“Manehando e Palabra dje Berdad Corectamente”

E PALABRA di Dios ta un mangasina di principionan cu ta vital pa un bida exitoso. E por yuda un minister instruí, reprendé i coregí. (2 Timoteo 3:16, 17) Sin embargo, pa beneficiá plenamente dje direccion aki percurá divinamente, nos mester sigui e conseho di apostel Pablo na Timoteo: “Haci bo sumo posibel pa presentá bo mes aprobá na Dios, un trahadó cu no tin nada di tene bergwensa di dje, manehando e palabra dje berdad corectamente.”—2 Timoteo 2:15.

E Palabra di Dios ta ser compará, entre otro cosnan, cu lechi nutritivo, cuminda sólido, awa refrescante i purificador, un spiel i un spada skerpi. Comprendiendo loke e términonan aki ta implicá ta yuda un minister usa e Bijbel ábilmente.

Distribuyendo e Lechi dje Palabra di Dios

Lechi ta e alimento cu babynan recien nací tin mester. Segun cu e baby ta crece, cuminda sólido gradualmente ta ser introducí den su dieta, pero na cuminsamentu, e por digerí solamente lechi. Den hopi sentido, esnan cu sa tiki tocante e Palabra di Dios ta manera baby. Sea un persona ta recientemente interesá den e Palabra di Dios of e ta familiarisá cuné pa algun tempu, si e no tin mas cu un comprendimentu elemental di loke Bijbel ta bisa, e ta un baby spiritual i tin mester di nutricion fácil pa digerí—“lechi” spiritual. Ainda e no ta capas pa digerí “cuminda sólido,” e cosnan profundo dje Palabra di Dios.—Hebreonan 5:12.

Esaki tabata e situacion den e congregacion recien formá den Corinto ora Pablo a skirbi nan: “Mi a alimentá boso cu lechi, no cu algu di come, pasobra ainda boso no tabata suficiente fuerte.” (1 Corintionan 3:2) E corintionan mester a siña na promé lugá e “cosnan elemental dje pronunciacionnan sagrado di Dios.” (Hebreonan 5:12) Na nan etapa di desaroyo, nan no por a digerí “e cosnan profundo di Dios.”—1 Corintionan 2:10.

Mescos cu Pablo, ministernan cristian awe ta demostrá nan interes den babynan spiritual dor di duna nan “lechi,” esta, dor di yuda nan bira firmemente fundá den doctrina cristian básico. Nan ta animá esnan nobo of inmaduro pa “forma un anhelo p’e lechi no-adulterá cu ta pertenecé n’e palabra.” (1 Pedro 2:2) Apostel Pablo a mustra cu el a dicerní e atencion specialisá cu esnan nobo tin mester ora el a skirbi: “Tur cu ta participá di lechi no conocé e palabra di husticia, pasobra e ta un baby.” (Hebreonan 5:13) Pacenshi, consideracion, comprendimentu i suavedad ta rekerí di ministernan di Dios segun cu nan ta compartí e lechi puru dje Palabra cu esnan nobo i inexperenciá mediante studionan di Bijbel na cas i den e congregacion.

Manehando e Cuminda Sólido dje Palabra di Dios

Pa por crece na salbacion, un cristian mester di mas cu “lechi.” Unabes e comprendé claramente i aceptá e berdadnan primario di Bijbel, e ta cla pa sigui p’e ‘cuminda sólido cu ta pertenecé na personanan maduro.’ (Hebreonan 5:14) Con e por haci esaki? Básicamente, mediante un rutina regular di studio personal i asociacion na reunionnan cristian. Bon custumbernan asina lo yuda haci un cristian spiritualmente fuerte, maduro i efectivo den e ministerio. (2 Pedro 1:8) Nos no mester lubidá cu ademas di conocimentu, hacimentu dje boluntad di Jehova tambe ta encerá cuminda spiritual.—Juan 4:34.

Awe, un “esclabo fiel i discreto” a ser nombrá pa suministrá Dios su sirbidornan cu cuminda n’e tempu apropiado i pa yuda nan comprendé “e sabiduria di Dios grandemente diversificá.” Jehova, mediante su spiritu, ta revelá berdadnan bíblico profundo mediante e esclabo leal aki, cu ta publicá fielmente ‘cuminda spiritual n’e tempu apropiado.’ (Mateo 24:45-47; Efesionan 3:10, 11; compará cu Revelacion 1:1, 2.) Tur cristian individual ta responsabel pa haci e uso di mas completo di tal percuracionnan publicá.—Revelacion 1:3.

Naturalmente, algun cos den Bijbel ta “difícil pa comprendé,” asta pa cristiannan maduro. (2 Pedro 3:16) Tin expresionnan confundidor, profecianan i ilustracionnan cu ta rekerí hopi studio i meditacion. P’esei, studio personal ta incluí cobamentu den e Palabra di Dios. (Proverbionan 1:5, 6; 2:1-5) Ancianonan specialmente tin un responsabilidad relacioná cu esaki ora nan ta siña e congregacion. Sea nan ta conducí e Studio di Buki di Congregacion of e Studio dje Toren di Vigilancia, ta duna discurso público of ta sirbi den cualkier otro capacidad di siña, ancianonan mester ta cabalmente familiarisá cu nan material i sea cla pa duna atencion na nan “arte di siña” segun cu nan ta transmití cuminda spiritual sólido n’e congregacion.—2 Timoteo 4:2.

Awa cu Ta Refrescá i Purificá

Jesus a bisa e muher samaritano n’e pos cu lo el a dun’é algu pa bebe cu lo a bira den dje “un fontein di awa cu ta brota pa impartí bida eterno.” (Juan 4:13, 14; 17:3) E awa dunador di bida aki ta incluí tur e percuracionnan di Dios pa gana bida mediante e Lamchi di Dios, i e percuracionnan aki ta ser splicá den Bijbel. Como individuonan cu tin sed p’e “awa” ei, nos ta aceptá e invitacion cu e spiritu i e bruid di Cristo ta duna pa “bebe dje awa di bida grátis.” (Revelacion 22:17) Bebementu dje awa aki por nificá bida eterno.

Ademas, Bijbel ta fiha e normanan moral i spiritual pa cristiannan berdadero. Segun cu nos ta aplicá e normanan aki establecí dor di Dios, nos ta ser purificá dor dje Palabra di Jehova, “labá limpi” di tur custumber cu Jehova Dios ta odia. (1 Corintionan 6:9-11) P’e motibu aki, e berdad cu e Palabra inspirá ta contené ta ser yamá un “baño di awa.” (Efesionan 5:26) Si nos no permití e berdad di Dios purificá nos den e manera aki, nos adoracion lo no ta aceptabel p’e.

Interesantemente, ancianonan cu ta ‘manehá e palabra dje berdad corectamente’ tambe ta ser compará cu awa. Isaías ta bisa cu nan ta “manera coriente di awa den un pais secu.” (Isaías 32:1, 2) Ancianonan amoroso ta cumpli cu e descripcion aki ora nan ta bishitá nan rumannan como wardadornan spiritual, usando e Palabra refrescante di Dios pa impartí informacion edificante, consolador i spiritual cu ta fortalecé i fortificá.—Compará cu Mateo 11:28, 29.a

Miembronan di congregacion ta anticipá ansiosamente bishita dje ancianonan. “Mi sa con calmante e ancianonan por ta, i mi ta asina contentu cu Jehova a haci e percuracion aki,” Bonnie ta bisa. Lynda, un mama soltero, ta skirbi: “Cu animacion bíblico, ancianonan a yudá mi enfrentá e situacion cu éxito. Nan a scucha i a mustra compasion.” Michael ta bisa: “Nan a hací mi sintí mi parti di un organisacion cu tin interes.” “Bishita di ancianonan a yudá mi vence periodonan di depresion severo,” un otro ta bisa. Un bishita spiritualmente edificante di un anciano ta manera un bebida friu i refrescante. Esnan semehante na carné ta ser consolá segun cu ancianonan amoroso ta yuda nan mira con principionan bíblico ta aplicá na nan situacion.—Romanonan 1:11, 12; Santiago 5:14.

Usa e Palabra di Dios Manera un Spiel

Ora un individuo ta tuma cuminda sólido, e propósito no ta pa simplemente disfrutá dje smak. Mas bien, e ta spera pa haña nutricion cu lo permitié funcioná. Si e ta un mucha, e ta spera cu e cuminda lo yud’é crece pa bira un adulto. Ta mescos cu cuminda spiritual. Studio personal di Bijbel por ta agradabel, pero esei no ta e único motibu p’e. Cuminda spiritual mester cambia nos. E ta yuda nos identificá i producí e fruta dje spiritu i ta yuda nos bisti “e personalidad nobo, cu mediante conocimentu exacto ta ser hací nobo segun e imágen di Esun cu a cre’é.” (Colosensenan 3:10; Galationan 5:22-24) Cuminda spiritual tambe ta yuda nos crece na madures, ekipando nos mihó pa aplicá principionan bíblico ora di trata cu nos problemanan i ora di yuda otronan trata cu di nan.

Con nos por sa si Bijbel tin e efecto ei riba nos? Nos ta usa Bijbel manera un spiel. Santiago a bisa: “Bira hacidornan dje palabra, i no tendedornan so . . . Si cualkier hende ta un tendedor dje palabra, i no un hacidor, esaki ta manera un homber cu ta mira su cara natural den un spiel. Pasobra e ta mira su mes, i e ta bai i inmediatamente e ta lubidá ki clase di homber e ta. Pero esun cu ta loer den e ley perfecto cu ta pertenecé na libertad i cu ta persistí den dje, e hende aki, dor cu el a bira, no un tendedor lubidador, sino un hacidor dje obra, lo ta felis den su hacimentu di esei.”—Santiago 1:22-25.

Nos ta “loer” den e Palabra di Dios ora nos ta examin’é cuidadosamente i compará loke nos ta cu loke nos mester ta di acuerdo cu Dios su normanan. Haciendo esaki, nos lo bira “hacidornan dje palabra, i no tendedornan so.” Bijbel lo tin un efecto excelente riba nos.

E Palabra di Dios Manera un Spada

Finalmente, apostel Pablo ta yuda nos mira con nos por usa e Palabra di Dios como un spada. Ora e ta spierta nos contra “e gobiernunan, contra e autoridadnan, contra e gobernantenan di mundu dje scuridad aki, contra e mal forsanan spiritual den e lugánan celestial,” e ta urgi nos pa “aceptá . . . e spada di spiritu, esta, e Palabra di Dios.” (Efesionan 6:12, 17) E Palabra di Dios ta un arma indispensabel cu nos por usa pa kita cualkier idea cu ta ser “lantá contra e conocimentu di Dios.”—2 Corintionan 10:3-5.

No cabe duda, “e palabra di Dios ta bibu i ta ehercé poder.” (Hebreonan 4:12) Jehova ta papia cu humanidad atrabes dje páginanan di su Palabra inspirá. Us’é bon pa siña otronan i pa desenmascará doctrinanan falsu. Haci uso di dje pa animá, edificá, refrescá, consolá, motivá, i fortalecé otronan spiritualmente. I cu Jehova “ekipá bo cu tur cos bon pa haci su boluntad,” di manera cu semper lo bo haci loke ta “masha agradabel den su bista.”—Hebreonan 13:21.

[Nota]

[Plachi na página 31]

Ancianonan ta animá otronan, “manehando e palabra dje berdad corectamente”