Capítulo Bintitres

Keda den Expectativa di Jehova

Isaías 30:1-33

 1, 2. (a) Kico Isaías capítulo 30 ta contené? (b) Cua preguntanan nos lo considerá awor?

DEN Isaías capítulo 30, nos ta lesa mas declaracion formal divino contra e malbadonan. Sin embargo, e parti aki dje profecia di Isaías ta resaltá algun cualidad alentador di Jehova. De echo, Jehova su característicanan ta ser describí asina bibu cu nos por, na moda di papia, mira su presencia consolador, tende su bos guiador i sinti e caricia di su mannan curativo.—Isaías 30:20, 21, 26.

² Pero tog e paisanonan di Isaías, e habitantenan apóstata di Huda, ta nenga di bolbe na Jehova. Mas bien, nan ta pone nan confiansa den hende. Kico Jehova ta opiná di esaki? I con e parti aki dje profecia di Isaías ta yuda cristiannan awe keda den expectativa di Jehova? (Isaías 30:18) Laga nos wak.

Un Locura i Eror Fatal

 3. Ki conspiracion Jehova ta saca na cla?

³ Ya pa algun tempu e lidernan di Huda ta conspirá den secreto pa haña un manera pa evitá di cai bou dje yugo di Asiria. Sin embargo, Jehova tabata vigilá nan, i awor e ta saca nan conspiracion na cla: “‘Ai dje yunan cabesura,’ ta e expresion di Jehova, ‘esnan dispuesto pa cumpli cu conseho, pero no di mi; i pa drama un ofrenda di bebida, pero no cu mi spiritu, afin di agregá picá na picá; esnan cu ta sali bai pa baha na Egipto.’”—Isaías 30:1, 2a.

 4. Con Dios su pueblo rebelde a pone Egipto den e lugá di Dios?

⁴ Esta un shok e lidernan ei yen di intriga ta haña ora nan tende con nan plan ta ser revelá! Biaha bai Egipto pa cera un aliansa cuné ta mas cu un acto di hostilidad contra Asiria; esei ta rebelion contra Jehova Dios. Den tempu di rey David, e nacion a considerá Jehova como su fortalesa i a tuma refugio den ‘e sombra di su ala.’ (Salmo 27:1; 36:7) Awor nan ta “busca amparo den e lugá fortificá di fárao” i ta “tuma refugio den e sombra di Egipto.” (Isaías 30:2b) Nan a pone Egipto den e lugá di Dios! Esta un traicion!—Lesa Isaías 30:3-5.

 5, 6. (a) Di con e aliansa cu Egipto ta un eror fatal? (b) Ki biahe anterior cu Dios su pueblo a haci ta resaltá e bobedad dje biahe aki pa Egipto?

⁵ Por si acaso nan respondé cu e mision pa Egipto ta djis un bishita casual, Isaías ta duna mas detaye. “E declaracion formal contra e bestianan di zuid: Dor di e tera di angustia i condicionnan duru, di leon i di leopardo cu ta gruña, di víbora i di colebra di candela buladó, riba scouder di buricu adulto nan ta hiba nan recursonan, i riba bulto di camel nan provisionnan.” (Isaías 30:6a) Ta bisto cu e biahe ta bon planeá. Esnan mandá ta organisá un caravana di camel cu buricu, i nan ta carga nan cu mercancia costoso i ta baha bai Egipto, pasando dor di un desierto desolá pestá cu leon cu ta gruña i colebra venenoso. Por fin esnan mandá ta yega nan destinacion i ta entregá nan tesoronan n’e egipcionan. Nan a cumpra proteccion, o al ménos esei nan ta pensa. Sin embargo, Jehova ta bisa: “Na interes dje pueblo nan lo no resultá di ningun probecho. I e egipcionan ta simpel banidad, i nan yudansa simplemente lo no sirbi di nada. P’esei mi a yama esun aki: ‘Rahab—nan ta na fabor di sinta ketu.’” (Isaías 30:6b, 7) “Rahab,” un “monster di laman,” ta bira un símbolo di Egipto. (Isaías 51:9, 10) E ta primintí nan tur cos, pero no ta haci nada. Huda ta cometé un eror fatal dor di cera un aliansa cuné.

⁶ Ta posibel cu Isaías su descripcion dje biahe di esnan mandá ta pone su oyentenan corda un biahe similar hací den tempu di Moises. Nan antepasadonan a pasa dor dje mésun ‘desierto inspirador di temor.’ (Deuteronomio 8:14-16) Pero, den tempu di Moises e israelitanan a sali for di Egipto i for di cautiverio. E biaha aki esnan mandá ta bai Egipto, sí, pa someté nan mes na dje. Ki un locura! Laga nos nunca tuma un mal decision asina i cambia nos libertad spiritual pa sclabitud!—Compará cu Galationan 5:1.

Nan Ta Oponé e Mensahe dje Profeta

 7. Di con Jehova ta laga Isaías skirbi Su spiertamentu na Huda?

⁷ Jehova ta bisa Isaías pa skirbi e mensahe cu el a caba di entregá di manera cu “e por sirbi pa un dia den futuro, como un testimonio pa tempu indefiní.” (Isaías 30:8) P’e beneficio di generacionnan futuro, incluso pa nos generacion awe, mester keda registrá cu Jehova ta desaprobá ponementu di aliansa cu hende riba confiansa den dje. (2 Pedro 3:1-4) Pero tin un motibu mas urgente pa pon’é por escrito. “Ta un pueblo rebelde, yunan mentiroso, yunan cu no kier a tende e ley di Jehova.” (Isaías 30:9) E pueblo a rechasá e conseho di Dios. P’esei, mester pon’é por escrito pa despues nan no por nenga cu a spierta nan debidamente.—Proverbionan 28:9; Isaías 8:1, 2.

 8, 9. (a) Den ki manera e lidernan di Huda ta purba corumpí e profetanan di Jehova? (b) Con Isaías ta demostrá cu lo e no laga nan intimid’é?

⁸ Awor Isaías ta duna un ehempel dje actitud rebelde dje pueblo. Nan “a bisa esnan cu ta mira: ‘Boso no mag mira,’ i esnan cu tabatin vision: ‘Boso no mag wak den vision pa nos nada stret. Papia cu nos cosnan suave; mira den vision cosnan engañoso.’” (Isaías 30:10) Dor di manda e fiel profetanan stop di papia loke ta “stret,” esta berdad, i en bes di esei papia loke ta “suave” i “engañoso,” esta falsu, e lidernan di Huda ta mustra cu nan kier pa kishikí nan orea. Nan kier elogio, no condenacion. Den nan opinion, cualkier profeta cu no ta dispuesto pa profetisá loke ta complacé nan mester “apartá for dje caminda; desviá for dje berea.” (Isaías 30:11a) E mester sea papia loke nan ta gusta tende of stop di predicá por completo!

⁹ Isaías su oponentenan ta insistí: “Pone e Santu di Israel stop djis pa nos causa.” (Isaías 30:11b) Laga Isaías stop di papia den e nomber di Jehova, “e Santu di Israel”! E título aki so riba su mes ta iritá nan, pasobra Jehova su normanan elevá ta mustra con deplorabel nan condicion ta. Con Isaías ta reaccioná? E ta declará: “Esaki ta loke e Santu di Israel a bisa.” (Isaías 30:12a) Sin vacilá, Isaías ta papia net e palabranan cu su opositornan no tin gana di tende. Lo e no laga nan intimid’é. Ki un ehempel excelente pa nos! Ora ta trata di proclamá e mensahe di Dios, cristiannan nunca no mag comprometé. (Echonan 5:27-29) Mescos cu Isaías, nan ta sigui proclamá: ‘Esaki ta loke Jehova a bisa’!

E Consecuencianan di Rebelion

10, 11. Kico lo ta e consecuencianan di Huda su rebelion?

¹⁰ Huda a rechasá e palabra di Dios, a confia den un mentira i a dependé riba “loke ta engañoso.” (Isaías 30:12b) Kico lo ta e consecuencianan? En bes di kita bai manera e nacion ta deseá, Jehova lo laga e nacion stop di existí! E fin aki lo ta repentino i total, manera Isaías ta enfatisá cu un ilustracion. E rebelion dje nacion ta manera “un seccion kibrá cu ta a punto di basha abou, un pida cu a blas den un muraya hopi haltu, cua su derumbe por bini di ripiente, den un instante.” (Isaías 30:13) Mescos cu un pida cu a blas den un muraya haltu cu tempu lo pone e muraya basha abou, asina e creciente rebeldia di Isaías su contemporáneonan lo causa e caida dje nacion.

¹¹ Cu un otro ilustracion Isaías ta indicá cu e binidero destruccion lo ta unu total: “Un hende lo kibr’é sigur manera ora kibra un pochi grandi di un trahadó di pochi, aplastá na pida-pida sin cu un hende tene consideracion cuné, di manera cu no por haña entre su pidanan aplastá un fragmento di klei pa saca candela for di fogon cuné of pa saca awa for di un lugá di moeras.” (Isaías 30:14) E destruccion di Huda lo ta asina total cu lo no keda nada di balor, ni sikiera un pida klei suficiente grandi pa saca shinishi cayente for di un fogon of pa saca awa for di un moeras. Un fin hopi bergonsoso! E binidero destruccion di esnan cu ta rebelá contra adoracion berdadero awe lo ta mes repentino i total.—Hebreonan 6:4-8; 2 Pedro 2:1.

Nan Ta Rechasá Jehova Su Oferta

12. Con e pueblo di Huda por evitá destruccion?

¹² Pero p’e oyentenan di Isaías, destruccion no ta inevitabel. Tin un salida. E profeta ta splica: “Esaki ta loke Señor Soberano Jehova, e Santu di Israel, a bisa: ‘Dor di bini bek i descansá boso lo ser salbá. Boso poder lo resultá simplemente den mantené boso mes sosegá i den pleno confiansa.’” (Isaías 30:15a) Jehova ta cla pa salba su pueblo, basta nan mustra fe dor di “descansá”—esta no trata di garantisá nan salbacion mediante aliansanan humano—i dor di ‘mantené nan mes sosegá,’ esta dor di demostrá confiansa den Dios su poder protector sin entregá na miedu. “Pero boso no tabata kier,” Isaías ta bisa e pueblo.—Isaías 30:15b.

13. Den kico e lidernan di Huda ta pone nan confiansa, i e confiansa ei ta hustificá?

¹³ Anto Isaías ta sigui elaborá: “I boso a bisa: ‘No, sino cu riba cabai nos lo hui!’ Ta p’esei boso lo hui. ‘I riba cabai velos nos lo core!’ Ta p’esei esnan cu ta persiguí boso lo mustra nan mes velos.” (Isaías 30:16) E habitantenan di Huda ta pensa cu cabai velos, en bes di Jehova, lo ta nan salbacion. (Deuteronomio 17:16; Proverbionan 21:31) Sin embargo, e profeta ta contestá cu nan confiansa lo ta un ilusion pasobra nan enemigunan lo vence nan. Ni sikiera e echo cu nan ta hopi lo no yuda nan. “Mil lo tembla pa causa dje reprendementu di unu so; pa causa dje reprendementu di cincu boso lo hui.” (Isaías 30:17a) E ehércitonan di Huda lo drenta pánico i hui riba e gritu di djis un man yen di enemigu.a Al final, ta solamente un resto lo keda, bandoná “manera master riba top di un ceru i manera un señal riba un ceritu.” (Isaías 30:17b) Precis manera e profecia a bisa, un resto so a sobrebibí ora cu Jerusalem a ser destruí na aña 607 P.E.C.—Jeremías 25:8-11.

Consuelo Meimei di Condenacion

14, 15. Ki consuelo e palabranan di Isaías 30:18 ta ofrecé habitantenan di antiguo Huda i cristiannan berdadero djawe?

¹⁴ Miéntras cu ainda e palabranan severo ei ta resoná den orea dje oyentenan di Isaías, e tono di su mensahe ta cambia. Promesa di bendicion ta remplasá menasa di desaster. “P’esei Jehova lo keda den expectativa pa mustra fabor na boso, i p’esei lo e lanta pa mustra misericordia na boso. Pasobra Jehova ta un Dios di huicio. Felis ta tur esnan cu ta keda den expectativa di dje.” (Isaías 30:18) Ki palabranan alentador! Jehova ta un Tata compasivo cu ta anhelá pa yuda su yunan. E tin goso den mustra nan misericordia.—Salmo 103:13; Isaías 55:7.

¹⁵ E palabranan trankilisante aki ta aplicá na e resto hudiu cu misericordiosamente ta ser permití di sobrebibí e destruccion di Jerusalem na aña 607 P.E.C. i na e poconan cu ta regresá e Tera Primintí na aña 537 P.E.C. Sin embargo, e profeta su palabranan ta consolá cristiannan djawe tambe. Nan ta corda nos cu Jehova lo “lanta” na nos fabor, i pone fin na e mundu malbado aki. Adoradónan fiel por tin confiansa cu Jehova—“un Dios di huicio”—lo no permití e mundu di Satanas existí ni un dia mas di loke husticia ta rekerí. P’esei, “esnan cu ta keda den expectativa di dje” tin hopi motibu pa ta felis.

Jehova Ta Consolá Su Pueblo dor di Contestá Oracion

16. Con Jehova ta consolá esnan desanimá?

¹⁶ Pero, tin hende kisas ta sinti nan desanimá dor cu liberacion no a bini mes lihé cu nan a spera. (Proverbionan 13:12; 2 Pedro 3:9) Hopi hende ta haña consuelo den e siguiente palabranan di Isaías cu ta resaltá un aspecto special di Jehova su personalidad. “Ora cu asta e pueblo den Síon lo biba den Jerusalem, lo bo no yora di ningun manera. Sin falta lo e mustra fabor na bo riba zonido di bo gritu di angustia; asina cu e tend’é realmente lo e contestá bo.” (Isaías 30:19) Isaías ta transmití ternura den e palabranan aki dor di cambia dje forma plural “boso” di versículo 18 pa e “bo” singular na versículo 19. Ora Jehova ta consolá esnan angustiá, e ta trata cada persona individualmente. Mescos cu un Tata, e no ta puntra un yu desanimá: ‘Di con bo no por ta fuerte manera bo ruman homber?’ (Galationan 6:4) Mas bien, e ta scucha atentamente na cada un. De echo, “asina cu e tend’é realmente lo e contestá.” Palabranan masha alentador! Esnan desanimá por haña hopi fortalesa si nan resa na Jehova.—Salmo 65:2.

Tende Dios Su Bos Guiador dor di Lesa Su Palabra

17, 18. Con Jehova ta percurá guia asta den tempu difícil?

¹⁷ Isaías ta sigui cu su discurso recordando su oyentenan cu angustia lo bini. E pueblo lo ricibí “pan den forma di angustia i awa den forma di opresion.” (Isaías 30:20a) E angustia i opresion cu nan lo ricibí ora nan ser sitiá lo bira mes normal cu pan cu awa. Asina mes, Jehova ta cla pa rescatá esnan di curason recto. “Bo Magnífico Instructor lo no sconde su mes mas, i bo wowonan tin cu bira wowonan cu ta mira bo Magnífico Instructor. I bo propio oreanan lo tende un palabra bo tras ta bisa: ‘Esaki ta e caminda. Cana den dje,’ den caso cu boso mester bai na banda drechi of den caso cu boso mester bai na banda robes.”—Isaías 30:20b, 21.b

¹⁸ Jehova ta e “Magnífico Instructor.” No tin niun maestro cu por para banda di dje. Pero, con hende por “mira” i “tende” Jehova? E ta revelá su mes mediante su profetanan, i nan palabranan ta registrá den Bijbel. (Ámos 3:6, 7) Awe, ora adoradónan fiel lesa Bijbel, ta como si fuera Dios su bos paternal ta bisa nan cua ta e caminda pa sigui i ta urgi nan pa reahustá nan proceder pa asina cana den dje. Tur cristian mester scucha atentamente ora Jehova ta papia via e páginanan di Bijbel i via publicacionnan basá riba Bijbel cu “e esclabo fiel i discreto” ta percurá. (Mateo 24:45-47) Laga cada persona lesa Bijbel diligentemente, pasobra ‘e ta nificá su bida.’—Deuteronomio 32:46, 47; Isaías 48:17.

Refleccioná Riba Futuro Bendicionnan

19, 20. Ki bendicionnan ta warda esnan cu ta reaccioná riba e bos dje Magnífico Instructor?

¹⁹ Esnan cu ta reaccioná riba e bos dje Magnífico Instructor lo destrosá nan imágennan, ya cu nan ta considerá nan como algu repugnante. (Lesa Isaías 30:22.) E ora ei e personanan aki lo disfrutá di bendicionnan maraviyoso cu ta ser describí na Isaías 30:23-26. E versículonan aki ta contené un bunita profecia di restoracion cu tin su promé cumplimentu ora cu un resto hudiu regresá for di cautiverio na aña 537 P.E.C. Awe, e profecia aki ta yuda nos mira e bendicionnan maraviyoso cu e Mesías ta percurá den e paradijs spiritual actual i den e Paradijs literal binidero.

²⁰ “Sigur lo e duna awaceru pa bo simia cu cua bo ta sembra e tereno, i como e producto dje tereno, pan, cu mester bira vet i zeta. Bo crio di bestia lo come yerba riba e dia ei den un sabana espacioso. I e bacanan i e buricunan adulto cu ta cultivá e tereno lo come yerba sasoná cu yerba marga, cu a ser bientá cu skop i cu forki.” (Isaías 30:23, 24) Pan “vet i zeta”—cuminda hopi nutritivo—lo ta e componente básico di loke hende ta come. E tera lo producí asina un abundancia cu asta e bestianan lo beneficiá. Lo duna e bestianan di crio “yerba sasoná cu yerba marga,” cuminda dushi reservá pa ocasionnan special. Asta a ‘bienta’ e cuminda aki, algu cu normalmente ta haci solamente cu grano destiná pa consumo humano. Den e pasashi aki Isaías ta presentá detayenan bunita cu ta ilustrá e abundancia di bendicion cu Jehova lo drama riba fiel humanidad!

21. Describí con completo e futuro bendicionnan lo ta.

²¹ “Riba tur ceru haltu i riba tur ceritu elevá mester bini riu.” (Isaías 30:25a)c Isaías ta presentá un bon descripcion cu ta enfatisá con completo Jehova su bendicionnan lo ta. Lo no tin scarcedad di awa, un producto precioso cu lo basha no solamente den lugánan plat, sino tambe riba tur ceru, asta “riba tur ceru haltu i riba tur ceritu.” Sí, hamber lo ta algu di pasado. (Salmo 72:16) Awor e profeta ta dirigí su atencion na cosnan cu ta mas haltu cu ceru. “E lus di luna yen mester bira manera e lus di solo briyante; i asta e lus di solo briyante lo bira shete biaha mas fuerte, manera e lus di shete dia, riba e dia cu Jehova verband e derumbe di su pueblo i cura asta e herida grave cu a resultá dje golpi cu el a propin’é.” (Isaías 30:26) Ki un culminacion emocionante dje profecia briyante aki! E gloria di Dios lo briya den tur su splendor. E bendicionnan cu ta warda Dios su adoradónan fiel lo superá ampliamente—shete bes—cualkier cos cu nan a yega di experenciá.

Huicio i Goso

22. Na contraste cu e bendicionnan cu lo bini pa esnan fiel, kico Jehova tin wardá pa e malbadonan?

²² E tono di Isaías su mensahe ta bolbe cambia. E ta bisa: “Mira!” como si fuera pa capta atencion di su oyentenan. “E nomber di Jehova ta bini di leu, kimando cu su rabia i cu nubianan pisá. Pa loke ta su lipnan, nan a yena cu denunciacion, i su lenga ta manera un candela devorador.” (Isaías 30:27) Te asina leu, Jehova no a intervení, i a permití e enemigunan di su pueblo sigui nan propio curso. Awor e ta hala cerca pa ehecutá huicio, manera un tormenta cu ta yegando mas i mas cerca. “Su spiritu ta manera un riu inundante cu ta yega te na garganta, pa zwai e nacionnan bai-bin cu un sefta di inutilidad; i un frena cu ta pone un hende dual lo ta na cachete dje pueblonan.” (Isaías 30:28) Enemigunan dje pueblo di Dios lo ser rondoná pa “un riu inundante,” lo sagudí nan violentamente “bai-bin cu un sefta,” i lo pone un “frena” na nan. Nan lo ser destruí.

23. Kico ta pone cristiannan djawe sinti un “alegria di curason”?

²³ Atrobe e tono di Isaías ta cambia ora e ta describí e condicion felis di adoradónan fiel cu un dia lo regresá nan pais. “Boso lo tin un cantica manera den e anochi cu un hende ta santificá su mes pa un fiesta, i alegria di curason manera di un hende cu ta cana cu un fluit pa drenta den e ceru di Jehova, na e Baranca di Israel.” (Isaías 30:29) Cristiannan berdadero djawe ta experenciá un “alegria di curason” similar ora nan refleccioná riba e huicio dje mundu di Satanas, e proteccion cu Jehova e “Baranca di salbacion” ta duna nan, i e futuro bendicionnan di Reino.—Salmo 95:1.

24, 25. Con e profecia di Isaías ta enfatisá e realidad dje huicio cu ta biniendo riba Asiria?

²⁴ Despues di expresá alegria, Isaías ta bolbe bek na e tema di huicio i ta identificá esnan cu lo ricibí e furia di Dios. “Jehova sigur lo laga tende e dignidad di su bos i lo laga mira su brasa cu ta baha, den furia di rabia i den e vlam di un candela devorador i yobida pisá, tempestad di awaceru i hagel. Pasobra debí na e bos di Jehova teror lo gara Asiria; lo e asta golpi’é cu un garoti.” (Isaías 30:30, 31) Cu e descripcion detayá aki, Isaías ta enfatisá e realidad di Dios su huicio contra Asiria. De echo, Asiria ta para dilanti Dios i tembla ora e mira su “brasa” di huicio ta baha riba dje.

²⁵ E profeta ta sigui bisa: “Cada sla di su bara di castigu cu Jehova lo laga baha riba Asiria sigur lo resultá di ta cu tamborin i cu arpa; i realmente lo e bringa contra nan cu batayanan caminda lo zwai arma. Pasobra for di tempu recien su Tofet ta poné cla; tambe e ta prepará pa e rey mes. El a haci su monton hundu. Candela i palu tin na abundancia. E rosea di Jehova, manera un riu di swafel, ta kima contra dje.” (Isaías 30:32, 33) Aki ta usa Tofet, den e vaye di Hinom, como un lugá figurativo cu ta kimando cu candela. Dor di mustra cu Asiria lo bai caba einan, Isaías ta enfatisá e destruccion repentino i total cu lo bini riba e nacion ei.—Compará cu 2 Reynan 23:10.

26. (a) Jehova su proclamacionnan contra Asiria tin ki aplicacion actual? (b) Con cristiannan djawe ta keda den expectativa di Jehova?

²⁶ Aunke e mensahe di huicio aki ta dirigí contra Asiria, e nificacion dje profecia di Isaías ta bai mas leu. (Romanonan 15:4) Na moda di papia, Jehova lo bini atrobe di leu, pa inundá, sagudí i frena tur esnan cu ta oprimí su pueblo. (Ezekiel 38:18-23; 2 Pedro 3:7; Revelacion 19:11-21) Mare e dia ei por yega lihé! Miéntras tantu, cristiannan ta warda ansiosamente riba e dia di nan liberacion. Ora nan meditá riba e palabranan bibu registrá na Isaías capítulo 30, esei ta fortalecé nan. E palabranan aki ta animá Dios su sirbidónan pa balorá e privilegio di por haci oracion, pa studia Bijbel diligentemente i meditá riba e futuro bendicionnan di Reino. (Salmo 42:1, 2; Proverbionan 2:1-6; Romanonan 12:12) Dje manera ei e palabranan di Isaías ta yuda nos tur keda den expectativa di Jehova.

[Nota]

[Plachi na página 305]

Den tempu di Moises, e israelitanan a sali for di Egipto. Den tempu di Isaías, Huda ta bai busca yudansa cerca Egipto

[Plachi na página 311]

“Riba tur ceritu elevá mester bini riu”

[Plachi na página 312]

Jehova lo bini “cu su rabia i cu nubianan pisá”