Capítulo Diesun

Ai dje Rebeldenan!

Isaías 9:8–10:4

 1. Ki fayo teribel Jeróboam a cometé?

ORA e pueblo cu tabata den pacto cu Jehova a ser dividí den dos reino, e reino di nort formá pa dies tribu a bin cai bou dje gobernacion di Jeróboam. E rey nobo tabata un gobernante capas i enérgico. Pero e tabata falta berdadero fe den Jehova. Dor di esaki el a cometé un fayo teribel cu tabata fatal pa henter e historia dje reino di nort. Segun e Ley di Moises, tres bes pa aña e israelitanan mester a biaha bai n’e tempel di Jerusalem, cu awor tabata den Huda su reino di zuid. (Deuteronomio 16:16) Jeróboam tabatin miedu cu e biahenan regular ei lo a lanta den su súbditonan e pensamentu di un re-unificacion cu nan rumannan di zuid. P’esei el a “traha dos bisé di oro i a bisa e pueblo: ‘Ta muchu pa boso subi bai Jerusalem. Ata bo Dios akí, o Israel, cu a haci bo subi for dje tera di Egipto.’ Anto, el a pone un na Betel, i e otro el a pone na Dan.”—1 Reynan 12:28, 29.

 2, 3. Ki efecto e eror di Jeróboam tabatin riba Israel?

² Na principio, e plan di Jeróboam a parce di funcioná. Poco-poco pero sigur, e hendenan a stop di bai Jerusalem i a cuminsá practicá nan ritonan religioso dilanti e dos bisénan. (1 Reynan 12:30) Sin embargo, e práctica religioso apóstata aki a corumpí e reino di dies tribu. Añanan despues, asta Jehú, kende a manifestá un celo encomendabel pa caba cu adoracion di Baal for di Israel, a sigui buig dilanti e bisénan di oro. (2 Reynan 10:28, 29) Na ki otro consecuencia e decision malísimo aki di Jeróboam a hiba? Instabilidad político i sufrimentu p’e pueblo.

³ Dor cu Jeróboam a bira apóstata, Jehova a bisa cu su desendencia lo no reina riba e pais, i cu na final e reino di nort lo a sufri un desaster teribel. (1 Reynan 14:14, 15) E palabra di Jehova a cumpli. Shete dje reynan di Israel a goberná pa dos aña of ménos—algun pa un par di dia so. Un a cometé suicidio, i seis a ser asesiná pa hombernan ambicioso cu a usurpá e trono. Foral despues dje reinado di Jeróboam II—cu a terminá rond di aña 804 P.E.C. miéntras Uzías tabata reina na Huda—tabatin disturbio, violencia i asesinato na Israel. Ta den e marco di circunstancia aki Jehova ta manda un spiertamentu pa medio di Isaías, of “palabra” directo p’e reino di nort. “Tabatin un palabra cu Jehova a manda contra Jacob, i el a cai riba Israel.”—Isaías 9:8.a

Soberbia i Insolencia Ta Merecé Rabia Divino

 4. Ki “palabra” Jehova ta manda contra Israel, i pakico?

⁴ E “palabra” di Jehova lo no ser ignorá. “E pueblo lo sa esei sigur, sí, nan tur, Efraim i e habitante di Samaria, pa causa di nan soberbia i pa causa di nan curason insolente.” (Isaías 9:9) “Jacob,” “Israel,” “Efraim” i “Samaria” ta referí na Israel su reino di nort, di cua Efraim ta e tribu predominante i Samaria e capital. Jehova su palabra contra e reino ei ta consistí di un declaracion hudicial fuerte, pasobra Efraim a bira insensibel den su apostasia i ta trata Jehova cu un insolencia abierto. Dios lo no protehá e pueblo for dje consecuencianan di nan camindanan malbado. Nan lo haña nan forsá ta tende, of presta atencion, na Su palabra.—Galationan 6:7.

 5. Con e israelitanan ta mustra cu e huicionan di Jehova no ta importá nan?

⁵ Segun cu e situacion ta deteriorá, e pueblo ta sufri pérdidanan grandi, entre otro nan casnan, cu por lo general ta trahá di bloki di lodo cu palu barata. Nan curason ta suavisá como resultado di esei? Nan lo haci caso dje profetanan di Jehova i bolbe bek n’e Dios berdadero?b Isaías ta mustra con insolente e reaccion dje pueblo ta: “Bloki ta loke a cai, pero cu piedra cortá nos lo construí. Nan a kap palunan di sicomoro, pero nos lo remplasá nan cu palu di seda.” (Isaías 9:10) E israelitanan ta desafiá Jehova i ta rechasá su profetanan, kendenan ta mustra nan riba e motibu dje dificultadnan ei. Den un sentido, e hendenan ta bisa: ‘Nos por perde cas frágil di bloki di lodo cu palu barata, pero na final nos lo sali ganá tog pasobra nos lo reconstruí nan cu material superior: piedra cortá i palu di seda!’ (Compará cu Job 4:19.) Nan no ta laga Jehova cu niun otro opcion sino di disipliná nan mas ainda.—Compará cu Isaías 48:22.

 6. Con Jehova ta desbaratá e conspiracion sirio-israelita contra Huda?

⁶ Isaías ta continuá: “Jehova lo pone e adversarionan di Rezin na haltu contra dje.” (Isaías 9:11a) Rey Peka di Israel i rey Rezin di Siria ta aliado. Nan ta conspirá pa conkistá e reino di dos tribu di Huda i pa pone un rey marioneta—un tal “yu homber di Tabeel”—riba e trono di Jehova den Jerusalem. (Isaías 7:6) Pero e conspiracion ta destiná pa fracasá. Rezin tin enemigunan poderoso, i Jehova lo “pone” e enemigunan aki “na haltu contra dje,” esta contra Israel. E expresion ‘pone na haltu’ ta nificá permití nan cuminsá un guera eficas cu lo desbaratá e aliansa i su metanan.

 7, 8. Kico e echo cu Siria a cai den man di Asiria ta nificá pa Israel?

⁷ E aliansa aki lo cuminsá habri for di otro ora Asiria atacá Siria. “E rey di Asiria a subi bai Damasco [capital di Siria] i a captur’é i a hiba su pueblo den exilio na Kir, i el a mata Rezin.” (2 Reynan 16:9) Ora Peka perde su aliado poderoso, e ta mira con su plannan maligno pa cu Huda ta cai na awa. De echo, poco despues dje morto di Rezin, e propio Peka ta muri asesiná na man di Hosea, kende despues ta usurpá e trono di Samaria.—2 Reynan 15:23-25, 30.

⁸ Siria, ex-aliado di Israel, awor ta cai bou di dominio di Asiria, e potencia dominante den e region. Isaías ta profetisá con Jehova lo usa e combinacion político nobo aki: “E enemigunan di esun ei [Israel] lo e [Jehova] pui, Siria for di oost i filisteonan for di patras, i nan lo come Israel cu boca habrí. En bista di tur esaki, su rabia no a bira bek, sino cu ainda su man ta sacá.” (Isaías 9:11b, 12) Sí, awor Siria a bira enemigu di Israel, i Israel mester prepará p’e atake di Asiria cu Siria. E invasion tin éxito. Asiria ta haci e usurpadó Hosea su sirbidó i ta imponé un belasting haltu riba dje. (Un par di década promé, Asiria a ricibí un suma grandi for di rey Menahem di Israel.) Ki cierto e palabranan di profeta Oséas ta resultá di ta: “Stranhero a come [Efraim] su poder”!—Oséas 7:9; 2 Reynan 15:19, 20; 17:1-3.

 9. Pakico nos por bisa cu e atake filisteo ta bini “for di patras”?

⁹ Isaías no ta bisa tambe cu e filisteonan lo atacá “for di patras”? Sí. Promé cu e tempu di compas magnético, e hebreonan tabata indicá direccion for dje punto di bista di un persona cu ta para cara pa salimentu di solo. Di manera cu “oost” tabata parti dilanti, miéntras cu west, cant’i costa caminda e filisteonan tabata biba, tabata “patras.” Den e caso aki, kisas e “Israel” cu ta ser mencioná na Isaías 9:12 ta incluí Huda pasobra e filisteonan a invadí Huda durante e reinado di Acas, contemporáneo di Peka, i nan a capturá i ocupá algun stad i lugá fortificá. Mescos cu Efraim den nort, Huda ta merecé e disiplina aki di Jehova, pasobra e tambe ta pestá cu apostasia.—2 Crónicanan 28:1-4, 18, 19.

Di ‘Cabes te Rabu’—Un Nacion di Rebelde

10, 11. Ki castigu Jehova lo trece contra Israel pa motibu di nan rebeldia persistente?

¹⁰ Apesar di tur su sufrimentu i e declaracionnan fuerte dje profetanan di Jehova, e reino di nort ta persistí den su rebeldia contra Jehova. “E pueblo mes no a bolbe cerca Esun cu a golpia nan, i Jehova di ehércitonan nan no a busca.” (Isaías 9:13) Consecuentemente, e profeta ta bisa: “Jehova lo corta kita cabes cu rabu, rama cu richi for di Israel, riba un solo dia. Esun di edad i altamente respetá ta e cabes, i e profeta cu ta duna instruccion falsu ta e rabu. I esnan cu ta guiando e pueblo aki ta resultá di ta esnan cu ta pone nan cana dual; i esnan di nan cu ta ser guiá, ta esnan cu ta ser confundí.”—Isaías 9:14-16.

¹¹ E “cabes” cu e “rama” ta representá “esun di edad i altamente respetá,” esta e lidernan dje nacion. E “rabu” cu e “richi” ta referí na profeta falsu cu ta expresá palabranan pa complacé nan lidernan. Un erudito di Bijbel ta skirbi: “E Profetanan falsu ta e rabu pasobra den sentido moral nan tabata esnan mas baho dje pueblo, i pasobra nan tabata siguidó i apoyadó hipócrita di gobernantenan malbado.” Profesor Edward J. Young ta bisa dje profetanan falsu aki: “Nan no tabata lider, ma unda cu nan a sigui e lidernan, nan no tabata haci nada otro cu busca fabor i labia nan, manera e rabu cu un cachó ta waya.”—Compará cu 2 Timoteo 4:3.

Asta ‘Biuda cu Huérfano’ Ta Rebelde

12. Con leu corupcion a penetrá den e sociedad israelita?

¹² Jehova ta e Defensor principal di biuda cu huérfano. (Éxodo 22:22, 23) Sin embargo, tende loke Isaías ta bisa awor: “Jehova lo no alegrá ni sikiera pa causa di nan hóbennan, i lo e no tene misericordia cu nan huérfanonan di tata i cu nan biudanan; pasobra nan tur ta apóstata i malechor i tur boca ta papia co’i kens. En bista di tur esaki, su rabia no a bira bek, sino cu ainda su man ta sacá.” (Isaías 9:17) Apostasia a corumpí tur nivel di sociedad, asta biuda cu huérfano! Cu pacenshi Jehova ta manda su profetanan, sperando cu e pueblo lo cambia. Por ehempel, Oséas ta suplicá nan: “Bira bek, sí, o Israel, na Jehova bo Dios, pasobra bo a trompecá den bo eror.” (Oséas 14:1) Imaginá bo cuantu pena e Defensor di biuda cu huérfano mester sinti di tin cu ehecutá huicio asta contra nan!

13. Kico nos por siña for dje situacion cu a existí den tempu di Isaías?

¹³ Mescos cu Isaías, nos tambe ta biba den un tempu crítico promé cu Jehova su dia di huicio contra e malbadonan. (2 Timoteo 3:1-5) Ta ki importante anto pa cristian berdadero, sin importá nan situacion den bida, mantené nan mes limpi den sentido spiritual, moral i mental pa por keda cu e aprobacion di Dios. Laga cada un di nos cuida nos relacion cu Jehova. Una bes nos a hui for di “Babilonia e Grandi,” laga nos no ‘participá nunca mas cuné den su picánan.’—Revelacion 18:2, 4.

Adoracion Falsu Ta Fomentá Violencia

14, 15. (a) Na kico adoracion di demoño ta conducí? (b) Segun e profecia di Isaías, con Israel lo sigui sufri?

¹⁴ Eigenlijk, adoracion falsu ta adoracion di demoño. (1 Corintionan 10:20) Manera a keda demostrá promé cu Diluvio, influencia di demoño ta conducí na violencia. (Génesis 6:11, 12) Nada straño anto cu ora Israel bira apóstata i cuminsá adorá demoño, e tera ta yena cu violencia i maldad.—Deuteronomio 32:17; Salmo 106:35-38.

¹⁵ Isaías ta describí den un manera bibu con maldad i violencia ta plama den Israel: “Maldad a kima manera candela; matanan di sumpiña i mal yerba lo e come. I lo e coge candela den e partinan cerá di mondi, i lo hiba nan laira manera columna di huma. Den e furia di Jehova di ehércitonan a pega e tera na candela, i e pueblo lo bira manera cuminda pa candela. Niun hende lo mustra compasion ni sikiera na su ruman. I unu lo kap na banda drechi i sigur lo tin hamber; i unu lo come na banda robes, i nan sigur lo no keda satisfecho. Nan cada un lo come e carni di su mes brasa, Manases Efraim, i Efraim Manases. Huntu nan lo ta contra Huda. En bista di tur esaki, su rabia no a bira bek, sino cu ainda su man ta sacá.”—Isaías 9:18-21.

16. Con e palabranan di Isaías 9:18-21 ta cumpli?

¹⁶ Mescos cu un candela ta plama di mata di sumpiña pa mata di sumpiña, violencia ta plama sali for di man i alcansá lihé “e partinan cerá di mondi,” ocasionando asina un gran candela di mondi di violencia. E comentaristanan bíblico Keil i Delitzsch ta describí e nivel di violencia como “e autodestruccion mas inhumano durante un guera civil caminda no tin órden público. Sin poseé niun sintimentu tierno, nan a devorá otro cu un ansha insaciabel.” Probablemente, aki Isaías ta mencioná e tribunan di Efraim i Manases pa nomber pasobra nan ta e representantenan principal dje reino nort i, como desendiente dje dos yunan di José, nan ta esnan mas estrechamente ligá cu otro den e dies tribunan. Pero, apesar di esaki nan ta interumpí nan violencia di ruman contra ruman solamente ora nan ta bringa contra Huda den zuid.—2 Crónicanan 28:1-8.

Huesnan Corupto Dilanti Nan Hues

17, 18. Ki clase di corupcion ta existí den e sistema hudicial i administrativo di Israel?

¹⁷ Siguientemente Jehova ta dirigí su wowo hudicial riba e huesnan i otro funcionarionan corupto di Israel. Esakinan ta abusá di nan poder i ta plunder esnan di condicion humilde i afligí cu ta acudí na nan pa busca husticia. Isaías ta bisa: “Ai di esnan cu ta decretá reglanan perhudicial i di esnan cu, skirbiendo constant, a skirbi puru problema, afin di rechasá esnan di condicion humilde for di un caso hudicial, i pa kita husticia for di esnan afligí di mi pueblo, pa biudanan bira nan botin, i pa nan por plunder asta huérfanonan di tata!”—Isaías 10:1, 2.

¹⁸ E Ley di Jehova ta condená tur forma di inhusticia: “Boso no mag haci inhusticia den e huicio. Bo no mag trata esun di condicion humilde cu parcialidad, i bo no mag preferá e persona di un hende importante.” (Levítico 19:15) Pasando por haltu dje ley ei, e funcionarionan aki a decretá nan propio “reglanan perhudicial” pa asina legalisá loke en realidad ta e forma mas cruel di puru ladronicia: kita e poco pertenencianan di biuda i huérfano. Claro cu e diosnan falsu di Israel ta ciegu p’e inhusticia aki, pero Jehova sí no ta. Pa medio di Isaías, Jehova ta dirigí su atencion awor n’e huesnan malbado aki.

19, 20. Con e situacion di hues israelita corupto lo cambia, i kico lo para di nan “gloria”?

¹⁹ “Kico boso lo haci e dia cu duna boso atencion i na e ruina, ora e bini di leu? Cerca ken boso lo hui bai pa auxilio, i unda boso lo laga boso gloria, a no ser cu un hende tin cu buig bou dje prizoneronan i cu hende ta sigui cai bou di esnan cu a ser matá?” (Isaías 10:3, 4a) E biuda i huérfanonan no tin hues onrado na ken nan por apelá. Ta na su lugá anto awor pa Jehova puntra e huesnan israelita corupto ei na ken nan lo acudí awor cu Jehova ta exigí cuenta di nan. Sí, nan ta na punto di haña sa cu “ta un cos spantoso pa cai den man di e Dios bibu.”—Hebreonan 10:31.

²⁰ E “gloria” dje huesnan malbado aki—e prestigio, e onor i e poder mundano cu nan rikesa i posicion ta trece cuné—lo ta di poco duracion. Algun lo bira prizonero di guera, lo “buig,” of bùk huntu cu e otro prezunan, miéntras cu e resto lo ser matá, i nan curpanan lo keda cubrí cu e cadavernan di esnan cu a muri den guera. Nan “gloria” ta incluí tambe rikesa ilegal cu e enemigunan lo sakea.

21. En bista dje castigunan cu Israel a ricibí, Jehova su rabia contra nan a plakia?

²¹ Isaías ta concluí e estrofa final aki cu un spiertamentu no muchu prometedor: “En bista di tur esaki [tur e calamidad cu e nacion a sufri te asina leu], su rabia no a bira bek, sino cu ainda su man ta sacá.” (Isaías 10:4b) Sí, Jehova tin mas cos di bisa Israel. Su man sacá lo no bira bek sino te ora e dal e reino rebelde di nort un golpi final i devastador.

Nunca Bira Víctima di Engaño i di Interes Egoista

22. Ki les nos por saca for di loke a sosodé cu Israel?

²² E palabra cu Jehova a pronunciá pa medio di Isaías a cai pisá riba Israel i ‘no a bolbe na dje sin resultado.’ (Isaías 55:10, 11) E fin trágico di Israel su reino di nort ta skirbí den e analnan di historia, i nos por solamente imaginá e sufrimentu cu su habitantenan tabatin cu pasa aden. Mes sigur e palabra di Dios lo cumpli riba e sistema di cosnan actual, foral riba cristiandad apóstata. Ta di sumo importancia anto pa cristiannan no duna oido na ningun tipo di propaganda mentiroso contra Dios! Danki n’e Palabra di Dios, pa hopi tempu caba e tácticanan astuto di Satanas ta completamente desenmascará, di manera cu nos no tin nodi laga esakinan engañá nos manera e hendenan di antiguo Israel. (2 Corintionan 2:11) No laga niun di nos hamas stop di adorá Jehova “cu spiritu i cu berdad.” (Juan 4:24) Den tal caso, su man sacá lo no dal su adoradónan manera el a dal Efraim rebelde. Mas bien lo e pone su brasanan tiernamente rond di nan, i lo e yuda nan riba e caminda cu ta hiba na bida eterno den un paradijs riba tera.—Santiago 4:8.

[Nota]

[Plachi na página 139]

Maldad i violencia ta asotá Israel mescos cu un candela di mondi

[Plachi na página 141]

Jehova lo exigí cuenta di esnan cu ta probechá di nan próhimo