Haci Boso Bida Exitoso!

“Felis ta e homber cu no a cana den e conseho dje malbadonan . . . Tur loke e haci lo tin éxito.”—SALMO 1:1, 3.

 1. (a) Ki punto di bista hopi hóben di mundu tin tocante éxito? (b) Con Bijbel ta describí un hende exitoso?

EXITO—kico e palabra ei ta nificá pa bo? Un hóben a bisa: “Mi meta principal ta di logra éxito den negoshi.” Un mucha muher hóben a yega di bisa: “Mi soño mas grandi ta di tin un famia felis.” Pero un otro mucha muher ta bisa: “Mi soño ta simplemente di tin un cas nèchi, un auto nèchi . . . Mi ta busca mi propio interes.” E problema ta cu ni placa, ni famia, ni un carera bon pagá no ta indicacion di berdadero éxito. Na Salmo 1:1-3, nos ta lesa: “Felis ta e homber cu no a cana den e conseho dje malbadonan . . . Su deleite ta den e ley di Jehova . . . Tur loke e haci lo tin éxito.”

 2. Den kico berdadero éxito ta sinta, i cua ta e único manera pa logr’é?

² Aki Bijbel ta primintí algu cu niun hende no por ofrecé—berdadero éxito! Pero no ta di ganashi material e ta papia. Bijbel mes ta spierta: “Amor pa placa ta rais di tur sorto di cos perhudicial.” (1 Timoteo 6:10) Berdadero éxito ta sinta den agradá Dios, entre otro, sigui Jehova su ley. Esaki so por trece berdadero satisfaccion i felicidad! Por ta cu e idea di ta bou di Jehova su ley i ricibí instruccion tocante kico pa haci, no ta zona atractivo. Tog, Jesus a bisa: “Felis ta esnan cu ta conciente di nan necesidad spiritual.” (Mateo 5:3) Sea cu bo ta conciente di dje of no, bo a ser creá cu necesidad spiritual—entre otro, un necesidad profundo di conocé Dios i comprendé su propósitonan. P’esei, ta solamente ora bo satisfacé e necesidadnan ei i sigui “e ley di Jehova” bo por experenciá berdadero felicidad.

Di Con Nos Tin Mester di Dios Su Leynan

 3. Di con nos lo mester ta contentu pa laga Jehova ‘dirigí nos pasonan’?

³ Profeta Jeremías a skirbi: “Mi sa masha bon, o Jehova, cu e caminda di hende terenal no ta pertenecé na dje. No ta pertenecé na hende cu ta canando pa ni sikiera dirigí su paso.” (Jeremías 10:23) Esaki ta conta pa tur ser humano, hóben i bieu. No ta djis cu nos falta e sabiduria, experencia i conocimentu necesario pa dirigí nos pasonan; nos no tin derecho mes di hacié. Na Revelacion 4:11, Bijbel ta bisa: “Bo ta digno, Jehova, asta nos Dios, pa ricibí e gloria i e onor i e poder, pasobra abo a crea tur cos, i pa causa di bo boluntad nan a existí i a ser creá.” Como nos Creador, Jehova ta “e fuente di bida.” (Salmo 36:9) Como tal, e sa mihó cu ningun otro hende, con nos mester usa nos bida. P’esei, ora el a pone ley, e no a hacié pa stroba nos di gosa, sino pa yuda nos beneficiá nos mes. (Isaías 48:17) Ignorá Dios su ley, i bo ta condenando bo mes na fracaso.

 4. Di con asina tantu hóben ta ruina nan bida?

⁴ Bo a yega di puntra bo mes, por ehempel, di con asina tantu hende hóben ta ruina nan bida cu droga, conducta inmoral i otro bicionan? Salmo 36:1 i 2 ta splica: “Pa e malbado, e expresion di transgresion ta meimei di su curason; no tin temor di Dios dilanti su wowo. Pasobra el a trata su mes muchu suave den su propio bista pa e por descubrí su eror afin di odi’é.” Dor cu nan falta un “temor” saludabel di Dios, hopi hóben ta gaña nan mes pa kere cu comportacion peligroso no tin ningun consecuencia. Pero, na final di cuenta, nan tin cu enfrentá e principio incambiabel aki: “Kico cu un hende sembra, esaki lo e cosechá tambe; pasobra esun cu sembra cu su carni na bista lo cosechá corupcion for di su carni, pero esun cu sembra cu e spiritu na bista lo cosechá bida eterno for dje spiritu.”—Galationan 6:7, 8.

‘Conta e Dianan’

 5, 6. (a) Pakico hóbennan mester ‘conta nan dianan,’ i kico esei kier men? (b) Kico kier men ‘corda riba nos Magnífico Creador’?

⁵ Con bo por haci bo bida un éxito i “cosechá bida eterno”? Moises a skirbi: “E dianan di nos añanan ta setenta aña; i si dor di poder special, nan ta ochenta aña . . . E tin cu pasa bai lihé, anto nos ta bula bai.” (Salmo 90:10) Kisas bo ta pensa masha poco riba morto, of nunca mes. De echo, hopi hóben ta actua como si fuera nan ta indestructibel. Pero Moises ta pone nos cara-cara cu e realidad doloroso aki: bida ta corticu. Nos no tin ni garantia cu nos lo yega 70 of 80 aña. “Tempu i suceso imprevisto” por caba cu asta un hende hóben i cu bon salú. (Eclesiástes 9:11) Pues, con abo ta bai usa e bida precioso cu bo ta gosa di dje awor? Moises a pidi Dios: “Mustra nos exactamente con pa conta nos dianan di tal manera cu nos por trece un curason di sabiduria aden.”—Salmo 90:12.

⁶ Kico kier men cu bo ta conta bo dianan? No cu bo mester ta obsesioná tocante con largu lo bo por biba. Moises tabata pidi Jehova p’e siña Su pueblo con pa usa e dianan cu nan a sobra, di un manera cu ta trece onor p’E. Abo ta conta e dianan di bo bida dor di considerá cada dia un recurso precioso cu bo por usa pa trece alabansa na Dios? Bijbel ta animá hóbennan pa haci lo siguiente: “Kita shangrinamentu for di bo curason, i evitá calamidad pa bo carni; pasobra hubentud i flor di bida ta banidad. Corda, awor, riba bo Magnífico Creador den e dianan di bo hubentud.” (Eclesiástes 11:10–12:1) Corda riba nos Creador ta encerá mas cu djis keda sin lubidá cu e ta existí. Ora cu e criminal a roga Jesus: “Corda riba mi ora bo drenta den bo reino,” e tabata kier pa Jesus haci mas cu djis corda su nomber. E tabata kier pa Jesus actua, p’e resucit’é! (Lucas 23:42; compará cu Génesis 40:14, 23; Job 14:13.) Mescos, corda riba Jehova ta implicá accion, haci loke ta agrad’é. Bo por bisa cu bo ta cordando riba Jehova?

No Envidiá Malechornan

 7. Di con algun hóben ta scoge pa lubidá nan Creador? Duna un ehempel.

⁷ Hopi hóben ta scoge pa lubidá Jehova dor cu nan ta sinti cu ser un Testigo ta limitá nan muchu. Un ruman homber na Spaña ta corda con e tabata sinti tempu e tabata un tiener: “Mundu a atraé mi dor cu e berdad tabata parce mi difícil i streng. Bo mester a sinta, studia, bai reunion, bisti dashi, i eseinan no ta e cosnan cu mi tabata gusta haci.” Abo sa sinti cu bo ta perdiendo algu dor cu bo ta sirbi Dios? Lo bo por keda sorprendí pa sa cu un dje escritornan di Bijbel a yega di tin e mésun sintimentunan ei. Por fabor, habri bo Bijbel i lesa Salmo 73.

 8. Di con Asaf a “envidiá esnan cu ta gaba”?

⁸ Laga nos bai den mas detaye cu e salmo aki. Versículo 2 i 3 ta bisa: “En cuanto ami, mi pianan casi a desviá, mi pasonan a casi slip. Pasobra mi a cuminsá envidiá esnan cu ta gaba, ora mi a mira e pas mes dje malbadonan.” Segun e título riba e salmo aki, esun cu a skirbié tabata Asaf. E tabata un músico levita, un contemporáneo di rey David. (1 Crónicanan 25:1, 2; 2 Crónicanan 29:30) Maske e tabatin e privilegio precioso di sirbi den Dios su tempel, el a “cuminsá envidiá” e hendenan cu tabata gaba tocante nan malechonan. Cos tabata parce di bai bon cu nan; nan a parce di gosa di pas i siguridad. Nan aparente éxito a asta ‘superá e imaginacionnan di nan curason.’ (Versículo 5, 7) Nan tabata papia di nan hazañanan “den un estilo halsá,” esta, na moda arogante. (Versículo 8) ‘Nan a pone nan boca den shelu, i nan lenga mes a cana riba tera.’ Nan no tabata mustra respet pa niun hende, ni den shelu ni riba tera.—Versículo 9.

 9. Con algun hóben cristian djawe por bin sinti mescos cu Asaf?

⁹ Kisas por bisa mescos di bo compañeronan na scol. Por ta, bo ta tende nan gaba sin ningun ripara tocante nan aventuranan sexual, nan fiestanan desenfrená i nan uso di alcohol i droga. Si bo compará nan bida di asina yamá placer, cu e caminda smal cu abo mester cana ariba como un cristian, tin bes lo bo por sinti ‘envidia di esnan cu ta gaba.’ (Mateo 7:13, 14) Asaf mes a yega te na e punto di sclama: “Siguramente ta en bano cu mi a limpia mi curason i cu mi a laba mi mannan den inocencia mes. I mi a yega di ta plagá henter dia.” (Versículo 13, 14) Sí, el a cuminsá cuestioná si ta bale la pena sirbi Dios i hiba un bida recto.

10, 11. (a) Kico a cambia Asaf su actitud? (b) Den ki sentido malechornan ta “riba suela cu ta slip”? Duna un ehempel.

¹⁰ Felismente, Asaf no a keda den e estado deprimí aki pa hopi tempu. El a bin realisá lihé cu e aparente pas di e malbadonan no tabata nada mas cu un ilusion, i un ilusion temporal so tambe! El a sclama: “Siguramente riba suela cu ta slip ta caminda bo ta pone nan. Bo a laga nan cai den ruina. O con nan a bira un obheto di asombro manera den un momento! Con nan a alcansá nan fin, mediante teror di ripiente nan a yega na nan fin!” (Versículo 18, 19) Mescos, hopi di bo pareunan ta riba “suela cu ta slip.” Tardi of trempan nan lo mira resultado di nan comportacion pecaminoso. Lo por ta un embaraso indeseá, un enfermedad transmití sexualmente i asta encarcelacion of morto! Pió ainda, nan lo sufri alehamentu for di Dios.—Santiago 4:4.

¹¹ Un hóben Testigo na Spaña a comprobá tal berdad personalmente. Como hóben el a hiba un bida dòbel. E tabatin relacion estrecho cu un grupo di hóben malbado. Den poco tempu el a namorá di un di nan, un drogadicto. Aunke e ruman mes no tabata usa droga, e tabata cumpra droga p’e sí. E ta admití: “Asta mi tabata yud’é pasa e angua.” Afortunadamente, e ruman aki a recobrá su sano huicio, i el a ser restorá na salú spiritual. Pero el a spanta mashá ora el a haña sa poco despues cu su ex-namorado drogadicto a muri di AIDS. Sí, manera e salmista a bisa, hende malbado ta “riba suela cu ta slip.” Algun di nan lo por muri inesperá como resultado di nan estilo di bida desenfrená. Pa loke ta e sobránan, a ménos cu nan cambia nan moda di actua, den futuro cercano nan lo enfrentá “e revelacion di Señor Jesus for di shelu cu su angelnan poderoso den un vlam di candela, ora e trece vengansa riba esnan cu no conocé Dios i esnan cu no ta obedecé e bon nobo tocante nos Señor Jesus.”—2 Tesalonicensenan 1:7, 8.

12. Con un hóben na Hapon a bin mira e bobedad di envidiá malechornan?

¹² P’esei, ta masha bobo pa nos envidiá “esnan cu no conocé Dios”! Si bo wak bon, ta esnan cu conocé Jehova i tin e speransa di biba pa semper ta merecé pa hende envidiá nan. Un ruman homber hóben na Hapon a bin realisá esei. Como hóben, e tambe “tabata kier mas libertad.” E ta splica: “Mi tabata sinti cu mi tabata perdiendo algu. Despues mi a realisá con mi bida lo ta sin e berdad. Mi a visualisá mi mes ta biba 70 of 80 aña, anto muri. Pero Jehova ta ofrecé nos e speransa di biba pa semper! E realisacion aki a yuda mi apreciá loke mi tabatin.” Tog, keda fiel meimei di yen di hende cu no ta sigui Dios su leynan no ta ni un tiki fácil. Kico ta algun cos cu bo por haci pa resistí tal preshonnan?

Wak cu Ken Bo Ta Asociá!

13, 14. Pakico ta importante pa nos ta selectivo tocante ken nos ta asociá cuné?

¹³ Laga nos bolbe wak e descripcion dje homber exitoso, na Salmo 1:1-3: “Felis ta e homber cu no a cana den e conseho dje malbadonan, i den caminda di pecadónan e no a para, i riba stul di mofadónan e no a sinta. Pero su deleite ta den e ley di Jehova, i den su ley e ta lesa na bos abou di dia i anochi. I siguramente lo e yega di ta manera un palu plantá cantu di coriente di awa, cu ta duna su propio fruta den su temporada i di cua su blachinan no ta marchitá, i tur loke e haci lo tin éxito.”

¹⁴ Na promé lugá, nota con bo asociacion ta hunga un rol importante. Proverbionan 13:20 ta bisa: “Esun cu ta cana cu hende sabí lo bira sabí, pero esun cu tin trato cu hende estúpido lo bai e malu.” Esei no kier men cu bo mester ta friu cu hóbennan cu no ta Testigo di Jehova, ni cu bo no mester ta amigabel of cortes cu nan. Bijbel ta urgi nos pa stima nos próhimo i “sea pacífico cu tur hende.” (Romanonan 12:18; Mateo 22:39) Pero, si bo asociá muchu íntimo cu nan, lo bo por haña bo ta “cana den e conseho” di hende cu no ta sigui normanan bíblico.

E Beneficionan di Lesa Bijbel

15. Con hóbennan por cultivá un anhelo pa lesa Bijbel?

¹⁵ Ademas, e salmista a remarcá cu un homber exitoso tin deleite den lesa Dios su ley “na bos abou di dia i anochi.” (Salmo 1:1, 2) Berdad, Bijbel no ta fácil pa lesa, i tin cos “difícil pa comprendé” den dje. (2 Pedro 3:16) Pero lesamentu di Bijbel no tin nodi ta fastioso. Bo por “desaroyá un anhelo p’e lechi no-adulterá” dje Palabra di Dios. (1 Pedro 2:2) Purba lesa djis un tiki tur dia. Si tin punto cu bo no ta comprendé, investigá un poco. Despues, pensa riba loke bo a lesa. (Salmo 77:11, 12) Si bo no por logra concentrá, purba lesa “na bos abou.” Cu tempu, sigur lo bo bai stima lesamentu di Bijbel mas i mas. Un ruman muher hóben na Brazil ta conta: “Semper Jehova a parce di ta leu pa mi. Pero mi tin un par di luna ta mehorá mi studio personal i mi lesamentu di Bijbel. Awor mi ta sinti cu mi relacion cu Jehova ta mas fuerte. E ta mas real pa mi.”

16. Con nos por beneficiá mas dje reunionnan di congregacion?

¹⁶ Asistencia na reunionnan di congregacion tambe ta vital pa bo crecementu spiritual. Bo por ricibí hopi animacion si bo ‘presta atencion na con bo ta scucha.’ (Lucas 8:18) Bo sa haña tin bes cu e reunionnan no ta masha interesante? Wel, puntra bo mes: ‘Kico ami ta haci pa yuda e reunionnan bira mas interesante? Mi ta paga tinu? Mi ta prepará? Mi ta duna contesta?’ Pasobra, Bijbel ta bisa nos pa nos “considerá otro pa incitá otro na amor i na obranan excelente, . . . un animando otro.” (Hebreonan 10:24, 25) Pa bo por haci esaki, bo mester participá! I di mes, pa bo participá, bo mester a studia e informacion di antemano. Un ruman muher hóben ta admití: “Di berdad ta mas fácil pa bo participá n’e reunionnan si bo a prepará.”

Sigui Dios Su Caminda Ta Hiba na Exito

17. Den ki sentido un lesadó diligente di Bijbel ta “manera un palu plantá cantu di coriente di awa”?

¹⁷ E salmista ta sigui describí un homber exitoso “manera un palu plantá cantu di coriente di awa.” Cu coriente di awa, lo e por tabata kier men rooi cu nan tabata coba pa muha palu den hofi. (Isaías 44:4) Si bo lesa Bijbel tur dia, ta como si fuera bo ta pegá na un fuente constante di sosten i refrescamentu. (Jeremías 17:8) Tur dia lo bo ricibí e forsa cu bo tin mester pa bo por wanta prueba i dificultad. I lo bo siña conocé Jehova su manera di pensa, cu lo duna bo e sabiduria cu bo tin mester pa tuma decisionnan sabí.

18. Kico por garantisá cu un hóben lo tin éxito den sirbi Jehova?

¹⁸ Por tin bes cu sirbi Jehova ta parce un poco difícil. Pero nunca no sinti cu e ta muchu difícil pa bo. (Deuteronomio 30:11) Bijbel ta primintí bo cu ‘tur loke bo haci lo tin éxito’ riba término largu, tanten cu bo meta principal ta di agradá Jehova i haci su curason alegrá! (Proverbionan 27:11) I corda cu bo no ta bo so. Bo tin e apoyo di Jehova i Jesucristo. (Mateo 28:20; Hebreonan 13:5) Nan sa di e preshonnan cu bo ta enfrentá, i nan lo no bandoná bo nunca. (Salmo 55:22) Ademas, bo tin e apoyo di “henter e asociacion di rumannan,” i di bo mayornan, si nan ta teme Dios. (1 Pedro 2:17) Cu un apoyo asina, huntu cu bo determinacion i bo esfuerso, bo por gosa di un bida exitoso, no pa awor so, sino pa semper!

Puntonan di Repaso

◻ Kico ta berdadero éxito?

◻ Di con nos tin mester di Jehova p’e dirigí nos pasonan?

◻ Con hóbennan por ‘conta nan dianan’?

◻ Di con ta bobo pa envidiá malechornan?

◻ Con lesamentu di Bijbel tur dia i asistencia regular na reunion por yuda hóbennan logra un bida exitoso?

[Plachi na página 20]

Dor cu nan falta un “temor” saludabel di Dios, hopi hóben ta haci cos cu ta perhudicá nan

[Plachi na página 22]

Hopi bes hóbennan ta lubidá cu nan accionnan tin consecuencia

[Plachi na página 23]

Cultivá un amor pa lesamentu di Bijbel

[Plachi na página 23]

Lo bo disfrutá mas dje reunionnan si bo participá