Capítulo Cuater

E Cas di Jehova Ta Ser Halsá

Isaías 2:1-5

 1, 2. Ki palabranan ta grabá riba un muraya n’e plasa di Nacionnan Uní, i di ki fuente nan ta?

“NAN lo bati nan spada haci ploeg i nan lansa haci skèr di snui mata: nacion lo no hisa spada contra nacion. Ni nan lo no siña di guera mas.” Esakinan ta palabranan grabá riba un muraya n’e plasa di Nacionnan Uní na New York. Pa hopi década no tabatin indicacion di ken e palabranan ei tabata. Siendo cu e meta di Nacionnan Uní (ONU) ta pa traha den direccion di pas mundial, tabata fácil pa concluí cu ta e fundadónan di ONU a bini cuné na 1945.

² Sin embargo, na 1975 nan a graba e nomber di Isaías riba e muraya bou dje cita. Tabata evidente e ora ei cu e palabranan aki no a originá den nos tempu. De facto, nan tabata skirbí como profecia mas cu 2.700 aña pasá den loke awe ta e di dos capítulo dje buki di Isaías. Pa miles di aña amantenan di pas a puntra nan mes con i na ki tempu e cosnan cu Isaías a predicí lo tuma lugá. No ta necesario mas pa puntra esei. Awe nos ta mira e cumplimentu remarcabel dje profecia di antaño aki tuma lugá nos dilanti.

 3. Cua ta e nacionnan cu ta bati nan spada haci ploeg?

³ Cua ta e nacionnan cu ta bati nan spada haci ploeg? Esei sigur no ta e nacionnan i gobiernunan político dje tempu actual. Te cu awor e nacionnan aki a fabricá spada, esta arma, tantu pa bai guera como pa conserbá “pas” mediante uso di forsa. En realidad, semper nan tendencia tabata di bati nan ploeg haci spada! E profecia di Isaías ta haña su cumplimentu den representantenan for di tur nacion, personanan cu ta adorá Jehova, “e Dios di pas.”—Filipensenan 4:9.

E Nacionnan Cu Ta Basha Bai na Adoracion Puru

 4, 5. Kico e promé versículonan di Isaías capítulo 2 ta predicí, i kico ta enfatisá cu e palabranan ei ta confiabel?

⁴ Capítulo 2 di Isaías ta cuminsá cu e palabranan aki: “E cos cu Isaías, yu di Ámoz, a mira den vision tocante Huda i Jerusalem: I tin cu sosodé den e parti final dje dianan cu e ceru dje cas di Jehova lo bira firmemente establecí mas haltu cu e top dje cerunan, i sigur lo e ser halsá mas haltu cu e ceritunan; i na dje tur e nacionnan tin cu basha bai.”—Isaías 2:1, 2.

⁵ Ripará cu loke Isaías ta profetisá no ta djis speculacion. Jehova ta manda Isaías skirbi di sucesonan cu “tin cu sosodé” sin falta. Tur loke Jehova pone pa sosodé, tin “éxito sigur.” (Isaías 55:11) Evidentemente, pa enfatisá con confiabel su promesa ta, Dios a inspirá profeta Mikéas, contemporáneo di Isaías, pa skirbi den su buki e mésun profecia cu nos ta haña na Isaías 2:2-4.—Mikéas 4:1-3.

 6. Na ki tempu e profecia di Isaías ta cumpli?

⁶ Na ki tempu e profecia di Isaías lo mester cumpli? “Den e parti final dje dianan,” of manera Beibel Santu ta bisa, “den e último dianan.” E Scritura Griego Cristian a papia di rasgonan cu lo a identificá e periodo aki. Den nan tin guera, temblor, pest, scarcedad di cuminda i “tempu crítico, duru pa trata cuné.”a (2 Timoteo 3:1-5; Lucas 21:10, 11) E cumplimentu dje profecianan ei ta duna hopi prueba cu nos ta bibando “den e parti final dje dianan,” den e último dianan dje sistema actual di mundu. Ta lógico anto cu nos ta spera di mira e cosnan cu Isaías a profetisá di dje, cumpli den nos tempu.

Un Ceru Riba Cua Hende Ta Adorá

 7. Ki cuadro profético Isaías ta pinta?

⁷ Isaías ta pinta cu poco palabra un cuadro profético bibu. Nos ta mira un ceru haltu, i riba su top tin un cas glorioso, e tempel di Jehova. E ceru aki ta mas haltu cu e otro ceru i ceritunan rond di dje. Tog, su aparencia no ta menasante ni ta hinca miedu den hende; e ta atractivo. Hende di tur nacion ta anhelá pa subi e ceru dje cas di Jehova; nan ta basha bai na dje. Ta fácil pa visualisá e cuadro, pero kico e ta nificá?

 8. (a) Cu kico ceru i ceritu ta vinculá den tempu di Isaías? (b) Kico e fluho di nacionnan cu ta basha bai na “e ceru dje cas di Jehova” ta representá?

⁸ Den tempu di Isaías, hopi bes ceru i ceritu sa ta vinculá cu adoracion. Por ehempel, nan ta sirbi como sitio pa adoracion idólatra i pa santuario di dios falsu. (Deuteronomio 12:2; Jeremías 3:6) Sin embargo, e cas, of tempel di Jehova ta dorna e top di ceru di Moria na Jerusalem. E israelitanan fiel ta biaha bai Jerusalem tres bes pa aña i nan ta subi ceru di Moria pa adorá e Dios berdadero. (Deuteronomio 16:16) Di manera cu e fluho di nacionnan cu ta basha bai na “e ceru dje cas di Jehova” ta representá e hopi pueblonan cu ta bini huntu pa adoracion berdadero.

 9. Kico “e ceru dje cas di Jehova” ta representá?

⁹ Claro cu awe e pueblo di Dios no ta reuní na un ceru literal riba cua tin un tempel di piedra. E ehército romano a destruí Jehova su tempel na Jerusalem na aña 70 E.C. Ademas, apostel Pablo a aclará cu e tempel den Jerusalem i e tabernáculo usá promé cuné, tabata un representacion. Nan a prefigurá un realidad spiritual mas grandioso, “e berdadero tent, cu Jehova a lanta, i no hende.” (Hebreonan 8:2) E tent spiritual ei ta e areglo pa acercá Jehova den adoracion basá riba e sacrificio di rescate di Jesucristo. (Hebreonan 9:2-10, 23) Na armonia cu esaki, “e ceru dje cas di Jehova” mencioná na Isaías 2:2 ta representá e adoracion puru i elevá di Jehova den nos tempu. Esnan cu ta practicá adoracion puru no ta reuní na un sitio geográfico; ta e adoracion na Dios ta uni nan.

Adoracion Puru Ta Ser Poné na Haltu

10, 11. Den ki sentido Jehova su adoracion a ser elevá den nos tempu?

¹⁰ E profeta ta bisa cu “e ceru dje cas di Jehova,” esta adoracion puru, lo yega di ta “firmemente establecí mas haltu cu e top dje cerunan” i lo ta “halsá mas haltu cu e ceritunan.” Hopi tempu promé cu Isaías a biba, rey David a hiba e arca di pacto riba ceru di Síon na Jerusalem, cu ta situá 760 meter riba nivel di laman. E arca a keda ei te ora a traslad’é n’e tempel cu a ser completá riba ceru di Moria. (2 Samuel 5:7; 6:14-19; 2 Crónicanan 3:1; 5:1-10) Pues, pa tempu di Isaías ya a elevá e arca sagrado literalmente i a poné den e tempel, na un lugá mas haltu cu e hopi ceritunan rond di dje riba cua hende tabata adorá dios falsu.

¹¹ Claro cu den sentido spiritual, e adoracion di Jehova semper tabata superior n’e prácticanan religioso di esnan cu ta sirbi dios falsu. Sin embargo, den nos tempu Jehova a elevá su adoracion te na shelu, riba tur forma di adoracion impuru, sí, hopi mas haltu cu tur “e ceritunan” i “e top dje cerunan.” Con asina? Principalmente dor di recogé esnan cu ta deseá di ador’é “cu spiritu i cu berdad.”—Juan 4:23.

12. Ken ta “e yunan dje reino,” i ki recogementu a tuma lugá?

¹² Cristo Jesus a compará un “conclusion di un sistema di cosnan” cu un tempu di cosecha ora cu e angelnan lo a recogé “e yunan dje reino,” esta, esnan cu ta carga e speransa di goberná cu Jesus den gloria celestial. (Mateo 13:36-43) Desde 1919, Jehova a autorisá “e resto” dje yunan aki pa colaborá cu e angelnan den e cosecha. (Revelacion 12:17) Pues, na promé lugá a recogé “e yunan dje reino,” Jesus su rumannan ungí. Anto nan, na nan turno, ta participá den un otro trabou di recogementu.

13. Con Jehova a bendicioná e resto ungí?

¹³ Durante e tempu di cosecha aki, na un manera progresivo Jehova a yuda e resto ungí comprendé i aplicá su Palabra, Bijbel. Esaki tambe a contribuí na elevá adoracion puru. Aunke ‘scuridad mes ta tapa tera, i tiniebla diki e gruponan nacional,’ e ungínan ta “briyando como iluminadónan” entre humanidad, ya cu Jehova a haci nan limpi i a refiná nan. (Isaías 60:2; Filipensenan 2:15) “Yená cu e conocimentu exacto di su boluntad den tur sabiduria i comprendimentu spiritual,” e ungínan cu spiritu aki ta “briya mes briyante cu solo den e reino di nan Tata.”—Colosensenan 1:9; Mateo 13:43.

14, 15. Ademas dje recogementu di “e yunan dje reino,” ken mas a ser recogé, i con Ageo a profetisá esaki?

¹⁴ Ademas di nan, mas hende a basha bai na “e ceru dje cas di Jehova.” Jesus a yama nan su ‘otro carnénan,’ i nan tin e speransa di biba pa semper den un paradijs riba tera. (Juan 10:16; Revelacion 21:3, 4) For di añanan ’30 di siglo 20, nan a presentá na cantidad di miles, despues cientos di miles, i awor miyones! Den un vision cu apostel Juan a haña, a describí nan como “un multitud grandi, cu ningun hende por a conta, for di tur nacion i tribu i pueblo i lenga.”—Revelacion 7:9.

¹⁵ Profeta Ageo a profetisá e formacion dje multitud grandi aki. El a skirbi: “Esaki ta loke Jehova di ehércitonan a bisa: ‘Un biaha mas—ta pa poco tempu—i mi ta bai sagudí shelu i tera i laman i suela secu. I lo mi sagudí tur e nacionnan, i e cosnan deseabel di tur e nacionnan [esnan cu ta djoin cristiannan ungí den adoracion puru] tin cu drenta paden; i lo mi yena e cas aki cu gloria,’ Jehova di ehércitonan a bisa.” (Ageo 2:6, 7) Existencia dje “multitud grandi” creciente aki i nan compañeronan ungí ta elevá, sí, ta glorificá adoracion puru den e cas di Jehova. Nunca promé tabatin asina tantu ser humano uní den adoracion dje Dios berdadero, i esaki ta duna gloria na Jehova i na su Rey entronisá, Jesucristo. Rey Sálomon a skirbi: “Den e multitud di pueblo tin e adorno di un rey.”—Proverbionan 14:28.

Adoracion Elevá den Bida di Hende

16-18. Ki cambionan algun persona a haci pa asina por adorá Jehova na un manera aceptabel?

¹⁶ Jehova ta merecé tur e mérito p’e elevacion di adoracion puru den nos tempu. Sin embargo, esnan cu acerk’é tin e privilegio di participá den e trabou aki. Mescos cu ta rekerí esfuerso pa subi un ceru, asina tambe, esfuerso ta necesario pa siña i biba na armonia cu e normanan hustu di Dios. Mescos cu e cristiannan den promé siglo, e sirbidónan di Dios awe a bandoná estilo di bida i prácticanan cu no ta cuadra cu adoracion puru. Fornicadó, idólatra, adúltero, ladron, personanan golos, buraché i otronan a cambia nan bida i a ser “labá limpi” den bista di Dios.—1 Corintionan 6:9-11.

¹⁷ E experencia di un señora hóben ta masha típico. El a skirbi: “Un tempu mi tabata perdí i sin speransa. Mi tabata hiba un bida inmoral i di buracheria. Mi a contraé enfermedadnan venérico. Tambe mi tabata bende droga i mi no tabatin cunes cu nada.” Despues cu el a studia Bijbel, el a haci cambionan grandi den su bida pa ahustá su mes n’e normanan di Dios. Awor e ta bisa: “Mi tin pas mental, respet propio, un speransa pa futuro, un berdadero famia i, riba tur cos, un relacion cu nos Tata, Jehova.”

¹⁸ Asta despues di a alcansá un condicion aprobá dilanti Jehova, hende tin cu sigui elevá adoracion puru dor di dun’é un lugá prominente den nan bida. Miles di aña pasá, pa medio di Isaías, Jehova a expresá su confiansa cu lo tin multitud di hende awe cu ta ansioso pa haci adoracion na dje e cos mas importante den nan bida. Abo ta entre nan?

Un Pueblo Cu Ta Siña e Caminda di Jehova

19, 20. Kico e pueblo di Dios ta ser siñá, i na unda?

¹⁹ Isaías ta amplia mas riba esnan cu ta aceptá adoracion puru awe. E ta bisa: “Hopi pueblo sigur lo bai i bisa: ‘Ban, i laga nos subi na e ceru di Jehova, na e cas di e Dios di Jacob; i lo e instruí nos tocante su camindanan, i nos lo cana den su bereanan.’ Pasobra di Síon ley lo sali, i e palabra di Jehova for di Jerusalem.”—Isaías 2:3.

²⁰ Jehova no ta laga su sirbidónan cana dual manera carné perdí. Pa medio di Bijbel i publicacionnan basá riba Bijbel, e ta duna nan su “ley” i su “palabra” pa asina nan siña su camindanan. E conocimentu aki ta prepará nan pa “cana den su bereanan.” Motivá pa un curason yen di aprecio i na armonia cu instruccion divino, nan ta papia cu otro dje camindanan di Jehova. Nan ta bini huntu na congresonan grandi i den gruponan mas chikitu na Salon di Reino i den casnan privá, pa asina scucha i siña cua ta e camindanan di Dios. (Deuteronomio 31:12, 13) Dje manera ei nan ta sigui e ehempel dje cristiannan di promé cu tabata reuní huntu pa animá i incitá otro pa abundá den ‘amor i obranan excelente.’—Hebreonan 10:24, 25.

21. Den ki obra Jehova su sirbidónan ta participá?

²¹ Tambe nan ta invitá otro hende pa “subi” n’e adoracion halsá di Jehova Dios, loke ta cuadra perfectamente cu e mandamentu cu Jesus a duna su disipelnan poco promé cu el a subi na shelu. El a bisa nan: “Bai pues, i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso.” (Mateo 28:19, 20) Cu apoyo divino, Testigonan di Jehova obedientemente ta bai rond mundu pa siña hende i haci disipel i bautisá nan.

Transformá Spada na Ploeg

22, 23. Kico Isaías 2:4 ta predicí, i kico un funcionario di ONU a bisa di esei?

²² Awor nos ta yega n’e siguiente versículo, di cua un parti ta grabá riba e muraya n’e plasa di ONU. Isaías ta skirbi: “Lo e dicta sentencia entre e nacionnan i rectificá asuntunan relacioná cu hopi pueblo. I nan lo tin cu bati nan spada haci ploeg i nan lansa haci skèr di snui mata. Nacion lo no hisa spada contra nacion, ni nan lo no siña di guera mas.”—Isaías 2:4.

²³ No ta asina-asina hende ta logra esaki. Federico Mayor, director-general di UNESCO (Organisacion di Nacionnan Uní pa Educacion, Ciencia i Cultura), a yega di bisa: “Ta parce cu tur e barbaridadnan di guera cu nos ta mira den nos cas awe pa medio di aparatonan audio-visual, no por detené e avance dje enorme makinaria di guera establecé i mantené siglo tras siglo. E generacionnan actual tin e tarea bíblico casi imposibel di ‘transformá nan spada na ploeg’ i haci e transicion for di un instinto di guera—cu a desaroyá desde orígen di tempu—pa un amor pa pas. Esaki ta e acto mas mihó i mas noble cu e ‘pueblo mundial’ lo por logra, i e mihó obsekio na nos desendientenan.”

24, 25. Den ken e palabranan di Isaías ta cumpli, i con?

²⁴ Hamas e nacionnan como totalidad lo por logra e meta noble aki. Esei ta simplemente fuera di nan alcanse. Ta personanan individual for di hopi nacion cu ta uní den adoracion puru, ta cumpli cu Isaías su palabranan. Jehova a “rectificá asuntunan” entre nan. El a siña su pueblo biba na pas cu otro. Den un mundu dividí i desbaratá pa conflicto, di un manera figurativo, nan di berdad a bati nan “spada haci ploeg i nan lansa haci skèr di snui mata.” Con asina?

²⁵ Pa cuminsá, nan no ta tuma parti pa niun banda den e gueranan dje nacionnan. Djis promé cu Jesus su morto, algun homber armá a bini pa arest’é. Ora Pedro a zwai su spada pa defendé su Maestro, Jesus a bis’é: “Hinca bo spada bek na su lugá, pasobra tur esnan cu coge spada lo perecé pa spada.” (Mateo 26:52) Djei padilanti, Jesus su siguidónan a bati nan spada haci ploeg i a nenga di tuma arma pa mata nan próhimo i di apoyá actividadnan di guera den otro maneranan. Nan ta “sigui tras di pas cu tur hende.”—Hebreonan 12:14.

Buscando e Camindanan di Pas

26, 27. Con e pueblo di Dios ta “busca pas i sigui tras di dje”? Duna un ehempel.

²⁶ E pas dje pueblo di Dios ta bai muchu mas leu cu djis nenga di participá den guera. Aunke nan ta den mas cu 230 pais i ta representá numeroso idioma i cultura, nan ta na pas cu otro. Den nan tin un cumplimentu moderno dje palabranan cu Jesus a bisa su disipelnan den promé siglo: “Na esaki tur lo sa cu boso ta mi disipelnan, si boso tin amor entre boso.” (Juan 13:35) E cristiannan di actualidad ta “hacidónan di pas.” (Mateo 5:9, nota na pia di página) Nan ta “busca pas i [ta] sigui tras di dje.” (1 Pedro 3:11) Esun cu ta sostené nan ta Jehova, “e Dios cu ta duna pas.”—Romanonan 15:33.

²⁷ Tin ehempelnan dramático di personanan cu a siña con pa bira hacidó di pas. Un yoncuman ta skirbi di su infancia: “Experencia difícil a siña mi defendé mi mes. Esei a haci mi agresivo i a yena mi cu rabia. Semper mi cosnan tabata caba na bringamentu. Tur dia mi tabata bringa cu un mucha diferente den becindario, tin biaha cu moketa, tin biaha cu baranca di piedra of botter. Mi a lanta como un mucha masha violento.” Pero cu tempu e hóben aki a respondé n’e invitacion pa bai na “e ceru dje cas di Jehova.” El a siña e camindanan divino i a bira un sirbidó pacífico di Dios.

28. Kico cristiannan por haci pa sigui tras di pas?

²⁸ Mayoria sirbidó di Jehova no ta bini di un ambiente violento asina. Tog, asta den detayenan relativamente chikitu—manera actonan di bondad, pordon i empatia—nan ta trata di fomentá pas cu otro hende. Aunke nan ta imperfecto, nan ta haci esfuerso pa aplicá e conseho di Bijbel pa “sigui soportá otro i pordoná otro libremente si un hende tin un motibu pa keha contra otro.”—Colosensenan 3:13.

Un Futuro di Pas

29, 30. Ki futuro tin p’e tera?

²⁹ Jehova a haci algu maraviyoso den “e parti final dje dianan” aki. For di tur nacion el a reuní hende cu kier sirbié i el a siña nan cana den su camindanan, camindanan di pas. Esakinan ta e personanan cu lo sobrebibí e binidero “tribulacion grandi” i drenta den un pacífico mundu nobo den cua lo eliminá guera pa semper.—Revelacion 7:14.

³⁰ Lo no tin spada—arma—mas. E salmista a skirbi dje tempu ei: “Boso bini, contemplá e actividadnan di Jehova, con el a establecé sucesonan asombroso riba tera. E ta haci gueranan stop te n’e extremidad di tera. E ta kibra e boog i ta corta e lansa na pida; e garoshinan e ta kima den candela.” (Salmo 46:8, 9) En bista di tal perspectiva, e siguiente exhortacion ta mes apropiado awe cu tempu cu Isaías a skirbié: “O hombernan dje cas di Jacob, bini i laga nos cana den e lus di Jehova.” (Isaías 2:5) Sí, laga Jehova su lus iluminá nos berea awor, i nos lo cana den su caminda pa tur eternidad.—Mikéas 4:5.

[Nota]