Lo Kaba ku Morto, e Último Enemigu

1, 2. Ki sorto di bida Adam ku Eva tabatin na prinsipio, i ki preguntanan ta lanta?

ORA Dios a krea Adam ku Eva, nan no tabatin ningun enemigu. Nan tabata perfekto i tabata biba den un paradeis. Komo yu di e Kreador, nan tabatin un relashon será kuné. (Gén. 2:7-9; Luk. 3:38) E enkargo ku Dios a duna nan a indiká kuantu tempu nan lo a biba. (Lesa Génesis 1:28.) Pa kumpli ku e mandato di “yena e tera” i kultiv’é, nan no tabatin nodi di biba pa semper. Pero pa por a sigui kuida ‘tur ser bibu ku ta move riba tera’ sí nan lo mester a biba pa semper. Adam ku Eva lo por a disfrutá di e tarea akí pa tur eternidat.

² Dikon anto nos situashon ta asina diferente awe? Kon bini nos tin asina tantu enemigu ku ta stroba nos di ta felis? Di unda esun di mas pió, morto, a bini? Kon Dios lo kaba ku e enemigunan akí? Den Beibel nos ta haña kontesta riba e preguntanan akí, i nos lo analisá nan den e artíkulo akí.

3, 4. (a) Ki spièrtamentu Dios a duna Adam ku Eva? (b) Dikon tabata asina importante pa nan hasi kaso di e spièrtamentu ei?

³ Aunke Adam ku Eva tabatin e posibilidat di biba pa semper, nan no tabata inmortal. Pa nan por a keda na bida, nan tabatin ku hala rosea, kome, bebe i drumi. Es mas, nan bida tabata dependé di nan relashon ku Yehova, Esun ku a duna nan bida. (Deu. 8:3) Pa nan por a sigui gosa di bida, nan mester a aseptá e guia di Dios. Asta promé ku Yehova a krea Eva, el a laga Adam komprondé esaki bon kla. Kon? Wèl, “Dios a ordená e hòmber, bisando: ‘Di tur palu di e hòfi bo mag kome libremente, ma di e palu di konosementu di bon i malu lo bo no kome, pasobra e dia ku bo kome di dje, lo bo muri sigur.’”—Gén. 2:16, 17.

⁴ “E palu di konosementu di bon i malu” a representá e derecho ku Dios tabatin di disidí kiko ta bon i kiko ta malu. Klaru, Adam tabatin un sentido di loke ta bon i malu kaba ya ku el a ser kreá den e imágen di Dios i e tabatin un konsenshi. Pero e palu mester a kòrda Adam ku Eva ku semper nan lo tabatin mester di e guia di Yehova. Si nan a kome di e palu akí tòg, ta komo si fuera nan lo a bisa Dios: “Nos no tin mester di bo reglanan.” Ku ki resultado? Nan i nan desendientenan lo a muri, manera Dios a spièrta nan.

 5. Dikon Adam ku Eva a desobedesé Yehova?

⁵ Despues ku Dios a krea Eva, Adam a kont’é di e mandamentu di Dios. Eva tabata sa esei asina bon ku despues e por a ripitié kasi palabra pa palabra. (Gén. 3:1-3) El a ripitié na un kolebra, ku en realidat tabata Satanas e Diabel, un yu spiritual di Dios ku a laga e deseo pa poder i independensia krese den dje. (Kompará ku Santiago 1:14, 15.) Pa logra su propósito malbado, Satanas a bisa Eva ku Dios ta gaña. El a sigurá Eva ku lo e no muri si e desobedesé Dios, sino ku lo el a bira manera Dios. (Gén. 3:4, 5) Eva a ker’é i a kome e fruta, demostrando asina ku e ke tabata independiente, i a konvensé Adam tambe pa hasi meskos. (Gén. 3:6, 17) Satanas a gañ’é. (Lesa 1 Timoteo 2:14.) I maske Adam tabata sa ku ta malu pa kome e fruta, tòg el ‘a skucha su esposa.’ E kolebra, Satanas e Diabel, a hasi manera e tabata amigu di Eva, pero en realidat e tabata un enemigu kruel ku tabata sa bon bon kiko lo tabata e konsekuensianan teribel di su mentira.

6, 7. Kon Yehova a atendé e huisio di Adam ku Eva?

⁶ Pa motibunan egoista, tantu Adam komo Eva a rebeldiá kontra Yehova, Esun ku a duna nan bida i tur loke nan tabatin. Klaru ku Yehova tabata sa presis kiko a sosodé. (1 Kró. 28:9; lesa Proverbionan 15:3.) Pero el a laga Adam, Eva i Satanas demostrá kiko realmente nan tabata sinti p’e. No tin duda ku loke nan a hasi a duel Yehova, komo nan Tata, mashá. (Kompará ku Génesis 6:6.) Sinembargo, komo Hues, Yehova mester a aktua di akuerdo ku hustisia i duna nan e kastigu ku el a spièrta nan p’e di antemano.

⁷ Tokante e palu di konosementu di bon i malu, Dios a bisa Adam: “E dia ku bo kome di dje, lo bo muri sigur.” Por ta masha bon ku Adam a pensa ku “e dia” lo tabata un dia literal di 24 ora i ku lo el a muri promé ku solo baha. Pero mas lat riba e dia ei, Yehova a papia ku Adam ku Eva. (Gén. 3:8) Ta komo si fuera nan tabata den un korte. Komo Hues hustu, el a skucha promé loke nan tabatin di bisa den nan defensa. (Gén. 3:9-13) Despues di esei, el a dikta sentensia i a kondená e dos malechornan na morto. (Gén. 3:14-19) Pero si el a mata Adam ku Eva mesora, su propósito pa hende lo no a kumpli. (Isa. 55:11) Aunke Yehova a konfirmá e pena di morto i e efektonan di piká a aparesé mesora, el a permití Adam ku Eva biba sufisiente largu pa nan haña yu ku sí lo por a haña un mihó futuro. Pero, den bista di Dios, Adam ku Eva a muri riba e dia ku nan a peka. I komo ku pa Yehova 1.000 aña ta manera un dia, en bèrdat nan a muri denter di un “dia.”—2 Ped. 3:8.

8, 9. Kon piká a afektá e desendientenan di Adam? (Wak e promé plachi.)

⁸ Kon loke Adam ku Eva a hasi a afektá nan yunan? Na Romanonan 5:12, apòstel Pablo a splika: “Pa medio di ún hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.” Anto Pablo a agregá: “Mediante desobedensia di esun hende ei hopi a bira pekadó.” (Rom. 5:19) E promé hende ku a muri tabata fiel Abel. (Gén. 4:8) Despues, e otro yunan i nietunan di Adam a bira bieu i muri. Pues, humanidat a heredá piká i morto; dos enemigu ku hende no por skapa di dje. Aunke nos no sa presis kon piká i morto a pasa físikamente pa e desendientenan di Adam, nos por mira e resultadonan sí.

⁹ Ku rason Beibel ta kompará piká i morto ku un “velo ku ta tapa tur pueblo, sí, e mantel ku ta habrí over di tur nashon.” (Isa. 25:7) E tela pisá i sofokante ei ta tapa henter humanidat. No tin ún hende ku por skapa di piká i morto. Ta p’esei Beibel ta bisa ku “den Adam tur ta muri.” (1 Kor. 15:22) I p’esei Pablo a puntra: “Ken lo libra mi di e kurpa ku ta hiba mi na e morto akí?” Lo tabatin un persona ku por hasié?a—Rom. 7:24.

10. (a) Menshoná algun versíkulo di Beibel ku ta indiká ku Yehova lo kaba ku morto. (b) Kiko e versíkulonan akí ta revelá tokante Yehova i su Yu?

¹⁰ Yehova lo por a libra Pablo. Djis despues di menshoná “e velo,” Isaías a skirbi: “E lo traga morto pa semper, i Señor DIOS lo seka awa di wowo for di tur kara.” (Isa. 25:8) Meskos ku un tata ta keda kontentu di por kita loke ta pone su yunan sufri i seka nan wowo, asina tambe Yehova gustosamente lo kaba ku e morto ku nos a heredá di Adam! I e tin un persona ku ta yud’é: Hesus. Nos ta lesa na 1 Korintionan 15:22: “Meskos ku den Adam tur ta muri, asina tambe den Kristu tur lo haña bida.” Pablo mes tambe a kontestá e pregunta ken lo libr’é. E di: “Mi ta gradisí Dios ku lo e hasi esaki pa medio di Hesukristu, nos Señor!” (Rom. 7:25) Ta bisto anto ku maske Adam ku Eva a peka, Yehova no a stòp di stima humanidat. I Hesus, kende Yehova a usa pa traha Adam ku Eva, tampoko no a stòp di stima hende. (Pro. 8:30, 31) Pero kon e famia humano lo a ser librá di piká i morto?

11. Kiko Yehova a hasi pa yuda humanidat?

¹¹ Ora Adam a peka, Yehova a sentensi’é na morto. Komo resultado, tur hende a heredá imperfekshon i morto. (Rom. 5:12, 16) Nos ta lesa na Romanonan 5:18: “Mediante ún delitu e resultado tabata kondenashon pa tur sorto di hende.” Kiko Yehova por a hasi pa eliminá e kondenashon ei sin pasa por haltu di su mes normanan? Hesus a kontestá e pregunta akí ora el a bisa: “E Yu di hende [a bini] pa duna su alma komo reskate a kambio di hopi hende.” (Mat. 20:28) E promé yu spiritual di Yehova a nase komo un hende perfekto riba tera i lo a perkurá un reskate. Kon e reskate akí lo a kumpli ku e normanan di hustisia di Yehova?—1 Tim. 2:5, 6.

12. Kon e reskate a kumpli ku e normanan di hustisia di Yehova?

¹² Hesus, komo un hende perfekto, por a biba pa semper. Esei ta loke Yehova tabata ke pa Adam. E propósito di Yehova tabata pa yena e tera ku e desendientenan perfekto di Adam. Hesus tabata stima su Tata i e desendientenan di Adam asina tantu ku e tabata dispuesto pa sakrifiká su bida humano. Pues, el a sakrifiká un bida ku a korespondé ku loke Adam a pèrdè. Despues, Yehova a resusitá Hesus ku un kurpa spiritual. (1 Ped. 3:18) E reskate a kumpli ku Yehova su normanan di hustisia, pasobra den un sentido Hesus a tuma e lugá di Adam. E sakrifisio di su bida perfekto a sirbi komo un reskate, òf pago, pa kumpra e famia humano bèk i duna nan e futuro ku Adam a pèrdè, esta, e posibilidat di bida eterno. Pablo a splika: “Ta asina tambe ta pará skirbí: ‘E promé hende, Adam, a bira un alma bibu.’ E último Adam a bira un spiritu ku ta duna bida.”—1 Kor. 15:45.

13. Kiko “e último Adam” lo hasi pa hende ku a muri?

¹³ Djis akí, “e último Adam” lo duna bida eterno na e desendientenan di Adam en general. Esaki lo inkluí mayoria di hende ku a muri den pasado. Nan lo ser resusitá pa bolbe biba riba tera.—Huan 5:28, 29.

14. Kon hende lo ser librá di imperfekshon?

¹⁴ Kon humanidat lo ser librá di e imperfekshon ku nan a heredá? Yehova a forma un gobièrnu selestial, e Reino, ku ta konsistí di “e último Adam” i 144.000 persona skohí for di entre humanidat ku lo sòru pa esei. (Lesa Revelashon 5:9, 10.) E 144.000 personanan ku lo goberná huntu ku Hesus den shelu ántes tabata hende imperfekto, pues nan lo por komprondé nan siudadanonan. Durante e reinado di 1.000 aña, nan ku Hesus lo yuda hende riba tera alkansá perfekshon.—Rev. 20:6.

15, 16. (a) Kiko ta “e último enemigu,” i ki ora lo kaba kuné? (b) Segun 1 Korintionan 15:28, kiko Hesus lo hasi finalmente?

¹⁵ Na fin di e 1.000 aña di gobernashon di Reino, humanidat obediente lo a ser librá di e enemigunan ku e desobedensia di Adam a trese, esta, piká i morto. Beibel ta bisa: “Meskos ku den Adam tur ta muri, asina tambe den Kristu tur lo haña bida. Ma kada un den su debido órden: Kristu, e promé fruta, despues esnan ku ta pertenesé na Kristu [su ko-gobernantenan], durante su presensia. Anto, na final, ora ku e kaba ku tur gobièrnu i tur outoridat i poder, lo e entregá e Reino na su Dios i Tata. Pasobra e mester reina komo rei te ora Dios pone tur enemigu bou di su pia. E último enemigu ku lo e kaba kuné ta morto.” (1 Kor. 15:22-26) Sí, por fin “e último enemigu,” esta, morto heredá for di Adam, lo keda eliminá pa semper. “E velo” pisá ku ta tapa henter e famia humano lo no t’ei mas.—Isa. 25:7, 8.

¹⁶ Apòstel Pablo a konkluí su resúmen inspirá ku e palabranan akí: “Ora ku tur kos keda someté na dje, e ora ei e Yu mes tambe lo someté su mes na Esun ku a someté tur kos na dje, pa Dios por ta tur kos pa tur hende.” (1 Kor. 15:28) E gobernashon di Hesus lo a kumpli ku su propósito. Ku gran satisfakshon, Hesus lo entregá e outoridat bèk na Yehova i presentá e famia humano perfekto na dje.

17. Kiko lo pasa finalmente ku Satanas?

¹⁷ Kiko lo pasa ku Satanas, esun ku a start tur e miseria ku humanidat a pasa aden? Nos ta haña e kontesta na Revelashon 20:7-15. Despues di e 1.000 aña, Satanas lo purba un biaha mas di gaña tur hende perfekto. Kaba Diabel i tur esnan ku siguié lo ser eliminá di unabes i pa semper. Esaki Beibel ta yama “e di dos morto.” (Rev. 21:8) Esnan ku muri “e di dos morto” lo no bolbe biba nunka mas. Pero pa hende ku ta stima e Kreador i ta sirbié fielmente, “e di dos morto” no ta un enemigu.

18. Kon e enkargo ku Dios a duna Adam lo kumpli finalmente?

¹⁸ Tur hende lo ta perfekto e ora ei, i nan lo ta kompletamente aprobá pa Yehova pa haña bida eterno. Lo no tin niun enemigu mas! E enkargo ku Dios a duna Adam lo a ser lográ sin dje. E tera lo ta yen di su desendientenan, kendenan ku plaser lo kuida e tera i e bestianan. Esta felis nos ta ku pronto Yehova lo kaba ku nos último enemigu: morto!