Capítulo Diescuater

Jehova Ta Humiyá un Stad Arogante

Isaías 13:1–14:23

 1. Con leu den futuro e buki di Isaías ta wak awor?

E BUKI profético di Isaías a ser skirbí den siglo 8 P.E.C., durante e periodo cu Asiria a invadí e Tera Primintí. Manera nos a mira caba den su capítulonan anterior, Isaías ta predicí cu un exactitud remarcabel e curso dje acontecimentunan. Sin embargo, e buki ta wak mas leu cu e periodo cu Asiria ta un potencia mundial. E ta profetisá con e pueblo den pacto cu Jehova lo regresá for di exilio den hopi tera, incluso Sinar, caminda Babilonia tabata situá. (Isaías 11:11) Den Isaías capítulo 13 nos ta haña un profecia remarcabel. Su cumplimentu lo habri caminda p’e hudiunan regresá nan pais. E ta introducié cu e siguiente palabranan: “E declaracion formal contra Babilonia cu Isaías, yu di Ámoz, a mira den vision.”—Isaías 13:1.

‘Lo Mi Rebahá Soberbia’

 2. (a) Di ki manera Ezekías ta haña su mes metí cu Babilonia? (b) Kico ta e “señal” cu lo ser lantá?

² Huda ta haña su mes metí cu Babilonia durante cu Isaías ta na bida. Rey Ezekías ta bira hopi malu pero despues e ta recuperá. Embahadornan di Babilonia ta bin felicit’é cu el a recuperá, probablemente cu e intencion secreto di haña su apoyo den e guera cu nan ta hiba contra Asiria. Rey Ezekías ta cometé e imprudencia di mustra nan tur su tesoronan, motibu pa cua Isaías ta bisa e rey cu despues cu e muri, tur e rikesa ei lo bai para na Babilonia. (Isaías 39:1-7) Su palabranan ta cumpli na aña 607 P.E.C. ora Jerusalem ta ser destruí i e nacion ta ser hibá den exilio. Sin embargo, Dios su pueblo scogí lo no keda den Babilonia pa semper. Jehova ta revelá con lo e habri caminda pa nan bolbe nan tera. E ta cuminsá: “Riba un ceru di baranca sunú boso lanta un señal. Hisa bos na nan, zwai man, pa nan drenta den e entrada dje noblenan.” (Isaías 13:2) E “señal” ta un potencia mundial cu ta surgiendo i cu lo kita Babilonia for di su posicion di prominencia. Lo lant’é “riba un ceru di baranca sunú,” esta, den pleno bista for di un distancia grandi. Cu e ordu pa atacá Babilonia, e potencia mundial nobo ei lo habri paso dor di “e entrada dje noblenan,” e portanan dje gran stad ei, i lo conkist’é.

 3. (a) Ken ta e “santificánan” cu Jehova lo lanta? (b) Den ki sentido ehércitonan pagano ta ‘santificá’?

³ Jehova ta sigui bisa: “Ami mes a duna e ordu na mi santificánan. Tambe mi a yama mi poderosonan pa expresá mi rabia, mi personanan di gran alegria. Scucha! Un multitud den e cerunan, algu manera un pueblo numeroso! Scucha! E boroto di reinonan, di nacionnan reuní huntu! Jehova di ehércitonan ta mobilisá e ehército di guera.” (Isaías 13:3, 4) Ken ta e “santificánan” aki nombrá pa tumba e babilonionan arogante? Nan ta un combinacion di ehército nacional, “nacionnan reuní huntu,” cu ta baha bin contra Babilonia for di un region montañoso leu. “Nan ta biniendo dje tera leu, for di extremidad di shelu.” (Isaías 13:5) Den ki sentido nan ta santificá? Sigur no den e sentido cu nan ta santu. Nan ta ehércitonan pagano cu no ta interesá den sirbi Jehova. Sin embargo, den e Scritura Hebreo, e palabra “santificá” ta nificá “apartá pa uso divino.” Jehova por santificá ehército dje nacionnan i usa nan ambicionnan egoista pa expresá su rabia. El a usa Asiria den e manera ei. Lo e usa Babilonia den un manera similar. (Isaías 10:5; Jeremías 25:9) I lo e usa otro nacionnan pa castigá Babilonia.

 4, 5. (a) Kico Jehova ta pronosticá tocante Babilonia? (b) Kico esnan cu kier atacá Babilonia ta haña nan cuné?

⁴ Babilonia no ta e potencia mundial dominante ainda. Pero Jehova ta mira padilanti n’e tempu cu lo e ocupá e posicion ei, i via boca di Isaías, e ta pronosticá su caida, bisando: “Grita yora, pasobra e dia di Jehova ta cerca! Manera un plundermentu violento di parti dje Todopoderoso lo e bini.” (Isaías 13:6) Sí, Babilonia su bromamentu lo cambia bira yoramentu di tristesa. Pakico? Esei ta pa motibu di “e dia di Jehova,” e dia riba cua Jehova ta ehecutá huicio contra dje.

⁵ Pero con lo ta posibel pa plunder Babilonia? Ora e momento cu Jehova a fiha pa esaki yega, e stad lo duna e impresion di ta masha sigur. Ehércitonan invasor lo tin cu wak un manera promé pa pasa dor dje defensa natural cu riu Eufrátes ta brinda. E riu ei ta pasa dwars dor dje stad i for di dje ta saca awa pa yena un rooi como proteccion rond dje stad. Tambe e riu ta suministrá awa di bebe. Despues nan ta haña nan cu e murayanan dòbel masivo di Babilonia, cu ta mustra impenetrabel. Ademas, e stad ta bon di stock cu cuminda. E buki Daily Bible Illustrations (Ilustracionnan Bíblico pa Tur Dia) ta bisa cu Nabonido—e último rey di Babilonia—“a haci esfuerso extraordinario pa stock e stad cu provision, i segun cálculo e tabata contené suficiente [alimento] pa sostené e habitantenan pa binti aña.”

 6. Kico lo sosodé inesperadamente ora e atake predicí riba Babilonia tuma lugá?

⁶ Sin embargo, aparencia sa gaña hende. Isaías ta bisa: “Ta p’esei mes tur man lo cai, i henter e curason mes di hende mortal lo dirti. I e hendenan a keda perturbá. Steipi i dolor di parto mes a gara nan; manera un muher cu ta duna lus nan tin dolor di parto. Nan ta wak otro asombrá. Nan caranan ta cara flamá.” (Isaías 13:7, 8) Ora e ehércitonan conkistadó invadí e stad, e trankilidad di su habitantenan lo cambia bira un dolor mes repentino i intenso cu esun di un muher cu ta duna lus. Nan curason lo dirti di miedu. Paralisá, nan mannan lo cai abou, incapas pa haci un defensa. Nan caranan lo ta “flamá” di miedu i angustia. Nan lo wak otro asombrá, puntrando nan mes con nan gran stad por a cai.

 7. Cua ta e “dia di Jehova” cu ta bini, i kico lo ta e consecuencianan pa Babilonia?

⁷ No obstante, lo e cai sigur. Babilonia tin cu enfrentá un dia di regla cuenta, un “dia di Jehova,” cu lo ta berdaderamente doloroso. E Hues supremo lo expresá su rabia i trece e huicio bon merecí contra Babilonia su habitantenan pecaminoso. E profecia ta bisa: “Mira! E dia mes di Jehova ta bini, cruel, tantu cu furia como cu rabia ardiente, afin di haci e tera un obheto di asombro, i pa anikilá e pecadónan dje tera for di den dje.” (Isaías 13:9) Cos ta mustra scur pa Babilonia. Ta como si fuera solo, luna i strea ta stop di duna lus. “Pasobra e streanan di shelu i nan constelacionnan di Kesil lo no manda nan lus; solo realmente lo bira scur ora e sali, i luna mes lo no laga su lus briya.”—Isaías 13:10.

 8. Pakico Jehova ta decretá e caida di Babilonia?

⁸ Pakico e stad orguyoso aki lo tin e destino ei? Jehova ta bisa: “Sigur lo mi trece riba e tera productivo su propio maldad, i riba e malbadonan nan propio eror. I realmente lo mi pone un paro n’e orguyo di esnan cu ta actua cu arogancia, i e soberbia dje tiranonan lo mi rebahá.” (Isaías 13:11) Como castigu pa a trata e pueblo di Dios cruelmente, Jehova lo basha su rabia riba Babilonia. Henter e tera lo sufri pa motibu dje maldad dje babilonionan. E tiranonan orguyoso ei lo no desafiá Jehova abiertamente mas!

 9. Kico ta spera Babilonia riba e dia di huicio di Jehova?

⁹ Jehova ta bisa: “Lo mi haci hende mortal mas scars cu oro refiná, i hende terenal mas scars cu oro di Ofir.” (Isaías 13:12) Sí, e stad lo keda bandoná. Jehova ta continuá: “P’esei lo mi laga shelu mes bira agitá, i tera mes lo sagudí i move for di su lugá bou dje furia di Jehova di ehércitonan i riba e dia di su rabia ardiente.” (Isaías 13:13) E “shelu” di Babilonia, su multitud di dios i diosanan, lo ta agitá, incapas pa yuda e stad den e tempu crucial ei. “Tera,” esta, e Imperio di Babilonia, lo ser sagudí for di su lugá i pasa pa historia como un imperio mas cu a muri. “Tin cu sosodé cu, mescos cu un gazèl cu nan a core cuné i manera un tou cu no tin niun hende pa reuní nan huntu, cada un di nan lo dirigí nan mes bai pa su mes pueblo; i cada un di nan lo hui, bai pa su mes tera.” (Isaías 13:14) Tur stranhero cu a apoyá Babilonia lo bandon’é i lo hui, cu e speransa di por forma relacionnan nobo cu e potencia mundial cu lo venc’é. Por último, Babilonia lo sufri e agonia di un stad conkistá, e mésun agonia cu el a causa asina tantu pueblo den su tempu di gloria: “Tur cu ser hañá lo ser traspasá, i tur cu ser capturá den e barimentu lo cai pa spada; i asta nan yunan lo ser kibrá na pida-pida dilanti nan wowo. Nan casnan lo ser di plunder i nan propio esposanan lo ser violá.”—Isaías 13:15, 16.

Dios Su Instrumento di Destruccion

10. Ken Jehova lo usa pa derotá Babilonia?

¹⁰ Cua potencia Jehova lo usa pa provocá e caida di Babilonia? E mes ta revelá esei rond di 200 aña di antemano: “Ata mi ta bai lanta contra nan e medonan, cu ta considerá plata manera nada i cu, pa loke ta oro, no tin deleite aden. I nan boognan lo kibra asta hombernan hóben na pida-pida. I nan lo no tin duele dje fruta di barica; nan wowo lo no sinti duele di yu homber. I Babilonia, e adorno di reinonan, e bunitesa dje orguyo dje caldeonan, mester bira manera ora Dios a deribá Sódoma i Gomora.” (Isaías 13:17-19) E stad espléndido di Babilonia lo cai, i Jehova su instrumento pa causa esaki ta ehércitonan dje pais leu yen di ceru: Media.a Cu tempu, Babilonia lo keda mes desolá cu e stadnan sumamente inmoral di Sódoma cu Gomora.—Génesis 13:13; 19:13, 24.

11, 12. (a) Con Media a combertí su mes den un potencia mundial? (b) Ki característica poco comun e profecia ta mencioná tocante e ehércitonan medo?

¹¹ Tempu di Isaías, tantu Media como Babilonia ta bou dje yugo di Asiria. Rond di un siglo despues, na aña 632 P.E.C., Media i Babilonia ta uni forsa i ta conkistá Nínive, capital di Asiria. Esaki ta habri caminda pa Babilonia bira e potencia mundial predominante. Lo e no por imaginá su mes cu un 100 aña despues di esei, Media lo bira destruyé! Ken otro cu no ta Jehova Dios por a tribi haci un pronóstico asina?

¹² Ora Jehova ta identificá e instrumento di destruccion cu el a scoge, e ta bisa cu e ehércitonan medo ‘ta considerá plata manera nada i pa loke ta oro, nan no tin deleite aden.’ Ki un característica poco comun pa soldá sin heful! E erudito riba tereno di Bijbel, Albert Barnes ta bisa: “Poco ta e ehércitonan invasor cu no tabata interesá den haña un botin.” E ehércitonan medo ta manera Jehova ta predicí? Sí. Considerá e comentario aki den e obra The Bible-Work di J. Glentworth Butler: “Distinto di mayoria nacion cu a yega di bringa guera, e medonan, i foral e personan, no tabata pensa mes tantu riba e oro manera nan tabata pensa riba e conkista i e gloria.”b En bista di e actitud aki, no ta un sorpresa cu ora e gobernante perso Ciro a libra e israelitanan for di exilio na Babilonia, el a debolbé nan miles di artículo di oro i plata cu Nabucodonosor a sakea for dje tempel di Jerusalem.—Ésdras 1:7-11.

13, 14. (a) Aunke e guereronan medo i perso no ta interesá den botin, kico sí nan ta ambicioná? (b) Con Ciro ta superá e defensa cu e babilonionan ta broma cuné?

¹³ Aunke e guereronan medo i perso no tabata muchu interesá den botin, nan tabata masha ambicioso sí. Nan no ta pensa di keda tras di niun otro nacion riba esena mundial. Ademas, Jehova ta pone “plundermentu violento” den nan curason. (Isaías 13:6) P’esei, armá cu nan boognan di metal—cu nan por usa no solamente pa tira flecha sino tambe pa dal i aplastá soldá enemigu, yunan di mama babilonio—nan ta decididu pa conkistá Babilonia.

¹⁴ E fortificacionnan babilonio no ta intimidá Ciro, lider dje ehércitonan medo-perso. Den e anochi di 5 pa 6 di october di aña 539 P.E.C., e ta ordená pa desviá e awanan di riu Eufrátes. Ora e nivel di awa a baha, e invasornan ta pasa dor dje riu cu ta yega awor te na nan bel di pia, i ta penetrá den e stad sin cu ningun hende mira. Nan ta coge e habitantenan di Babilonia di sorpresa i e stad ta cai. (Daniel 5:30) Jehova Dios ta inspirá Isaías pa profetisá dje sucesonan aki i no ta laga niun duda cu ta E ta dirigí cosnan.

15. Ki futuro ta spera Babilonia?

¹⁵ Con completo e destruccion di Babilonia lo ta? Scucha e declaracion di Jehova: “Hamas lo e ser habitá, ni lo e no permanecé generacion tras generacion. I einan e arabir lo no arma su tent, ni ningun wardadó lo laga nan tou descansá einan. I einan esnan cu ta frecuentá lugánan sin awa sigur lo cai drumi, i nan casnan mester ta yen cu palabrua real. I ei abestrus tin cu biba, i e demoñonan cu forma di cabritu mes lo bula rond einan. I chacal tin cu yora den su torennan di habitacion, i e colebra grandi lo ta den e palacionan di deleite exkisito. I e temporada p’e ta cerca di yega, i su dianan mes lo no ser posponé.” (Isaías 13:20-22) Desolacion total lo ta destino dje stad.

16. Ki confiansa e condicion actual di Babilonia ta duna nos?

¹⁶ E desolacion aki no a tuma lugá mesora na aña 539 P.E.C. Sin embargo, awe nos por mira claramente cu tur loke Isaías a predicí relacioná cu Babilonia a cumpli. “Awor akí [Babilonia] ta, i tabata pa siglonan, un esena di desolacion extenso, un monton di ruina,” segun un comentarista di Bijbel. Anto e ta agregá: “Ta imposibel contemplá e esena aki sin ser recordá cu ki exactitud e pronósticonan di Isaías i Jeremías a cumpli.” Ta claro cu niun contemporáneo di Isaías por a predicí e caida di Babilonia i su desolacion mas despues. Al fin i al cabo, e caida di Babilonia na man di Medo-Persia a tuma lugá rond di 200 aña despues cu Isaías a skirbi su buki! I su desolacion definitivo a bini siglonan mas despues. Esei no ta fortalecé nos fe den Bijbel como e Palabra inspirá di Dios? (2 Timoteo 3:16) Ademas, ya cu Jehova a cumpli cu profecia den pasado, nos por tin pleno confiansa cu profecia di Bijbel cu no a cumpli ainda lo ser realisá na Dios su debido tempu.

“Sosiegu for di Bo Dolor”

17, 18. Ki bendicionnan e derota di Babilonia lo trece pa Israel?

¹⁷ E caida di Babilonia lo ta un alivio pa Israel. Lo e nificá liberacion for di cautiverio i e oportunidad pa bolbe bek n’e Tera Primintí. P’esei, Isaías ta bisa awor: “Jehova lo mustra misericordia na Jacob, i ainda sigur lo e scoge Israel; i realmente lo e duna nan sosiegu riba nan suela, i e residente stranhero tin cu uni cu nan, i nan tin cu pega n’e cas di Jacob. I pueblonan realmente lo tuma nan i hiba nan na nan mes lugá, i e cas di Israel tin cu tuma nan pa su mes como posesion riba e suela di Jehova como criá homber i criá muher; i nan tin cu capturá esnan cu tabata tene nan prezu, i nan tin cu tene den sumision esnan cu tabata obligá nan traha.” (Isaías 14:1, 2) Aki “Jacob” ta referí na Israel den su totalidad, esta, tur 12 tribu. Jehova lo mustra misericordia na “Jacob” dor di permití e nacion bolbe bek nan tera. Miles di stranhero lo compañá nan, di cua hopi lo sirbi e israelitanan como criá di tempel. Algun israelita lo bin haña asta autoridad riba nan ex-capturadónan.c

¹⁸ E angustia di biba den exilio lo pasa forbij. Na su lugá, Jehova lo duna su pueblo “sosiegu for di [nan] dolor i for di [nan] agitacion i for dje sclabitud pisá den cua nan a haci [nan] catibu.” (Isaías 14:3) Una bes librá for dje cadenanan literal di sclabitud, Israel lo no sufri mas dje dolor ni agitacion di biba meimei di adoradó di dios falsu. (Ésdras 3:1; Isaías 32:18) Comentando riba esaki, e buki Lands and Peoples of the Bible (Tera i Pueblo di Bijbel) ta bisa: “E característicanan dje babilonionan tabata reflehá den nan diosnan, incluso nan pió defectonan. Nan diosnan tabata cobarde, buraché i kens.” Esta un alivio di por scapa for di un ambiente religioso degradá asina!

19. Kico Israel mester haci pa Jehova pordoná nan, i kico nos ta siña di esaki?

¹⁹ No obstante, e misericordia di Jehova no ta incondicional. Su pueblo tin cu demostrá remordimentu pa nan maldad cu a impulsá Dios pa castigá nan asina severamente. (Jeremías 3:25) Si nan confesá nan picánan di un manera franco i sincero, Jehova lo pordoná nan. (Mira Nehemías 9:6-37; Daniel 9:5.) E mésun principio ta conta awe tambe. Siendo cu “no tin un hende cu no ta peca,” nos tur mester di Jehova su misericordia. (2 Crónicanan 6:36) Jehova, e Dios misericordioso, ta animá nos amorosamente pa confesá nos picánan na dje, repentí i stop di practicá loke ta malu pa nos por ser curá. (Deuteronomio 4:31; Isaías 1:18; Santiago 5:16) Esaki no solamente ta yuda nos recobrá su aprobacion sino tambe e ta duna nos consuelo.—Salmo 51:1; Proverbionan 28:13; 2 Corintionan 2:7.

Un “Proverbio” Contra Babilonia

20, 21. Con e bisiñanan di Babilonia ta alegrá ora e cai?

²⁰ Mas cu 100 aña promé cu Babilonia surgi como e potencia mundial dominante, Isaías ta predicí con mundu lo reaccioná riba su caida. Di un manera profético e ta ordená e israelitanan cu lo sali liber for di su cautiverio: “Bo tin cu entoná e proverbio aki contra e rey di Babilonia i bisa: ‘Wak con esun cu tabata obligá otronan traha a stop, con opresion a stop! Jehova a kibra e bara dje malbadonan, e garoti di esnan cu tabata goberná, esun cu tabata golpia pueblonan cu furia cu golpi sin stop, esun cu tabata dominá nacionnan den puru rabia cu persecucion sin restriccion.’ ” (Isaías 14:4-6) Babilonia a gana e reputacion di un conkistadó, di un opresor cu ta combertí hende liber den esclabo. Ta masha apropiado cu ta celebrá su caida cu un “proverbio” dirigí na promé lugá contra e dinastia babilónico—cuminsando cu Nabucodonosor i terminando cu Nabonido i Bélsasar—cu a goberná den e época di gloria dje gran stad!

²¹ Ki un diferencia ora e cai! “Henter e tera a drenta den descanso, a bira liber di disturbio. Hende a bira alegre cu gritunan gososo. Asta e palunan di jenever tambe a alegrá pa bo causa, e palunan di seda di Líbanon, bisando: ‘Desde cu bo a cai drumi abou, ningun kapdó di palu no ta subi contra nos.’ ” (Isaías 14:7, 8) E gobernantenan di Babilonia a mira e reynan dje nacionnan como palu cu nan por a kap abou i usa pa nan propio finnan. Wel, tur esei a caba. E kapdó di palu di Babilonia a kap su último palu!

22. Den e sentido poético, con Sheol ta reaccioná riba e caida dje dinastia babilónico?

²² E caida di Babilonia ta asina asombroso cu graf mes ta reaccioná: “Asta Sheol abou a bira agitá pa bo causa afin di bin topa bo ora bo yega. Pa bo causa el a spierta esnan cu ta impotente den morto, tur e lidernan di tera semehante na cabritu. El a pone tur e reynan dje nacionnan lanta for di nan trono. Nan tur ta expresá nan mes i ta bisa bo: ‘Abo tambe nan a haci débil manera nos? Ta manera nos nan a haci bo? Na Sheol nan a baha bo orguyo, e bochincha di bo instrumentnan di cuerde. Bou di bo, nan a habri bichi manera un cama; i bichi ta bo co’i tapa.’” (Isaías 14:9-11) Esta un imágen poético impactante! Ta como si fuera graf comun di humanidad ta spierta tur e reynan cu a baha den morto promé cu e dinastia babilónico pa nan por ricibí e huésped nobo. Nan ta haci mofa dje potencia di Babilonia cu awor ta impotente, drumí riba un cama di bichi en bes di un canapé costoso, i cubrí cu bichi en bes di cu laken caru.

“Manera un Cadaver Trapá”

23, 24. Na ki extremo e arogancia dje reynan di Babilonia ta yega?

²³ Isaías ta continuá cu su proverbio: “Ai, wak con bo a cai for di shelu, abo, esun briyante, yu di aurora! Wak con bo a ser cortá te na tera, abo, cu tabata incapacitá e nacionnan!” (Isaías 14:12) Orguyo egoista ta impulsá e monarcanan babilónico pa halsa nan mes riba reynan bisiña. Manera un strea cu ta briya cla-cla den e shelu di mainta trempan, nan ta ehercé nan poder i autoridad arogantemente. Nabucodonosor su conkista riba Jerusalem, un hazaña cu ni Asiria no a logra, ta motibu special di su orguyo. E proverbio ta describí con e dinastia orguyoso di Babilonia ta bisa: “Na shelu lo mi subi. Mas ariba cu e streanan di Dios lo mi halsa mi trono, i lo mi cai sinta riba e ceru di reunion, den e partinan mas leu di nort. Lo mi subi mas ariba cu e lugánan haltu dje nubianan; i lo mi laga mi mes parce e Haltísimo.” (Isaías 14:13, 14) Esei no ta colmo di sinbergwenseria?

²⁴ Bijbel ta compará e reynan dje liña di desendencia real di David cu strea. (Númeronan 24:17) For di David padilanti, e “streanan” ei a goberná riba ceru di Síon. Despues cu Sálomon a construí e tempel na Jerusalem, e nomber Síon a bin aplicá na henter e stad. Bou dje pacto di Ley, tur israelita masculino tabata obligá pa biaha tres bes pa aña bai Síon. Dje manera ei el a bira “e ceru di reunion.” Siendo determiná pa dominá e reynan di Huda i despues kita nan for dje ceru ei, Nabucodonosor ta declará su intencion di halsa su mes ariba tur e “streanan” ei. En bes di duna Jehova mérito pa su victoria riba nan, en efecto, e ta pone su mes cu arogancia na lugá di Jehova.

25, 26. Con e dinastia babilónico ta topa su fin bergonsoso?

²⁵ Ki un sla duru ta warda e dinastia orguyoso di Babilonia! E ta leu for di ser halsá ariba e streanan di Dios. Mas bien, Jehova ta bisa: “Na Sheol nan lo pone bo baha, te n’e partinan mas leu dje buracu. Esnan cu mira bo lo keda wak bo; nan lo examiná bo cuidadosamente, i bisa: ‘Ta esaki ta e homber cu tabata agitá e tera, cu tabata pone reinonan sagudí, cu a haci e tereno productivo manera desierto i cu a deribá asta su stadnan, cu ni sikiera pa su prezunan no a habri e caminda pa cas?’” (Isaías 14:15-17) E dinastia ambicioso lo baha den Hádes (Sheol), mescos cu cualkier ser humano.

²⁶ Kico lo para anto dje potencia cu a conkistá reinonan, destruí tereno productivo i tumba stadnan na gran cantidad? Kico lo para dje potencia mundial cu a hiba prezunan sin nunca mas permití nan bai nan tera bek? Wel, e dinastia babilónico lo ni sikiera haña un entiero decente! Jehova ta bisa: “Tur otro rey dje nacionnan, sí, nan tur, a cai drumi abou den gloria, cada un den su mes cas. Pero pa loke ta abo, bo a ser tirá afó sin un lugá di entiero pa bo, manera un spruit odiá, bistí cu mortonan cu a ser hincá cu spada cu ta baha n’e piedranan di un buracu, manera un cadaver trapá. Lo bo no uni cu nan den un graf, pasobra bo a ruiná bo propio tera, bo a mata bo propio pueblo. Pa tempu indefiní e desendencia di malechornan lo no ser nombrá.” (Isaías 14:18-20) Den e mundu antiguo, ora un rey no a haña un entiero digno, esei tabata un bergwensa p’e. Pues, kico dje dinastia real di Babilonia? Ta berdad cu probablemente nan tabata dera nan reynan cu onor, pero e dinastia imperial di reynan cu ta desendiente di Nabucodonosor lo ser bentá afó “manera un spruit odiá.” Ta como si fuera a tira e dinastia den un graf sin nomber—manera un simpel soldá di infanteria cu a muri den bataya. Esta un humiyacion!

27. Den ki sentido futuro generacionnan babilónico lo sufri pa causa dje eror di nan antepasadonan?

²⁷ E proverbio ta concluí cu e ordunan final p’e conkistadónan medo i perso: “Prepará un bloki di matadero pa su propio yunan, pa causa dje eror di nan antepasadonan, pa nan no lanta i realmente tuma posesion dje tera i yena cara dje tera productivo cu stad.” (Isaías 14:21) E caida di Babilonia lo ta permanente. E dinastia babilónico lo pasa pa historia. Lo e no rebibá nunca mas. Futuro generacionnan babilónico lo sufri “pa causa dje eror di nan antepasadonan.”

28. Kico tabata e rais dje picá di reynan babilónico, i kico nos ta siña for di esaki?

²⁸ Nos por saca un les balioso for dje huicio pronunciá contra e dinastia babilónico. E rais dje picá di reynan babilónico tabata nan ambicion sin límite. (Daniel 5:23) Nan curason tabata yená cu sed pa poder. Nan kier a dominá otronan. (Isaías 47:5, 6) I nan a anhelá pa ricibí gloria for di hende, algu cu ta pertenecé na Dios so. (Revelacion 4:11) Esaki ta un advertencia pa ken cu tin un puesto di autoridad, incluso den e congregacion cristian. Ambicion i orguyo egoista ta característicanan cu Jehova lo no tolerá, ni den hende individual ni den e nacionnan.

29. E orguyo i ambicion dje gobernantenan babilónico tabata un refleho di kico?

²⁹ E orguyo dje gobernantenan babilónico tabata un refleho dje spiritu di “e dios dje sistema di cosnan aki,” Satanas e Diabel. (2 Corintionan 4:4) E tambe tin sed pa poder i tin gana di halsa su mes riba Jehova Dios. Mescos cu tabata e caso cu e rey di Babilonia i e pueblonan cu el a dominá, Satanas su ambicion malbado a resultá den miseria i sufrimentu pa henter humanidad.

30. Cua otro Babilonia ta ser mencioná den Bijbel, i ki spiritu el a manifestá?

³⁰ Mas aleu nos ta lesa den e buki di Revelacion di un otro Babilonia: “Babilonia e Grandi.” (Revelacion 18:2) E organisacion aki, e imperio mundial di religion falsu, tambe a manifestá un spiritu orguyoso, opresivo i cruel. Como resultado, e tambe tin cu enfrentá un “dia di Jehova” i sufri destruccion na Dios su debido tempu. (Isaías 13:6) Desde 1919, e mensahe aki a resoná rond mundu: “Babilonia e Grandi a cai!” (Revelacion 14:8) Ora e no por a tene e pueblo di Dios den cautiverio, el a sufri un caida i pronto lo e ser completamente destruí. Pa loke ta antiguo Babilonia, Jehova a manda: “Pagu’é bek conforme su actividad. Conforme cu tur loke el a haci, haci cuné. Pasobra ta contra Jehova el a actua cu arogancia, contra e Santu di Israel.” (Jeremías 50:29; Santiago 2:13) Babilonia e Grandi lo ricibí un sentencia similar.

31. Kico lo pasa pronto cu Babilonia e Grandi?

³¹ P’esei, Jehova su declaracion final dje profecia aki den e buki di Isaías ta aplicá no solamente na Babilonia di antigwedad sino tambe na Babilonia e Grandi: “Lo mi lanta contra nan . . . I lo mi corta kita for di Babilonia nomber i resto i yu i desendencia . . . I lo mi hacié un posesion di porco di spiña i plasnan di awa yen di caña, i lo mi barié cu e basora di destruccion.” (Isaías 14:22, 23) E ruinanan desolá di Babilonia di antigwedad ta mustra kico Jehova lo haci pronto cu Babilonia e Grandi. Ki un consuelo pa amantenan di adoracion berdadero! Esta un estímulo pa nunca nos permití e característicanan satánico di orguyo, arogancia of crueldad saca rais den nos!

[Nota]

[Plachi na página 178]

Ora Babilonia cai e ta bira lugá di biba pa bestia di desierto

[Plachinan na página 186]

Mescos cu Babilonia di antigwedad, Babilonia e Grandi lo bira un monton di ruina