Na Cua Mesa Bo Ta Come?

“Boso no por participa dje ‘mesa di Jehova’ i di mesa di demoño.” ​—⁠1 CORINTIO 10:⁠21.

TAL palabra inspirá di apóstol Pablo ta mustra cu tin dos mesa simbólico dilanti humanidad. Cada mesa ta ser identificá via e clase di cuminda simbólico poní riba dje, i nos tur ta come na un mesa of ne otro. Sin embargo, si nos kier agrada Dios, nos no por come na su mesa i alabez participa na scondí di mesa di demoño. Apóstol Pablo a duna e spiertamento: “Loke e nacionan ta sacrifica, nan ta sacrifica pa demoño, i no pa Dios; i mi no kier pa boso bira participante cu demoño. Boso no por bebe dje copa di Jehova i di copa di demoño; boso no por participa dje ‘mesa di Jehova’ i di mesa di demoño.”​—⁠1 Corintio 10:​20, 21.

² E palabra di Pablo ta hácinos corda sacrificio di comunion cu israelita di antigua a ofrece bao di ley di Jehova Dios. E altar di Dios tabata yamá mesa, i segun e ley, hende cu a trece bestia pa ser sacrificá a tene comunion cu Jehova i cu e sacerdotenan. Di ki manera? Di promé, Jehova a participa dje sacrificio pasobra e sanger tabata gesprenkel riba su altar i candela bao dje altar a consumi e vet. Di dos, sacerdote a participa pasobra e (i su famía) a come e pecho i pia drechi hazá dje bestia sacrificá. I di tres, hende cu a ofrece e sacrificio a participa comiendo e resto dje bestia. (Levítico 7:​11-36) Awe, participacion dje mesa di Jehova kier men cu nos ta rindi na dje e clase di adoracion cu e ta exigi, conforme cu ehempel di Jesús i su apóstolnan. Pa haci esei, nos tin cu come spiritualmente loke Jehova Dios ta percura mediante su Palabra i organizacion. Israelita cu a disfruta di un comunion special cu Jehova na su mesa, tabata prohibí di ofrece sacrificio na demoño na nan mesa. Israelita spiritual i nan compañénan, e “otro carnénan,” ta bao dje mesun prohibicion divino.​—⁠Juan 10:16.

³ Con hende por ta culpable di comemento na mesa di demoño den nos tempo? Door di duna apoyo na cualkier cos contrario cu Jehova Dios. E mesa di demoño ta inclui tur propaganda demoniaco, locual tin e propósito di desviá i apartános foi Jehova Dios. Ken kier alimenta nan curazón i mente cu tal veneno? Cristian berdadero ta nenga di participa di sacrificio cu e mayoría ta ofrece awe ne dios di gera i riqueza.​—⁠Mateo 6:⁠24.

Evita “e mesa di demoño”

⁴ E pregunta cu ta enfrenta nos tur tá, Mi ta come na cua mesa? Nos no por scapa for dje echo di cu nos ta keda obligá di come na un mesa of ne otro. (Compara cu Mateo 12:30.) Cu conocimento nos no kier come na mesa di demoño. Hacimento di esei ta hácinos perde e fabor dje único Dios bibo i berdadero, Jehova Dios. En cambio, comemento di cuminda ne mesa di Jehova so ta resulta den bida eterna den felicidad! (Juan 17:⁠3) Un refrán ta bisa cu hende ta consisti di loke nan ta come. Pues, ken cu kier mantene bon salud fisical i mental tin cu vigila loke nan ta come. Mescos cu cuminda sin balor yen di vet, aunque e ta prepará cu bon sabor cu químico agregá, e no ta contribui na nos salud fisical continuo, p’sei e propaganda di mundo enlazá cu idea di demoño ta cuminda simbólico malu i sin balor cu por corrumpi nos mente.

⁵ Apóstol Pablo a profetiza cu durante e último dianan, “siñanza di demoño” lo desviá hende. (1 Timoteo 4:⁠1) Tal siñanza demoniaco no ta ser hayá den kerimento religioso falso so sino també ta ser plamá na tur parti di otro manera. Por ehempel, nos tin cu analiza i considera cua buki i revista nos i nos yiunan ta leza, cua programa di television nos ta mira, i cua comedia i película nos ta wak. (Proverbio 14:15) Si nos ta divertínos den lezamento di fantasía, e ta contene violencia estúpido, relacion sexual inmoral, of práctica di spiritismo? Si nos ta leza buki cu no ta fantasía pa haya instruccion, e ta siña filosofía of un moda di biba cu “no ta di acuerdo cu Cristo”? (Colosense 2:⁠8) E ta presenta speculacion bano, of ta boga pa enbolbemento den movimento social di mundo? E ta cria determinacion di ser mashá ricu? (1 Timoteo 6:⁠9) E ta un publicacion cu ta presenta astutamente siñanza desunificador cu no ta cristian? Si e contesta ta sí, i nos ta sigi leza of repasa tal informacion, nos ta corre e rísico di come na mesa di demoño. Awe, tin cientos di miles di publicacion cu ta promove filosofía di mundo cu ta parce tanto iluminá i al tanto. (Eclesiastés 12:12) Pero ningun propaganda asina ta realmente nobo; ni tampoco e no ta obra pa bo beneficio i mehoramento, no mas cu loke Satanás a bisa astutamente na Eva a obra pa su mehoramento.​—⁠2 Corintio 11:⁠3.

⁶ P’sei, ora Satanás ta invitános pa purba su cuminda demoniaco sin balor, con nos mester reacciona? Mescos cu Jesús ora Satanás a tenté pa haci piedra bira pan. Jesús a contestá: “Ta pará skirbí, ‘Hende mester biba, no di pan so, sino di tur palabra cu ta sali for di boca di Jehova.’ ” I ora e Diabel a ofrece Jesús “tur reino di mundo i nan gloria” si e cai abao i rindi un acto di adoracion na Satanás, Jesús a responde: “Bai djaki, Satanás! Pasobra ta pará skirbí, ‘Ta Jehova bo Dios bo mester adora, i na ne so bo mester rindi sirbishi sagrado.’ ”​—⁠Mateo 4:​3, 4, 8-10.

⁷ Nunca por tin reconciliacion entre e mesa di Jehova i e mesa cu enemigo demoniaco di dje ta pone! Ai sí, hende a purba esei caba. Corda israelita di antigua den e tempo di profeta Elías. E pueblo a bisa cu nan tabata adora Jehova Dios, pero nan a kere cu otro dios, tal como Baal, a priminti prosperidad. Elías a yega cerca e pueblo i a puntra: “Pa cuanto tempo boso lo coha riba dos opinion distinto? Si Jehova ta e Dios berdadero, bai sigié; pero si ta Baal, bai sigié.” Innengablemente israelita tabata coha “promé riba un pia anto riba e otro.” (1 Rey 18:21; The Jerusalem Bible) Elías a desafiá sacerdote di Baal pa duna prueba cu nan dios realmente tabata un dios. E Dios cu por a manda candela foi cielo riba un sacrificio ta duna prueba cu e ta e Dios berdadero. Apesar di hopi esfuerzo, sacerdote di Baal a faya. Anto Elías a pidi senciyamente: “Ai Jehova, contestámi, pe pueblo aki sa cu abo, Jehova, ta e Dios berdadero.” Un bez candela di Jehova a baha foi cielo i a consumi e sacrificio di un animal papa muhá. Emocioná cu e demonstracion convenciente di cu Jehova ta Dios, e pueblo a obedece Elías i a mata tur 450 profeta di Baal. (1 Rey 18:​24-40) Awe també, nos tin cu reconoce Jehova como e Dios berdadero i decisivamente cuminza come na su mesa so si nos no ta haci esei caba.

‘Esclabo fiel’ ta sirbi ne mesa di Jehova

⁸ Señor Jesucristo a profetiza cu durante su presencia un “esclabo fiel i prudente” lo percura alimento spiritual pa disípel di dje: “E esclabo ei ta feliz si su doño yegando ta hayé haciendo esei. En berdad mi ta bisa boso, Lo e nombré riba tur loke ta di dje.” (Mateo 24:​45-47) Tal esclabo a resulta di ser, no un solo persona, sino un grupo di hende cristian dedicá i ungí. E grupo ta pone riba e mesa di Jehova e alimento spiritual di mas excelente tanto pe resto ungí como pe multitud grandi. Awor na total di mas cu cuater miyón, e “multitud grandi” ta tuma nan decision hunto cu e resto ungí apoyando e soberanía universal di Jehova Dios i su Reino cu lo e usa pa santifica su nomber santo.​—⁠Revelacion 7:​9-17.

⁹ E grupo di esclabo fiel ta usa e Sociedad Watch Tower Bible and Tract pa percura alimento spiritual pa tur Testigo di Jehova. Mientras cu cristiandad i tur otro parti dje sistema di cosnan aki ta muri di hamber pa falta di alimento spiritual dunador di bida, e pueblo di Jehova Dios ta banqueteá. (Amós 8:11) Esei ta na cumplimento dje profecía den Isaías 25:6: “Jehova di ehército siguramente lo pone pa tur e pueblo, den e montaña aki, un banquete di plato cu hopi azeta, un banquete di biña bon getrek, di plato cu hopi azeta yen di tuti, di biña bon getrek, colá.” Manera versículo 7 i 8 ta mustra, e fiesta lo sigi pa semper. Esei ta ki un bendicion pa tur e organizacion visibel di Jehova Dios awor, i lo sigi ser ki un bendicion den e futuro!

Cuidao cu cuminda venenoso riba mesa di demoño

¹⁰ Cuminda riba e mesa di demoño ta venenoso. Por ehempel, considera e cuminda cu e grupo di esclabo malu i hende apóstata ta percura. E no ta alimenta ni edifica; e no ta saludable. E no por ta, pasobra hende apóstata a bandona e alimento dje mesa di Jehova. Como resultado, loke nan a desaroya di un personalidad nobo a bai. Loke ta motivánan no ta e spiritu santo, sino ta amargura sterki. Nan ta keda preocupá cu un solo doel​—⁠e batimento di otro esclabo, nan compañénan di antes, manera Jesús a profetiza.​—⁠Mateo 24:​48, 49.

¹¹ Por ehempel, leu atrás na 1909, C. T. Russell, e presidente dje Sociedad Watch Tower dje tempo ei, a skirbi tocante hende cu ta bandona e mesa di Jehova Dios, anto ta cuminza maltrata otro esclabo, nan compañénan di antes. The Watch Tower di 1 di October di 1909, a bisa: “Tur hende cu ta bandona e Sociedad i su trabao, en bez di prospera of edifica otronan den e fe i den e desaroyo di fruta di spiritu, ta parce di haci net lo contrario​—⁠nan ta purba di perhudica e Causa cu nan a sirbi na antes, i, cu mas boroto of cu menos, ta desparce gradualmente, perhudicando solamente nan mes i otro hende cu tin un spiritu di contencion similar. . . . Si algun hende ta kere cu nan por haya cuminda tanto bon of mihor riba otro mesa, of cu nan mes por produci cuminda tanto bon of mihor​—⁠láganan sigi nan camina. . . . Pero, aunque nos ta laga otronan bai unda cu nan kier of na tur parti pa haya cuminda i luz pa nan satisfaccion, ta straño cu hende cu ta bira nos opositor ta scoge un camina mashá diferente. En bez di bisa na moda baronil di mundo, ‘Mi a haya algo cu mi ta prefera; ayó!’ nan ta manifesta rabia, malicia, odio, contencion, ‘obra di carni i di diabel’ te na un grado cu nos nunca a mira hende di mundo manifesta. Nan ta parce di ser contaminá cu locura, un maleza satánico. Algun di nan ta dal nos, anto ta bisa cu nos a dal nan. Nan ta cla pa bisa i skirbi falsedad i rebaha nan mes pa comete malicia.”

¹² Sí, hende apóstata ta publica literatura cu ta usa perversidad, loke ta mitá berdad, i falsedad abierto. Nan asta ta carga poster di propaganda contra nos na asamblea di Testigo di Jehova, purbando di coge esnan indiferente den trampa. Pues, ta peligroso pa permiti nos curiosidad conmovénos pa alimentá nos mente cu tal skirbimento of scucha nan palabra abusivo! Aunque nos no por kere cu esei ta un rísico pa nos personalmente, e ta peligroso toch. Pakico? Entre otro cosnan, algun literatura apóstata ta presenta falsedad usando “labiamento” i “palabra falso.” (Romano 16:​17, 18; 2 Pedro 2:⁠3) Esei no ta loke bo ta spera riba mesa di demoño? I aunque hende apóstata por presenta cierto echo també, eseinan generalmente no ta den nan contexto pe propósito di aleha otro hende for dje mesa di Jehova Dios. Tur nan skirbimento simplemente ta critica i ta kibra! Nada ta edificante.

¹³ Jesús a bisa: “Boso por conocénan pa nan fruta.” (Mateo 7:16) Pues, kico ta e fruta di hende apóstata i nan publicacion? Cuater cos ta identifica nan propaganda. (1) Astucia. Efesio 4:14 ta bisa cu nan ta usa “astucia den invento di error.” (2) Inteligencia orguyoso. (3) Falta di amor. (4) Falta di onradez den varios forma. Esei ta precisamente ingrediente dje cuminda cu ta riba mesa di demoño, tur locual tin e propósito di destrui e fe dje pueblo di Jehova Dios.

¹⁴ I tin un otro aspecto. Hende apóstata a bolbe na kico? Den hopi caso, nan a bolbe drenta den e scuridad di cristiandad i su doctrina, tal como e creencia di cu tur hende cristian ta bai cielo. Además, e mayoría di nan no ta tuma un posicion bíblico firme mas tocante sanger, tocante neutralidad, i e necesidad di duna testimonio tocante e Reino di Dios. Pero, nos cu a scapa for dje scuridad di Babilonia e Grandi, nunca kier bolbe na dje. (Revelacion 18:​2, 4) Como sirbidor leal di Jehova Dios, pakico nos kier tira un bista riba propaganda publicá pa hende cu ta rechaza e mesa di Jehova Dios locual awor ta bati verbalmente esnan cu ta yúdanos recibi “palabra saludable”?​—⁠2 Timoteo 1:⁠13.

¹⁵ Algun hende por ta curioso tocante acusacion cu hende apóstata ta haci. Pero, nos mester tuma na pecho e principio den Deuteronomio 12:​30, 31. Den dje Jehova mediante Moisés a duna spiertamento na israelita tocante kico pa evita despues cu nan a saca habitante pagano for dje Tera Primintí. “Tene cuidao pa miedu di ser entrampá tras di nan, despues cu nan a ser exterminá di dilanti bo, i pa miedu di puntra tocante nan diosnan, bisando, ‘Cua costumber e nacionan tabatin sirbiendo nan diosnan? I ami, sí, ami, lo haci mescos.’ Bo no mag haci asina cu Jehova bo Dios.” Sí, Jehova Dios sa con curiosidad di hende ta traha. Corda Eva, i també esposa di Lot! (Lucas 17:32; 1 Timoteo 2:14) Láganos nunca scucha loke hende apóstata ta bisa of ta haci. Mas bien, láganos keda ocupá edificando hende i comiendo lealmente ne mesa di Jehova!

E mesa di Jehova so lo permanece

¹⁶ Pronto, e tribulacion grandi lo yega, sigiendo rápidamente te na su culminacion den “e gera dje gran dia di Dios Todopoderoso.” (Revelacion 16:​14, 16) Lo e yega su colmo ora Jehova ta destrui e sistema di cosnan aki i e mesa simbólico unda nacion di mundo ta come. També, Jehova lo destrui henter e organizacion invisibel di Satanás e Diabel cu su ehército di demoño. Hende cu a sigi come na mesa spiritual di Satanás, e mesa di demoño, lo keda obligá di asisti na un comemento literal, no, no como participante, sino como e plato principal​—⁠pa nan destruccion!​—⁠Mira Ezekiel 39:4; Revelacion 19:​17, 18.

¹⁷ E mesa di Jehova Dios so lo permanece. Hende cu ta come cu aprecio na su mesa lo ser conserbá i lo tene e privilegio di come na dje pa semper. Nunca mas nan lo ta den e peliger di scarcidad di cuminda di ningun sorto. (Salmo 67:6; 72:16) Nan lo sirbi Jehova Dios den Paradijs den salud perfecto! Finalmente e palabra conmovedor di Revelacion 21:4 lo ser cumplí magnificamente: “Lo e seca tur lágrima di nan wowo, i lo no existi morto mas, ni yoramento ni sclamamento ni dolor lo no existi mas. E cosnan anterior a pasa caba.” Pa motibo cu lo no tin oposicion mas, e soberanía universal di Jehova Dios lo prevalece na tur parti pa semper hamás mientras cu fabor divino sin fin ta basha riba humanidad rescatá cu ta ocupá e tera paradísico. Pa gana tal recompensa, laga nos tur keda determiná di participa exclusivamente dje mesa di Jehova, locual ta pasa over cu lo mihor di alimento spiritual!

[Study Questions]

1. Cua mesa ta poní dilanti nos, i apóstol Pablo a duna cua spiertamento tocante nan?

2. (a) Cua mesa di Jehova a existi den e tempo di Israel di antigua, i ken a participa di sacrificio di comunion? (b) Kico participacion dje mesa di Jehova ta nifica awe?

3. Con hende por ser culpable di participacion dje mesa di demoño den nos tempo?

4. Cua pregunta ta enfrenta nos tur, i pakico cu conocimento nos no kier participa di mesa di demoño?

5. Con nos por evita di acepta siñanza di demoño awe?

6. Ora Satanás ta invitános pa purba cuminda demoniaco sin balor, con nos, en efecto, mester reacciona?

7. Pakico nos ta gaña nos mes si nos ta kere cu nos por come cu bon éxito na mesa di Jehova i també na mesa di demoño?

8. Jesús a profetiza cu lo e usa cua esclabo pa alimenta su disípelnan spiritualmente durante su presencia, i cua identificacion e esclabo tin?

9. E grupo di esclabo a usa cua instrumento pa percura alimento spiritual pa Testigo di Jehova, i cua detaye profético ta ser duná di nan banquete spiritual?

10. (a) E grupo di esclabo malu ta percura cua clase di cuminda, i cu cua intencion? (b) Con e grupo di esclabo malu ta trata otro esclabo, nan compañénan di antes?

11. Kico C. T. Russell a skirbi en cuanto scogimento di alimento spiritual, i con el a pinta hende cu ta bandona e mesa di Jehova?

12. (a) Con hende apóstata ta bati otro esclabo? (b) Pakico ta peligroso pa ser curioso i come como alimento e skirbimento di hende apóstata?

13, 14. Hende apóstata i nan propaganda ta produci cua fruta?

15. Cua principio bíblico ta yúdanos sigi e camina sabí ora nos ta tende di acusacion cu hende apóstata ta haci?

16. (a) Kico lo sosode pronto cu Satanás, su demoñonan, i e mesa simbólico unda nacion di mundo ta come? (b) Kico lo sosode tur hende cu ta sigi come na mesa di demoño?

17. Cua bendicion ta bini pa hende cu ta come exclusivamente na mesa di Jehova?

[Caption on page 10]

E mesa di Jehova Dios ta abunda cu lo mihor di alimento spiritual

[Caption on page 13]

Con bo ta contestá?

◻ Con nos por evita gañamento di siñanza di demoño?

◻ Pakico nos no por come cu bon éxito na mesa di Jehova Dios i mesa di demoño?

◻ Hende apóstata ta percura cua clase di cuminda?

◻ Pakico ta peligroso pa ser curioso tocante acusacion di hende apóstata?

◻ Hende apóstata ta produci cua fruta?