Identificando e Clase Corecto di Mensahero

“Ami ta . . . Esun cu ta haci e palabra di su sirbidor ser realisá, i Esun cu ta efectuá completamente e conseho di su mes mensaheronan.”—ISAIAS 44:25, 26.

 1. Con Jehova ta identificá e clase corecto di mensahero, i con e ta desenmascará esnan falsu?

JEHOVA DIOS ta e Magnífico Identificador di su mensaheronan berdadero. E ta identificá nan dor di laga e mensahenan cu e ta entregá mediante nan ser realisá. Tambe Jehova ta e Gran Desenmascarador di mensaheronan falsu. Con e ta desenmascará nan? E ta frustra nan señalnan i prediccionnan. Den e manera aki e ta mustra cu nan ta pronosticadornan cu a nombra nan mes, kende nan mensahenan realmente ta brota for di nan propio razonamentu falsu—sí, nan pensamentu bobo i carnal!

 2. Ki conflicto entre mensaheronan a tuma lugá den tempu di israelita?

² Tantu Isaías como Ezekiel a afirmá cu nan ta mensaheronan di Jehova Dios. Esei tabata e caso? Laga nos mira. Isaías a profetisá den Jerusalem for di rond di 778 P.E.C. te cu algun tempu despues di 732 P.E.C. Ezekiel a ser exiliá na Babilonia na 617 P.E.C. El a profetisá na su rumannan hudiu aya. Tur dos profeta a anunciá cu curashi cu Jerusalem lo a ser destruí. Otro profetanan a bisa cu Dios lo no a laga esaki tuma lugá. Ken a resultá di ta e clase corecto di mensahero?

Jehova Ta Desenmascará Profetanan Falsu

3, 4. (a) Cua dos mensahe contrario na otro a ser entregá n’e israelitanan na Babilonia, i con Jehova a desenmascará un mensahero falsu? (b) Kico Jehova a bisa lo sosodé cu profetanan falsu?

³ Tempu cu Ezekiel tabata na Babilonia, el a ricibí un vision di loke tabata sosodiendo den e tempel di Jerusalem. N’e entrada di su porta oost tabatin 25 homber. Entre nan tabatin dos prins, Jaazanías i Pelatías. Con Jehova a mira nan? Ezekiel 11:2, 3 ta contestá: “Yu di hende, esakinan ta e hombernan cu ta tramando maldad i cu ta asesorando mal conseho contra e stad aki; cu ta bisando, ‘E construccion di casnan no ta cerca di tuma lugá?’” E mensaheronan presumido aki di pas tabata bisando, ‘No tin peliger pa Jerusalem. Ata, pronto nos ta bai traha mas cas den dje!’ Pues Dios a bisa Ezekiel pa contrarestá esei den un profecia contra e mensaheronan mentiroso aki. Den versículo 13 di capítulo 11, Ezekiel ta bisa nos loke a sosodé cu un di nan: “A sosodé cu tan pronto cu mi a profetisá, Pelatías e yu di Benaya mes a muri.” Probablemente esaki a sosodé pasobra Pelatías tabata e prins di mas prominente i influyente i e idólatra principal. Su morto repentino a proba cu e tabata un profeta falsu!

⁴ Jehova su ehecucion riba Pelatías no a stop e otro profetanan falsu di gaña den nomber di Dios. E mentirosonan aki a sigui den nan curso di locura di predicí cosnan contra e boluntad di Dios. P’esei Jehova Dios a bisa Ezekiel: “Ai dje profetanan estúpido, cu ta cana tras di nan propio spiritu, ora no tin nada cu nan a mira!” Mescos cu Pelatías, nan lo no bai t’ei “mas” pa di un manera desafiante imaginá pa Jerusalem “un vision di pas, ora no tin pas.”—Ezekiel 13:3, 15, 16.

 5, 6. Apesar di tur e mensaheronan falsu, con Isaías a ser vindicá como un profeta berdadero?

⁵ Pa loke ta Isaías, tur su mensahenan divino tocante Jerusalem a ser realisá. Den e zomer di 607 P.E.C., e babilonionan a destruí e stad i a bai cu un resto hudiu bek na Babilonia como prezu. (2 Crónicanan 36:15-21; Ezekiel 22:28; Daniel 9:2) E calamidadnan aki a stop e profetanan falsu di bombardiá e pueblo di Dios cu papiamentu bano? No, e mensaheronan mentiroso ei a sigui nan curso!

⁶ Como si fuera esaki no tabata basta, e exiliadonan israelita tabata exponé tambe na Babilonia su pronosticadornan, adivinadornan i astrólogonan bromadó. Sin embargo, Jehova a demostrá cu tur e mensaheronan falsu aki tabata hende bobo frustrá, profetisando net contrario di loke a sosodé. Cu tempu el a demostrá cu Ezekiel tabata su mensahero berdadero, mescos tambe Isaías. Jehova a cumpli cu tur e palabranan cu el a papia via nan, net manera el a primintí: “Mi ta frustrando e señalnan di esnan di abla bashí, i ami ta Esun cu ta haci adivinadornan mes actua locamente; Esun cu ta pone hombernan sabí hala bai patras, i Esun cu ta cambia asta nan conocimentu den bobedad; Esun cu ta haci e palabra di su sirbidor ser realisá, i Esun cu ta efectuá completamente e conseho di su mes mensaheronan.”—Isaías 44:25, 26.

Mensahenan Pasmoso Tocante Babilonia i Jerusalem

 7, 8. Ki mensahe inspirá Isaías tabatin pa Babilonia, i kico su palabranan a nificá?

⁷ Huda i Jerusalem tabata pa bira desolá, sin ningun habitante humano, pa 70 aña. Sin embargo, Jehova a declará mediante Isaías i Ezekiel cu e stad lo a ser reconstruí i e tera habitá na e tempu exacto cu el a predicí! Esaki tabata un prediccion asombroso. Pakico? Pasobra Babilonia tabata conocí como un nacion cu nunca tabata libra su prizoneronan. (Isaías 14:4, 15-17) Pues ta ken lo por a libra e prezunan aki? Ken lo por a deribá e poderoso Babilonia, cu su murayanan colosal i sistema di defensa basá riba riu? Jehova Todopoderoso tabata por! I el a bisa cu lo el a hacié: “Ami ta . . . Esun cu ta bisa e profundidad di awa [esta, e stad su sistema di defensa basá riba awa], ‘Evaporá; i tur bo riunan lo mi seca’; Esun cu ta bisa di Ciro, ‘E ta mi wardadó, i tur loke mi tin deleite aden lo e realisá completamente’; asta den mi bisamentu di Jerusalem, ‘Lo e ser reconstruí,’ i dje tempel, ‘Bo fundeshi lo ser poné.’”—Isaías 44:25, 27, 28.

⁸ Pensa un ratu! Riu Eufrátes, un barera berdaderamente formidabel pa hende, tabata pa Jehova manera un gota di awa riba un superficie super cayente. Sssht, e barera lo a evaporá! Babilonia lo a cai. Aunke ainda tabata rond di 150 aña promé cu e nacementu di Ciro e perso, Jehova a laga Isaías profetisá cu e rey aki lo a capturá Babilonia i libra e prezunan hudiu autorisando nan pa bolbe bek i reconstruí Jerusalem i su tempel.

 9. Ken Jehova a nombra como su agente pa castigá Babilonia?

⁹ Nos ta haña e profecia aki na Isaías 45:1-3: “Esaki ta loke Jehova a bisa na su ungí, na Ciro, kende su man drechi mi a gara, pa someté nacionnan su dilanti, . . . pa habri dilanti dje e portanan di dos blad, di manera cu asta e portanan mes lo no ser cerá: ‘Dilanti bo ami mes lo bai, i lo mi parehá e desigualdadnan dje tereno. E portanan di koper lo mi kibra na pida-pida, i e baranan di heru lo mi corta. I lo mi duná bo e tesoronan cu ta den e scuridad i e tesoronan scondí cu ta den e lugánan di sconde, pa bo por sa cu ami ta Jehova, Esun cu ta yamá bo na bo nomber.’”

10. Den ki manera Ciro a ser “ungí,” i con Jehova por a papia cuné mas cu shen aña promé cu el a nace?

¹⁰ Ripará cu Jehova ta papia cu Ciro como si fuera e ta na bida caba. Esaki ta armonisá cu Pablo su declaracion cu Jehova “ta yama e cosnan cu no ta como si fuera nan ta.” (Romanonan 4:17) Tambe, Dios ta identificá Ciro como “su ungí.” Pakico el a haci esei? Al fin i al cabo, nunca e sumo sacerdote di Jehova no a basha zeta santu di ungimentu riba cabes di Ciro. Berdad, pero esaki ta un ungimentu profético. E ta indicá un instalacion den un posicion special di autoridad ehecutivo. P’esei Dios por a papia dje nombramentu delantá di Ciro como un ungimentu.—Compará cu 1 Reynan 19:15-17; 2 Reynan 8:13.

Dios Ta Cumpli cu e Palabranan di Su Mensaheronan

11. Pakico e habitantenan di Babilonia a sinti nan sigur?

¹¹ N’e tempu cu Ciro a bai contra Babilonia, su ciudadanonan a sinti nan masha protehá i sigur. Nan stad tabata rondoná pa un ‘gracht’ protectivo, profundo i hanchu, formá dor di Riu Eufrátes. Caminda e riu a core dor dje stad, tabatin un waf continuo a lo largu dje oriya parti oost dje riu. Pa separ’é for dje stad, Nabucodonosor a construí loke el a yama “un muraya grandi, cu mescos cu un ceru, no por ser trasladá . . . Su rand [el] a lanta mes haltu cu un ceru.”a E muraya aki tabatin portanan cu blad grandi di koper. Pa drenta nan, bo tabatin cu subi for di cantu dje riu. Nada straño cu e prizoneronan di Babilonia a perde tur speransa di por a sali liber un dia!

12, 13. Con Jehova su palabranan mediante su mensahero Isaías a ser realisá ora Babilonia a cai den man di Ciro?

¹² Pero no e hudiunan prezu ei cu tabatin fe den Jehova! Nan tabatin un speransa briyante. Mediante su profetanan, Dios a primintí di libra nan. Con Dios a cumpli cu su promesa? Ciro a manda su ehércitonan desviá Riu Eufrátes na un punto cu tabata vários kilometer nort di Babilonia. Asina, e stad su defensa principal a bira un fondo di riu relativamente secu. Riba e anochi crucial, coredónan di paranda den Babilonia di un manera descuidá a laga e portanan di dos blad cantu dje awanan di Eufrátes habrí. Jehova no a kibra e portanan di koper literalmente na pida-pida; ni e no a corta e baranan di heru cu tabata cera nan, pero su maniobra maraviyoso pa tene nan habrí i sin proteccion di bara tabatin e mésun efecto. E murayanan di Babilonia tabata inútil. Ciro su trupanan no tabatin nodi subi e murayanan pa drenta paden. Jehova a bai dilanti Ciro, eliminando “e desigualdadnan dje tereno,” sí, tur obstáculo. Isaías a resultá di ta Dios su berdadero mensahero.

¹³ Ora Ciro a haña control completo riba e stad, tur su tesoronan a cai den su man, incluyendo esnan hincá den cuartonan scur i scondí. Pakico Jehova Dios a haci esaki pa Ciro? Pa e por a sa cu Jehova, ‘Esun cu ta yam’é na su nomber,’ ta e Dios di berdadero profecia i e Señor Soberano di universo. Lo el a sa cu Dios a percurá p’e yega na poder pa libra Su pueblo, Israel.

14, 15. Con nos por sa cu Ciro a debe su victoria riba Babilonia na Jehova?

¹⁴ Scucha e palabranan di Jehova na Ciro: “Pa causa di mi sirbidor Jacob i di Israel mi scogí, mi a asta pasa na yamá bo na bo nomber; mi a pasa na duná bo un nomber di onor, aunke bo no a conocé mi. Ami ta Jehova, i no tin ningun otro. Cu excepcion di mi no tin otro Dios. Lo mi fahá bo fuertemente, aunke bo no a conocé mi, pa asina hende por sa for di salimentu di solo i for di su bahamentu cu no tin ningun otro fuera di mi. Ami ta Jehova, i no tin ningun otro. Ami, Jehova, kende ta forma lus i crea scuridad, haciendo pas [esta, pa su pueblo den exilio] i creando calamidad [pa Babilonia], ta haci tur e cosnan aki.”—Isaías 45:4-7.

¹⁵ E mérito p’e echo cu Ciro a conkistá Babilonia mester bai na Jehova, pasobra E tabata esun cu a fortalec’é pa cumpli cu Su deleite contra e stad malbado ei i libra Su pueblo prezu. Den esaki, Dios a manda su shelu yobe influencianan of forsanan hustu. El a manda su tera habri i producí sucesonan hustu i salbacion pa su pueblo den exilio. I su shelu i tera figurativo a respondé n’e mandamentu aki. (Isaías 45:8) Mas cu shen aña despues di su morto, Isaías a resultá di ta Jehova su mensahero berdadero!

E Bon Nobo dje Mensahero pa Síon!

16. Ki bon noticia por a ser proclamá den e stad desolá di Jerusalem ora Babilonia a sufri derota?

¹⁶ Pero tin mas. Isaías 52:7 ta papia di bon nobo pa Jerusalem: “Ki bunita riba e cerunan ta e pianan di esun cu ta trece bon nobo, esun cu ta publicá pas, esun cu ta trece bon nobo di algu mihó, esun cu ta publicá salbacion, esun cu ta bisa Síon: ‘Bo Dios a bira rey!’” Imaginá bo ki emocionante tabata pa mira un mensahero acercá Jerusalem for dje cerunan! E mester tin noticia. Kico e ta? Esei ta noticia excitante pa Síon. Noticia di pas, sí, noticia dje bon boluntad di Dios. Jerusalem i su tempel mester ser reconstruí! I e mensahero ta proclamá cu entusiasmo triunfante: “Bo Dios a bira rey!”

17, 18. Con e derota di Babilonia na man di Ciro a afectá Jehova su propio nomber?

¹⁷ Ora Jehova a permití e babilonionan tumba su trono típico riba cua e reynan dje liña di David a sinta, por a parce cu E no tabata Rey mas. Marduk, e dios principal di Babilonia, a parce di ta rey na lugá di dje. Sin embargo, ora e Dios di Síon a tumba Babilonia, el a demostrá su soberania universal—cu e tabata e Rey di mas grandi. I pa subrayá e echo aki, Jerusalem, “e stad dje gran Rey,” mester a ser reestablecí, huntu cu su tempel. (Mateo 5:35) En cuanto e mensahero cu a trece e bon noticia ei, aunke su pianan tabata tur na stof, sushi i na blar, pa esnan cu a stima Síon i su Dios, nan tabata mustra masha bunita mes!

¹⁸ Den un sentido profético, e caida di Babilonia a nificá cu e reino di Dios a ser establecí i cu esun cu tabata hiba bon noticia tabata un proclamador dje caida di Babilonia. Ademas, e ‘koerier’ di antigwedad aki, cu Isaías a profetisá di dje, a prefigurá un mensahero di bon noticia mas magnífico—mas magnífico debí na su contenido sublime i su tema di Reino, cu implicacionnan maraviyoso pa tur hende di fe.

19. Ki mensahe tocante e tera di Israel Jehova a duna mediante Ezekiel?

¹⁹ Ezekiel tambe a ricibí profecianan briyante di restoracion. El a profetisá: “Esaki ta loke e Señor Soberano Jehova a bisa, ‘. . . Lo mi causa tambe p’e stadnan ser habitá, i e lugánan desolá tin cu ser reconstruí. I hende siguramente lo bisa: “E tera aya cu tabata desolá a bira manera e hofi di Eden.”’”—Ezekiel 36:33, 35.

20. Ki exhortacion gososo Isaías a duna Jerusalem proféticamente?

²⁰ Den cautiverio na Babilonia, e pueblo di Dios tabata di luto riba Síon. (Salmo 137:1) Awor, nan por a alegrá. Isaías a exhortá: “Alegrá, sclama gososamente cu un solo bos, lugánan desolá di Jerusalem, pasobra Jehova a consolá su pueblo; el a cumpra Jerusalem di nobo. Jehova a desnudá su brasa santu dilanti wowo di tur e nacionnan; i tur e finnan dje tera tin cu mira e salbacion di nos Dios.”—Isaías 52:9, 10.

21. Con e palabranan di Isaías 52:9, 10 a ser cumplí despues dje derota di Babilonia?

²¹ Sí, Jehova su pueblo scogí tabatin gran motibu pa goso. Awor nan tabata bai ocupá di nobo e lugánan ei cu un tempu tabata desolá, haciendo nan bira manera e hofi di Eden. Jehova a “desnudá su brasa santu” pa nan. El a lora su manga, na moda di papia, pa traha pa trece su pueblo bek na nan patria stimá. Esaki no tabata un of otro incidente insignificante i iriparabel den historia. No, tur hende cu tabata na bida e tempu ei a mira Dios su ‘brasa desnudá’ ehercé poder den asuntunan humano pa por a efectuá e salbacion asombroso di un nacion. Nan a haña un prueba impecabel cu Isaías i Ezekiel tabata Jehova su mensaheronan berdadero. Ningun hende por a duda cu e Dios di Síon tabata e único Dios bibu i berdadero riba tur e tera. Na Isaías 35:2, nos ta lesa: “Lo tin esnan cu lo mira e gloria di Jehova, e splendor di nos Dios.” Esnan cu a aceptá e prueba aki di Jehova su Divinidad a cuminsá ador’é.

22. (a) Pa kico nos awe por ta gradicidu? (b) Pakico nos mester ta specialmente gradicidu cu Jehova ta desenmascará mensaheronan falsu?

²² Ki gradicidu nos mester ta cu Jehova ta identificá su mensaheronan berdadero! E ta en berdad “Esun cu ta haci e palabra di su sirbidor ser realisá, i Esun cu ta efectuá completamente e conseho di su mes mensaheronan.” (Isaías 44:26) E profecianan di restoracion cu el a duna Isaías i Ezekiel ta engrandecé su gran amor, bondad inmerecí i misericordia pa cu su sirbidornan. Siguramente, Jehova ta merecé tur nos alabansa pa esaki! I nos awe mester ta specialmente gradicidu cu e ta desenmascará mensaheronan falsu. Esaki ta pa motibu cu tin hopi di nan awor riba e esena di mundu. Nan mensahenan imponente ta ignorá Jehova su propósitonan anunciá. E siguiente artículo lo yuda nos identificá e mensaheronan falsu ei.

[Nota]

Bo Por Splica?

◻ Con Jehova ta identificá su mensaheronan berdadero?

◻ Mediante Isaías, ken Jehova a nombra como su agente pa conkistá Babilonia?

◻ Con e profecianan di Isaías cu ta describí e derota di Babilonia a ser cumplí?

◻ Ki bon resultado e derota di Babilonia tabatin riba Jehova su nomber?

[Plachi na página 9]

P’e nacionnan di Ezekiel su dia a parce imposibel pa derotá Babilonia