‘E Sorto di Hende Ku Boso Mester Ta’

“Komo ku tur e kosnan akí lo wòrdu destruí di e manera akí, ki sorto di hende boso mester ta den un kondukta santu i deboto!” ​—2 PED. 3:11.

 1. Dikon Pedro su di dos karta tabata masha oportuno pa e kristiannan den su tempu?

TEMPU ku apòstel Pedro a skirbi su di dos karta inspirá, ya e kongregashon kristian a pasa den hopi persekushon. Sinembargo, esaki no a kaba ku e zelo di e rumannan ni stroba e kongregashonnan di krese. P’esei, Diabel a kuminsá usa un táktika ku anteriormente e tabatin masha éksito kuné. Manera Pedro a splika, Satanas a trata di pone e pueblo di Dios bandoná prinsipionan bíbliko. Kon? El a usa maestronan falsu, kendenan tabatin “wowo yen di adulterio” i “un kurason entrená den golosidat.” (2 Ped. 2:​1-3, 14; Hudas 4) P’esei, Pedro su di dos karta a animá e rumannan pa keda fiel na Dios den e situashon ei.

 2. (a) Riba kiko 2 Pedro kapítulo 3 ta enfoká? (b) Ki preguntanan nos mester hasi nos mes?

² Pedro a skirbi: “Mi ta konsiderá korekto, tanten ku mi ta den e tènt akí [òf, e kurpa karnal akí], pa animá boso pa medio di spièrtamentu, sabiendo ku pronto mi tin di kita mi tènt terenal pone un banda . . . Ademas, lo mi hasi tur mi posibel pa, despues di mi morto, boso semper lo por rekordá e kosnan akí.” (2 Ped. 1:​13-15) Pues, Pedro tabata sa ku e ta bai muri, i e tabata ke pa hende sigui benefisiá di su rekordatorionan oportuno. I su deseo a kumpli, pasobra su kartanan a bira parti di Beibel i ta na alkanse di nos tur awe. Kapítulo 3 di Pedro su di dos karta ta di gran interes pa nos, ya ku e ta papia di “e último dianan” di e sistema malbado akí i di e destrukshon di e tera i e shelu simbóliko. (2 Ped. 3:​3, 7, 10) Awor bon, ki konseho Pedro a laga pa nos? I kon su konseho por yuda nos haña e aprobashon di Yehova?

3, 4. (a) Ki deklarashon Pedro a hasi, i ki spièrtamentu el a duna? (b) Menshoná tres punto ku nos lo analisá.

³ Despues ku Pedro a papia di e destrukshon di e mundu di Satanas, el a bisa: “Ki sorto di hende boso mester ta den un kondukta santu i deboto!” (2 Ped. 3:​11, 12) Ku e palabranan akí, Pedro a mustra bon kla ku ta solamente esnan ku ta hasi e boluntat di Yehova i ku ta desplegá e kualidatnan ku ta agradá Dios lo sobrebibí e binidero “dia di vengansa.” (Isa. 61:2) P’esei, el a spièrta: “Boso anto, stimánan, sabiendo esaki di antemano, tene kuidou, pa boso no wòrdu lastrá hibá pa medio di e eror di hòmbernan malbado [esta, maestronan falsu], i boso kai for di boso mes firmesa.”​—2 Ped. 3:17.

⁴ Sí, komo un di personanan ku tabata ‘sa [sierto kosnan] di antemano,’ Pedro tabata sa ku spesialmente den e último dianan kristiannan mester keda alerta pa nan por mantené nan integridat. Mas despues, apòstel Juan a splika bon kla pakiko ta importante pa keda alerta. Den un vishon, el a mira kon Satanas ta ser saká for di shelu i ku e ta ‘furioso’ riba esnan ku “ta warda e mandamentunan di Dios i [“ku tin e trabou di duna,” NW] testimonio di Hesukristu.” (Rev. 12:​9, 12, 17) Ta bèrdat ku komo grupo, Dios su fiel sirbidónan, tantu esnan ungí komo e “otro karnénan,” lo sali viktorioso. (Juan 10:16) Pero kiko di kada un di nos? Nos lo mantené nos integridat? Wèl, tin tres kos ku nos mester hasi pa logra esei: (1) kultivá kualidatnan ku ta agradá Dios, (2) keda moralmente i spiritualmente puru i sin mancha, i (3) mantené e punto di bista korekto di prueba- i difikultatnan ku nos ta konfrontá. Laga nos analisá e tres puntonan akí.

Kultivá Kualidatnan Ku Ta Agradá Dios

5, 6. Ki kualidatnan nos mester kultivá, i dikon esaki ta rekerí “esfuerso”?

⁵ Pedro a skirbi na komienso di su di dos karta: “[“Hasi tur boso esfuerso pa,” NW] añadí na boso fe, birtut, i na boso birtut, konosementu; i na boso konosementu, dominio propio, i na boso dominio propio, perseveransia, i na boso perseveransia, santidat; i na boso santidat, kariño fraternal, i na boso kariño fraternal, amor. Pasobra si e kualidatnan akí ta den boso i ta oumentando, nan lo no laga boso keda inútil ni sin fruta den e konosementu berdadero di nos Señor Hesukristu.”​—2 Ped. 1:​5-8.

⁶ Ta bèrdat ku nos mester ‘hasi esfuerso’ pa partisipá den aktividatnan ku ta yuda nos kultivá kualidatnan ku ta agradá Dios. Por ehèmpel, nos tin ku hasi esfuerso pa asistí na tur nos reunionnan kristian, pa lesa Beibel tur dia i pa pega na un bon programa di estudio personal. Kisas ta hopi trabou tambe pa organisá tur siman un anochi di Adorashon Komo Famia ku ta agradabel i probechoso. Pero unabes nos tin un bon rutina, ta mas fásil pa mantené e bon kustumbernan akí, foral ora nos ta mira e benefisionan.

7, 8. (a) Kiko algun ruman a komentá tokante e anochi di Adorashon Komo Famia? (b) Kon abo ta benefisiá di boso adorashon komo famia?

⁷ Relashoná ku e anochi di Adorashon Komo Famia, un ruman muhé a skirbi: “E ta duna nos chèns di analisá masha hopi tópiko mes.” Un otro ruman muhé a bisa: “Frankamente bisá, mi no tabata ke pa e estudio di buki stòp di eksistí, pasobra e tabata mi reunion faborito. Pero, awor ku nos tin e anochi di Adorashon Komo Famia, mi a realisá ku Yehova sa kiko nos tin mester i na ki momento.” Un kabes di kas a komentá: “Nos adorashon komo famia a yuda nos masha bon mes. Ta dushi ku nos por tin un reunion ku nos ta adaptá na nos nesesidatnan komo pareha! Tantu ami komo mi kasá ta sinti ku awor nos a bai dilanti den nos manera di desplegá e fruta di spiritu, i nos tin mas goso ku nunka den nos sirbishi.” Un otro kabes di kas a bisa: “E muchanan ta hasi nan propio investigashon i ta siña hopi kos. Ademas, nan ta gusta esei. E provishon akí ta konvensé nos mas ainda ku Yehova sa kiko ta nos problemanan i ta skucha nos orashonnan.” Kiko abo ta pensa di e maravioso provishon spiritual akí?

⁸ No laga asuntunan di ménos importansia stroba nos adorashon komo famia. Un pareha kasá a bisa: “E último kuater simannan akí, tur djaweps anochi tabatin algu ku kasi a stroba nos di tene nos estudio di famia, ma nos no a permití esei.” Klaru ku tin biaha nos no por hasi otro; nos tin ku ahustá nos programa. Sinembargo, nos mester ta determiná pa no kanselá nos anochi di Adorashon Komo Famia—ni sikiera un siman!

 9. Kon Yehova a sostené Jeremias, i kiko nos por siña for di Jeremias su ehèmpel?

⁹ Profeta Jeremias ta un bon ehèmpel pa nos. El a apresiá e alimento spiritual ku el a risibí di Yehova, ya ku esaki a dun’é forsa pa sigui prediká na personanan ku a rechasá su mensahe. Sí, Jeremias mes a bisa: “E palabra di SEÑOR a bira . . . manera kandela den mi kurason, será den mi wesunan.” (Jer. 20:​8, 9) Ademas, e alimento spiritual ei a yuda Jeremias enfrentá e tempu difísil ku a kulminá den destrukshon di Yerusalèm. Awe, nos tin henter e Palabra di Dios skirbí. Ora nos ta studi’é diligentemente i ta trata di mira kosnan segun Dios su punto di bista, nos tambe, meskos ku Jeremias, lo por perseverá ku goso den nos sirbishi, keda fiel apesar di prueba i keda moralmente i spiritualmente puru.​—Sant. 5:10.

Keda “Puru i Sin Mancha”

10, 11. Dikon nos tin ku hasi nos máksimo esfuerso pa keda “puru i sin mancha,” i kiko esaki ta rekerí di nos?

¹⁰ Komo kristian, nos sa ku nos ta biba den tempu di fin. P’esei mes, no ta sorprendé nos ku e mundu ta asina opseshoná ku e kosnan ku Yehova ta odia, manera golosidat, violensia i práktikanan seksual pèrvèrso. Ku poko palabra, ta komo si fuera e strategia di Satanas ta: ‘Si mi no por spanta e sirbidónan di Dios, kisas mi por pone nan bandoná nan prinsipionan bíbliko.’ (Rev. 2:​13, 14) P’esei, nos mester tuma masha na serio e konseho akí ku Pedro a duna su rumannan stimá: “Hasi boso máksimo esfuerso pa Dios haña boso puru i sin mancha, i pa boso ta na pas kunÉ.”​—2 Ped. 3:14, BPK.

¹¹ Akí Pedro a ripití e animashon ku el a duna anteriormente, esta, “hasi tur boso esfuerso.” Ta bisto anto ku Yehova—kende a inspirá Pedro pa ekspresá e palabranan ei—sa ku nos tin ku hasi hopi esfuerso pa keda “puru i sin mancha,” esta, limpi di tur sushedat di e mundu di Satanas. Hasi nos máksimo esfuerso ta enserá, entre otro, lucha kontra mal deseo pa nan no poderá di nos kurason. (Lesa Proverbionan 4:23; Santiago 1:​14 i 15.) E ta enserá tambe para firme i resistí e atakenan di personanan ku ta kuestioná nos manera di biba i ku ta “kalumnia” nos.​—1 Ped. 4:4.

12. Ki garantia Lukas 11:13 ta duna nos?

¹² Debí ku nos ta imperfekto, nos tin ku lucha pa hasi loke ta bon. (Rom. 7:​21-25) I e úniko manera ku nos por tin éksito ta si nos akudí na Yehova, kende ta duna su spiritu santu generosamente na esnan ku pidié ku sinseridat. (Luk. 11:13) Spiritu santu, na su turno, ta produsí kualidatnan ku ta hasi nos digno di Dios su aprobashon, i e ta yuda nos resistí tentashon i trata ku pruebanan ku sigur lo sigui oumentá segun ku e dia di Yehova ta aserká.

Laga Prueba Hasi Nos Mas Fuerte

13. Kiko lo yuda nos perseverá bou di prueba?

¹³ Tanten ku nos ta biba den e sistema malbado akí, nos ta haña nos ku prueba òf difikultat. Pero en bes di laga eseinan desanimá nos, pakiko no konsiderá nan komo un oportunidat pa demostrá Dios ku nos ta stim’é i komo un chèns pa fortalesé nos fe den dje i den su Palabra? Disipel Santiago a skirbi: “Konsiderá esaki komo puru goso, mi rumannan, ora boso haña boso mes den diferente pruebanan, sabiendo ku e prueba di boso fe ta produsí perseveransia.” (Sant. 1:​2-4) I no lubidá, Yehova “sa kon skapa hende dediká n’E di tribulashon.”​—2 Ped. 2:9, BPK.

14. Kon e ehèmpel di Hosé ta animá bo?

¹⁴ Konsiderá e ehèmpel di Hosé, yu di Jakòb. Su propio ruman hòmbernan a bend’é komo esklabo. (Gén. 37:​23-28; 42:21) Kon Hosé a reakshoná? El a pèrdè su fe pa motibu di e akto kruel ei? El a bira amargá kontra Dios, pasobra el a permití kos malu pasa kuné? E Palabra di Dios ta mustra bon kla ku esei no tabata e kaso. Pero Hosé su pruebanan no a keda te ei. Mas despues, nan a akus’é falsamente di intento di violashon i a ser’é den prizòn. Pero e biaha ei tambe Hosé a keda fiel i deboto na Dios. (Gén. 39:​9-21) El a laga e pruebanan ei hasié mas fuerte, i al final Yehova a bendishon’é rikamente.

15. Kiko nos por siña for di e ehèmpel di Noemí?

¹⁵ Ta bèrdat ku prueba i problema por hasi nos tristu i asta deprimí nos. Probablemente, tabatin momentonan ku esei tabata e kaso ku Hosé. I no tin duda ku esei a pasa ku otro fiel sirbidónan di Dios tambe. Konsiderá e kaso di Noemí, kende a pèrdè su kasá i su dos yunan. Noemí a bisa: “No yama mi Noemí; yama mi Mara [ku ta nifiká “Marga”], pasobra e Todopoderoso a trata mi ku hopi amargura.” (Ruth 1:​20, 21) Noemí su reakshon tabata normal i komprendibel. Sinembargo, meskos ku Hosé, el a keda spiritualmente fuerte i leal na Dios. I Yehova, na su turno, a bendishoná e muhé ekselente ei. (Ruth 4:​13-17, 22) Ademas, den e binidero Paradeis, Yehova lo deshasí di tur daño ku humanidat a sufri na man di Satanas i su mundu malbado. Es mas, “e kosnan di ántes lo no wòrdu rekordá mas ni bini na memoria.”​—Isa. 65:17.

16. Ki aktitut nos mester tin relashoná ku orashon, i dikon?

¹⁶ No ta importá ki prueba nos haña nos kuné, nos por superá nan basta nos kòrda kuantu Yehova ta stima nos. (Lesa Romanonan 8:​35-39.) Ounke Satanas ta sigui buska tur manera pa deskurashá nos, lo e no tin éksito si nos mantené nos “sano huisio” i keda alerta, esta, ‘sobrio ku e propósito di hasi orashon.’ (1 Ped. 4:7) Hesus a bisa: “Sea alerta tur ora bai, hasiendo orashon pa boso por tin forsa pa skapa di tur e kosnan akí ku ta bai tuma lugá, i pa para dilanti di e Yu di hende.” (Luk. 21:36) Den e idioma original, e palabra tradusí den e teksto akí komo “orashon” ta referí na orashon intenso. Pues, urgiendo nos pa hasi orashon intenso, Hesus a enfatisá ku awor ta tempu pa pensa seriamente riba nos posishon dilanti di dje i su Tata. Esei ta importante, pasobra ta solamente esnan ku tin Dios su aprobashon tin e speransa di sobrebibí e dia di Yehova.

Keda Aktivo den Sirbishi di Yehova

17. Kon e bon ehèmpel di e profetanan ta motivá bo si bo tin ku prediká den un teritorio difísil?

¹⁷ Nos ta sinti nos masha refreská ora nos partisipá den aktividatnan spiritual. Esaki ta laga nos kòrda e palabranan di Pedro: “Ki sorto di hende boso mester ta den un kondukta santu i deboto!” (2 Ped. 3:11) P’esei, nos ta komprondé ku aktividatnan spiritual mester ta un parti importante di nos bida. I e aktividat spiritual di mas importante ta e proklamashon di e bon notisia. (Mat. 24:14) Ta bèrdat ku por ta difísil pa prediká den sierto teritorionan. Kisas, e hendenan ta indiferente, ta oponé nos òf ta asina apsorbá den nan kehasernan di tur dia ku nan no ta skucha. Yehova su sirbidónan den tempu bíbliko tambe a haña nan ku personanan asina, pero tòg nan no a stòp di prediká e mensahe di Dios. Mas bien, nan a sigui bai “bes tras bes” serka e hendenan. (Lesa 2 Krónikanan 36:​15 i 16; Jer. 7:​24-26) Kiko a yuda nan perseverá? Nan a mira e trabou di prediká manera Yehova ta mir’é i no manera e mundu ta mir’é. Ademas, pa nan, tabata un gran onor pa karga e nòmber di Dios.​—Jer. 15:16.

18. Kon e predikashon di e Reino lo yuda engrandesé e nòmber di Dios den futuro?

¹⁸ Nos tambe tin e privilegio di proklamá e propósito di Yehova i hasi su nòmber konosí. P’esei, pensa riba esaki: Durante e gran dia di Dios, ora su enemigunan tin ku rindi kuenta na dje, nan no por bisa ku nan no tabata sa kiko ta bai pasa, pasobra nos a prediká na tur hende. Sí, meskos ku Fárao di antigwedat, nan tambe lo sa ku ta Yehova ta esun ku ta aktua kontra nan. (Eks. 8:​1, 20; 14:25) Na mesun tempu, Yehova lo onra su fiel sirbidónan; lo e laga tur hende sa ku ta nan tabata su berdadero representantenan.​—Lesa Ezekiel 2:5; 33:33.

19. Kon nos ta demostrá ku nos ke hasi bon uso di Yehova su pasenshi?

¹⁹ Kasi na final di su di dos karta, Pedro a skirbi su rumannan den fe: “Konsiderá e pasenshi di nos Señor komo salbashon.” (2 Ped. 3:15) Sí, laga nos sigui hasi bon uso di Yehova su pasenshi. Kon asina? Nos mester kultivá kualidatnan ku ta agradá Dios, nos tin ku keda “puru i sin mancha” i enfrentá prueba i problema ku e aktitut korekto. Ademas, nos tin ku keda okupá den e trabou di prediká e Reino. Hasiendo asina, nos por tin e speransa di disfrutá pa semper di e bendishonnan ku e ‘shelu nobo i e tera nobo’ ta trese kuné.​—2 Ped. 3:13.

Bo Ta Kòrda?

• Kon nos por kultivá kualidatnan ku ta agradá Dios?

• Kon nos por keda “puru i sin mancha”?

• Ki lès nos por siña for di Hosé i Noemí?

• Dikon ta un gran privilegio pa partisipá den e trabou di prediká?

[Plachi na página 17]

Esposo, kiko bo por hasi pa yuda bo mes i bo famia kultivá kualidatnan ku ta agradá Dios?

[Plachi na página 18]

Ki lès nos por saka for di e manera ku Hosé a trata ku prueba?