Referensia pa Material i Tarea pa Reunion Nos Bida i Sirbishi Kristian
10-16 DI YÜLI
TESORONAN DI E PALABRA DI DIOS | EZEKIEL 15-17
“Bo Ta Kumpli ku Loke Bo A Primintí?”
w88-S 15/9 17 §8
Yehova Ta Saka Su Spada!
8 Despues, Dios ta kompará e gobernantenan di Babilonia i Egipto ku águilanan grandi. Un di nan a kibra e tòp di un palu di seder ora el a pone Sedekias komo rei na lugá di Yoakim. Aunke Sedekias a hura lealtat na Nabukodonosor, el a kibra su huramentu ora el a buska yudansa di Egipto, e otro águila grandi. Si Sedekias a invoká e nòmber di Dios ora el a hasi e huramentu ei, lo el a trese reproche riba Yehova ora el a kibr’é. P’esei, nos mester ta desididu pa kumpli ku loke nos primintí i asina no trese reproche riba Dios. Ta un onor pa karga e nòmber divino komo un Testigu di Yehova!—Ezekiel 17:1-21.
Buska Hoyanan Spiritual
w88-S 15/9 17 §7
Yehova Ta Saka Su Spada!
7 Pa motibu ku e habitantenan di Huda tabata infiel, Huda a ser kompará ku un mata di wendrùif sin bon fruta, ku ta sirbi solamente pa tira den kandela. (Ezekiel 15:1-8) Tambe el a ser kompará ku un bebi ku Dios a libra di Egipto i ku el a kria te ora el a krese i bira un muhé adulto. Yehova a tum’é komo esposa, pero el a bai sirbi diosnan falsu i lo a ser destruí pa motibu di su adulterio den sentido spiritual. Sinembargo, Dios lo a establesé un pakto eterno ku esnan ku a keda fiel na dje, e pakto nobo ku e Israel spiritual.—Ezekiel 16:1-63; Yeremías 31:31-34; Galationan 6:16.
NOS BIDA KRISTIAN
g14-S 3 14-15
YUDANSA PA FAMIA | MATRIMONIO
Bo Ta Sinti Bo Desepshoná ku Bo Matrimonio?
E PROBLEMA
Tempu boso tabata namorá, tabata parse ku boso tabatin hopi kos en komun; awor e sintimentu di desilushon a separá boso. Ántes bo tabata sinti ku bo no por sin dje; awor bo ke ta leu for di dje.
No preokupá, boso por vense e retonan. Pero, promé ku tur kos, boso tin ku buska pa sa kiko ta e kousa di boso problema.
DIKON ESAKI TA SOSODÉ
Rutina. Bo trabou, boso yunan, boso suegronan; pokopoko e rutina di tur dia por pone bo pèrdè e sintimentu di felisidat den matrimonio. Ademas, problemanan inesperá, manera problema finansiero òf un malesa króniko di un miembro di famia por pone preshon riba bo matrimonio.
Diferensianan aparentemente sin solushon. Hopi biaha, durante namoramentu, e pareha tin e tendensia di pasa e diferensianan ku tin entre nan por alto. Pero despues di kasamentu, nan ta deskubrí ku nan manera di komuniká, manehá plaka, resolvé problema, etcetera, ta kompletamente diferente for di otro. Diferensianan ku un tempu tabata kousa djis un disgustu menor awor ta bira insoportabel.
Alehamentu den sentido emoshonal. Ku tempu, palabra- i akshonnan poko amabel i desakuerdonan ku keda sin resolvé por akumulá i pone ku boso ta alehá for di otro emoshonalmente òf pió ainda boso por enbolbé boso mes emoshonalmente ku un otro persona.
Ekspektativanan ku no ta realístiko. Tin pareha ku ta kasa pensando ku nan a haña e persona perfekto. Maske e pensamentu ei por zona masha romántiko, e por hiba na desaster. Asina problemanan kuminsá, e ilushon di a haña “e persona perfekto” ta kaba na nada, i e pareha por kuminsá pensa ku nan a tuma un desishon robes.
LOKE BOSO POR HASI
Enfoká riba e bon kualidatnan di bo kasá. Hasi lo siguiente: Skirbi tres bon kualidat di bo kasá, kisas den bo telefòn òf tras di un potrèt di boso kasamentu ku semper bo tin huntu ku bo i lesa e kualidatnan ei ku frekuensia. Esei lo yuda bo kòrda pakiko bo a kasa kuné. Si bo enfoká riba e bon kualidatnan di bo kasá, esei lo yuda bo mantené pas kuné i solushoná boso problemanan di e mihó manera.—Prinsipio di Beibel: Romanonan 14:19.
Hasi algu leuk huntu. Promé ku boso a kasa, boso sigur tabata saka tempu pa hasi kosnan huntu. Esei tabata algu nobo i emoshonante pa boso i no tabata sosodé pa kasualidat. Dikon boso no ta saka tempu awor pa hasi algu leuk huntu? Dediká tempu na bo kasá. Plania algu spesial, manera boso tabata hasi tempu boso tabata namorá. Asina boso ta hala mas serka otro, boso relashon ta bira mas fuerte i boso lo ta mihó prepará pa enfrentá problemanan inesperá den bida.—Prinsipio di Beibel: Proverbionan 5:18.
Ekspresá bo sintimentunan. Si bo kasá a bisa òf hasi algu ku a hùrt bo, lo ta bon si bo por djis pasa e asuntu por alto. Pero si esei no ta posibel, evitá di usa e táktika di keda sin papia kuné. Mas bien, ekspresá bo sintimentunan di manera trankil i mas pronto posibel, si por riba e mesun dia.—Prinsipio di Beibel: Efesionan 4:26.
No pensa mesora ku bo kasá a hasi algu ku mal intenshon. Ta mas probabel ku boso niun di dos tin intenshon di hùrt otro. P’esei, pidi otro pordon pa kualke kos ku boso por a bisa òf hasi ku a hùrt otro i papia tokante loke boso por hasi spesífikamente pa no ripití e mesun fout. Sigui e konseho bíbliko akí: “Bira bondadoso ku otro, mustra tierno kompashon, pordoná otro libremente.”—Efesionan 4:32.
Sea realístiko. Beibel ta bisa ku lo tin difikultat den matrimonio. (1 Korintionan 7:28) Asina ta ku si tin difikultat, no pensa mesora ku tabata un mal desishon pa kasa. Mas bien, resolvé difikultatnan entre boso dos i “sigui soportá otro i pordoná otro libremente.”—Kolosensenan 3:13.
[Kuadro na página 15]
TEKSTONAN KLAVE
“Hasi esfuerso pa buska e kosnan ku ta promové pas.”—Romanonan 14:19.
“Alegrá bo den e esposa di bo hubentut.”—Proverbionan 5:18.
“No laga solo baha miéntras ku ainda boso ta rabiá.”—Efesionan 4:26.
[Kuadro na página 15]
KUMPLI KU BO VOTO MATRIMONIAL
Bo ta kòrda e promesa ku bo a hasi dia bo a kasa? Pensa riba e voto ei i puntra bo mes: ‘Mi ta hasiendo mi bèst pa kumpli kuné?’ Evitá di pensa si bo kasá ta kumpli kuné òf nò. Ora bo a hasi bo voto, bo a bisa loke abo lo hasi. Si boso kada un hasi esfuerso pa kumpli ku e voto ei, probablemente boso tur dos lo keda kontentu ku e bon resultadonan.
[Komentario di e página 15]
Si bo kasá a bisa òf hasi algu ku a hùrt bo, lo ta bon si bo por djis pasa e asuntu por alto.
17-23 DI YÜLI
TESORONAN DI E PALABRA DI DIOS | EZEKIEL 18-20
“Ora Yehova Pordoná, E Ta Lubidá?”
w12-S 1/7 18 §2
Ora Dios Pordoná, E Ta Lubidá?
Pa medio di profeta Ezekiel, Yehova a dikta sentensia kontra e habitantenan infiel di Huda i Herúsalèm. E nashon komo grupo a stòp di adorá Yehova i a bira violento. Yehova a profetisá ku Babilonia lo a destruí Herúsalèm, pero na mes momento tambe el a duna nan speransa. E huisio lo tabata individual; kada ken tabata responsabel pa su mes echonan.—Versíkulonan 19, 20.
w12-S 1/7 18 §3-7
Ora Dios Pordoná, E Ta Lubidá?
Awor, si un hende ku tabata hasi malu disidí di kambia, kiko lo a pasa? Na versíkulo 21, Yehova ta bisa: “Si e malbado bira for di tur su pikánan ku el a kometé i warda tur mi statutonan i praktiká huisio i hustisia, e lo biba sigur; e lo no muri.” Sí, Yehova tabata “kla pa pordoná” hende ku a arepentí di kurason i a laga nan mal kaminda.—Salmo 86:5.
I kiko di e pikánan ku el a kometé? Na versíkulo 22, Yehova ta bisa: “Ningun di su transgreshonnan ku el a kometé lo no wòrdu rekordá kontra dje. Pa motibu di su hustisia ku el a praktiká, e lo biba.” Tuma nota ku e pikánan ku el a kometé “lo no wòrdu rekordá kontra dje.” Dikon e ekspreshon ei ta importante?
Den Beibel, e palabra hebreo tradusí “rekordá” por nifiká mas ku djis kòrda kosnan di pasado. Relashoná ku e palabra ei, un obra di referensia ta bisa: “De echo, mayoria di biaha [e] ta impliká un akshon òf e ta den kombinashon ku un verbo di akshon.” Pues, “rekordá” por nifiká “tuma akshon.” P’esei, ora Yehova bisa ku e pikánan di un pekadó ku a arepentí “lo no wòrdu rekordá kontra dje,” e ta bisando ku lo e no tuma akshon kontra dje, esta, bolbe akus’é òf kastig’é pa pikánan ku el a kometé den pasado.
E palabranan konmovedor ku nos ta haña na Ezekiel 18:21 i 22 ta duna nos un idea di kon leu Yehova su pordon ta yega. Ora Dios pordoná e pikánan di un persona ku a arepentí, e no ta kòrda riba nan mas. Al kontrario, e ta tira nan tras di su lomba. (Isaías 38:17) Ta komo si fuera e ta veeg nan por kompleto.—Echonan 3:19.
Nos tur tin mester di e miserikòrdia di Dios, pasobra komo ser humano imperfekto nos ta kometé piká konstantemente. (Romanonan 3:23) Pero Yehova ke pa nos sa ku e ta kla pa pordoná nos si nos arepentí di kurason. I ora e pordoná nos, e ta lubidá nos piká, esta, e no ta bolbe akusá òf kastigá nos pa nos pikánan di pasado. Esta un alivio! E miserikòrdia di Dios no ta motivá bo pa hala mas serka dje?
31 DI YÜLI–6 DI OUGÙSTÙS
TESORONAN DI E PALABRA DI DIOS | EZEKIEL 24-27
“Un Profesia Kontra Tiro Ta Fortalesé Nos Konfiansa den Yehova Su Palabra”
si-S 133 §4
Buki di Beibel Number 26—Ezekiel
4 Un otro prueba di ku Beibel ta un buki outéntiko ta e kumplimentu dramátiko di e profesianan di Ezekiel kontra e nashonnan den bisindario, manera Tiro, Egipto i Edòm. Por ehèmpel, Ezekiel a profetisá ku Tiro lo a ser destruí, i esei a sosodé en parte ora Nabukodonosor a konkistá e stat despues di a siti’é pa 13 aña largu. (Eze. 26:2-21) E konkista akí no a nifiká e fin kompleto di Tiro. No opstante, e huisio di Yehova a eksigí pa e stat keda totalmente destruí. Dios a profetisá lo siguiente mediante Ezekiel: “Lo mi raspa kita asta su stòf for di dje i hasié manera un baranka pelon. . . . I tira bo piedranan, bo balkinan i bo sushedat den laman.” (Eze. 26:4, 12) Tur esaki a kumpli mas ku 250 aña despues, ora Aleksander e Grandi a ataká e isla di Tiro. E sòldánan di Aleksander a piki tur e restunan di e ruina di e stat di Tiro ku tabata anteriormente na e kosta di Fenisia i a tira nan den laman pa traha un kaminda di 800 meter i yega na parti di e stat ku tabata riba un isla. Anto, ku un konstrukshon kompleho, nan a logra sitia e stat, subi i bula over di e murayanan di 46 meter haltu i konkistá e stat na aña 332 promé ku Kristu. Míles di e habitantenan a muri i hopi otro a ser bendí komo katibu. Manera Ezekiel a profetisá tambe, Tiro a bira “un baranka pelon, i . . . un lugá pa habri reda riba dje.” (Eze. 26:14) Na e otro banda di e Tera Primintí, e edomitanan ku a trata di manera traishonero tambe a ser anikilá, manera Ezekiel a profetisá. (Eze. 25:12, 13; 35:2-9) I, klaru, e profesianan di Ezekiel tokante e destrukshon di Herúsalèm i e restorashon di Israel tambe a kumpli te den detaye.—Eze. 17:12-21; 36:7-14.
ce-S 216 §3
Beibel di Bèrdat Ta Inspirá pa Dios?
3 Tiro tabata un stat portuario prominente di Fenisia ku a trata di manera traishonero ku Israel di antigwedat, un nashon bisiña na parti zùit ku tabata adorá Yehova. Mediante profeta Ezekiel, Yehova a profetisá mas ku 250 aña di antemano ku Tiro lo a ser destruí kompletamente. Yehova a bisa: “Lo mi trese hopi nashon kontra bo . . . Nan lo destruí e murayanan di Tiro i basha su torennan abou. Tambe lo mi raspa kita asta su stòf for di dje i hasié manera un baranka pelon. E lo bira un lugá pa habri reda riba dje meimei di laman.” Ezekiel a menshoná tambe di antemano kua lo tabata e promé nashon ku lo a sitia Tiro i tambe ken lo tabata e lider di e nashon ei: “Lo mi trese Nabukodonosor, rei di Babilonia, . . . kontra Tiro.”—Ezekiel 26:3-5, 7.
it-1-S 84 §2
Aleksander
Despues di a logra dos viktoria desisivo na Asia Menor (e promé na Riu Grániko i e di dos na e yanura di Isos, kaminda un ehérsito grandi di Persia, ku a konsistí di mei mion sòldá, a sufri un derota aplastante), Aleksander no a kore tras di e personan pa persiguí nan, sino a dirigí su atenshon na e isla di Tiro. Vários siglo di antemano Dios a profetisá ku e murayanan, e torennan i e kasnan di Tiro lo a ser destruí i tirá den laman. (Eze 26:4, 12) P’esei, ta remarkabel ku Aleksander a tuma e ruinanan di e stat Tiro ku Nabukodonosor a destruí anteriormente na kosta di Fenisia i tira nan den laman pa traha un kaminda di 800 meter pa yega na e isla di Tiro. Ku su flota di barku riba laman i su mashinnan di guera el a logra destruí e dama orguyoso di laman por kompleto na yüli di aña 332 promé ku Kristu.
Buska Hoyanan Spiritual
w88-S 15/9 21 §24
Yehova Ta Saka Su Spada!
24 Despues, Ezekiel mester a hasi algu straño. (Lesa Ezekiel 24:15-18.) Dikon e profeta no mester a yora ora su kasá a muri? Pa demostrá kon turdí e hudiunan lo a keda ora Herúsalèm, su habitantenan i su tèmpel a ser destruí. Ezekiel a papia hopi kaba tokante e susesonan ei i lo e no a bolbe menshoná e mensahe di Dios te ora ku e tende ku Herúsalèm a kai. Asina tambe, kristiandat i su lidernan hipókrita lo keda turdí ora e momento di nan destrukshon yega. I despues ku e “tribulashon grandi” kuminsá, e klase di vigilante ungí no tin nodi di bisa nada mas tokante e fin di kristiandat; loke nan a bisa aworakí kaba ta sufisiente. (Mateo 24:21) Anto, ora e “spada” di Dios baha riba kristiandat, e religiosonan tur turdí ei i otro hende ‘lo sa ku e ta Yehova.’—Ezekiel 24:19-27.