Subiendo cu Hala Manera Aguila

CON un homber ta sinti despues di a soportá cincu aña den camponan di concentracion nazi? Desanimá? Amargá? Vengativo?

Pa straño cu por parce, un homber asina a skirbi: “Mi bida a bira mas ricu cu hamas mi por a spera.” Pakico el a sinti asina? El a splica: “Mi a haña refugio bou dje halanan dje Haltísimo, i mi a experenciá e cumplimentu dje palabranan dje profeta Isaías, ora el a bisa: ‘Esnan cu ta spera den Jehova lo recobrá poder. Nan lo subi cu hala manera águila. Nan lo . . . cana i lo no cansa.’”—Isaías 40:31.

E homber cristian aki, kende físicamente a ser torturá cu e trato di mas horendo cu bo por imaginá, tabatin un spiritu cu figurativamente a subi bai haltu, un spiritu cu e crueldad nazi no por a vence. Mescos cu David, el a haña refugio den e sombra dje “halanan” di Dios. (Salmo 57:1) E cristian aki a haci uso di un comparacion cu profeta Isaías a usa, comparando su forsa spiritual cu esun di un águila cu ta subi bai mas i mas haltu den shelu.

Abo sa sintí bo aplastá dor di problemanan? Sin duda bo tambe lo kier haña refugio bou dje halanan dje Haltísimo, pa “subi cu hala manera águila.” Pa comprendé con esaki ta posibel, ta bon pa sa algu tocante águila, un para cu frecuentemente ta ser usá den un manera figurativo den e Scritura.

Bou dje Emblema dje Aguila

Di tur e paranan cu hende di antigwedad a observá, águila tabata kisas esun di mas admirá debí na su poder i manera mahestuoso di bula. Hopi ehército di antigwedad, incluyendo esnan di Babilonia, Persia i Roma, a marcha bou dje emblema di un águila. E ehército di Ciro e Grandi tabata un di esakinan. Bijbel a profetisá cu e rey pérsico aki lo ta manera un ‘roofvogel’ biniendo for di oost pa devorá e Imperio Babilónico. (Isaías 45:1; 46:11) Doshen aña despues cu e profecia aki a ser skirbí, e trupanan di Ciro, cu tabatin águilanan riba nan banderanan di bataya, a baha cu velocidad riba e stad di Babilonia mescos cu un águila ta bula riba su prooi.

Mas recientemente, guereronan manera Carlomagno i Napoleon i paisnan manera Merca i Alemania tambe a scoge e águila como nan símbolo. E israelitanan a ser mandá pa no venerá imágennan di águila ni di ningun otro criatura. (Exodo 20:4, 5) Sin embargo, escritornan di Bijbel a referí na característicanan dje águila cu e propósito di ilustrá nan mensahe. Pues e águila, e para cu ta ser mencioná mas tantu den e Scritura, ta ser usá pa simbolisá cosnan tal como sabiduria, proteccion divino i rapides.

E Wowo di un Aguila

E bista skerpi dje águila semper a ser usá den proverbionan. Aunke e águila di oro casi nunca ta pisa mas cu 5 kilo, su wowo ta realmente mas grandi cu esun di un hende, i su bista ta muchu mas skerpi. Jehova mes, describiendo pa Job e abilidad dje águila pa busca i haña su cuminda, a bisa: “Leu den distancia su wowonan ta sigui mira.” (Job 39:27, 29) Alice Parmelee, den su buki All the Birds of the Bible (Tur e Paranan di Bijbel), ta informá cu “un biaha un águila a señalá un piscá morto ta drif den un lago riba un distancia di 5 kilometer i a haci un duik diagonal n’e lugá exacto. E águila no solamente tabata capas pa mira un obheto chikitu riba un distancia muchu mas grandi cu un hende por a mira, sino tambe e para a tene e piscá den foco constante atrabes di su duik di cincu kilometer.”

Pa motibu di su bista skerpi, e águila ta un símbolo apropiado di sabiduria, un dje cualidadnan principal di Jehova. (Compará cu Ezekiel 1:10; Revelacion 4:7.) Pakico esei ta asina? Sabiduria ta enbolbé premirá e consecuencianan di cualkier accion cu nos tuma. (Proverbionan 22:3) E águila, cu su abilidad pa mira leu den distancia, por señalá peliger for di hopi leu i tuma precaucionnan, mescos cu e homber discreto den Jesus su ilustracion, kende a premirá e posibilidad di un tempestad i a construí su cas riba baranca. (Mateo 7:24, 25) Interesantemente, den e idioma spañó, describiendo un persona manera un águila ta nificá cu e tin perspicacia of dicernimentu.

Si un dia bo haña un chens di mira un águila djacerca, ripará con e ta usa su wowonan. E no ta mirá bo riba-riba; mas bien, ta parce cu e ta scudriñá tur detaye di bo aparencia. Di igual manera, e homber sabí ta analisá un asuntu cuidadosamente promé cu e tuma un decision en bes di confia riba su instinto of sintimentunan. (Proverbionan 28:26) Miéntras cu e bista skerpi dje águila ta hacié un símbolo apto dje cualidad divino di sabiduria, su manera magnífico di bula tambe ta ser usá figurativamente dor di escritornan bíblico.

“E Caminda di un Aguila den Shelu”

“E caminda di un águila den shelu” ta notabel pa tantu su velocidad i e manera cu e ta parce di bula sin haci muchu esfuerso, sin sigui un trayecto prescribí i sin laga ningun rastro. (Proverbionan 30:19) Lamentacionnan 4:19 ta referí n’e rapides dje águila, unda e soldatnan babilónico ta ser describí: “Mas velos cu e águilanan di shelu nos persiguidornan a resultá di ta. Riba e cerunan nan a sigui fuertemente nos tras.” Ora un águila cu ta circulá na haltu ta señalá su prooi, e ta bira su halanan i ta baha den un duik steil, durante cua e por alcansá velocidadnan di te 130 kilometer pa ora, segun algun informe. No ta un sorpresa cu e Scritura ta usa e águila como un sinónimo di velocidad, specialmente en coneccion cu un forsa militar.—2 Samuel 1:23; Jeremías 4:13; 49:22.

Isaías, di otro banda, ta referí na un águila su manera di bula sin haci muchu esfuerso. “Esnan cu ta spera den Jehova lo recobrá poder. Nan lo subi cu hala manera águila. Nan lo core i no fatigá; nan lo cana i lo no cansa.” (Isaías 40:31) Kico ta e secreto dje águila su zweefmentu? Pa subi ta rekerí poco esfuerso ya cu e águila ta usa termalnan, esta columnanan di aire cayente cu ta subi. Termalnan ta invisibel, pero e águila ta experto den haña nan. Una bes un termal ser hañá, e águila ta span su halanan i rabu i ta circulá den e columna di aire cayente, cu ta hisa e águila mas i mas na haltu. Ora e haña suficiente haltura, e ta zweef bai n’e siguiente termal, unda e ta ripití e proceso. Den e manera aki e águila por keda na laira pa oranan largu gastando un mínimo di energia.

Na Israel, specialmente den e Vaye di Rift cu ta extendé for di Ezion-geber na oriya di Laman Corá te na Dan den parti nort, tur ora bo por mira águilanan. Nan ta particularmente numeroso durante lente i herfst ora nan ta migra. Algun aña tabatin casi 100.000 águila. Ora e solo di mainta ta keinta e aire, bo por mira cientos di roofvogel bula riba e barancanan cu ta keda na rand dje Vaye di Rift.

E águila su manera di bula sin haci muchu esfuerso ta un bunita ilustracion di con Jehova su forsa por lanta nos spiritualmente i emocionalmente di manera cu nos por sigui padilanti cu nos trabou. Mescos cu un águila no por subi na tal halturanan usando su propio forsa, nos no por tin éxito si nos ta dependé riba nos propio abilidadnan. “Pa tur cos mi tin e forsa den birtud di esun cu ta duná mi poder,” apostel Pablo a splica. (Filipensenan 4:13) Manera un águila cu constantemente ta busca termalnan invisibel, nos ta “sigui pidi” Jehova su forsa activo invisibel mediante nos oracionnan ferviente.—Lucas 11:9, 13.

Aguilanan cu ta migra hopi biaha ta haña e termalnan dor di observá otro roofvogel. E naturalista D. R. Mackintosh a informá cu na un ocasion nan a mira 250 águila i buitre circulá bai ariba den e mésun termal. Cristiannan awe di igual manera por siña dependé riba Jehova su fortalesa dor di imitá e ehempelnan fiel di otro sirbidornan deboto.—Compará cu 1 Corintionan 11:1.

Den e Sombra dje Halanan di un Aguila

Un dje periodonan di mas peligroso den e bida di un águila ta ora e ta siña bula. Basta un par di águila ta muri den e intento. E nacion inexperenciá di Israel tambe tabata den peliger ora el a sali for di Egipto. Pues e palabranan di Jehova n’e israelitanan tabata masha apropiado: “Boso mes a mira loke mi a haci cu e egipcionan, pa mi por carga boso riba hala di águila i trece boso cerca mi mes.” (Exodo 19:4) Tin informenan di águilanan cargando un para yong brevemente riba nan lomba pa e para yong no cai den su promé intentonan pa bula. G. R. Driver, comentando den Palestine Exploration Quarterly riba tal informe, a bisa: “P’esei e idioma simbólico usá [den Bijbel] no ta un simpel idea imaginario sino ta basá riba echo real.”

Aguilanan ta mayornan ehemplar den otro maneranan tambe. Nan no solamente ta percurá cuminda regularmente p’e yunan den e neshi sino tambe cu cuidou e mama ta kibra na pida pida e carni cu e águila masculino ta trece n’e neshi p’e águila chikitu por gulié. Debí cu generalmente nan ta traha nan neshinan riba baranca of den palunan haltu, e paranan yong ta exponé na tur tipo di condicion di tempu. (Job 39:27, 28) E solo cu ta kima fuertemente, algu comun pa paisnan bíblico, por causa morto dje para yong si no tabata p’e cuido di su mayornan. E águila adulto ta span su halanan, tin bes pa oranan largu, afin di duna sombra na su yunan tierno.

Pues ta masha apropiado cu e halanan di un águila ta ser usá den e Scritura como un símbolo di proteccion divino. Deuteronomio 32:9-12 ta describí con Jehova a protehá e israelitanan durante nan biahe den desierto: “Pasobra e parti cu ta corespondé na Jehova ta su pueblo; Jacob ta e parti cu e ta heredá. El a bini pa hañ’é den un tera di desierto, i den un desierto desolá i cu ta yora. El a cuminsá rondon’é, cuid’é, proteh’é manera su pret’i wowo. Mescos cu un águila ta trece movecion den su neshi, ta keda rond di su yunan chikitu, ta span su halanan, ta tuma nan, ta carga nan riba su plumanan, Jehova so a sigui gui’é.” Jehova lo duna nos e mésun proteccion amoroso si nos ta confia den dje.

E Manera pa Scapa

Algun biaha ora nos ta confrontá problemanan, nos por haña e deseo di bula bai for di nos dificultadnan. Esei tabata exactamente e manera cu David a sinti. (Compará cu Salmo 55:6, 7.) Pero aunke Jehova a primintí di yuda nos segun cu nos ta enfrentá prueba i sufrimentu den e sistema aki, e no ta ofrecé un escape completo. Nos tin e siguransa di Bijbel: “Ningun tentacion a bini riba boso fuera di loke ta comun pa hende. Pero Dios ta fiel, i lo e no laga boso ser tentá mas ayá di loke boso por soportá, sino cu huntu cu e tentacion lo e percurá tambe p’e salida pa boso por want’é.”—1 Corintionan 10:13.

“E salida” of “un manera pa scapa” (King James Version) ta enbolbé siña confia den Jehova. Esaki ta loke Max Liebster, kende su comentarionan a ser citá na cuminsamentu dje artículo aki, a descubrí. Durante su añanan den e camponan di concentracion, el a yega na conocé i confia den Jehova. Manera Max a descubrí, Jehova ta fortalecé nos mediante su Palabra, su spiritu, i su organisacion. Asta den e camponan, e Testigonan a busca pa haña compañeronan creyente i a ofrecé nan yudansa spiritual, compartiendo pensamentunan bíblico i cualkier literatura bíblico cu tabata disponibel. I manera e fiel sobrebibientenan a testificá bes tras bes, Jehova en berdad a fortificá nan. “Continuamente mi tabata pidi Jehova p’e yudá mi,” Max ta splica, “i su spiritu a sostené mi.”

Sea cual sea e prueba cu nos ta enfrentá, di mes manera nos por conta riba e spiritu santu di Dios, basta nos ta sigui pidi p’e. (Mateo 7:7-11) Fortalecí dor dje “poder mas ayá di loke ta normal” aki, nos lo subi bai haltu mas bien cu ser aplastá dor di nos problemanan. Nos lo sigui cana den Jehova su caminda, i nos lo no cansa. Nos lo subi cu hala manera águila.—2 Corintionan 4:7; Isaías 40:31.

[Komentario na página 10]

E no ta mirá bo riba-riba

[Plachi na página 9]

Foto: Cortesía de GREFA

[Plachi na página 10]

Foto: Cortesía de Zoo de Madrid