Parti 10

E Maraviyoso Mundu Nobo Traha dor di Dios

 1, 2. Kico lo sosodé despues dje guera limpiador di Armagedon?

DESPUES di Dios su guera limpiador di Armagedon, kico e ora ei? E ora ei un glorioso era nobo lo cuminsá. E sobrebibientenan di Armagedon, cu ya caba a proba nan lealtad na Dios su gobernacion, lo ser introducí den e mundu nobo. Ki un periodo nobo emocionante di historia esei lo ta segun cu beneficionan maraviyoso ta basha for di Dios na e famia humano!

² Bou dje direccion di Dios su Reino, e sobrebibientenan lo cuminsá desaroyá un paradijs. Nan energia lo ta dedicá na actividadnan inegoista cu lo beneficiá tur na bida e tempu ei. Lo cuminsá transformá e tera den un cas bunita, pacífico i satisfactorio pa humanidad.

Husticia Ta Reemplasá Maldad

 3. Djis despues di Armagedon nos lo sinti cua alivio inmediato?

³ Tur esaki lo ser hací posibel dor dje destruccion di Satanas su mundu. Religionnan falsu, sistemanan social of gobiernunan divisivo lo no t’ei mas. Propaganda satánico pa gaña hende lo no t’ei mas; tur e agencianan cu ta produci’é lo caba huntu cu Satanas su sistema. Djis pensa: henter e ambiente venenoso dje mundu di Satanas kitá for di caminda! Ki un alivio esei lo ta!

 4. Describí e cambio den siñansa cu lo tuma lugar.

⁴ Anto e ideanan destructivo di gobernacion humano lo ser reemplasá cu siñansa edificante cu ta bini for di Dios. “Tur bo yunan lo ta personanan siñá dor di Jehova.” (Isaías 54:13) Cu e instruccion saludabel aki aña tras aña, “e tera siguramente lo ta yená cu e conocementu di Jehova mescos cu awa ta cubriendo laman mes.” (Isaías 11:9) Hende lo no siña mas loke ta malu, sino “husticia ta loke e habitantenan dje tera productivo siguramente lo siña.” (Isaías 26:9) Pensamentu i accionnan edificante lo ta cos di tur dia.​—Echo 17:31; Filipense 4:8.

 5. Kico lo sosodé cu tur maldad i hende malbado?

⁵ Pues, lo no tin mas asesinato, violencia, violacion, atraco of cualkier otro crímen. Ningun persona lo tin cu sufri debí n’e echonan malbado di otronan. Proverbio 10:30 ta bisa: “Encuanto esun hustu, te na tempu indefiní nan lo no lagu’é tambaleá; pero encuanto esnan malbado, nan lo no keda biba riba e tera.”

Salú Perfecto Lo Ta Restorá

 6, 7. (a) Ki realidad penoso gobernacion di Reino lo trece na un fin? (b) Con Jesus a demostrá esaki tempu cu e tabata riba tera?

⁶ Den e mundu nobo, tur e mal efectonan dje rebelion original lo ser reducí na nada. Por ehempel, gobernacion di Reino lo eliminá malesa i behes. Awe, asta si bo ta disfrutá di un midí di bon salú, e realidad penoso ta cu bo ta bira bieu, bo wowonan ta bira scur, bo djentenan ta putri, bo orea ta bira dof, bo cuero ta plooi, bo órganonan interno ta daña, te ora cu finalmente bo muri.

⁷ Sin embargo, tal efectonan angustioso cu nos a heredá for di nos promé mayornan pronto lo ta un cos di pasado. Bo ta corda loke Jesus a demostrá encuanto salú tempu cu e tabata riba tera? E Bijbel ta relatá: “Multitudnan grandi a acerk’é, teniendo huntu cu nan hende cu tabata coho, mancaron, ciegu, muda i di hopi di otro manera i nan casi a tira nan na su pia i el a cura nan; di manera cu e multitud a keda asombrá segun cu nan a mira esnan muda papia i esnan coho cana i esnan ciegu mira.”​—Mateo 15:​30, 31.

 8, 9. Describí e felicidad cu lo tin den e mundu nobo ora salú perfecto ser restorá.

⁸ Ki gran felicidad lo tin den e mundu nobo segun cu tur nos enfermedadnan ta ser eliminá! E sufrimentu cu ta resultá for di mal salú nunca mas lo tormentá nos. “Ningun residente lo bisa: ‘Mi ta malu.’” “Na e tempu ei e wowo di esnan ciegu lo ser habrí i e orea mes di esnan surdu lo ser destapá. Na e tempu ei esun coho lo subi na haltu mescos cu un biná i e lenga di esun muda lo sclama di alegria.”​—Isaías 33:24; 35:​5, 6.

⁹ Lo no ta emocionante pa lanta cada mainta i realisá cu awor bo ta disfrutá di salú vibrante? Lo no ta placentero pa personanan di edad avansá sa cu nan a ser restorá na e pleno vigor di hubentud i lo logra e perfeccion cu Adam i Eva originalmente a disfrutá di dje? E promesa dje Bijbel ta: “Laga su carni bira mas frescu cu den hubentud; lagu’é bolbe na e dianan di su vigor hubenil.” (Job 33:25) Ki un deleite lo ta pa tira e bril di bista, aparato di oido, kruk, rol­stoel i remedinan ei afó! Nunca mas lo tin mester di hospital, docter i dentista.

10. Kico lo pasa cu morto?

¹⁰ Personanan cu ta disfrutá di tal salú vibrante lo no kier muri. I nan lo no tin mester di muri, pasobra humanidad lo no ta den e gara di imperfeccion heredá i morto mas. Cristo “mester goberná como rey te ora cu Dios a pone tur enemigu bou di su pia. Morto, como e último enemigu, tin cu ser reducí na nada.” “E don cu Dios ta duna ta bida eterno.”​—1 Corintio 15:​25, 26; Romano 6:23; mira tambe Isaías 25:8.

11. Con Revelacion ta resumí e beneficionan dje mundu nobo?

¹¹ Resumiendo e beneficionan cu lo basha for dje Dios interesá na e famia humano den Paradijs, e último buki dje Bijbel ta bisa: “I [Dios] lo seca tur lágrima for di nan wowo i morto lo no ta mas, ni yoramentu ni sclamacion ni dolor lo no ta mas. E cosnan anterior a pasa caba.”​—Revelacion 21:​3, 4.

E Mortonan Ta Bolbe

12. Con Jesus a demostrá su poder duná di Dios di resureccion?

¹² Jesus a haci mas cu cura esnan enfermo i sana e coho. Tambe el a trece personanan bek for di graf. Asina el a demostrá e maraviyoso poder di resureccion cu Dios a dun’é. Bo ta corda e ocasion ora Jesus a bini na e cas di un homber kende su yu muher a muri? Jesus a bisa e mucha muher morto: “Mosa, mi ta bisá bo, Lanta!” Cu ki resultado? “Inmediatamente e mosa a lanta i a cuminsá cana.” Mirando esei, hende einan “tabata fuera di nan mes cu gran éxtasis.” Apénas nan por a contené nan felicidad!​—Marco 5:​41, 42; mira tambe Lucas 7:​11-16; Juan 11:​1-45.

13. Ki tipo di hende lo bai ser resucitá?

¹³ Den e mundu nobo, “lo bai tin un resureccion di tantu e hustu i e inhustu.” (Echo 24:15) Na e tempu ei Jesus lo usa su poder duná di Dios pa lanta e mortonan pasobra, manera el a bisa, “Mi ta e resureccion i e bida. Esun cu ehercé fe den mi, aunke e muri, lo bolbe biba.” (Juan 11:25) Tambe el a bisa: “Tur esnan den graf memorial [den Dios su memoria] lo tende [Jesus] su bos i lo sali.”​—Juan 5:​28, 29.

14. Debí cu morto lo no t’ei mas, lo deshací di cua cosnan?

¹⁴ Grandi lo ta e goso mundialmente ora grupo tras grupo di personanan morto bolbe na bida pa uni cu nan stimánan! Lo no tin anuncionan di morto mas den corant pa trece tristesa na e sobrebibientenan. En bes di esei, kisas lo tin net lo contrario: anuncionan di esnan recien resucitá pa trece goso na esnan cu tabata stima nan. Pues ningun entiero, candela pa kima morto, crematorio of santana mas!

Un Mundu Berdaderamente Pacífico

15. Con e profecia di Miqueas lo ser realisá den e sentido mas completo?

¹⁵ Berdadero pas den tur área di bida lo ser realisá. Guera, promotor di guera i fabricantenan di arma lo ser cosnan di pasado. Pakico? Pasobra interesnan divisivo nacional, di tribu i racial lo disparcé. Anto, den e sentido mas completo, “nan lo no hisa spada, nacion contra nacion, tampoco lo nan siña di guera mas.”​—Miqueas 4:3.

16. Con Dios lo percurá pa gueranan bira imposibel?

¹⁶ Esaki por parce sorprendente en bista di hende su historia sangriente di guera constante. Pero esei a sosodé pasobra humanidad tabata bou di gobernacion humano i di demoño. Den e mundu nobo, bou di gobernacion di Reino, esaki ta loke lo sosodé: “Boso bin, pueblo, contemplá e actividadnan di Jehova . . . E ta haciendo guera caba te na extremidad dje tera. E ta kibra e arco i ta corta e lansa na pida pida; e garoshinan [di guera] e ta kima den candela.”​—Salmo 46:​8, 9.

17, 18. Den e mundu nobo, cua relacion lo existí entre hende i bestia?

¹⁷ Hende i bestia tambe lo ta na pas, mescos cu nan tabata den Eden. (Génesis 1:28; 2:19) Dios ta bisa: “Pa nan siguramente lo mi cera un pacto den e dia ei en coneccion cu e bestia salbahe di cunucu i cu e criatura bulador di cielu i e cos cu ta lastra di tera i . . . lo mi pone nan drumi abou den siguridad.”​—Oseas 2:18.

¹⁸ Ki extenso e pas ei lo ta? “Lobo mes realmente lo biba pa un tempu cu e lamchi machu i cu e yu di cabritu e leopardo mes lo drumi abou i e bisé i e leon hóben cu lana i e animal bon alimentá tur huntu; i un simpel mucha homber chikitu lo ta lider riba nan.” Nunca mas animalnan lo ser un menasa pa hende of pa nan mes. Asta “e leon lo come yerba mescos cu e toro”!​—Isaías 11:​6-9; 65:25.

Tera Transformá den un Paradijs

19. E tera lo ser transformá den kico?

¹⁹ Henter e tera lo ser transformá den un cas paradísico pa humanidad. Ta p’esei Jesus por a primintí un homber cu a kere den dje: “Lo bo ta cu mi den Paradijs.” E Bijbel ta bisa: “E desierto i e region sin awa lo alegrá mashá i e yanura di desierto lo ta gososo i lo florea manera asafran. . . . Pasobra den e desierto awa lo a brota i corientenan den e yanura di desierto.”​—Lucas 23:43; Isaías 35:​1, 6.

20. Pakico hamber nunca mas lo afligí humanidad?

²⁰ Bou di Dios su Reino, hamber nunca mas lo afligí miyones di hende. “Lo bai tin abundancia di grano riba tera; riba top dje cerunan lo tin un sobreabundancia.” “E palu di cunucu mester duna su fruta i e tera mes lo duna su producto i nan realmente lo resultá di ta riba nan suela den siguridad.”​—Salmo 72:16; Ezekiel 34:27.

21. Kico lo sosodé cu falta di cas, barionan decaí i mal becindarionan?

²¹ Lo no tin mas pobresa, hende sin cas, barionan decaí of becindarionan yená cu criminalidad. “Nan siguramente lo construí casnan i biba den nan; i nan siguramente lo planta hofinan di druif i come nan fruta. Nan lo no construí i un otro hende ta biba aden; nan lo no planta i un otro hende ta come di dje.” “Nan realmente lo sinta, cada unu bou di su palu di druif i bou di su palu di figu, i lo no tin ningun persona pa pone nan tembla.”​—Isaías 65:​21, 22; Miqueas 4:4.

22. Con e Bijbel ta describí e bendicionnan di Dios su gobernacion?

²² Hende lo ser bendicioná cu tur e cosnan aki, i mas, den Paradijs. Salmo 145:16 ta bisa: “Bo [Dios] ta habriendo bo man i satisfaciendo e deseo di tur cos bibiente.” No ta nada straño cu profecia bíblico ta declará: “Esnan mansu mes lo poseé e tera i nan en berdad lo haña nan deleite exkisito den e abundancia di pas. . . . Esnan hustu mes lo poseé e tera i nan lo biba pa semper riba dje.”​—Salmo 37:​11, 29.

Deshaciendo dje Pasado

23. Con Dios su Reino lo deshací di tur sufrimentu cu nos a experenciá?

²³ Dios su gobernacion di Reino lo deshací di tur e daño hací na e famia humano durante e último seis mil aña. E gosonan na e tempu ei lo surpasá cualkier sufrimentu cu hende a experenciá. Bida lo no ser perturbá dor di ningun mal memoria di sufrimentu anterior. E pensamentunan i actividadnan edificante cu lo ta e bida di tur dia di hende gradualmente lo reemplasá e recuerdonan doloroso.

24, 25. (a) Kico Isaías a profetisá cu lo sosodé? (b) Pakico nos por ta sigur cu recuerdonan di sufrimentu di pasado lo desparcé gradualmente?

²⁴ E Dios interesá ta declará: “Mi ta creando cielu nobo [un gobiernu celestial nobo riba humanidad] i un tera nobo [un sociedad humano hustu] i e cosnan anterior lo no ser recordá, tampoco nan lo subi na e curason. Pero boso alegrá mashá, pueblo, i sea gososo pa semper den loke mi ta creando.” “Henter e tera a sosegá, a bira liber di disturbio. Hende a bira alegre cu gritunan gososo.”​—Isaías 14:7; 65:​17, 18.

²⁵ Pues mediante su Reino, Dios lo drei e mal situacion cu a dura asina largu completamente bek. Atraves di eternidad lo e mustra su gran interes pa nos dor di yobe riba nos bendicionnan cu lo haci hopi mas cu compensá cualkier daño cu nos a ricibí den nos pasado. E problemanan anterior cu nos a experenciá lo desparcé gradualmente te na un recuerdo dof e tempu ei, si nos ta interesá pa corda nan mes.

26. Pakico Dios lo compensá nos pa cualkier sufrimentu di pasado?

²⁶ Asina ta e manera cu Dios lo compensá nos pa e sufrimentu cu nos por a soportá den e mundu aki. E sa cu no tabata nos falta cu nos a nace imperfecto, pasobra nos a heredá imperfeccion for di nos promé mayornan. No tabata nos falta cu nos a nace den un mundu satánico, pasobra si Adam i Eva lo a keda fiel, nos lo a nace en bes di esei den un paradijs. Pues cu gran compasion Dios lo haci mas cu compensá pa e pasado malu cu tabata imponé riba nos.

27. Cua profecianan lo haña nan maraviyoso cumplimentu den e mundu nobo?

²⁷ Den e mundu nobo, humanidad lo experenciá e libertad profetisá na Romano 8:​21, 22: “E creacion mes tambe lo ser librá for di sclabitud na corupcion i tin e glorioso libertad dje yunan di Dios. Pasobra nos sa cu tur e creacion ta sigui sclama huntu i kedando den dolor huntu te cu awor.” Hende na e tempu ei lo mira e cumplimentu completo dje oracion: “Laga bo reino bini. Laga bo boluntad ser cumplí, como den cielu, tambe riba tera.” (Mateo 6:10) E condicionnan maraviyoso riba e tera paradísico lo reflehá e condicionnan den cielu.

[Plachi na página 23]

Den e mundu nobo, esnan di edad avansá lo bolbe na vigor di hubentud

[Plachi na página 24]

Tur malesa i hendikep lo ser eliminá den e mundu nobo

[Plachi na página 25]

Den e mundu nobo, e mortonan lo ser resucitá na bida

[Plachi na página 26]

‘Nan lo no siña di guera mas’

[Plachi na página 27]

Hende i bestia lo ta na pas total den Paradijs

[Plachi na página 27]

‘Dios lo habri su man i satisfacé e deseo di tur cos bibiente’

[Plachi na página 28]

Dios su Reino lo haci mas cu compensá pa tur e sufrimentu cu nos a soportá