Capitulo 18
Pone Como Bo Meta pa Sirbi Dios pa Semper
1, 2. Kico ta rekerí fuera di tin e conocimentu di Dios?
IMAGINA cu bo ta pará dilanti un porta cerá na lok cu ta hiba na un kamber conteniendo tesoronan magnífico. Laga nos bisa cu un persona autorisá a duná bo e yabi i a bisá bo sirbi bo mes dje cosnan balioso aki. E yabi ei lo no ta di ningun probecho pa bo aménos cu bo us’é. Di igual manera, bo mester usa conocimentu pa e por beneficiá bo.
2 Esaki ta particularmente berdad dje conocimentu di Dios. En berdad, conocimentu exacto di Jehova Dios i Jesucristo ta nificá bida eterno. (Juan 17:3) Sin embargo, e prospecto ei no por ser realisá djis dor di tin conocimentu. Mescos cu lo bo usa un yabi di balor, bo mester aplicá e conocimentu di Dios den bo bida. Jesus a bisa cu esnan cu ta haci Dios su boluntad lo “drenta den e reino.” Tal individuonan lo ser privilegiá pa sirbi Dios pa semper!—Mateo 7:21; 1 Juan 2:17.
3. Kico ta Dios su boluntad pa nos?
3 Despues di siña loke e boluntad di Dios ta, ta vital pa haci’é. Kico bo ta pensa ta Dios su boluntad pa bo? Aptamente e por ser resumí den e palabranan aki: Imitá Jesus. Promé Pedro 2:21 ta bisa nos: “Pa e curso aki boso a ser yamá, pasobra asta Cristo a sufri pa boso, lagando atras un modelo pa boso por sigui su pasonan cu sumo cuidou i atencion.” Pa haci Dios su boluntad, anto, bo mester sigui Jesus su ehempel mas cuidadosamente cu ta posibel. Esei ta e manera pa bo aplicá e conocimentu di Dios.
CON JESUS A USA E CONOCIMENTU DI DIOS
4. Pakico Jesus sa asina tantu tocante Jehova, i con el a usa e conocimentu aki?
4 Jesucristo tin un conocimentu mas íntimo di Dios cu otronan. El a biba i a traha cu Jehova Dios den cielu pa un temporada largísimo promé cu el a bini na tera. (Colosensenan 1:15, 16) I kico Jesus a haci cu tur e conocimentu ei? E no tabata satisfecho cu simplemente tin’é den su posesion. Jesus a biba di acuerdo cu e conocimentu ei. Ta p’esei e tabata asina bondadoso, paciente, i amoroso den su tratonan cu su próhimo. Dje manera ei Jesus tabata imitando su Tata celestial i tabata actua na armonia cu su conocimentu di Jehova su camindanan i personalidad.—Juan 8:23, 28, 29, 38; 1 Juan 4:8.
5. Pakico Jesus a ser bautisá, i con el a biba di acuerdo cu e nificacion di su bautismo?
5 E conocimentu cu Jesus tabatin a motiv’é tambe pa dal un paso crucial. El a bin for di Galilea na e Riu Jordan, caminda Juan a bautis’é. (Mateo 3:13-15) Kico Jesus su bautismo a simbolisá? Como un hudiu, el a nace den un nacion dedicá na Dios. P’esei, Jesus tabata dedicá for di nacementu. (Exodo 19:5, 6) Dor di someté na bautismo, e tabata presentando su mes na Jehova pa haci e boluntad divino p’e miéntras e tabata riba tera. (Hebreonan 10:5, 7) I Jesus a cumpli cu e nificacion di su bautismo. El a forsa su mes den e sirbishi di Jehova, compartiendo e conocimentu di Dios cu hende na tur oportunidad. Jesus a haña goso den haci e boluntad di Dios, asta bisando cu esaki tabata manera cuminda p’e.—Juan 4:34.
6. Di ki manera Jesus a nenga su mes?
6 Jesus a realisá plenamente cu hacimentu dje boluntad di Jehova lo ta masha costoso—cu esei asta lo cost’é su bida. Sin embargo, Jesus a nenga su mes, poniendo su necesidadnan personal na di dos lugá. Hacimentu dje boluntad di Dios semper a bin na promé lugá. Den esaki, con nos por sigui Jesus su ehempel perfecto?
PASONAN CU TA HIBA NA BIDA ETERNO
7. Cua ta algun paso cu un hende mester dal pa cualificá pa bautismo?
7 Distinto di Jesus, nos ta imperfecto i por alcansá e meta di bautismo solamente despues di dal otro pasonan vital. Esaki ta cuminsá cu ganamentu di conocimentu exacto di Jehova Dios i Jesucristo den nos curason. Haciendo esaki ta move nos pa ehercé fe i pa tin amor profundo pa Dios. (Mateo 22:37-40; Romanonan 10:17; Hebreonan 11:6) Cumpliendo cu Dios su leynan, principionan, i normanan mester impulsá nos pa repentí, expresando un duele piadoso pa cu nos picánan di pasado. Esaki ta hiba na combertimentu, esta, un biramentu bek i bandonamentu di cualkier curso malu cu nos a sigui tempu nos no tabatin e conocimentu di Dios. (Echonan 3:19) Naturalmente, si ainda nos ta practicando secretamente algun picá en bes di haci loke ta hustu, nos realmente no a bira bek, ni nos no a gaña Dios. Jehova ta detectá tur hipocresia.—Lucas 12:2, 3.
8. Cua accion bo mester tuma ora bo tin deseo pa participá den e actividad di predicacion dje Reino?
8 Awor cu bo a bin ta adkiriendo e conocimentu di Dios, no ta apropiado pa considerá asuntunan spiritual den un forma masha personal? Probablemente bo ta ansioso pa conta bo famianan, amigunan, i otronan loke bo ta siñando. En realidad, kisas ya caba bo ta haciendo esaki, asta mescos cu Jesus a compartí e bon nobo cu otro hende den un forma informal. (Lucas 10:38, 39; Juan 4:6-15) Awor kisas bo kier haci mas. Ancianonan cristian lo ta contentu pa papia cu bo pa dje manera ei determiná si bo ta cualificá i apto pa tin algun participacion regular den e actividad di predicacion di Reino dje Testigonan di Jehova. Si bo ta cualificá, e ancianonan lo haci areglo pa bo por compañá un Testigo den e ministerio. Jesus su disipelnan a sigui su instruccionnan afin di cumpli cu nan ministerio den un manera ordená. (Marco 6:7, 30; Lucas 10:1) Lo bo beneficiá di yudansa similar segun cu bo participá den plama e mensahe di Reino di cas pa cas i den otro maneranan.—Echonan 20:20, 21.
9. Con un persona ta haci un dedicacion na Dios, i con dedicacion ta afectá e persona su bida?
9 Predicando e bon nobo na tur clase di hende den e teritorio dje congregacion ta un manera pa haña esnan cu tin un disposicion hustu i esei ta entre e obranan excelente cu ta proba cu bo tin fe. (Echonan 10:34, 35; Santiago 2:17, 18, 26) Asistencia regular na reunionnan cristian i teniendo un participacion significativo den e trabou di predicá tambe ta maneranan pa demostrá cu bo a repentí i a combertí i ta awor determiná pa biba di acuerdo cu e conocimentu di Dios. Cua ta e siguiente paso lógico? Esei ta pa haci un dedicacion na Jehova Dios. Esaki ta nificá cu den oracion sincero, bo ta bisa Dios cu boluntariamente i cu tur bo curason bo ta entregando bo bida pa haci su boluntad. Esaki ta e manera pa dedicá bo mes na Jehova i aceptá e yugo bondadoso di Jesucristo.—Mateo 11:29, 30.
BAUTISMO—LOKE E TA NIFICA PA BO
10. Pakico bo mester ser bautisá despues cu bo dedicá bo mes na Jehova?
10 Segun Jesus, tur esnan cu bira su disipel mester ser bautisá. (Mateo 28:19, 20) Pakico esaki ta necesario despues cu bo a haci un dedicacion na Dios? Siendo cu bo a dedicá bo mes na Jehova, e sa cu bo ta stim’é. Pero sin duda lo bo kier tuma accion mas aleu asina pa laga otronan sa tocante bo amor pa Dios. Wel, bautismo ta ofrecé bo un oportunidad pa haci bo dedicacion na Jehova Dios conocí públicamente.—Romanonan 10:9, 10.
11. Kico ta e nificacion di bautismo?
11 Bautismo ta ricu den nificacion simbólico. Segun bo ta ser sumergí, of “derá,” bou di awa, ta como si fuera bo a muri pa loke ta bo curso anterior di bida. Ora bo sali for di awa, ta como si fuera bo ta saliendo pa un bida nobo, unu cu ta ser dirigí dor dje boluntad di Dios i no esun di bo mes. Naturalmente, esei no ta nificá cu lo bo no peca mas, pasobra nos tur ta imperfecto i p’esei ta peca tur dia. Sin embargo, como un sirbidor dedicá di Jehova, i bautisá, lo bo a drenta den un relacion special cuné. Pa motibu di bo repentimentu i bo sumision humilde na bautismo, Jehova ta dispuesto pa pordoná bo picánan riba e base di Jesus su sacrificio di rescate. Asina bautismo ta hiba na un concenshi limpi dilanti Dios.—1 Pedro 3:21.
12. Kico ta nificá pa ser bautisá (a) “den e nomber dje Tata”? (b) ‘den e nomber dje Yu’? (c) ‘den e nomber dje spiritu santu’?
12 Jesus a manda su siguidornan pa bautisá disipelnan nobo “den e nomber dje Tata i dje Yu i dje spiritu santu.” (Mateo 28:19) Kico Jesus tabata kier men? Bautismo “den e nomber dje Tata” ta indicá cu e persona cu ta ser bautisá, cu tur curason ta aceptá Jehova Dios como e Creador i e Soberano legítimo dje universo. (Salmo 36:9; 83:18; Eclesiástes 12:1) Ser bautisá ‘den e nomber dje Yu’ ta nificá cu e individuo ta reconocé Jesucristo—i particularmente Su sacrificio di rescate—como e único medio di salbacion percurá dor di Dios. (Echonan 4:12) Bautismo ‘den e nomber dje spiritu santu’ ta nificá cu e candidato pa bautismo ta reconocé Jehova su spiritu santu, of forsa activo, como Dios su instrumento pa hiba a cabo Su propósitonan i pa duna Su sirbidornan poder pa haci Su boluntad hustu den asociacion cu Su organisacion dirigí pa spiritu.—Génesis 1:2; Salmo 104:30; Juan 14:26; 2 Pedro 1:21.
BO TA CLA PA BAUTISMO?
13, 14. Pakico nos no mester tin miedu di scoge pa sirbi Jehova Dios?
13 Siendo cu bautismo ta nificá asina tantu i ta e evento mas importante den un persona su bida, e ta un paso cu bo mester tin miedu pa tuma? Di ningun manera! Aunke e decision pa ser bautisá no mester ser tumá levemente, e ta indiscutiblemente e decision di mas sabí cu posiblemente bo por tuma.
14 Bautismo ta duna prueba di bo scogementu pa sirbi Jehova Dios. Pensa riba e hendenan cu ken bo ta bin den contacto cuné. Den un forma of otro, cada un di nan no ta sirbiendo un doño? Algun ta sirbi como esclabo pa rikesa. (Mateo 6:24) Otronan diligentemente ta sigui tras di nan carera of ta sirbi nan mes dor di haci e cumplimentu di nan mes deseo e promé cos den nan bida. Tambe otronan ta sirbi diosnan falsu. Pero abo a scoge pa sirbi e Dios berdadero, Jehova. Ningun otro persona ta demostrá asina tantu bondad, compasion i amor. Dios ta dignificá hende cu trabou cu tin propósito i cu ta hiba nan na salbacion. E ta recompensá su sirbidornan cu bida eterno. Sin duda, siguiendo Jesus su ehempel i entregando bo bida na Jehova no ta un curso pa tin miedu pa tuma. Realmente, e ta e único curso cu ta agradá Dios i ta completamente razonabel.—1 Reynan 18:21.
15. Cua ta algun obstáculo comun pa bautismo?
15 Tog, bautismo no ta un paso pa tuma bou di presion. E ta un asuntu personal entre abo i Jehova. (Galationan 6:4) Segun cu bo a haci progreso spiritual, kisas bo a puntra bo mes: “Kico ta strobá mi di bautisá?” (Echonan 8:35, 36) Kisas bo por puntra bo mes, ‘Oposicion di mi famia ta loke ta strobá mi? Te ainda mi ta enbolbí den un of otro situacion no-bíblico of práctica pecaminoso? Por ta cu mi tin miedu di perde fabor den e comunidad?’ Esaki ta algun factor pa considerá, pero evaluá nan realísticamente.
16. Con lo bo beneficiá di sirbi Jehova?
16 No ta realístico pa evaluá e factornan negativo sin considerá e beneficionan di sirbi Jehova. Por ehempel, considerá e asuntu di oposicion di famia. Jesus a primintí cu asta si su disipelnan perde nan famianan pa motibu di a sigui’é, nan lo gana un famia spiritual mas grandi. (Marco 10:29, 30) E compañeronan creyente aki lo mustrá bo amor fraternal, lo yudá bo soportá persecucion, i lo apoyá bo riba e caminda pa bida. (1 Pedro 5:9) Specialmente e ancianonan di congregacion por yudá bo lucha cu problemanan i enfrentá otro desafionan exitosamente. (Santiago 5:14-16) Pa loke ta perdementu di fabor den e mundu aki, bo por wel puntra bo mes, ‘Kico por ta posiblemente comparabel cu teniendo e aprobacion dje Creador dje universo, causand’é pa alegrá riba e curso di bida cu mi a scoge?’—Proverbionan 27:11.
BIBANDO DI ACUERDO CU BO DEDICACION I BAUTISMO
17. Pakico bo mester mira bautismo como un cuminsamentu mas bien cu un final?
17 Ta importante pa corda cu bautismo no ta e fin di bo progreso spiritual. E ta marca e cuminsamentu di un sirbishi di bida largu na Dios como un minister ordená i un Testigo di Jehova. Aunke bautismo ta vitalmente importante, e no ta un garantia pa salbacion. Jesus no a bisa: ‘Tur cu ser bautisá lo ser salbá.’ Mas bien, el a bisa: “Esun cu a perseverá te na fin, ta esun cu lo ser salbá.” (Mateo 24:13) P’esei, ta vital pa bo busca e Reino di Dios promé dor di haci’é e interes principal den bo bida.—Mateo 6:25-34.
18. Despues di bautismo, cua ta algun meta pa sigui tras di dje?
18 Pa perseverá den bo sirbishi na Jehova, lo bo kier pone metanan spiritual pa bo mes. Un meta cu ta bale la pena ta pa aumentá bo conocimentu di Dios mediante studio personal regular di su Palabra. Planea pa lesamentu diario dje Bijbel. (Salmo 1:1, 2) Asistí na reunionnan cristian regularmente, pasobra e asociacion cu bo ta haña ei lo yuda pa duná bo fortalesa spiritual. Personalmente, pakico no haci’é bo meta pa comentá na e reunionnan di congregacion i asina alabá Jehova i busca pa edificá otronan? (Romanonan 1:11, 12) Un otro meta por ta pa mehorá e calidad di bo oracionnan.—Lucas 11:2-4.
19. Cua cualidadnan e spiritu santu por yudá bo manifestá?
19 Pa bo por biba di acuerdo cu e nificacion di bo bautismo, bo mester presta atencion constante na loke bo ta haci, lagando Dios su spiritu santu producí den bo cualidadnan manera amor, goso, pas, gran pacenshi, amabilidad, bondad, fe, suavedad, i dominio propio. (Galationan 5:22, 23; 2 Pedro 3:11) Corda, Jehova ta duna su spiritu santu na tur cu pidi p’e den oracion i ta obedec’é como su fiel sirbidornan. (Lucas 11:13; Echonan 5:32) Pues pidi Dios den oracion pa su spiritu i pidi’é yudansa pa manifestá cualidadnan cu ta agrad’é. Tal cualidadnan lo bira mas bisto den bo abla i conducta segun bo ta respondé na e influencia di Dios su spiritu. Naturalmente, cada individuo den e congregacion cristian ta haciendo esfuerso pa desaroyá “e personalidad nobo” pa asina por bira mas manera Cristo. (Colosensenan 3:9-14) Cada un di nos ta enfrentá desafionan distinto haciendo esaki pasobra nos ta na diferente grado di progreso spiritual. Siendo cu bo ta imperfecto, bo mester traha duru pa tin un personalidad manera di Cristo. Pero nunca desesperá den e asuntu aki, pasobra e ta posibel cu yudansa di Dios.
20. Den ki maneranan bo por imitá Jesus den e ministerio?
20 Entre bo metanan spiritual mester ta esun di imitá Jesus su ehempel gososo mas djacerca. (Hebreonan 12:1-3) El a stima e ministerio. Si bo ta privilegiá pa participá den e actividad di predicacion dje Reino, anto, no lagu’é bira un simpel rutina. Busca pa haña satisfaccion den siña otronan tocante e Reino di Dios manera Jesus a haci. Pone na práctica e instruccion cu e congregacion ta percurá pa yudá bo mehorá como un maestro. I sea sigur cu Jehova por duná bo e fortalesa pa cumpli cu bo ministerio.—1 Corintionan 9:19-23.
21. (a) Con nos sa cu Jehova ta atesorá individuonan fiel bautisá? (b) Kico ta mustra cu bautismo ta importante pa nos sobrebibí e ehecucion di Dios su huicio riba e sistema di cosnan malbado aki?
21 Un persona dedicá i bautisá cu fielmente ta haci esfuerso pa sigui Jesus ta un persona special pa Dios. Jehova ta examiná tur e miles di miyones di curasonnan humano i sa con scars tal individuonan ta. E ta considerá nan como tesoro, “cosnan deseabel.” (Ageo 2:7) Profecianan bíblico ta mustra cu Dios ta mira tal personanan como marcá pa sobrebibí e ehecucion di su huicio cu lo bin pronto riba e sistema di cosnan malbado aki. (Ezekiel 9:1-6; Malakías 3:16, 18) Bo ta “corectamente incliná pa bida eterno”? (Echonan 13:48) Ta bo deseo sincero pa ser marcá como un persona cu ta sirbi Dios? Dedicacion i bautismo ta parti dje marca ei, i nan ta esencial pa sobrebibencia.
22. Cua prospectonan e “multitud grandi” por anticipá?
22 Despues dje Diluvio mundial, Noe i su famia a sali for dje arca drenta den un tera limpi. Mescos awe, “un multitud grandi” cu ta aplicá e conocimentu di Dios den nan bida i ta gana Jehova su aprobacion tin e prospecto di sobrebibí e fin dje sistema di cosnan malbado aki i disfrutá di bida eterno riba un tera permanentemente limpi. (Revelacion 7:9, 14) Con e bida ei lo ta?
TEST BO CONOCIMENTU
Con Jehova kier pa bo usa bo conocimentu di dje?
Cua ta algun paso cu ta hiba na bautismo?
Pakico bautismo no ta un final sino un cuminsamentu?
Con nos por biba di acuerdo cu nos dedicacion i bautismo?
[Plachi na página 172]
Bo a haci un dedicacion na Dios den oracion?
[Plachi na página 174]
Kico ta strobá bo di ser bautisá?