Capitulo Tres

Leal na Jehova—Apesar di Prueba!

 1, 2. Ki sucesonan significativo a sirbi como un preludio p’e relato di Daniel?

E BUKI profético di Daniel ta cuminsá na un tempu di cambio trasedental riba esena internacional. Asiria a caba di perde su capital, Nínive. Egipto a perde su poder i a keda limitá na un posicion di menor importancia pa zuid dje tera di Huda. I Babilonia tabata subi rápidamente como e potencia principal den e lucha pa dominacion mundial.

² Na aña 625 P.E.C., fárao Neko di Egipto a haci un último intento desesperá pa evitá cu Babilonia ta expandé bin zuid. Pa logra esei, el a hiba su ehército Carkemis, situá na oriya dje parti mas ariba di riu Eufrátes. E bataya di Carkemis, manera a yam’é despues, tabata un suceso decisivo i histórico. E ehército di Babilonia, bou di mando dje príncipe heredero Nabucodonosor, a dal e trupanan di fárao Neko un golpi devastador. (Jeremías 46:2) Nabucodonosor a probechá dje estímulo di su victoria i a pasa riba Siria cu Palestina i, pa motibunan práctico, a pone un fin na dominacion egipcio den e region aki. Ta e morto di su tata, Nabopolasar, so a trece un paro temporal na su campaña.

 3. Kico tabata e resultado di Nabucodonosor su promé campaña contra Jerusalem?

³ E siguiente aña, Nabucodonosor—entronisá awor como rey di Babilonia—a bolbe dirigí su atencion na su campañanan militar na Siria i Palestina. Tabata durante e periodo aki cu el a bini Jerusalem pa promé biaha. Bijbel ta informá: “Den su dianan Nabucodonosor, rey di Babilonia, a subi, di manera cu Jehoiakim a bira su sirbidó pa tres aña. Sin embargo, el a bira bek i rebelá contra dje.”—2 Reynan 24:1.

NABUCODONOSOR NA JERUSALEM

 4. Con nos mester comprendé e expresion “den e di tres aña dje gobernacion real di Jehoiakim” na Daniel 1:1?

⁴ E expresion “pa tres aña” ta di interes special pa nos, pasobra e palabranan di introduccion di Daniel ta bisa: “Den e di tres aña dje gobernacion real di Jehoiakim, rey di Huda, Nabucodonosor, rey di Babilonia, a bini Jerusalem anto a siti’é.” (Daniel 1:1) Den e tercer aña dje gobernacion real completo di Jehoiakim, kende a reina di aña 628 pa 618 P.E.C., ainda Nabucodonosor no tabata “rey di Babilonia,” sino tabata e príncipe heredero. Na aña 620 P.E.C., Nabucodonosor a obligá Jehoiakim paga tributo. Pero despues di un tres aña, Jehoiakim a rebelá. Pues, tabata na aña 618 P.E.C., esta durante e tercer aña dje gobernacion real di Jehoiakim como rey subordiná na Babilonia, cu rey Nabucodonosor a bini Jerusalem pa di dos biaha, pa castigá e rebelde Jehoiakim.

 5. Kico tabata e resultado di Nabucodonosor su segundo campaña contra Jerusalem?

⁵ Resultado dje sitiamentu aki tabata cu, “cu tempu Jehova a duna Jehoiakim, rey di Huda, i un parti dje artículonan di uso dje cas dje Dios berdadero, den su man.” (Daniel 1:2) Probablemente Jehoiakim a muri, sea asesiná of den un revolucion, durante e promé etapanan dje sitiamentu. (Jeremías 22:18, 19) Na aña 618 P.E.C., su yu di 18 aña di edad, Joakin a siguié como rey. Pero Joakin su reinado a dura solamente tres luna i dies dia, i na aña 617 P.E.C. el a entregá.—Compará cu 2 Reynan 24:10-15.

 6. Kico Nabucodonosor a haci cu e utensiyonan sagrado dje tempel na Jerusalem?

⁶ Nabucodonosor a tuma artículonan sagrado dje tempel na Jerusalem como botin i “a hiba nan na e tera di Sinar na e cas di su dios; i e artículonan di uso el a hiba na e cas di tesoro di su dios,” Marduk, of na hebreo, Merodac. (Daniel 1:2; Jeremías 50:2) A descubrí un inscripcion babilónico caminda un persona representando Nabucodonosor ta bisa dje tempel di Marduk: “Mi a warda plata i oro i piedranan precioso den dje . . . i a pone e cas di tesoro di mi reino ei.” Nos lo lesa tocante e utensiyonan sagrado atrobe den e dianan di rey Bélsasar.—Daniel 5:1-4.

E ELITE DJE HOBENNAN DI JERUSALEM

 7, 8. Kico nos por deducí for di Daniel 1:3, 4 i 6 tocante e antecedente di Daniel i su tres compañeronan?

⁷ Nan a trece mas cu e tesoronan dje tempel di Jehova na Babilonia. E relato ta bisa: “Anto rey a bisa Aspenaz, su hefe di funcionario di palacio, pa trece algun dje yunan di Israel i dje desendencia real i dje noblenan, muchanan cu no tabatin ningun defecto, sino di bon aparencia i cu perspicacia den tur sabiduria i familiarisá cu conocimentu, cu tabatin dicernimentu di loke ta conocí, den ken tambe tabatin e abilidad di para den palacio di rey.”—Daniel 1:3, 4.

⁸ Ken nan a scoge? Bijbel ta bisa nos: “A sosodé cu tabatin entre nan algun yu di Huda: Daniel, Hananías, Misael i Azarías.” (Daniel 1:6) Esaki ta tira poco lus riba e antecedente di Daniel i su compañeronan cu por lo demas ta desconocí. Por ehempel, nos ta ripará cu nan tabata “yu di Huda,” e tribu real. Sea cu nan tabata for dje liña real of no, ta razonabel pa pensa cu por lo ménos nan tabata di famianan cu tabatin algun importancia i influencia. Ademas di tabatin mente i curpa salú, nan tabatin perspicacia, sabiduria, conocimentu i dicernimentu—tur esei na un edad suficiente hóben pa ser yamá “muchanan,” podisé na principio di nan añanan di tiener. Daniel i su compañeronan mester tabata sobresaliente—e élite—entre e hóbennan na Jerusalem.

 9. Pakico ta parce cu Daniel i su tres compañeronan sigur tabatin mayornan temeroso di Dios?

⁹ E relato no ta bisa nos ken tabata e mayornan dje hóbennan aki. No obstante, ta parce cu nan sigur tabata personanan deboto na Dios, cu a tuma nan responsabilidad como mayor na serio. Tumando na cuenta e decadencia moral i spiritual cu a prevalecé na Jerusalem den e tempu ei, foral entre ‘e desendencia real i e noblenan,’ ta keda claro cu e excelente cualidadnan hañá den Daniel i su tres compañeronan no a bini di mes. No tin duda cu mester tabata teribel pa e mayornan mira hende bai cu nan yunan na un pais leu. Ai, si nan por a sa e resultado, esta orguyoso nan lo tabata! Ki importante ta pa mayornan lanta nan yunan “den e disiplina i reglamentu mental di Jehova”!—Efesionan 6:4.

UN LUCHA PA NAN MENTE

10. Kico nan a siña e hóbennan hebreo, i cu ki propósito?

¹⁰ Mesora un lucha a cuminsá pa influenciá e mente hóben dje exiliadonan aki. Pa haci sigur cu lo a moldea e tienernan hebreo pa nan pas den e sistema babilónico, Nabucodonosor a decretá pa su funcionarionan “siña nan e forma di skirbi i lenga dje caldeonan.” (Daniel 1:4) Esaki no tabata un gewoon educacion. The International Standard Bible Encyclopedia ta splica cu esaki “a consistí di siña sumerio, acadio, arameo . . . , i otro idiomanan, i tambe studia e literatura extenso skirbí n’e idiomanan ei.” “E literatura extenso” a consistí di historia, matemática, astronomia, etcétera. Sin embargo, “textonan religioso asociá cu nan, tocante señalnan i tambe di astrologia . . . , a hunga un papel importante.”

11. Ki pasonan a tuma pa haci sigur cu e hóbennan hebreo lo a drenta completo den e bida di palacio di Babilonia?

¹¹ Pa e hóbennan hebreo aki adoptá custumber i cultura di bida den palacio di Babilonia completamente, “rey a asigná na nan un porcion diario for dje alimentonan exkisito di rey i for di su biña di bebe, asta pa nutri nan pa tres aña, pa na fin di esakinan nan por a para dilanti di rey.” (Daniel 1:5) Ademas, “e funcionario principal di palacio a asigná nomber na nan. Di manera cu el a asigná na Daniel e nomber di Béltsasar; i na Hananías, Sadrac; i na Misael, Mesac; i na Azarías, Abednego.” (Daniel 1:7) Den tempu bíblico tabata comun pa duna un persona un nomber nobo pa marca un suceso importante den su bida. Por ehempel, Jehova a cambia e nombernan di Abram i Sarai, pa Abraham i Sara. (Génesis 17:5, 15, 16) Pa un hende cambia e nomber di un otro persona ta un muestra claro di autoridad of dominio. Ora Josef a bira administradó di cuminda di Egipto, fárao a dun’é e nomber Zafenat-panéah.—Génesis 41:44, 45; compará cu 2 Reynan 23:34; 24:17.

12, 13. Pakico nos por bisa cu cambia nomber dje hóbennan hebreo tabata un esfuerso pa saboteá nan fe?

¹² Den caso di Daniel i su tres compañeronan hebreo, e cambio di nomber tabata significante. E nomber cu nan mayornan a duna nan tabata na armonia cu e adoracion di Jehova. “Daniel” ta nificá “Mi Hues Ta Dios.” E nificacion di “Hananías” ta “Jehova A Mustra Fabor.” Posiblemente “Misael” ta nificá “Ken Ta Manera Dios?” “Azarías” ta nificá “Jehova A Yuda.” Sin duda e deseo ferviente di nan mayornan tabata pa nan yunan crece bou dje guia di Jehova Dios pa bira su sirbidónan fiel i leal.

¹³ Sin embargo, tur e nombernan nobo cu nan a duna e cuater hebreonan tabata estrechamente asociá cu nomber di diosnan falsu, pa indicá asina cu e Dios berdadero a ser someté dor di e diosnan ei. Ki un intento malicioso pa saboteá e fe dje hóbennan aki!

14. Kico e nombernan nobo cu nan a duna Daniel i su tres compañeronan ta nificá?

¹⁴ A cambia Daniel su nomber pa Béltsasar, cu ta nificá “Protehá Bida di Rey.” Evidentemente, esaki tabata un forma abreviá di un invocacion na Bel, of Marduk, e dios principal di Babilonia. Sea cu Nabucodonosor tabatin di haber cu scogementu dje nomber aki pa Daniel of no, e tabata orguyoso di reconocé cu esei tabata “conforme cu e nomber di [su] dios.” (Daniel 4:8) Hananías su nomber a bira Sadrac, loke algun experto ta kere ta un nomber componí cu ta nificá “Mandamentu di Aku.” Ta interesante pa nota cu Aku tabata e nomber di un dios sumerio. Misael a bira Mesac (posiblemente, Mi·sha·aku), aparentemente un cambio astuto di “Ken Ta Manera Dios?” pa “Ken Ta Loke Aku Ta?” Azarías su nomber babilónico tabata Abednego, cu probablemente ta nificá “Sirbidó di Nego.” I “Nego” ta un variante di “Nebo,” nomber di un dios cu vários gobernante babilónico tambe tabatin.

DECIDIDU PA KEDA LEAL NA JEHOVA

15, 16. Ki peligernan Daniel i su compañeronan a confrontá awor, i con nan a reaccioná?

¹⁵ E nombernan babilónico, e programa di reeducacion i e dieta special—tur tabata un esfuerso pa no solamente purba integrá Daniel i e tres hóbennan hebreo den e estilo di bida di Babilonia, sino tambe pa kita nan for di nan propio Dios, Jehova, i for di nan entrenamentu i antecedente religioso. Confrontá cu tur e preshon i tentacion aki, kico e hóbennan aki lo a haci?

¹⁶ E relato inspirá ta bisa: “Daniel a determiná den su curason cu lo e no contaminá su mes cu e alimentonan exkisito di rey i cu su biña di bebe.” (Daniel 1:8a) Aunke ta mencioná Daniel so pa nomber, na loke a sigui ta evidente cu su tres compañeronan a apoyá su decision. E palabranan, “a determiná den su curason,” ta mustra cu e instruccion cu e mayornan di Daniel i otro hendenan aya na cas a dun’é, a yega na su curason. Indudablemente, entrenamentu similar a guia e otro tres hebreonan den nan decisionnan. Esaki ta ilustrá ampliamente e balor di siña nos yunan, asta ora por parce cu nan ta muchu chikitu pa comprendé.—Proverbionan 22:6; 2 Timoteo 3:14, 15.

17. Pakico Daniel i su compañeronan a protestá solamente contra e cumindanan diario di rey i no contra e otro areglonan?

¹⁷ Pakico e hóbennan hebreo a protestá solamente contra e alimentonan exkisito i e biña, pero no contra e otro areglonan? E razonamentu di Daniel ta indicá claramente pakico: “Lo e no contaminá su mes.” Pa desagradabel cu por tabata pa siña “e forma di skirbi i lenga dje caldeonan” i haña un nomber babilónico, esakinan no necesariamente a contaminá un persona. Considerá e ehempel di Moises, casi 1.000 aña promé. Aunke el a ser “instruí den tur e sabiduria dje egipcionan,” el a keda leal na Jehova. Su criansa cerca su mes mayornan a dun’é un fundeshi sólido. Como resultado, “pa medio di fe, Moises, ora el a bira grandi, a nenga di ser yamá yu dje yu muher di fárao, scogiendo pa ser maltratá cu e pueblo di Dios mas bien cu disfrutá temporalmente di picá.”—Echonan 7:22; Hebreonan 11:24, 25.

18. Den ki maneranan e cuminda di rey lo por a contaminá e hóbennan hebreo?

¹⁸ Den ki manera e cuminda dje rey di Babilonia lo por a contaminá e hóbennan? Na promé lugá, podisé entre e alimentonan exkisito tabatin cuminda prohibí pa e Ley di Moises. Por ehempel, e babilonionan tabata come animalnan impuru, prohibí pa e israelitanan bou di Ley. (Levítico 11:1-31; 20:24-26; Deuteronomio 14:3-20) Na di dos lugá, e babilonionan no tabatin e custumber di sangra animalnan matá promé cu come nan carni. Come carni cu no a sangra lo tabata un violacion directo di Jehova su ley tocante sanger. (Génesis 9:1, 3, 4; Levítico 17:10-12; Deuteronomio 12:23-25) Na di tres lugá, adoradónan di diosnan falsu tabatin custumber di ofrecé nan cuminda na ídolo promé cu nan com’é na mesa huntu. Sirbidónan di Jehova lo no kier tin nada di haci cu e cosnan ei! (Compará cu 1 Corintionan 10:20-22.) Finalmente, ta masha insaludabel pa hende di cualkier edad entregá dia tras dia na cumindanan ricu i bebida sterki, laga para pa hóbennan.

19. Con e hóbennan hebreo lo por a hustificá nan mes, pero kico a yuda nan yega na e conclusion corecto?

¹⁹ Sa kico pa haci ta un cos, pero tin e curashi pa hacié ora bo ta bou di preshon of tentacion ta completamente un otro cos. Daniel i su tres compañeronan por a razoná cu ya cu nan ta leu for di nan mayornan i amigunan, eseinan no sa kico nan tabata haci. Tambe nan por a hustificá nan mes cu tabata ordu di rey i cu aparentemente no tabatin ningun alternativa. Ademas, sin duda e otro hóbennan a aceptá e areglonan unbes i a considerá nan participacion un privilegio en bes di un prueba. Pero tal forma di pensa robes por a hiba fácilmente na e trampa di picá secreto, cu ta un las pa hopi hóben. E hóbennan hebreo tabata sa cu “e wowo di Jehova ta na tur parti” i cu “e Dios berdadero mes lo trece tur clase di obra na huicio relacioná cu tur cos scondí, en cuanto si e ta bon of malu.” (Proverbionan 15:3; Eclesiástes 12:14) Laga nos tur siña un les for dje curso dje hóbennan fiel aki.

A RECOMPENSÁ CURASHI I PERSISTENCIA

20, 21. Ki accion Daniel a tuma, i cu ki resultado?

²⁰ Despues cu Daniel a dicidí den su curason pa resistí e influencianan corupto, el a actua na armonia cu su decision. “El a sigui pidi e funcionario principal di palacio pa e no tin cu contaminá su mes.” (Daniel 1:8b) “Sigui pidi,” ta un expresion notabel. Mayoria biaha, esfuerso persistente ta necesario si nos kier tin éxito den resistí tentacion of vence cierto debilidadnan.—Galationan 6:9.

²¹ Den caso di Daniel, persistencia a duna resultado. “Consecuentemente, e Dios berdadero a entregá Daniel na bondad amoroso i misericordia dilanti dje funcionario principal di palacio.” (Daniel 1:9) E echo cu finalmente cosnan a sali bon pa Daniel i su compañeronan, no ta pasobra nan tabata personanan atractivo i inteligente. Mas bien, tabata debí na Jehova su bendicion. Sin duda Daniel a corda e proverbio hebreo: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.” (Proverbionan 3:5, 6) Siguiendo e conseho ei, di berdad a trece recompensa.

22. Ki protesta legítimo e funcionario di palacio tabatin?

²² Na promé instante, e funcionario principal di palacio a protestá: “Mi tin miedu di mi señor rey, kende a fiha loke boso mester come i bebe. Pakico anto, e mester mira boso cara tur decaí na comparacion cu e muchanan cu ta di mésun edad cu boso, i pakico boso tin cu haci mi cabes culpabel dilanti rey?” (Daniel 1:10) Esakinan tabata obhecion i temornan válido. Rey Nabucodonosor no tabata un persona cu lo a aceptá desobedencia, i e funcionario a realisá cu su “cabes” lo ta na peliger si e mester a bai contra instruccion di rey. Kico Daniel lo a haci?

23. Con Daniel a mustra perspicacia i sabiduria den e manera cu el a trata cu e asuntu?

²³ Aki ta caminda perspicacia i sabiduria a hunga un rol. Probablemente e hóben Daniel a corda e proverbio: “Un contesta, ora e ta suave, ta apartá rabia, pero un palabra cu ta causa dolor ta instigá rabia.” (Proverbionan 15:1) En bes di haci cos di cabesura i insistí pa cumpli cu su peticion i posiblemente provocá otro hende pa hacié un mártir, Daniel a laga e asuntu para. Na e tempu apropiado, el a acercá “e bewaker,” cu kisas tabata mas dispuesto pa dun’é un chens, ya cu e bewaker sí no tabatin cu duna cuenta directamente na rey.—Daniel 1:11.

TA PROPONE UN PRUEBA DI DIES DIA

24. Ki prueba Daniel a proponé?

²⁴ Daniel a proponé e bewaker pa haci un prueba, bisando: “Por fabor, pone bo sirbidónan na prueba pa dies dia, i laga nan duna nos poco berdura pa nos come i awa pa nos bebe; i laga nos cara i cara dje muchanan cu ta come e alimento exkisito di rey presentá bo dilanti, i haci cu bo sirbidónan conforme cu loke bo mira.”—Daniel 1:12, 13.

25. Kico probablemente a cai bou dje ‘berduranan’ cu nan a sirbi Daniel i su tres amigunan?

²⁵ Dies dia riba ‘berdura cu awa’; nan cara lo a bira “tur decaí” na comparacion cu e otronan? “Berdura” ta traducí for di un palabra hebreo cu básicamente ta nificá “simia.” Algun version di Bijbel ta traducié “bonchi,” loke ta ser definí como “simia comibel di vários berdura (manera pitipuá, bonchi of lenteha).” Algun erudito ta haña cu e contexto ta indicá un dieta cu a incluí mas cu solamente simia comibel. Un obra di referencia ta declará: “Loke Daniel i su compañeronan tabata pidi tabata e dieta vegetal simpel di hende comun i coriente, en bes di e dieta mas ricu i cu mas carni dje mesa real.” Pues, berdura por a encerá platonan nutritivo prepará cu bonchi, comcomber, konofló, siboyo largu, lenteha, milon i siboyo, i pan trahá di tur sorto di grano. Sigur ningun hende lo no a considerá esei un dieta di pasa hamber. Aparentemente e bewaker a capta e punto. “Finalmente el a scucha nan tocante e asuntu aki i a pone nan na prueba pa dies dia.” (Daniel 1:14) Kico tabata e resultado?

26. Kico tabata e resultado dje prueba di dies dia, i pakico e asuntu a resultá asina?

²⁶ “Na fin di dies dia nan cara a mustra mihó i cu mas carni cu tur e muchanan cu tabata come dje alimentonan exkisito di rey.” (Daniel 1:15) No mester tuma esaki como evidencia di cu un dieta vegetariano ta superior cu unu mas ricu i cu carni. Dies dia ta un periodo di tempu muchu corticu pa cualkier clase di dieta producí resultadonan palpabel, pero pa Jehova logra su propósito sí e no ta muchu corticu. Su Palabra ta bisa: “E bendicion di Jehova—esei ta loke ta haci ricu, i e no ta agregá ningun dolor na dje.” (Proverbionan 10:22) E cuater hóbennan hebreo a pone nan fe i confiansa den Jehova, i e no a bandoná nan. Siglonan despues, Jesucristo a sobrebibí 40 dia sin come. Relacioná cu esaki el a cita e palabranan hañá na Deuteronomio 8:3, caminda nos ta lesa: “Hende no ta biba di pan so, sino di tur expresion cu ta sali for di boca di Jehova hende ta biba.” I e experencia di Daniel i su amigunan ta un ehempel clásico di esaki.

PERSPICACIA I SABIDURIA NA LUGA DI ALIMENTO EXKISITO I BIÑA

27, 28. Den ki maneranan e dieta na cua Daniel i su tres amigunan a someté nan mes tabata un preparacion pa cosnan mas grandi den futuro?

²⁷ E dies dianan tabata djis un prueba, pero e resultadonan tabata masha convincente. “Di manera cu e bewaker a sigui kita nan alimentonan exkisito i nan biña di bebe i duna nan berdura.” (Daniel 1:16) No ta difícil pa imaginá kico e otro hóbennan den e programa di entrenamentu a pensa di Daniel i su compañeronan. Nenga e bankete di rey pa come berdura tur dia, mester a parce masha bobo den nan bista. Pero tabatin pruebanan grandi djis tras di porta, i esakinan lo a rekerí pa e hóbennan hebreo ta tur alerto i sobrio posibel. Riba tur cos, nan fe i confiansa den Jehova tabata loke lo a yuda nan pasa dor di nan pruebanan di fe.—Compará cu Hosué 1:7.

²⁸ Evidencia cu Jehova tabata cu e hóbennan aki, nos por haña den loke Bijbel ta bisa siguientemente: “Pa loke ta e muchanan aki, nan cuater, na nan e Dios berdadero a duna conocimentu i perspicacia den tur skirbimentu i sabiduria; i Daniel mes tabatin comprendimentu den tur sorto di vision i soño.” (Daniel 1:17) Pa trata cu tempu difícil den futuro, nan tabatin mester di mas cu fortalesa físico i bon salú. “Ora sabiduria drenta den bo curason i conocimentu mes bira agradabel pa bo mes alma, capacidad di pensa mes lo vigilá bo, dicernimentu mes lo protehá bo, pa libra bo dje mal caminda.” (Proverbionan 2:10-12) Esei tabata precis loke Jehova a ekipá e cuater hóbennan fiel cuné pa por enfrentá loke tabatin nan dilanti.

29. Con bini Daniel por a ‘comprendé tur sorto di vision i soño’?

²⁹ Bijbel ta declará cu Daniel “tabatin comprendimentu den tur sorto di vision i soño.” Esaki no ta nificá cu el a bira un síkico. Ta interesante cu, aunke Daniel ta ser considerá un dje gran profetanan hebreo, nunca Dios no a inspir’é pa expresá declaracionnan manera “esaki ta loke Señor Soberano Jehova a bisa” of “esaki ta loke Jehova di ehércitonan a bisa.” (Isaías 28:16; Jeremías 6:9) Tog, tabata bou di guia dje spiritu santu di Dios cu Daniel por a comprendé i interpretá vision i soñonan cu a revelá e propósito di Jehova.

FINALMENTE, E PRUEBA CRUCIAL

30, 31. Con e manera di anda cu Daniel i su compañeronan a scoge, a resultá di ta probechoso pa nan?

³⁰ E tres añanan di reeducacion i preparacion a terminá. Awor a bini e prueba crucial: un entrevista personal cu rey. “Na fin dje dianan cu rey a bisa pa trece nan paden, e funcionario principal di palacio a trece nan tambe dilanti di Nabucodonosor.” (Daniel 1:18) Tabata tempu pa e cuater hóbennan mustra kico nan a siña. E echo cu nan a pega na e leynan di Jehova en bes di entregá na custumbernan di Babilonia lo a resultá di ta probechoso pa nan?

³¹ “Rey a cuminsá papia cu nan, i entre nan tur no a haña ni un manera Daniel, Hananías, Misael i Azarías; i nan a sigui para dilanti rey.” (Daniel 1:19) Ki un vindicacion total di nan manera di anda durante e tres añanan cu a pasa! E echo cu nan a pega na un dieta cu nan fe i concenshi a dicta nan, no tabata ningun locura di nan parti. Dor di ta fiel den loke por a parce un cos chikitu, Daniel i su amigunan a ricibí bendicionnan mas grandi. Tur e hóbennan den e programa kier a logra haña e privilegio di “para dilanti rey.” Bijbel no ta bisa cu ta e cuater hóbennan hebreo ei so rey a scoge. Sea cual sea e caso, nan curso fiel en berdad a duna nan “un gran recompensa.”—Salmo 19:11.

32. Pakico nos por bisa cu Daniel, Hananías, Misael i Azarías a disfrutá di un privilegio mas grandi cu sirbi den palacio di rey?

³² “Bo a contemplá un homber ábil den su trabou? Dilanti reynan lo e posicioná su mes,” e Scritura ta bisa. (Proverbionan 22:29) Pues, Nabucodonosor a scoge Daniel, Hananías, Misael i Azarías pa para dilanti rey, esta, pa ta parti dje palacio real. Den tur esaki, nos por mira con e man di Jehova ta maniobrá asuntunan pa revelá aspectonan importante dje propósito divino mediante e hóbennan aki, foral mediante Daniel. Maske tabata un onor pa nan scoge bo pa bira parti dje palacio real di Nabucodonosor, tabata un onor muchu mas grandi pa ser usá den un manera asina maraviyoso dor dje Rey Universal, Jehova.

33, 34. (a) Di con rey a keda impresioná cu e hóbennan hebreo? (b) Ki les nos por saca for dje experencia dje cuater hebreonan?

³³ No a tarda muchu cu Nabucodonosor a ripará cu e sabiduria i perspicacia cu Jehova a otorgá e cuater hóbennan hebreo tabata hopi mas superior cu di tur e consehero i sabionan di su palacio. “Tocante tur asuntu di sabiduria i comprendimentu cu rey a puntra nan di dje, el a haña nan asta dies biaha mas mihó cu tur e sacerdotenan practicadó di magia i tovenarnan cu tabatin den henter su region real.” (Daniel 1:20) I no por tabata otro. E “sacerdotenan practicadó di magia” i “tovenarnan” a dependé riba e siñansa mundano i supersticioso di Babilonia, miéntras cu Daniel i su amigunan a pone nan confiansa den sabiduria djariba. Simplemente no por tabatin comparacion!

³⁴ Atrabes di siglonan cosnan no a cambia mashá. Den promé siglo E.C., ora cu filosofia griego i ley romano tabata popular, Dios a inspirá apostel Pablo pa skirbi: “E sabiduria dje mundu aki ta bobedad cerca Dios; pasobra ta pará skirbí: ‘E ta coge e sabínan den nan mes astucia.’ I atrobe: ‘Jehova sa cu e razonamentunan di hende sabí ta bano.’ P’esei, no laga ningun hende broma den hende.” (1 Corintionan 3:19-21) Awe, nos tin cu tene duru na loke Jehova a siña nos i no laga e encanto i briyo dje mundu influenciá nos fácilmente.—1 Juan 2:15-17.

FIEL TE NA FIN

35. Cuantu Bijbel ta conta nos dje tres compañeronan di Daniel?

³⁵ Daniel capítulo 3 ta ilustrá dramáticamente e fe fuerte di Hananías, Misael i Azarías, en coneccion cu e imágen di oro di Nabucodonosor riba e yanura di Dura i e prueba dje fornu di candela. Indudablemente e hebreonan aki temeroso di Dios a keda fiel na Jehova te na nan morto. Nos sa esaki pasobra no tin duda cu ta na nan apostel Pablo a referí ora el a skirbi tocante esnan “cu pa medio di fe . . . a detené forsa di candela.” (Hebreonan 11:33, 34) Nan ta ehempelnan sobresaliente pa sirbidónan hóben i bieu di Jehova.

36. Ki carera sobresaliente Daniel tabatin?

³⁶ Pa loke ta Daniel, e último versículo di capítulo 1 ta bisa: “Daniel a sigui te na e promé aña di rey Ciro.” Historia ta revelá cu Ciro a conkistá Babilonia den un solo anochi, na aña 539 P.E.C. Evidentemente debí na Daniel su reputacion i posicion, el a sigui sirbi den e palacio di Ciro. De facto, Daniel 10:1 ta bisa nos cu “den e di tres aña di Ciro, rey di Persia,” Jehova a revelá un asuntu notabel na Daniel. Si Daniel tabata un tiener tempu cu nan a hib’é Babilonia na aña 617 P.E.C., lo e mester tabatin casi 100 aña di edad ora el a ricibí e vision final ei. Esta un carera largu i bendicioná di sirbishi fiel na Jehova!

37. Ki lesnan nos por saca for di un consideracion di Daniel capítulo 1?

³⁷ E capítulo di introduccion dje buki di Daniel ta conta nos mas cu solamente un historia di cuater hóben fiel cu a pasa pruebanan di fe cu éxito. E ta mustra nos con Jehova por usa ken cu e kier pa logra su propósito. E relato ta duna prueba cu si Jehova permitié, asta loke por parce un calamidad, por sirbi un propósito probechoso. I e ta conta nos cu fieldad den cosnan chikitu ta trece un recompensa grandi.

KICO BO A SACA AFO?

• Kico nos por bisa dje antecedente di Daniel i su tres amigunan hóben?

• Con e excelente criansa dje cuater hóbennan hebreo a ser poné na prueba den Babilonia?

• Con Jehova a recompensá e cuater hebreonan pa e posicion di curashi cu nan a tuma?

• Ki lesnan sirbidó di Jehova djawe por siña for di Daniel i su tres compañeronan?

[Plachi di henter página 30]