Bo Ta Resisti E Spiritu Di Mundo?

“Nos a recibi, no e spiritu di mundo, sino e spiritu cu ta di Dios.” ​—⁠1 CORINTIO 2:⁠12.

DURANTE un anochi frescu den December di 1984, algo escandaloso a sosode den Bhopal, India. Den e stad, tin un planta químico, i riba e anochi ei den December, un ventiel no a funciona den un tanki di warda gas. Di ripiente, tonelada di isocianato metilo a cuminza sali na laira. E bientu a hibé i e gas fatal a yena cas i a tapa famía drumí. E cantidad di hende cu a muri tabata miles, i hopi mas tabata mancá. E tabata e accidente industrial di mas malu te ne tempo ei.

² Hende a lamenta ora nan a tende di Bhopal. Pero, aunque esei tabata fatal, e gas cu a sali ei a mata hopi menos hende cu ta ser matá spiritualmente pa un “gas” cu hende rond di mundo ta traga tur dia. E Bijbel ta yamé “e spiritu di mundo.” Esei ta e atmósfera fatal cu apóstol Pablo a pone na contraste cu e spiritu di Dios ora el a bisa: “Awor nos a recibi, no e spiritu di mundo, sino e spiritu cu ta bini di Dios, pa nos conoce e cosnan cu Dios bondadosamente a dúnanos.”​—⁠1 Corintio 2:⁠12.

³ Exactamente kico ta “e spiritu di mundo”? Segun e diccionario The New Thayer’s Greek English Lexicon of the New Testament, un nificacion general dje palabra “spiritu” (griego, pneuʹma) ta “e disposicion of influencia cu ta yena i ta goberna e alma di hende.” Hende por tin un disposicion of genio bon of malu. (Salmo 51:10; 2 Timoteo 4:22) També, un grupo di hende por tin un spiritu, of disposicion dominante. Apóstol Pablo a skirbi su amigo Filemón: “E bondad inmerecida di Señor Jesucristo sea cu e spiritu cu boso ta mustra.” (Filemón 25) Di igual manera​—⁠pero na un escala hopi mas grandi​—⁠e mundo en general tin un disposicion predominante, i esei ta “e spiritu di mundo” cu Pablo a menciona. Segun Word Studies in the New Testament di Vincent, “e frase kier men e principio di maldad cu ta motiva e mundo no regenerá.” Esei ta e tendencia pecaminoso cu ta penetra e pensamento di mundo i ta afecta fuertemente e manera cu hende ta anda.

⁴ Tal spiritu ta venenoso. Pakico? Pasobra e ta bini dje “gobernante di mundo,” Satanás. Realmente, Satanás ta ser yamá “e gobernante di autoridad di laira, e spiritu cu ta obra awor den e yiunan di desobedencia.” (Juan 12:31; Efesio 2:⁠2) Ta difícil pa scapa for di tal “aire,” of “spiritu cu ta obra awor den e yiunan di desobedencia.” E ta den tur parti dje arreglo social di hende. Si nos ta tragué, nos ta cuminza adopta su actitud, su meta. E spiritu di mundo ta estimula ‘bibando conforme cu e carni,’ es decir, di acuerdo cu nos imperfeccion pecaminoso. E ta fatal, “pasobra si boso ta biba di acuerdo cu e carni boso lo muri siguramente.”​—⁠Romano 8:⁠13.

Evitando e spiritu di mundo

⁵ Durante e desaster di Bhopal, alarma i e holor fuerte di gas a lanta un Testigo di Jehova. Sin tarda el a lanta su famía i a bai lihé na caya. Parando un rato pa determina e direccion dje bientu, el a lucha pa pasa door dje multitud confundí i a hiba su famía ne punta di un ceru pafó dje stad. Ei nan por a yena nan pulmón cu aire frescu i limpi cu a bini di un lagún cerca nan.

⁶ Tin un terreno halto cu nos por subi pa haya refugio for dje “aire” venenoso dje mundo aki? E Bijbel ta bisa cu sí. Mirando den futuro te na nos dia, profeta Isaías a skirbi: “Mester sosode den e parti final dje dianan cu e montaña dje cas di Jehova lo ser establecí firmemente mas halto cu montañanan, i siguramente lo ser hizá mas halto cu ceru; i tur nacion tin cu corre cerca dje. I hopi hende siguramente lo bai i bisa: ‘Bam, láganos subi cerca e montaña di Jehova, cerca e cas di e Dios di Jacob; i lo e instruínos tocante su camina, i nos lo camna den su berea.’ Pasobra ley lo sali for di Sion, i e palabra di Jehova for di Jerusalem.” (Isaías 2:​2, 3) E lugar halto di e adoracion puro, e lugar elevá, e “montaña dje cas di Jehova,” ta e único sitio riba e planeta aki liber dje spiritu di mundo sofocante i venenoso. Esei ta e lugar unda e spiritu di Jehova ta plama libremente den fiel hende cristian.

⁷ Hopi hende cu na antes tabata traga e spiritu di mundo ta disfruta di un alivio similar cu loke e Testigo di Jehova den Bhopal a experimenta. Despues di menciona e “yiunan di desobedencia” cu ta traga e aire, of spiritu, di mundo, apóstol Pablo a bisa: “Den nan nos tur na un tempo a comportános na armonía cu deseo di nos carni, haciendo loke tabata e boluntad di carni i di pensamento, i nos naturalmente tabata yiu di rabia mescos cu e otronan. Pero Dios, cu ta ricu den misericordia, pa su gran stimacion cu locual el a stímanos, a hácinos biba hunto cu Cristo.” (Efesio 2:​3-5) Hende cu ta traga solamente e aire venenoso dje sistema di cosnan aki ta morto den un sentido spiritual. Sin embargo, gracias na Jehova Dios, miyones di hende djawe ta hui ne terreno spiritual halto i ta scapa for di tal estado fatal.

Manifestacion di “spiritu di mundo”

⁸ E aire fatal di Satanás ta tur rond di nos ainda. Nos tin cu keda vigilante i nunca laga e corriente rebahános di nobo ne mundo, kizás pa ser chocá spiritualmente. Esei ta exigi vigilancia constante. (Lucas 21:36; 1 Corintio 16:13) Por ehempel, tuma e echo aki na cuenta. Tur hende cristian ta conoce ley di Jehova Dios tocante moralidad i nunca lo pónenan di acuerdo di cu costumber impuro tal como adulterio, fornicacion, i homosexualidad ta aceptabel. Sin embargo, tur aña rond di 40.000 hende ta ser expulsá for dje organizacion di Jehova Dios. Pakico? Den hopi caso debí ne mesun costumber impuro. Con esei por sosode?

⁹ Pasobra nos tur ta imperfecto. E carni ta swak, i nos tin cu lucha constantemente contra mal inclinacion cu ta presenta den nos curazón. (Eclesiastés 7:20; Jeremías 17:⁠9) Sin embargo, tal mal inclinacion ta ser instigá pe spiritu di mundo. Hopi hende di mundo no ta mira nada malu den inmoralidad, i e idea di cu tur cos ta permití ta un parti dje inclinacion mental dje sistema di cosnan di Satanás. Si nos ta keda na contacto cu tal pensamento, sí, tin un posibilidad fuerte cu nos lo cuminza pensa mescos cu e mundo. Pronto, tal pensamento impuro por produci mal deseo cu lo termina den picá serio. (Santiago 1:​14, 15) Nos por dwal for dje montaña di e adoracion puro di Jehova Dios i rebaha den riol contaminá dje mundo di Satanás. Ningun hende cu ta keda ei boluntariamente lo hereda bida eterna.​—⁠Efesio 5:​3-5, 7.

¹⁰ E spiritu di mundo ta keda visibel tur rond di nos. Por ehempel, hopi hende tin un actitud insolente i sarcástico tocante bida. Ya cu nan ta keda desilusioná debí na hende político corrupto of incompetente i debí na lider religioso inmoral i golós pa placa, nan ta papia sin respet asta tocante cosnan serio. Hende cristian ta resisti tal tendencia. Aunque nos por tin un sentido di humor saludable, nos ta evita di trece den e congregacion un spiritu sarcástico faltando respet. E papiamento di hende cristian ta refleha temor di Jehova Dios i pureza di curazón. (Santiago 3:​10, 11; compara cu Proverbio 6:14.) Sea cu nos ta hoven of bieu, nos papiamento mester “semper sea cu gracia sazoná cu salu, afin di sa con [nos] mester duna contesta un na otro.”​—⁠Colosense 4:⁠6.

¹¹ Un otro inclinacion común cu ta refleha e spiritu di mundo ta odio. E mundo ta partí pa motibo di odio i gera fundá ariba diferencia di raza, di pueblo, di nacion, i asta diferencia personal. Cosnan ta cuanto mas mihor unda e spiritu di Dios ta activo! Apóstol Pablo a skirbi: “No paga malu cu malu na ningun hende. Percura cosnan excelente den bista di tur hende. Si ta posibel, tanto como ta depende di boso, keda na paz cu tur hende. No vinga boso, stimánan, sino laga lugar pe rabia; pasobra ta pará skirbí: ‘Vinganza ta di mi; lo mi paga, Jehova ta bisa.’ Pero, ‘si bo enemigo tin hamber, duné cuminda; si e tin sed, duné algo di bebe; pasobra haciendo asina bo por montona piedra di candela riba su cabez.’ No laga malu vencébo, sino sigi vence malu cu bon.”​—⁠Romano 12:​17-21.

¹² E spiritu di mundo també ta estimula materialismo. Bao di influencia dje mundo di comercio, wowo di hopi hende ta keda yená cu aparato di mas reciente, moda di mas reciente, i auto di mas reciente. Nan ta keda catibo di “deseo di wowo.” (1 Juan 2:16) E mayoría ta midi nan éxito den bida cu e tamaño di nan cas of e cantidad di placa den e banco. Hende cristian, respirando e aire spiritual limpi dje montaña halto dje adoracion puro di Jehova Dios, ta resisti tal inclinacion. Nan sa cu dedicacion na sigimento tras di cosnan material por ta desastroso. (1 Timoteo 6:​9, 10) Jesús a haci su disípelnan corda: “Asta ora hende tin abundancia, nan bida no ta resulta di loke nan tini.”​—⁠Lucas 12:⁠15.

¹³ Tin otro manifestacion dje “aire” insaludable di mundo. Un manifestacion ta e spiritu di rebeldía. (2 Timoteo 3:​1-3) Bo a ripara cu hopi hende no ta coopera mas cu hende di autoridad? Bo a ripara cu den bo trabao seglar tin un costumber na tur parti di no traha amenos cu un persona realmente ta wak? Cuanto hende bo ta conoce cu a viola ley​—⁠kizás no a paga belasting of a horta cos na nan lugar di empleo? Si bo ta bai scol ainda, bo nunca a keda desanimá di haci bo posibel pasobra compañé di scol ta desprecia esnan cu tin bon éxito den klas? Tur esei ta manifestacion di spiritu di mundo cu hende cristian mester resisti.

Con pa resisti e spiritu di mundo

¹⁴ Sin embargo, con nos por resisti e spiritu di mundo ya cu nos realmente ta biba den e mundo? Nos tin cu corda cu no ta importa unda ta sosode cu nos tá física of spiritualmente, nos no ta parti di mundo. (Juan 17:​15, 16) Nos meta no ta meta di mundo. Nos punto di bista di cosnan ta diferente. Nos ta hende spiritual, papiando i pensando “no cu palabra cu sabiduría humano a siña, sino cu palabra cu e spiritu a siña, mientras cu nos ta combina asunto spiritual cu palabra spiritual.”​—⁠1 Corintio 2:⁠13.

¹⁵ Kico hende por haci si nan ta háyanan den un becindario contaminá cu gas venenoso? Nan por bisti un máscara di gas conectá cu un tanki di aire limpi, of nan por bandoná e becindario físicamente. E manera pa evita aire di Satanás ta combina e dos método. Tanto como ta posibel, nos ta purba di alehános físicamente for di cualkier cos cu ta haci posibel pe spiritu di mundo afecta nos pensamento. Asina, nos ta evita mal asociacion, i nos no ta pónenos na contacto cu ningun sorto di diverticion cu ta promove violencia, inmoralidad, spiritismo, rebelion, of cualkier otro obra di carni. (Galatio 5:​19-21) Pero, siendo cu nos ta biba den mundo, nos no por henteramente evita contacto cu tal cosnan. Pues, nos ta haci cos sabí si nos ta conectános cu un tanki di aire frescu spiritual. Nos ta yena nos pulmón spiritual, den un sentido, den asistencia na reunion cu regularidad, den estudio personal, den actividad i asociacion cristian, i oracion. Dje manera ei, si algun aire di Satanás ta lek den nos pulmón spiritual, e spiritu di Dios ta fortalecénos pa rechazé.​—⁠Salmo 17:​1-3; Proverbio 9:9; 13:20; 19:20; 22:⁠17.

¹⁶ E spiritu di Dios ta transforma hende cristian na un persona cu ta keda destacá como diferente cu hende cu ta parti di mundo. (Romano 12:​1, 2) Pablo a bisa: “Fruta di spiritu ta amor, gozo, paz, gran pacenshi, bondad, husticia, fe, suavidad, dominio propio. No tin ley contra tal cosnan.” (Galatio 5:​22, 23) E spiritu di Dios també ta duna hende cristian un comprendimento mas profundo di cosnan. Pablo a bisa: “Ningun hende a yega di conoce e cosnan di Dios, sino e spiritu di Dios.” (1 Corintio 2:11) Generalmente, “cosnan di Dios” ta inclui berdad tal como e sacrificio di rescate, e Reino di Dios bao di Jesucristo, e speranza di bida eterna, i e kitamento pronto dje mundo malbado. Cu e yudanza dje spiritu di Dios, hende cristian ta conoce i ta acepta cosnan asina como e berdad, i esei ta haci nan punto di bista di bida diferente cu e punto di bista di hende di mundo. Nan ta keda contentu pa haya nan gozo den e sirbishi di Jehova Dios awor, cu e prospecto di sirbié pa eternidad den futuro.

¹⁷ Jesús tabata un ehempel superlativo pa hende cu ta resisti e spiritu di mundo. Pronto despues dje bautismo di Jesús, Satanás a purba di hibé for dje sirbishi di Jehova, presentando tres tentacion. (Mateo 4:​1-11) E tentacion final a enbolbe e posibilidad cu Jesús por alcanza gobernacion di henter e mundo pe prijs di un solo acto di adoracion di Satanás. Jesús por a razona: ‘Wel, lo mi haci un solo acto di adoracion, anto despues di recibi gobernacion di mundo, lo mi arrepenti i bolbe ne adoracion di Jehova. Como gobernante di mundo, lo mi tin un posicion hopi mas mihor pa beneficiá humanidad cu loke mi tin awor como carpinté di Nazaret.’ Jesús no a razona asina. El a keda dispuesto pa spera te cu Jehova Dios a duné gobernacion di mundo. (Salmo 2:⁠8) Na e ocasion ei, i na tur otro ocasion den su bida, el a resisti e influencia venenoso dje aire di Satanás. Asina, el a vence e mundo contaminá spiritualmente.​—⁠Juan 16:⁠33.

¹⁸ Apóstol Pedro a bisa cu nos mester sigi e pasonan di Jesús cu sumo cuidao i atencion. (1 Pedro 2:21) Cua mihor ehempel nos por haya? Den e último dianan aki, bao di influencia di spiritu di mundo, hende ta rebaha mas i mas hundo den degradacion. Ta ki un cos maraviyoso cu den un mundo asina, e lugar halto dje adoracion di Jehova Dios ta keda destacá como puro i limpi! (Miqueas 4:​1, 2) Siguramente, e poder dje spiritu di Dios ta keda bisto pasobra miyones di hende ta corre cerca e lugar di adoracion di Dios, resistiendo e spiritu di mundo cu ta penetra na tur parti, i ta duna onor i alabanza na Jehova Dios! (1 Pedro 2:​11, 12) Láganos tur keda determiná di permanece den e lugar halto te cu e Rey ungí di Jehova Dios ta elimina e mundo malbado i ta tira den abismo Satanás e Diabel i demoño di dje. (Revelacion 19:​19–20:⁠3) Anto, e spiritu di mundo lo no existi mas. Ki bendicion lo tin den e tempo ei!

[Study Questions]

1, 2. Cua tragedia enbolbiendo gas venenoso a sosode den Bhopal, India, pero cua “gas” mas fatal hende ta traga rond di mundo?

3. Kico ta e “spiritu di mundo”?

4. Ken ta e fuente dje spiritu di mundo, i tal spiritu ta tene ki efecto riba hende?

5. Con un Testigo di Jehova a reacciona sábiamente durante e desaster den Bhopal?

6. Unda nos por bai pa scapa for di spiritu di mundo?

7. Con hopi hende a wordu salbá for di spiritu di mundo?

8, 9. (a) Kico ta mustra cu nos mester vigila constantemente contra e spiritu di mundo? (b) Con e spiritu di Satanás por corrumpínos?

10. Cua ta un manifestacion dje aire di Satanás, i pakico hende cristian mester evita esei?

11. (a) Menciona e segundo aspecto dje spiritu di mundo. (b) Pakico hende cristian ta diferente cu hende cu ta refleha tal aspecto?

12. Pakico hende cristian ta evita materialismo?

13. Menciona algun otro aspecto di spiritu di mundo.

14. Di ki manera hende cristian ta diferente cu hende no cristian?

15. Con nos por resisti e spiritu di mundo?

16. Con nos ta duna evidencia di cu nos tin e spiritu di Dios?

17. Ken a pone ehempel superlativo resistiendo e spiritu di mundo, i di ki manera?

18. Con nos resistencia contra e spiritu di mundo ta duna alabanza na Dios?

[Caption on page 16]

E spiritu di mundo ta di Satanás

[Caption on page 17]

Pa evita e spiritu di mundo, hui ne lugar halto dje adoracion di Jehova Dios

[Caption on page 19]

Bo por splica?

◻ Kico ta e spiritu di mundo?

◻ E spiritu di mundo ta tene cua efecto riba hende?

◻ Cua ta algun manifestacion dje spiritu di mundo, i con nos por evité?

◻ Con nos ta mustra cu nos tin e spiritu di Dios?

◻ Hende cu ta resisti e spiritu di mundo ta recibi cua bendicion?