E Huicio Di Jehova Contra Siñador Falso

“Den profeta di Jerusalem mi a mira cosnan horrible, e cometimento di adulterio i andamento den falsedad . . . Pa mi, nan tur a bira manera Sodoma, i habitante di dje manera Gomorra.”​—⁠JEREMÍAS 23:⁠14.

KEN cu ta participa den dunamento di siñanza divino ta acepta un responsabilidad serio. Santiago 3:1 ta adverti: “No hopi di boso mester bira maestro, mi rumanan, sabiendo cu nos lo recibi un huicio mas severo.” Sí, siñador dje Palabra di Dios ta bao di un responsabilidad mas serio pa rindi cuenta aceptable, mas tanto cu hende cristian en general. Kico esei kier men pa hende cu ta resulta di ser siñador falso? Láganos tira un bista riba e situacion dje dia di Jeremías. Nos por mira con esei a simboliza loke ta pasa awe.

² Na aña 647 PEC, aña 13 dje reinado di rey Josías, Jeremías tabata comisioná como profeta di Jehova. Jehova tabatin un keho contra Hudá, p’sei el a manda Jeremías pa declaré. Profeta falso, of siñador di Jerusalem, tabata haci “cosnan horrible” den bista di Dios. Nan maldad tabata asina grandi cu Dios a compará Jerusalem i Hudá cu Sodoma i Gomorra. Jeremías capítulo 23 ta bísanos tocante esei. Versículo 14 ta bisa:

³ “Den profeta di Jerusalem mi a mira cosnan horrible, e cometimento di adulterio i andamento den falsedad; i nan a fortalece man di malechor pa nan no bolbe, cada un for di su mes maldad. Pa mi, nan tur a bira manera Sodoma, i habitante di dje manera Gomorra.”

⁴ Sí, tal profeta, of siñador, a pone ehempel moral mashá malu i, en efecto, a anima hende pa haci mescos. Mira estado di cristiandad djawe! E no ta mescos cu e situacion den e dia di Jeremías? Awe e clero ta laga adúltero i homosexual sigi como miembro dje clero i asta ta láganan celebra misa. Ta straño cu tanto miembro di religion també ta inmoral?

⁵ Jehova Dios a compara habitante di Jerusalem cu hende di Sodoma i Gomorra. Pero e estado inmoral di cristiandad ta peor cu estado di Sodoma i Gomorra. Sí, cristiandad ta asta mas reprensible den bista di Jehova Dios. Siñador di dje ta burla e ley moral cristian. I esei ta cria un clima di degradacion moral den locual tin tentacion mashá peligroso di tur sorto pa haci loke ta malu. Tal situacion moral ta asina prevalente cu maldad awendia ta ser considerá como normal.

“Andamento den falsedad”

⁶ Tuma nota awor di loke versículo 14 ta bisa tocante profeta di Jerusalem. Nan tabata ‘anda den falsedad.’ I e último parti di versículo 15 ta bisa: “For di profeta di Jerusalem apostasía a sali pa tur e tera.” Anto versículo 16 ta agrega: “Esaki ta loke Jehova di ehército a bisa: ‘No scucha palabra di profeta cu ta profetiza pa boso. Nan ta haci boso bira bano. E vision di nan mes curazón ta loke nan ta papia​—⁠no for di boca di Jehova.’ ”

⁷ Mescos cu profeta falso di Jerusalem, clero di cristiandad també ta anda den falsedad, plamando doctrina apóstata, siñanza no hayá den e Palabra di Dios. Cua ta algun siñanza falso asina? Inmortalidad di alma, e trinidad, purgatorio, i candela di fiernu pa tormenta hende pa semper. També, nan ta agrada oído di oyentes, predicando loke hende ta gusta tende. Nan ta repiti bez tras bez cu ningun calamidad ta enfrenta cristiandad pasobra e tin e paz di Dios. Pero, e clero ta declara “e vision di nan mes curazón.” E ta falso. Hende cu ta kere mentira asina ta ser venená spiritualmente. Nan ta ser gañá, resultando den nan mes destruccion!

⁸ Considera loke Jehova ta bisa tocante tal siñador falso den versículo 21: “Mi no a manda e profetanan, no obstante nan mes a corre. Mi no a papia cu nan, no obstante nan mes a profetiza.” Mescos awe, Dios no a manda e clero, tampoco nan no ta siña su berdad. Cu ki resultado? Un ignorancia bíblico pasmoso ta existi den miembro di religion pasobra nan pastor ta alimentánan cu filosofía di mundo.

⁹ Además, clero djawe ta declara speranza falso. Tuma nota di versículo 25: “Mi a tende loke profeta cu ta profetizando falsedad den mi mes nomber a bisa, bisando, ‘Mi tabatin un soño! Mi tabatin un soño!’ ” Nan ta ki clase di soño? Versículo 32 ta bísanos: “ ‘Mira, mi ta contra profeta di soño falso,’ ta e declaracion di Jehova, ‘cu ta relatánan i ta haci mi pueblo dwal pa motibo di nan falsedad i pa motibo di nan bromamento. Pero, ami no a mándanan ni no a dúnanan ordu. P’sei di ningun manera nan lo beneficiá e pueblo aki,’ ta e declaracion di Jehova.”

¹⁰ Cua soño of speranza falso e clero a siña? Wel, cu Nacion Uní ta e único speranza pa humanidad pa paz i siguridad awe. Den aña reciente nan a yama NU “e último speranza pa acuerdo i paz,” “e foro supremo di paz i husticia,” “e speranza principal di mundo pa paz mundial.” Ki un desilusion! E único speranza pa humanidad ta e Reino di Dios. Pero e clero no ta predica i siña e berdad tocante tal gobierno celestial, locual tabata e tema central dje predicacion di Jesús.

¹¹ Versículo 27 ta bísanos mas. “Nan ta pensa di haci mi pueblo lubida mi nomber pa medio di nan soño cu nan ta sigi relata un na otro, mescos cu nan tata a lubida mi nomber pa medio di Baal.” Profeta falso di Jerusalem a haci e pueblo lubida e nomber di Dios. Siñador religioso falso djawe no ta haci mescos? Peor, nan ta sconde e nomber di Dios, Jehova. Nan ta siña cu no ta necesario pa usé, i nan ta kité for di nan traduccion di Bijbel. Nan ta opone fuertemente ken cu ta siña e pueblo cu e nomber di Dios ta Jehova. Pero e grupo cu Jeremías a simbolizá, e resto di hende cristian ungí cu e spiritu, hunto cu nan compañénan, ta haci mescos cu Jesús a haci. Nan ta siña miyones di hende tocante e nomber di Dios.​—⁠Juan 17:⁠6.

Desenmascarando nan reprensibilidad

¹² E grupo cu Jeremías a simboliza a desenmascará e clero bez tras bez como siñador falso cu ta hiba nan tao den e camina hanchu di destruccion. Sí, e resto ta haci claro pakico tal soñador ta merece e huicio desfavorable di Jehova Dios. Por ehempel, sirbidor di Jehova hopi bez ta cita Revelacion 18:​24, cu ta bisa cu den Babilonia e Grandi ta ser hayá e sanger di “tur esnan cu a ser matá riba tera.” Corda tur gera cu a ser bringá riba diferencia religioso. Ki grandi ta e culpa pa dramamento di sanger di tal siñador religioso falso! Nan siñamento a causa desunion i a cria odio di hende di otro religion i grupo nacional. En cuanto Gera Mundial I, e buki na inglés Predicador ta presenta arma, ta bisa: “E clero a duna e gera su nificacion i impulso spiritual apasioná. . . . Asina e iglesia a bira totalmente enbolbí den e sistema dje gera.” Mescos tabata cierto den Gera Mundial II. E clero a apoya plenamente nacion den gera i a bendicioná nan soldad. Dos gera mundial a cuminza den cristiandad den locual miembro dje mesun religion a mata otro. Partido seglar i religioso den cristiandad ta sigi causa dramamento di sanger te ne tempo actual. Ki efecto horrible nan siñanza falso a tene!

¹³ Haci fabor di tuma nota di Jeremías capítulo 23, versículo 22: “Si nan a para den mi grupo íntimo, anto nan por a haci mi pueblo tende mi mes palabra, i nan por a hácinan bolbe for di nan mal camina i for dje maldad di nan tratamento.” Si profeta religioso di cristiandad ta para den e grupo íntimo di Jehova, den relacion estrecha cuné como si nan ta un sirbidor fiel i prudente, anto nan també mester biba di acuerdo cu e ley di Dios. Nan també mester haci e pueblo di cristiandad tende e palabra di Dios mes. En bez di esei, siñador falso djawe a haci nan sigidor sirbidor ciegu di Satanás e Diabel, enemigo di Dios.

¹⁴ E revelacion dje berdad tocante e clero cu e grupo cu Jeremías a simbolizá ta fuerte. Por ehempel, den e asamblea internacional “Boluntad Divino” na 1958 di Testigo di Jehova den e stad di New York, e vice presidente dje Sociedad Watch Tower a introduci un declaracion cu a bisa en parti: “Sin ningun palabra di dobel sentido ni vacilacion nos ta declara cu e causa fundamental di tur e crimen, delincuencia, odio, contencion, prehuicio, . . . i confusion loco ta religion malu, religion falso; tras di locual ta e enemigo invisibel di hende, Satanás e Diabel. Hende mas responsabel pe estado di mundo ta instructor i lider religioso; i esnan mas reprensibel di nan ta e clero religioso di cristiandad. . . . Despues di tanto aña desde Gera Mundial I, cristiandad ta para den un relacion cu Dios mescos cu e relacion di Israel den e dia di Jeremías. Sí, cristiandad ta enfrenta un destruccion mas spantoso i destructivo cu e destruccion cu Jeremías a mira sosode Jerusalem.”

E huicio di siñador falso

¹⁵ Apesar dje spiertamento, con e clero a actua desde esei? Mescos cu versículo 17 ta informa: “Nan ta bisa bez tras bez na hende cu ta falta respet pa mi, ‘Jehova a papia: “Paz ta loke boso lo yega di haya.” ’ I pa tur hende cu ta camna den e obstinacion di nan curazón, nan a bisa, ‘Ningun calamidad lo bini riba boso.’ ” Esei ta cierto? No! Jehova Dios lo desenmascara e falsedad di tal profecía dje clero. Lo e no cumpli cu loke nan ta bisa den su nomber. Sin embargo, e garantía falso dje clero di paz cu Dios ta mashá engañoso!

¹⁶ Bo ta pensa, ‘Kico, e siñanza falso dje clero por gañámi? Nunca!’ Wel, no tene tanto confianza! Corda cu e siñanza falso dje clero a cria un clima moral engañoso horrible. Nan siñanza complaciente ta hustifica casi tur cos, no ta importa ki inmoral e tá. I tal clima moral degenerá ta penetra den tur campo di diverticion, película, television, revista, i música. Pues, anto, nos tin cu eherce cautela extremo, pa nos no bira víctima dje influencia di tal atmósfera moral degenerá pero astutamente atractivo. Hovenan por cai den trampa di video i música degradante. Corda cu e actitud djawe di cu tur cos ta permití, ta un resultado directo dje siñanza falso dje clero i nan nengamento di defende ley husto di Dios. E grupo cu Jeremías a simboliza ta combati tal punto di bista inmoral i ta yuda sirbidor di Jehova Dios rechaza e maldad cu ta prevalece den cristiandad.

¹⁷ Cua huicio siñador falso di cristiandad lo recibi foi Jehova, e gran Huez? Versículo 19, 20, 39, i 40 ta contesta: “Mira! E tempestad di bientu di Jehova, furia mes, siguramente lo sali, asta un tempestad di remolina. Lo e remoliná riba cabez dje malbadonan mes. E rabia di Jehova lo no bolbe atrás te cu el a cumpli i te cu el a realiza idea di su curazón. . . . Lo mi entrega boso na descuido, cu finalidad, lo mi bandona boso i e stad cu mi a duna boso i boso antepasadonan​—⁠di dilanti mi. I lo mi pone riba boso reproche te na tempo indefinitivo i humiliacion te na tempo indefinitivo, cu lo no ser lubidá.” Tur esei a sosode Jerusalem malbado i su tempel, i awor un calamidad similar lo sosode cristiandad malbado pronto!

Declarando “e carga di Jehova”

¹⁸ Pues, kico ta e responsabilidad dje grupo cu Jeremías a simboliza i nan compañénan? Versículo 33 ta bísanos: “Ora e pueblo aki of e profeta of sacerdote ta puntrábo, bisando, ‘Kico ta e carga di Jehova?’ bo mester bísanan també, ‘ “Boso ta​—⁠ai ki un carga! I lo mi siguramente bandona boso,” ta e declaracion di Jehova.’ ”

¹⁹ E palabra hebreo pa “carga” tin un sentido dobel. E por referi na un declaracion divino importante of na algo cu ta carga hende i ta cánsanan. Den e texto e expresion “carga di Jehova” ta referi na un profecía importante​—⁠e declaracion di cu Jerusalem tabata condená na destruccion. E pueblo a gusta tende declaracion profético importante for di Jehova cu Jeremías a dúnanan bez tras bez? No, e pueblo a tene mofa di Jeremías: ‘Cua profecía (carga) bo tin awor? Nos ta sigur cu bo profecía lo ser un otro carga fatigante!’ Pero, kico Jehova a bísanan? Esaki: “Boso ta​—⁠ai ki un carga! I lo mi siguramente bandona boso.” Sí, e pueblo tabata un carga pa Jehova, i e tabata bai kítanan pa nan no ser un carga pisá pe mas.

²⁰ Kico ta e “carga di Jehova” awe? Esei ta e mensahe profético importante dje Palabra di Dios. E ta cargá cu condenacion, anunciando e destruccion pronto di cristiandad. En cuanto e pueblo di Jehova Dios, nos tin e responsabilidad importante di declara e “carga di Jehova.” Mientras cu e fin ta yega cerca, nos tin cu bisa tur hende cu e pueblo gedwal di cristiandad ta un “carga,” sí, “Ai ki un carga!” pa Jehova Dios, i cu pronto lo e libré dje “carga,” bandonando cristiandad na calamidad.

²¹ E huicio di Jehova tabata ehecutá den e tempo di Jeremías ora babilónico a destrui Jerusalem na aña 607 PEC. Manera e profecía a bisa, esei tabata un experencia bergonzoso i humiliante pa israelita obstiná i infiel. (Jeremías 23:​39, 40) El a mustranan cu Jehova, pa locual nan a falta honor bez tras bez, a bandonánan por fin ne consecuencia di nan maldad. Por fin boca di nan profeta falso tabata silenciá. Pero, e boca di Jeremías a sigi profetiza. Jehova no a bandoné. Di acuerdo cu e modelo, Jehova lo no bandona e grupo cu Jeremías a simbolizá ora su decision importante ta resulta den e aplastamento fatal dje clero di cristiandad i hende cu ta kere nan mentira.

²² Sí, e estado desolá sin habitante di Jerusalem despues di aña 607 PEC lo ta exactamente e aparencia di cristiandad ora e ta perde su riqueza i ta ser desenmascará bergonzosamente. Esei ta e huicio merecí cu Jehova a decreta contra siñador falso. E huicio lo no faya. Mescos cu tur mensahe spiertador inspirá cu Jeremías a declara a wordu cumplí den pasado, nan lo ser realizá den nan cumplimento den e dia djawe. Pues, láganos ser manera Jeremías. Declara sin miedu e carga profético di Jehova pe pueblo, pa nan sa pakico e plena midí di su huicio husto ta bini riba tur siñador religioso falso!

[Study Questions]

1. Pakico hende cu ta participa den siñamento divino ta acepta un responsabilidad mashá importante?

2, 3. Cua huicio Jehova a declara mediante Jeremías en cuanto siñador falso di Jerusalem?

4. Di ki manera e mal ehempel moral di siñador di Jerusalem ta ser igualá den cristiandad djawe?

5. Pakico e estado inmoral di cristiandad ta peor cu e estado di Sodoma i Gomorra?

6. Kico Jeremías a bisa tocante e maldad di profeta di Jerusalem?

7, 8. Pakico e clero di cristiandad ta mescos cu profeta falso di Jerusalem, i con esei ta afecta miembro di religion?

9, 10. (a) Siñador falso di Jerusalem tabatin cua sorto di soño? (b) Con e clero di cristiandad di igual manera a siña “soño falso”?

11. (a) Siñador falso di Jerusalem tabatin cua mal efecto riba e nomber di Dios mes? (b) Na contraste cu e grupo cu Jeremías a simboliza, kico siñador religioso falso djawe a haci tocante e nomber divino?

12. (a) Pakico tin un gran culpa pa dramamento di sanger di parti di siñador religioso falso djawe? (b) Ki papel e clero a hunga den dos gera mundial?

13. Con Jeremías 23:22 ta duna prueba cu e clero di cristiandad no tin ningun relacion cu Jehova Dios?

14. Cua declaracion fuerte desenmascarando e clero di cristiandad tabata publicá na 1958?

15. E clero a declara cua profecía di paz? Nan lo ser cumplí?

16. (a) Cua clima moral tin den e mundo, i ken en parti ta responsabel pe? (b) Kico e grupo cu Jeremías a simboliza ta haci tocante e punto di bista degradá di mundo?

17. (a) Segun Jeremías, cua huicio tabatin cu bini riba Jerusalem malbado? (b) Kico lo sosode cristiandad pronto?

18, 19. Jeremías a anuncia cua “carga di Jehova” na Hudá, cu cua significacion?

20. Kico ta e “carga di Jehova” djawe?

21. (a) Pakico Jerusalem tabata destruí na 607 PEC? (b) Despues dje destruccion di Jerusalem, kico a sosode profeta falso i e berdadero profeta di Jehova, dunando nos cua siguranza awe?

22. E huicio di Jehova lo reduci cristiandad na cua estado?

[Caption on page 8]

Profeta di Jerusalem a comete “cosnan horrible”

[Caption on page 9]

“E vision di nan mes curazón ta loke nan ta papia”

[Caption on page 10]

Jerusalem despues di su destruccion ta ilustra e destino final di cristiandad

[Caption on page 12]

Pregunta di repaso

◻ Ki malu Jerusalem di antigua tabata desde e punto di bista di Jehova?

◻ Di ki manera cristiandad ‘a anda den falsedad’?

◻ Di ki manera e estado reprensible dje clero djawe ta ser desenmascará?

◻ Cua “carga di Jehova” ta ser declará awor?