E Palu Ku Ta “Yora” i Su “Lágrimanan”

‘Trese bálsamo pa doló,’ Yeremías 51:8 ta bisa. Pa haña sa di unda e supstansia relahante i sumamente kurativo aki ta bini, nos tin ku bai entre otro na e isla di Kíos, den laman Egeo.

NA PRINSIPIO di zomer, kunukeronan na Kíos ta prepará pa kosechá di un manera straño. Despues ku nan kaba di bari rònt di e matanan ku ta produsí gòm (hars) i ku semper ta bèrdè, nan ta traha un kapa di klei blanku. Despues e kunukeronan ta skèrf e kaska dje palu i pone esaki “yora.” “Lágrimanan” pálido di gòm ta kuminsá lèk for dje palu. Despues di dos òf tres siman, e gotanan di gòm ta kuaha i e kunukero ta pasa rekohé nan, sea direktamente for di e tronkon òf for di riba e kapa di klei abou. Ku e “lágrimanan” di gòm aki nan ta traha bálsamo.

Pero promé ku kosecha, pasenshi i trabou duru ta nesesario. E tronkon shinishi tur trosí ta krese masha pokopoko mes. Ta dura 40 pa 50 aña promé ku e palu krese kompletamente; normalmente e ta yega 2 te 3 meter.

Fuera di skèrf e tronkonnan i rekohé e “lágrimanan,” mas trabou ta nesesario pa produsí gòm. Ora e kunukeronan kaba di rekohé e “lágrimanan” di gòm, nan ta separá e mihónan, laba nan i surti nan segun nan tamaño i kalidat. Despues, nan ta limpia e gòm un biaha mas, anto e ora ei por us’é pa diferente kos.

Historia di un Mata Presioso

E palabra griego pa “gòm” ta relashoná ku un término ku ta nifiká ‘morde riba djente.’ E nòmber aki ta indiká ku for di hopi tempu pasá, a usa gòm komo bals pa refreská aliento.

E informashon mas bieu tokante gòm ta bin di Herodoto, historiadó griego di siglo 5 promé ku Era Komun. Otro outornan i dòkternan di pasado—manera Apolodoro, Dioscorides, Teofrasto i Hipókrates—a menshoná e uso medisinal di gòm. Maske palu ku ta produsí gòm ta krese kant’i henter e kosta Mediteráneo, kasi ta Kíos so ta prosesá gòm desde aña 50 E.K. I gòm tabata e kos ku mas a interesá esnan ku a konkistá Kíos: promé e romanonan, despues e genovesnan, anto mas despues e ottomannan.

Uso Amplio di Gòm

Ántes dòkternan egipsio tabata usa gòm pa vários malesa manera diarea i artrítis. Tambe nan tabata us’é komo sensia i pa balsamá kadaver. Kisas ta for di e palu aki entre otro tabata saka ‘ungwento di Galad,’ bon konosí den Beibel pa su efekto kurativo i pa su uso den kosmétika i komo bálsamo. (Yeremías 8:22; 46:11) Tin hende asta ta pensa ku tal bes e palu ku ta produsí un speserei dushi ta pertenesé na e famia di palunan ku ta produsí gòm. E speserei dushi ei ta un di e ingredientenan di e sensia santu perfumá ku nan a usa solamente pa kosnan sagrado.—Éksodo 30:34, 35.

Awendia bo por haña gòm den vèrnis pa protehá pintura trahá ku fèrf di zeta, mueblenan i instrumentonan musikal. E ta ser usá komo material waterproef i di isolashon, i tambe nan ta konsider’é komo un di e mihó produktonan pa konserbá koló di paña i pintura artístiko. Tambe ta usa gòm den leim i pa duna kueru kolo. Dor ku e ta hole dushi i tin otro karakterístikanan, ta usá gòm den habon, kosmétika i perfume.

Gòm ta riba 25 lista ofisial di remedi rònt mundu. Ainda e mundu arabir ta us’é hopi den remedi tradishonal. Ademas bo ta hañ’é den plòm di djente i den e kapa interior di kápsula di remedi.

Komo fuente di bálsamo, e “lágrimanan” di e palu di gòm ku ta “yora” i ku tin diferente uso, a trankilisá i kura hende pa siglonan kaba. Ta na su lugá anto ku Yeremías su profesia ta bisa: ‘Tuma ungwento di Galad pa doló.’

[Plachinan na página 31]

Kíos

Kosechando gòm

Ta rekohé “lágrimanan” di gòm kuidadosamente

[Rekonosementu]

Kíos i arte di kosechá: Kortesia di Korais Library; tur otro: Kostas Stamoulis