Jehova Ta un Dios di Pacto

“Lo mi cera un pacto nobo cu e cas di Israel i cu e cas di Huda.”—JEREMIAS 31:31.

 1, 2. (a) Ki celebracion Jesus a iniciá riba e anochi di 14 di nísan, 33 E.C.? (b) Na cua pacto Jesus a referí en coneccion cu su morto?

RIBA e anochi di 14 di nísan, 33 E.C., Jesus a celebrá e Pascu hudiu cu su 12 apostelnan. Ya cu e tabata sa cu esaki tabata e último biaha cu lo el a cena cu nan i cu pronto lo el a muri na man di su enemigunan, Jesus a probechá dje ocasion pa splica hopi asuntu importante na su disipelnan mas íntimo.—Juan 13:1–17:26.

² Tabata n’e ocasion aki cu, despues di a manda Hudas Iscariote bai, Jesus a instituí e único celebracion religioso anual cu cristiannan mester tene—e Memorial di su morto. E registro ta bisa: “Miéntras nan a sigui come, Jesus a tuma un pan i, despues di a pronunciá un bendicion, el a kibr’é i, dunand’e na su disipelnan, el a bisa: ‘Tuma, come. Esaki ta nificá mi curpa.’ Tambe, el a tuma un copa i, despues di a duna gradicimentu, el a dun’é na nan, bisando: ‘Bebe di dje, boso tur; pasobra esaki ta nificá mi “sanger dje pacto,” cu lo tin cu ser dramá na fabor di hopi pa pordon di picá.’” (Mateo 26:26-28) Jesus su siguidónan mester a recordá su morto den un manera simpel i digno. I Jesus a referí na un pacto en coneccion cu su morto. Den e relato den Lucas, e ta ser yamá “e pacto nobo.”—Lucas 22:20.

 3. Ki preguntanan ta presentá tocante e pacto nobo?

³ Kico ta e pacto nobo? Si e ta e pacto nobo, esei ta nificá cu tin un pacto bieu? Tin un otro pacto relacioná cu e pacto nobo? E preguntanan aki ta importante pasobra Jesus a bisa cu e sanger dje pacto lo a ser dramá “pa pordon di picá.” Nos tur tin masha mester dje pordon ei.—Romanonan 3:23.

Un Pacto cu Abraham

 4. Ki promesa antiguo ta yuda nos comprendé e pacto nobo?

⁴ Pa comprendé e pacto nobo, nos tin cu bai bek casi 2.000 aña promé cu Jesus su ministerio terenal n’e tempu ora Taré i su famia—incluyendo Abram (despues, Abraham) i Abram su esposa Sarai, (despues, Sara)—a biaha for dje pais próspero di Ur dje caldeonan pa Haran den nort di Mesopotamia. Nan a keda ei te ora Taré a muri. Despues, riba ordu di Jehova, Abraham na 75 aña di edad a crusa Riu Eufrátes i a biaha direccion zuidwest p’e tera di Canan pa hiba un bida nomádico den tent. (Génesis 11:31–12:1, 4, 5; Echonan 7:2-5) Esei tabata na 1943 P.E.C. Miéntras Abraham tabata na Haran ainda, Jehova a bis’é: “Lo mi hací bo bira un nacion grandi i lo mi bendicioná bo i lo mi haci bo nomber grandi; i lo bo resultá di ta un bendicion. I lo mi bendicioná esnan cu ta bendicioná bo, i esun cu ta inbocá malu riba bo lo mi maldicioná, i tur e famianan dje tera siguramente lo bendicioná nan mes pa medio di bo.” Mas tardi, despues cu Abraham a crusa drenta Canan, Jehova a agregá: “Na bo simia mi ta bai duna e tera aki.”—Génesis 12:2, 3, 7.

 5. Jehova su promesa na Abraham ta conectá cu cua profecia histórico?

⁵ E promesa na Abraham tabata relacioná cu un otro promesa di Jehova. Sí, el a haci Abraham un figura clave den historia humano, unu ligá cu e cumplimentu dje promé profecia hamas registrá. Despues cu Adam i Eva a peca den e hofi di Eden, Jehova a pronunciá huicio riba nan tur dos, i n’e mésun ocasion, el a dirigí su mes na Satanas, cu a engañá Eva, bisando: “Lo mi pone enemistad entre abo i e muher i entre bo simia i su simia. Lo e machicá bo den cabes i abo lo machik’é den hilchi.” (Génesis 3:15) Jehova su pacto cu Abraham a indicá cu e Simia mediante ken Satanas su obranan lo a ser desbaratá, lo a aparecé den e liña di desendencia dje patriarca ei.

 6. (a) Mediante ken Jehova su promesa na Abraham lo a cumpli? (b) Kico ta e pacto di Abraham?

⁶ Siendo cu Jehova su promesa tabata relacioná cu un simia, Abraham tabatin mester di un yu homber mediante ken e Simia lo a bini. Ma tantu Abraham como Sara tabata di edad avansá i ainda nan no tabatin yu. Pero, finalmente, Jehova a bendicioná nan, rebibando milagrosamente nan facultadnan procreativo, i Sara a haña un yu homber cu Abraham, yamá Isaac, i asina a mantené bibu e promesa di un Simia. (Génesis 17:15-17; 21:1-7) Añanan mas despues, despues cu Jehova a pone e fe di Abraham na prueba—asta te n’e punto di proba cu e tabata dispuesto pa ofrecé su yu stimá Isaac den sacrificio—el a ripití su promesa na Abraham: “Siguramente lo mi bendicioná bo i lo mi siguramente multiplicá bo simia manera e streanan di shelu i manera e pipitanan di santu cu ta na oriya di laman; i bo simia lo tuma posesion dje porta di su enemigunan. I pa medio di bo simia tur nacion dje tera siguramente lo bendicioná nan mes debí n’e echo cu bo a scucha mi bos.” (Génesis 22:15-18) Hopi biaha e promesa adicional aki ta ser yamá e pacto di Abraham, i e pacto nobo cu a bini despues lo tabata estrechamente relacioná cuné.

 7. Con e simia di Abraham a cuminsá aumentá na cantidad, i ki circunstancianan a pone cu nan a bira residente na Egipto?

⁷ Cu tempu, Isaac a haña dos yu homber ohochi, Esau i Jacob. Jehova a scoge Jacob pa ta e antepasado dje Simia Primintí. (Génesis 28:10-15; Romanonan 9:10-13) Jacob a haña 12 yu homber. Sí, tabata tempu awor pa Abraham su simia cuminsá aumentá. Ora Jacob su yu hombernan tabata adulto, hopi di nan teniendo nan mes famia, un hamber a obligá nan tur muda bai Egipto unda, cu intervencion di Dios, Jacob su yu Josef a prepará e caminda. (Génesis 45:5-13; 46:26, 27) Despues di algun aña, e hamber na Canan a terminá. Pero Jacob su famia a keda Egipto—na principio como huésped, pero despues como esclabo. Tabata te na 1513 P.E.C., 430 aña despues cu Abraham a crusa Riu Eufrátes, cu Moises a libra Jacob su desendientenan for di Egipto. (Exodo 1:8-14; 12:40, 41; Galationan 3:16, 17) Awor Jehova lo a duna atencion special na su pacto cu Abraham.—Exodo 2:24; 6:2-5.

“E Pacto Bieu”

 8. Kico Jehova a cera cu e desendencia di Jacob na Sínai, i kico esaki tabatin di haber cu e pacto di Abraham?

⁸ Ora Jacob i su yu hombernan a muda bai Egipto, nan tabata un famia extenso, pero nan desendientenan a bandoná Egipto como un grupo grandi di tribunan numeroso. (Exodo 1:5-7; 12:37, 38) Promé cu Jehova a trece nan na Canan, el a guia nan den direccion sur na pia dje ceru yamá Horeb (of Sínai) na Arabia. Ei, el a cera un pacto cu nan. Compará cu “e pacto nobo,” esaki a yega di ser yamá “e pacto bieu.” (2 Corintionan 3:14) Pa medio dje pacto bieu, Jehova a efectuá simbólicamente e cumplimentu preliminar di su promesa na Abraham.

 9. (a) Ki cuater cosnan Jehova a primintí mediante e pacto di Abraham? (b) Ki prospectonan mas Jehova su pacto cu Israel a haci posibel, i bou di ki condicion?

⁹ Jehova a splica Israel e condicionnan dje pacto aki: “Si boso obedecé mi bos estrictamente i berdaderamente warda mi pacto, e ora ei boso siguramente lo bira mi propiedad special entre tur otro pueblo, pasobra henter e tera ta pertenecé na mi. I boso mes lo bira pa mi un reino di sacerdote i un nacion santu.” (Exodo 19:5, 6) Jehova a primintí cu Abraham su simia (1) lo a bira un gran nacion, (2) lo a haña victoria riba nan enemigunan, (3) lo a heredá e tera di Canan, i (4) lo ta e canal via cua e nacionnan lo a ricibí bendicionnan. Awor el a revelá cu nan mes por a heredá e bendicionnan aki como su pueblo special, Israel, birando “un reino di sacerdote i un nacion santu,” si nan obedecé su mandamentunan. E israelitanan a bai di acuerdo pa drenta e pacto aki? Nan a contestá unidamente: “Tur loke Jehova a papia nos ta dispuesto na haci.”—Exodo 19:8.

10. Con Jehova a organisá e israelitanan den un nacion, i kico el a spera for di nan?

¹⁰ P’esei, Jehova a organisá e israelitanan den un nacion. El a duna nan leynan cu a regulá adoracion i bida civil. Tambe el a percurá un tabernáculo (despues, un tempel den Jerusalem) i un sacerdocio pa rindi sirbishi sagrado den e tabernáculo. Warda e pacto a nificá obedecé Jehova su leynan i, specialmente, adorá e so. E promé dje Dies Mandamentunan cu tabata e núcleo dje leynan ei tabata: “Ami ta Jehova bo Dios, cu a sacá bo for dje tera di Egipto, for dje cas di esclabo. Bo no mag tin ningun otro dios contra mi cara.”—Exodo 20:2, 3.

Bendicionnan Mediante e Pacto di Ley

11, 12. Den ki maneranan e promesanan den e pacto bieu a cumpli pa cu Israel?

¹¹ E promesanan den e pacto di Ley a cumpli pa cu Israel? Israel a bira “un nacion santu”? Como desendiente di Adam, e israelitanan tabata pecadó. (Romanonan 5:12) No obstante, bou dje Ley, nan tabata ofrecé sacrificio pa cubri nan picánan. Relacioná cu e sacrificionan cu nan tabata ofrecé riba e Dia di Expiacion anual, Jehova a bisa: “Riba e dia aki, expiacion lo ser hací pa boso pa pronunciá boso limpi. Boso lo ta limpi di tur boso picánan dilanti Jehova.” (Levítico 16:30) P’esei, ora nan tabata fiel, Israel tabata un nacion santu, limpiá p’e sirbishi di Jehova. Pero pa nan mantené e condicion limpi aki, nan mester a obedecé e Ley i ofrecé sacrificio continuamente.

¹² Israel a bira “un reino di sacerdote”? For dje tempu cu Dios a cera e pacto cu Israel, e tabata un reino, cu Jehova como Rey celestial. (Isaías 33:22) Ademas, e pacto di Ley a contené percuracionnan pa un reino humano, di manera cu despues Jehova a ser representá pa reynan cu a goberná den Jerusalem. (Deuteronomio 17:14-18) Pero Israel tabata un reino di sacerdote? Bon, e tabatin un sacerdocio cu tabata rindi sirbishi sagrado den e tabernáculo. E tabernáculo (despues, e tempel) tabata e centro di adoracion puru pa tantu hende israelita como pa no-israelita. I e nacion tabata e único canal di berdad revelá na humanidad. (2 Crónicanan 6:32, 33; Romanonan 3:1, 2) Tur israelita fiel, no solamente sacerdotenan levita, tabata “testigonan” di Jehova. Israel tabata Jehova su “sirbidó,” formá pa ‘relatá su alabansa.’ (Isaías 43:10, 21) Hopi stranhero humilde a mira Jehova su poder na fabor di su pueblo i a ser atraí na adoracion puru. Nan a bira prosélito. (Hosué 2:9-13) Pero solamente un tribu a ègt sirbi como sacerdotenan ungí.

Prosélitonan na Israel

13, 14. (a) Pakico nos por bisa cu prosélitonan no tabata participante den e pacto di Ley? (b) Con prosélitonan a yega di ta bou dje pacto di Ley?

¹³ Kico tabata e posicion dje prosélitonan ei? Ora Jehova a cera su pacto, esei tabata solamente cu Israel; aunke esnan dje “inmenso multitud mixto” tabata presente, nan no a ser mencioná como participante. (Exodo 12:38; 19:3, 7, 8) Nan primogénitonan no tabata incluí ora e prijs di rescate p’e primogénito di Israel a ser calculá. (Númeronan 3:44-51) Décadanan despues ora e tera di Canan a ser dividí entre e tribunan israelita, nan no a apartá nada pa creyentenan no-israelita. (Génesis 12:7; Hosué 13:1-14) Pakico? Pasobra e pacto di Ley no a ser cerá cu prosélitonan. Pero hombernan prosélito a ser circuncidá den obedencia n’e Ley. Nan a warda su reglamentunan, i nan a beneficiá di su percuracionnan. Tantu prosélito como israelita a bini bou dje pacto di Ley.—Exodo 12:48, 49; Númeronan 15:14-16; Romanonan 3:19.

¹⁴ Por ehempel, si un prosélito a mata un hende accidentalmente, mescos cu un israelita, lo e por a hui bai un stad di refugio. (Númeronan 35:15, 22-25; Hosué 20:9) Riba Dia di Expiacion un sacrificio a ser ofrecé “na fabor di henter e congregacion di Israel.” Como parti dje congregacion, prosélitonan a participá den e procedimentunan i e sacrificio a cubri nan. (Levítico 16:7-10, 15, 17, 29; Deuteronomio 23:7, 8) E prosélitonan tabata asina estrechamente asociá cu Israel bou dje Ley cu na Pentecoste 33 E.C. ora e promé ‘yabi dje reino’ a ser usá na fabor dje hudiunan, prosélitonan tambe a beneficiá. Como resultado, “Nicolas, un prosélito di Antiokia,” a bira un cristian i tabata entre e ‘shete hombernan acreditá’ nombrá pa percurá p’e necesidadnan dje congregacion den Jerusalem.—Mateo 16:19; Echonan 2:5-10; 6:3-6; 8:26-39.

Jehova Ta Bendicioná e Simia di Abraham

15, 16. Con Jehova su pacto cu Abraham a cumpli bou dje pacto di Ley?

¹⁵ Despues di a organisá Abraham su desendientenan como un nacion bou dje Ley, Jehova a bendicioná nan di acuerdo cu su promesa n’e patriarca. Na 1473 P.E.C., Moises su sucesor, Hosué, a hiba Israel Canan. E partimentu dje tera entre e tribunan cu a sigui despues a cumpli cu Jehova su promesa pa duna e tera n’e simia di Abraham. Ora Israel tabata fiel, Jehova a cumpli cu su promesa pa duna nan victoria riba nan enemigunan. Esaki tabata specialmente e caso durante e gobernacion di Rey David. P’e tempu di David su yu Sálomon, un di tres aspecto dje pacto di Abraham a cumpli. “Huda i Israel tabata hopi, manera e pipitanan di santu cu tin cant’i laman di hopi cu nan tabata, comiendo i bebiendo i alegrando.”—1 Reynan 4:20.

¹⁶ Pero, con e nacionnan lo a bendicioná nan mes mediante Israel, simia di Abraham? Manera a ser mencioná anteriormente, Israel tabata Jehova su pueblo special, su representante entre e nacionnan. Djis promé cu Israel a marcha drenta Canan, Moises a bisa: “Alegrá, O nacionnan, cu su pueblo.” (Deuteronomio 32:43) Hopi stranhero a respondé. Ya caba “un inmenso multitud mixto” a sigui Israel for di Egipto, tabata testigo di Jehova su poder den desierto i a tende Moises su invitacion pa alegrá. (Exodo 12:37, 38) Mas despues, e moabita Rut a casa cu e israelita Boaz i a bira un antepasado dje Mesías. (Rut 4:13-22) E kenita Jehónadab i su desendientenan i e etiopio Ebed-Melec a distinguí nan mes dor di pega na principionan hustu ora hopi israelita natural tabata infiel. (2 Reynan 10:15-17; Jeremías 35:1-19; 38:7-13) Bou dje imperio di Persia, hopi stranhero a bira prosélito i a lucha huntu cu Israel contra su enemigunan.—Ester 8:17, nota.

Un Pacto Nobo Tabata Necesario

17. (a) Pakico Jehova a rechasá e reino di nort i sur di Israel? (b) Kico a hiba n’e rechaso final dje hudiunan?

¹⁷ Sin embargo, pa por a ricibí e cumplimentu completo dje promesa di Dios, e nacion special di Dios mester tabata fiel. Esei e no tabata. Ta cierto cu tabatin israelitanan cu fe sobresaliente. (Hebreonan 11:32–12:1) No obstante, na hopi ocasion e nacion a acudí na diosnan pagano, sperando di haña beneficionan material. (Jeremías 34:8-16; 44:15-18) Algun persona a aplicá e Ley robes of a djis ignor’é. (Nehemías 5:1-5; Isaías 59:2-8; Malakías 1:12-14) Despues dje morto di Sálomon, Israel a parti den un reino di nort i un reino di sur. Ora e reino di nort a resultá di ta abiertamente rebelde, Jehova a anunciá: “Pa motibu cu ta e conocimentu ta loke bo mes a rechasá, mi tambe lo rechasá bo for di sirbi como sacerdote pa mi.” (Oséas 4:6) E reino di sur tambe a ser castigá fuertemente dor cu el a faya cu e pacto. (Jeremías 5:29-31) Ora e hudiunan a rechasá Jesus como e Mesías, Jehova a rechasá nan tambe. (Echonan 3:13-15; Romanonan 9:31–10:4) Finalmente, Jehova a cera un areglo nobo pa efectuá e cumplimentu completo dje pacto di Abraham.—Romanonan 3:20.

18, 19. Ki areglo nobo Jehova a haci pa asina e pacto di Abraham por a cumpli den un manera completo?

¹⁸ E areglo nobo ei tabata e pacto nobo. Jehova a profetisá esaki ora el a bisa: “‘Mira! Ta bini dianan,’ ta e expresion di Jehova, ‘i lo mi cera un pacto nobo cu e cas di Israel i cu e cas di Huda’ . . . ‘Esaki ta e pacto cu lo mi cera cu e cas di Israel despues dje dianan ei,’ ta e expresion di Jehova. ‘Lo mi pone mi ley den nan, i lo mi skirbié den nan curason. I lo mi bira nan Dios, i nan mes lo bira mi pueblo.’”—Jeremías 31:31-33.

¹⁹ Esaki ta e pacto nobo na cua Jesus a referí dia 14 di nísan, 33 E.C. N’e ocasion ei, Jesus a revelá cu tabata falta masha poco pa Jehova cera e pacto primintí cu su disipelnan, cu Jesus como mediador. (1 Corintionan 11:25; 1 Timoteo 2:5; Hebreonan 12:24) Atrabes dje pacto nobo aki, Jehova su promesa na Abraham mester a haña un cumplimentu mas glorioso i duradero, manera nos lo mira den e siguiente artículo.

Bo Por Splica?

◻ Kico Jehova a primintí den e pacto di Abraham?

◻ Con Jehova a efectuá e cumplimentu dje pacto di Abraham pa cu Israel carnal?

◻ Con prosélitonan a beneficiá for dje pacto bieu?

◻ Pakico un pacto nobo tabata necesario?

[Plachi na página 9]

Mediante e pacto di Ley, Jehova a efectuá un cumplimentu preliminar dje pacto di Abraham