Capítulo Bintiun

Jehova Su Man Ta Bira Haltu

Isaías 25:1–27:13

 1. Di con Isaías tin aprecio pa Jehova?

ISAÍAS tin un amor profundo pa Jehova i p’e ta un deleite di por alab’é. E ta sclama: “O Jehova, abo ta mi Dios. Mi ta halsa bo, mi ta elogiá bo nomber.” Kico ta yuda e profeta sinti un aprecio asina profundo pa su Creador? Un factor principal ta su conocimentu di Jehova i su actividadnan. E siguiente palabranan di Isaías ta revelá e conocimentu aki: “Pasobra bo a haci cosnan maraviyoso, consehonan for di tempu mas promé, den fieldad, den confiabilidad.” (Isaías 25:1) Mescos cu Hosué, cu a biba promé cuné, Isaías sa cu Jehova ta fiel i confiabel i cu tur su “consehonan”—tur loke ta su propósito—ta ser realisá.—Hosué 23:14.

 2. Isaías ta declará awor ki conseho di Jehova, i ta contra ken e conseho aki lo ta?

² E consehonan di Jehova ta incluí su declaracionnan di huicio contra e enemigunan di Israel. Awor Isaías ta declará un di nan: “Bo a haci un stad un monton di piedra, un pueblo fortificá un ruina cu ta basha abou, un toren di habitacion di stranheronan pa no ta stad mas, cu asta pa tempu indefiní lo no ser reedificá.” (Isaías 25:2) Ta cua ta e stad no-identificá aki? Kisas Isaías ta referí na Ar di Moab, ya cu Moab for di hopi tempu ta enemigu dje pueblo di Dios.a Of kisas e ta referí na un otro stad mas poderoso: Babilonia.—Isaías 15:1; Sofonías 2:8, 9.

 3. Den ki manera e enemigunan di Jehova ta glorifik’é?

³ Con e enemigunan di Jehova lo reaccioná ora cu su conseho contra nan stad fuerte ser realisá? “Esnan cu ta un pueblo fuerte lo glorificá bo; e pueblo dje nacionnan tiránico, nan lo teme bo.” (Isaías 25:3) Ta di comprendé cu e enemigunan dje Dios todopoderoso lo tem’é. Pero con nan lo glorifik’é? Nan lo bandoná nan diosnan falsu i aceptá adoracion puru? Difícilmente! Mas bien, manera fárao i Nabucodonosor, nan lo glorificá Jehova ora nan haña nan obligá ta reconocé su superioridad aplastante.—Éxodo 10:16, 17; 12:30-33; Daniel 4:37.

 4. Cua “pueblo dje nacionnan tiránico” ta existí awe, i con asta e tin cu glorificá Jehova?

⁴ Awe “e pueblo dje nacionnan tiránico” ta “e stad grandi cu tin un reino riba e reynan dje tera,” esta, “Babilonia e Grandi,” e imperio mundial di religion falsu. (Revelacion 17:5, 18) E parti principal dje imperio aki ta cristiandad. Con e lidernan religioso di cristiandad ta glorificá Jehova? Dor di admití cu amargura e cosnan maraviyoso cu Dios a efectuá na fabor di su Testigonan. Foral na 1919 ora cu Jehova a restorá su sirbidónan na actividad dinámico despues di a libra nan for di cautiverio spiritual den Babilonia e Grandi, e lidernan aki “a spanta i a duna gloria n’e Dios di shelu.”—Revelacion 11:13.b

 5. Con Jehova ta protehá esnan cu tin confiansa absoluto den dje?

⁵ Aunke Jehova ta inspirá temor den su enemigunan, e ta un refugio pa hende mansu i humilde cu kier sirbié. Tiranonan político i religioso kisas ta purba tur manera pa kibra e fe di adoradónan berdadero, pero nan ta fracasá pasobra esakinan tin confiansa absoluto den Jehova. Cu tempu, Dios ta silenciá su opositornan cu facilidad, como si fuera tapando e solo ardiente di desierto cu un nubia of blokeando e forsa di un tempestad di awaceru cu un muraya.—Lesa Isaías 25:4, 5.

‘Un Bankete pa Tur Pueblo’

 6, 7. (a) Ki clase di bankete Jehova ta sirbi, i pa ken? (b) Kico e bankete cu Isaías a profetisá ta prefigurá?

⁶ Mescos cu un tata amoroso, Jehova no solamente ta protehá su yunan sino tambe ta alimentá nan, foral den sentido spiritual. Despues di libra su pueblo na 1919, e ta pone un bankete di victoria nan dilanti, un suministro abundante di alimento spiritual: “Jehova di ehércitonan sigur lo prepará pa tur pueblo, riba e ceru aki, un bankete di plato cu hopi zeta, un bankete di biña mantené riba kachi-kachi, di plato cu hopi zeta yená cu tuti di wesu, di biña mantené riba kachi-kachi, filtrá.”—Isaías 25:6.

⁷ Jehova ta sirbi e bankete riba su “ceru.” Kico e ceru aki ta? E ta “e ceru dje cas di Jehova” na cua tur nacion ta basha bai den “e parti final dje dianan.” Ta Jehova su “ceru santu,” caminda su fiel adoradónan no ta haci ningun daño ni causa ningun ruina. (Isaías 2:2; 11:9) Den e lugá elevá aki di adoracion, Jehova ta sirbi su bankete abundante pa hende fiel. I e bon cosnan spiritual cu awor ta ser percurá asina generosamente, ta prefigurá e bon cosnan físico cu lo ser percurá ora e Reino di Dios bira e único gobiernu di humanidad. E tempu ei lo no existí hamber mas. “Lo yega di tin abundancia di grano riba tera; riba top dje cerunan lo tin sobreabundancia.”—Salmo 72:8, 16.

 8, 9. (a) Cua dos enemigu grandi di humanidad lo ser eliminá? Splica. (b) Kico Dios lo haci pa eliminá e reproche di su pueblo?

⁸ Esnan cu ta come awor dje bankete di alimento spiritual cu Dios ta percurá tin un futuro glorioso. Scucha e siguiente palabranan di Isaías. Comparando picá i morto cu un “enboltura,” of “obra di flegtu” sofocante, e ta bisa: “Riba e ceru aki sigur [Jehova lo] traga e cara dje enboltura cu ta lora rond di tur pueblo i e obra di flegtu cu ta di flegtu den otro riba tur e nacionnan. Lo e realmente traga morto pa semper, i Señor Soberano Jehova sigur lo seca e lágrimanan for di tur cara.”—Isaías 25:7, 8a.

⁹ Sí, picá i morto lo no existí mas! (Revelacion 21:3, 4) Ademas, e reproche mentiroso cu Jehova su sirbidónan a soportá pa miles di aña tambe lo ser eliminá. “E reproche di su pueblo lo e kita di tur e tera, pasobra Jehova mes a papi’é.” (Isaías 25:8b) Con esaki lo sosodé? Jehova lo eliminá e fuente dje reproche ei, Satanas cu su simia. (Revelacion 20:1-3) Nada straño anto cu e pueblo di Dios lo sintié impulsá pa sclama: “Mira! Esaki ta nos Dios. Nos a pone nos speransa den dje, i lo e salba nos. Esaki ta Jehova. Nos a pone nos speransa den dje. Laga nos ta gososo i alegrá den su salbacion.”—Isaías 25:9.

Hende Soberbe Lo Ser Humiyá

10, 11. Ki trato severo Jehova tin reservá pa Moab?

¹⁰ Jehova ta salba esnan di su pueblo cu ta humilde. Sin embargo, Moab—Israel su bisiña—ta orguyoso, i Jehova ta odia orguyo. (Proverbionan 16:18) P’esei, humiyacion ta spera Moab. “E man di Jehova lo sosegá riba e ceru aki, i tin cu trapa Moab den su lugá manera ora ta trapa un monton di yerba secu den un lugá di mest. I e tin cu dal su mannan habri meimei di dje, manera ora un landadó ta dal su mannan habri pa landa, i e tin cu rebahá su soberbia cu e movementunan mañoso di su man. I e stad fortificá, cu bo murayanan haltu di siguridad, e tin cu tira abou; e tin cu rebah’é, pon’é den contacto cu tera, cu stòf.”—Isaías 25:10-12.

¹¹ Jehova su man lo “sosegá” riba e ceru di Moab. E resultado? Mester dal i trapa Moab soberbe mescos cu “den un lugá di mest.” Den tempu di Isaías, nan tabata trapa yerba secu den monton di sushi di bestia pa traha mest; pues Isaías ta profetisá humiyacion pa Moab, apesar di su murayanan haltu cu a parce sigur.

12. Di con Jehova ta dirigí su declaracion di huicio specíficamente contra Moab?

¹² Di con Jehova ta dirigí un conseho asina duru specíficamente na Moab? E moabitanan ta desendiente di Lot, subrino di Abraham i un adoradó di Jehova. Pues, no solamente nan ta bisiña sino tambe famia dje nacion cu Dios a cera pacto cuné. Apesar di esaki, nan a adoptá diosnan falsu i a manifestá un actitud di enemistad sin compasion contra Israel. Nan merecé nan destino. Den esaki, Moab ta manera e enemigunan di Jehova su sirbidónan djawe. E ta foral mescos cu cristiandad, cu ta pretendé di a originá dje congregacion cristian di promé siglo pero cu, manera nos a mira caba, ta e parti principal di Babilonia e Grandi.

Un Cantica di Salbacion

13, 14. Ki “stad fuerte” e pueblo di Dios tin awe, i ken ta ser permití pa drenta den dje?

¹³ Ke tal dje pueblo di Dios? Tur emocioná pasobra nan tin e fabor i proteccion di Jehova, nan ta hisa nan bos den cantica. “Riba e dia ei lo canta e cantica aki den e tera di Huda: ‘Nos tin un stad fuerte. E ta pone salbacion como muraya i fortificacion. Habri e portanan p’e nacion hustu cu ta mantené conducta fiel por drenta.’” (Isaías 26:1, 2) Aunke e palabranan aki sin duda tabatin un cumplimentu den tempu antiguo, ta bisto cu nan tin un cumplimentu awe tambe. Jehova su “nacion hustu,” Israel spiritual, ta conta cu un organisacion fuerte manera un stad. Esta un motibu pa alegrá, pa canta!

¹⁴ Ki clase di hende ta drenta den e “stad” aki? E cantica ta duna e contesta: “E inclinacion cu ta bon sostené lo bo [Dios] protehá den pas continuo, pasobra ta den bo hende ta ser impulsá pa confia. Confia den Jehova pa semper, pasobra den Jah Jehova ta e Baranca di tempu indefiní.” (Isaías 26:3, 4) “E inclinacion” cu Jehova ta sostené ta e deseo di obedecé su principionan hustu i confia den dje, en bes di den mundu su sistemanan comercial, político i religioso cu ta tambaleando. “Jah Jehova” ta e único Baranca confiabel di siguridad. Esnan cu tin pleno confiansa den Jehova ta ricibí su proteccion i ta disfrutá di “pas continuo.”—Proverbionan 3:5, 6; Filipensenan 4:6, 7.

15. Con “e pueblo elevá” a ser humiyá awe, i den ki manera “e pianan di esnan afligí” ta trap’é?

¹⁵ Ki un contraste cu loke ta pasa cu e enemigunan dje pueblo di Dios! “Esnan cu tabata biba den haltura, e pueblo elevá, el a tira abou. E ta rebah’é, e ta rebah’é te na tera; e ta pon’é den contacto cu stòf. E pia lo trap’é, e pianan di esnan afligí, e pasonan di esnan di condicion humilde.” (Isaías 26:5, 6) Mescos cu promé, Isaías kisas ta referí na un “pueblo elevá” den Moab, of kisas e kier men un otro stad, manera por ehempel Babilonia, cu sigur ta elevá den soberbia. Sea cual sea e caso, Jehova a cambia e rolnan, di manera cu awor ‘esnan afligí i di condicion humilde’ ta trapa e “pueblo elevá.” Awe e profecia aki ta cuadra precis cu Babilonia e Grandi, foral cristiandad. Na 1919 e “pueblo elevá” aki a sufri un caida humiyante ora el a hañ’é obligá ta libra e pueblo di Jehova, i e pueblo aki na su turno a cuminsá trapa esun cu tabatiné prezu. (Revelacion 14:8) Den ki manera? Dor di anunciá públicamente cu Jehova su vengansa ta biniendo riba dje.—Revelacion 8:7-12; 9:14-19.

E Deseo pa Husticia i pa e “Memoria” di Jehova

16. Ki excelente ehempel di debocion Isaías ta pone?

¹⁶ Despues dje cantica triunfante aki, Isaías ta revelá e profundidad di su propio debocion i e recompensanan di sirbi e Dios di husticia. (Lesa Isaías 26:7-9.) E profeta ta percurá un excelente ehempel di ‘pone speransa den Jehova’ i di tin un deseo profundo pa Jehova su “nomber” i “memoria.” Kico ta e memoria di Jehova? Éxodo 3:15 ta bisa: “Jehova . . . ta mi nomber te na tempu indefiní, i esaki ta e memoria di mi pa generacion tras di generacion.” Isaías stima e nomber di Jehova i tur loke e ta nificá, incluso Jehova su norma i camindanan hustu. Esnan cu ta cultivá e mésun amor pa Jehova ta sigur di su bendicion.—Salmo 5:8; 25:4, 5; 135:13; Oséas 12:5.

17. Ki privilegionan lo nenga e malbadonan?

¹⁷ Sin embargo, no ta tur hende stima Jehova i su normanan elevá. (Lesa Isaías 26:10.) Asta ora invitá e malbadonan, nan ta nenga cabesuramente di siña husticia pa nan por drenta “e tera di rectitud,” e tera ocupá dor di Jehova su sirbidónan cu ta recto den sentido moral i spiritual. Consecuentemente, e malbadonan “lo no mira e grandesa di Jehova.” Nan lo no biba pa disfrutá dje bendicionnan cu lo basha bini pa humanidad despues cu Jehova su nomber ser santificá. Asta den e mundu nobo, ora cu henter e planeta lo ta un “tera di rectitud,” algun hende kisas ta keda sin reaccioná faborablemente riba Jehova su bondad amoroso. Lo no skirbi nomber di hende asina den e buki di bida.—Isaías 65:20; Revelacion 20:12, 15.

18. Den ki manera algun hudiu den tempu di Isaías ta ciegu pasobra nan kier, i na ki tempu nan lo ser forsá pa “contemplá” Jehova?

¹⁸ “O Jehova, bo man a bira haltu, pero nan no ta contempl’é. Nan lo contemplá i ser brongosá pa motibu dje celo di bo pueblo. Sí, e candela destiná pa bo propio adversarionan lo come nan.” (Isaías 26:11) Den tempu di Isaías, Jehova a hisa su man pa protehá su pueblo dor di actua contra nan enemigunan. Pero mayoria dje hudiunan no a reconocé esaki. E personanan ei, spiritualmente ciegu pasobra nan mes kier, cu tempu lo ser forsá pa “contemplá,” esta, reconocé Jehova ora e candela di su celo come nan. (Sofonías 1:18) Mas despues Dios a bisa Ezekiel: “Nan lo tin cu sa cu ami ta Jehova.”—Ezekiel 38:23.

“Esun Cu Jehova Ta Stima E Ta Disipliná”

19, 20. Di con i den ki manera Jehova a disipliná su pueblo, i ken a beneficiá di tal disiplina?

¹⁹ Isaías sa cu cualkier pas i prosperidad cu su paisanonan ta disfrutá di dje ta debí na Jehova su bendicion. “O Jehova, lo bo husga pas pa nos, pasobra asta tur nos obranan bo a ehecutá pa nos.” (Isaías 26:12) Apesar di esaki i apesar cu Jehova a pone dilanti su pueblo e oportunidad di bira “un reino di sacerdote i un nacion santu,” Huda tabatin su bon tempu i su mal tempu. (Éxodo 19:6) No ta poco biaha e pueblo a bai adorá diosnan falsu, loke a pone Jehova disipliná nan bes tras bes. Sin embargo, tal disiplina ta prueba di Jehova su amor pasobra “esun cu Jehova ta stima e ta disipliná.”—Hebreonan 12:6.

²⁰ Hopi bes, Jehova ta disipliná su pueblo dor di permití otro nacionnan, “otro doñonan,” dominá nan. (Lesa Isaías 26:13.) Na aña 607 P.E.C., Jehova ta permití Babilonia hiba nan den exilio. Esaki ta beneficiá nan? Sufrimentu riba su mes no ta beneficiá un persona. Sin embargo, si esun cu sufri siña for di loke sosodé, repentí i duna Jehova debocion exclusivo, e ora ei e ta beneficiá. (Deuteronomio 4:25-31) Tin hudiu cu ta mustra berdadero repentimentu? Sí! Isaías ta bisa proféticamente: “Pa bo so nos lo mencioná bo nomber.” Despues di regresá for di exilio na aña 537 P.E.C., e hudiunan hopi bes tin cu ser disipliná pa otro picánan, pero nunca mas nan ta cai den e trampa di adorá dios di piedra.

21. Kico lo pasa cu esnan cu a oprimí e pueblo di Dios?

²¹ Kico di esnan cu a capturá Huda? “Impotente den morto, nan lo no lanta. P’esei bo a dirigí bo atencion pa anikilá nan i destruí tur mencion di nan.” (Isaías 26:14) Babilonia lo tin cu sufri pa e crueldadnan cu el a causa Jehova su nacion scogí. Jehova lo usa e medo i personan pa tumba orguyoso Babilonia i libra su pueblo exiliá. E gran stad, Babilonia, lo keda impotente, como si fuera morto. Cu tempu, lo e no existí mas.

22. Con Dios a bendicioná su pueblo den tempu moderno?

²² Den e cumplimentu moderno, na aña 1919 a libra un resto di Israel spiritual refiná for di Babilonia e Grandi i restorá nan na Jehova su sirbishi. Cu vitalidad renobá, cristiannan ungí a dedicá nan mes celosamente na e trabou di predicá. (Mateo 24:14) En buelta, Jehova a bendicioná nan cu aumento, i asta a trece un multitud grandi di “otro carné” pa sirbi huntu cu nan. (Juan 10:16) “Bo a agregá n’e nacion; o Jehova, bo a agregá n’e nacion; bo a glorificá bo mes. Bo a extendé na un distancia grandi tur e fronteranan dje pais. O Jehova, durante angustia nan a dirigí nan atencion na bo; nan a drama un oracion di fluister ora nan a ricibí bo disiplina.”—Isaías 26:15, 16.

“Nan Lo Lanta”

23. (a) Ki demostracion sobresaliente di Jehova su poder ta tuma lugá na aña 537 P.E.C.? (b) Ki demostracion similar ta tuma lugá na aña 1919 E.C.?

²³ Isaías ta bolbe referí na e situacion cu Huda ta aden miéntras e ta den cautiverio ainda na Babilonia. E ta compará e nacion cu un muher cu tin dolor di parto pero cu no por duna lus sin yudansa. (Lesa Isaías 26:17, 18.) E yudansa ei ta bini na aña 537 P.E.C., i e pueblo di Jehova ta regresá nan patria, ansioso pa reedificá e tempel i restorá adoracion berdadero. Na moda di papia, ta lanta e nacion for di morto. “Bo mortonan lo biba. Un cadaver di mi—nan lo lanta. Spierta i sclama di goso, boso cu ta biba den stòf! Pasobra bo serena ta manera serena di mata di malva, i e tera mes lo laga esnan impotente den morto cai manera ora duna lus.” (Isaías 26:19) Esta un demostracion di Jehova su poder! Anto ora e palabranan aki a cumpli den sentido spiritual na 1919, esei tambe tabata un demostracion grandioso! (Revelacion 11:7-11) I nos ta anhelá mashá e momento pa e palabranan aki cumpli den sentido literal den e mundu nobo i esnan impotente den morto ‘tende Jesus su bos i sali’ for dje grafnan conmemorativo!—Juan 5:28, 29.

24, 25. (a) Con e hudiunan na aña 539 P.E.C. lo a obedecé e mandamentu di Jehova di sconde nan mes? (b) Kico kisas e “kambernan interior” ta indicá den tempu moderno, i ki actitud nos tin cu cultivá pa cu esakinan?

²⁴ Sin embargo, pa hende fiel por disfrutá dje bendicionnan spiritual primintí mediante Isaías, nan tin cu obedecé e mandamentunan aki di Jehova: “Bai, mi pueblo, drenta den bo kambernan interior, i cera bo portanan bo tras. Sconde bo mes pa un ratu so te ora e denunciacion pasa. Pasobra mira! Jehova ta saliendo for di su lugá pa exigí cuenta p’e eror dje habitante dje tera contra dje, i e tera sigur lo exponé su dramamentu di sanger i lo no tapa mas esnan matá di dje.” (Isaías 26:20, 21; compará cu Sofonías 1:14.) E pasashi aki kisas tin un cumplimentu inicial ora cu e medo i personan, encabesá pa rey Ciro, conkistá Babilonia na aña 539 P.E.C. Segun e historiadó griego Jenofonte, ora Ciro ta drenta Babilonia, e ta manda tur hende keda den nan cas pasobra su cabayeria tin “ordu pa mata tur hende cu nan haña pafó di cas.” Awe, posiblemente e “kambernan interior” dje profecia aki ta estrechamente relacioná cu e dies di miles di congregacionnan di Jehova su pueblo rond mundu. E congregacionnan ei lo sigui desempeñá un papel clave den nos bida, asta durante “e tribulacion grandi.” (Revelacion 7:14) Ta ki vital anto pa nos mantené un actitud sano pa cu e congregacion i asociá regularmente cuné!—Hebreonan 10:24, 25.

²⁵ Pronto e mundu di Satanas lo yega na su fin. Ainda nos no sa con Jehova lo protehá su pueblo durante e tempu inspirador di temor ei. (Sofonías 2:3) Pero, nos sa sí cu nos sobrebibencia lo dependé di nos fe den Jehova i di nos lealtad i obedencia na dje.

26. Kico “Leviatan” ta den tempu di Isaías i den nos tempu, i kico ta sosodé cu e “monster di laman” aki?

²⁶ Mirando na e tempu ei den futuro, Isaías ta profetisá: “Riba e dia ei Jehova, cu su spada duru i grandi i fuerte, lo dirigí su atencion na Leviatan, e colebra cu ta lastra, sí na Leviatan, e colebra trocí, i sigur lo e mata e monster di laman cu ta den laman.” (Isaías 27:1) Den e promé cumplimentu, “Leviatan” ta referí na e paisnan na cua Israel a plama, manera Babilonia, Egipto i Asiria. E paisnan aki lo no por stroba e pueblo di Jehova di regresá su patria na e debido tempu. Pero ken ta e Leviatan moderno? Parce cu ta Satanas—“e colebra original”—i su sistema di cosnan malbado aki riba tera, su instrumento pa bringa contra Israel spiritual. (Revelacion 12:9, 10; 13:14, 16, 17; 18:24) “Leviatan” a perde su gara riba e pueblo di Dios na aña 1919, i pronto lo e disparcé completamente ora cu Jehova sigur lo “mata e monster di laman.” Miéntras tantu, nada cu “Leviatan” purba haci contra e pueblo di Jehova lo tin berdadero éxito.—Isaías 54:17.

“Un Cunucu di Wijndruif di Biña Cu Ta Scuma”

27, 28. (a) Cu kico Jehova su cunucu di wijndruif a yena henter e tera? (b) Con Jehova ta protehá su cunucu di wijndruif?

²⁷ Cu un otro cantica Isaías ta ilustrá awor masha bunita e productividad di Jehova su pueblo liberá: “Riba e dia ei boso canta p’e: ‘Un cunucu di wijndruif di biña cu ta scuma! Ami, Jehova, ta proteh’é. Tur momento lo mi muh’é. Pa niun hende no dirigí su atencion contra dje, lo mi proteh’é asta anochi i den dia.’” (Isaías 27:2, 3) E resto di Israel spiritual i nan colaboradónan diligente en berdad a yena henter e tera cu nan producto spiritual. Esta un motibu pa celebrá, pa canta! Tur mérito ta bai na Jehova, esun cu ta cuida su cunucu di wijndruif cu amor.—Compará cu Juan 15:1-8.

²⁸ Di berdad goso a remplasá e rabia cu Jehova tabatin! “Mi no tin furia. Ken lo duna mi mata di sumpiña i mal yerba den e bataya? Lo mi trapa riba nan. Na e mésun tempu lo mi pega nan na candela. Di otro manera lagu’é gara mi lugá fortificá, lagu’é haci pas cu mi; pas, lagu’é haci cu mi.” (Isaías 27:4, 5) Pa ta sigur cu su matanan di wijndruif ta sigui producí un abundancia di “biña cu ta scuma,” Jehova ta aplastá i ta caba manera cu candela cu tur influencia semehante na mal yerba cu lo por corumpí su cunucu di wijndruif. P’esei, no laga niun hende pone e bienestar dje congregacion cristian na peliger! Mas bien, laga tur hende ‘gara Jehova su lugá fortificá,’ dor di busca su fabor i proteccion. Dje manera ei nan ta haci pas cu Dios, algu asina importante cu Isaías ta mencion’é dos bes. E resultado? “Den e dianan binidero Jacob lo saca rais, Israel lo saca flor i realmente lo spruit; i nan simplemente lo yena e superficie dje tera productivo cu producto.” (Isaías 27:6)c Ki un evidencia maraviyoso di Jehova su poder cumplimentu dje versículo aki ta! Desde 1919, cristiannan ungí a yena e tera cu “producto,” alimento spiritual nutritivo. Como resultado, miyones di otro carné leal a djoin nan, i huntu nan ta “rindiendo sirbishi sagrado na [Dios] di dia i anochi.” (Revelacion 7:15) Meimei di un mundu corupto, cu goso e cristiannan aki ta tene su normanan elevá na haltu. I Jehova ta sigui bendicioná nan cu aumento. Laga nos nunca perde for di bista e gran privilegio cu nos tin: participá dje “producto” i compartié cu otro hende mediante nos propio gritu di alabansa!

[Nota]

[Kuadro na página 285]

“Un Cachu Grandi” Ta Proclamá Libertad

Na aña 607 P.E.C., Huda su dolornan ta aumentá ora cu Jehova ta disipliná su nacion rebelde cu e golpi di exilio. (Lesa Isaías 27:7-11.) E eror dje nacion ta demasiado grandi pa sacrificio di bestia expiá. P’esei, mescos cu un hende por plama carné of cabritu cu “un gritu spantoso” of kisas “supla” blachi bai cu un bientu fuerte, asina Jehova ta expulsá Israel for di nan patria. Despues di esei, asta pueblonan débil, simbolisá dor dje sexo femenino, lo por probechá di loke ta resta dje pais.

Sin embargo, e tempu ta yega pa Jehova libra su pueblo for di cautiverio. E ta libra nan mescos cu kisas un cunukero ta libra olijfi cu, na moda di papia, ta prezu na palu. “Tin cu sosodé riba e dia ei cu Jehova lo bati kita e fruta, for dje coriente dje Riu [Eufrátes] te na e vaye torencial di Egipto, i asina lo piki boso un pa un, o yunan di Israel. I tin cu sosodé riba e dia ei cu lo supla riba un cachu grandi, i esnan cu ta perecé den e tera di Asiria i esnan cu ta plamá den e tera di Egipto sigur lo bini i buig dilanti Jehova riba e ceru santu di Jerusalem.” (Isaías 27:12, 13) Ciro, despues di su victoria na aña 539 P.E.C., ta saca un decreto cu ta libra tur hudiu den su imperio, incluso esnan na Asiria i Egipto. (Ésdras 1:1-4) Ta como si fuera nan a supla “un cachu grandi,” resonando e himno di libertad pa e pueblo di Dios.

[Plachi na página 275]

“Un bankete di plato cu hopi zeta”

[Plachi na página 277]

Babilonia ta ser trapá bou di pia di esnan cu tabata su prizonero

[Plachi na página 278]

“Drenta den bo kambernan interior”