Capítulo Nuebe

Confia den Jehova ora Calamidad Ta Menasá

Isaías 7:1–8:18

 1. Pakico un examinacion di Isaías capítulo 7 i 8 lo beneficiá cristiannan djawe?

CAPÍTULO 7 i 8 di Isaías ta un bon estudio di contraste. Tantu Isaías como Acas a pertenecé na un nacion dedicá na Jehova; tur dos tabatin un asignacion divino, unu como profeta, e otro como rey di Huda; i ámbos a enfrentá e mésun menasa: e invasion di Huda na man di ehércitonan enemigu superior. Sin embargo, Isaías a enfrentá e menasa cu confiansa den Jehova, miéntras cu Acas a sucumbí na temor. Pakico cada un a reaccioná na un manera distinto? Como cu cristiannan dje tempu actual tambe ta rondoná pa forsanan hostil, nan ta haci bon di examiná e dos capítulonan aki di Isaías pa descubrí ki les nan ta contené.

Dilanti un Decision

 2, 3. Ki resúmen Isaías ta duna den su palabranan di introduccion?

² Mescos cu un artista ta schets un pintura nobo cu djis un par di strepi, Isaías ta cuminsá su relato cu algun declaracion general cu ta marca e principio i fin dje sucesonan cu e ta bai relatá: “A sosodé den e dianan di Acas, yu di Jotan, yu di Uzías rey di Huda, cu Rezin rey di Siria—i Peka yu di Remalías, rey di Israel—a subi bai Jerusalem pa haci guera contra dje, i a resultá cu e no por a haci guera contra dje.”—Isaías 7:1.

³ Ta siglo 8 P.E.C. Acas a sigui su tata, Jotan, como rey di Huda. Rezin, rey di Siria, i Peka, rey di Israel su reino di nort, ta invadí Huda, i nan ehércitonan ta lansa un atake feros. Cu tempu, nan ta sitia Jerusalem mes, pero sin éxito. (2 Reynan 16:5, 6; 2 Crónicanan 28:5-8) Pakico? Nos lo haña sa esei despues.

 4. Pakico e curason di Acas i di su pueblo ta tembla di miedu?

⁴ Mas promé den e guera, “a duna e cas di David un informe cu a bisa: ‘Siria a lèn riba Efraim.’ I su curason i curason di su pueblo a cuminsá tembla, manera palu di mondi ta tembla pa causa di bientu.” (Isaías 7:2) Sí, Acas i su pueblo ta spanta ora nan haña sa cu e sirionan i e israelitanan a cera cabes i cu n’e momentonan ei mes nan ehércitonan ta kampeer riba suela di Efraim (Israel). Nan ta na un distancia di apénas dos pa tres dia di marcha for di Jerusalem!

 5. Den ki sentido e pueblo di Dios djawe ta manera Isaías?

⁵ Jehova ta bisa Isaías: “Sali, por fabor, bai topa Acas, abo cu Sear-jasub bo yu homber, te na punta dje canal dje tanki superior pegá cu e caminda grandi dje cunucu dje labadó di paña.” (Isaías 7:3) Imaginá bo! Na un momento cu ta rey mester ta buscando e profeta di Jehova pa pidi su guia, e profeta tin cu sali bai busca rey! Asina mes, Isaías ta obedecé Jehova di buena gana. Mescos awe tambe, e pueblo di Dios di buena gana ta sali bai busca hende cu ta biba den temor debí n’e preshonnan dje mundu aki. (Mateo 24:6, 14) Ki un satisfaccion cu tur aña cientos di miles di persona ta respondé faborablemente n’e bishitanan dje predicadónan aki dje bon nobo i ta gara Jehova su man di proteccion!

 6. (a) Ki mensahe alentador e profeta ta duna rey Acas? (b) Ki situacion ta existí awe?

⁶ Isaías ta haña Acas pafó dje murayanan di Jerusalem ta inspeccioná e suministro di awa dje stad, como preparacion p’e sitiamentu cu por cuminsá un ora pa otro. Isaías ta dun’é e mensahe di Jehova: “Tene cuidou i keda trankil. No tene miedu, i no laga bo curason sea tímido pa causa dje dos stompinan dje balkinan aki cu ta huma, pa causa dje rabia ardiente di Rezin i Siria i e yu homber di Remalías.” (Isaías 7:4) Ora e atacantenan a destrosá Huda mas promé, nan furia tabata mes cayente cu vlam, pero awor nan ta djis ‘dos stompi di balki cu ta huma.’ Acas no tin nodi teme rey sirio Rezin ni rey israelita Peka, yu di Remalías. Awe tin un situacion parecido. Pa siglonan, lidernan di cristiandad a persiguí cristian berdadero cruelmente. Pero awor akí, cristiandad ta manera un balki casi completamente kimá. Su dianan ta contá.

 7. Pakico e nomber di Isaías i esun di su yu ta duna motibu pa speransa?

⁷ Ademas dje mensahe di Isaías, e nificacion di Isaías su nomber i di su yu tambe ta duna speransa na esnan cu ta confia den Jehova den tempu di Acas. Ta berdad cu Huda ta den peliger, pero e nomber Isaías, cu ta nificá “Salbacion di Jehova,” ta un indicacion cu Jehova lo soru pa nan ser librá. Jehova ta bisa Isaías p’e bai cu su yu homber Sear-jasub, kende su nomber ta nificá “Un Resto So Lo Bolbe.” Asta ora e reino di Huda cai finalmente, Dios, den su misericordia, lo trece un resto bek n’e pais.

Mas cu un Guera Entre Nacionnan

 8. Pakico e atake contra Jerusalem ta mas cu un guera entre nacionnan?

⁸ Jehova ta revelá pa medio di Isaías e estrategia dje enemigunan di Huda. Ata loke nan ta planea akí: “Laga nos subi contra Huda i laga nos sker e i tum’é pa nos mes dor di kibra su murayanan; i laga nos pone un otro rey reina den dje, e yu homber di Tabeel.” (Isaías 7:5, 6) E aliansa sirio-israelita ta conspirá pa conkistá Huda i remplasá Acas, yu di David, cu e homber cu nan scoge. Ta claro cu awor e atake contra Jerusalem ta mas cu un guera entre nacionnan. El a bira un lucha entre Satanas cu Jehova. Pakico? Dor cu Jehova Dios a cera un pacto cu rey David den cua e ta sigur’é cu su yunan lo goberná e pueblo di Jehova. (2 Samuel 7:11, 16) Esta un triunfo pa Satanas si e por a instalá un otro dinastia real riba e trono den Jerusalem! E por a asta frustra e propósito di Jehova p’e liña di David producí un heredero permanente, e “Prins di Pas.”—Isaías 9:6, 7.

Jehova Su Garantianan Amoroso

 9. Ki garantianan mester duna tantu Acas como cristian djawe curashi?

⁹ E complot di Siria cu Israel lo tin éxito? No. Jehova ta declará: “E lo no para, ni lo e no tuma lugá.” (Isaías 7:7) Pa medio di Isaías, Jehova ta bisa cu no solamente e sitiamentu di Jerusalem lo fracasá, sino cu “denter di solamente sesent’i cincu aña Efraim lo ser destrosá na pida-pida, di manera cu lo e no ta un pueblo.” (Isaías 7:8) Sí, denter di 65 aña Israel lo no existí mas como pueblo.a E garantia aki, cu su precision cronológico, lo mester duna Acas ánimo. Asina tambe, e echo cu e pueblo di Dios djawe sa cu e tempu p’e mundu di Satanas aki ta cabando, ta fortalecé nan.

10. (a) Awe, con cristian berdadero por imitá Jehova? (b) Kico Jehova ta ofrecé Acas?

¹⁰ Kisas e cara di Acas ta duna e impresion cu e no por caba di kere, ya cu Jehova ta bisa mediante Isaías: “A ménos cu boso tin fe, boso lo no dura largu.” Anto cu pacenshi, “Jehova a sigui papia mas cos cu Acas.” (Isaías 7:9, 10) Ki un ehempel magnífico! Awe, aunke hopi hende no ta respondé mesora n’e mensahe di Reino, nos ta haci bon di imitá Jehova dor di bishitá nan bes tras bes i “papia mas cos.” Na continuacion, Jehova ta bisa Acas: “Pidi pa bo mes un señal for di Jehova bo Dios, i hacié mes hundu cu Sheol of hacié haltu manera e regionnan djariba.” (Isaías 7:11) Acas tin mag di pidi un señal, i Jehova lo dun’é como garantia cu lo e protehá e cas di David.

11. Ki garantia Jehova su expresion “bo Dios” ta duna?

¹¹ Ripará kico Jehova ta bisa: ‘Pidi un señal for di bo Dios.’ Jehova ta berdaderamente bondadoso. Ya caba Acas tin e fama di ta adorá dios falsu i di a adoptá prácticanan pagano repugnante. (2 Reynan 16:3, 4) Apesar di esei i apesar di Acas su cobardia, ainda Jehova ta yama su mes e Dios di Acas. Esaki ta garantisá nos cu Jehova no ta rechasá hende muchu lihé. E ta dispuesto pa saca su man pa esnan cu faya of kende nan fe a bira débil. E garantia aki di amor divino lo motivá Acas p’e aceptá Jehova su yudansa?

Di Duda pa Desobedencia

12. (a) Ki actitud arogante Acas ta adoptá? (b) En bes di bolbe na Jehova, cerca ken Acas ta busca yudansa?

¹² Acas ta contestá na un manera desafiante: “Lo mi no pidi, ni lo mi no pone Jehova na prueba.” (Isaías 7:12) No, no ta e palabranan dje ley “boso no mag pone Jehova boso Dios na prueba” Acas ta obedeciendo aki. (Deuteronomio 6:16) Siglonan despues, Jesus ta cita e mésun ley ei ora Satanas ta purba hink’é den tentacion. (Mateo 4:7) Pero e caso di Acas ta distinto, pasobra ta Jehova ta invit’é p’e bolbe na adoracion berdadero i ta ofrecé un señal cu lo fortalecé su fe. Sin embargo, Acas ta preferá di busca proteccion otro caminda. Posiblemente n’e momento ei e rey ta manda un suma grandi di placa Asiria, buscando yudansa contra su enemigunan di nort. (2 Reynan 16:7, 8) Miéntras tantu, e ehército sirio-israelita ta rondoná Jerusalem i ta cuminsá sitia e stad.

13. Ki cambio nos ta ripará den versículo 13, i kico esei ta nificá?

¹³ Cu e rey su falta di fe na mente, Isaías ta bisa: “Scucha por fabor, o cas di David. Ta un cos asina chikitu pa boso cansa hende, cu boso tin cu cansa mi Dios tambe?” (Isaías 7:13) Sí, Jehova por cansa di hende cu ta desafi’é constantemente. Ripará tambe cu awor e profeta ta papia di “mi Dios” i no “bo Dios.” Un cambio cu ta un mal señal! Ora Acas rechasá Jehova i acudí na Asiria, e ta perde un bon oportunidad pa drecha su relacion cu Dios. Laga nos nunca sacrificá nos relacion cu Dios dor di pasa por haltu di nos creencianan bíblico djis pa haña algun beneficio temporal.

E Señal di Emmanuel

14. Con Jehova ta mustra su fieldad na su pacto cu David?

¹⁴ Jehova ta keda fiel na su pacto cu David. El a ofrecé un señal i lo e duna un señal! Isaías ta continuá: “Jehova mes lo duna boso un señal: Mira! E mosa mes realmente lo sali na estado, i e ta duna lus na un yu homber, i sigur lo e yam’é Emmanuel. Manteca i miel lo e ta comiendo pa ora cu e sa con pa rechasá loke ta malu i scoge loke ta bon. Pasobra promé cu e mucha homber sa con pa rechasá loke ta malu i scoge loke ta bon, e suela dje dos reynan pa ken bo ta sinti un miedu teribel, lo keda completamente bandoná.”—Isaías 7:14-16.

15. Cua dos pregunta e profecia tocante Emmanuel ta contestá?

¹⁵ Aki tin bon noticia pa ken cu tin miedu cu e invasornan lo pone fin n’e liña di rey cu ta bini for di David. “Emmanuel” ta nificá “Dios Ta cu Nos.” Dios ta cu Huda i lo no permití niun hende anulá su pacto cu David. Ademas, Isaías ta bisa Acas i su pueblo kico Jehova lo haci i tambe na ki tempu lo e hacié. Promé cu e mucha homber Emmanuel tin suficiente edad pa distinguí entre bon i malu, e nacionnan enemigu lo ser destruí. I dicho echo!

16. Pakico Jehova lo a laga e identidad di Emmanuel den tempu di Acas na duda?

¹⁶ Bijbel no ta revelá yu di ken Emmanuel ta. Pero dor cu e hobencito aki tin cu sirbi como señal i cu Isaías mas despues ta bisa cu e i su yunan “ta como señal,” kisas Emmanuel ta un yu dje profeta. (Isaías 8:18) Tal bes Jehova ta laga e identidad di Emmanuel den tempu di Acas na duda pa asina no kita e atencion cu generacionnan mas despues mester tin pa e Emmanuel Mayor. Ken esei ta?

17. (a) Ken ta e Emmanuel Mayor, i kico su nacementu a nificá? (b) Pakico e pueblo di Dios por sclama awe: “Dios ta cu nos”?

¹⁷ Aparte dje buki di Isaías, e único otro mencion dje nomber Emmanuel den Bijbel ta na Mateo 1:23. Jehova a inspirá Mateo pa aplicá e profecia dje nacementu di Emmanuel n’e nacementu di Jesus, e Heredero legítimo dje trono di David. (Mateo 1:18-23) E nacementu dje promé Emmanuel tabata un señal cu Dios no a bandoná e cas di David. Mescos tambe, e nacementu di Jesus, e Emmanuel Mayor, tabata un señal cu Dios no a bandoná humanidad ni su pacto di Reino cu e cas di David. (Lucas 1:31-33) Cu Jehova su representante principal awor entre humanidad, Mateo tabatin tur motibu pa bisa, ‘Dios ta cu nos.’ Awe, Jesus ta goberná como Rey celestial i e ta cu su congregacion riba tera. (Mateo 28:20) No tin duda anto cu e pueblo di Dios tin asta mas motibu pa sclama cu curashi: “Dios ta cu nos!”

Mas Consecuencia di Infieldad

18. (a) Pakico e siguiente palabranan di Isaías ta causa teror pa su oyentenan? (b) Con cos lo cambia pronto?

¹⁸ E último palabranan di Isaías ta masha consolador, pero esnan cu ta sigui sí ta hinca teror den su oyentenan: “Jehova lo trece contra bo i contra bo pueblo i contra e cas di bo tata dianan manera no tabatin desde e dia cu Efraim a apartá for di banda di Huda, esta, e rey di Asiria.” (Isaías 7:17) Sí, desaster ta na caminda, na man dje rey di Asiria. E chens cu e asirionan, notorio pa nan crueldad, lo bin dominá Huda, ta pone cu Acas i su pueblo ta keda hopi anochi sin por drumi. Acas a kere cu dor di bira amigu di Asiria esei lo a libr’é di Israel i Siria. Berdad, e rey di Asiria lo respondé n’e súplica di Acas dor di atacá Israel i Siria finalmente. (2 Reynan 16:9) Probablemente p’e motibu aki Peka i Rezin lo haña nan obligá di retirá for di Jerusalem. Di manera cu e aliansa sirio-israelita lo resultá di ta incapas pa poderá di Jerusalem. (Isaías 7:1) Sin embargo, awor Isaías ta bisa su oyentenan pasmá cu Asiria, for di ken nan ta spera di ricibí proteccion, lo bira nan opresor!—Compará cu Proverbionan 29:25.

19. Ki spiertamentu e drama histórico aki ta contené pa cristiannan djawe?

¹⁹ E relato histórico verídico aki ta contené un spiertamentu pa cristiannan djawe. Ora nos ta bou di preshon nos por sinti nos mes tentá pa pasa por haltu di principionan cristian, rechasando asina e proteccion di Jehova. Un proceder asina ta imprudente, comparabel cu suicidio, manera e siguiente palabranan di Isaías ta mustra bon cla. E profeta ta describí loke e invasion asirio lo nificá p’e tera i pa su hendenan.

20. Ken ta “e muscanan” i “e abehanan,” i kico nan lo haci?

²⁰ Isaías ta dividí su declaracionnan formal den cuater parti, i den cada un e ta predicí kico lo pasa “riba e dia ei,” es decir, dia cu Asiria atacá Huda. “Tin cu sosodé riba e dia ei cu Jehova lo fluit yama e muscanan cu ta na extremidad dje canalnan di Nilo di Egipto i e abehanan cu ta den e tera di Asiria, i nan lo bini sigur i baha, nan tur, riba e vayenan torencial steil i riba e skernan di baranca steil i riba tur mondi cerá di mata di sumpiña i riba tur e lugánan di bebe awa.” (Isaías 7:18, 19) Mescos cu zwerm di musca i abeha, e ehércitonan di Egipto i Asiria lo dirigí nan atencion n’e Tera Primintí. Lo no trata aki di un invasion pasahero. “E muscanan” i “e abehanan” lo baha riba e tera i lo yena tur skina i nachi.

21. Den ki manera e rey Asirio lo ta manera un nabaha?

²¹ Isaías ta continuá: “Riba e dia ei, pa medio di un nabaha di huur den e region dje Riu, asta pa medio di rey di Asiria, Jehova lo feita e cabes i e cabei di pia, i e nabaha lo bari asta e barba mes.” (Isaías 7:20) Awor ta solamente Asiria, e menasa principal, ta ser mencioná. Acas ta contratá e rey asirio pa “feita” Siria i Israel. Sin embargo, e “nabaha di huur” aki for dje region di Eufrátes lo move contra “cabes” di Huda i feit’é pelon-pelon, kita asta e barba!

22. Ki ehempel Isaías ta duna pa mustra riba e consecuencianan dje binidero invasion asirio?

²² Kico lo ta e consecuencianan? “Tin cu sosodé riba e dia ei cu un persona lo conserbá bibu un baca yong dje tou i dos carné. I tin cu sosodé cu, debí n’e abundancia dje produccion di lechi, lo e come manteca; pasobra manteca cu miel ta loke tur cu a keda meimei dje pais lo come.” (Isaías 7:21, 22) Una bes e asirionan “feita” e tera, lo sobra asina poco hende cu un cantidad chikitu di bestia so lo ta necesario pa percurá cuminda. “Manteca cu miel” nan lo come. Nada mas. Ni biña, ni pan ni otro producto básico. Como si fuera pa enfatisá e grado di desolacion, tres bes Isaías ta bisa cu caminda tabatin tera productivo i balioso, awor lo tin mata di sumpiña i mal yerba. Ken cu risca sali pafó dje stad lo tin mester di “flecha i boog” pa protehá nan mes contra bestia salbahe cu ta sconde den e matanan. Terenonan limpiá pa planta lo bira lugá pa toro cu carné trapa. (Isaías 7:23-25) E profecia aki ta cuminsá cumpli den e tempu di Acas mes.—2 Crónicanan 28:20.

Pronósticonan Exacto

23. (a) Kico Jehova ta manda Isaías haci awor? (b) Con e señal dje tabla ta ser confirmá?

²³ Isaías ta bini bek awor riba e situacion actual. Ainda e coalicion sirio-israelita ta sitiando Jerusalem ora e profeta duna e informe aki: “Jehova a bisa mi: ‘Tuma pa bo mes un tabla grandi i skirbi riba dje cu pen di hende mortal, “Maher-salal-has-baz.” I laga mi tin testimonio pa mi mes pa medio di testigonan fiel, Urías e sacerdote i Zacarías yu di Jeberekías.’” (Isaías 8:1, 2) E nomber Maher-salal-has-baz ta nificá “Haci Lihé, O Botin! El A Bini Rápidamente n’e Sakeo.” Isaías ta pidi dos homber respetá den comunidad pa para como testigo dje echo cu e ta skirbi e nomber aki riba un tabla grandi, pa despues nan por confirmá e autenticidad dje documento. No obstante, un di dos señal lo confirmá e señal aki.

24. Ki efecto e señal di Maher-salal-has-baz lo mester tin riba e pueblo di Huda?

²⁴ Isaías ta bisa: “E ora ei mi a acercá e profetisa, i el a sali na estado i cu tempu a duna lus na un yu homber. Awor Jehova a bisa mi: ‘Dun’é e nomber Maher-salal-has-baz, pasobra promé cu e mucha homber sa con pa grita: “Mi tata!” i: “Mi mama!” nan lo hiba e recursonan di Damasco i e botin di Samaria dilanti rey di Asiria.’” (Isaías 8:3, 4) Tantu e tabla grandi como e mucha recien nací lo sirbi como señal cu pronto Asiria lo sakea Siria i Israel, e opresornan di Huda. Con lihé? Promé cu e mucha homber por bisa e promé palabranan cu mayoria baby ta siña, esta, “Tata” i “Mama.” Un pronóstico asina exacto lo mester fortalecé e pueblo su confiansa den Jehova. Ma tambe e por pone algun cuminsá haci mofa di Isaías cu su yunan. Sea cual sea e caso, e palabranan profético di Isaías ta cumpli.—2 Reynan 17:1-6.

25. Ki similaridad tin entre e dianan di Isaías i e tempu actual?

²⁵ Cristiannan por saca un bon les for dje diferente spiertamentunan di Isaías. Apostel Pablo a revelá na nos cu den e drama histórico aki, Isaías a representá Jesucristo, i Isaías su yunan a representá e disipelnan ungí di Jesus. (Hebreonan 2:10-13) Jesus, mediante su siguidónan ungí riba tera, ta recordando cristiannan berdadero dje necesidad pa “keda lantá” den e tempu crítico aki. (Lucas 21:34-36) N’e mésun tempu nan ta spierta opositornan cu no ta repentí, di nan binidero destruccion, aunke hopi di nan ta haci mofa di tal spiertamentu. (2 Pedro 3:3, 4) E echo cu e profecianan ei mará na cierto tempu a cumpli den e dianan di Isaías ta un garantia cu loke Dios a programá pa nos dia tambe lo ser “realisá sin falta. Lo e no ta lat.”—Habacuc 2:3.

“Awanan” Devastador

26, 27. (a) Ki sucesonan Isaías ta predicí? (b) Kico e palabranan di Isaías ta indicá pa Jehova su sirbidónan djawe?

²⁶ Isaías ta continuá cu su spiertamentunan: “Pa motibu cu e pueblo aki a rechasá e awanan di Siloé cu ta bayendo suavemente, i tin gran alegria pa causa di Rezin i e yu homber di Remalías; sí p’esei, mira!, Jehova ta laga subi contra nan e awanan poderoso i abundante dje Riu, e rey di Asiria i henter su gloria. I lo e subi sigur riba tur su canalnan di riu i desbordá tur su oriyanan i pasa dwars dor di Huda. Realmente lo e inundá i pasa over. Te na garganta lo e yega. I e tin cu span su alanan pa yena e hanchura di bo tera, o Emmanuel!”—Isaías 8:5-8.

²⁷ “E pueblo aki,” Israel su reino di nort, ta rechasá Jehova su pacto cu David. (2 Reynan 17:16-18) Pa nan, e pacto ta parce mes débil cu e awanan di Siloé cu ta core suave asina i ta suministrá Jerusalem cu awa. Nan ta alegrá den nan guera contra Huda. Pero e desprecio aki lo no keda sin castigu. Jehova lo permití e asirionan “inundá,” of invadí Siria i Israel, mescos cu pronto Jehova lo permití e elementonan político dje mundu actual inundá e imperio di religion falsu. (Revelacion 17:16; compará cu Daniel 9:26.) Siguientemente, Isaías ta bisa cu e “awanan” inundante lo “pasa dwars dor di Huda” i yega “te na garganta,” te na Jerusalem, caminda e cabes (rey) di Huda ta goberná.b Mescos tambe, den nos tempu e ehecutornan político di religion falsu lo dirigí nan mes contra Jehova su sirbidónan i lo rondoná nan “te na garganta.” (Ezekiel 38:2, 10-16) Kico lo ta e resultado? Wel, kico ta sosodé den tempu di Isaías? E awanan asirio ta inundá e murayanan dje stad i bari e pueblo di Dios? No. Dios ta cu nan.

No Tene Miedu: “Dios Ta cu Nos!”

28. Apesar di tur intento vigoroso di nan enemigunan, kico Jehova ta garantisá Huda?

²⁸ Isaías ta duna e advertencia aki: “Sea dañino, o pueblonan [cu ta oponé Dios su pueblo di pacto], i sea destrosá na pida-pida; i duna oido, boso tur cu ta den partinan leu di tera! Faha boso mes, i sea destrosá na pida-pida! Faha boso mes, i sea destrosá na pida-pida! Planea un proyecto, i lo e ser desbaratá! Papia cualkier palabra, i lo e no permanecé, pasobra Dios ta cu nos!” (Isaías 8:9, 10) Algun aña despues, durante e reinado di Ezekías, yu fiel di Acas, e palabranan aki ta cumpli. Ora e asirionan menasá Jerusalem, e angel di Jehova ta mata 185.000 soldá. Ta bisto cu Dios ta cu su pueblo i cu e liña real di David. (Isaías 37:33-37) Di igual manera, durante e binidero bataya di Armagedon, Jehova lo manda e Emmanuel Mayor no solamente pa aplastá Su enemigunan, sino tambe pa rescatá tur esnan cu ta confia den Dje.—Salmo 2:2, 9, 12.

29. (a) Con diferente e hudiunan den tempu di Acas ta for di esnan den tempu di Ezekías? (b) Pakico sirbidónan di Jehova djawe no ta forma ningun aliansa religioso of político?

²⁹ Distinto dje hudiunan di tempu di Ezekías, e contemporáneonan di Acas no tin fe cu Jehova por protehá nan. Nan ta preferá un confederacion, of “conspiracion,” cu e asirionan como nan baluarte contra e aliansa sirio-israelita. Sin embargo, e “man” di Jehova ta impulsá Isaías pa papia contra “e caminda dje pueblo aki,” es decir, contra e tendencia popular. E ta spierta: “Boso no mester teme e obheto di nan temor, ni boso no mester tembla dilanti dje. Jehova di ehércitonan—e ta Esun cu boso mester trata como santu, i e mester ta e obheto di boso temor, i e mester ta Esun cu ta pone boso tembla.” (Isaías 8:11-13) Cu e palabranan aki na mente, awe Jehova su sirbidónan ta paga tinu pa nan no cera aliansa religioso of político ni confia den nan. Nan tin pleno confiansa den Dios su poder di proteccion. Al fin i al cabo, si ‘Jehova ta na nos banda, kico hende terenal por haci nos?’—Salmo 118:6.

30. Kico lo pasa cu esnan cu no ta confia den Jehova?

³⁰ Anto Isaías ta ripití cu Jehova lo ta “un lugá sagrado,” un proteccion, pa esnan cu ta confia den dje. En cambio, esnan cu ta rechas’é “sigur lo trompecá i cai i ser kibrá, i lo ser cogé den las i atrapá”—cincu verbo descriptivo cu no ta laga niun duda tocante kico lo para di esnan cu no ta confia den Jehova. (Isaías 8:14, 15) Esnan cu a rechasá Jesus den promé siglo tambe a trompecá i cai. (Lucas 20:17, 18) Mescos lo pasa cu esnan cu awe no ta duna nan lealtad na Jesus, e Rey celestial entronisá.—Salmo 2:5-9.

31. Con cristiannan berdadero djawe por sigui e ehempel di Isaías i di esnan cu ta scucha su siñansanan?

³¹ Den e tempu di Isaías, no ta tur hende ta trompecá. Isaías ta bisa: “Lora e testimonio, pone un seyo rond dje ley entre mi disipelnan! I lo mi keda den expectativa di Jehova, cu ta sconde su cara pa e cas di Jacob, i mi speransa lo ta den dje.” (Isaías 8:16, 17) Tantu Isaías como esnan cu ta obedecé su siñansa lo no bandoná e Ley di Dios. Nan ta sigui confia den Jehova, maske nan compatriotanan malbado ta nenga di haci esei i ta pone cu Jehova ta sconde su cara for di nan. Laga nos sigui e ehempel di esnan cu ta confia den Jehova i sea mes determiná pa pega na adoracion puru!—Daniel 12:4, 9; Mateo 24:45; compará cu Hebreonan 6:11, 12.

“Señal” i “Milager”

32. (a) Ken awe ta sirbi “como señal i como milager”? (b) Pakico cristiannan mester resaltá for dje mundu?

³² Isaías ta proclamá awor: “Mira! Ami cu e yunan cu Jehova a duna mi, ta como señal i como milager den Israel di parti di Jehova di ehércitonan, cu ta biba den ceru di Síon.” (Isaías 8:18) Sí, Isaías, Sear-jasub i Maher-salal-has-baz ta señalnan dje propósito di Jehova pa Huda. Awe tambe, Jesus i su rumannan ungí ta sirbi como señal. (Hebreonan 2:11-13) I “un multitud grandi” di “otro carné” a uni cu nan den nan trabou. (Revelacion 7:9, 14; Juan 10:16) Claro cu un señal ta balioso solamente ora e ta resaltá meimei di loke ta rondon’é. Di igual manera, cristiannan ta cumpli cu nan comision como señal solamente ora nan ta resaltá como diferente for dje mundu aki, cifrando pleno confiansa den Jehova i proclamando su propósito cu curashi.

33. (a) Kico cristiannan berdadero ta determiná pa haci? (b) Pakico cristian berdadero lo por para firme?

³³ Laga nos tur anto pega na e normanan di Dios, no na esnan dje mundu aki. Sigui resaltá sin temor—como señal—cumpliendo cu e comision cu e Isaías Mayor, Jesucristo, a ricibí: “Proclamá e aña di bon boluntad . . . i e dia di vengansa di parti di nos Dios.” (Isaías 61:1, 2; Lucas 4:17-21) Sí, ora e inundacion asirio pasa dor dje tera—asta si e yega te na nos garganta—lo e no bari cristiannan berdadero. Nos lo para firme pasobra “Dios ta cu nos.”

[Nota]

[Plachi na página 103]

Isaías a bai cu Sear-jasub ora el a duna Acas e mensahe di Jehova

[Plachi na página 111]

Pakico Isaías a skirbi “Maher-salal-has-baz” riba un tabla grandi?