Capitulo Diestres

Dos Rey na Conflicto cu Otro

 1, 2. Pakico nos mester ta interesá den e profecia registrá na Daniel capítulo 11?

DOS rey rival di otro ta lucha den un guera total pa supremacia. Segun cu añanan ta pasa, promé un ta logra alcansá un posicion dominante, despues e otro. Tabatin biaha cu un rey ta dominá, miéntras cu e otro ta bira inactivo, i tabatin periodonan sin conflicto. Pero e ora ei di ripiente un otro bataya ta explotá, i e conflicto ta sigui. Entre e participantenan dje drama aki tabatin e rey sirio Seleuco I Nicátor, rey egipcio Tolomeo Lago, e princesa sirio cu despues a bira reina egipcio Cleopatra I, e emperadornan romano Augusto i Tiberio, i reina Zenobia di Palmira. Segun cu e conflicto ta yega su fin, Alemania nazi, e bloke comunista, e Potencia Mundial Anglo-Americano, e Liga di Nacionnan i Nacionnan Uní, tambe tabata enbolbí. E final ta un episodio cu ningun dje entidadnan político aki a verwagt. E angel di Jehova a declará e profecia excitante aki na profeta Daniel un 2.500 aña pasá.—Daniel, capítulo 11.

² Ki emocioná Daniel lo mester tabata pa tende e angel revelá na dje e rivalidad entre dos futuro rey en detaye! E drama ta di interes pa nos tambe, pasobra e lucha pa poder entre e dos reynan ta extendé te den nos tempu. Ora nos mira con historia a demostrá cu e promé parti dje profecia a cumpli, nos fe i confiansa cu e último parti dje relato profético lo cumpli sigur, ta bira mas fuerte. Dor di presta atencion n’e profecia aki, nos lo haña un bista cla unda nos ta pará den e coriente di tempu. Tambe esaki lo fortificá nos determinacion pa keda neutral den e conflicto miéntras cu nos ta warda cu pacenshi pa Dios actua na nos fabor. (Salmo 146:3, 5) Laga nos scucha cu sumo atencion anto, miéntras cu e angel di Jehova ta papia cu Daniel.

CONTRA E REINO DI GRECIA

 3. Ken e angel a apoyá “den e promé aña di Dario e medo”?

³ E angel di: “Pa loke ta ami, den e promé aña di Dario e medo [539/538 P.E.C.], mi a lanta para como fortalecedó i como un lugá fortificá p’e.” (Daniel 11:1) Dario no tabata na bida mas, pero e angel a referí na su reinado como e punto di salida dje mensahe profético. Tabata e rey aki cu a manda saca Daniel for dje cueba di leon. Tambe Dario a decretá cu tur su súbditonan mester teme e Dios di Daniel. (Daniel 6:21-27) Sin embargo, e persona cu e angel a lanta para pa apoyá, no tabata Dario e medo, sino e angel su socio Miguel, e prins dje pueblo di Daniel. (Compará cu Daniel 10:12-14.) E angel di Dios a dun’é e apoyo aki, miéntras Miguel tabata bringa contra e prins demoño di Medo-Persia.

 4, 5. Ken tabata e cuater reynan di Persia cu Daniel a profetisá di dje?

⁴ E angel di Dios a sigui bisa: “Mira! Lo tin tres rey ainda cu lo lanta para pa Persia, i e di cuater lo acumulá rikesa mas grandi cu tur e otronan. I asina cu e bira fuerte den su rikesa, lo e lanta tur cos contra e reino di Grecia.” (Daniel 11:2) Ken precis e gobernantenan aki di Persia tabata?

⁵ E promé tres reynan tabata Ciro e Grandi, Cambises II i Dario I. Como cu Bardiya (of kisas un homber yamá Gaumata cu a pasa pa Bardiya) a reina pa shete luna so, e profecia a laga su reinado breve afó. Na aña 490 P.E.C., e di tres rey, Dario I, a purba invadí Grecia pa di dos biaha. Sin embargo, e personan a haña un derota aplastante na Máraton i a retirá bai Asia Menor. Aunke Dario a prepará cuidadosamente pa un campaña mas contra Grecia, e no a logra efectu’é promé cu su morto cuater aña despues. Esei a keda na su yu i sucesor, e di “cuater” rey, Hérhes I. Esaki tabata e rey Asuero cu a casa cu Ester.—Ester 1:1; 2:15-17.

 6, 7. (a) Con e di cuater rey a “lanta tur cos contra e reino di Grecia”? (b) Kico tabata resultado dje campaña di Hérhes contra Grecia?

⁶ En berdad Hérhes I a “lanta tur cos contra e reino di Grecia,” esta, contra e grupo di estadonan griego independiente. E buki The Medes and Persians—Conquerors and Diplomats (E Medo i Personan—Conkistadó i Diplomático), ta bisa: “Cortesanonan ambicioso a insta Hérhes pa lansa un atake via tera i laman.” Historiadó griego Herodoto, di siglo 5 P.E.C., ta skirbi cu “ningun otro expedicion por a surpasá e atake aki.” Su registro ta declará cu e tropanan naval “tabata 517.610 homber na tur. Tabatin 1.700.000 soldá na pia, 80.000 soldá riba cabai, na cua mester agregá e arabirnan cu a core riba kamel i e libionan cu a bringa den garoshi di guera, cu ami ta calculá tabata 20.000. Pues anto, e cantidad di soldá riba tera i laman contá huntu ta suma 2.317.610 homber.”

⁷ Como cu Hérhes I su meta tabata pa logra un conkista total, el a mobilisá su inmenso ehército contra Grecia na aña 480 P.E.C. E personan a superá un táctica griego pa retrasá nan na Termópilas, i a destruí Aténas. Pero na Salamina, nan a ricibí un derota teribel. Na aña 479 P.E.C. e griegonan a logra un otro victoria na Platea. Ningun dje shete reynan cu a sigui Hérhes riba trono dje Imperio di Persia durante e siguiente 143 añanan no a invadí Grecia. Pero despues a lanta un rey poderoso na Grecia.

UN REINO GRANDI PARTÍ NA CUATER

 8. Cua “rey poderoso” a lanta para, i con el a bin “goberná cu dominio extenso”?

⁸ E angel a bisa: “Un rey poderoso sigur lo lanta para i goberná cu dominio extenso i haci manera e kier.” (Daniel 11:3) Na aña 336 P.E.C., ora Alexander tabatin 20 aña, el a “lanta para” como rey di Macedonia. Di berdad el a bira “un rey poderoso,” Alexander e Grandi. Motivá dor di un plan di su tata, Filipo II, el a capturá e provincianan perso na Medio Oriente. Crusando e riunan Eufrátes i Tígris, su 47.000 hombernan a plama e tropanan di Dario III, cu a consistí di 250.000 soldá, na Gaugamela. Mas despues, Dario a hui i nan a asesin’é. Asina e dinastia di Persia a yega na su fin. Awor Grecia a bira e potencia mundial, i Alexander a ‘goberná cu dominio extenso i a haci manera e tabata kier.’

 9, 10. Con e profecia di cu Alexander su reino lo no bai pa su desendencia a resultá berdad?

⁹ Alexander su gobernacion riba mundu lo tabata breve, pasobra e angel di Dios a agregá: “Ora cu e lanta para, su reino lo ser kibrá i lo ser partí den direccion dje cuater bientunan di shelu, pero no na su desendencia i no segun su dominio cu cua el a goberná; pasobra lo ranca su reino saca cu rais, asta pa otronan cu no ta esakinan.” (Daniel 11:4) Alexander no tabatin ni 33 aña ainda ora cu malesa repentino a caba cu su bida na Babilonia na aña 323 P.E.C.

¹⁰ E inmenso imperio di Alexander no a pasa pa “su desendencia.” Su ruman homber Filipo III Arrideo a reina pa ménos cu shete aña i na aña 317 P.E.C., riba peticion di Olimpia, mama di Alexander, nan a asesin’é. Alexander su yu homber Alexander IV a goberná te aña 311 P.E.C., ora cu Casandro, un dje generalnan di su tata, a mat’é. Alexander su yu ilegítimo Herácles a trata na goberná den nomber di su tata, pero nan a asesin’é na aña 309 P.E.C. Asina e liña di Alexander a terminá, i “su dominio” a sali for di man di su famia.

11. Con Alexander su reino a ser “partí den direccion dje cuater bientunan di shelu”?

¹¹ Despues di Alexander su morto, su reino a “ser partí den direccion dje cuater bientunan.” Su hopi generalnan a pleita nan cu nan, segun cu nan tabata gara teritorio. General Antígono I, cu tabatin un wowo so, a purba trece henter Alexander su imperio bou di su control. Pero el a muri den bataya na Ipso, Frigia. Pa aña 301 P.E.C., cuater general di Alexander tabata na poder riba e inmenso teritorio cu nan comandante a conkistá. Casandro a goberná Macedonia i Grecia. Lisímaco a haña control riba Asia Menor i Tracia. Seleuco I Nicátor a sigurá Mesopotamia i Siria pa su mes. I Tolomeo Lago a tuma Egipto i Palestina. Manera e palabra profético a bisa, Alexander su gran imperio a keda partí den cuater reino helenístico.

DOS REY RIVAL TA SURGI

12, 13. (a) Con cuater reino helenístico a keda reducí na dos? (b) Cua dinastia Seleuco a establecé na Siria?

¹² Un par di aña despues di a bini na poder, Casandro a muri, i na aña 285 P.E.C., Lisímaco a tuma posesion dje parti europeo dje Imperio Griego. Na aña 281 P.E.C., Lisímaco a muri den bataya contra Seleuco I Nicátor, i esei a duna Seleuco control riba mayor parti dje teritorionan asiático. Antígono II Gonatas, nietu di un dje generalnan di Alexander, a subi trono di Macedonia na aña 276 P.E.C. Cu tempu, Macedonia a bira dependiente di Roma i finalmente a bira un provincia romano na aña 146 P.E.C.

¹³ Solamente dos dje cuater reinonan helenístico a keda prominente awor, unu bou di Seleuco I Nicátor i e otro bou di Tolomeo Lago. Seleuco a establecé e dinastia seléucido na Siria. Entre e stadnan cu el a funda tabatin Antiokia—capital nobo di Siria—i e haf di Seleucia. Mas despues apostel Pablo a siña hende na Antiokia, caminda pa promé biaha a yama e siguidónan di Jesus cristian. (Echonan 11:25, 26; 13:1-4) Nan a asesiná Seleuco na aña 281 P.E.C., pero su dinastia a sigui te cu aña 64 P.E.C., ora general romano Gnaeo Pompeyo a haci Siria un provincia romano.

14. Na ki tempu a establecé e dinastia tolemaico na Egipto?

¹⁴ Dje cuater reinonan helenístico, esun cu a dura mas largu tabata di Tolomeo Lago, of Tolomeo I, kende a asumí e título di rey na aña 305 P.E.C. E dinastia tolemaico cu el a establecé a sigui goberná Egipto te ora cu el a cai den man di Roma na aña 30 P.E.C.

15. Cua dos rey fuerte a surgi for dje cuater reinonan helenístico, i ki lucha nan a cuminsá?

¹⁵ Pues for dje cuater reinonan helenístico, a surgi dos rey fuerte: Seleuco I Nicátor riba Siria i Tolomeo I riba Egipto. Cu e dos reynan aki e lucha largu entre “e rey di nort” i “e rey di zuid,” describí den Daniel capítulo 11, a cuminsá. E angel di Jehova no a mencioná nomber dje reynan, pasobra e identidad i nacionalidad dje dos reynan aki lo a cambia atrabes di siglonan. E angel a laga detayenan innecesario afó i a mencioná solamente gobernante i sucesonan relacioná cu e conflicto.

E CONFLICTO TA CUMINSA

16. (a) E dos reynan tabata nort i zuid di ken? (b) Cua ta e promé reynan cu tabatin e papel di “e rey di nort” i “e rey di zuid”?

¹⁶ Scucha! Describiendo comienso dje conflicto dramático aki, e angel di Jehova ta bisa: “E rey di zuid lo bira fuerte, sí, un di [Alexander] su prinsnan; i [e rey di nort lo] prevalecé contra dje i sigur lo goberná cu dominio extenso mas grandi cu e poder di goberná di esun ei.” (Daniel 11:5) E denominacion “rey di nort” i “rey di zuid” ta referí na reynan nort i zuid dje pueblo di Daniel, cu pa e tempu ei ya caba tabata librá di cautiverio na Babilonia i restorá na e tera di Huda. E promé “rey di zuid” tabata Tolomeo I di Egipto. Un dje generalnan di Alexander cu a prevalecé contra Tolomeo I i cu a goberná “cu dominio extenso” tabata e rey sirio Seleuco I Nicátor. Ta e a asumí e papel di “e rey di nort.”

17. Na principio dje conflicto entre e rey di nort i e rey di zuid, bou di ken su dominio e tera di Huda tabata?

¹⁷ Na principio dje conflicto, e tera di Huda tabata bou di dominio dje rey di zuid. For di mas of ménos 320 P.E.C., Tolomeo I a influenciá hudiunan pa bini Egipto como colonisadó. Un colonia hudiu a florecé na Alexandria, caminda Tolomeo I a funda un biblioteca famoso. E hudiunan na Huda a keda bou di control di Egipto tolemaico, e rey di zuid, te cu aña 198 P.E.C.

18, 19. Den transcurso di tempu, con e dos reynan rival a drenta “un areglo hustu”?

¹⁸ Relacioná cu e dos reynan ei, e angel a profetisá: “Na fin di algun aña nan lo bira aliado di otro, i e yu muher mes dje rey di zuid lo bini cerca e rey di nort pa haci un areglo hustu. Pero e yu muher lo no retené e poder di su brasa; i e rey di nort lo no para, ni su brasa tampoco; i e yu muher lo ser entregá, e mes, i esnan cu a trec’é aden, i esun cu a causa su nacementu, i esun cu a hacié fuerte den e tempu ei.” (Daniel 11:6) Con esaki a tuma lugá?

¹⁹ E profecia a laga Antioco I afó, kende ta yu i sucesor di Seleuco I Nicátor, pasobra e no a hiba un guera decisivo contra e rey di zuid. Pero su sucesor Antioco II, a bringa un guera largu contra Tolomeo II, yu di Tolomeo I. Antioco II i Tolomeo II tabata respectivamente e rey di nort i e rey di zuid. Antioco II tabata casá cu Laodice, i nan tabatin un yu homber cu yama Seleuco II, miéntras cu Tolomeo II tabatin un yu muher cu yama Berenice. Na aña 250 P.E.C., e dos reynan aki a drenta “un areglo hustu.” Pa paga e prijs dje aliansa aki, Antioco II a divorciá di su esposa Laodice i a casa cu Berenice, “e yu muher mes dje rey di zuid.” El a haña un yu cuné cu a bira heredero dje trono di Siria na lugá dje yunan di Laodice.

20. (a) Den ki sentido Berenice su “brasa” no a para? (b) Den ki manera a entregá Berenice, i “esnan cu a trec’é aden” i “esun cu a hacié fuerte”? (c) Ken a bira rey di Siria despues cu Antioco II a perde “su brasa,” of poder?

²⁰ Berenice su “brasa,” es decir, e poder cu a apoy’é, tabata su tata, Tolomeo II. Ora el a muri na aña 246 P.E.C., Berenice no a “retené e poder di su brasa” cerca su esposo. Antioco II a rechas’é, a bolbe casa cu Laodice, i a nombra nan yu homber como su sucesor. Manera Laodice a planea, nan a asesiná Berenice i su yu. Evidentemente, e criánan cu a trece Berenice for di Egipto pa Siria, “esnan cu a trec’é aden,” a sufri e mésun fin. Laodice a asta venená Antioco II, i asina e rey di nort “su brasa,” of poder, tampoco ‘no a para.’ Pues anto, tantu Berenice su tata, “esun cu a causa su nacementu,” como su esposo sirio, esun cu temporalmente a hacié “fuerte,” a muri. Esaki a laga Seleuco II, yu di Laodice, como rey di Siria. Con e siguiente rey tolemaico lo a reaccioná riba tur esaki?

UN REY TA VENGA E ASESINATO DI SU RUMAN MUHER

21. (a) Ken tabata “un spruit” dje “rais” di Berenice, i con el a “lanta para”? (b) Con Tolomeo III a “bini contra e lugá fortificá dje rey di nort” i a prevalecé contra dje?

²¹ E angel a bisa: “Un spruit di e yu muher su rais sigur lo lanta para den su posicion, i lo e bini n’e forsa militar i bini contra e lugá fortificá dje rey di nort i sigur lo actua contra nan i prevalecé.” (Daniel 11:7) “Un spruit” di Berenice su “rais,” es decir di su mayornan, tabata su ruman homber. Ora su tata a muri, e ruman homber a “lanta para” como e rey di zuid, e fárao egipcio Tolomeo III. Unbes el a sali pa bai venga e asesinato di su ruman muher. El a marcha bai contra e rey sirio Seleuco II, cu Laodice a usa pa asesiná Berenice cu su yu homber, i a bini contra “e lugá fortificá dje rey di nort.” Tolomeo III a conkistá e parti fortificá di Antiokia i a mata Laodice. Bayendo den direccion oost dor di e teritorio dje rey di nort, el a plunder Babilonia i a sigui marcha bai India.

22. Kico Tolomeo III a trece bek for di Egipto, i pakico el a “para pa algun aña apartá for dje rey di nort”?

²² Kico a sosodé despues? E angel di Dios ta conta nos: “I tambe cu nan diosnan, cu nan imágennan bashá, cu nan artículonan deseabel di plata i di oro i cu e prezunan lo e bini Egipto. I e mes lo para pa algun aña apartá for dje rey di nort.” (Daniel 11:8) Mas cu 200 aña promé, e rey perso Cambises II a conkistá Egipto i a bai cas cu diosnan egipcio, “nan imágennan bashá.” Ora Tolomeo III a plunder Persia su ex-capital real Susa, el a recuperá e diosnan aki i a hiba nan ‘prezu’ na Egipto. Tambe el a trece masha hopi ‘artículo deseabel di plata i di oro’ bek como botin di guera. Tolomeo III a hañ’é ta bolbe bek Egipto pa dominá un lantamentu, i asina a “apartá for dje rey di nort,” dor di no caus’é mas daño.

E REY SIRIO TA TUMA REPRESAYA

23. Di con e rey di nort a “bai bek na su propio suela” despues di a drenta e reino dje rey di zuid?

²³ Con e rey di nort a reaccioná? E angel a bisa Daniel: “Realmente lo e drenta den e reino dje rey di zuid i bai bek na su propio suela.” (Daniel 11:9) E rey di nort—rey sirio Seleuco II—a atacá bek. El a drenta “e reino,” esta e teritorio, dje rey di zuid egipcio, pero a topa cu derota. Cu solamente un resto chikitu di su ehército, Seleuco II a “bai bek na su propio suela,” i a retirá na e capital sirio Antiokia rond di aña 242 P.E.C. Ora el a muri, su yu Seleuco III a siguié riba trono.

24. (a) Kico a pasa cu Seleuco III? (b) Con e rey sirio Antioco III a “bini i inundá i pasa dor” dje dominio dje rey di zuid?

²⁴ Kico Bijbel a pronosticá tocante e desendencia dje rey sirio Seleuco II? E angel a bisa Daniel: “Awor pa loke ta su yunan, nan lo excitá nan mes i realmente reuní huntu un multitud di gran forsa militar. I ora di bini, sigur lo e bini i inundá i pasa dor. Pero lo e bai bek, i lo e excitá su mes te ora cu e yega su lugá fortificá.” (Daniel 11:10) Den ménos cu tres aña, nan a asesiná Seleuco III i asina a pone fin na su reinado. Su ruman homber, Antioco III, a siguié riba trono di Siria. E yu homber aki di Seleuco II a reuní un gran forsa militar pa atacá e rey di zuid, cu pa e tempu ei tabata Tolomeo IV. E rey di nort nobo di Siria a bringa cu éxito contra Egipto i a reconkistá e haf di Seleucia, e provincia Coele-Siria, e stadnan Tiro i Tolemaida, i pueblonan bisiña. El a causa un derota aplastante na un ehército di rey Tolomeo IV, i a conkistá hopi stad di Huda. Den primavera di aña 217 P.E.C., Antioco III a sali for di Tolemaida i a bai nort ‘te ora cu el a yega na su lugá fortificá’ na Siria. Pero tabatin cambio na caminda.

E SITUACION TA BOLTU

25. Unda Tolomeo IV a topa Antioco III den bataya, i kico a ser ‘duná den man’ dje rey di zuid egipcio?

²⁵ Mescos cu Daniel, nos ta scucha yen di expectativa na loke e angel di Jehova ta sigui pronosticá: “E rey di zuid lo bira amargá i lo tin cu sali bai i bringa cuné, es decir, cu e rey di nort; i sigur lo e laga un multitud grandi lanta para, i realmente lo duna e multitud den man di esun ei.” (Daniel 11:11) Cu un tropa di 75.000 soldá, e rey di zuid, Tolomeo IV, a bai den direccion nort contra e enemigu. E rey di nort sirio, Antioco III, a reuní “un multitud grandi” di 68.000 soldá pa lanta contra dje. Pero a “duna e multitud den man” dje rey di zuid den bataya na e stad costero di Rafia, no muchu leu for dje frontera di Egipto.

26. (a) Cua “multitud” e rey di zuid a hiba cuné na e bataya na Rafia, i kico tabata e términonan dje tratado di pas cu nan a cera ei? (b) Den ki sentido Tolomeo IV ‘no a usa su posicion fuerte’? (c) Ken a bira e siguiente rey di zuid?

²⁶ E profecia ta sigui: “I sigur nan lo hiba e multitud bai cuné. Su curason lo bira halsá, i realmente lo e pone dies di miles cai; pero lo e no usa su posicion fuerte.” (Daniel 11:12) Tolomeo IV, e rey di zuid, a “hiba,” esta a mata, 10.000 di Siria su soldánan na pia i 300 di esnan riba cabai i a tuma 4.000 prezu. E ora ei e reynan a cera un pacto caminda Antioco III lo keda cu Seleucia, su haf sirio, pero lo perde Fenicia i Coele-Siria. Debí n’e victoria aki, curason dje rey di zuid egipcio a “bira halsá,” foral contra Jehova. Huda a keda bou di control di Tolomeo IV. Sin embargo, e no a “usa su posicion fuerte” pa sigui traha riba su victoria contra e rey di nort sirio. En bes di esei, Tolomeo IV a bai hiba un bida di libertinahe, i su yu di cincu aña, Tolomeo V, a bira e siguiente rey di zuid, algun aña promé cu morto di Antioco III.

E HACIDO DI HAZAÑA TA REGRESA

27. Con e rey di nort a bolbe “na fin dje tempunan” pa recuperá teritorio for di Egipto?

²⁷ Debí na tur su hazañanan, Antioco III a haña e nomber Antioco e Grandi. E angel a bisa di dje: “E rey di nort tin cu bolbe i establecé un multitud mas grandi cu esun promé; i na fin dje tempunan, algun aña, lo e bini, haciendo esei cu un gran forsa militar i cu un gran cantidad di producto.” (Daniel 11:13) E “tempunan” aki tabata 16 aña of mas, despues cu e egipcionan a derotá e sirionan na Rafia. Ora e hóben Tolomeo V a bira rey di zuid, Antioco III a sali cu “un multitud mas grandi cu esun promé,” pa recuperá e teritorionan cu el a perde den man dje rey di zuid egipcio. Cu e meta ei, el a uni forsa cu rey Filipo V di Macedonia.

28. Ki problema e rey hóben di zuid tabatin?

²⁸ Tambe e rey di zuid tabatin problema den su reino. Segun e angel, “den e tempu ei lo tin hopi cu lo lanta para contra e rey di zuid.” (Daniel 11:14a) En berdad, hopi a “lanta para contra e rey di zuid.” Ademas di enfrentá e tropanan di Antioco III i su aliado di Macedonia, e rey hóben di zuid tabatin problema na cas na Egipto. Debí n’e manera arogante cu su tutor Agátocles, kende a goberná den su nomber, a trata e egipcionan, hopi di nan a rebelá. E angel a agregá: “I e yunan dje atracadónan cu ta pertenecé na bo pueblo, di nan parti, lo ser hibá pa purba realisá un vision; i nan lo tin cu trompecá.” (Daniel 11:14b) Asta algun hende dje pueblo di Daniel a bira ‘yunan di atracadó,’ esta revolucionarionan. Pero cualkier “vision” cu e hombernan hudiu ei tabatin di caba cu dominacion gentil riba nan patria tabata falsu, i nan lo a fracasá, esta “trompecá.”

29, 30. (a) Con “e brasanan di zuid” a cai p’e atake for di nort? (b) Con e rey di nort a logra “para den e pais di Decoracion”?

²⁹ Ademas e angel di Jehova a pronosticá: “E rey di nort lo bini i lanta un tranké di sitia i realmente capturá un stad cu fortificacionnan. I pa loke ta e brasanan di zuid, nan lo no para, ni e pueblo di su scogínan; i lo no tin poder pa keda para. I esun cu ta bini contra dje lo haci manera e kier, i lo no tin ningun ta para su dilanti. I lo e para den e pais di Decoracion, i lo tin exterminacion den su man.”—Daniel 11:15, 16.

³⁰ Forsanan militar bou di Tolomeo V, of “e brasanan di zuid,” a cai p’e atake for di nort. Na Paneas (Cesarea di Filipo), Antioco III a pone Egipto su general Scopas i 10.000 homber selecto, of su “scogínan,” drenta Sidon, “un stad cu fortificacionnan.” Ei Antioco III a “lanta un tranké di sitia,” i a conkistá e haf fenicio na aña 198 P.E.C. El a actua “manera e kier,” debí cu e tropanan dje rey di zuid egipcio no por a para su dilanti. E ora ei Antioco III a marcha bai contra Jerusalem, capital di “e pais di Decoracion,” Huda. Na aña 198 P.E.C., Jerusalem i Huda a sali for di bou dje dominacion dje rey di zuid egipcio i a bai pa esun dje rey di nort sirio. I Antioco III, e rey di nort, a cuminsá “para den e pais di Decoracion.” Tabatin “exterminacion den su man” pa tur hudiu i egipcio cu a opon’é. Pa cuantu tempu e rey aki lo por a haci manera e tabata kier?

ROMA TA RESTRINGI E HACIDO DI HAZAÑA

31, 32. Pakico e rey di nort al final tog a cera “términonan hustu” di pas cu e rey di zuid?

³¹ E angel di Jehova ta duna nos e contesta aki: “[E rey di nort lo] pone su cara pa bini cu e vigor di henter su reino, i lo e tin términonan hustu huntu cuné; i lo e actua eficasmente. I pa loke ta trata e yu muher di hende muher, lo ser duná na dje pa ruiná e yu muher. I e yu muher lo no para, i lo e no sigui ta di dje.”—Daniel 11:17.

³² E rey di nort, Antioco III, a “pone su cara” pa dominá Egipto “cu e vigor di henter su reino.” Pero al final tog el a cera “términonan hustu” di pas cu Tolomeo V, e rey di zuid. E exigencianan di Roma a pone Antioco III cambia su plan. Ora e cu rey Filipo V di Macedonia a uni contra e rey egipcio hóben pa conkistá su teritorionan, e tutornan di Tolomeo V a acudí na Roma pa proteccion. Roma a probechá dje oportunidad pa expandé su campo di influencia, i a mustra nan su poder militar.

33. (a) Kico tabata e términonan di pas entre Antioco III i Tolomeo V? (b) Kico tabata e propósito dje matrimonio entre Cleopatra I i Tolomeo V, i di con e complot a fracasá?

³³ Obligá dor di Roma, Antioco III a trece términonan di pas pa e rey di zuid. En bes di entregá e teritorionan conkistá bek, manera Roma a exigí, Antioco III a planea pa haci un transferencia nominal di nan, dor di laga su yu muher Cleopatra I—“e yu muher di hende muher”—casa cu Tolomeo V. Como su bruidschat nan lo a duna algun provincia, entre nan Huda, “e pais di Decoracion.” Sin embargo, na e matrimonio na aña 193 P.E.C., e rey sirio no a laga e provincianan aki bai pa Tolomeo V. Esaki tabata un matrimonio político, cu tabatin e meta di someté Egipto na Siria. Pero e complot a fracasá, pasobra Cleopatra I ‘no a sigui ta di dje,’ ya cu despues el a tuma parti pa su esposo. Ora guera a start entre Antioco III i e romanonan, Egipto a tuma parti pa Roma.

34, 35. (a) E rey di nort a bira su cara pa cua “paisnan na costa”? (b) Con Roma a pone un fin na “e desonra” causá dor dje rey di nort? (c) Con Antioco III a muri, i ken a bira e siguiente rey di nort?

³⁴ Refiriendo na e contratempunan cu e rey di nort a pasa aden, e angel a agregá: “I [Antioco III] lo bira su cara bek n’e paisnan na costa i realmente lo capturá hopi. I un comandante [Roma] lo tin cu laga e desonra cu ta bini di dje stop pa su mes [Roma], pa su desonra [causá dor di Antioco III] no t’ei. [Roma lo] laga e desonra bolbe bek riba esun ei. I [Antioco III lo] bira su cara bek na e lugánan fortificá di su propio pais, i sigur lo e trompecá i cai, i lo no hañ’é.”—Daniel 11:18, 19.

³⁵ E “paisnan na costa” tabata Macedonia, Grecia i Asia Menor. Un guera a start na Grecia na aña 192 P.E.C., i nan a inducí Antioco III pa bini Grecia. Roma tabata malcontentu cu e rey sirio su intento pa capturá mas teritorio einan, i p’esei a declará guera contra dje formalmente. Na Termópilas el a sufri un derota na man di Roma. Rond di un aña despues di a perde e bataya di Magnesia na aña 190 P.E.C., e mester a entregá tur teritorio bek na Grecia, Asia Menor i na áreanan west di cerunan Tauro. Roma a exigí un tributo pisá i a establecé su dominacion riba e rey di nort sirio. Como cu nan a sak’é for di Grecia i Asia Menor i despues cu el a perde casi henter su flota, Antioco III a “bira su cara bek na e lugánan fortificá di su propio pais,” Siria. E romanonan a ‘laga e desonra di dje contra nan bolbe bek riba e mes.’ Antioco III a muri na aña 187 P.E.C., durante un intento pa horta un tempel na Elymais, Persia. Asina el a “cai,” esta a muri, i su yu Seleuco IV, a subi trono como e siguiente rey di nort.

E CONFLICTO TA SIGUI

36. (a) Con e rey di zuid a purba sigui cu e lucha, pero kico a para di dje? (b) Con Seleuco IV a cai, i ken a siguié riba trono?

³⁶ Como rey di zuid, Tolomeo V a purba haña e provincianan cu lo mester a bira di dje como bruidschat di Cleopatra, pero nan a venen’é mata. Tolomeo VI a siguié riba trono. Kico di Seleuco IV? E tabatin mester di placa pa paga e tributo pisá cu e tabata debe Roma. P’esei el a manda su tesorero Heliodoro coge e rikesanan cu hende a bisa tabatin wardá den e tempel di Jerusalem. Como cu Heliodoro tabata kier e trono, el a asesiná Seleuco IV. Sin embargo, rey Eumenes di Pérgamo i su ruman Atalo a laga entronisá Antioco IV (Antioco Epifanes), ruman homber dje rey asesiná.

37. (a) Con Antioco IV a purba demostrá cu e ta mas poderoso cu Jehova Dios? (b) Na kico e profanacion dje tempel na Jerusalem, na man di Antioco IV, a hiba?

³⁷ E rey di nort nobo, Antioco IV, a busca manera pa demostrá cu e ta mas poderoso cu Dios, dor di purba eradicá Jehova su areglo di adoracion. Pa desafiá Jehova, el a dedicá e tempel di Jerusalem na Zeus of Jupiter. Na december aña 167 P.E.C., nan a lanta un altar pagano riba e altar grandi den patio dje tempel caminda ántes tabata haci ofrenda kimá diariamente na Jehova. Dies dia despues, nan a ofrecé sacrificio na Zeus riba e altar pagano. E profanacion aki a causa un rebelion hudiu bou di guia dje macabeonan. Antioco IV a bringa contra nan pa tres aña. Na aña 164 P.E.C., riba aniversario dje profanacion, Hudas Macabeo a rededicá e tempel na Jehova i asina a instituí e fiesta di dedicacion, esta, Hanuká.—Juan 10:22.

38. Con e gobernacion macabeo a yega na su fin?

³⁸ Ta probabel cu e macabeonan a cera un pacto cu Roma na aña 161 P.E.C., i a establecé un reino na aña 104 P.E.C. Pero e friccion entre nan i e rey di nort sirio a sigui. Finalmente, nan a pidi Roma pa intervení. E general romano Gnaeo Pompeyo a conkistá Jerusalem na aña 63 P.E.C., despues di a siti’é pa tres luna. Na aña 39 P.E.C., e senado romano a nombra Herodes—un edomita—como rey di Hudea. El a conkistá Jerusalem na aña 37 P.E.C. i asina a pone fin na e gobernacion macabeo.

39. Con bo a beneficiá dje consideracion di Daniel 11:1-19?

³⁹ Esta emocionante pa mira e promé parti dje profecia dje dos reynan den conflicto cumpli en detaye! Sí, ta ki excitante pa wak bek den e historia dje 500 añanan cu a sigui despues cu a entregá e mensahe profético na Daniel, i identificá e gobernantenan cu a ocupá e puesto dje rey di nort i dje rey di zuid! Sin embargo, e identidad político dje dos reynan aki ta cambia segun cu e bataya entre nan ta sigui durante e tempu cu Jesucristo a cana riba tera i te den nos dia. Dor di cuadra desaroyonan histórico cu detayenan intrigante revelá den e profecia aki, nos lo por identificá e dos reynan aki na guera cu otro.

KICO BO A SACA AFO?

• Cua dos dinastia di reynan fuerte a surgi for dje reinonan helenístico, i ki lucha e reynan a cuminsá cuné?

• Manera Daniel 11:6 a pronosticá, con e dos reynan a drenta “un areglo hustu”?

• Con e conflicto a desaroyá entre

Seleuco II i Tolomeo III (Daniel 11:7-9)?

Antioco III i Tolomeo IV (Daniel 11:10-12)?

Antioco III i Tolomeo V (Daniel 11:13-16)?

• Kico tabata e propósito dje matrimonio entre Cleopatra I i Tolomeo V, i di con e complot a fracasá (Daniel 11:17-19)?

• Ki beneficio bo a saca dor di presta atencion na Daniel 11:1-19?

[Tabèl/Plachi na página 228]

REYNAN DEN DANIEL 11:5-19

Daniel 11:5 Seleuco I Nicátor Tolomeo I

Daniel 11:7-9 Seleuco II Tolomeo III

Daniel 11:10-12 Antioco III Tolomeo IV

[Plachi]

Moneda cu cara di Tolomeo II i su esposa

[Plachi]

Seleuco I Nicátor

[Plachi]

Antioco III

[Plachi]

Tolomeo VI

[Plachi]

Tolomeo III i su sucesornan a construí e tempel aki di Hórus na Idfu, Egipto Ariba

[Mapa/Plachi na página 216, 217]

(Pa e teksto den su formato kompleto, wak e publikshon)

E denominacion “rey di nort” i “rey di zuid” ta referí na reynan nort i zuid dje tera dje pueblo di Daniel

MACEDONIA

GRECIA

ASIA MENOR

ISRAEL

LIBIA

EGIPTO

ETIOPIA

SIRIA

Babilonia

ARABIA

[Plachi]

Tolomeo II

[Plachi]

Antioco e Grandi

[Plachi]

Un tabla di piedra cu decretonan oficial emití pa Antioco e Grandi

[Plachi]

Moneda cu cara di Tolomeo V

[Plachi]

Porta di Tolomeo III, na Karnak, Egipto

[Plachi di henter página 210]

[Plachi na página 215]

Seleuco I Nicátor

[Plachi na página 218]

Tolomeo I