Capítulo 37
Lamentacion i alegría riba e fin di Babilonia
1. Con “rey dje tera” lo reacciona ne destruccion rápido di Babilonia e Grandi?
E FIN di Babilonia ta bon noticia pe pueblo di Jehova, pero con e nacionan ta miré? Juan ta bísanos: “I rey dje tera cu a comete fornicacion cuné i a biba den luho sin bergüenza lo yora i bati nan mes den desconsuelo riba dje, ora nan ta mira e huma dje kimamento di dje, mientras cu nan ta para leu pa motibo di nan miedu di su tormento i ta bisa, ‘Ki lástima, Ki lástima, abo, e stad grandi, Babilonia, a stad fuerte, pasobra den un ora bo huicio a yega!’”—Revelacion 18:9, 10.
2. (a) Siendo cu e diez cachu simbólico dje bestia salbahe di color scarlata ta destrui Babilonia e Grandi, pakico “rey dje tera” ta keda desconsolá riba su fin? (b) Pakico rey desconsolá ta para leu for dje stad condená?
2 Reaccion dje nacionan por parce un sorpresa den bista dje echo cu e diez cachu símbolico dje bestia salbahe di color scarlata ta destrui Babilonia. (Revelacion 17:16) Pero, despues di fin di Babilonia, evidentemente “rey dje tera” lo realiza ki útil e tabata pa nan pa domina e pueblo i tene nan na paz. Clero ta declara cu gera ta sagrado, ta recluta soldad, i den nan predicashi ta anima hovenan pa bai den gera. Religion ta percura un máscara di santidad pa gobernante corrupto sconde tras di dje ora nan ta oprimi pueblo. (Compara cu Jeremías 5:30, 31; Mateo 23:27, 28.) Sin embargo, ripara cu rey desconsolá awor ta para leu for dje stad condená. Nan no ta yega suficiente cerca pa duné yudanza. Nan ta lamenta pa miré bai pero no asina tanto di corre risico di yudé.
Comerciante ta yora i ta lamenta
3. Ken mas tin duele debí ne destruccion di Babilonia e Grandi, i Juan a duna cua motibo pa esei?
3 Rey di tera no ta e úniconan cu ta lamenta e cabamento di Babilonia e Grandi. “També, comerciante biahero dje tera ta yora i ta lamenta riba dje, pasobra no tin hende pa cumpra nan surtido completo mas, un surtido completo di oro i plata i piedra precioso i perla i linen fini i púrpura i seda i scarlata; i tur cos den palu perfumá i tur sorto di obheto di ivor i tur sorto di obheto di palu mas precioso i di coper i di heru i di marmol; també di cané i specerij di India i censia i azeta perfumá i olíbano i biña i azeta di oliba i hariña fini i trigo i baca i carné, i cabai i coche i esclabo i alma humano. Sí, e fruta excelente cu bo alma ta deseá a apartá for di bo [Babilonia e Grandi], i tur cos exquisito i cos bonita a perece foi bo, i nunca mas boso lo háyanan.”—Revelacion 18:11-14.
4. Pakico “comerciante biahero” ta lamenta i ta yora riba e fin di Babilonia e Grandi?
4 Sí, Babilonia e Grandi tabata un amiga íntima i bon cliente di comerciante ricu. Por ehempel, monasterio, conbento i misa di cristiandad pa siglonan a montona un cantidad enorme di oro, plata, piedra precioso, palu balioso, i otro forma di riqueza material. Además, religion ta duna su bendicion na gasto extravagante i na partido di bebimento ne tempo di celebracion di pascu cu ta desonra Cristo, i na otro dia religioso. Misionero di cristiandad a drenta den país leu i a habri mercado nobo pa “comerciante biahero” di mundo. Den Hapón di siglo 17, e religion católico, cu a yega hunto cu comerciante, asta a enbolbele den gera local. Informando di un bataya decisivo na pia dje muraya dje castel di Osaka, The Encyclopaedia Britannica ta bisa: “Soldad di Tokugawa tabata bringa contra un enemigo cu tabatin bandera pintá cu cruz i imagen dje Salbador i di Santiago, e santo patrón di Spaña.” E ehército victorioso a persigi i casi a extermina catolicismo den Hapón. Participacion di religion den asunto di mundo djawe lo no resulta den bendicion pe tampoco.
5. (a) E boz biniendo di cielo ta duna cua otro detaye dje lamentacion di “comerciante biahero”? (b) Pakico comerciante també “ta para leu”?
5 E boz biniendo di cielo a sigi bisa: “Comerciante biahero di tal cosnan, cu a bira ricu foi dje, lo para leu pa motibo di nan miedu di su tormento i lo lamenta i yora, bisando, ‘Ki lástima, ki lástima—e gran stad, bistí cu linen fini i púrpura i scarlata, i dorná ricamente cu adorno di oro i piedra precioso i perla, pasobra den un ora riqueza asina grandi a wordu destruí!’” (Revelacion 18:15-17a) Cu e destruccion di Babilonia e Grandi, “comerciante” ta lamenta e pérdida di nan socio comercial. En berdad, ta “ki lástima, ki lástima,” pa nan. Pero ripara cu e motibo di nan lamentacion ta henteramente egoísta i nan—mescos cu rey—“ta para leu.” Nan no ta yega suficiente cerca pa nan duna yudanza na Babilonia e Grandi.
6. Ki detaye e boz biniendo di cielo ta duna di lamentacion di capitán di barcu i di marinero, i pakico nan ta lamenta?
6 E relato ta sigi bisa: “I tur capitán di barcu i tur hende cu ta biahá na cualkier parti, i marinero i tur hende cu ta gana nan pan na lamá, a para leu i a sclama mientras cu nan a wak e huma dje kimamento di dje i a puntra, ‘Cua stad ta manera e gran stad?’ I nan a tira stof riba nan cabez i a sclama, lamentando i yorando, i a bisa, ‘Ki lástima, ki lástima—e gran stad, den locual tur hende cu tin barcu riba lamá a bira ricu pa motibo di su preciosidad, pasobra den un ora el a ser destruí!’” (Revelacion 18:17b-19) Babilonia di antigua tabata un stad comercial i tabatin un gran cantidad di barcu. També, Babilonia e Grandi ta haci hopi negoshi usando e “hopi awa” di su pueblo. Esei ta duna empleo na hopi hende religioso. Ki un golpi económico pa nan ta e destruccion di Babilonia e Grandi! Nunca lo tin un fuente di ganashi manera ele.
Alegrando riba su exterminacion
7, 8. Con e boz biniendo di cielo ta culmina su mensahe tocante Babilonia e Grandi, i ken ta respondé ne palabra?
7 Ora Media i Persia a vence Babilonia di antigua, Jeremías a profetiza: “I cielo i tera i tur loke tin den nan siguramente lo sclama gozosamente riba Babilonia.” (Jeremías 51:48) Ora Babilonia e Grandi ta ser destruí, e boz biniendo di cielo ta culmina su mensahe, bisando di Babilonia e Grandi: “Alegrábo riba dje, O cielo, també boso, santo i apóstol i profetanan, pasobra hudicialmente, Dios a duna castigo na dje pa boso!” (Revelacion 18:20) Jehova i e angelnan lo keda contentu pa mira exterminacion dje enemigo bieu di Dios, i també apóstol i profeta cristian di promé cu a recibi nan resureccion caba i ta tuma nan puesto den e arreglo dje 24 anciano.—Compara cu Salmo 97:8-12.
8 En berdad, tur “santo”—sea cu nan ta resusitá den cielo of ta na bida ainda riba tera—lo sclama pa gozo, hunto cu e asociacion dje multitud grandi di otro carné. Cu tempo, tur hende di fe di antigua lo ser resusitá den e sistema nobo di cosnan, i nan també lo alegra hunto cu nan. E pueblo di Dios no a purba di vínganan riba nan persigidor di religion falso. Nan ta corda e palabra di Jehova: “Vinganza ta di mi; lo mi paga, Jehova ta bisa.” (Romano 12:19; Deuteronomio 32:35, 41-43) Wel, awor Jehova a paga. Tur e sanger cu Babilonia e Grandi a drama ta ser vingá.
Tiramento dje piedra grandi di molina
9, 10. (a) Kico e angel fuerte ta haci i ta bisa awor? (b) Cua acto similar dje angel fuerte di Revelacion 18:21 a tuma lugar den e tempo di Jeremías, i kico esei a garantizá? (c) E accion dje angel fuerte cu Juan a mira ta garantiza kico?
9 Loke Juan a mira despues ta confirma cu e huicio di Jehova di Babilonia e Grandi ta final: “I un angel fuerte a hiza un piedra manera un piedra grandi di molina i a tiré den lamá, bisando: ‘Asina cu un tiro lihé Babilonia e stad grandi lo ser tirá abao, i lo no ser hayá nunca mas.’” (Revelacion 18:21) Den e tempo di Jeremías, un acto similar cu un nificacion profético fuerte tabata ehecutá. Jeremías tabata inspirá pa skirbi den un buki, “tur calamidad cu lo bini riba Babilonia.” El a duna e buki na Seraya i a bisé bai Babilonia. Sigiendo instruccion di Jeremías, Seraya a leza ei un declaracion contra e stad: “Ai, O Jehova, bo mes a papia contra e lugar aki, pa corté pa no yega di tin den dje ningun habitante, ni hende ni bestia doméstico, sino pe bira simplemente un desierto desolá te na tempo indefinitivo.” Anto Seraya a mara un piedra ne buki i a tiré den e rio Eufrates, bisando: “Asina Babilonia lo sink i nunca subi debí ne calamidad cu mi ta manda riba dje.”—Jeremías 51:59-64.
10 E tiramento dje buki den e rio cu un piedra mará na dje tabata un garantía cu Babilonia lo baha den olvido, pa nunca recobra. Ora apóstol Juan a mira un angel fuerte ehecuta un acto similar, esei també ta un garantía fuerte di cu e propósito di Jehova pa cu Babilonia e Grandi lo ser cumplí. E estado di ruina completo di Babilonia di antigua den e dia djawe ta duna testimonio fuerte di loke lo pasa religion falso den e futuro cercano.
11, 12. (a) Kico e angel fuerte ta bisa Babilonia e Grandi awor? (b) Con Jeremías a profetiza tocante Jerusalem apóstata, i kico esei a nifica pa nos dia?
11 Awor e angel fuerte a dirigié na Babilonia e Grandi, bisando: “I nunca mas hende lo tende den bo e sonido di cantante cu ta compaña nan mes cu arpa ni di músico ni di tocador di fluit ni di trompet, ni ningun artisano di ofishi lo ser hayá den bo hamás, i ningun sonido di piedra di molina nan lo bolbe tende den bo hamás, i ningun luz di lampi lo bolbe luza den bo hamás, i ningun boz di bruidegom ni di bruid nan lo bolbe tende den bo hamás; pasobra bo comerciante biahero tabata hende dje promé rango dje tera, pasobra bo a gaña tur nacion cu bo práctica spiritista.”—Revelacion 18:22, 23.
12 Jeremías a profetiza cu palabra semehante tocante Jerusalem apóstata: “Lo mi destrui di den nan e sonido di hubileo i e sonido di gozamento, e boz di bruidegom i boz di bruid, e sonido di molina di man i luz di lampi. I tur e tera aki tin cu ser un lugar desolá, un obheto di asombro.” (Jeremías 25:10, 11) Como e parti principal di Babilonia e Grandi, cristiandad lo bira un ruina sin bida, cu tabata ilustrá na moda tanto bibiente den e estado di desolacion di Jerusalem despues di aña 607 PEC. Cristiandad cu na un tempo a alegra gozosamente i tabata druk haciendo ruido diario lo hayé vencí i bandoná.
13. Cua cambio di ripiente ta bini pa Babilonia e Grandi, i esei ta tene ki efecto riba “comerciante biahero” di dje?
13 En berdad, manera e angel a bisa Juan, Babilonia e Grandi henter lo cambia for di un imperio poderoso internacional pa bira un desierto secu i desolá. “Comerciante biahero” di dje, incluyendo miyonario di rango halto, a usa su religion pa nan mes probecho of como disfraz, i su clero a haya cu ta probechoso pa ser prominente hunto cu nan. Pero tal comerciante no tin Babilonia e Grandi mas como nan cómplice. Lo e no gaña e nacionan nunca mas cu práctico religioso misterioso.
Spantoso culpa pa dramamento di sanger
14. E angel fuerte ta duna cua motibo pe severidad dje huicio di Jehova, i kico Jesús a bisa també ora e tabata ariba tera?
14 Den conclusion, e angel fuerte a bisa pakico Jehova ta huzga Babilonia e Grandi asina severamente. Segun e angel: “Sí, den dje ta ser hayá e sanger di profeta i di santo i di tur esnan cu a ser matá riba tera.” (Revelacion 18:24) Ora Jesús tabata riba tera, el a bisa lider religioso di Jerusalem cu nan tabata responsabel pa “tur e sanger husto dramá riba tera, dje sanger di husto Abel” padilanti. P’sei, e generacion perverso tabata destruí na aña 70 EC. (Mateo 23:35-38) Awe, un otro generacion di hende religioso ta carga e culpa di sanger pa su persecucion di sirbidor di Dios.
15. E Iglesia católico i Alemania nazista ta culpable pa dramamento di sanger di cua dos manera?
15 Den su buki na inglés E Iglesia Católico i Alemania Nazista, Guenter Lewy a skirbi: “Ora Testigo di Jehova tabata sofocá den Bavaria dia 13 di April [di 1933] e Iglesia asta a acepta e asignacion cu e Ministerio di Educacion i Religion a duné di informa di cualkier miembro dje secta cu ainda a practica e religion prohibí.” Asina e Iglesia católico tin parti dje responsabilidad di cu miles di Testigo di Jehova tabata mandá na concentrasicamp; i su man tin e mancha di sanger vital di cientos di Testigo di Jehova duná e castigo di morto. Ora testigo hoven, tal como Wilhelm Kusserow, a mustra cu nan por muri cu curashi fusilá, Hitler a decidi cu fusilamento tabata mucho bon pa esnan cu a nenga sirbishi militar; pues Wolfgang, ruman di Wilhelm, di 20 aña di edad, a muri di guillotín. Ne mesun tempo, e Iglesia católico tabata anima católico alemán hoven pa muri den ehército di nan patria. Culpa pa dramamento di sanger dje iglesia ta keda bisto!
16, 17. (a) Babilonia e Grandi mester ta acusa di cua dramamento di sanger, i con e Vaticano a bira culpable di dramamento di sanger di hudío cu a muri den matanza di nazista? (b) Menciona un manera den locual religion falso ta culpable pe matamento di miyones di hende den cientos di gera den tempo actual.
16 Sin embargo, e profecía ta bisa cu Babilonia e Grandi ta culpabel di sanger di “tur esnan cu a ser matá riba tera.” Esei siguramente ta cierto den tempo moderno. Por ehempel, desde cu intriga católico a yuda Hitler subi na poder den Alemania, e Vaticano ta comparti e terrible culpa pa dramamento di sanger en relacion cu e seis miyón hudío cu a muri den matanza bao di nazista. Además, den nos tempo, hopi mas cu cien miyón hende a ser matá den cientos di gera. Religion falso tin e culpa pa tal matamento? Sí, di dos manera.
17 Un manera ta cu hopi gera ta relacioná cu diferencia religioso. Por ehempel, e violencia den India entre mohamedano i hindú na 1946 te 1948 tabata instigá pa religion. Cientos di miles di hende a perde nan bida. E conflicto entre Iraq i Iran despues di 1980 tabata relacioná cu diferencia religioso, i cientos di miles tabata matá. Violencia entre católico i protestante den Nortirlanda a mata miles di hende. Examinando e campo ei, columnista C. L. Sulzberger a bisa na 1976: “E berdad tristu tá cu probablemente mitá of mas di gera cu ta ser bringá awor rond di mundo ta sea abiertamente conflicto religioso of ta toca pleitu religioso.” En berdad, tabata asina durante tur e historia turbulento di Babilonia e Grandi.
18. Menciona e segundo manera cu religion di mundo ta culpable pa dramamento di sanger.
18 Cua ta e otro manera? Desde e punto di bista di Jehova Dios, religion di mundo ta culpabel pa dramamento di sanger pasobra cu nan siñanza, nan no a convence nan sigidor dje berdad di requisito di Jehova Dios pa su sirbidornan. Nan no a siña i a convence hende di cu berdadero adorador di Dios tin cu imita Jesucristo i mustra amor pa otro apesar di nan origen nacional. (Miqueas 4:3, 5; Juan 13:34, 35; Echo 10:34, 35; 1 Juan 3:10-12) Door cu religion cu ta compone Babilonia e Grandi no a siña tal cosnan, nan miembro a ser hibá den e remolina di gera internacional. Ki bisto esei a keda den e dos geranan mundial den e promé mitá di siglo 20, ambos di locual a cuminza den cristiandad i den locual miembro dje mesun religion a mata otro! Si tur hende cu ta yama nan mes cristian a obedece principio bíblico, e dos gera nunca lo a sosode.
19. Cua spantoso culpa pa dramamento di sanger Babilonia e Grandi tini?
19 Jehova Dios ta pone culpa pa tanto dramamento di sanger riba Babilonia e Grandi. Si lider religioso, i specialmente esnan di cristiandad, a siña nan pueblo e berdad di Bijbel, tal dramamento di sanger por mayor lo no a sosode. Berdaderamente, anto, sea directa of indirectamente, Babilonia e Grandi—e gran muher di mala bida i e imperio mundial di religion falso—tin cu rindi cuenta na Jehova Dios no solamente pe “sanger di profeta i di santonan” cu el a persigi i a mata sino també pe sanger di “tur esnan cu a ser matá riba tera.” Babilonia e Grandi en berdad ta espantosamente culpable pa dramamento di sanger. Su destruccion final lo resulta den tanto alivio!
[Kuadro na página 270]
E prijs di compromiso
Guenter Lewy a skirbi den su buki na inglés E Iglesia Católico i Alemania Nazista: “Si catolicismo alemán desde e principio a pega na un norma di oposicion firme ne gobierno nazista, historia di mundo por a sigi otro rumbo. Aunque e lucha lo no a termina den e derota di Hitler ni a preveni tur crimen di dje, desde e punto di bista aki e por a hiza e prestigio moral dje Iglesia mashá mes. Innengablemente tal resistencia por a costa mashá bida humano, pero e sacrificio lo a ser hací pe mayor causa. Ya cu Hitler no por a depende di su mes pueblo, e lo no a risca cuminza un gera i esei por a salba literalmente miyones di bida. . . . Ora miles di alemán antinazista tabata matá cu tortura den concentrasicamp di Hitler, ora hende intelectual polaco tabata matá, ora cientos di miles di ruso a muri como resultado di ser tratá como slavo Untermenschen [subhumano], i ora 6.000.000 ser humano tabata asesiná pasobra nan no tabata ario, funcionario dje Iglesia católico den Alemania a fortalece e gobierno cu a comete tal crimen. E papa di Roma, e cabez spiritual i maestro moral supremo dje Iglesia católico romano, a mantene silencio.”—Bladji 320, 341.
[Plachi na página 268]
“Ki lástima, ki lástima,” gobernante ta bisa
[Plachi na página 268]
“Ki lástima, ki lástima,” comerciante ta bisa