Kapítulo Bintiocho

Un Lus pa e Nashonnan

Isaías 66:15-24

1, 2. Dikon lus ta hopi importante, i ki klase di skuridat ta tapa tera awe?

YEHOVA ta e Fuente di lus, “e Dunador di solo pa lus den dia, e statutonan di luna i e streanan pa lus anochi.” (Yeremías 31:35) A base di esaki so kaba hende mester dun’é rekonosementu komo e Fuente di bida, ya ku lus ta nifiká bida. Si tera no tabata haña lus ni kalor di solo konstantemente, bida lo no tabata posibel manera nos konos’é. Nos planeta lo tabata inhabitabel.

² P’esei pa nos ta di sumo importansia ku Yehova—refiriendo na nos tempu—a profetisá di un époka di skuridat i no di lus. Bou di inspirashon Isaías a skirbi: “Mira! skuridat mes lo tapa tera, i tiniebla diki e gruponan nashonal.” (Isaías 60:2) E palabranan aki a referí naturalmente na skuridat spiritual, no literal, pero tòg nos no mag balotá nan seriedat. Hende ku no tin lus spiritual ku tempu ta pèrdè nan bida, meskos ku esnan ku keda sin haña lus di solo.

 3. Na unda nos por akudí pa haña lus den e tempu skur aki?

³ Durante e tempu skur aki, nos no por pèrmití nos mes e luho di ignorá e lus spiritual ku Yehova ta pone disponibel pa nos. Ta masha importante pa nos akudí na e Palabra di Dios pa lusa nos kaminda dor di lesa Beibel tur dia si ta posibel. (Salmo 119:105) Reunionnan kristian ta duna nos e oportunidat pa animá otro pa keda riba “e kaminda dje hustunan.” (Proverbionan 4:18; Hebreonan 10:23-25) E fortalesa ku nos ta saka for di studio di Beibel diligente i di asosiashon kristian sano ta yuda nos evitá ku e skuridat di e “último dianan” aki—ku lo kulminá den e gran “dia di Yehova su rabia”—ta traga nos. (2 Timoteo 3:1; Sofonías 2:3) E dia ei ta aserkando ku velosidat haltu! Ku e ta bini ta sigur; meskos ku un dia paresido a bini riba e habitantenan di antiguo Yerúsalèm.

Yehova ‘Ta Tuma e Kontroversia’

4, 5. (a) Den ki sentido Yehova ta bini kontra Yerúsalèm? (b) Dikon nos por konkluí ku ta un kantidat relativamente chikí di hudiu lo sobrebibí e destrukshon di Yerúsalèm na 607 promé ku Era Komun? (Wak nota na pia di página.)

⁴ Den e versíkulonan final di e profesia emoshonante di Isaías, Yehova ta deskribí na un manera bibu e susesonan ku ta hiba na e dia di su rabia. Nos ta lesa: “Yehova mes ta bini manera un kandela, i su garoshinan manera un bientu di tempestat, afin di paga bèk su rabia ku puru furia i su reprendementu ku vlamnan di kandela. Pasobra manera kandela Yehova mes en realidat lo tuma e kontroversia, sí, ku su spada, kontra tur karni; i esnan matá pa Yehova sigur lo bira hopi.”—Isaías 66:15, 16.

⁵ E palabranan ei mester yuda e hendenan den tempu di Isaías komprendé kon serio nan situashon ta. E tempu ta yegando serka pa e babilonionan—komo esnan ku lo ehekutá Yehova su huisio—bini kontra Yerúsalèm. Nan garoshinan lo lanta nubia di stòf meskos ku un mal tempu ku hopi bientu. Sin duda, esei lo ta un bista spantoso. Yehova lo usa e invasornan pa trese su huisio ardiente kontra tur “karni” hudiu infiel. Lo ta komo si fuera Yehova mes ta bringa kontra su pueblo. Su “puru furia” lo no bira bèk. Hopi hudiu lo kai komo “esnan matá pa Yehova.” Na aña 607 promé ku Era Komun, e profesia aki ta kumpli.a

 6. Ki práktikanan kastigabel ta tuma lugá den Huda?

⁶ Yehova ta hustifiká pa ‘tuma e kontroversia’ kontra su pueblo? Definitivamente! Den transkurso di nos análisis di e buki di Isaías, nos a mira ku e hudiunan tabata profundamente enbolbí den adorashon falsu, ounke supuestamente nan tabata dediká na Yehova, i Yehova no a sera wowo pa nan akshon. Nos ta bolbe mira esaki den e siguiente palabranan di e profesia: “‘Esnan ku ta santifiká nan mes i limpia nan mes pa e hardinnan tras di unu den e sentro, ku ta kome karni di porko i e kos repugnante, asta e raton ku ta salta, nan tur huntu lo yega na nan fin,’ ta e ekspreshon di Yehova.” (Isaías 66:17) E hudiunan ei ta “santifiká nan mes i limpia nan mes” komo preparashon pa adorashon puru? Ta bisto ku nò. Mas bien, nan ta partisipando den ritonan di purifikashon pagano den hardinnan spesial. Anto ora nan kaba nan ta kome den forma haragan karni di porko i di otro kriaturanan ku e Lei di Moises ta konsiderá impuru.—Levítiko 11:7, 21-23.

 7. Den kiko kristiandat parse e nashon di Huda ku su idolatria?

⁷ Esta un bèrgwensa pa un nashon ku a sera un pakto ku e úniko Dios berdadero! Pero pensa un ratu: Awe e mesun situashon bergonsoso aki ta eksistí entre e religionnan di kristiandat. Nan tambe ta pretendé ku nan ta sirbi Dios, i hopi di nan lidernan ta fingi di ta deboto. Sin embargo nan ta susha nan mes ku siñansa i tradishonnan pagano, dunando prueba ku nan ta den skuridat spiritual. I ki grandi e skuridat ei ta!—Mateo 6:23; Huan 3:19, 20.

‘Nan Lo Tin Ku Mira Mi Gloria’

 8. (a) Kiko lo pasa tantu ku Huda komo kristiandat? (b) Den ki sentido e nashonnan lo ‘mira Yehova su gloria’?

⁸ Yehova ta tuma nota di kristiandat su akshonnan kastigabel i siñansanan falsu? Lesa e siguiente palabranan di Yehova ku Isaías a skirbi, i wak kiko bo ta saka afó: “Pa loke ta nan obranan i nan pensamentunan, mi ta bini afin di kolektá tur nashon i lenga huntu; i nan lo tin ku bini i mira mi gloria.” (Isaías 66:18) Yehova sa di e obranan i tambe di e pensamentunan di esnan ku ta pretendé di ta su sirbidó, i e ta kla pa husga nan pa esei. Huda ta pretendé ku e ta kere den Yehova, pero su obranan di idolatria i su práktikanan pagano ta desmentí esei. Ta pòrnada su siudadanonan ta “purifiká” nan mes segun ritonan pagano. E nashon lo ser destruí, i esei lo sosodé den pleno bista di su bisiñanan adoradó di dios falsu. E bisiñanan aki lo ‘mira Yehova su gloria’ den e sentido ku nan lo ta testigu di e susesonan aki i nan lo haña nan obligá ta atmití ku Yehova su palabra a kumpli. Ki paralelo esaki tin den kristiandat? Ora ku su fin yega, hopi di su amigunan bieu i sosionan komersial lo haña nan obligá di para mira kon Yehova su palabra ta kumpli, sin ku nan por hasi nada al respekto.—Yeremías 25:31-33; Revelashon 17:15-18; 18:9-19.

 9. Ki bon notisia Yehova ta deklará?

⁹ Yerúsalèm su destrukshon na aña 607 promé ku Era Komun ta nifiká ku Yehova lo no tin testigu mas riba tera? Nò. Lo tin hudiu ku lo mantené integridat eksepshonal, manera Daniel i su tres kompañeronan, ku lo sigui sirbi Yehova asta durante nan eksilio na Babilonia. (Daniel 1:6, 7) Sí, e fila di testigu di Yehova fiel lo keda intakto, i despues di 70 aña, hòmber i muhénan fiel lo sali for di Babilonia i regresá Huda pa restorá adorashon puru einan. Ta na esei Yehova ta referí siguientemente: “Lo mi pone entre nan un señal, i lo mi manda algun di esnan ku a skapa na e nashonnan, na Társis, Pul i Lut, esnan ku ta span bog, Tubal i Yavan, e islanan leu, ku no a tende un informe tokante mi ni a mira mi gloria; i nan sigur lo anunsiá mi gloria entre e nashonnan.”—Isaías 66:19.

10. (a) Den ki sentido hudiunan fiel librá for di Babilonia lo sirbi komo un señal? (b) Ken awe ta sirbi komo un señal?

¹⁰ E multitut di hòmber i muhénan fiel ku ta regresá Yerúsalèm na 537 promé ku Era Komun lo sirbi komo un señal asombroso, un prueba ku Yehova a libra su pueblo. Ken por a imaginá ku un dia e hudiunan prezu lo a rekobrá nan libertat pa reanudá adorashon puru den e tèmpel di Yehova? Asina tambe e kristiannan ungí den promé siglo a sirbi “komo señal i komo milager,” i hendenan mansu ku kier a sirbi Yehova a basha bin serka nan. (Isaías 8:18; Hebreonan 2:13) Awe kristiannan ungí, ku ta prosperá den nan tera restorá, ta sirbi komo un señal asombroso riba tera. (Isaías 66:8) Nan ta un prueba bibu di e poder di Yehova su spiritu, i ta atraé hende mansu kende nan kurason ta motivá nan pa sirbi Yehova.

11. (a) Kon hopi hende di e nashonnan lo siña tokante Yehova despues di e restorashon? (b) Kon Zakarías 8:23 a kumpli inisialmente?

¹¹ Pero despues di e restorashon di aña 537 promé ku Era Komun, kon hende di e nashonnan ku no a tende e informe tokante Yehova lo por siña konos’é? Wèl, no ta tur hudiu fiel lo regresá Yerúsalèm na fin di e eksilio babilóniko. Algun di nan, manera Daniel, lo keda Babilonia. Otronan lo plama bai rònt mundu. Den siglo 5 promé ku Era Komun, tabatin hudiu ta biba den henter e Imperio di Pèrsia. (Èster 1:1; 3:8) Sin duda algun di nan a konta nan bisiñanan pagano tokante Yehova, pasobra hopi hende di e nashonnan ei a bira hudiu. Ta parse ku esei tabata e kaso di e eunuko etiopio ku e disipel kristian Felipe a prediká na dje den promé siglo. (Echonan 8:26-40) Tur esaki a tuma lugá komo un kumplimentu inisial di e palabranan di profeta Zakarías: “Den e dianan ei lo sosodé ku dies hòmber di tur e idiomanan dje nashonnan lo gara, sí, nan realmente lo gara e saya di un hòmber ku ta un hudiu, bisando: ‘Nos lo bai ku boso, pasobra nos a tende ku Dios ta ku boso.’” (Zakarías 8:23) Yehova en bèrdat a manda lus pa e nashonnan!—Salmo 43:3.

Tresiendo “un Regalo na Yehova”

12, 13. Den ki sentido lo trese “rumannan” na Yerúsalèm kuminsando na aña 537 promé ku Era Komun en adelante?

¹² Despues ku a rekonstruí Yerúsalèm, e hudiunan plamá den paisnan leu lo konsiderá e stat huntu ku su saserdosio restorá komo e sentro di adorashon puru. Hopi di nan lo biaha distansianan largu pa asistí na e fiestanan anual ku lo wòrdu selebrá einan. Bou di inspirashon Isaías ta skirbi: “‘Nan realmente lo trese tur boso rumannan for di tur e nashonnan komo un regalo na Yehova, riba kabai i den garoshi i den garoshi tapá i riba mula i riba kamelnan hembra velos, te na mi seru santu, Yerúsalèm,’ Yehova a bisa, ‘meskos ku ora e yu hòmbernan di Israel ta trese e regalo den un wea limpi den e kas di Yehova. I for di nan tambe lo tuma algun saserdote, pa e levitanan.’”—Isaías 66:20, 21.

¹³ Algun di e “rumannan for di tur e nashonnan” tabata presente riba dia di Pentekòste ora ku a drama spiritu santu riba e disipelnan di Hesus. Beibel ta bisa: “Tabatin bibando den Yerúsalèm hudiunan, hòmbernan temeroso di Dios, di tur nashon di esnan bou di shelu.” (Echonan 2:5) Nan a bini Yerúsalèm pa adorá segun e kustumber hudiu, pero ora nan a tende e bon nobo tokante Hesukristu, hopi di nan a pone fe den dje i a batisá.

14, 15. (a) Kon kristiannan ungí a rekohé mas di nan “rumannan” spiritual despues di Promé Guera Mundial, i den ki manera a trese esakinan pa Yehova komo un “regalo den un wea limpi”? (b) Den ki sentido Yehova a “tuma algun pa e saserdotenan”? (c) Ken tabata algun di e kristiannan ungí enbolbí den e rekohementu di nan rumannan spiritual? (Wak e kuadro riba e página aki.)

¹⁴ E profesia aki tin un kumplimentu moderno? Klaro ku sí. Despues di Promé Guera Mundial, Yehova su sirbidónan ungí a komprendé for di e Skritura ku e Reino di Dios a ser establesí den shelu na aña 1914. Dor di studia Beibel kuidadosamente, nan a haña sa ku mester a rekohé mas heredero di Reino òf “rumannan.” Predikadónan yen di kurashi, a biaha te na “e parti mas leu dje tera”—usando tur tipo di medio di transporte—en buska di posibel miembronan di e restu ungí. Ora nan a haña e personanan aki, di kua mayoria a sali for di iglesianan di kristiandat, nan a trese nan pa Yehova komo regalo.—Echonan 1:8.

¹⁵ E ungínan ku nan a rekohé den e promé añanan ei no a ferwagt ku Yehova lo aseptá nan den e kondishon ku nan tabata promé ku nan a konosé e bèrdat di Beibel. Nan a dal paso pa limpia nan mes di kontaminashon spiritual i moral di manera ku nan por a ser presentá komo un “regalo den un wea limpi,” òf manera apòstel Pablo a bis’é, “komo un bírgen puru na e Kristu.” (2 Korintionan 11:2) Fuera di rechasá doktrinanan falsu, e ungínan tabatin ku siña kon pa keda estriktamente neutral den asuntunan polítiko di e mundu aki. Na 1931, ora ku Yehova su sirbidónan tabata debidamente purifiká, el a konsedé nan miserikòrdiosamente e privilegio di karga su nòmber komo Testigunan di Yehova. (Isaías 43:10-12) Pero den ki sentido Yehova a “tuma algun pa e saserdotenan”? Komo grupo, e ungínan aki a bira parti di “un saserdosio real, un nashon santu,” ofresiendo sakrifisio di alabansa na Dios.—1 Pedro 2:9; Isaías 54:1; Hebreonan 13:15.

E Rekohementu Ta Sigui

16, 17. Ken ta representá “boso desendensia” despues di Promé Guera Mundial?

¹⁶ E kantidat total di e “saserdosio real” ei ta 144.000, i ku tempu a rekohé nan tur. (Revelashon 7:1-8; 14:1) Esei tabata fin di e trabou di rekohementu? Nò. E profesia di Isaías ta sigui bisa: “‘Pasobra meskos ku e shelu nobo i e tera nobo ku mi ta bai krea ta pará mi dilanti,’ ta e ekspreshon di Yehova, ‘asina boso desendensia i boso nòmber lo keda para.’” (Isaías 66:22) Den e promé kumplimentu di e palabranan ei, e hudiunan ku regresá for di eksilio den Babilonia lo haña yu. Den e manera ei e restu di hudiu restorá—“e tera nobo”—ku lo biba bou di e gobernashon hudiu nobo—“e shelu nobo”—lo ta firmemente establesí. Sin embargo, e profesia tabatin un kumplimentu sumamente remarkabel den nos tempu.

¹⁷ E “desendensia” ku e nashon di rumannan spiritual ta produsí ta e “multitut grandi,” ku tin e speransa di bida eterno riba tera. Nan ta sali “for di tur nashon i tribu i pueblo i lenga,” i nan ta “pará dilanti dje trono i dilanti e Lamchi.” Esakinan “a laba nan pañanan largu i a hasi nan blanku den e sanger dje Lamchi.” (Revelashon 7:9-14; 22:17) Awe e “multitut grandi” ta kita for di skuridat spiritual i ta akudí na e lus ku Yehova ta perkurá. Nan ta pone fe den Hesukristu, i meskos ku nan rumannan ungí, nan ta hasi esfuerso pa keda limpi den sentido spiritual i moral. Komo grupo nan ta sigui sirbi bou di e guia di Kristu i nan lo “keda para” pa semper!—Salmo 37:11, 29.

18. (a) Kon e miembronan di e multitut grandi a aktua meskos ku nan rumannan ungí? (b) Kon e ungínan i nan kompañeronan ta adorá Yehova “di luna nobo pa luna nobo i di sabat pa sabat”?

¹⁸ E hòmber i muhénan trahadó aki ku tin un speransa terenal sa ku ounke ta masha importante pa nan keda limpi den sentido moral i spiritual, pa agradá Yehova nan tin ku hasi algu mas. E trabou di rekohementu ta den full swing, i nan kier partisipá den dje. E buki di Revelashon ta profetisá tokante nan: “Nan ta dilanti dje trono di Dios; i nan ta rindiendo sirbishi sagrado na dje di dia i anochi den su tèmpel.” (Revelashon 7:15) E palabranan ei ta laga nos kòrda riba e penúltimo versíkulo di e profesia di Isaías: “‘Lo sosodé sigur ku di luna nobo pa luna nobo i di sabat pa sabat, tur karni lo bini pa bùig mi dilanti,’ Yehova a bisa.” (Isaías 66:23) Esaki ta tumando lugá awe. “Di luna nobo pa luna nobo i di sabat pa sabat”—es desir regularmente, siman aden siman afó, luna aden luna afó—kristiannan ungí i nan kompañeronan, e multitut grandi, ta reuní huntu pa adorá Yehova. Nan ta hasi esaki, entre otro, dor di asistí na reunionnan kristian i partisipá den e sirbishi públiko. Abo ta un di esnan ku regularmente ‘ta bini i bùig dilanti Yehova’? E pueblo di Yehova ta hasié ku gran goso, i esnan di e multitut grandi ta anhelá e dia ora ku “tur karni”—tur hende na bida—lo sirbi Yehova “di luna nobo pa luna nobo i di sabat pa sabat” pa henter eternidat.

E Fin Definitivo di Dios Su Enemigunan

19, 20. Ki propósito Gehena tabatin den tempu bíbliko, i kiko e ta simbolisá?

¹⁹ A resta un solo versíkulo di e profesia di Isaías pa nos analisá. E buki ta konkluí ku e palabranan aki: “Nan realmente lo sali i wak e kadavernan di hende ku tabata kometé transgreshon kontra mi; pasobra bichi ku ta riba nan lo no muri i nan kandela mes lo no paga, i nan tin ku bira algu repugnante pa tur karni.” (Isaías 66:24) Hesukristu probablemente tabatin e profesia aki na mente ora el a animá su disipelnan pa simplifiká nan bida i pone interesnan di Reino na promé lugá. El a bisa: “Si bo wowo ta pone bo trompeká, tir’é afó; ta mihó pa bo drenta ku un wowo den e reino di Dios en bes di ku dos wowo ser tirá den Gehena, unda nan bichi no ta muri i e kandela no ta paga.”—Marko 9:47, 48; Mateo 5:29, 30; 6:33.

²⁰ Kiko ta Gehena? Vários siglo pasá e erudito hudiu David Kimhi a skirbi: “E ta un lugá situá pegá ku Yerúsalèm, i e ta un lugá repugnante, i nan ta benta kosnan impuru i kadaver den dje. Tambe tabatin un kandela konstante pa kima e kosnan impuru i e wesunan di e kadavernan. P’esei ta yama e huisio di e malbadonan simbólikamente Gehinnom [òf Gehena].” Si ta asina manera e komentarista hudiu aki ta indiká, ku e propósito di Gehena tabata pa deshasí di desperdisio i kadaver di hende ku nan a konsiderá indigno di un entiero, kandela lo tabata e medio apropiado pa eliminá tal desperdisio. Loke kandela no a kaba kuné, bichi lo a kaba kuné. Esei ta un imágen apropiá di e fin definitivo di tur Dios su enemigunan!b

21. Pa ken e buki di Isaías ta konkluí riba un nota positivo, i dikon?

²¹ No ta asina ku e profesia emoshonante di Isaías ta konkluí na un forma hororoso en bista ku e último versíkulo ta menshoná kadaver, kandela i bichi? Esnan ku ta deklará nan mes enemigu di Dios sin duda ta pensa ku sí. Pero pa e amigunan di Dios, e deskripshon ku Isaías ta duna di e destrukshon eterno di e malbadonan ta masha alentador. Yehova su pueblo tin mester di e garantia aki ku nan enemigunan nunka mas lo bolbe dominá nan. E enemigunan ei, ku a kousa e adoradónan di Dios asina tantu sufrimentu i ku a trese asina tantu reproche riba Dios su nòmber, lo ser destruí pa semper. E ora ei, “angustia lo no lanta un di dos biaha.”—Nahum 1:9.

22, 23. (a) Menshoná algun benefisio ku bo a haña dor di studia e buki di Isaías. (b) Despues di a studia e buki di Isaías, kiko bo ta determiná pa hasi, i kiko ta bo speransa?

²² Finalisando nos análisis di e buki di Isaías, nos ta komprendé bon kla ku e buki bíbliko aki no ta simplemente historia morto. Al kontrario, e tin un mensahe pa nos awe. Ora nos reflekshoná riba e tempu skur den kua Isaías a biba, nos por mira kuantu su tempu parse nos tempu. Disturbionan polítiko, hipokresia religioso, korupshon hudisial i opreshon di hende fiel i di hende pober a karakterisá e tempu di Isaías, i esei ta karakterisá nos tempu tambe. E hudiunan fiel den siglo 6 promé ku Era Komun sin duda tabata gradisidu pa e profesia di Isaías, i nos tambe ta haña un konsuelo segun nos ta studi’é.

²³ Den e tempu trabahoso aki ku skuridat diki ta tapa gruponan nashonal, nos tur ta masha gradisidu ku Yehova, mediante Isaías, a perkurá lus pa henter humanidat! E lus spiritual ei ta nifiká nada ménos ku bida eterno pa tur ku asept’é di henter nan kurason, sin importá nan orígen nashonal òf étniko. (Echonan 10:34, 35) Pues anto, laga nos sigui kana den e lus di e Palabra di Dios, les’é tur dia, meditá riba dje i apresiá e balor di su mensahe. Asina nos lo kosechá bendishonnan eterno i alabá e nòmber santu di Yehova!

[Nota]

[Kuadro na página 409]

Ungínan for di Tur Nashon Presentá na Yehova Komo Regalo

Na 1920, Juan Muñiz a bandoná Merka pa bai Spaña i despues a biaha pa Argentina, kaminda el a organisá kongregashon di personanan ungí. Di 1923 en adelante, e lus di bèrdat a bria riba hende di kurason onrado na Wèst Áfrika ora ku e misionero William R. Brown (konosí tambe komo ‘Bible Brown’) a kuminsá prediká e mensahe di Reino den lugánan manera Sierra Leone, Ghana, Liberia, Gambia i Nigeria. E mesun aña ei e kanades George Young a biaha bai Brazil i despues a sigui pa Argentina, Kostarika, Panamá, Venezuela i asta Union Soviétiko. Rònt di mesun tempu, Edwin Skinner a nabegá di Inglatera bai India, kaminda el a traha hopi aña den e trabou di kosecha.

[Plachi na página 411]

Algun hudiu na Pentekòste tabata ‘rumannan tresí for di tur e nashonnan’

[Plachi di henter página na página 413]