Habitantenan Huntu den Un “Tera” Restora

“En cuanto boso, boso lo ser yamá e sacerdotenan di Jehova; lo ser bisá cu boso ta e ministernan di nos Dios.”—ISAIAS 61:6.

 1, 2. (a) Kico tabata e situacion di esnan combertí den Israel? (b) Ki spiritu e miembronan dje “multitud grandi” a demostrá den tempu moderno?

DEN tempunan antiguo, ora cu Israel tabata fiel, el a sirbi riba e esena di mundu como un testigo p’e gloria di Jehova. (Isaías 41:8, 9; 43:10) Hopi stranhero a respondé i a yega na adorá Jehova den asociacion cu Su pueblo scogí. En efecto, nan a bisa Israel loke Rut a bisa Noemí: “Bo pueblo lo ta mi pueblo, i bo Dios mi Dios.” (Rut 1:16) Nan a someté nan n’e condicionnan dje pacto di Ley, e hombernan siendo circuncidá. (Exodo 12:43-48) Algun dje muhernan a casa cu israelita. Rahab di Jérico i Rut e moabita a bira antepasadonan di Jesucristo. (Mateo 1:5) Tal prosélitonan tabata parti dje congregacion di Israel.—Deuteronomio 23:7, 8.

² Mescos cu prosélitonan den Israel, e “multitud grandi” awe a bisa e resto ungí: “Nos lo bai cu boso, pasobra nos a tende cu Dios ta cu boso.” (Revelacion 7:9; Zacarías 8:23) Nan ta reconocé cu e cristiannan ungí aki ta Jehova su “esclabo fiel i discreto,” i nan ta traha asina estrechamente cu nan cu e ungínan i e “otro carnénan” ta “un solo tou, un solo wardador.” (Mateo 24:45-47; Juan 10:16) Kico lo sosodé cu e multitud grandi ora tur nan rumannan ungí ricibí nan recompensa celestial? Nan no tin nodi tin miedu. Atrabes dje “último dianan” aki, Jehova a haci preparacion p’e tempu ei.—2 Timoteo 3:1.

Un “Tera” Spiritual

 3. Kico ta e “cielu nobo” profetisá dor di Pedro, i na ki tempu el a ser establecí?

³ E areglo celestial di gobernacion di cua e 144.000 cristiannan ungí lo ta un parti a ser profetisá dor di apostel Pedro. El a bisa: “Tin cielu nobo i un tera nobo cu nos ta spera segun su promesa, i den esakinan husticia lo biba.” (2 Pedro 3:13) E “cielu nobo” aki a ser establecí na 1914, ora Cristo a ser entronisá como Rey den e Reino celestial. Pero kico dje “tera nobo”?

 4. (a) Ki suceso inesperá a tuma lugá na 1919? (b) Kico tabata e nacion cu a “nace den un solo biaha,” i kico tabata e ‘tera cu a ser producí cu dolor di parto’?

⁴ Na 1919, Jehova a saca e resto ungí for di cautiverio na Babilonia e Grandi. (Revelacion 18:4) Pa e lidernan di cristiandad, e suceso dramático aki tabata totalmente inesperá. Relacioná cu esei, Bijbel ta bisa: “Ken a tende di un cos manera esaki? Ken a mira cosnan manera esakinan? Acaso un tera lo ser producí cu dolor di parto den un solo dia? Of un nacion lo nace den un solo biaha?” (Isaías 66:8) Ora e congregacion ungí a aparecé di ripiente dilanti e nacionnan como un pueblo librá, e tabata en berdad un nacion cu a “nace den un solo biaha.” Pero kico e “tera” tabata? Den un sentido, e tabata un ekivalente spiritual dje tera di Israel di antigwedad. E tabata e region di actividad otorgá n’e “nacion” recien nací, un lugá unda e profecianan di Paradijs dje buki di Isaías ta haña un cumplimentu moderno i spiritual. (Isaías 32:16-20; 35:1-7; compará cu Hebreonan 12:12-14.) Unda cu un cristian por ta físicamente, e ta den e “tera” ei.

 5. Ki núcleo a cuminsá existí na 1919? Splica.

⁵ Kico esaki tabatin di haber cu e “tera nobo” profetisá dor di Pedro? Wel, e “nacion” nobo ei, nací na 1919 den un “tera” restorá, tabatin cu desaroyá den un organisacion mundial componí di alabadornan ungí i no-ungí di Jehova. E organisacion aki lo sobrebibí Armagedon pa drenta Dios su mundu nobo. Den e manera aki e nacion ei por ser considerá como e núcleo dje sociedad humano hustu, e tera nobo, cu lo existí despues dje destruccion dje mundu di Satanas.a Pa rond di 1935, e ungínan, como grupo, a ser recogé den e tera restorá. Desde e tempu ei, e énfasis tabata riba recogementu dje multitud grandi di otro carné, cu awe ta casi cincu miyon na cantidad. (Revelacion 14:15, 16) E “tera” ta di mas poblá? No, su fronteranan por ser extendé mes ampliamente cu ta necesario. (Isaías 26:15) Realmente, ta emocionante pa mira su poblacion crece segun cu e resto ungí ta yena e “tera” cu “producto”—alimento spiritual saludabel i fortalecedor. (Isaías 27:6) Pero kico ta e posicion dje otro carnénan aki den e “tera” restorá dje pueblo di Dios?

Stranheronan Activo den e “Tera”

 6. Con stranheronan tabata activo den e “tera” dje pueblo di Dios?

⁶ Mescos cu prosélitonan den e tera di Israel a someté nan n’e Ley di Moises, e multitud grandi awe den e “tera” restorá ta obedecé Jehova su mandamentunan. Educá dor di nan rumannan ungí, nan ta abstené for di adoracion falsu den tur su formanan i ta warda e santidad di sanger. (Echonan 15:19, 20; Galationan 5:19, 20; Colosensenan 3:5) Nan ta stima Jehova cu tur nan curason, mente, alma i forsa i ta stima nan próhimo mescos cu nan mes. (Mateo 22:37; Santiago 2:8) Den Israel di antigwedad prosélitonan a yuda cu e construccion dje tempel di Sálomon i a apoyá restoracionnan di adoracion berdadero. (1 Crónicanan 22:2; 2 Crónicanan 15:8-14; 30:25) Awe, e multitud grandi tambe ta participá den proyectonan di construccion. Por ehempel, nan ta yuda edificá congregacionnan i circuitonan, pa no mencioná mes e ehecucion di proyectonan di construccion material, manera Salonnan di Reino, Salonnan di Asamblea i facilidadnan di sucursal.

 7. Kico a sosodé den Jerusalem despues cu nan a sali for di exilio tempu no tabatin suficiente levita pa efectuá sirbishi di tempel?

⁷ Na 537 P.E.C., ora Israel a regresá for di exilio na Babilonia, nan a cuminsá organisá sirbishi n’e sitio dje tempel. Sin embargo, e levitanan cu a regresá no tabata mashá. P’esei, e netineonan—residentenan stranhero circuncidá kendenan anteriormente tabata asistente dje levitanan—a ricibí mas privilegio den sirbishi di tempel. Sin embargo, nan no tabata igual cu e sacerdotenan arónico ungí.b—Esdras 7:24; 8:15-20; Nehemías 3:22-26.

 8, 9. Con e otro carnénan a asumí un parti aumentante dje trabou di rindi sirbishi sagrado durante e último dianan?

⁸ Cristiannan ungí awe a sigui e patronchi aki. Segun cu “e tempu di fin” a progresá, e resto dje ungínan a bira ménos i ménos den e “tera” dje pueblo di Dios. (Daniel 12:9; Revelacion 12:17) En bista di esaki, e multitud grandi awor ta cumpli cu mayoria dje trabou di rindi “sirbishi sagrado.” (Revelacion 7:15) Siguiendo e liderato di nan rumannan ungí, nan ta “ofrecé na Dios un sacrificio di alabansa, esta e fruta di lipnan cu ta haci declaracion público di su nomber.” Nan “no ta lubidá e hacimentu di loke ta bon i e compartimentu di cosnan cu otronan,” sabiendo cu “sacrificionan asina ta agradá Dios mashá.”—Hebreonan 13:15, 16.

⁹ Ademas, ya cu e multitud grandi ta aumentando cu cientos di miles tur aña, tin un necesidad continuamente creciente pa supervision. Un tempu esaki a ser atendé exclusivamente dor di e cristiannan ungí. Awor, supervision di mayoria congregacion, i tambe circuito, districto i sucursal, pa motibu di necesidad a ser confiá n’e otro carnénan. Na 1992 algun di esakinan a ser duná e privilegio di asistí n’e reunionnan dje comiténan dje Cuerpo Gobernante i di sirbi como yudantenan no-votador (e yudantenan aki ta participá den reunionnan dje comiténan pero no ta tuma parti den e decision final cu e Cuerpo Gobernante ta tuma). Tog, e otro carnénan ta keda leal na nan compañeronan cristian ungí i ta sinti nan privilegiá pa sostené nan como Jehova su esclabo fiel i discreto.—Mateo 25:34-40.

“Manera un Sheik”

10, 11. Siguiendo e patronchi di algun filisteo, con algun enemigu anterior di Dios su pueblo a experenciá un cambio di curason? Cu ki resultado?

¹⁰ E manera cu e esclabo fiel i discreto a usa e otro carnénan den posicionnan di responsabilidad a ser profetisá na Zacarías 9:6, 7. Ei nos ta lesa: “Ami siguramente lo corta e orguyo dje filisteo. I lo mi kita e cosnan manchá cu sanger for di su boca, i su cosnan repugnante for di entre su djentenan, i e mes tambe siguramente lo ser lagá como restante pa nos Dios; i e tin cu bira manera un sheik den Huda, i Ekron manera e hebuseo.”c E filisteonan tabata enemigunan hurá di Jehova su pueblo, mescos cu e mundu di Satanas ta awe. (1 Juan 5:19) Mescos cu e filisteonan finalmente a ser eliminá como pueblo, asina e mundu aki, cu su componentenan religioso, político i comercial, pronto lo experenciá Jehova su rabia destructivo.—Revelacion 18:21; 19:19-21.

¹¹ Sin embargo, segun e palabranan di Zacarías, algun filisteo a experenciá un cambio di curason, i esaki a prefigurá cu algun hende mundano awe lo no keda na enemistad cu Jehova. Nan lo bandoná idolatria religioso cu su ritonan abominabel i sacrificionan repugnante i ser limpiá den bista di Jehova. Den nos tempu “filisteonan” reformá asina ta ser hañá den e multitud grandi.

12. Den tempu moderno, con “Ekron” a bira “manera e hebuseo”?

¹² Segun e profecia, e stad filisteo principal di Ekron lo bira “manera e hebuseo.” Un tempu e hebuseonan tambe tabata enemigunan di Israel. Jerusalem tabata den nan man te ora David a conkist’é. No obstante, algun di esnan cu a sobrebibí e gueranan cu Israel evidentemente a bira prosélito. Nan a sirbi den e tera di Israel como esclabo i asta tabatin e privilegio di traha riba e construccion dje tempel. (2 Samuel 5:4-9; 2 Crónicanan 8:1-18) Awe, “ekronitanan” cu ta acudí n’e adoracion di Jehova tambe tin privilegionan di sirbishi den e “tera” bou di supervision dje esclabo fiel i discreto.

13. Kico tabata un sheik den e mundu di antigwedad?

¹³ Zacarías ta bisa cu e filisteo lo ta manera un sheik den Huda. E palabra hebreo ʼal·luphʹ, ora e ser traducí como “sheik,” ta nificá “lider di un mil” (of, “kiliarca”). Esei tabata un posicion masha haltu. E nacion di Edom di ántes aparentemente tabatin solamente 13 sheik. (Génesis 36:15-19) E palabra “sheik” no ta ser usá hopi biaha ora referencia ta ser hací na Israel, pero e expresion “cabesante (of, hefe) di un mil” sí ta aparecé frecuentemente. Ora Moises a manda yama representantenan dje nacion di Israel, el a convocá “e cabesantenan dje miles di Israel.”d Tabatin 12 di esakinan, evidentemente subordiná solamente na Moises. (Númeronan 1:4-16) Di igual manera, den e organisacion dje ehército, hefenan di miles a cai direct bou dje general of e rey.—2 Samuel 18:1, 2; 2 Crónicanan 25:5.

14. Con awe e “filisteo” a bira manera un sheik?

¹⁴ Zacarías no a profetisá cu e filisteo repentí realmente lo ta un sheik den Israel. Esei lo no ta apropiado, ya cu e no tabata un israelita natural di nacementu. Pero lo e ta manera un sheik, ocupando un posicion di autoridad comparabel cu un sheik. I asina a resultá di ser. Segun cu e resto di cristian ungí ta mengua na cantidad i hopi di esnan cu ta na bida ainda ta limitá debí na edad, otro carnénan bon entrená ta yuda segun cu tin necesidad di nan. Nan no kier reemplasá nan rumannan ungí. Pero e esclabo fiel i discreto ta duna nan autoridad segun e necesidad den e “tera,” di manera cu e organisacion di Dios por sigui progresá den un manera organisá. Un proceso progresivo asina ta ser mirá den un otro profecia mas.

Sacerdote i Cunukero

15. (a) Den e cumplimentu di Isaías 61:5, 6, ken ta “e sacerdotenan di Jehova,” i na ki tempu nan ta sirbi den e capacidad aki den un sentido completo? (b) Ken ta e “hendenan straño” cu ta haci e trabou di agricultura di Israel, i—den un sentido spiritual—kico e trabou aki ta enbolbé?

¹⁵ Isaías 61:5, 6 ta bisa: “Hendenan straño realmente lo lanta i lo pastoreá boso tounan, i e stranheronan lo ta boso cunukeronan i boso cuidadornan di cunucu di wijndruif. I en cuanto boso, boso lo ser yamá e sacerdotenan di Jehova; lo ser bisá cu boso ta e ministernan di nos Dios. E recursonan dje nacionnan boso lo come, i den nan gloria boso lo papia gososamente tocante boso mes.” Awe, “e sacerdotenan di Jehova” ta cristiannan ungí. Den un sentido final i completo, nan lo sirbi como “sacerdotenan di Jehova . . . , ministernan di nos Dios,” den e Reino celestial. (Revelacion 4:9-11) Ken ta e “hendenan straño” responsabel pa trabou di agricultura? Esakinan ta e otro carnénan, kendenan ta biba den e “tera” dje Israel di Dios. Kico ta e trabou di pastoreá, di cuida cunucu i cultivo di wijndruif cu ta ser encargá na nan? Den e sentido spiritual importante, e tareanan aki tin di haber cu yuda, cuida i cosechá hende.—Isaías 5:7; Mateo 9:37, 38; 1 Corintionan 3:9; 1 Pedro 5:2.

16. Cu tempu ken lo atendé cu tur e trabou den e “tera” dje pueblo di Dios?

¹⁶ Actualmente, tin ainda un cantidad chikitu di israelita spiritual riba tera cu ta participá den e trabou spiritual di pastoreá, di cuida cunucu i cultivo di wijndruif. Ora e congregacion ungí den su totalidad ta finalmente uní cu Cristo, tur e trabou aki lo ser lagá p’e otro carnénan. Asta e supervision humano dje “tera” e ora ei lo ta den man di otro carnénan cualificá, kendenan den e buki di Ezekiel ta ser apuntá como un clase di cabesante.—Ezekiel, capítulo 45, 46.e

E “Tera” Ta Permanecé

17. Ki preparacionnan Jehova ta haciendo durante e último dianan aki?

¹⁷ Sí, e multitud grandi no tin nodi tin miedu! Jehova a haci preparacion amplio pa nan. Un desaroyo masha importante riba tera durante e último dianan aki tabata e recogementu i seyamentu dje ungínan. (Revelacion 7:3) Sin embargo, durante e tempu cu esaki ta ser lográ, Jehova a trece e otro carnénan den asociacion cu nan den un tera spiritual restorá. Ei nan a ser alimentá spiritualmente i entrená den e bida cristian. Ademas, nan a ser bon instruí den duna sirbishi sagrado, incluyendo supervision. Pa esaki nan ta profundamente gradicidu na Jehova i nan rumannan ungí.

18. Atrabes di ki sucesonan e otro carnénan lo permanecé lealmente den e “tera” di Israel spiritual?

¹⁸ Ora Gog di Magog ta haci su atake final riba e pueblo di Dios, e otro carnénan lo para firme cu e resto ungí den “e tera di region rural habrí.” E otro carnénan lo ta den e “tera” ei ainda ora nan sobrebibí e destruccion dje nacionnan i drenta den Dios su mundu nobo. (Ezekiel 38:11; 39:12, 13; Daniel 12:1; Revelacion 7:9, 14) Continuando fiel, nan nunca lo tin cu bandoná e lugá deleitabel ei.—Isaías 11:9.

19, 20. (a) Den e mundu nobo, ki supervision sublime e habitantenan dje “tera” lo disfrutá di dje? (b) Na kico nos ta mira padilanti cu gran anticipacion?

¹⁹ Israel di antigwedad a ser goberná dor di rey humano i tabatin sacerdote levítico. Den e mundu nobo, cristiannan lo tin supervision muchu mas sublime. Bou dje Señor Soberano, Jehova, nan lo ta sumiso n’e gran Sumo Sacerdote i Rey, Jesucristo, i n’e 144.000 sacerdote i rey socio—algun di cua nan a conocé anteriormente como nan rumannan cristian riba tera. (Revelacion 21:1) Habitantenan fiel dje tera spiritual lo biba riba un tera restorá na un paradijs literal, deleitando den e bendicionnan cu ta trece curacion, cu ta yega na nan mediante Jerusalem Nobo.—Isaías 32:1; Revelacion 21:2; 22:1, 2.

²⁰ Segun cu Jehova su magnífico garoshi celestial ta move indeteniblemente padilanti pa logra su propósito, nos tur ta mira padilanti cu anticipacion ansioso na cumplimentu cu e parti asigná na nos. (Ezekiel 1:1-28) Ora e propósitonan ei finalmente ser lográ, pensa cu ki goso Jehova su santificacion triunfante lo ser celebrá! E poderoso himno registrá na Revelacion 5:13 e ora ei lo ser cantá dor di henter creacion: “Na Esun sintá riba e trono i n’e Lamchi sea e bendicion i e onor i e gloria i e poder pa semper hamas”! Sea cu nos lugá lo ta den cielu of riba tera, nos no ta anhelá pa ta ei, uniendo nos bosnan den e grandioso coro di alabansa ei?

[Notanan]

Con Bo Ta Contestá?

◻ Cua “tera” a ser restorá na 1919, i con el a ser yená cu habitante?

◻ Con e otro carnénan a ser duná mas responsabilidad den e “tera” di Dios su pueblo restorá?

◻ Den ki manera miembronan dje multitud grandi ta “manera e hebuseo”? “manera un sheik den Huda”?

◻ Pa cuantu tempu e otro fiel carnénan lo permanecé den e “tera”?

[Plachi na página 23]

E filisteo moderno lo ta “manera un sheik den Huda”

[Plachi na página 24]

E ungínan i e otro carnénan ta sirbi huntu den e tera spiritual