Capítulo Diescincu

E Conseho di Jehova Contra e Nacionnan

Isaías 14:24–19:25

 1. Di ki huicio contra Asiria Isaías ta skirbi?

JEHOVA por usa e nacionnan pa disipliná su pueblo pa nan maldad. Pero no cu e ta dispensá nan pa e manera innecesariamente cruel, orguyoso i hostil cu nan ta trata adoracion berdadero. P’esei, hopi tempu di antemano, e ta inspirá Isaías pa skirbi “e declaracion formal contra Babilonia.” (Isaías 13:1) Sin embargo, Babilonia ta un menasa pa mas den futuro. Den e tempu di Isaías, e nacion cu ta oprimí e pueblo cu ta den pacto cu Dios ta Asiria. Asiria ta destruí Israel su reino di nort i ta ruiná gran parti di Huda. Pero e triunfo di Asiria ta limitá. Isaías ta skirbi: “Jehova di ehércitonan a hura, bisando: ‘Siguramente net manera mi a calculá, asina tin cu sosodé . . . afin di kibra e asirio den mi tera i pa mi por trapa riba dje den mi propio cerunan; i pa su yugo realmente por kita for di riba nan i pa asta su carga por kita for di riba nan scouder.’” (Isaías 14:24, 25) No hopi tempu despues cu Isaías pronunciá e profecia aki, e menasa asirio ta ser kitá for di Huda.

 2, 3. (a) Den tempu antiguo, contra ken Jehova ta saca su man? (b) Kico kier men cu Jehova ta saca su man contra “tur e nacionnan”?

² Pero, kico di otro nacionnan cu ta enemigu dje pueblo den pacto cu Dios? Mester husga nan tambe. Isaías ta declará: “Esaki ta e conseho cu ta ser consehá contra henter e tera, i esaki ta e man cu ta sacá contra tur e nacionnan. Pasobra Jehova di ehércitonan mes a consehá, i ken por kibr’é? I su man ta esun sacá, i ken por bir’é bek?” (Isaías 14:26, 27) E “conseho” di Jehova ta mas cu un simpel recomendacion. Esei ta su determinacion firme, su decreto. (Jeremías 49:20, 30) E “man” di Dios ta su poder den accion. Den e versículonan final di Isaías capítulo 14 (versíkulo 29-32) i den capítulo 15 pa 19, e conseho di Jehova ta contra Filistea, Moab, Damasco, Etiopia i Egipto.

³ Pero Isaías ta bisa cu e man di Jehova ta sacá contra “tur e nacionnan.” P’esei, aunke e profecianan di Isaías ta cumpli inicialmente den antigwedad, den liñanan general nan ta aplicá tambe durante “e tempu di fin” ora Jehova ta saca su man contra tur e reinonan di tera. (Daniel 2:44; 12:9; Romanonan 15:4; Revelacion 19:11, 19-21) Jehova, e Dios Todopoderoso, ta revelá su conseho hopi tempu adelantá i cu confiansa. Niun hende por bira su man sacá.—Salmo 33:11; Isaías 46:10.

“Un Colebra di Candela Buladó” Contra Filistea

 4. Mencioná algun detaye di Jehova su declaracion formal contra Filistea.

⁴ E filisteonan ta e proménan na turno. “Den e aña cu rey Acas a muri a bini e declaracion formal aki: ‘No alegrá, o Filistea, ningun di bo, djis pasobra a kibra e garoti di esun cu tabata golpia bo. Pasobra for dje rais dje colebra lo sali un colebra venenoso, i su fruta lo ta un colebra di candela buladó.’”—Isaías 14:28, 29.

 5, 6. (a) Den ki sentido Uzías tabata manera un colebra p’e filisteonan? (b) Kico Ezekías ta resultá di ta contra Filistea?

⁵ Rey Uzías tabata suficiente fuerte pa resistí e menasa cu Filistea a representá. (2 Crónicanan 26:6-8) Den bista dje filisteonan, e tabata manera un colebra, kende su garoti a sigui golpia e bisiña hostil ei. Ora Uzías a muri, ‘su garoti a ser kibrá.’ Fiel Jotan a siguié riba trono, pero “ainda e pueblo tabata actua na un manera ruinoso.” Despues, Acas a bira rey. Ei cos a cambia, i e filisteonan a conducí atakenan militar exitoso contra Huda. (2 Crónicanan 27:2; 28:17, 18) Pero awor cos ta cambia atrobe. Na aña 746 P.E.C., rey Acas ta muri i e hóben Ezekías ta subi trono. Si e filisteonan ta kere cu cos lo sigui na nan fabor, nan ta mal kibocá. Ezekías ta resultá di ta un adversario temibel. Como desendiente di Uzías (“fruta” di su “rais”), Ezekías ta manera “un colebra di candela buladó”: e ta lansa su mes rápidamente den atake, ta golpia cu velocidad di weerlicht i e golpi ta keda kima, como si fuera el a inyectá su víctimanan cu veneno.

⁶ Sin duda, un bon descripcion dje rey nobo. “Tabata [Ezekías] cu a deribá e filisteonan te na Gaza i tambe su teritorionan.” (2 Reynan 18:8) Segun e registronan di historia dje rey asirio Senákerib, e filisteonan a bira súbdito di Ezekías. “Esnan di condicion humilde,” esta e reino debilitá di Huda, ta bin disfrutá di siguridad i prosperidad material, miéntras cu Filistea ta padecé di hamber.—Lesa Isaías 14:30, 31.

 7. Ki declaracion di fe Ezekías tin cu haci n’e embahadornan cu ta na Jerusalem?

⁷ Ta parce cu cierto embahadornan a bini Huda—tal bes cu e intencion di forma un aliansa contra Asiria. Kico mester bisa nan? “Kico cualkier hende lo bisa como contesta na e mensaheronan dje nacion?” Ezekías mester busca proteccion den aliansa cu stranhero? No! E mester bisa e mensaheronan: “Jehova mes a pone e fundeshi di Síon, i den dje esnan afligí di su pueblo lo tuma refugio.” (Isaías 14:32) E rey mester tin pleno confiansa den Jehova. E fundeshi di Síon ta firme. E stad lo sobrebibí como un refugio sigur contra e menasa asirio.—Salmo 46:1-7.

 8. (a) Con algun nacion djawe ta manera Filistea? (b) Mescos cu Jehova a haci den antigwedad, kico el a haci pa sostené su pueblo awe?

⁸ Mescos cu antiguo Filistea, algun nacion djawe ta oponé adoradónan di Dios ferosmente. Nan a cera Testigonan cristian di Jehova den prizon i campo di concentracion. Nan a prohibí nan como organisacion. Nan a mata hopi di nan. Oponentenan ta sigui “haci atake skerpi contra e alma dje hustu.” (Salmo 94:21) Den bista di nan enemigunan, e grupo cristian aki por parce “di condicion humilde” i ‘pober.’ Pero cu e sosten di Jehova, nan ta disfrutá di prosperidad spiritual, miéntras nan enemigunan ta padecé di hamber. (Isaías 65:13, 14; Ámos 8:11) Ora Jehova saca su man contra e filisteonan di actualidad, “esnan di condicion humilde” aki lo ta protehá. Na unda? Den asociacion cu “e famia di cas di Dios,” di cua Jesus ta e piedra sólido di skina di fundeshi. (Efesionan 2:19, 20) Ademas, nan lo tin e proteccion di “Jerusalem celestial,” Jehova su Reino celestial cu tin Cristo como Rey.—Hebreonan 12:22; Revelacion 14:1.

Moab Ta Ser Silenciá

 9. Contra ken e siguiente declaracion formal ta, i con e pueblo aki a duna prueba di ta un enemigu dje pueblo di Dios?

⁹ Oost di laman Morto tin un otro bisiña di Israel: Moab. Distinto dje filisteonan, e moabitanan ta famia di Israel pasobra nan ta desendiente di Lot, subrino di Abraham. (Génesis 19:37) Apesar dje relacion ei, Moab tin un historia di enemistad cu Israel. Por ehempel, den tempu di Moises, e rey di Moab a contratá profeta Balam pa esaki maldicioná e israelitanan. Ora esei a fracasá, Moab a recurí na inmoralidad i adoracion di Baal pa coge Israel den trampa. (Númeronan 22:4-6; 25:1-5) Nada straño anto cu awor Jehova ta inspirá Isaías pa skirbi “e declaracion formal contra Moab”!—Isaías 15:1a.

10, 11. Kico lo sosodé cu Moab?

¹⁰ E profecia di Isaías ta ser dirigí contra vários stad i lugá den Moab, manera Ar, Kir (of Kir-hareset) i Dibon. (Isaías 15:1b, 2a) E moabitanan lo yora nan kukinan di rasenchi di Kir-hareset, probablemente un producto principal dje stad. (Isaías 16:6, 7) Sibma i Jazer, famoso pa nan cultivo di wijndruif, lo sufri castigu. (Isaías 16:8-10) Eglat-selisia, cua su nomber kisas ta nificá “Baca di Tres Aña,” lo ta manera un baca yong robusto cu ta dal gritu tristu di angustia. (Isaías 15:5) Yerba di tera lo seca, miéntras e “awanan di Dimon” lo yena cu sanger debí n’e matansa dje moabitanan. E ‘awanan di Nimrim’ lo bira “puru desolacion,” sea den un sentido figurativo of den un sentido literal—probablemente pasobra forsanan enemigu lo blokea nan riunan.—Isaías 15:6-9.

¹¹ E moabitanan lo faha nan mes cu paña di sacu, e bistí di luto. Nan lo feita nan cabes pelon-pelon como símbolo di bergwensa i lamento. Nan lo “corta” nan barba como señal di tristesa i humiyacion profundo. (Isaías 15:2b-4) Isaías mes, sigur di e cumplimentu dje huicionan aki, ta sinti un tristesa profundo. Mescos cu e cuerdenan di un arpa ta vibra, su paden ta ser conmoví cu duele pa motibu dje mensahe di calamidad contra Moab.—Isaías 16:11, 12.

12. Con e palabranan di Isaías a cumpli contra Moab?

¹² Na ki tempu e profecia aki lo cumpli? Pronto. “Esaki ta e palabra cu Jehova a papia anteriormente tocante Moab. I awor Jehova a papia, bisando: ‘Denter di tres aña, segun e añanan di un trahadó pa salario, e gloria di Moab tambe tin cu ser desonrá cu hopi conmocion di tur sorto, i esnan cu resta lo ta masha tiki, nada poderoso.’” (Isaías 16:13, 14) Na armonia cu esaki, hayasgonan arkeológico ta indicá cu durante siglo 8 P.E.C., Moab a pasa un periodo di sufrimentu intenso i hopi di su sitionan a ser desolá. Tiglat-piléser III a mencioná Salamanu di Moab entre e gobernantenan cu a paga tributo na dje. Senákerib a ricibí tributo for di Kammusunadbi, rey di Moab. E monarcanan asirio Esar-hadon i Asurbanipal a bisa cu e reynan moabita Musuri i Kamashaltu tabata sometí na nan. Hopi siglo pasá, e moabitanan a stop di existí como pueblo. Aunke a haña ruina di stadnan supuestamente moabita, te asina leu a coba saca masha poco evidencia dje antiguo enemigu poderoso aki di Israel.

E “Moab” di Actualidad Ta Perecé

13. Ki organisacion djawe ta comparabel cu Moab?

¹³ Awe tin un organisacion mundial similar na Moab di antigwedad. Ta trata aki di cristiandad, e parti principal di “Babilonia e Grandi.” (Revelacion 17:5) Tantu Moab como Israel tabata desendiente di Taré, tata di Abraham. Mescos cu e congregacion actual di cristian ungí, cristiandad tambe ta pretendé cu nan raisnan ta den e congregacion cristian di promé siglo. (Galationan 6:16) Sin embargo, mescos cu Moab, cristiandad ta corupto pasobra e ta promové inmoralidad spiritual i adoracion di otro dios cu no ta e único Dios berdadero, Jehova. (Santiago 4:4; 1 Juan 5:21) Como clase, e lidernan di cristiandad ta oponé esnan cu ta predicá e bon nobo di Reino.—Mateo 24:9, 14.

14. Apesar di e conseho di Jehova contra e “Moab” di tempu actual, ki speransa tin pa miembronan individual dje organisacion ei?

¹⁴ Cu tempu Moab a ser silenciá. Mescos lo sosodé cu cristiandad. Jehova lo usa un ekivalente moderno di Asiria pa causa su desolacion. (Revelacion 17:16, 17) Sin embargo, tin speransa pa hende den e “Moab” djawe. Meimei di su profecia contra Moab, Isaías ta bisa: “Sigur lo establecé firmemente un trono den bondad amoroso; i un hende tin cu sinta riba dje cu apego na e berdad den e tent di David, husgando i buscando husticia i siendo lihé den husticia.” (Isaías 16:5) Na 1914, Jehova a establecé firmemente e trono di Jesus, e Gobernante dje liña di desendencia di rey David. E reinado di Jesus ta un manifestacion di Jehova su bondad amoroso i, pa cumpli cu e pacto cu Dios a cera cu rey David, lo e dura pa semper. (Salmo 72:2; 85:10, 11; 89:3, 4; Lucas 1:32) Hopi hende mansu a bandoná e “Moab” djawe i a someté nan mes na Jesus pa por gana bida. (Revelacion 18:4) Ta ki un consuelo pa esakinan sa cu Jesus lo “clarificá na e nacionnan kico ta husticia”!—Mateo 12:18; Jeremías 33:15.

Damasco Ta Bira un Ruina den Decadencia

15, 16. (a) Ki medidanan hostil Damasco i Israel ta tuma contra Huda, i cu cua consecuencia pa Damasco? (b) Ken ta incluí den e declaracion formal contra Damasco? (c) Kico cristiannan djawe por siña for dje ehempel di Israel?

¹⁵ Siguientemente, Isaías ta skirbi “e declaracion formal contra Damasco.” (Lesa Isaías 17:1-6.) Damasco, situá panort di Israel, ta “e cabes di Siria.” (Isaías 7:8) Durante e reinado di rey Acas di Huda, Rezin di Damasco, aliado di Peka di Israel, ta invadí Huda. Sin embargo, riba peticion di Acas, e asirio Tiglat-piléser III ta atacá Damasco, ta conkist’é i manda hopi di su habitantenan den exilio. For dje momento ei, ya Damasco no ta representá un menasa mas pa Huda.—2 Reynan 16:5-9; 2 Crónicanan 28:5, 16.

¹⁶ Probablemente debí n’e aliansa di Israel cu Damasco, e declaracion formal di Jehova contra Damasco ta contené tambe expresionnan di huicio contra e reino infiel di nort. (Isaías 17:3-6) Israel lo bira manera un cunucu cu masha poco grano den tempu di cosecha of manera un palu di olijfi di cua a sagudí mayoria olijfi for dje takinan. (Isaías 17:4-6) Ki un ehempel serio pa esnan cu ta dedicá na Jehova! E ta verwagt debocion exclusivo i ta aceptá solamente sirbishi sagrado cu ta sali di curason. I e ta odia esnan cu ta lanta contra nan rumannan.—Éxodo 20:5; Isaías 17:10, 11; Mateo 24:48-50.

Pleno Confiansa den Jehova

17, 18. (a) Con algun hende den Israel ta respondé riba e declaracionnan di Jehova, pero con e mayoria ta reaccioná? (b) Ki similaridad tin entre e sucesonan djawe i esnan den tempu di Ezekías?

¹⁷ Isaías ta bisa na continuacion: “Riba e dia ei hende terenal lo hisa su bista na Esun cu a trah’é, i su propio wowonan lo fiha riba e Santu di Israel mes. I lo e no dirigí su bista na e altarnan, e obranan di su man; i lo e no fiha riba loke su dedenan a traha, ni riba e palunan sagrado ni riba e mesanan di censia.” (Isaías 17:7, 8) Sí, algun hende den Israel ta haci caso dje spiertamentu di Jehova. Por ehempel, ora Ezekías ta manda un invitacion p’e habitantenan di Israel djoin Huda den un celebracion dje Pascu hudiu, algun israelita ta aceptá e invitacion i ta biaha bai zuid pa uni cu nan rumannan den adoracion puru. (2 Crónicanan 30:1-12) No obstante, mayoria habitante di Israel ta haci mofa dje mensaheronan cu ta trece e invitacion. E apostasia dje pais ta incurabel. P’esei, e conseho di Jehova contra dje ta bira realidad. Asiria ta destruí e stadnan di Israel, e tera ta keda desolá, i e terenonan di yerba ta bira improductivo.—Lesa Isaías 17:9-11.

¹⁸ Kico djawe? Israel tabata un nacion apóstata. P’esei, e manera cu Ezekías a trata na yuda algun persona den e nacion ei pa bolbe bek na adoracion berdadero ta pone nos corda con cristiannan berdadero djawe ta purba yuda hende cu ta pertenecé n’e organisacion apóstata di cristiandad. Desde 1919, koeriernan di “e Israel di Dios” a bai na tur parti di cristiandad i invitá hende pa djoin adoracion puru. (Galationan 6:16) Mayoria a rechasá e invitacion i hopi a haci mofa dje mensaheronan. Pero algun sí a haci caso. Awor nan ta miyones na cantidad, i nan tin deleite den ‘fiha nan wowonan riba e Santu di Israel’ pa ricibí su siñansa. (Isaías 54:13) Nan ta stop di rindi adoracion na altarnan impuru—debocion na dios cu hende a traha i di confia den nan—i ta acudí cu entusiasmo na Jehova. (Salmo 146:3, 4) Cada un di nan ta bisa mescos cu Mikéas, contemporáneo di Isaías: “Pero en cuanto ami, ta pa Jehova lo mi mantené mi mes vigilante. Lo mi mustra un actitud di warda riba e Dios di mi salbacion. Mi Dios lo tende mi.”—Mikéas 7:7.

19. Ken Jehova lo reprendé, i kico esei lo nificá pa nan?

¹⁹ Ki un contraste cu esnan cu ta pone nan confiansa den hende mortal! Olanan turbulento di violencia i agitacion ta asotá humanidad den e último dianan aki. E “laman” di humanidad inkieto i rebelde ta generá malcontentu i revolucion. (Isaías 57:20; Revelacion 8:8, 9; 13:1) Jehova lo ‘reprendé’ e multitud aki cu ta haci bochincha. Su Reino celestial lo destruí tur organisacion i hende individual problemático, i esakinan lo “hui bai leu . . . manera un warwarú di sumpiña dilanti bientu di tempestad.”—Isaías 17:12, 13; Revelacion 16:14, 16.

20. Apesar cu e nacionnan ta “plunder” cristian berdadero, ki confiansa nan tin?

²⁰ Cu ki resultado? Isaías ta bisa: “Na ora di anochi, pues, mira!, tin teror repentino. Promé cu mainta—e no t’ei mas. Esaki ta e parti cu ta corespondé na esnan cu ta pluma nos, i e suerte di esnan cu ta plunder nos.” (Isaías 17:14) Hopi ta esnan cu ta plunder e pueblo di Jehova, tratando nan cruelmente i cu falta di respet. Pa motibu cu nan no ta—i no ta deseá di ta—parti dje religionnan tradicional di mundu, críticonan yen di prehuicio i oponentenan fanático ta mira cristiannan berdadero como prooi fácil. Pero e pueblo di Dios tin confiansa cu e “mainta” riba cua nan tribulacionnan lo terminá ta acercando rápidamente.—2 Tesalonicensenan 1:6-9; 1 Pedro 5:6-11.

Etiopia Ta Trece un Regalo pa Jehova

21, 22. Cua ta e siguiente nacion pa ricibí un declaracion di huicio, i con e palabranan inspirá di Isaías ta cumpli?

²¹ Na por lo ménos dos ocasion, Etiopia, pazuid di Egipto, tabata enbolbí den accion militar contra Huda. (2 Crónicanan 12:2, 3; 14:1, 9-15; 16:8) Awor Isaías ta profetisá huicio riba e nacion ei: “Ah!, e pais dje insectonan cu ala cu ta zum, cu ta den e region dje riunan di Etiopia!” (Lesa Isaías 18:1-6.)a Jehova ta decretá cu lo ‘corta, kita i kap’ Etiopia afó.

²² Historia seglar ta bisa nos cu den e parti final di siglo 8 P.E.C., Etiopia a conkistá Egipto i a gobern’é pa mas o ménos 60 aña. E emperadornan asirio Esar-hadon i Asurbanipal a invadí teritorio egipcio un tras di otro. Ora Asurbanipal a destruí Tebas, Asiria a dominá Egipto i pone fin n’e dominio etiopio riba e vaye di Nilo. (Mira tambe Isaías 20:3-6.) Kico di nos tempu?

23. Ki papel e “Etiopia” moderno ta hunga, i pakico e ta topa su fin?

²³ E profecia di Daniel di “e tempu di fin,” ta bisa cu “e rey [agresivo] di nort” tin Etiopia i Libia ta “sigui den su pasonan,” esta, nan ta respondé na su direccion. (Daniel 11:40-43) Etiopia ta ser mencioná tambe entre e forsanan di bataya di “Gog dje tera di Magog.” (Ezekiel 38:2-5, 8) E forsanan di Gog, cu ta incluí e rey di nort, ta topa nan fin ora nan atacá e nacion santu di Jehova. P’esei, Jehova lo saca su man contra e “Etiopia” moderno tambe pa motibu di su oposicion contra e soberania di Jehova.—Ezekiel 38:21-23; Daniel 11:45.

24. Den ki maneranan Jehova a ricibí “regalo” for dje nacionnan?

²⁴ Pero e profecia ta bisa tambe: “E tempu ei nan lo trece un regalo pa Jehova di ehércitonan, di parti di un pueblo di estatura haltu i cútis suave, sí, di un pueblo cu na tur parti ta inspirá temor . . . na e lugá dje nomber di Jehova di ehércitonan, ceru di Síon.” (Isaías 18:7) Aunke e nacionnan no ta reconocé e soberania di Jehova, nan a actua algun biaha na un manera cu ta beneficiá e pueblo di Jehova. Den algun pais autoridadnan a traha ley i dicta sentencia di corte cu ta otorgá derecho legal na Jehova su fiel adoradónan. (Echonan 5:29; Revelacion 12:15, 16) Tambe tin otro clase di regalo. ‘Reynan lo trece regalo pa bo mes. Obhetonan di brons lo sali for di Egipto; Cus [Etiopia] mes lo saca su man rápidamente cu regalo pa Dios.’ (Salmo 68:29-31) Awe, miyones di “etiopio” moderno cu ta teme Jehova ta treciendo “un regalo” den e forma di adoracion. (Malakías 1:11) Nan ta participá den e tarea enorme di predicá e bon nobo di Reino na tur parti dje tera. (Mateo 24:14; Revelacion 14:6, 7) Esta un regalo excelente pa Jehova!—Hebreonan 13:15.

E Curason di Egipto Ta Dirti

25. Con Isaías 19:1-11 ta cumpli riba Egipto di antigwedad?

²⁵ E bisiña pegá cu Huda parti zuid ta Egipto; pa hopi tempu enemigu dje pueblo den pacto cu Dios. Isaías capítulo 19 ta conta dje instabilidad cu tin den Egipto durante e bida di Isaías. Tin guera civil den Egipto, cu “stad contra stad, reino contra reino.” (Isaías 19:2, 13, 14) Historiadónan a haña prueba cu dinastianan rival tabata goberná diferente parti dje pais na mésun tempu. E sabiduria tan aclamá di Egipto, cu su ‘diosnan cu no bal nada i encantadónan,’ no ta scap’é for di “man di un doño duru.” (Isaías 19:3, 4) Asiria, Babilonia, Persia, Grecia i Roma un tras di otro ta conkistá Egipto. Tur e sucesonan aki ta cumpli cu e profecianan di Isaías 19:1-11.

26. Den e cumplimentu mayor, con e habitantenan di “Egipto” moderno lo reaccioná riba Jehova su obranan di huicio?

²⁶ Sin embargo, den Bijbel, hopi bes Egipto ta simbolisá e mundu di Satanas. (Ezekiel 29:3; Joël 3:19; Revelacion 11:8) Pues anto, Isaías su “declaracion formal contra Egipto” tin un cumplimentu mayor? Sigur-sigur! E palabranan di introduccion dje profecia mester impulsá tur hende pa tuma nota: “Mira! Jehova ta coriendo riba un nubia velos i ta drentando Egipto. I e diosnan di Egipto cu no bal nada sigur lo tembla pa causa di dje, i e curason di Egipto lo dirti den dje.” (Isaías 19:1) Pronto Jehova lo drenta accion contra e organisacion di Satanas. N’e tempu ei, hende lo mira cu e diosnan dje sistema di cosnan aki no bal nada. (Salmo 96:5; 97:7) “E curason di Egipto lo dirti” di miedu. Jesus a profetisá dje tempu ei: ‘Lo tin angustia dje nacionnan, sin conocé e salida pa causa dje roncamentu di laman i su agitacion, miéntras cu hende ta desmayá di miedu i expectativa dje cosnan cu ta bini riba e tera habitá.’—Lucas 21:25, 26.

27. Di ki divisionnan interno den “Egipto” Bijbel a papia di dje, i con esaki ta cumpli awe?

²⁷ Tocante e periodo promé cu Jehova ehecutá su huicio, e ta bisa proféticamente: “Lo mi pui egipcio contra egipcio, i nan lo haci guera cada un contra su ruman homber, i cada un contra su compañero, stad contra stad, reino contra reino.” (Isaías 19:2) For di ora Dios a establecé su Reino den shelu na 1914, “e señal di [Jesus su] presencia” tabata marcá pa nacion cu ta lanta contra nacion i reino contra reino. Masacre entre tribu, genocidio sangriente i e asina yamá purificacion étnico a costa bida di miyones di hende durante e último dianan aki. Pió so e ‘dolornan di angustia’ ei lo bira segun cu e fin ta yega cerca.—Mateo 24:3, 7, 8.

28. Den e dia di huicio, kico religion falsu lo por haci pa scapa e sistema di cosnan aki?

²⁸ “E spiritu di Egipto tin cu keda babucá den dje, i lo mi confundí su propio conseho. I sigur nan lo acudí na e diosnan cu no bal nada i na e encantadónan i na e mediumnan spiritista i na e pronosticadónan profesional di suceso.” (Isaías 19:3) Ora Moises a presentá dilanti fárao, e sacerdotenan di Egipto cu no por a igualá Jehova su poder, a keda tur bergonsá. (Éxodo 8:18, 19; Echonan 13:8; 2 Timoteo 3:8) Mescos tambe, den e dia di huicio, religion falsu lo ta incapas pa salba e sistema corupto aki. (Compará cu Isaías 47:1, 11-13.) Cu tempu, Egipto a bin cai bou di “un doño duru,” esta Asiria. (Isaías 19:4) Esaki ta prefigurá e futuro scur cu ta warda e sistema di cosnan aki.

29. Ora e dia di Jehova yega, políticonan lo por yuda cu algu?

²⁹ Pero kico di lidernan político? Nan por yuda cu algu? “E prinsnan di Zoan sí ta bobo. Pa loke ta e sabínan dje conseheronan di fárao, nan conseho ta un cos irazonabel.” (Lesa Isaías 19:5-11.) Ta masha irazonabel pa spera cu consehero humano lo por yuda cu algu den e dia di huicio! Aunke nan tin tur e conocimentu di mundu na nan disposicion, nan ta falta sabiduria divino. (1 Corintionan 3:19) Nan a rechasá Jehova i a acudí n’e supuesto ciencia, na filosofia, placa, placer i otro diosnan substituto. Como resultado, nan no conocé e propósito di Dios. Nan a keda engañá i turdí. Nan obranan ta en bano. (Lesa Isaías 19:12-15.) “E sabínan a keda bergonsá. Nan ta terorisá i lo ser atrapá. Mira! Nan a rechasá e palabra mes di Jehova, i ki sabiduria nan tin?”—Jeremías 8:9.

Un Señal i un Testimonio pa Jehova

30. Den ki manera “e suela di Huda tin cu bira pa Egipto un motibu pa tambaleá”?

³⁰ Pero, aunke e lidernan di “Egipto” ta débil, “manera hende muher,” ainda tin hende cu ta busca sabiduria divino. E ungínan di Jehova i nan compañeronan ‘ta declará na tur parti e excelencianan di Dios.’ (Isaías 19:16; 1 Pedro 2:9) Nan ta haci tur loke ta na nan alcanse pa spierta hende dje binidero fin dje organisacion di Satanas. Mirando padilanti n’e situacion aki, Isaías ta bisa: “E suela di Huda tin cu bira pa Egipto un motibu pa tambaleá. Tur hende na ken bo mencion’é tin miedu debí n’e conseho di Jehova di ehércitonan cu e ta consehá contra dje.” (Isaías 19:17) E fiel mensaheronan di Jehova ta sigui declará e berdad—incluso e anuncio dje plaganan cu Jehova a profetisá di dje. (Revelacion 8:7-12; 16:2-12) Esaki ta molestiá e lidernan religioso di mundu.

31. Con bini hende ta papia “e idioma di Canan” den e stadnan di Egipto (a) den tempu antiguo? (b) den actualidad?

³¹ Kico ta e resultado sorprendente dje trabou di proclamacion aki? “Riba e dia ei lo resultá cu tin cincu stad den e tera di Egipto cu ta papia e idioma di Canan i cu ta hura na Jehova di ehércitonan. Un stad nan lo yama e Stad di Basha Abou.” (Isaías 19:18) Aparentemente, den tempu antiguo e profecia aki a cumpli ora por a tende e idioma hebreo den e stadnan egipcio caminda e hudiunan a hui bai. (Jeremías 24:1, 8-10; 41:1-3; 42:9–43:7; 44:1) Awe, tin hende den e teritorio di “Egipto” moderno cu a siña papia e “idioma puru” di Bijbel. (Sofonías 3:9) Un dje cincu stadnan figurativo ei yama “E Stad di Basha Abou,” loke ta nificá cu e “idioma puru” tin di haber tambe cu desenmascará e organisacion di Satanas i ‘bash’é abou.’

32. (a) Ki “altar” ta meimei dje tera di Egipto? (b) Den ki sentido e ungínan ta manera “un pilar” banda dje frontera di Egipto?

³² Danki n’e trabou di proclamacion dje pueblo di Jehova, sin duda su gran nomber lo bira conocí den e sistema di cosnan aki. “Riba e dia ei lo resultá di tin un altar pa Jehova meimei dje tera di Egipto, i un pilar pa Jehova banda di su frontera.” (Isaías 19:19) E palabranan aki ta señalá n’e posicion di cristian ungí, cu ta den un relacion di pacto cu Dios. (Salmo 50:5) Manera “un altar” nan ta ofrecé nan sacrificionan; manera “un pilar i apoyo dje berdad,” nan ta duna testimonio di Jehova. (1 Timoteo 3:15; Romanonan 12:1; Hebreonan 13:15, 16) Nan ta “meimei dje tera,” i huntu cu nan compañeronan di “otro carné” nan ta den mas cu 230 pais i isla. Pero nan “no ta parti di mundu.” (Juan 10:16; 17:15, 16) Na moda di papia, nan ta pará na e frontera entre e mundu aki i e Reino di Dios, i ta cla prepará pa crusa e frontera ei i ricibí nan recompensa celestial.

33. Den ki maneranan e ungínan ta “un señal” i “un testimonio” den “Egipto”?

³³ Isaías ta continuá: “E mester resultá di ta pa un señal i pa un testimonio pa Jehova di ehércitonan den e tera di Egipto; pasobra nan lo sclama na Jehova debí na e opresornan, i lo e manda un salbador pa nan, sí, un magnífico, cu realmente lo libra nan.” (Isaías 19:20) Como “un señal” i “un testimonio,” e ungínan ta hiba delantera den e trabou di predicá i ta halsa e nomber di Jehova den e sistema di cosnan aki. (Isaías 8:18; Hebreonan 2:13) Na tur parti di tera por tende e gritunan di hende oprimí, pero por lo general gobiernunan humano no por yuda nan. Sin embargo, Jehova lo manda un Magnífico Salbador, e Rey Jesucristo, pa libra tur hende mansu. Ora e último dianan aki yega nan culminacion n’e guera di Armagedon, lo e trece alivio i bendicion eterno pa hende temeroso di Dios.—Salmo 72:2, 4, 7, 12-14.

34. (a) Con “e egipcionan” lo siña conocé Jehova, i ki sacrificio i regalo nan lo dun’é? (b) Na ki tempu Jehova lo dal “Egipto” un golpi, i ki curacion lo sigui despues di esei?

³⁴ Miéntras tantu, ta e boluntad di Dios pa tur clase di persona gana conocimentu exacto i ser salbá. (1 Timoteo 2:4) P’esei, Isaías ta skirbi: “Jehova sigur lo bira conocí pa e egipcionan; i e egipcionan tin cu conocé Jehova riba e dia ei, i nan tin cu ofrecé sacrificio i regalo i tin cu haci un voto na Jehova i pagu’é. I Jehova sigur lo dal Egipto un golpi. Lo tin dalmentu di un golpi i un curamentu; i nan tin cu bolbe bek na Jehova, i lo e tin cu laga nan rogu’é i tin cu cura nan.” (Isaías 19:21, 22) Hende di tur nacion dje mundu di Satanas, “egipcionan” individual, ta siña conocé Jehova i ta ofrecé como sacrificio na dje, “e fruta di lipnan cu ta haci declaracion público di su nomber.” (Hebreonan 13:15) Nan ta haci un voto na Jehova dor di dedicá nan mes na dje, i nan ta paga nan voto dor di sirbié lealmente henter nan bida. Despues dje “golpi” cu Jehova lo dal e sistema di cosnan aki na Armagedon, lo e usa su Reino pa cura humanidad. Durante Jesus su Reinado di Mil Aña, lo elevá humanidad na perfeccion spiritual, mental, moral i físico—un berdadero curacion!—Revelacion 22:1, 2.

“Bendicioná Sea Mi Pueblo”

35, 36. Como cumplimentu di Isaías 19:23-25, ki coneccion a bin existí den tempu antiguo entre Egipto, Asiria i Israel?

³⁵ Anto e profeta ta premirá un desaroyo notabel: “Riba e dia ei lo yega di tin un caminda grandi for di Egipto pa Asiria, i Asiria realmente lo drenta Egipto, i Egipto den Asiria; i nan sigur lo rindi sirbishi, Egipto cu Asiria. Riba e dia ei Israel lo bira e di tres huntu cu Egipto i cu Asiria, esta, un bendicion meimei di tera, pasobra Jehova di ehércitonan lo a bendicion’é, bisando: ‘Bendicioná sea mi pueblo, Egipto, i e obra di mi man, Asiria, i mi herencia, Israel.’” (Isaías 19:23-25) Sí, lo yega e dia cu lo tin un relacion di amistad entre Egipto cu Asiria. Con asina?

³⁶ Den pasado, ora Jehova a rescatá su pueblo for dje nacionnan, el a traha, na moda di papia, camindanan grandi pa nan cu ta hiba na libertad. (Isaías 11:16; 35:8-10; 49:11-13; Jeremías 31:21) Un cumplimentu limitá dje profecia aki a tuma lugá despues dje derota di Babilonia ora a saca exiliadonan for di Asiria i Egipto, i tambe for di Babilonia, hiba nan bek n’e Tera Primintí. (Isaías 11:11) Pero kico dje tempu actual?

37. Den ki manera miyones di hende awe ta biba como si fuera tin un caminda grandi entre “Asiria” cu “Egipto”?

³⁷ Awe, e resto ungí di israelita spiritual ta “un bendicion meimei di tera.” Nan ta promové adoracion berdadero i ta declará e mensahe di Reino na hende den tur nacion. Algun dje nacionnan aki ta manera Asiria, cu característica militar fuerte. Otronan ta mas liberal, kisas manera Egipto, cu un tempu tabata “e rey di zuid” den e profecia di Daniel. (Daniel 11:5, 8) Miyones di persona tantu for dje nacionnan militarista como esnan mas liberal a subi e caminda di adoracion berdadero. Dje manera ei, hende di tur nacion ta “rindi sirbishi” unidamente. No tin division nacionalista den esakinan. Nan stima otro, i por bisa berdad cu ‘Asiria ta drenta Egipto i Egipto den Asiria.’ Ta como si fuera tin un caminda grandi cu ta comunicá e dos nacionnan cu otro.—1 Pedro 2:17.

38. (a) Con Israel “lo bira e di tres huntu cu Egipto i cu Asiria”? (b) Pakico Jehova ta bisa: “Bendicioná sea mi pueblo”?

³⁸ Pero con Israel “lo bira e di tres huntu cu Egipto i cu Asiria”? Na cuminsamentu di “e tempu di fin,” mayoria hende cu a sirbi Jehova riba tera tabata miembro di “e Israel di Dios.” (Daniel 12:9; Galationan 6:16) Desde e añanan ’30 di siglo 20, a surgi un multitud grandi di “otro carné,” cu un speransa terenal. (Juan 10:16a; Revelacion 7:9) Saliendo for di tur nacion—prefigurá pa Egipto cu Asiria—nan ta basha bai na Jehova su cas di adoracion i ta invitá otronan pa djoin nan. (Isaías 2:2-4) Nan ta haci e mésun trabou di predicá cu nan rumannan ungí, nan ta wanta pruebanan similar, ta manifestá e mésun fieldad i integridad, i ta come n’e mésun mesa spiritual. Definitivamente, e ungínan i e ‘otro carnénan’ ta forma “un solo tou, un solo wardador.” (Juan 10:16b) Mirando nan celo i perseverancia, ken por duda cu Jehova ta contentu cu nan actividad? Nada straño cu e ta bendicioná nan cu e palabranan: “Bendicioná sea mi pueblo”!

[Nota]

[Plachi na página 191]

Guereronan filisteo ta atacá nan enemigunan (relieve egipcio di siglo 12 P.E.C.)

[Plachi na página 192]

Relieve den piedra di un guerero of dios moabita (entre siglo 11 i 8 P.E.C.)

[Plachi na página 196]

Guerero sirio riba lomba di kamel (siglo 9 P.E.C.)

[Plachi na página 198]

E “laman” di humanidad rebelde ta generá malcontentu i revolucion

[Plachi na página 203]

E sacerdotenan di Egipto no por a igualá Jehova su poder