Bo Por ‘Distinguí Tantu Bon Como Malu’?

“Sigui haci sigur kico ta aceptabel pa Señor.”—EFESIONAN 5:10.

 1. Den ki sentido bida awe por ta confuso, i di con?

“MI SA masha bon, o Jehova, cu e caminda di hende terenal no ta pertenecé na dje. No ta pertenecé na hende cu ta cana pa ni sikiera dirigí su paso.” (Jeremías 10:23) E echo importante aki cu Jeremías a reconocé tin mas tantu peso ainda pa nos awe. Di con? Debí cu nos ta biba den “tempu crítico, duru pa trata cuné,” manera Bijbel a profetisá. (2 Timoteo 3:1) Tur dia nos ta enfrentá situacionnan cu por confundí nos, i nan ta exigí pa nos tuma decision. Sea cu e decisionnan aki ta grandi of chikitu, nan por tin un efecto profundo riba nos bienestar físico, emocional i spiritual.

 2. Ki decisionnan por parce di poco importancia, i sin embargo con cristiannan dedicá ta mira nan?

² Hopi decision cu nos ta tuma den nos bida diario por ser considerá como rutinario of di poco importancia. Por ehempel, tur dia nos tin cu scoge ki paña pa bisti, ki cuminda pa come, ken nos ta bai topa i cosnan asina. Nos ta tuma e decisionnan aki na un manera casi automático, sin pensa mashá. Pero di berdad e asuntunan aki ta di poco importancia? Como cristiannan dedicá, nos ta sumamente interesá pa semper e decisionnan cu nos tuma—relacioná cu nos paña, nos aparencia, con nos ta come i bebe, nos abla i nos conducta—reflehá e papel cu nos ta desempeñá como sirbidónan dje Haltísimo, Jehova Dios. Nos ta corda riba e palabranan di apostel Pablo: “Sea cu boso ta comiendo of bebiendo of haciendo cualkier otro cos, haci tur cos pa e gloria di Dios.”—1 Corintionan 10:31; Colosensenan 4:6; 1 Timoteo 2:9, 10.

 3. Ki decisionnan ta asuntunan hopi serio?

³ Algun otro decision ta asuntunan asta mas serio. Por ehempel, e decision di casa of keda soltero tin un efecto profundo i di largu alcanse riba bo bida. Sigur-sigur, scoge e persona adecuado pa casa cuné, p’e bira bo compañero pa e resto di bo bida, no ta ki-cu-ta.a (Proverbionan 18:22) Ademas, e hendenan cu nos ta scoge como amigu i pa asociá cuné, e educacion, e empleo, i tambe e entretenimentu i recreo cu nos ta scoge, ta hunga un papel grandi i asta decisivo riba nos spiritualidad, i pues tambe riba nos bienestar eterno.—Romanonan 13:13, 14; Efesionan 5:3, 4.

 4. (a) Ki abilidad ta hopi bon pa nos tin? (b) Ki preguntanan nos mester considerá?

⁴ Ya cu nos ta haña nos cu tur e opcionnan aki nos dilanti, lo ta hopi bon sigur pa nos tin e abilidad pa distinguí entre loke ta bon i loke ta malu, of entre loke ta parce di ta bon i loke ta bon di berdad. Bijbel ta spierta nos: “Ta existí un caminda cu ta stret dilanti un homber, pero despues e camindanan di morto ta su fin.” (Proverbionan 14:12) Pues, nos por puntra: ‘Con nos por desaroyá e abilidad di distinguí entre bon i malu? Unda nos por acudí pa nos haña e guia necesario pa tuma decision? Kico hende di ántes i djawor a yega di haci tocante esaki, i cu ki resultado?’

“E Filosofia i Engaño Bano” di Mundu

 5. Den ki tipo di mundu e promé cristiannan a biba?

⁵ E cristiannan di promé siglo a biba den un mundu dominá dor di balornan i idealnan griego-romano. Di un banda tabatin e comodidad i luho dje estilo di bida romano, cu hopi hende a considerá envidiabel. Di otro banda, e intelectualnan dje tempu ei tabata loco cu ideanan filosófico; no solamente cu esnan di Plato i Aristóteles, pero tambe cu esnan di e scolnan filosófico mas nobo, manera e epicureonan i e stoiconan. Ora apostel Pablo a yega Aténas riba su di dos gira como misionero, el a hañ’é confrontá cu filósofonan epicureo i stoico cu a sinti nan superior cu e “charlatan” Pablo aki.—Echonan 17:18.

 6. (a) Kico algun dje promé cristiannan a sinti nan mes tentá pa haci? (b) Ki advertencia Pablo a duna?

⁶ P’esei, no ta difícil pa nos comprendé di con e conducta i e estilo di ‘biba na grandi’ di hende rond di nan a atraé algun dje promé cristiannan. (2 Timoteo 4:10) Hendenan cu a forma parti integral dje sistema a parce di gosa di hopi beneficio i bentaha, i e decisionnan cu nan a tuma a parce di ta bon. Mundu a parce di tin algu balioso di ofrecé; algu cu e sistema di bida cristian no tabatin. Sin embargo, apostel Pablo a spierta: “Tene cuidou: kisas por tin un hende cu lo hiba boso como su víctima mediante e filosofia i engaño bano segun e tradicion di hende, segun e cosnan elemental di mundu i no segun Cristo.” (Colosensenan 2:8) Di con Pablo a bisa asina?

 7. Den práctica, ki berdadero balor e sabiduria di mundu tin?

⁷ Pablo a advertí nan esei debí cu el a detectá un peliger real scondí tras dje moda di pensa di esnan cu a sinti nan atraí na mundu. E manera cu el a usa e expresion “filosofia i engaño bano” ta particularmente significativo. E nificacion literal dje palabra “filosofia” ta “amor i búskeda di sabiduria.” Riba su mes esei por ta beneficioso. De echo Bijbel ta animá nos, particularmente den e buki di Proverbionan, pa busca e tipo corecto di conocimentu i sabiduria. (Proverbionan 1:1-7; 3:13-18) Pero Pablo a conectá “filosofia” cu “engaño bano.” Cu otro palabra, den Pablo su bista e sabiduria cu mundu tabatin di ofrecé tabata bashí i engañoso. E tabata manera un blas suplá: el a parce sólido, pero en realidad e tabata bashí. Sigur-sigur lo ta inútil i asta desastroso si nos basa nos decisionnan tocante bon i malu riba algu bashí manera “e filosofia i engaño bano” di mundu.

Esnan Cu Ta Bisa Cu “Bon Ta Malu i Cu Malu Ta Bon”

 8. (a) Na ken hende ta acudí pa conseho? (b) Ki tipo di conseho nan ta duna?

⁸ Awe e situacion no ta muchu diferente. Tin un gran cantidad di experto riba casi tur tereno di interes humano. Consehero matrimonial i familiar, consehero den korant of revista, hende cu ta yama nan mes terapista, astrólogo, síkico i otronan ta cla pa duna conseho—pero contra pago. Anto ta ki tipo di conseho nan ta ofrecé? Hopi bes nan ta hala normanan bíblico un banda, i pone e asina yamá moralidad nobo na nan lugá. Por ehempel, papiando di cu gobiernu ta nenga di registrá matrimonionan homosexual, un editorial den Cánada su korant convencional The Globe and Mail a declará: “Ta absurdo cu na aña 2000 un pareha cu stima otro i ta deboto na otro no tin mag di cumpli cu nan deseo di mas grandi djis pa motibu cu casualmente nan ta dje mésun sexo.” Awendia ta na moda pa bo tolerá, no criticá. Segun hende, tur cos ta relativo; no tin nada definitivamente bon ni malu mas.—Salmo 10:3, 4.

 9. Kico hende cu ta ser considerá respetabel den sociedad ta haci hopi bes?

⁹ Otro hende ta tuma hende exitoso den sentido social i financiero—hende ricu i famoso—como nan ehempel ora di tuma decision. Maske e sociedad djawendia ta considerá hende ricu i famoso como respetabel, hopi bes ta cu boca so hende asina ta reconocé birtudnan manera onrades i confiabilidad. Hopi di nan no ta wori si nan tin cu kibra regla i trapa principio moral den nan búskeda di poder i ganashi. Pa nan logra fama i popularidad, algun di nan ta benta balornan establecí un banda sin pensa dos bes, i ta scoge pa comportá nan mes na maneranan extravagante i escandaloso. Esei a producí un sociedad motivá pa ganashi cu ta laga tur cos pasa, i su lema ta: “Tur cos por.” Ta straño anto cu hende ta confundí i insigur relacioná cu loke ta toca bon i malu?—Lucas 6:39.

10. Con e palabranan di Isaías tocante bon i malu a resultá berdad?

¹⁰ Tur rond di nos, nos por mira e consecuencianan trágico di mal decisionnan tumá a base di guia robes: famia i matrimonio kibrá, uso di droga i maluso di alcohol, gèng di hóben violento, relacion sexual cu diferente partner, malesa transmití sexualmente, i esaki ta djis pa mencioná un par. Si bo wak bon, con nos por spera pa cos bai otro si hende ta bandoná tur norma, tur punto di salida, pa loke ta toca bon i malu? (Romanonan 1:28-32) Ta net manera profeta Isaías a declará: “Ai di esnan cu ta bisa cu bon ta malu i cu malu ta bon, esnan cu ta pone scuridad pa lus i lus pa scuridad, esnan cu ta pone marga pa dushi i dushi pa marga! Ai di esnan sabí den nan mes wowo i discreto asta dilanti nan mes cara!”—Isaías 5:20, 21.

11. Di con ta un mal idea pa nos confia den nos mes ora di determiná kico ta bon of malu?

¹¹ E echo cu Dios a exigí cuenta di e hudiunan ei di antigwedad cu a bira “sabí den nan mes wowo” ta pone cu ta mas importante ainda pa nos evitá di confia den nos mes ora di determiná kico ta bon of malu. Awe hopi hende ta di acuerdo cu e idea di cu bo mester “djis bai tras di loke bo curason ta bisa bo” of “haci loke abo ta sinti cu ta corecto.” E forma di actua ei ta sano? No segun Bijbel. Bijbel ta bisa bon cla: “E curason ta mas traicionero cu cualkier otro cos i ta desesperá. Ken por conoc’é?” (Jeremías 17:9) Abo lo confia un persona traicionero i desesperá p’e guia bo ora di tuma decision? Sigur cu no. Probablemente lo bo haci net contrario di loke un hende asina bisa bo. Ta p’esei Bijbel ta corda nos: “Esun cu ta confia den su mes curason ta bobo, pero esun cu ta cana den sabiduria ta esun cu lo scapa.”—Proverbionan 3:5-7; 28:26.

Siña Kico Ta Aceptabel pa Dios

12. Di con nos mester proba pa nos mes kico ta e “boluntad di Dios”?

¹² Ya cu nos no mester confia ni riba sabiduria di mundu ni den nos mes pa loke ta toca bon i malu, kico nos mester haci anto? Wak e conseho bon cla aki di apostel Pablo: “Stop di ser formá segun e sistema di cosnan aki, mas bien sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios.” (Romanonan 12:2) Di con nos mester proba pa nos mes, esta haci sigur, kico ta e boluntad di Dios? Den Bijbel Jehova ta duna un motibu simpel pero poderoso, bisando: “Mescos cu shelu ta mas haltu cu tera, asina mi camindanan ta mas haltu cu boso camindanan, i mi pensamentunan cu boso pensamentunan.” (Isaías 55:9) Pues, na lugá di confia riba “sentido comun,” manera hende ta yam’é, of bai tras di loke nos ta sinti nos bon cuné, Bijbel ta spierta nos: “Sigui haci sigur kico ta aceptabel pa Señor.”—Efesionan 5:10.

13. Con e palabranan di Jesus registrá na Juan 17:3 ta enfatisá cu ta necesario pa sa kico ta aceptabel pa Dios?

¹³ Jesucristo a enfatisá cu esei ta necesario ora el a bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) E nificacion dje expresion ‘gana conocimentu’ ta hopi mas profundo cu simplemente “conocé.” Segun Vine’s Expository Dictionary, e ta “indicá un relacion entre e conocedó, i e cos cu e conocé; aki, e cos conocí ta precioso of importante pa e conocedó, i p’esei e relacion mes tambe ta precioso.” Ora nos tin un relacion cu un persona, esei ta nificá mas cu djis sa ken e ta, of con e yama. Tambe e kier men sa kico e ta gusta i kico no, conocé su balor i normanan i respetá nan.—1 Juan 2:3; 4:8.

Entrená Nos Facultadnan Perceptivo

14. Kico segun Pablo ta e diferencia principal entre baby spiritual i hende maduro?

¹⁴ Anto con nos por siña distinguí entre bon i malu? Loke Pablo a bisa e cristiannan hebreo di promé siglo ta duna e contesta. El a skirbi: “Tur cu ta participá di lechi no conocé e palabra di husticia, pasobra e ta un baby. Pero cuminda sólido ta pertenecé na hende maduro, na esnan kende mediante uso tin nan facultadnan perceptivo entrená pa distinguí tantu loke ta bon como loke ta malu.” Aki Pablo ta haci un contraste entre “lechi”—loke den e versículo promé el a describí como “e cosnan elemental dje declaracionnan sagrado di Dios”—cu “cuminda sólido” cu ta pertenecé na “hende maduro” kende “mediante uso tin nan facultadnan perceptivo entrená pa distinguí tantu loke ta bon como loke ta malu.”—Hebreonan 5:12-14.

15. Pakico adkerí conocimentu exacto di Dios ta exigí trabou duru?

¹⁵ Esei kier men cu na promé lugá nos mester traha duru pa adkerí un conocimentu exacto di Dios su normanan mencioná den su Palabra, Bijbel. Nos no ta interesá di tin un lista pa bisa nos precis kico pa haci of laga di haci. Bijbel no ta un buki asina. Mas bien, Pablo a splica: “Tur Scritura ta inspirá di Dios i probechoso pa siña, pa reprendé, pa rectificá cosnan, pa disipliná den husticia, p’e hende di Dios por ta plenamente competente, completamente ekipá pa tur bon obra.” (2 Timoteo 3:16, 17) Pa nos beneficiá dje siñansa, e reprendementu i e disiplina ei, nos mester usa nos mente i nos abilidad di pensa. Esaki ta exigí esfuerso, pero e resultado—ser “plenamente competente, completamente ekipá pa tur bon obra”—ta bale la pena.—Proverbionan 2:3-6.

16. Entrená nos facultadnan perceptivo kier men kico?

¹⁶ I, manera Pablo a mustra, hende maduro “tin nan facultadnan perceptivo entrená pa distinguí tantu loke ta bon como loke ta malu.” Awor nos a yega n’e punto principal. Literalmente, e expresion “tin nan facultadnan perceptivo entrená” ta nificá “cu nan cincu sentidonan a ser entrená (manera un gimnasta).” (Traduccion Kingdom Interlinear) Un gimnasta cu experencia por haci riba cierto aparato, manera e renchinan of balki di balansa, maniobranan sumamente velos cu por parce di burla gravedad of otro leynan di naturalesa. Na tur momento e tin control total riba tur parti di su curpa, i e sa casi manera dor di instinto ki movementu e mester haci pa e por completá su presentacion cu éxito. Tur esaki ta bini dor di entrenamentu pisá i práctica constante.

17. Den ki sentido nos mester ta manera gimnasta?

¹⁷ Den sentido spiritual, nos tambe mester ta manera un gimnasta bon entrená si nos kier ta sigur cu semper nos lo scoge sabí. Nos mester tin control total na tur momento riba nos sentidonan i nos partinan di curpa. (Mateo 5:29, 30; Colosensenan 3:5-10) Por ehempel, bo ta disipliná bo wowo pa bo no mira material inmoral, of bo orea pa bo no scucha música of papiamentu degradá? Ta berdad cu cosnan insaludabel asina ta rond di nos tur ora. Sin embargo, ta keda na nos si nos ta lagu’é saca rais den nos mente i nos curason. Nos por imitá e salmista cu a bisa: “Lo mi no pone dilanti mi wowonan ningun cos cu no ta sirbi pa nada. E obramentu dje apóstatanan ei mi a odia; e no ta pega na mi. . . . Pa loke ta cualkier persona cu ta papia falsedad, lo e no ta firmemente establecí dilanti mi wowonan.”—Salmo 101:3, 7.

Entrená Bo Facultadnan dor di Usa Nan

18. Kico e expresion “mediante uso” den Pablo su splicacion tocante entrená nos facultadnan perceptivo ta duna di comprendé?

¹⁸ Tene na mente cu ta “mediante uso” nos por entrená nos facultadnan perceptivo pa distinguí tantu loke ta bon como loke ta malu. Cu otro palabra, cada bes cu nos enfrentá un decision, nos mester siña usa nos facultad mental pa dicerní cua principionan di Bijbel ta aplicabel, i con por aplicá nan. Desaroyá e custumber di investigá den publicacionnan bíblico percurá mediante e “esclabo fiel i discreto.” (Mateo 24:45) Claro cu nos por busca yudansa di cristian maduro. Sin embargo, e esfuerso personal cu nos haci pa studia e Palabra di Dios, ademas di haci oracion na Jehova pa pidié su guia i su spiritu, lo ta sumamente recompensador na largu plaso.—Efesionan 3:14-19.

19. Ki bendicion nos por tin si nos entrená nos facultadnan perceptivo progresivamente?

¹⁹ Segun cu nos ta entrená nos facultadnan perceptivo progresivamente, nos meta ta pa “nos no ta baby mas, tirá p’aki i p’aya manera dor di olanan i hibá di aki p’aya dor di tur bientu di siñansa pa medio di triki di hende, pa medio di astucia den inventá eror.” (Efesionan 4:14) Mas bien, a base dje conocimentu i comprendimentu cu nos tin di loke ta aceptabel pa Dios, nos por tuma decision sabí—sea nan ta grandi of chikitu—cu lo beneficiá nos, edificá nos compañeronan di adoracion, i mas cu tur, agradá nos Tata celestial. (Proverbionan 27:11) Esta un bendicion i proteccion esei ta den e tempunan crítico aki!

[Nota]

Bo Por Splica?

• Ki abilidad ta necesario pa nos por tuma decision sabí?

• Di con no ta sabí pa nos sigui ehempel di hende prominente of confia riba nos propio sintimentu ora di dicidí si algu ta bon of malu?

• Di con nos mester ta sigur di loke ta aceptabel pa Dios ora nos ta tuma decision, i con nos por haci esei?

• Kico kier men ‘tin nos facultadnan perceptivo entrená’?

[Plachi na página 9]

Ta inútil pa nos tuma hende ricu i famoso como ehempel

[Plachi na página 10]

Mescos cu un gimnasta, nos mester tin control total riba tur nos sentidonan i riba tur parti di nos curpa