadonan semper ta parse di tin éksito. El a puntra su mes si tabata bale la pena pa hasi Dios su boluntat. (Sal. 73:12, 13, 16) Kiko Yehova a hasi? E no a kondená e salmista ei. De echo, Dios a lag’é skirbi su palabranan den Beibel. Ku tempu, e salmista a komprondé ku ser amigu di Yehova ta bal mas ku kualke otro kos den bida. (Sal. 73:23, 24, 26, 28) Kiko nos ta siña? Ansiano no mester ta lihé pa husga e rumannan ku a kuminsá duda si ta bale la pena pa sigui sirbi Yehova. En bes di kondená nan, e ansianonan mester purba di komprondé dikon nan ta papia i hasi asina. Ta e ora ei numa e ansianonan por usa Beibel pa animá nan.

14. Dikon Elías tabatin mester di yudansa, i kon Yehova a yud’é?

¹⁴ Profeta Elías a hui pa Reina Yézabèl. (1 Rei. 19:1-3) Elías a pensa ku ta e so a sobra komo profeta di Yehova i ku su trabou tabata enbano. El a bira asina deprimí ku e tabata kier a muri. (1 Rei. 19:4, 10) Yehova no a kondená Elías. En bes di esei, el a sigurá Elías ku e no tabata su so, ku e por a konfia den e poder di Dios i ku ainda tabatin hopi trabou pa e hasi. Amablemente Yehova a skucha Elías su preokupashonnan i a dun’é asignashon nobo. (1 Rei. 19:11-16, 18) Kiko nos ta siña? Nos tur, spesialmente e ansianonan, mester trata Yehova su karnénan na un manera amabel. Sea ku un ruman bisa ku e ta rabiá òf ku e no meresé Yehova su pordon, e ansianonan mester lag’é deshogá su kurason i skuch’é. Despues, nan lo purba di yuda e karné pèrdí ei mira ku Yehova ta stim’é masha hopi mes.

15. Di akuerdo ku Huan 6:39, kon Hesus a mira e karnénan di su Tata?

¹⁵ Kon Yehova ke pa nos mira su karnénan pèrdí? Nos por siña for di e ehèmpel di Hesus. E tabata sa ku kada un di Yehova su karnénan ta presioso den Su bista. P’esei, Hesus a hasi tur loke e tabata por pa yuda “e karnénan pèrdí di e kas di Israel” bolbe serka Yehova. (Mat. 15:24; Luk. 19:9, 10) Debí ku Hesus tabata un bon wardador, el a hasi tur loke e tabata por pa niun di Yehova su karnénan no pèrdè.—Lesa Huan 6:39.

16-17. Kon e ansianonan mester sinti tokante yuda e rumannan ku a dual? (Wak e kuadro “Kon un Karné Pèrdí Por Sinti Su Mes?”)

¹⁶ Apòstel Pablo a animá e ansianonan di e kongregashon na Efeso pa imitá Hesus. El a bisa: “Boso mester yuda esnan ku ta suak. I boso mester kòrda e palabranan di Señor Hesus, ora e mes a bisa: ‘Tin mas felisidat den duna ku den risibí.’” (Echo. 20:17, 35) Sin duda, e ansianonan awe tin e mesun responsabilidat ei. Un ansiano na Spaña ku yama Salvador a bisa: “Ora mi pensa riba kuantu Yehova ta stima su karnénan pèrdí, mi ta sinti mi motivá pa hasi tur loke mi por pa yuda nan. Mi sa ku Yehova ke pa mi kuida nan.”

¹⁷ Tur e rumannan menshoná den e artíkulo akí a haña yudansa i a bolbe serka Yehova. Na e momentonan akí, hopi di nos rumannan ku a dual tambe ke bolbe. Kiko nos por hasi pa yuda nan? Den e siguiente artíkulo, nos lo analisá esei den mas detaye.