Loke Beibel Ta Siña Ta Duna Nos Speransa
Nos ta anhelá pa mira e kambionan ku Dios a primintí ku lo tuma lugá den futuro serkano. Dios lo kaba ku sufrimentu i duna hende un bida felis aki riba tera. (Salmo 37:11) Dikon nos por konfia e promesa ei? Pasobra “Dios no ta manera hende, E no sa gaña.” (Numbernan 23:19, BPK) Laga nos wak algun di e kosnan maravioso ku nos Kreador lo hasi den futuro.
Dios Lo Kaba ku Hende Malbado
“Ora e malbado sprùit manera yerba, i tur ku ta hasi inikidat floresé, ta pa nan wòrdu destruí pa semper.”—SALMO 92:7.
Manera nos a mira den e artíkulo anterior, maldat ta sigui oumentá. Esei no ta sorprendé nos, pasobra Beibel ta bisa na 2 Timoteo 3:1-5 ku durante “e último dianan” hende lo komportá nan mes masha malu mes. E último dianan di kiko? E último dianan di hende ku ta skohe pa desobedesé Dios. Pronto, Dios lo destruí tur hende ku no ke stòp di hasi loke ta malu. E ora ei, ta hende ku ta obedesé Dios so lo tin riba tera. “E hustunan lo heredá e tera, i lo biba den dje pa semper.”—Salmo 37:29.
Dios Lo Destruí Satanas
“E Dios ku ta duna pas, pronto lo e aplastá Satanas.”—ROMANONAN 16:20.
Ora Dios kaba ku Satanas, e demoñonan i mal hende, lo tin pas riba tera. Nos Kreador ta hasi e siguiente promesa: “Ningun hende lo no spanta [bo].”—Mikéas 4:4.
Dios Lo Kaba ku Malesa i Morto
“E tènt di Dios lo ta ku humanidat . . . I lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.”—REVELASHON 21:3, 4.
Nos lo no sufri ni bira malu mas, pasobra Dios lo drecha tur e dañonan kousá pa Satanas, Adam, Eva i nos mes imperfekshonnan. Komo resultado, “lo no tin morto mas.” Hende ku ta stima i obedesé nos Kreador lo biba pa semper. Pero na unda nan lo biba?
Nos Kreador Lo Hasi Tera Bira un Paradeis
“Tera seku i desierto lo ta kontentu, i Arabá lo regosihá i floria manera rosa.”—ISAÍAS 35:1.
Ora Dios kaba ku e malbadonan, tera lo bira un paradeis. Lo tin hopi parke i hòfi bunita i lo tin kuminda na abundansia. (Salmo 72:16) Laman, lago i riu lo bira limpi, i nan lo ta yen di bida atrobe. Kisas e palabra “polushon” lo asta disparsé for di nos vokabulario! Hende lo traha nan mes kas i biba den dje. Nunka mas hende lo ta sin kas, i nan lo no pasa hamber ni ta pober mas.—Isaías 65:21, 22.
Dios Lo Lanta Hende Ku A Muri for di Morto
“Lo bai tin un resurekshon.”—ECHONAN 24:15.
Lo bo tin gana di mira bo sernan kerí ku a muri atrobe? Dios Todopoderoso lo lanta nan bèk for di morto, òf resusitá nan, pa biba den Paradeis riba tera. Abo lo rekonosé nan i nan lo rekonosé bo. Imaginá kon felis boso tur lo ta! Kon nos por tin sigur ku Dios lo lanta nos sernan kerí for di morto? Beibel ta duna ehèmpel di tantu adulto komo mucha ku a ser reuní ku nan famia despues ku nan a ser resusitá for di morto. Ademas, den mayoria di kaso, Hesus a resusitá hende den públiko.—Lukas 8:49-56; Huan 11:11-14, 38-44.