Historia di Bida

Di Traha Arma pa Salba Bida

SEGUN E RELATO DI ISIDOROS ISMAILIDIS

Mi tabata na rudia i lágrima tabata muha mi cara. Mi a resa: “Ai, Dios, mi concenshi ta bisa mi cu mi no por sigui traha den produccion di arma. Mi a haci hopi esfuerso pa haña otro trabou, pero mi no ta logra. Mañan, mi ta entregá mi retiro. Jehova, por fabor, no laga mi cuater yunan muri di hamber.” Con bin mi a yega n’e punto aki?

BIDA tabata trankil i sin problema na Drama, den nort di Grecia, caminda mi a nace na 1932. Mi tata tabata papia cu mi di loke e tabata kier pa mi haci. El a animá mi pa bai studia na Merca. Despues cu Grecia a keda di plunder den Segundo Guera Mundial, un dicho comun entre griegonan tabata: “Bo por horta nos pertenencianan, pero nunca bo por horta loke tin den nos mente.” Mi tabata decididu pa haña un educacion universitario i logra algu cu nunca ningun hende lo por horta.

For di edad hóben, mi a djoin vários organisacion di hóben cu Iglesia Griego Ortodox a patronisá. Nan tabata bisa nos pa evitá sectanan peligroso. Mi ta corda specíficamente un grupo cu nan a mencioná, esta, Testigonan di Jehova, ya cu supuestamente nan a representá e anticristo.

Despues di a caba scol técnico na Aténas na 1953, mi a biaha bai Alemania pa wak si mi por a haña un trabou i a la bes bai scol. Pero esei no a resultá, pues mi a bai otro paisnan. Despues di un par di siman, mi a haña mi sin niun cen na un haf na Bélgica. Mi ta corda cu mi a cana drenta un misa, cai sinta i cuminsá yora asina profundamente cu lágrima a basha abou riba e flur. Mi a bisa den oracion cu si Dios yuda mi yega Merca, lo mi no core tras di cosnan material, sino busca un educacion i haci esfuerso pa ta un bon cristian i bon ciudadano. Finalmente na 1957, mi a yega Merca.

Bida Nobo na Merca

Bida na Merca tabata difícil pa un imigrante cu no tabata sa e idioma i cu no tabatin cen. Anochi mi a traha dos trabou i mi a lucha pa bai scol den dia. Mi a asistí na vários les na universidad i mi a logra un ‘associate degree.’ Despues mi a bai Universidad di California na Los Angeles i mi a logra mi ‘bachelor of science’ den física práctico. E palabranan di mi tata tocante haña un educacion a yuda mi pasa dor dje añanan difícil aki.

Rond dje tempu ei, mi a topa un mucha muher griego encantador cu yama Ekaterini, i nos a casa na 1964. Tres aña despues, nos promé yu homber a nace, i den ménos cu cuater aña, nos a haña dos yu homber mas i un yu muher. Cria un famia i na mésun tempu studia na universidad, tabata realmente un reto.

Mi tabata traha pa Forsa Aéreo Mericano na un compania di misil i espacio na Sunnyvale, California. Mi tabata enbolbí den vários proyecto aéreo i espacial, incluso e programanan di Agena i Apollo. Asta mi a ricibí medaya pa mi contribucion na misionnan di Apollo 8 i Apollo 11. Despues di esei, mi a sigui cu mi estudio i mi a bira profundamente enbolbí den vários proyecto militar espacial. N’e punto aki mi a pensa cu mi a logra tur cos—un esposa encantador, cuater yu maraviyoso, un trabou prestigioso i un cas bunita.

Un Homber Persistente

Na principio di 1967, na trabou, mi a topa Jim, un homber masha humilde i amabel. Tabata parce cu Jim semper tabatin un smile riba su cara, i nunca e no a rechasá un invitacion pa tuma un pausa i refresco huntu cu mi. El a usa e oportunidadnan aki pa compartí informacion for di Bijbel cu mi. Jim a bisa mi cu e tabata studiando Bijbel cu Testigonan di Jehova.

Mi a keda di shok ora mi a tende cu Jim a bira enbolbí cu e grupo religioso aki. Con ta posibel cu un bon hende asina por a bira víctima dje secta di anticristo? Sin embargo, mi no por a resistí Jim su interes personal den mi i su amabilidad. A parce cu tur dia e tabatin algu diferente pa mi lesa. Por ehempel, un dia el a bini den mi oficina i a bisa: “Isidoros, e artículo aki den E Toren di Vigilancia ta papia tocante con pa fortalecé bida di famia. Bai cas cuné i les’é huntu cu bo casá.” Mi a bis’é cu lo mi lesa e revista, pero despues mi a bai den baño i a kibr’é na pida-pida i tir’é den co’i sushi.

Pa tres aña largu, mi a destruí tur buki i revista cu Jim a duna mi. Como cu mi tabatin un prehuicio contra Testigonan di Jehova, pero tog kier a mantené Jim su amistad, mi a pensa cu ta mihó scucha loke el a bisa i despues lubidá e informacion mesora.

Sin embargo, for dje combersacionnan aki mi a ripará cu mayoria dje cosnan cu mi a kere i practicá, no tabata basá riba Bijbel. Mi a realisá cu e siñansanan di Trinidad, fiernu di candela i inmortalidad di alma no ta bíblico. (Eclesiástes 9:10; Ezekiel 18:4; Juan 20:17) Como un griego ortodox orguyoso, mi no kier a admití abiertamente cu Jim tabatin rason. Pero ya cu semper el a usa Bijbel i nunca no a duna su opinion personal, mi a reconocé finalmente cu e homber aki tabatin un mensahe balioso for di Bijbel pa mi.

Mi casá a sinti cu tabatin algu ta sosodé, i el a puntra mi si mi a papia cu mi amigu cu ta asociá cu e Testigonan. Ora mi a bisa sí, e di: “Laga nos bai cualkier otro iglesia liber di esun di Testigonan di Jehova.” Sin embargo, poco tempu despues ami cu mi casá, huntu cu nos yunan, tabata asistí regularmente n’e reunionnan dje Testigonan.

Un Decision Difícil

Segun cu mi a studia Bijbel, mi a topa cu e palabranan di profeta Isaías: “Nan lo tin cu bati nan spada na ploeg i nan lansa na skèr di corta mata. Nacion lo no hisa spada contra nacion, ni nan lo no siña di guera mas.” (Isaías 2:4) Mi a puntra mi mes: ‘Con un sirbidó di un Dios cu stima pas por ta traha den diseño i produccion di armanan destructivo?’ (Salmo 46:9) No a tuma mi masha tempu pa yega n’e conclusion cu mi mester a cambia di trabou.

Ta di comprendé cu esaki tabata un desafio enorme. Mi tabatin un trabou di prestigio. Mi a lucha atrabes di añanan di trabou duru, educacion i sacrificio pa logra yega te aki. Mi a progresá como profesional, i ata mi awor pará na punto di entregá mi carera. Sin embargo, mi amor profundo pa Jehova i mi deseo intenso pa haci su boluntad a prevalecé finalmente.—Mateo 7:21.

Mi a dicidí di bai busca trabou den un empresa na Seattle, Washington. Sin embargo, pa mi desilusion, no a pasa masha tempu cu mi a ripará cu mi tabata asta mas enbolbí den trabou cu no tabata na armonia cu Isaías 2:4. Mi esfuersonan pa traha solamente riba otro proyectonan a fracasá, i atrobe mi concenshi a cuminsá molestiá mi. Mi a mira bon cla cu mi no por a keda cu e trabou ei i n’e mésun momento mantené un concenshi limpi.—1 Pedro 3:21.

A bira bisto cu nos lo mester a bai haci cambionan grandi. Den ménos cu seis luna, nos a cambia nos estilo di bida i a reducí e gastunan di famia te na mitar. Despues nos a bende nos cas luhoso i a cumpra unu chikitu na Denver, Colorado. Awor mi tabata cla p’e último decision—kita for di trabou. Den mi carta di retiro cu mi a tik, mi a splica mi posicion basá riba concenshi. E anochi ei, ora e muchanan a bai drumi, mi a hinca rudia huntu cu mi casá i nos a haci oracion na Jehova, manera mi a describí den e introduccion dje artículo aki.

Den ménos cu un luna, nos a muda bai Denver, i dos siman despues, na juli 1975, ami cu mi casá a bautisá. Seis luna largu mi no por a haña trabou, i tiki-tiki nos cennan di spar tabata cabando. P’e di shete luna, nos cennan di spar tabata mas tiki cu e pago cu nos mester a haci riba cas. Mi a cuminsá busca cualkier djob cu mi por a haña, pero djis despues mi a haña trabou den ingenieria. E salario tabata solamente mitar di loke mi tabata gana ántes; asina mes, e tabata hopi mas di loke mi a pidi Jehova. Esta felis mi tabata cu mi a pone interesnan spiritual na promé lugá!—Mateo 6:33.

Lantando Nos Yunan pa Stima Jehova

Miéntras tantu, ami cu Ekaterini tabata ocupá cu e trabou desafiante di cria nos cuater yunan na armonia cu principionan divino. Felismente, cu yudansa di Jehova, nos a mira nan tur, bira cristian maduro, dedicando nan bida completo n’e trabou importante di predicá e Reino. Nos tres yu hombernan, Christos, Lakes i Gregory, a gradua n’e Scol di Entrenamentu Ministerial i ta sirbi awor den vários asignacion, bishitando i fortaleciendo congregacionnan. Nos yu muher Toula, ta traha como boluntario n’e sede mundial di Testigonan di Jehova na New York. Nos curason a yena di emocion ora nos a mira nan tur sacrificá careranan prometedor i empleonan cu ta paga hopi cen, pa nan por sirbi Jehova.

Hopi hende a puntra kico ta e secreto tras dje éxito ei den criamentu di yu. Claro cu no tin un formulá fiho pa cria yu, pero diligentemente nos a purba inculcá amor pa Jehova i pa próhimo den nan curason. (Deuteronomio 6:6, 7; Mateo 22:37-39) E muchanan a siña cu nos no por bisa Jehova cu nos ta stim’é, a ménos cu nos obranan ta mustra esei.

Un bes pa siman, generalmente diasabra, nos a participá como famia den e ministerio. Regularmente nos tabatin studio di Bijbel como famia riba dialuna anochi despues di cuminda, i tambe nos tabatin studio di Bijbel cu cada yu individual. Ora e yunan tabata mas chikitu, nos a tene sesionnan di studio corticu vários bes pa siman cu cada yu, i segun cu nan a crece, nos tabatin sesionnan di studio mas largu un bes pa siman. Durante e sesionnan di studio aki, nos yunan a habri nan mes i expresá nan problemanan libremente cu nos.

Tambe nos a disfrutá di recreo edificante como famia. Nos tabata gusta toca instrumento musical huntu, i cada yu tabata gusta toca su canticanan faborito. Tabatin algun fin di siman cu nos a invitá otro famianan pa asociacion edificante. Nos tabata bai cu vakansi tambe como famia. Durante un biahe asina, nos a pasa dos siman explorando e cerunan di Colorado i trahando huntu cu e congregacionnan local den e ministerio di veld. Cu hopi cariño nos yunan ta corda con nan a traha na congresonan di distrito den vários departamento i yuda den construccion di Salon di Reino na diferente lugá. Ora nos a hiba e muchanan Grecia pa mira nan famianan, nan tabatin oportunidad tambe di topa hopi Testigo fiel cu a yega di bai prizon pa motibu di nan fe. Esaki a haci un impresion profundo riba nan, i a yuda nan determiná pa para firme i cu curashi p’e berdad.

Claro cu tin biaha e muchanan no a comportá nan bon of cu nan tabatin mal asociacion. Otro biahanan, nos como mayor a causa problema dor di tabata kisas demasiado streng den algun cos. Pero recurí n’e “reglamentu mental di Jehova,” cu ta ser hañá den Bijbel, a yuda rectificá asuntunan pa nos tur.—Efesionan 6:4; 2 Timoteo 3:16, 17.

E Tempu Mas Felis di Mi Bida

Despues cu nos yunan a cuminsá den e ministerio di tempu completo, ami cu Ekaterini a cuminsá pensa seriamente con nos por a expandé nos participacion den e trabou di salba bida aki. Pues na 1994, despues cu mi a baha cu penshon adelantá, nos a cuminsá traha como pionero regular. Nos ministerio ta incluí bishitá scol i universidadnan local unda nos ta duna testimonio na studiantenan i ta conducí studio di Bijbel cu algun di nan. Dor cu mi por comprendé nan dificultadnan—ya cu mi tabata den nan sapatu no hopi tempu pasá—mi tabatin hopi éxito den yuda nan siña di Jehova. Ta ki un goso di por a studia cu studiantenan for di Bolivia, Brazil, Chile, China, Egipto, Etiopia, México, Tailandia i Turkia! Tambe mi ta disfrutá di duna testimonio na telefon, foral na hende cu ta papia mi idioma nativo.

Aunke mi tin hopi limitacion debí na mi accent griego pisá i mi edad avansá, semper mi a purba haci mi mes disponibel i di tin e spiritu di Isaías, cu a proclamá: “Ata mi aki! Manda mi.” (Isaías 6:8) Nos tabatin e goso di yuda mas cu seis hende dedicá nan bida na Jehova. Definitivamente, esaki tabata e tempu di mas felis pa nos.

Un tempu, henter mi bida tabata drei rond di traha armanan monstruoso pa mata mi próhimo. Sin embargo, mediante Jehova su bondad inmerecí, el a habri caminda pa ami cu mi famia bira su sirbidónan dedicá i usa nos bida na hiba pa hende e bon nobo di bida eterno riba un tera paradísico. Ora mi refleccioná riba e decisionnan difícil cu mi mester a tuma, e palabranan di Malakías 3:10 ta bini na mi mente: “‘Pone mi na prueba, por fabor, den esaki,’ Jehova di ehércitonan a bisa, ‘i wak si mi no ta habri pa boso e portanan di shelu i realmente basha riba boso un bendicion te ora cu no tin mas mester.’” En berdad el a haci asina—n’e satisfaccion di nos curason!

[Kuadro/Plachi na página 27]

Lakes: Mi tata a odia hipocresia. El a traha duru p’e no ta hipócrita, foral den pone e ehempel corecto pa su famia. Hopi bes el a bisa nos: “Si boso dedicá boso bida na Jehova, esei ta nificá algu. Boso mester ta dispuesto pa haci sacrificio pa Jehova. Esei ta tur loke ser un cristian ta nificá.” E palabranan aki a keda pegá den mi mente i nan a yuda mi sigui su ehempel den haci sacrificio pa Jehova.

[Kuadro/Plachi na página 27]

Christos: Mi a apreciá mashá e lealtad di henter alma cu mi mayornan a mustra na Jehova i nan dedicacion serio na nan responsabilidad como mayor. Nos a haci tur cos huntu como famia—di sirbishi te na nos vakansinan. Aunke nan por a enbolbé nan mes den masha hopi otro cos, mi mayornan a mantené nan bida simpel i enfocá riba e ministerio. Awe, mi sa cu mi ta logra e máximo felicidad ora mi ta completamente enbolbí den e sirbishi di Jehova.

[Kuadro/Plachi na página 28]

Gregory: Mas cu e palabranan di animacion di mi mayornan pa expandé mi ministerio, ta nan ehempel i evidencia di goso den Jehova su sirbishi a motivá mi pa reevaluá mi circunstancia, pone cualkier preocupacion i miedu pa cuminsá den sirbishi di tempu completo un banda, i dedicá mi mes mas plenamente na e trabou di Jehova. Mi ta gradicí mi mayornan cu nan a yuda mi haña e goso cu ta bini dor cu mi ta haci esfuerso.

[Kuadro/Plachi na página 28]

Toula: Semper mi mayornan a enfatisá cu nos relacion cu Jehova ta e cos di mas precioso cu hamas nos por poseé i cu e único manera cu nos por ta semper realmente felis, ta dor di duna Jehova lo mihó. Nan a haci Jehova masha real mes pa nos. Hopi bes mi tata a bisa nos cu bo ta experenciá un sintimentu indescriptibel ora bo por bai drumi anochi cu un concenshi limpi, sabiendo cu bo a haci bo best pa haci Jehova felis.

[Plachi na página 25]

Tempu mi tabata soldá na Grecia, 1951

[Plachi na página 25]

Huntu cu Ekaterini na 1966

[Plachi na página 26]

Mi famia na 1996: (di robes pa drechi, patras) Gregory, Christos, Toula; (dilanti) Lakes, Ekaterini i ami