Referensia pa Material i Tarea pa Reunion Nos Bida i Sirbishi Kristian

5-11 DI YÜNI

TESORONAN DI E PALABRA DI DIOS | YEREMÍAS 51-52

“Yehova Su Palabra Ta Kumpli en Detaye”

it-2-S 356 §2-3

Medonan, Media

E personan huntu ku e medonan ta derotá Babilonia. Den siglo 8 promé ku Kristu, Isaías a profetisá ku Yehova lo a lanta kontra Babilonia “e medonan . . . kendenan no ta interesá den plata ni tin plaser den oro. Nan bognan lo plècha e hóbennan.” (Isa 13:​17-19; 21:⁠2) Den e kaso akí, e término “medonan” por inkluí e personan tambe ya ku e historiadónan griego klásiko por lo general tabata usa e término akí pa referí tantu na e medonan komo e personan. E echo ku nan a despresiá plata i oro por duna di komprondé ku den e kaso di Babilonia, nan interes prinsipal tabata e konkista i no e botin, i p’esei ningun soborno òf oferta pa paga tributo lo a kumpra nan òf kita nan for di nan meta. Tantu e medonan komo e personan a usa bog komo nan arma prinsipal. Por lo general, e bognan tabata di palu, aunke tin biaha nan tabata kubrí ku bròns òf koper tambe. (Kompará ku Sl 18:34) Probablemente, ku e bognan akí, huntu ku un kantidat grandi di flecha hasí skèrpi pa nan penetrá mas profundo, nan a ‘plècha e hóbennan di Babilonia.’​—⁠Yer 51:⁠11.

Ta notabel ku Yeremías (51:​11, 28) ta menshoná “e reinan di e medonan” entre e ehérsito ku a ataká Babilonia. E echo ku el a usa e forma plural ta mustra ku kisas asta den e tempu di Siro ainda a eksistí rei òf reinan di Media ku ménos outoridat, algu ku tabata parti di un kustumber antiguo. (Kompará tambe ku Yer 25:25.) P’esei, ora e podernan kombiná di e medo-, perso-, elamitanan i otro tribunan di e nashonnan bisiña a kapturá Babilonia, Rei Siro di Persia kisas a manda pa nombra Darío, un hòmber di Media, komo “rei riba e reino di e kaldeonan.”​—⁠Dan 5:31; 9:⁠1.

it-2-S 450 §3

Nabonido

Loke e krónika ta bisa tokante e anochi ku Babilonia a kai ta interesante: “E ehérsito di Siro a drenta Babilonia sin bringa.” E palabranan akí ta kuadra ku e profesia di Yeremías ku ta bisa: “E hòmbernan poderoso di Babilonia a stòp di bringa.”​—⁠Yer 51:⁠30.

it-1-S 273 §1

Babilonia

For di e fecha memorabel di aña 539 promé ku Kristu padilanti, Babilonia a kuminsá pèrdè su poder i gloria. Na dos okashon el a rebeldiá kontra e emperador perso Darío I (Histáspes), i na e di dos okashon el a keda di plùnder. E stat, ku a keda restorá parsialmente, a rebeldiá kontra Hérhes I i a keda sakiá. Aleksander e Grandi a purba di hasi Babilonia e kapital di su imperio, pero el a muri diripiente na aña 323 promé ku Kristu. Nikátor a konkistá e stat na aña 312 promé ku Kristu i a hiba un gran kantidat di su materialnan na e kosta di Riu Tigris pa usa nan despues pa konstruí su kapital nobo, Seleusia. Sinembargo, e stat tabata eksistí ainda den tempu di e promé kristiannan i un grupo di hudiu tabata biba einan. Esei a duna apòstel Pedro motibu pa bishitá Babilonia, manera su karta ta indiká. (1Pe 5:13) Inskripshonnan ku a ser hañá na Babilonia ta mustra ku e tèmpel di Bel tabata eksistí ainda na aña 75 despues di Kristu. No opstante, ta parse ku e stat a stòp di eksistí na siglo 4 despues di Kristu. E stat a bira nada mas ku “un monton di ruina.”​—⁠Yer 51:⁠37.

Buska Hoyanan Spiritual

it-2-S 423 §2

Seru

Ta representá gobièrnu. Den Beibel, seru por representá reino òf gobièrnu. (Dan 2:​35, 44, 45; kompará ku Isa 41:15; Rev 17:​9-11, 18.) Babilonia, pa medio di su konkistanan militar, a destruí otro nashonnan, p’esei e ta ser yamá “seru ku ta destruí.” ( Yer 51:​24, 25) Un salmo ku ta relatá loke Yehova a hasi kontra sierto hòmbernan di guera ta deskribié komo “glorioso, mas mahestuoso ku e serunan yen di bestia pa yag ariba.” (Sl 76:⁠4) E “serunan yen di bestia pa yag ariba” kisas ta representá reinonan agresivo. (Kompará ku Nah 2:​11-13.) David a bisa tokante Yehova: “Bo a hasi mi seru para firme,” loke probablemente ta nifiká ku Yehova a pone e reino di David na haltu i a estables’é firmemente. (Sl 30:7; kompará ku 2Sa 5:12.) E echo ku seru por representá reino ta yuda nos komprondé loke Revelashon 8:8 ta deskribí komo “algu manera un seru grandi na kandela.” Algu ku ta parse un seru na kandela ta duna di komprondé ku e ta relashoná ku un tipo di gobernashon ku ta destruktivo manera kandela.

it-2-S 304 §4

Laman

Ehérsitonan ku ta inundá. Yeremías a kompará e zonido di e ehérsito ku a ataká Babilonia ku e zonido di “laman” brutu. ( Yer 50:42) P’esei, ora el a profetisá ku “laman” lo a inundá Babilonia, e tabata referí na e ‘diluvio’ òf gran kantidat di ehérsito bou di mando di e medo- i personan.​—⁠Yer 51:42; kompará ku Dan 9:⁠26.

19-25 DI YÜNI

TESORONAN DI E PALABRA DI DIOS | EZEKIEL 1-5

“Ezekiel Tabatin Goso den Deklará e Mensahe di Dios”

it-1-S 823 §8

Tripa

Nos tripa ta digerí loke nos kome. E echo akí a ser usá na un manera simbóliko pa representá digestion mental òf spiritual ora ku Ezekiel, den un vishon, a haña e mandato pa kome un ròl i yena su barika (na hebreo: meím) kuné. Ezekiel mester a meditá riba e palabranan skirbí den e ròl i keda kòrda nan pa e haña forsa spiritual. Asina el a keda alimentá spiritualmente i a haña un mensahe ku e mester a proklamá.​—⁠Eze 3:​1-6; kompará ku Rev 10:​8-10.