Kapítulo Diesocho

Yehova Ta Rebibá Spiritu di Esnan di Kondishon Humilde

Isaías 57:1-21

 1. Ki siguransa Yehova a duna, i ki pregunta su palabranan ta lanta?

“ESAKI ta loke Esun Haltu i Elevá, ku ta biba pa semper i kende su nòmber ta santu, a bisa: ‘Den haltura i den e lugá santu ta kaminda mi ta biba, tambe huntu ku esun aplastá i di spiritu humilde, pa rebibá spiritu di esnan di kondishon humilde i pa rebibá kurason di esnan aplastá.’” (Isaías 57:15) Asina profeta Isaías a skirbi den siglo 8 promé ku Era Komun. Kiko tabata pasa den Huda ku a hasi e mensahe aki asina un animashon grandi? Kon e palabranan inspirá aki ta yuda kristiannan awe? Un análisis di Isaías kapítulo 57 lo yuda nos kontestá e preguntanan ei.

“Subi Aki Serka”

 2. (a) Na ki tempu e palabranan di Isaías kapítulo 57 aparentemente ta referí? (b) Kiko ta e situashon di hende hustu den tempu di Isaías?

² Ta parse ku e parti aki di e profesia di Isaías ta referí na e tempu di Isaías mes. Wak kon ankrá maldat a bira den su tempu: “E hustu mes a muri pero no tin niun hende ta tuma esei na pechu. I hendenan di bondat amoroso ta ser hibá den morto, miéntras ku niun hende ta ripará ku esei ta debí na e kalamidat ku e hustu ta ser hibá. E ta drenta den pas; nan ta deskansá riba nan kama, kada un ku ta kana stret padilanti.” (Isaías 57:1, 2) Si un hustu kai, niun hende no tin kunes. Niun hende ta tuma nota di su morto prematuro. Sin embargo, su morto ta dun’é pas, ta libr’é for di e sufrimentu ku e malbadonan ta kous’é, i ta skap’é di kalamidat. E situashon di Dios su nashon skohí ta deplorabel. Pero pa esnan ku ta keda fiel sigur ta un animashon pa sa ku Yehova no solamente ta wak kiko ta pasa, sino tambe lo apoyá nan!

 3. Kiko Yehova ta bisa e generashon malbado di Huda, i dikon?

³ Yehova ta dirigí su mes na e generashon malbado di Huda, bisando: “Pa loke ta boso, subi aki serka, yu hòmbernan di un muhé miradó di destino, simia di un persona adúltero i di un muhé ku ta kometé prostitushon.” (Isaías 57:3) Nan meresé e deskripshon bergonsoso ei komo yu di un miradó di destino i desendiente di un persona adúltero i di un prostituta. Fuera di kometé aktonan di idolatria i spiritismo, e adorashon falsu ku nan ta praktiká awor ta inkluí kondukta seksual inmoral. P’esei Yehova ta puntra e pekadornan aki: “Tokante ken boso ta dibertí boso mes ku tantu alegria? Kontra ken boso ta sigui habri boka grandi, ta sigui saka lenga? Boso no ta yunan di transgreshon, simia di falsedat, esnan ku ta lanta pashon meimei di palunan grandi, bou di tur palu yen di blachi, ku ta mata e yunan den e vayenan torensial bou dje skernan dje barankanan steil?”—Isaías 57:4, 5.

 4. Di kiko e malbadonan di Huda ta kulpabel?

⁴ Abiertamente e malbadonan di Huda ta praktiká nan adorashon pagano sumamente ofensivo, i nan ta ‘dibertí nan mes ku tantu alegria.’ Ku despresio nan ta hasi bofon di e profetanan di Dios ku el a manda pa korigí nan; sin ningun tiki bèrgwensa i sin rèspèt nan ta saka lenga pa nan. Ounke nan ta yunan di Abraham, nan komportashon rebelde ta hasi nan yunan di transgreshon i simia di falsedat. (Isaías 1:4; 30:9; Huan 8:39, 44) Pafó den kunuku, bou di palunan grandi, nan ta hinka fervor religioso den nan adorashon yen di ídolo. I e adorashon ei ta asina kruel ku nan ta asta mata nan yunan, meskos ku e nashonnan ku Yehova a saka for di e pais debí na nan obranan abominabel!—1 Reinan 14:23; 2 Reinan 16:3, 4; Isaías 1:29.

Nan Ta Basha Ofrenda di Bebida pa Piedra

5, 6. (a) En bes di adorá Yehova, kiko e habitantenan di Huda a preferá di hasi? (b) Te kon leu Huda su adorashon di ídolo ta bai?

⁵ Wak kon leu e habitantenan di Huda a kai den idolatria: “Bo porshon tabata huntu ku e piedranan lizu dje vayenan torensial. Nan—nan tabata bo parti. Ademas, ta pa nan bo a drama un ofrenda di bebida, bo a ofresé un regalo. Pa e kosnan aki lo mi konsolá mi mes?” (Isaías 57:6) E hudiunan ta e pueblo ku tin un pakto ku Dios, pero en bes di adorá Dios, nan ta piki piedra di riu i traha dios ku nan. David a proklamá ku Yehova tabata su porshon, pero e pekadornan aki a skohe ídolonan di piedra sin bida komo nan porshon i ta drama ofrenda di bebida pa nan. (Salmo 16:5; Habakuk 2:19) Ki konsuelo Yehova por haña den e manera degenerá ku e pueblo ku ta karga su nòmber ta ador’é?

⁶ Tur kaminda Huda ta kometé idolatria: bou di palu grandi, den vaye torensial, riba seru, den stat. Pero Yehova ta mira tur esei, i via Isaías, E ta saka na kla kon baho Huda ta: “Riba un seru haltu i elevá bo a pone bo kama. Ei tambe bo a subi pa ofresé sakrifisio. I tras di porta i kozein bo ta pone bo señal pa konmemorá.” (Isaías 57:7, 8a) Riba e lugánan haltu, Huda ta traha su kama di sushedat spiritual, i ei e ta ofresé sakrifisio na diosnan stranhero.a Asta kasnan privá tin ídolo tras di porta i kozein.

 7. Ku ki aktitut Huda ta partisipá den adorashon inmoral?

⁷ Tin hende kisas ta puntra nan mes kon bini Huda ta asina enbolbí den adorashon impuru. Ta un forsa poderoso a obligu’é bandoná Yehova? E kontesta ta nò. E ta hasié di su mes, anto ku smak. Yehova ta deklará: “Separá di mi bo a kita sunú anto a subi bai ariba; bo a hasi bo kama espasioso. I pa bo mes bo a bai sera un pakto ku nan. Bo a stima un kama ku nan. E órgano maskulino bo a kontemplá.” (Isaías 57:8b) Huda a sera un pakto ku su diosnan falsu, i ta stima su relashon ilegal ku nan. E stima spesialmente e práktikanan seksual inmoral ku ta karakterisá e adorashon di e diosnan aki i ku probablemente ta inkluí uso di símbolonan di e órgano seksual maskulino.

 8. Foral bou di kua rei idolatria a prosperá den Huda?

⁸ E deskripshon aki di Huda su adorashon ekstremadamente inmoral i kruel ta kuadra ku loke nos sa di vários rei malbado di Huda. Por ehèmpel, Manases a traha e lugánan haltu, a lanta altar pa Baal, i a pone altarnan religioso falsu den dos patio di e tèmpel. El a laga su yu hòmbernan pasa dor di kandela, el a praktiká magia, a wak destino i a promové práktikanan spiritista. Tambe Rei Manases a pone un imágen di e palu sagrado ku el a traha den Yehova su tèmpel.b El a sedusí Huda pa hasi “loke tabata malu, mas ku e nashonnan ku Yehova a anikilá.” (2 Reinan 21:2-9) Tin hende ta kere ku ta Manases a laga mata Isaías, ounke Manases su nòmber no ta aparesé na Isaías 1:1.

“Bo A Sigui Manda Bo Mensaheronan”

 9. Pakiko Huda ta manda mensahero na lugánan “leu”?

⁹ Huda su piká ta bai mas leu ku sirbi diosnan falsu. Usando Isaías komo bosero, Yehova ta bisa: “Anto bo a baha den direkshon di Melèk ku zeta, i a sigui traha bo ungwentonan na abundansia. I bo a sigui manda bo mensaheronan hopi leu, di manera ku bo a baha e asuntunan na Seol.” (Isaías 57:9) E reino infiel di Huda ta baha bai serka “Melèk,”—“e rei” na idioma hebreo; probablemente rei di un potensia stranhero—pa ofresé regalonan kostoso i atraktivo, simbolisá dor di zeta i ungwentonan perfumá. Huda ta manda mensahero na lugánan leu. Pakiko? Pa konvensé nashonnan pagano pa sera aliansa polítiko kuné. El a bira lomba pa Yehova, i ta pone su konfiansa den reinan stranhero.

10. (a) Kon Rei Akas ta purba sera un aliansa ku rei di Asiria? (b) Den ki manera Huda ta “baha e asuntunan na Seol”?

¹⁰ Un ehèmpel di esaki ta tuma lugá den tempu di Rei Akas. Komo ku e rei infiel di Huda ta sinti su mes menasá dor di e aliansa entre Israel i Siria, e ta manda mensahero serka Tiglat-piléser III di Asiria, bisando: “Mi ta bo sirbidó i bo yu hòmber. Bin i salba mi for di plant’i man di rei di Siria, i for di plant’i man di rei di Israel, kendenan ta lanta kontra mi.” Akas ta manda plata i oro komo soborno pa rei di Asiria, i e rei ta kumpli ku su petishon dor di lansa un atake devastador kontra Siria. (2 Reinan 16:7-9) Huda, den su trato ku e nashonnan pagano, ta baha “si tabata posibel asta te den reino di morto.” (Beibel na papiamentu koriente) Debí na tal relashon, Huda lo muri, es desir, stòp di eksistí komo un nashon independiente goberná pa un rei.

11. Ki sintimentu falsu di siguridat Huda ta manifestá?

¹¹ Yehova ta sigui bisa Huda: “Den e multitut di bo kamindanan bo a traha duru. Bo no a bisa: ‘No tin speransa!’ Bo a haña bo propio poder rebibá. Ta p’esei bo no a bira malu.” (Isaías 57:10) Sí, e nashon a traha duru den su kamindanan apóstata, i no ta mira ku esaki lo no tin éksito. Al kontrario, e ta gaña su mes ku tur kos ta bayendo bon ku su propio poder. E ta sinti su mes yen di energia i salú. Esta bobo, nò!

12. Ki situashonnan den kristiandat ta igual ku den Huda?

¹² Awe tin un organisashon ku su komportashon ta hasi nos kòrda riba esun di Huda den tempu di Isaías. Kristiandat ta usa e nòmber di Hesus, pero e ta forma aliansa ku e nashonnan i a yena su lugánan di adorashon ku ídolo. Su fielnan ta pone imágen asta den nan kasnan privá. Kristiandat a sakrifiká su hóbennan den e gueranan di e nashonnan. Su kondukta mester ta un ofensa grandi pa e Dios berdadero, ku ta manda kristiannan: “Hui di idolatria”! (1 Korintionan 10:14) Dor di mete den polítika, kristiandat a ‘kometé fornikashon ku e reinan di tera.’ (Revelashon 17:1, 2) De echo, e ta un gran apoyadó di Nashonnan Uní. Kiko ta spera e prostituta religioso aki? Wèl, kiko Yehova ta bisa su modelo original, Huda infiel, representá foral pa su kapital, Yerúsalèm?

‘Bo Kolekshon Lo No Libra Bo’

13. Den ki manera Huda ta “kuminsá gaña,” i kon e ta reakshoná riba Yehova su pasenshi?

¹³ “Di ken bo a spanta i a haña miedu, di manera ku bo a kuminsá gaña?,” Yehova ta puntra. Esei ta un bon pregunta! Huda sigur no ta mustra ku e tin un temor sano di Yehova. Si tabata asina, lo e no a bira un nashon di gañadó i di adoradó di dios falsu. Yehova ta sigui bisa: “Ami no tabata esun ku bo ta kòrda. Bo no a tuma nada na pechu. Ami no tabata keda ketu i skonde asuntunan? Pues ni sikiera di mi bo no tabatin miedu.” (Isaías 57:11) Yehova a keda ketu, sin trese kastigu mesora riba Huda. Huda ta apresiá esei? Nò, mas bien e ta mira Dios su pasenshi komo indiferensia. Huda a pèrdè tur temor di Dios.

14, 15. Kiko Yehova ta bisa tokante e obranan di Huda i di su “kolekshon di kosnan”?

¹⁴ Sin embargo, Dios su gran pasenshi lo yega na un fin. Refiriendo na e tempu ei, Yehova ta deklará: “Mi mes lo anunsiá bo hustisia i bo obranan, ku nan lo no benefisiá bo. Ora bo grita pa ousilio, bo kolekshon di kosnan lo no libra bo, pero un bientu lo hiba nan tur. Un rosea lo hiba nan.” (Isaías 57:12, 13a) Yehova lo desenmaskará Huda su hustisia falsu. Su obranan hipókrita lo no ta di ningun benefisio. Su “kolekshon di kosnan”—e gran kantidat di ídolo ku e tin—lo no libr’é. Ora kalamidat dal aden, un poko bientu lo bari e diosnan den kua e ta konfia bai kuné.

¹⁵ E palabranan di Yehova ta kumpli na aña 607 promé ku Era Komun. Na e tempu ei Rei Nabukodonosor di Babilonia ta destruí Yerúsalèm, kima e tèmpel i hiba mayoria di e pueblo prezu. “Asina Huda a ser hibá den eksilio for di su tera.”—2 Reinan 25:1-21.

16. Kiko ta spera kristiandat i e restu di “Babilonia e Grandi”?

¹⁶ Asina tambe, e gran kantidat di ídolo di kristiandat lo no libr’é den e dia di Yehova su rabia. (Isaías 2:19-22; 2 Tesalonisensenan 1:6-10) Kristiandat lo ser destruí huntu ku e restu di “Babilonia e Grandi,” e imperio mundial di religion falsu. E bestia salbahe simbóliko di koló skarlata i su dies kachunan “lo hasi [Babilonia e Grandi] desolá i sunú, i lo kome su karni i lo kim’é kompletamente ku kandela.” (Revelashon 17:3, 16, 17) Nos ta masha kontentu ku nos a obedesé e mandamentu: “Sali for di dje, mi pueblo, si boso no kier partisipá kuné den su pikánan, i si boso no kier risibí parti di su plaganan.” (Revelashon 18:4, 5) Laga nos nunka bai bèk na dje ni na su kamindanan.

“Esun Ku Tuma Refugio den Mi Lo Heredá e Tera”

17. Kiko e profesia ta primintí na ‘esun ku tuma refugio den Yehova,’ i ki tempu esaki ta kumpli?

¹⁷ Pero kiko di e siguiente palabranan di e profesia di Isaías? “Esun ku tuma refugio den mi lo heredá e tera i lo tuma poseshon di mi seru santu.” (Isaías 57:13b) Ta ku ken Yehova ta papia einan? E ta wak mas ayá ku e binidero kataklismo i ta profetisá di e liberashon di su pueblo for di Babilonia i restorashon di adorashon puru riba su seru santu, Yerúsalèm. (Isaías 66:20; Daniel 9:16) Su palabranan lo mester ta un gran animashon pa tur hudiu ku ta keda fiel! Yehova ta sigui bisa: “Un persona sigur lo bisa: ‘Hisa na haltu, hisa na haltu! Habri e kaminda. Kita tur opstákulo for di den kaminda di mi pueblo.’” (Isaías 57:14) Ora e tempu yega pa Dios libra su pueblo, e kaminda lo ta kla, sin ningun opstákulo.—2 Krónikanan 36:22, 23.

18. Kon e profesia ta deskribí Yehova su posishon elevá, i tòg, ki interes amoroso e ta desplegá?

¹⁸ Ta na e punto aki profeta Isaías ta relatá e palabranan sitá den e promé paragraf: “Esaki ta loke Esun Haltu i Elevá, ku ta biba pa semper i kende su nòmber ta santu, a bisa: ‘Den haltura i den e lugá santu ta kaminda mi ta biba, tambe huntu ku esun aplastá i di spiritu humilde, pa rebibá spiritu di esnan di kondishon humilde i pa rebibá kurason di esnan aplastá.’” (Isaías 57:15) Yehova su trono ta den e parti mas haltu di shelu. No tin un posishon mas haltu òf elevá. Ta un gran konsuelo pa sa ku for di einan e ta mira tur kos: no solamente e pikánan di e malbadonan, sino tambe e obranan hustu di esnan ku ta purba sirbié! (Salmo 102:19; 103:6) Ademas, e ta tende e keñamentu di esnan oprimí i ta rebibá kurason di esnan aplastá. E palabranan aki lo mester a konmové kurason di hudiu arepentí di antigwedat, meskos ku nan ta konmové nos awe.

19. Ki ora Yehova su indignashon ta pasa?

¹⁹ E siguiente palabranan di Yehova tambe ta duna konsuelo: “Lo no ta pa tempu indefiní ku mi ta pleita, ni lo mi no ta indigná pa semper; pasobra debí na mi e spiritu mes lo bira suak, asta e kriaturanan ku ta hala rosea ku mi mes a traha.” (Isaías 57:16) Ningun di Dios su kriaturanan lo por keda na bida si Yehova su rabia tabata pa semper. Pero felismente Dios su indignashon ta pa un tempu limitá. Ora esei kumpli ku su propósito, e ta pasa. E revelashon inspirá aki ta yuda nos desaroyá apresio profundo pa e amor ku Yehova tin pa su kreashon.

20. (a) Kon Yehova ta trata ku un malechor ku no repentí? (b) Den ki manera Yehova ta konsolá esun arepentí?

²⁰ Loke Yehova ta sigui bisa ta duna nos mas komprendementu penetrante. Promé e ta bisa: “Mi a bira indigná pa motibu ku su ganashi inhustu tabata robes, anto mi a gòlpi’é, skondiendo mi kara, miéntras mi tabata indigná. Pero manera un rebelde el a sigui kana den e kaminda di su kurason.” (Isaías 57:17) Sin duda e maldatnan kometé debí na golosidat ta pone Dios rabia. Tanten ku un persona ta rebelde di kurason, Yehova ta keda indigná. Pero kiko si e rebelde reakshoná bon riba disiplina? E ora ei Yehova lo demostrá kiko su amor i kompashon ta impuls’é pa hasi: “Mi a mira su kamindanan; i mi a kuminsá kur’é i dirigié i hasi kompensashon ku konsuelo p’e i pa esnan di dje ku tabata na luto.” (Isaías 57:18) Despues ku Yehova tuma akshon disiplinario, e ta kura esun arepentí i ta konsol’é huntu ku esnan ku ta na luto kuné. Ta p’esei na aña 537 promé ku Era Komun, e hudiunan por a regresá kas. Ounke ta sierto ku Huda nunka mas a bira un reino independiente goberná pa un rei di e desendensia di David, tòg nan a rekonstruí e tèmpel na Yerúsalèm i a restorá adorashon berdadero.

21. (a) Kon Yehova a rebibá e ánimo di kristiannan ungí na 1919? (b) Ki kualidat ta bon pa kada un di nos kultivá?

²¹ Yehova, “Esun Haltu i Elevá,” a mustra interes tambe den e bienestar di e restu ungí na aña 1919. Debí na nan aktitut arepentí i humilde, e gran Dios, Yehova, bondadosamente a tuma nota di nan aflikshon i a libra nan di nan koutiverio babilóniko. El a kita tur opstákulo i a dirigí nan na libertat pa nan por a rindi adorashon puru na dje. Asina e palabranan di Yehova mediante Isaías a kumpli e ora ei. I e palabranan ei ta enserá prinsipionan eterno ku ta apliká na kada un di nos. Yehova ta aseptá adorashon solamente for di hende humilde. I si un sirbidó di Dios peka, e mester rekonosé su eror lihé, aseptá reprendementu i korigí su kaminda. Laga nos no lubidá nunka ku Yehova ta kura i konsolá esnan humilde, pero ta “oponé esnan halsá.”—Santiago 4:6.

‘Pas pa Esun Ku Ta Leu i pa Esun Ku Ta Serka’

22. Ki futuro Yehova ta predisí pa (a) esnan ku repentí? (b) e malbadonan?

²² Yehova ta presentá awor un kontraste entre e futuro di esnan ku repentí i esnan ku persistí den nan kaminda malbado, bisando: “Mi ta krea e fruta di lep. Pas kontinuo lo tin pa esun ku ta leu i pa esun ku ta serka, . . . i lo mi kur’é. Pero e malbadonan ta manera laman brutu, ora e no por kalma, di kua su awanan ta sigui tira lima i lodo na laira. No tin pas . . . p’e malbadonan.”—Isaías 57:19-21.

23. Kiko ta e fruta di lep, i den ki manera Yehova ta “krea” e fruta aki?

²³ E fruta di lep ta e sakrifisio di alabansa ku hende ta ofresé na Dios: e deklarashon públiko di su nòmber. (Hebreonan 13:15) Kon Yehova ta “krea” e deklarashon públiko ei? Pa un persona por ofresé sakrifisio di alabansa, e tin ku siña promé tokante Dios, kaba pone fe den dje. Fe—un fruta di Dios su spiritu—ta motivá e persona ei pa papia tokante loke el a tende. Ku otro palabra, e ta hasi deklarashon públiko. (Romanonan 10:13-15; Galationan 5:22) Tambe nos tin ku kòrda ku Yehova ta esun ku finalmente ta enkargá su sirbidónan pa proklamá su alabansa. I Yehova ta esun ku ta libra su pueblo, hasiendo posibel pa nan ofresé tal sakrifisio di alabansa. (1 Pedro 2:9) P’esei e profesia por bisa ku ta Yehova ta krea e fruta di lep aki.

24. (a) Ken ta siña konosé e pas di Dios, i ku ki resultado? (b) Ken no ta siña konosé pas, i ku ki resultado pa nan?

²⁴ E hudiunan sigur a ofresé un fruta di lep emoshonante ora nan a regresá nan tera kantando alabansa na Yehova. Nan mester tabata kontentu ku nan konosé e pas di Dios, sea ku nan ta “leu”—na un distansia for di Huda, wardando pa bai bèk—òf “serka,” esta ya kaba den nan pais. Na kontraste, e situashon ta kompletamente distinto pa e malbadonan, esnan ku ta keda sin reakshoná faborabel riba e disiplina di Yehova. No ta importá ken e malbadonan aki ta òf na unda nan ta, no tin pas pa nan. Agitá manera laman brutu, nan no ta produsí fruta di lep, sino “lima i lodo,” es desir, tur tipo di kos sushi.

25. Kon hopi hende di leu i serka ta siña konosé pas?

²⁵ Awe tambe Yehova su adoradónan ta deklará e bon nobo di e Reino di Dios den henter mundu. Den mas ku 230 pais, kristiannan di leu i serka ta ofresé e fruta di nan lep, alabando e úniko Dios berdadero. “For di ekstremidat di tera” hende por tende e alabansa ku nan ta kanta. (Isaías 42:10-12) Hende ku tende nan i ku reakshoná faborabel ta aseptá e bèrdat di e Palabra di Dios, e Beibel. E personanan ei ta siña konosé pas, pasobra nan ta sirbi “e Dios ku ta duna pas.”—Romanonan 16:20.

26. (a) Kiko ta spera e malbadonan? (b) Ki promesa magnífiko Yehova a duna e mansunan, i kiko mester ta nos determinashon?

²⁶ Ta bèrdat ku e malbadonan no ta hasi kaso di e mensahe di Reino. Pero pronto lo no pèrmití nan kita e pas di e hustunan. Yehova ta primintí: “Solamente un poko tempu mas, i e malbado lo no t’ei mas.” Esnan ku buska refugio den Yehova lo tin e maravioso bendishon di heredá e tera. “E mansunan mes lo poseé e tera, i berdaderamente nan lo haña nan deleite ekskisito den e abundansia di pas.” (Salmo 37:10, 11, 29) Ki un bunita lugá nos planeta lo ta e ora ei! Laga nos tur ta desididu pa nunka pèrdè e pas di Dios, ya asina nos por kanta su alabansa pa henter eternidat.

[Nota]

[Plachi na página 263]

Huda ta praktiká adorashon inmoral bou di tur palu yen di blachi

[Plachi na página 267]

Huda ta traha altar den henter e pais

[Plachi na página 275]

“Mi ta krea e fruta di lep”