Imita Jehova—Eherce Husticia i Rectitud

“Ami ta Jehova, Esun cu ta ehercé bondad amoroso, husticia i rectitud den e tera; pasobra den e cosnan aki di berdad mi tin deleite.”—JEREMIAS 9:24.

 1. Ki prospecto maraviyoso Jehova a pone nos dilanti?

JEHOVA a primintí cu lo yega e dia ora cu tur hende lo conoc’é. Pa medio di su profeta Isaías, el a declará: “Nan lo no haci ningun daño ni causa ningun ruina den tur mi ceru santu; pasobra e tera siguramente lo ta yená cu e conocimentu di Jehova mescos cu e awanan ta cubri laman mes.” (Isaías 11:9) Ki un prospecto maraviyoso!

 2. Kico conocé Jehova ta encerá? Pakico?

² Pero, kico kier men conocé Jehova? Jehova a revelá na Jeremías loke a conta mas pisá: “Tene perspicacia i [tene] conocimentu di mi, cu ami ta Jehova, Esun cu ta ehercé bondad amoroso, husticia i rectitud den e tera; pasobra den e cosnan aki di berdad mi tin deleite.” (Jeremías 9:24) Pues, conocé Jehova ta encerá conocé e manera cu e ta ehercé husticia i rectitud. Anto si nos ehercé e cualidadnan aki, lo e tin deleite den nos. Con nos por haci esei? Den su Palabra, Bijbel, Jehova a conserbá un registro di su trato cu hende imperfecto atrabes di épocanan. Dor di studi’é, nos por bin conocé Jehova su caminda di husticia i rectitud i asina imit’é.—Romanonan 15:4.

Hustu i tog Compasivo

 3, 4. Pakico Jehova tabata hustificá den destruí Sódoma i Gomora?

³ E huicio divino riba Sódoma i Gomora ta un ehempel clásico cu ta ilustrá vários aspecto di Jehova su husticia. Jehova no solamente a duna un midí di castigu necesario, sino tambe el a percurá salbacion pa esnan cu a merecé esei. E destruccion dje stadnan ei tabata realmente hustificá? Abraham, kende aparentemente no tabata bon na haltura dje grado di Sódoma su maldad, no a pensa asina na promé instante. Jehova a sigurá Abraham cu si e por a haña solamente dies hende hustu, lo el a spar e stad ei. For di esaki nos por saca afó cu Jehova su husticia nunca ta purá of sin misericordia.—Génesis 18:20-32.

⁴ E inspeccion cu dos angel a haci a duna un testimonio bibu di Sódoma su degradacion moral. Ora e hombernan dje stad, “for di mucha homber te na homber bieu,” a haña sa cu dos homber a bini pa keda na cas di Lot, nan a asaltá su cas cu intencion di violá nan sexualmente na grupo. Nan perversidad di berdad a yega te na suela! Sin duda, e huicio di Jehova riba e stad tabata unu hustu.—Génesis 19:1-5, 24, 25.

 5. Con Dios a libra Lot i su famia for di Sódoma?

⁵ Despues cu apostel Pedro a cita e destruccion di Sódoma i Gomora como un ehempel spiertador, el a skirbi: “Jehova sa con pa libra hende di debocion piadoso for di prueba.” (2 Pedro 2:6-9) Dios lo no a cumpli cu su husticia si el a destruí hustu Lot i su famia huntu cu e hendenan malbado di Sódoma. P’esei, Jehova su angelnan a spierta Lot tocante e destruccion inminente. Ora Lot a totobiá, e angelnan, “pa e compasion di Jehova,” a gara Lot, su esposa i su yu muhernan na man i a saca nan for dje stad. (Génesis 19:12-16) Nos por ta sigur cu Jehova lo mustra interes similar pa e hustunan den e binidero destruccion dje sistema malbado aki.

 6. Pakico nos no mester ta indebidamente preocupá pa e binidero destruccion dje mal sistema di cosnan?

⁶ Aunke e fin dje sistema aki lo ta un tempu “pa haci husticia,” no tin motibu pa nos ta indebidamente preocupá. (Lucas 21:22) E huicio cu Dios lo ehecutá na Armagedon lo resultá “completamente hustu.” (Salmo 19:9) Manera Abraham a siña, nos como ser humano por tin confiansa absoluto den e husticia di Jehova, cu ta na un plano muchu mas elevá cu di nos. Abraham a puntra: “E Hues di tur e tera no ta bai haci loke ta corecto?” (Génesis 18:25; compará cu Job 34:10.) Of manera Isaías a expres’é aptamente: “Ken ta instruí [Jehova] den e caminda di husticia?”—Isaías 40:14.

Un Acto Hustu pa Salba Humanidad

 7. Ki coneccion tin entre Dios su husticia i su misericordia?

⁷ E husticia di Dios no ta ser manifestá solamente den e manera cu e ta castigá malechornan. Jehova ta describí su mes como “un Dios hustu i un Salbador.” (Isaías 45:21) Ta keda bisto cu tin un coneccion estrecho entre e husticia di Dios, i su deseo pa salba humanidad for dje efectonan di picá. Comentando riba e texto aki, The International Standard Bible Encyclopedia, Edicion di 1982, ta mustra cu “e husticia di Dios ta busca concretamente pa expresá Su misericordia i pa cumpli cu Su salbacion.” No cu e husticia di Dios tin cu ser moderá cu misericordia sino, mas bien, cu misericordia ta un expresion di Dios su husticia. E echo cu Dios a percurá un rescate pa salba humanidad ta e ehempel mas sobresaliente dje aspecto aki di husticia divino.

 8, 9. (a) Kico tabata incluí den e descripcion, “un solo acto hustu”? Pakico? (b) Kico Jehova ta pidi en buelta for di nos?

⁸ E prijs di rescate mes—e bida precioso di Dios su Yu unigénito, Jesucristo—tabata unu caru, pasobra e normanan di Jehova ta universal, i e mes tambe ta tene su mes na nan. (Mateo 20:28) Un bida perfecto, esun di Adam, a bai perdí, pues un bida perfecto tabata necesario pa rescatá bida di Adam su desendientenan. (Romanonan 5:19-21) Apostel Pablo ta describí Jesus su curso di integridad, incluso e pagamentu dje rescate, como “un solo acto hustu.” (Romanonan 5:18, nota) Pakico asina? Pasobra desde Jehova su punto di bista, rescatá humanidad tabata e cos corecto i hustu pa haci, maske esei a nificá un sacrificio grandi pa e mes. E desendientenan di Adam tabata manera un “caña kibrá,” cu Dios no kier a aplastá, of manera un “mecha di linen cu ta huma,” cu e no kier a paga. (Mateo 12:20) Dios tabatin confiansa cu hopi homber i muher fiel lo a surgi for di entre e desendientenan di Adam.—Compará cu Mateo 25:34.

⁹ Con nos mester reaccioná n’e acto supremo aki di amor i husticia? Un dje cosnan cu Jehova ta pidi en buelta for di nos ta pa nos “ehercé husticia.” (Mikéas 6:8) Con nos por haci esaki?

Busca Husticia, Sigui Tras di Rectitud

10. (a) Kico ta un manera principal den cua nos ta ehercé husticia? (b) Den ki manera nos por busca Dios su husticia promé?

¹⁰ Na promé lugá, nos tin cu adaptá nos mes n’e normanan moral di Dios. Pa motibu cu e normanan di Dios ta hustu i recto, nos ta ehercé husticia ora nos ta biba na armonia cu nan. Esei ta loke Jehova ta spera di su pueblo. “Siña haci bon; busca husticia,” Jehova a bisa e israelitanan. (Isaías 1:17) Jesus a duna conseho similar na su oyentenan den e Sermon Riba Ceru, ora el a instruí nan pa ‘busca promé e reino i Dios su husticia.’ (Mateo 6:33) Pablo a animá Timoteo pa “sigui tras di husticia.” (1 Timoteo 6:11) Ora nos ta biba na armonia cu Dios su normanan di conducta i ta bisti e personalidad nobo, nos ta siguiendo tras di berdadero husticia i rectitud. (Efesionan 4:23, 24) Cu otro palabra, nos ta busca husticia dor di haci cosnan na e manera di Dios.

11. Pakico i con nos mester lucha contra e dominio di picá?

¹¹ Manera nos ta bon conciente, no ta semper fácil pa hende imperfecto haci loke ta hustu i corecto. (Romanonan 7:14-20) Pablo a animá e cristiannan romano pa lucha contra e dominio di picá, di manera cu nan por a presentá nan curpanan dedicá na Dios como “armanan di husticia,” cu lo ta útil pa Dios den cumpli cu su propósito. (Romanonan 6:12-14) Di igual manera, dor di studia i aplicá e Palabra di Dios regularmente, nos por absorbá e “reglamentu mental di Jehova” i ser “disipliná den husticia.”—Efesionan 6:4; 2 Timoteo 3:16, 17.

12. Kico nos mester evitá si nos kier trata otronan n’e manera cu nos kier pa Jehova trata nos?

¹² Na di dos lugá, nos ta ehercé husticia ora nos ta trata otronan n’e manera cu nos kier pa Jehova trata nos. Ta fácil pa poseé un norma dòbel—unu tolerante pa cu nos mes pero unu estricto pa cu otronan. Nos ta cla pa ofrecé excuus pa nos mes faltanan, pero nos ta lihé pa criticá e fayonan di otro hende, cu asta por ta insignificante compará cu esnan di nos mes. Jesus a puntra di un manera al caso: “Pakico anto, bo ta wak e pida yerba secu den e wowo di bo ruman, pero no ta tuma na cuenta e biga den bo mes wowo?” (Mateo 7:1-3) Nos no mester lubidá nunca cu ningun di nos lo por para si Jehova scudriñá nos erornan. (Salmo 130:3, 4) Si Jehova su husticia ta permitié pasa por haltu dje debilidadnan di nos rumannan, ken nos ta pa husga nan desfaborablemente?—Romanonan 14:4, 10.

13. Pakico un homber hustu ta sinti su mes obligá pa predicá e bon nobo dje Reino?

¹³ Na di tres lugá, nos ta desplegá husticia divino ora nos ta participá diligentemente den e actividad di predicá. “No retené loke ta bon for di esnan na ken bo ta deb’é, ora ta sosodé cu ta den poder di bo man pa hacié,” Jehova ta consehá nos. (Proverbionan 3:27) Lo no ta corecto pa tene pa nos mes e conocimentu dunadó di bida cu Dios a duna nos asina generosamente. Ta berdad cu kisas hopi hende ta rechasá nos mensahe, pero tanten cu Dios ta sigui extendé misericordia na nan, nos mester ta dispuesto pa sigui duna nan e oportunidad pa “alcansá repentimentu.” (2 Pedro 3:9) I mescos cu Jesus, nos ta sinti nos contentu ora nos por yuda un hende bira na husticia i rectitud. (Lucas 15:7) Awor ta e tempu faborabel pa nos ‘sembra simia den husticia.’—Oséas 10:12.

“Prins pa Husticia Mes”

14. Ki papel ancianonan ta hunga relacioná cu husticia?

¹⁴ Nos tur tin cu cana den e caminda di husticia, pero foral ancianonan den e congregacion cristian tin un responsabilidad pa cu esaki. Jesus su gobernacion di prins ta ‘ser sostené pa medio di husticia i rectitud.’ Na armonia cu esei, e norma pa ancianonan ta husticia divino. (Isaías 9:7) Nan ta tene na mente loke Isaías 32:1 a describí proféticamente: “Mira! Un rey lo reina pa husticia mes; i en cuanto prinsnan, nan lo goberná como prins pa husticia mes.” Como superintendentenan nombrá pa spiritu, of “mayordomo di Dios,” ancianonan mester haci cosnan n’e manera di Dios.—Tito 1:7.

15, 16. (a) Con ancianonan ta imitá e fiel wardadó di carné den Jesus su ilustracion? (b) Con e ancianonan ta sinti pa cu esnan cu ta perdí den sentido spiritual?

¹⁵ Jesus a mustra cu e husticia di Jehova tabata compasivo, misericordioso i razonabel. Riba tur cos, el a trata na yuda esnan cu tabatin problema i “busca i salba loke tabata perdí.” (Lucas 19:10) Mescos cu e wardadó di carné den e ilustracion di Jesus a busca incansablemente te ora el a haña un carné perdí, ancianonan ta busca esnan cu a perde den sentido spiritual i ta haci esfuerso pa guia nan bek n’e tou.—Mateo 18:12, 13.

¹⁶ En bes di condená esnan cu tal bes a cometé picá serio, ancianonan ta busca pa cura nan i guia nan na repentimentu si esei ta posibel. Nan ta alegrá ora nan por yuda un persona cu a bai den mal caminda. Sin embargo, ora un malechor no kier repentí, esei ta haci nan tristu. E ora ei e normanan hustu di Dios ta rekerí pa nan expulsá e persona no-repentí. Asta e ora ei, mescos cu e tata dje yu perdí, nan ta spera cu un dia e persona cu a faya lo “bolbe na su sano huicio.” (Lucas 15:17, 18) Pues, ancianonan ta tuma iniciativa pa bishitá algun persona expulsá pa recordá nan con nan por bolbe bek n’e organisacion di Jehova.a

17. Ki meta ancianonan tin ora nan ta trata un caso di malecho, i ki cualidad lo yuda nan alcansá e meta ei?

¹⁷ Ancianonan tin cu imitá e husticia di Jehova foral ora nan ta trata casonan di malecho. Pecadónan “a sigui hala cerca” Jesus pasobra nan a sinti cu lo el a comprendé i yuda nan. (Lucas 15:1; Mateo 9:12, 13) Naturalmente, Jesus no a dispensá nan malecho. Esun biaha cu e notorio extorsionista Zakeo a come cu Jesus, a impuls’é pa repentí i corigí tur e sufrimentu cu el a causa otro hende. (Lucas 19:8-10) Awe ancianonan tin e mésun meta na nan audiencianan hudicial: hiba esun cu a faya na repentimentu. Si e ancianonan ta hende acercabel mescos cu Jesus tabata, hopi malechor lo haña cu ta mas fácil pa busca nan yudansa.

18. Kico lo permití ancianonan ser manera “un lugá di sconde for di bientu”?

¹⁸ Un curason sensitivo lo yuda ancianonan aplicá husticia divino, cu no ta severo ni sin heful. Ta interesante pa nota cu Esdras a prepará su curason, no djis su mente, pa por a instruí e israelitanan den e caminda di husticia. (Esdras 7:10) Un curason comprensivo lo permití ancianonan aplicá e principionan bíblico apropiado i tuma e circunstancianan di cada persona na consideracion. Ora Jesus a cura e señora cu tabatin un fluho di sanger, el a mustra cu Jehova su husticia ta nificá comprendé tantu e spiritu como e letter dje ley. (Lucas 8:43-48) Ancianonan cu ta aplicá husticia cu compasion por ser compará cu “un lugá di sconde for di bientu” pa esnan cu tin un lucha cu nan mes debilidadnan of cu e sistema di cosnan aki den cua nos ta biba.—Isaías 32:2.

19. Con un ruman muher a respondé n’e aplicacion di husticia divino?

¹⁹ Un ruman muher cu a cometé un picá serio a yega na comprendé husticia divino personalmente. “Francamente, mi tabatin miedu di bai cerca e ancianonan,” e ta admití. “Pero nan a tratá mi cu compasion i dignidad. E ancianonan tabata mas manera tatanan i no huesnan severo. Nan a yudá mi comprendé cu Jehova lo no a rechasá mi si mi tabata dicididu pa corigí mi camindanan. Mi a siña personalmente con e ta disipliná nos mescos cu un Tata amoroso. Mi por a habri mi curason na Jehova, cu e confiansa cu lo el a tende mi súplica. Mirando bek, mi por bisa sigur-sigur cu e reunion ei cu e ancianonan shete aña pasá tabata un bendicion di Jehova. Dje tempu ei padilanti, mi relacion cuné a bira hopi mas cerá.”

Cumpli cu Husticia i Haci Loke Ta Recto

20. Kico ta e beneficionan di comprendé i ehercé husticia i rectitud?

²⁰ Afortunadamente, husticia divino ta nificá hopi mas cu duna cada ken loke e ta merecé. Jehova su husticia a impuls’é pa otorgá bida eterno na esnan cu ta ehercé fe. (Salmo 103:10; Romanonan 5:15, 18) Dios ta trata cu nos den e manera aki pasobra su husticia ta tene cuenta cu nos circunstancianan, i e ta busca pa salba nos en bes di condená nos. Di berdad, un mihó comprendimentu dje alcanse di Jehova su husticia ta hala nos mas cerca dje. I segun cu nos ta haci esfuerso pa imitá e faceta aki di su personalidad, nos bida i esnan di otronan lo ser ricamente bendicioná. Nos Tata celestial lo no keda sin tuma nota dje echo cu nos ta sigui tras di husticia. Jehova ta primintí nos: “Boso cumpli cu husticia, i haci loke ta recto. Pasobra mi salbacion ta cerca di drenta, i mi husticia pa ser revelá. Felis ta e hende mortal cu ta haci esaki.”—Isaías 56:1, 2.

[Nota]

Bo Ta Corda?

◻ Kico e destruccion di Sódoma i Gomora ta siña nos di Jehova su husticia?

◻ Pakico e rescate ta un expresion sobresaliente di Dios su husticia i amor?

◻ Kico ta tres manera den cua nos por ehercé husticia?

◻ Den ki manera special ancianonan por imitá husticia divino?

[Plachinan na página 15]

Dor di nos actividad di predicá, nos ta desplegá husticia divino

[Plachi na página 16]

Ora ancianonan ta manifestá husticia divino, esnan cu tin problema ta haña cu ta mas fácil pa busca nan yudansa