Hose di Arimatea A Tuma un Kurashi

HOSE DI ARIMATEA no a pensa ku e tabatin kurashi pa aserká e gobernador romano, Ponsio Pilato. Pilato tabata konosí komo un hòmber hopi tèrko. Pero, si Hesus mester a haña un entiero digno, un hende mester a pidi Pilato pa e kurpa di Hesus. Tòg no tabata dje difísil ei pa papia ku Pilato manera Hose a pensa. Despues ku Pilato a haña konfirmashon for di un ofisial ku Hesus tabata morto, el a duna Hose pèrmit pa bai ku e kurpa. Pues awor, aunke ku Hose tabata hopi tristu, el a kore bai bèk kaminda nan a mata Hesus.—Mar. 15:42-45.

• Ken tabata Hose di Arimatea?

• Ki relashon e tabatin ku Hesus?

• Dikon e relato akí mester ta di interes pa bo?

E Evangelio inspirá di Marko ta yama Hose “un miembro respetá di e Konseho.” Den e konteksto akí, e Konseho por ta solamente e Sanedrin, esta, e korte supremo hudiu i e kuerpo ku tabatin outoridat riba komunidat, gobièrnu i religion. (Mar. 15:1, 43) Pues Hose tabata un di e lidernan di su pueblo, i esei ta splika kon bini e por a bai serka e gobernador romano. No ta un sorpresa ku Hose tabata riku tambe.—Mat. 27:57.

Komo grupo, e Sanedrin tabata odia Hesus. E miembronan a traha un kòmplòt pa mata Hesus. Sinembargo, Beibel ta bisa ku Hose tabata “un bon hende i un hòmber hustu.” (Luk. 23:50) Na kontraste ku su koleganan, el a hiba un bida onesto, moralmente limpi i a hasi su bèst pa obedesé e mandamentunan di Dios. Ademas, e tabata “spera riba e Reino di Dios,” i esaki por laga nos komprondé dikon el a bira un disipel di Hesus. (Mar. 15:43; Mat. 27:57) Probablemente, e tabata gusta e mensahe di Hesus komo ku bèrdat i hustisia tabata importante p’e.

Huan 19:38 ta bisa ku Hose “tabata un disipel di Hesus, ma na skondí pa motibu ku e tabatin miedu di e hudiunan.” Kiko Hose tabatin miedu di dje? E tabata sa ku e hudiunan tabata odia Hesus i ku nan tabata determiná pa ekspulsá for di snoa kualke hende ku a pone fe den dje. (Huan 7:45-49; 9:22) Si un hende a ser ekspulsá for di snoa, e hudiunan lo a odi’é i rechas’é. P’esei Hose a vasilá pa bisa abiertamente ku e tabatin fe den Hesus. Si el a hasi esei, lo e por a pèrdè su puesto i prestigio.

Hose no tabata e úniko hende den e situashon akí. Segun Huan 12:42, “hopi lider di e hudiunan a pone fe den dje [Hesus], ma pa motibu di e fariseonan, nan no tabata rekonos’é públikamente pa nan no keda ekspulsá for di snoa.” Un otro hende ku tabata den e mesun situashon tabata Nikodemo, ku tambe tabata miembro di e Sanedrin.—Huan 3:1-10; 7:50-52.

Aunke Hose tabata un disipel, e no tabatin kurashi pa bisa esei públikamente. Esei tabata un problema serio, spesialmente debí na loke Hesus a bisa: “Ken . . . ku deklará públikamente ku e ta na mi banda, ami tambe lo deklará dilanti di mi Tata ku ta den shelu ku e ta na mi banda, ma ken ku nenga mi dilanti di hende, mi tambe lo neng’é dilanti di mi Tata ku ta den shelu.” (Mat. 10:32, 33) Hose no a nenga ku e tabata konosé Hesus, pero tampoko e no a tuma kurashi pa bisa ku e tabata su disipel. Kiko di abo?

Apesar di esei, Hose a hasi algu bon, pasobra Beibel ta bisa ku e no a apoyá e kòmplòt di e miembronan di Sanedrin kontra Hesus. (Luk. 23:51) Algun hende ta bisa ku kisas Hose no tabata presente na Hesus su kaso den korte. Sea kual sea e kaso, Hose lo mester tabata malkontentu ku e inhustisia ei, pero e no por a hasi nada pa par’é!

Pa ora ku Hesus a muri, aparentemente Hose a vense su miedu i a disidí di apoyá e siguidónan di Hesus. Na Marko 15:43 nos ta haña un indikashon di e desishon ku Hose a tuma pasobra e teksto ta bisa ku el “a tuma un kurashi i a bai serka Pilato i a pidié e kurpa di Hesus.”

Ta parse ku Hose tabata presente ora Hesus a muri. Sí, e tabata sa promé ku Pilato ku Hesus a muri. Pues, ora Hose a pidi pa e kurpa, e gobernador “a keda asombrá ku Hesus por a muri kaba.” (Mar. 15:44) Si Hose a mira e agonia di Hesus ora e tabata na e staka di tormento, akaso e esena horibel ei a konmov’é pa e saminá su konsenshi i finalmente disidí ku e mester a atmití públikamente ku e tabata disipel di Hesus? Esei por ta posibel. Por lo ménos, awor Hose a ser motivá pa tuma akshon. Lo e no tabata un disipel di Hesus na skondí mas.

Segun e lei hudiu, hende sentensiá na morto mester a ser derá promé ku solo baha. (Deu. 21:22, 23) Pero e romanonan tabata laga kurpa di e kriminalnan ku a ser ehekutá putri na staka òf tabata tira nan den un lugá di benta morto. Pero esei no ta loke Hose tabatin na mente pa Hesus. Serka di e lugá kaminda nan a mata Hesus, Hose tabatin un graf nobo kobá den baranka. E echo ku Hose no a yega di usa e graf akí ainda, por indiká ku el a kaba di muda for di Arimateaa pa Herúsalèm i ku e tabata ferwagt di us’é komo un lugá pa dera su famia. (Luk. 23:53; Huan 19:41) Tabata un gesto generoso di parti di Hose pa usa su propio graf pa dera Hesus aden, i esaki a kumpli ku e profesia di ku e Mesías lo a ser derá “huntu ku e rikunan.”—Isa. 53:5, 8, 9.

Tur kuater Evangelio ta bisa ku despues ku nan a kita e kurpa di Hesus for di staka, Hose a lor’é den lenen fini i a pon’é den su propio graf. (Mat. 27:59-61; Mar. 15:46, 47; Luk. 23:53, 55; Huan 19:38-40) E úniko hende ku spesífikamente Beibel ta menshoná ku a yuda Hose tabata Nikodemo, kende a trese puiru ku ta hole dushi. E dos hòmbernan akí tabatin puesto haltu, pues muy probablemente no ta nan mes a karga e kadaver. Kasi sigur nan a usa sirbidónan pa karga e kadaver i hib’é na e graf. Sea kual sea e kaso, loke e dos hòmbernan akí a hasi tabata algu importante. Kualke hende ku a bini den kontakto ku un kurpa sin bida mester a keda impuru pa shete dia, i tur loke ku el a mishi kuné tambe lo a bira impuru. (Num. 19:11; Ageo 2:13) Ora nan tabata impuru, nan mester a isolá nan mes durante henter e siman di e Pasku Hudiu i pèrdè tur e konmemorashon- i selebrashonnan. (Num. 9:6) Komo ku Hose a perkurá pa Hesus su entiero, Hose su koleganan lo por a hasi bofon di dje. Pero awor e tabata dispuesto pa aseptá e konsekuensianan di duna Hesus un entiero digno i identifiká su mes públikamente komo un disipel di Kristu.

Despues ku nan a dera Hesus, Beibel no ta hasi menshon mas di Hose di Arimatea, esei por pone nos puntra nos mes: ‘Kiko a para di dje?’ Echo ta ku nos no sa. Sinembargo, a base di loke nos a kaba di analisá, kasi sigur el a bisa públikamente ku e tabata un kristian. Al fin i al kabo, ora el a enfrentá preshon i prueba, su fe i kurashi no a mengua. Al kontrario, su fe a bira mas fuerte i el a haña mas kurashi. Esei tabata un bon señal.

E relato akí ta lanta un pregunta ku nos tur tin ku pensa ariba: ‘Tin algu otro—manera puesto, trabou, kosnan material, famia òf asta nos propio libertat—ku nos ta duna mas importansia ku nos relashon ku Yehova?’