Capítulo Cincu
Jehova Ta Humiyá Esnan Cu Ta Halsa Nan Mes
1, 2. Pakico e mensahe profético cu Isaías a entregá n’e hudiunan di su tempu ta di interes pa nos?
DISGUSTÁ cu e condicion di Jerusalem i Huda, profeta Isaías ta dirigí su mes awor na Jehova Dios i ta declará: “Bo a bandoná bo pueblo, e cas di Jacob.” (Isaías 2:6a) Kico a inducí Dios pa rechasá e pueblo cu e mes a scoge como su “propiedad special”?—Deuteronomio 14:2.
2 E denuncia cu Isaías ta haci contra e hudiunan di su tempu ta di gran interes pa nos. Pakico? Pasobra e condicion di cristiandad awe ta masha parecido na esun dje pueblo di Isaías. I e huicio cu Jehova ta pronunciá tambe ta mescos. Prestando atencion na Isaías su proclamacion lo duna nos un idea cla di kico Dios ta condená i lo yuda nos evitá prácticanan cu e ta desaprobá. Wel, laga nos analisá cu expectativa e palabra profético di Jehova na Isaías 2:6–4:1.
Den Orguyo Nan Ta Buig
3. Ki eror di su pueblo Isaías ta confesá?
3 Isaías ta confesá e eror di su pueblo, bisando: “Nan a yena cu loke ta for di Oost, i nan ta practicante di magia mescos cu e filisteonan, i nan ta abundá cu yu di stranhero.” (Isaías 2:6b) Rond di 800 aña promé, Jehova a duna su pueblo scogí e mandato: “No haci boso mes impuru dor di ningun dje cosnan aki [cu cua] e nacionnan cu mi ta manda bai for di dilanti boso a haci nan mes impuru.” (Levítico 18:24) Relacioná cu esnan cu el a scoge como su propiedad special, Jehova a obligá Balam bisa: “For di top dje barancanan mi ta mira nan, i for dje ceritunan mi ta contemplá nan. Ei nan ta sigui biba aislá como pueblo, i nan no ta conta nan mes entre e nacionnan.” (Númeronan 23:9, 12) Sin embargo, p’e tempu di Isaías ya e scogínan di Jehova a adoptá e custumbernan repugnante dje nacionnan bisiña i ta ‘yen cu loke ta for di Oost.’ En bes di pone fe den Jehova i den su palabra, nan ta practicá “magia mescos cu e filisteonan.” En bes di keda separá for dje nacionnan, e pais ta “abundá cu yu di stranhero,” sin duda, stranhero cu ta pone e pueblo di Dios den contacto cu prácticanan malbado.
4. En bes di impulsá nan pa gradicí Jehova, ki efecto rikesa i fortalesa militar tin riba e hudiunan?
4 Isaías ta observá e prosperidad económico actual i e fortalesa militar di Huda durante e reinado di rey Uzías i ta declará: “Nan tera ta yen di plata cu oro, i no tin límite na nan tesoronan. I nan tera ta yen di cabai, i no tin límite na nan garoshinan.” (Isaías 2:7) E pueblo ta gradicí Jehova pa tal prosperidad i fortalesa militar? (2 Crónicanan 26:1, 6-15) Al contrario! En bes di esei, nan ta cifra nan confiansa den e rikesa i ta bira lomba pa Jehova Dios, e Fuente di nan prosperidad. Cu ki resultado? “Nan tera ta yen di dios cu no bal nada. Dilanti e obra di man di hende nan ta buig, dilanti loke dede di hende a traha. I hende terenal ta buig, i homber ta keda rebahá, i no ta posibel pa bo pordoná nan.” (Isaías 2:8, 9) Nan ta bira nan cara for dje Dios bibu i ta buig dilanti ídolo sin bida.
5. Pakico buig dilanti ídolo no ta un acto di humildad?
5 Ora hende buig, esei por ta un señal di humildad. Pero buig dilanti obhetonan sin bida ta banidad, i esei ta “rebahá” of degradá e adoradó di ídolo. Con Jehova por pordoná un picá asina? Kico e adoradónan di dios falsu aki lo haci ora Jehova pidi nan cuenta i rason?
‘Wowo Orguyoso Tin cu Ser Rebahá’
6, 7. (a) Riba Jehova su dia di huicio, kico ta sosodé cu esnan cu ta halsa nan mes? (b) Riba kico i riba ken Jehova ta expresá su rabia, i pakico?
6 Isaías ta continuá: “Drenta den e baranca i sconde bo mes den stòf pa causa dje miedu cu Jehova ta inspirá, i for di su superioridad espléndido.” (Isaías 2:10) Pero ningun baranca lo ta suficiente grandi pa protehá nan, ningun cos di tapa lo ta suficiente diki pa sconde nan for di Jehova, e Todopoderoso. Ora e bini pa ehecutá su huicio, “e wowonan orguyoso di hende terenal tin cu ser rebahá, i e soberbia di hombernan tin cu buig; i Jehova so tin cu ser poné na haltu riba e dia ei.”—Isaías 2:11.
7 “E dia cu ta pertenecé na Jehova di ehércitonan” ta acercando. Esei lo ta un tempu pa Dios expresá su rabia “riba tur e palunan di seda di Líbanon cu ta soberbe i halsá, i riba tur e palunan masivo di Basan; i riba tur e cerunan soberbe i riba tur e ceritunan cu ta halsá; i riba tur toren haltu i riba tur muraya fortificá; i riba tur barcu di Társis i riba tur boto deseabel.” (Isaías 2:12-16) Sí, tur organisacion cu hende a traha como símbolo di su orguyo i tur individuo malbado lo yega na turno riba e dia di rabia di Jehova. Pues, “e arogancia di hende terenal tin cu buig, i e soberbia di hombernan tin cu ser rebahá; i Jehova so tin cu ser poné na haltu riba e dia ei.”—Isaías 2:17.
8. Con e dia di huicio profetisá ta bini riba Jerusalem na aña 607 P.E.C.?
8 E dia di huicio profetisá ta bini riba e hudiunan na aña 607 P.E.C. ora rey Nabucodonosor di Babilonia destruí Jerusalem. E habitantenan ta mira nan stad stimá tur na vlam, su edificionan magnífico tumbá i su murayanan fuerte ruiná. E tempel di Jehova ta keda completamente destruí. Ni nan tesoronan ni nan garoshinan tin balor riba “e dia cu ta pertenecé na Jehova di ehércitonan.” I nan ídolonan? Ta sosodé net manera Isaías ta predicí: “E diosnan cu no bal nada lo pasa forbij por completo.” (Isaías 2:18) E hudiunan, entre cua tin prins i hombernan poderoso, ta ser hibá den exilio na Babilonia. Jerusalem tin cu keda desolá pa 70 aña.
9. Den ki sentido e situacion di cristiandad ta parecido na esun di Jerusalem i Huda den tempu di Isaías?
9 E situacion di cristiandad ta masha parecido na esun di Jerusalem i Huda den tempu di Isaías! Ta masha bisto cu cristiandad a cultivá un relacion estrecho cu e nacionnan dje mundu aki. E ta apoyá Nacionnan Uní cu entusiasmo i el a yena su cas cu ídolo i custumbernan no-bíblico. Su miembronan ta materialista i ta pone nan confiansa den poder militar. I acaso nan no ta mira nan clero como digno di gran distincion, atribuyendo título i onornan na nan? Sin falta, e halsamentu di cristiandad lo yega na su fin. Pero na ki tempu?
E Binidero “Dia di Jehova”
10. Na cua “dia di Jehova” apostel Pablo i Pedro ta señalá?
10 E Scritura ta señalá na un “dia di Jehova” cu lo ta muchu mas importante cu e dia di huicio cu a bini riba Jerusalem i Huda di antigwedad. Bou di inspiracion, apostel Pablo a relacioná e binidero “dia di Jehova” cu e presencia dje Rey entronisá Jesucristo. (2 Tesalonicensenan 2:1, 2) Pedro a papia dje dia ei en coneccion cu e establecimentu di ‘shelu nobo i un tera nobo den cua husticia lo tin cu biba.’ (2 Pedro 3:10-13) Ta e dia riba cua Jehova lo ehecutá su huicio riba henter e sistema di cosnan malbado aki, incluso riba cristiandad.
11. (a) Ken lo por “wanta bou” dje binidero “dia di Jehova”? (b) Con nos por haci Jehova nos refugio?
11 “Ai dje dia,” profeta Joël ta bisa, “pasobra e dia di Jehova ta cerca, i lo e bini manera un plundermentu violento for dje Todopoderoso!” En bista cu e “dia” ei ta tras di porta, tur hende lo no mester ta preocupá pa haña proteccion durante e tempu inspirador di temor ei? “Ken lo por wanta bou di dje?,” Joël ta puntra. E mes ta contestá: “Jehova lo ta un refugio pa su pueblo.” (Joël 1:15; 2:11; 3:16) Jehova Dios lo ta un refugio pa esnan cu tin un spiritu orguyoso i cu ta pone nan confiansa den rikesa, poder militar i dios cu hende a traha? Di ningun manera! Dios a bandoná asta su pueblo scogí ora nan a actua dje manera aki. Ta ki vital anto pa tur sirbidó di Dios “busca husticia, busca suavedad,” i examiná seriamente e lugá cu Jehova su adoracion ta ocupá den nan bida!—Sofonías 2:2, 3.
“Pa Spitsmuis i pa Raton Djanochi”
12, 13. Pakico ta apropiado pa adoradónan di ídolo tira nan diosnan “pa spitsmuis i pa raton djanochi” riba e dia di Jehova?
12 Kico adoradónan di dios falsu lo pensa di nan ídolonan durante e gran dia di Jehova? Isaías ta contestá: “Hende lo drenta den cueba dje barancanan i den e buracunan di stòf, pa causa dje miedu cu Jehova ta inspirá i for di su superioridad espléndido, ora e lanta pa tera tembla. Riba e dia ei hende terenal lo tira su diosnan di plata sin balor i su diosnan di oro inútil . . . pa spitsmuis i pa raton djanochi, afin di drenta den e buracunan den baranca i den e skernan di baranca steil, pa causa dje miedu cu Jehova ta inspirá i for di su superioridad espléndido, ora e lanta pa pone tera tembla. Pa boso mes bon, keda leu for di hende terenal, kende su rosea ta den su nanishi, pasobra a base di kico mester tene cuenta cuné?”—Isaías 2:19-22.
13 Spitsmuis ta biba den buracu den tera, i raton djanochi ta biba den cueba scur i bandoná. Ademas, caminda hopi raton djanochi ta biba tin un holó repugnante i formacion di capa diki di nan sushi. Bon lugá pa tira dios falsu aden. Un lugá di scuridad i impuresa ta tur loke nan merecé. Pa loke ta hende, riba e dia di huicio di Jehova nan lo busca refugio den cueba i sker den baranca. Pues, tantu e diosnan falsu como esnan cu ta adorá nan lo core e mésun suerte. Net manera Isaías a profetisá, ídolo sin bida no a salba ni esnan cu ta adorá nan ni Jerusalem for dje gara di Nabucodonosor na aña 607 P.E.C.
14. Kico hende cu mentalidad mundano lo haci durante e binidero dia di huicio di Jehova riba e imperio mundial di religion falsu?
14 Kico hende lo haci durante e binidero dia di huicio di Jehova riba cristiandad i otro sectornan dje imperio mundial di religion falsu? Ora hende mira con e situacion rond mundu ta empeorá, probablemente mayoria di nan lo bin realisá cu nan diosnan no bal nada. En bes di acudí na esakinan, por ta masha bon cu nan lo busca refugio i proteccion den organisacionnan terenal no-religioso, tal bes cerca Nacionnan Uní, e “bestia salbahe di color scarlata” di Revelacion capítulo 17. Ta e ‘dies cachunan’ dje bestia salbahe simbólico ei lo destruí Babilonia e Grandi, e imperio mundial di religion falsu, di cua cristiandad ta un parti importante.—Revelacion 17:3, 8-12, 16, 17.
15. Con Jehova so lo “ser poné na haltu” riba su dia di huicio?
15 Aunke e destruccion i kimamentu di Babilonia e Grandi lo ta e obra directo di e dies cachunan simbólico ei, e ta, en realidad, e ehecucion di Jehova su huicio. Relacioná cu Babilonia e Grandi, Revelacion 18:8 ta bisa: “P’esei, den un solo dia su plaganan lo bini, morto i lamentacion i hamber, i lo e ser kimá completamente cu candela, pasobra Jehova Dios, cu a husgu’é ta fuerte.” Pues ta Jehova Dios, e Todopoderoso, ta haña e mérito pa libra humanidad for dje dominacion di religion falsu. Manera Isaías ta bisa, “Jehova so tin cu ser poné na haltu riba e dia ei. Pasobra ta e dia cu ta pertenecé na Jehova di ehércitonan.”—Isaías 2:11b, 12a.
‘Boso Lidernan Ta Pone Boso Dual’
16. (a) Kico “sosten i apoyo” di un sociedad humano ta consistí di dje? (b) Con e pueblo di Isaías lo sufri ora kita e “sosten i apoyo” for di nan sociedad?
16 Pa un sociedad humano por ta stabil, e mester tin su “apoyo i sosten,” esta, necesidadnan di bida manera cuminda i awa i, mas importante, lidernan confiabel cu por guia e pueblo i mantené órden público. Pero relacioná cu Israel di antigwedad, Isaías ta profetisá: “Mira!, e Señor berdadero, Jehova di ehércitonan, ta kita apoyo i sosten for di Jerusalem i for di Huda, henter e apoyo di pan i henter e apoyo di awa, homber poderoso i guerero, hues i profeta, i practicante di miramentu di destino i anciano, hefe di cincuenta i homber altamente respetá i consehero i experto den arte mágico i e encantador ábil.” (Isaías 3:1-3) Mucha lo bira prins i goberná di un manera caprichoso. No ta gobernante so lo oprimí e pueblo sino cu “e pueblo realmente lo tiranisá otro . . . Nan lo lansa nan mes, e mucha homber contra e homber bieu, i esun cu no ta ser respetá mashá contra esun cu tin cu ricibí onor.” (Isaías 3:4, 5) Mucha ta “lansa nan mes” contra nan grandinan i falta respet pa nan. E condicion di bida lo ta asina malu cu un hende lo bisa un otro cu no tin ningun cualificacion pa goberná: “Bo tin un mantel. Bo tin cu bira un dictador pa nos, i e masa derotá aki mester ta bou di bo man.” (Isaías 3:6) Pero esnan cu ta haña e invitacion aki lo rechas’é, insistiendo cu nan no tin ni e capacidad pa cura e tera heridá ni e rikesa pa asumí tal responsabilidad. Nan lo bisa: “Lo mi no bira un hende cu ta verband herida; i den mi cas no tin ni pan ni mantel. Boso no tin cu pone mi como dictador riba e pueblo.”—Isaías 3:7.
17. (a) Den ki sentido e picá di Jerusalem i di Huda tabata “manera di Sódoma”? (b) Ken Isaías ta culpa p’e situacion cu su pueblo ta aden?
17 Isaías ta continuá: “Jerusalem a trompecá, i Huda mes a cai, pasobra nan lenga i nan tratonan ta contra Jehova, dor cu nan a comportá nan mes di un manera rebelde den bista di su gloria. Sí, e expresion di nan cara ta testificá contra nan, i nan ta conta di nan picá cu ta manera di Sódoma. Nan no a scond’é. Ai di nan alma! Pasobra nan a causa calamidad pa nan mes.” (Isaías 3:8, 9) E pueblo di Dios a rebelá contra e Dios berdadero den palabra i accion. Asta nan expresion di cara sin bergwensa i sin remordimentu ta reda nan picánan, cu ta mes repugnante cu esnan di Sódoma. Aunke nan ta den un pacto cu Jehova Dios, lo e no cambia su normanan pa nan. “Lo bai bon cu e hustu, pasobra nan lo come e fruta di nan mes trato. Ai di e malbado!—Calamidad; pasobra e trato cu el a duna cu su propio mannan lo ser duná na dje! Pa loke ta mi pueblo, esnan cu ta asign’é tarea ta trat’é cu severidad, i simpel hende muher realmente ta goberná riba dje. O mi pueblo, esnan cu ta guia bo ta pone bo cana dual, nan a bruha e caminda di bo bereanan.”—Isaías 3:10-12.
18. (a) Ki sentencia Jehova ta pronunciá contra anciano i prins dje tempu di Isaías? (b) Ki les nos ta siña for di Jehova su huicio contra e anciano i prinsnan?
18 Jehova ta “sentenciá” i ta “drenta den huicio” cu anciano i prins di Huda: “Boso mes a kima e cunucu di wijndruif por completo. Loke a kita via robo for di esun afligí ta den boso cas. Kico boso kier men ora boso ta aplastá mi pueblo, i ora boso ta mula cara di esnan afligí?” (Isaías 3:13-15) En bes di traha p’e bienestar dje pueblo, lidernan ta ocupá nan mes cu prácticanan fraudulento. Nan ta abusá di nan autoridad dor di enrikesé nan mes i horta esnan cu ta pober i den necesidad. Pero e lidernan aki lo tin cu duna cuenta i rason dilanti Jehova di ehércitonan p’e manera cu nan ta oprimí esnan afligí. Esta un spiertamentu pa esnan cu ta ocupá un puesto di responsabilidad awe! Nan tene cuidou pa hamas nan malusá nan autoridad.
19. Di ki opresion i persecucion cristiandad ta culpabel?
19 Cristiandad—particularmente su clero i lidernan prominente—di un manera fraudulento a adkerí hopi posesion cu lo mester pertenecé na e pueblo comun, e pueblo cu el a oprimí i ta sigui oprimí. Tambe el a bati, persiguí i maltratá e pueblo di Dios i a trece gran reproche riba e nomber di Jehova. Nos por tin sigur cu na su debido tempu, Jehova lo drenta den huicio contra dje.
“Marca di Heru Cayente En Bes di Bunitesa”
20. Pakico Jehova ta denunciá “e yu muhernan di Síon”?
20 Despues cu Jehova caba di denunciá e maldad dje lidernan, e ta dirigí su mes n’e muhernan di Síon, esta di Jerusalem. Aparentemente pa bai tras di moda, “e yu muhernan di Síon” ta bisti “cadena di pia”—mará na enkel—cu ta producí un zonido melodioso. E muhernan ta cana cu “stap chikitu i lihé,” adoptando loke lo por ser considerá un estilo di cana refiná i femenino. Acaso tin algu malu den esaki? E problema ta sinta den e actitud dje muhernan aki. Jehova ta bisa: “E yu muhernan di Síon a bira soberbe i nan ta cana cu nan garganta di rek i mirando di un manera provocativo cu nan wowo.” (Isaías 3:16) E soberbia ei no ta scapa castigu.
21. Con e huicio di Jehova contra Jerusalem ta afectá e muhernan hudiu?
21 P’esei, ora Jehova su huicio bini riba e tera, e “yu muhernan di Síon” halsá aki lo perde tur cos—asta e bunitesa cu nan ta asina orguyoso di dje. Jehova ta profetisá: “Tambe Jehova realmente lo yena e corona di cabes dje yu muhernan di Síon cu sarna, i Jehova mes lo laga nan frenta sunú. Riba e dia ei Jehova lo kita e bunitesa dje cadenanan di enkel i e banchinan di cabes i e adornonan den forma di luna, e renchinan di orea largu i e armbandnan i e velonan, e pañanan di cabes i e cadenanan di pia i e banchinan di pechu i e ‘casnan dje alma’ [probablemente botter di perfume] i e cocolishinan pa adorno [of, amuleto], e renchinan di dede i e renchinan di nanishi, e bistínan di ceremonia i e túnicanan djariba i e mantelnan i e tasnan, i e spielnan di man i e pañanan djabou i e tulbannan i e velonan grandi.” (Isaías 3:17-23; wak notanan na pia di página.) Esta un cambio trágico!
22. Ademas di nan adornonan, kico mas e muhernan di Jerusalem ta perde?
22 E mensahe profético ta sigui bisa: “En bes di zeta di bálsamo lo tin simplemente un holó mùf; i en bes di un faha, un cabuya; i en bes di un areglo di cabei artístico, pelon; i en bes di un bistí luhoso, fahamentu cu paña di sacu; marca di heru cayente en bes di bunitesa.” (Isaías 3:24) Na aña 607 P.E.C., e muhernan orguyoso di Jerusalem ta cai for di rikesa den pobresa. Nan ta perde nan libertad i ta ricibí “marca di heru” como señal di sclabitud.
“Sigur Lo Hacié Bashí”
23. Kico Jehova ta proclamá relacioná cu Jerusalem?
23 Dirigiendo su mes awor n’e stad di Jerusalem, Jehova ta proclamá: “Bo propio hombernan lo cai pa medio di spada, i bo poder pa medio di guera. I su entradanan lo mester ta na luto i expresá tristesa, i sigur lo hacié bashí. Lo e cai sinta abou riba tera.” (Isaías 3:25, 26) E hombernan di Jerusalem, incluso su poderosonan, lo ser matá den bataya. Lo haci e stad pareu cu suela. Pa “su entradanan,” lo ta un tempu pa “ta na luto i expresá tristesa.” Jerusalem lo keda “bashí,” sin ocupante.
24. Ki consecuencianan drástico e morto dje hombernan matá pa spada tin p’e muhernan di Jerusalem?
24 E morto dje hombernan matá pa spada lo tin consecuencianan drástico p’e muhernan di Jerusalem. Na conclusion dje pasashi aki di su buki profético, Isaías ta predicí: “Shete muher realmente lo gara un solo homber riba e dia ei, bisando: ‘Nos lo come nos propio pan i bisti nos propio mantelnan; solamente laga nos carga bo nomber pa kita nos reproche.’” (Isaías 4:1) E scarcedad di homber soltero cu por casa lo bira asina severo cu vários hende muher lo pega na un solo homber pa por carga su nomber, esta, pa nan ta públicamente conocí como su esposanan. Dje forma ei nan lo ta liber dje bergwensa di no tin un casá. E Ley di Moises a rekerí pa un homber duna su casá cuminda i paña. (Éxodo 21:10) Sin embargo, dor di bai di acuerdo pa ‘come nan propio pan i bisti nan propio mantel,’ e muhernan aki ta dispuesto pa libra e homber di su obligacionnan legal. Esta un situacion di desesperacion pa esnan cu un tempu tabata ‘yu muhernan soberbe di Síon’!
25. Kico ta spera esnan cu ta halsa nan mes?
25 Jehova ta humiyá esnan cu ta halsa nan mes. E ta haci esei na aña 607 P.E.C., ora e pone e orguyo di su pueblo scogí “buig” i “rebahá” nan “soberbia.” Cristian berdadero no mag lubidá nunca cu “Dios ta oponé esnan halsá, pero ta duna bondad inmerecí na esnan humilde.”—Santiago 4:6.
[Plachi na página 50]
Ni ídolo, ni rikesa, ni hazaña militar ta salba Jerusalem riba e dia di huicio di Jehova
[Plachi na página 55]
Riba “e dia di Jehova,” e imperio mundial di religion falsu lo ser destruí