Capitulo Diescuater

E Dos Reynan Ta Cambia di Identidad

 1, 2. (a) Kico a pone Antioco IV baha cabes p’e exigencianan di Roma? (b) Na ki tempu Siria a bira un provincia romano?

E MONARCA sirio Antioco IV ta invadí Egipto i ta coroná su mes como su rey. Riba peticion dje rey egipcio Tolomeo VI, Roma ta manda embahador Cayo Popilio Laenas na Egipto. E ta yega compañá pa un flota impresionante i cu ordu di senado romano pa Antioco IV renunciá su reinado riba Egipto i retirá for dje pais. Na Eleusis, un suburbio di Alexandria, e rey sirio i e embahador romano ta topa cara-cara. Antioco IV ta pidi tempu pa consultá cu su conseheronan, pero Laenas ta hala un ronchi riba suela rond dje rey i ta bis’é pa contestá promé cu e crusa e liña. Humiyá, Antioco IV ta cumpli cu e exigencianan romano i ta regresá Siria na aña 168 P.E.C. Asina e confrontacion entre e rey di nort sirio i e rey di zuid egipcio ta terminá.

² Roma, hungando un papel dominante den asuntunan di Medio Oriente, ta sigui manda riba Siria. P’esei, maske otro reynan dje dinastia seléucido ta sigui goberná Siria despues cu Antioco IV ta muri na aña 163 P.E.C., nan no ta ocupá e posicion di “e rey di nort.” (Daniel 11:15) Finalmente Siria ta bira un provincia romano na aña 64 P.E.C.

 3. Na ki tempu i con Roma a logra dominá Egipto?

³ E dinastia tolemaico di Egipto sí ta sigui mantené e posicion di “rey di zuid” pa un poco mas cu 130 aña despues di morto di Antioco IV. (Daniel 11:14) Durante e bataya di Accio, na aña 31 P.E.C., e gobernante romano Octavio ta derotá e forsanan combiná dje último reina tolemaico—Cleopatra VII—i su amante romano, Marco Antonio. Despues cu Cleopatra cometé suicidio e siguiente aña, Egipto tambe ta bira un provincia romano i no ta hunga e papel di rey di zuid mas. Pa aña 30 P.E.C., Roma tin supremacia riba tantu Siria como Egipto. Nos mester verwagt awor cu otro gobiernunan ta asumí e papel di rey di nort i rey di zuid?

UN REY NOBO TA MANDA “UN EXIGIDÓ”

 4. Pakico nos por verwagt cu un otro entidad na mando lo a asumí e identidad di rey di nort?

⁴ Den primavera di aña 33 E.C., Jesucristo a bisa su disipelnan: “Ora boso haña bista dje cos repugnante cu ta causa desolacion, manera Daniel e profeta a papia di dje, pará den un lugá santu, . . . e ora ei laga esnan cu ta den Hudea cuminsá hui p’e cerunan.” (Mateo 24:15, 16) Citando Daniel 11:31, Jesus a spierta su siguidónan tocante un futuro “cos repugnante cu ta causa desolacion.” Jesus a duna e profecia aki relacioná cu e rey di nort un 195 aña despues di morto di Antioco IV, e último rey sirio cu a hunga e papel ei. Ta sigur anto cu un otro entidad gubernamental lo tabatin cu asumí e identidad dje rey di nort. Ken esei lo tabata?

 5. Ken a lanta para como rey di nort, tumando e posicion cu un tempu Antioco IV tabatin?

⁵ E angel di Jehova Dios a profetisá: “Den su posicion [esta di Antioco IV] unu tin cu lanta para cu ta laga un exigidó pasa dor dje reino espléndido, i lo kibr’é den un par di dia, pero no den rabia ni den guera.” (Daniel 11:20) Esun cu a “lanta para” den e manera aki a resultá di ta e promé emperador romano Octavio, conocí como César Augusto.—Mira e cuadro “Unu Onrá, e Otro Despreciá,” na página 248.

 6. (a) Na ki tempu a laga “un exigidó” pasa dor “dje reino espléndido,” i di con esaki ta significativo? (b) Pakico nos por bisa cu Augusto no a muri “den rabia ni den guera”? (c) Ki cambio a tuma lugá den e identidad dje rey di nort?

⁶ “E reino espléndido” di Augusto a incluí “e pais di Decoracion,” esta, e provincia romano di Hudea. (Daniel 11:16) Na aña 2 P.E.C., Augusto a manda “un exigidó” dor di ordená un inscripcion of censo, probablemente di manera cu e por a haña sa e cantidad dje poblacion pa asuntu di belasting i pa reclutacion militar. Debí n’e decreto aki, José cu Maria a biaha bai Betlehem pa inscribí, loke a pone cu Jesus a nace na e lugá profetisá ei. (Mikéas 5:2; Mateo 2:1-12) Na augustus aña 14 E.C.—“den un par di dia,” esta, no hopi tempu despues dje decreto pa inscribí—Augusto a muri na edad di 76 aña, “no den rabia” na man di un asesino, ni “den guera,” sino debí na malesa. En berdad e rey di nort a cambia di identidad! Pa awor e rey aki a bira e Imperio Romano den persona di su emperadornan.

‘ESUN DESPRECIA TA LANTA PARA’

 7, 8. (a) Ken a lanta para den e posicion di Augusto como rey di nort? (b) Di con “e dignidad di e reino” a ser otorgá di mala gana n’e sucesor di César Augusto?

⁷ E angel ta sigui conta e profecia, bisando: “Den [Augusto] su posicion unu cu lo ser despreciá tin cu lanta para, i sigur nan lo no pone e dignidad di e reino riba dje; i realmente lo e drenta durante un tempu liber di preocupacion i lo haña gara di e reino cu labiamentu. I pa loke ta trata e brasanan dje inundacion, nan lo ser inundá pa causa di dje, i lo kibra nan; i tambe e Lider di e pacto.”—Daniel 11:21, 22.

⁸ Esun “cu lo ser despreciá” tabata Tiberio César, yu di Livia, Augusto su di tres casá. (Mira “Unu Onrá, e Otro Despreciá,” na página 248.) Augusto a odia e yu di criansa aki debí na su mal característicanan, i no tabata kier p’e bira e siguiente César. Nan a dun’é “e dignidad di e reino” di mala gana, i solamente despues cu tur otro posibel sucesor a muri. Augusto a adoptá Tiberio na aña 4 E.C., i a hacié heredero dje trono. Despues di morto di Augusto, Tiberio di 54 aña—esun despreciá—a “lanta para,” i a asumí poder como emperador romano i e rey di nort.

 9. Con Tiberio a “haña gara di e reino cu labiamentu”?

⁹ Segun The New Encyclopædia Britannica, “Tiberio a hunga política cu senado i pa casi un luna [despues cu Augusto a muri] e no a permití senado nombr’é como emperador.” El a bisa senado cu fuera di Augusto, ningun hende no tabata capas pa hiba e carga di goberná e Imperio Romano. El a pidi e senadornan pa restorá e república dor di confia e autoridad di goberná na un grupo di homber en bes di na un solo homber. Historiadó Will Durant a skirbi: “Senado no a tribi bai tras di loke el a bisa, p’esei nan a gaña buig p’e, i e pa nan, te ora cu finalmente el a aceptá pa asumí poder.” Durant a agregá: “Tur dos banda a hunga nan wega bon. Tiberio tabata kier a bira emperador di Roma masha bon, sino lo el a haña un manera pa nan no nombr’é como tal. Senado tabatin miedu di Tiberio i a odi’é, pero nan no a tribi reestablecé un república, manera esun anterior, basá riba asambleanan cu teoréticamente ta soberano.” Asina Tiberio a “haña gara di e reino cu labiamentu.”

10. Con a ‘kibra e brasanan dje inundacion’?

¹⁰ “Pa loke ta trata e brasanan dje inundacion”—e forsanan militar dje reinonan alrededor—e angel a bisa: ‘Nan lo ser inundá i lo kibra nan.’ Ora Tiberio a bira e rey di nort, su subrino Germánico César tabata comandante dje tropanan romano na riu Rijn. Na aña 15 E.C., Germánico a dirigí su ehército contra e héroe aleman Arminio, i a logra un poco éxito. Sin embargo, na comparacion cu e victorianan limitá ei, nan a perde hopi, i despues di esei Tiberio a para tur accion na Alemania. Na lugá di esei, el a instigá guera civil na Alemania i asina a purba stroba e tribunan aleman di uni. Por lo general Tiberio tabata pro un política exterior defensivo i a enfocá riba fortalecé e fronteranan. E política aki tabatin basta éxito. Den e manera aki el a controlá “e brasanan dje inundacion” i a “kibra” nan.

11. Con a ‘kibra e Lider dje pacto’?

¹¹ Tambe a ‘kibra e Lider di e pacto’ cu Jehova Dios a cera cu Abraham pa e bendicion di tur famia di tera. Jesucristo tabata e Simia di Abraham, primintí den e pacto ei. (Génesis 22:18; Galationan 3:16) Dia 14 di nísan 33 E.C., Jesus a para dilanti Poncio Pilato den e palacio dje gobernadó romano na Jerusalem. E sacerdotenan hudiu a acusá Jesus di traicion contra emperador. Pero Jesus a bisa Pilato: “Mi reino no ta parti dje mundu aki. . . . Mi reino no ta dje fuente aki.” Pero e hudiunan no tabata kier pa e gobernadó romano libra Jesus, kende no tabatin niun falta, i p’esei nan a grita: “Si bo pone e homber aki den libertad, bo no ta amigu di César. Tur hende cu haci su mes un rey ta papia contra César.” Despues di a grita pidi pa ehecutá Jesus, nan di: “Nos no tin mas rey cu César.” Segun e ley di ‘mahestad ofendí,’ cu Tiberio a expandé pa incluí casi cualkier insulto contra César, Pilato a entregá Jesus pa ser ‘kibrá,’ of clabá na un staca di tormento.—Juan 18:36; 19:12-16; Marco 15:14-20.

UN TIRANO ‘TA TRAMA SU COMPLOTNAN’

12. (a) Ken a bira aliado di Tiberio? (b) Con Tiberio a “bira poderoso mediante un nacion chikitu”?

¹² E angel a sigui profetisá tocante Tiberio, bisando: “Dor cu nan ta bira aliado cuné, lo e hiba a cabo un engaño i realmente subi i bira poderoso mediante un nacion chikitu.” (Daniel 11:23) Segun e constitucion, miembronan di senado romano a “bira aliado” di Tiberio, i pa formalidad el a dependé riba nan. Pero e tabata tramposo, i en berdad a bira “poderoso mediante un nacion chikitu.” E nacion chikitu ei tabata e Guardia Pretoriano romano, cu tabatin nan campamentu pegá cu e murayanan di Roma. Nan tabata asina cerca dje stad, cu nan a intimidá senado, i a yuda Tiberio controlá cualkier lantamentu contra su autoridad den e poblacion. P’esei, Tiberio a keda poderoso cu yudansa di un 10.000 guardia.

13. Den kico Tiberio a surpasá su antepasadonan?

¹³ E angel a agregá proféticamente: “Durante e tempu liber di preocupacion, lo e drenta asta den e parti vet dje distrito hurisdiccional i realmente haci loke su tatanan i tata di su tatanan no a haci. Cosnan hortá i botin i mercancia lo e plama entre nan; i lo e trama su complotnan contra lugánan fortificá, pero solamente te na un tempu.” (Daniel 11:24) Tiberio tabata masha desconfiá mes, i durante su reinado el a ordená yen di asesinato. Principalmente debí n’e influencia di Sejano, comandante dje Guardia Pretoriano, e último parti di su reinado tabata caracterisá pa teror. Finalmente, Sejano mes a cai bou di sospecho i Tiberio a laga ehecut’é. Pa loke ta tiranisá hende, Tiberio a surpasá su antepasadonan.

14. (a) Con Tiberio a plama “cosnan hortá i botin i mercancia” den tur e provincianan romano? (b) Pa tempu cu Tiberio a muri, con hende a mir’é?

¹⁴ Sin embargo, Tiberio a plama “cosnan hortá, botin i mercancia” den tur e provincianan romano. Pa ora el a muri, tur su súbditonan tabata gosa di prosperidad. Belasting no tabata pisá, i Tiberio por tabata generoso cu hende den áreanan cu tabata pasa den tempu difícil. Si soldá of funcionarionan a oprimí cualkier hende of a fomentá iregularidad den maneho di asuntunan, nan por a verwagt vengansa dje emperador. Un gara firme riba poder a mantené siguridad público, i un mihó sistema den e red di comunicacion a beneficiá comercio. Tiberio a haci sigur cu hende tabata administrá asuntunan di manera imparcial i constante, tantu paden como pafó di Roma. A drecha leynan, i a mehorá códigonan social i moral dor di promové reformanan cu César Augusto a instituí. Sin embargo, Tiberio ‘a trama su complotnan,’ di manera cu historiadó romano Tácito a describié como un homber hipócrita, cu tabata masha ábil den duna un aparencia falsu. Pa ora cu el a muri na mart di aña 37 E.C., hende a considerá Tiberio un tirano.

15. Con a bai cu Roma den e último parti di promé siglo i na principio di siglo 2 E.C.?

¹⁵ E sucesornan di Tiberio cu a cumpli cu e papel di rey di nort tabata, entre otro, Cayo César (Caligula), Claudio I, Nero, Vespasiano, Tito, Domiciano, Nerva, Trajano i Adriano. Segun The New Encyclopædia Britannica, “mayoria dje sucesornan di Augusto a sigui cu su política administrativo i su programa di construccion, aunke cu ménos innovacion pero cu mas exhibicion grandioso.” E enciclopedia ta sigui mustra: “Den e último parti di promé siglo i principio di siglo 2, Roma tabata na e cumbre di su splendor i poblacion.” Aunke durante e tempu aki Roma tabatin un poco problema n’e fronteranan dje imperio, su confrontacion pronosticá contra e rey di zuid, a tuma lugá te na siglo 3 E.C.

E TA LANTA CONTRA E REY DI ZUID

16, 17. (a) Ken a asumí e papel di rey di nort cu Daniel 11:25 ta referí na dje? (b) Ken a bin ocupá e posicion di rey di zuid, i con esaki a sosodé?

¹⁶ E angel di Dios a sigui conta e profecia, bisando: “[E rey di nort lo] lanta su poder i su curason contra e rey di zuid cu un gran forsa militar; i e rey di zuid, di su parti, lo excitá su mes pa e guera cu un forsa militar sumamente grandi i poderoso. I [e rey di nort lo] no para, debí cu nan lo trama complot contra dje. I esnan mes cu ta come su alimentonan exkisito lo causa su kibramentu. I pa loke ta su forsa militar, lo e ser hibá dor di inundacion, i sigur hopi lo cai morto.”—Daniel 11:25, 26.

¹⁷ Rond di 300 aña despues cu Octavio a haci Egipto un provincia romano, emperador romano Aureliano a asumí e papel di rey di nort. Miéntras tantu, reina Septimia Zenobia dje colonia romano Palmira, a ocupá e posicion di rey di zuid.a (Mira “Zenobia—E Reina Guerero di Palmira,” na página 252.) E ehército di Palmira a ocupá Egipto na aña 269 E.C., bou dje pretexto di sigur’é pa Roma. Zenobia kier a haci Palmira e stad dominante den oriente i kier a goberná riba Roma su provincianan parti oost. Alarmá debí na Zenobia su ambicion, Aureliano a lanta “su poder i su curason” pa actua contra Zenobia.

18. Kico tabata e resultado dje conflicto entre emperador Aureliano, e rey di nort, i reina Zenobia, e rey di zuid?

¹⁸ Como e entidad na mando, encabesá pa Zenobia, e rey di zuid a “excitá su mes” pa guera contra e rey di nort “cu un forsa militar sumamente grandi i poderoso” bou di dos general, Zabdas i Zabai. Pero Aureliano a conkistá Egipto i despues a lansa un expedicion bai te den Asia Menor i Siria. Nan a derotá Zenobia na Emesa (awor Homs). Despues di esei Zenobia a retirá bai Palmira. Ora Aureliano a sitia e stad ei, Zenobia a defend’é balentemente, pero sin éxito. El a hui bai cu su yu den direccion di Persia, pero tog e romanonan a capturá nan na riu Eufrátes. E hendenan di Palmira a entregá nan stad na aña 272 E.C. Aureliano a spar Zenobia, i a hacié e atraccion principal di su procesion triunfal dor di Roma na aña 274 E.C. Zenobia a pasa e resto di su bida como un dama romano di alto rango.

19. Con Aureliano a cai ‘debí na complotnan contra dje’?

¹⁹ Aureliano mes ‘no a keda para debí na complotnan contra dje.’ Na aña 275 E.C., el a sali riba un expedicion contra e personan. Miéntras e tabata warda na Tracia pa e oportunidad di crusa e canal pa drenta Asia Menor, esnan cu ‘a come su alimento’ a trama complot contra dje i a causa su “kibramentu.” E tabata bai pidi cuenta di su secretario Eros pa cierto iregularidad. Sin embargo, Eros a traha un lista falsu cu nomber di cierto oficialnan marcá pa muri. Ora e oficialnan a mira e lista aki, nan a planea pa asesiná Aureliano i a mat’é.

20. Con e “forsa militar” dje rey di nort a ser “hibá dor di inundacion”?

²⁰ Ora emperador Aureliano a muri, esei no a nificá fin dje carera dje rey di nort. Otro gobernantenan romano a siguié. Pa un tempu, e imperio tabatin un emperador na west i unu na oost. Bou di mando dje hombernan aki e “forsa militar” dje rey di nort a ser “hibá dor di inundacion,” of ‘a plama,’b i hopi hende a “cai morto” debí n’e invasionnan dje tribunan germano for di nort. E góticonan a pasa e fronteranan romano den siglo 4 E.C. Invasionnan a sigui un tras di otro. Na aña 476 E.C., e lider aleman Odoacro a kita e último emperador cu a goberná for di Roma. Pa comienso di siglo 6, e Imperio Romano den parti west tabata destruí, i reynan aleman a goberná Britania, Galia (Francia), Italia, Nort Africa i Spaña. E parti oost dje imperio a dura te den siglo 15.

UN IMPERIO GRANDI TA SER DIVIDI

21, 22. Ki cambionan Constantino a trece den siglo 4 E.C.?

²¹ E angel di Jehova no ta duna detayenan innecesario tocante e colapso dje Imperio Romano, cu a extendé pa siglonan. El a sigui pronosticá mas hazaña dje rey di nort i e rey di zuid. Sin embargo, un repaso breve di cierto desaroyonan den e Imperio Romano lo yuda nos identificá e dos reynan rival di otro den tempu mas despues.

²² Den siglo 4, emperador romano Constantino a duna cristiandad apóstata reconocimentu di Estado. Asta el a convocá un concilio eclesiástico na Nicea, Asia Menor, na aña 325 E.C., i e mes a presidié. Despues, Constantino a muda e residencia imperial for di Roma pa Bizancio, of Constantinopla, i a haci e stad ei su capital nobo. E Imperio Romano a keda bou di gobernacion di un solo emperador te na morto di emperador Teodosio I, dia 17 di januari 395 E.C.

23. (a) Con e Imperio Romano a parti despues di morto di Teodosio? (b) Na ki tempu e Imperio Oriental a yega na un fin? (c) Ken tabata goberná Egipto na 1517?

²³ Despues di morto di Teodosio, e Imperio Romano a keda partí entre su yunan. Honorio a ricibí e parti west, i Arcadio e parti oost, cu Constantinopla como su capital. Britania, Galia, Italia, Spaña i Nort Africa tabata entre e provincianan dje division west. Macedonia, Tracia, Asia Menor, Siria i Egipto tabata provincianan dje division oost. Na aña 642 E.C., e capital di Egipto, Alexandria, a cai den man dje saracenenan (arabirnan), i Egipto a bira un provincia dje califanan. Na januari 1449, Constantino XI a bira e último emperador di oriente. Turconan ottoman bou di mando dje sultan Mehmed II a conkistá Constantinopla dia 29 di mei 1453, i asina a pone fin na e Imperio Romano Oriental. Na 1517 Egipto a bira un provincia turco. Pero cu tempu, e pais aki dje antiguo rey di zuid lo a bini bou di control di un otro imperio for dje sector west.

24, 25. (a) Segun algun historiadó, kico a marca e comienso dje Santu Imperio Romano? (b) Kico a sosodé finalmente cu e título “emperador” dje Santu Imperio Romano?

²⁴ Den e parti west dje Imperio Romano a lanta e obispunan católico di Roma, foral Papa Leo I, renombrá pa a imponé autoridad papal den siglo 5 E.C. Cu tempu, papa a tuma riba su mes pa coroná e emperador dje seccion west. Esaki a sosodé na Roma riba dia di Pascu di Nacementu di aña 800 E.C., ora cu Papa Leo III a coroná e rey franco Karel (Karel e Grandi) como emperador dje Imperio Romano Occidental nobo. E coronacion aki a rebibá e gobernacion di emperador na Roma i, segun algun historiadó, a marca comienso dje Santu Imperio Romano. For dje tempu ei padilanti a existí e Imperio Oriental i e Santu Imperio Romano den west. Tur dos a pretendé di ta cristian.

²⁵ Cu transcurso di tempu, e sucesornan di Karel e Grandi a resultá di ta gobernantenan ineficas. E puesto di emperador a asta keda bashí pa un tempu. Miéntras tantu, e rey aleman Otto I a haña control riba gran parti di nort i central di Italia. El a proclamá su mes rey di Italia. Dia 2 di februari 962 E.C., Papa Juan XII a coroná Otto I como emperador dje Santu Imperio Romano. Su capital tabata na Alemania, i e emperadornan tabata aleman, mescos cu mayoria di nan súbditonan. Cincu siglo despues, e famia austriaco di Hapsburg a obtené e título di “emperador” i a manten’é pa mayor parti dje añanan cu a resta dje Santu Imperio Romano.

ATROBE TA IDENTIFICA E DOS REYNAN CLARAMENTE

26. (a) Kico nos por bisa tocante fin dje Santu Imperio Romano? (b) Ken a subi como rey di nort?

²⁶ Napoleon I a dal e Santu Imperio Romano un golpi mortal, ora el a nenga di reconocé su existencia despues di su victorianan na Alemania durante aña 1805. Incapas di defendé su corona, emperador Francis II a renunciá e státus di emperador romano dia 6 di augustus 1806, i a regresá na su gobiernu nacional como emperador di Austria. Despues di 1.006 aña, e Santu Imperio Romano—fundá dor di Leo III, un papa católico romano, i Karel e Grandi, un rey franco—a yega na un fin. Na 1870, Roma a bira e capital dje reino di Italia, independiente di Vaticano. E siguiente aña, un imperio germano a cuminsá cu Wilhelm I kende nan a yama césar of keizer. Asina e rey di nort di tempu moderno—Alemania—a subi esenario mundial.

27. (a) Con Egipto a bira un protectorado británico? (b) Ken a haña e posicion di rey di zuid?

²⁷ Pero cua tabata e identidad dje rey di zuid di tempu moderno? Historia ta mustra cu Gran Bretania a adkerí poder imperial den siglo 17. Dor cu Napoleon I kier a desbaratá e rutanan comercial británico, el a conkistá Egipto na aña 1798. Esei a resultá den guera, i un aliansa británico-ottoman a forsa e francesnan retirá for di Egipto, identificá como e rey di zuid na principio dje conflicto. Durante e siguiente siglo, influencia británico na Egipto a aumentá. Despues di 1882, Egipto tabata eigenlijk un protectorado británico. Ora Guera Mundial I a start na 1914, Egipto tabata pertenecé na Turkia i un kedive, of virrey, tabata gobern’é. Sin embargo, despues cu Turkia a tuma parti pa Alemania den e guera ei, Gran Bretania a baha e kedive i a declará Egipto un protectorado británico. Gran Bretania cu Merca a cuminsá forma lasonan estrecho gradualmente. Nan a bira e Potencia Mundial Anglo-Americano. Huntu, nan a haña e posicion di rey di zuid.

[Nota]

KICO BO A SACA AFO?

• Cua emperador romano tabata e promé cu a lanta para como rey di nort, i na ki tempu el a manda “un exigidó”?

• Ken a tuma e posicion di rey di nort despues di Augusto, i con a ‘kibra e Lider dje pacto’?

• Kico tabata e resultado dje conflicto entre Aureliano, como rey di nort, i Zenobia, como rey di zuid?

• Kico a para dje Imperio Romano, i pa fin di siglo 19, cua potencianan tabata ocupá e posicion dje dos reynan?

[Kuadro/Plachi na página 248-251]

UNU ONRÁ, E OTRO DESPRECIA

UNU a transformá un república yen di conflicto, den un imperio mundial. E otro a aumentá e rikesa dje imperio den 23 aña, hacié 20 biaha mas tantu. Unu a ser onrá ora el a muri, pero e otro a ser despreciá. E reinado dje dos emperadornan aki di Roma a abarcá Jesus su bida i ministerio. Ken nan tabata? I pakico unu tabata onrá, miéntras cu e otro no?

EL “A HAÑA ROMA DI BLOKI I A BAI LAGU’E DI MARMER”

Ora nan a asesiná Julio César na aña 44 P.E.C., Cayo Octavio, nietu di su ruman muher, tabatin 18 aña so. Siendo un yu adoptá di Julio César i su heredero personal principal, e hóben Octavio a sali mesora pa Roma pa reclamá su herencia. Ei el a topa un oponente poderoso, César su teniente principal, Marco Antonio, kende a kere cu ta e lo ta e heredero principal. Esaki a hiba na un intriga político i lucha pa poder cu a dura 13 aña.

Octavio a sali como e gobernante indiscutibel dje Imperio Romano, pero solamente despues cu el a derotá e forsanan combiná dje reina egipcio Cleopatra i su amante Marco Antonio (na aña 31 P.E.C.). E siguiente aña Antonio cu Cleopatra a cometé suicidio, i Octavio a anexá Egipto na su imperio. Asina a eliminá e último rastro dje Imperio Griego, i Roma e bira e potencia mundial.

Octavio a corda cu Julio César su manera tiránico di ehercé poder a hiba na su asesinato, i p’esei el a soru pa no ripití e eror ei. Pa no ofendé e sintimentunan romano cu tabata pro un república, el a laga su monarkia aparentá un república. El a nenga di usa títulonan manera “rey” i “dictador.” Bayendo un stap mas leu, el a anunciá su intencion di entregá control di tur provincia na senado romano i a ofrecé pa renunciá e funcionnan cu e tabatin. E táctica aki a resultá. E senado apreciativo a urgi Octavio pa keda cu su funcionnan i cu control riba algun provincia.

Ademas, dia 16 di januari 27 P.E.C., senado a otorgá Octavio e título “Augusto,” cu kier men “Exaltá, Sagrado.” Octavio no solamente a aceptá e título, sino tambe a cambia nomber di un luna pa su nomber, i a fia un dia for di ­februari pa asina augustus por tabatin mes tantu dia cu juli, e luna cu nan a duna e nomber di Julio César. Asina Octavio a bira e promé emperador di Roma, i djei padilanti tabata conocí como César Augusto of “E Augusto.” Despues tambe el a asumí e título “pontifex maximus” (sumo sacerdote), i na aña 2 P.E.C.​—e aña cu Jesus a nace​—Senado a dun’é e título Pater Patriae, “Tata di Su Patria.”

Den e mésun aña ei, “a sali un decreto for di César Augusto cu tur e tera habitá mester inscribí; . . . i tur hende a bai di biahe pa inscribí, cada un na su mes stad.” (Lucas 2:​1-3) Como resultado dje decreto aki, Jesus a nace na Betlehem, cumpliendo cu profecia bíblico.​—Daniel 11:20; Mikéas 5:2.

Augusto su gobernacion tabata caracterisá pa un midí di onrades i un moneda stabil. Tambe Augusto a establecé un sistema postal eficas i a construí caminda i brugnan. El a reorganisá e ehército, a crea un ehército naval permanente i a establecé un banda élite di wardaespalda imperial, conocí como e Guardia Pretoriano. (Filipensenan 1:13) Bou di su auspicio, escritornan manera Virgilio i Horacio a florecé, i escultornan a crea obranan bunita den e estilo cu awor nos ta yama clásico. Augusto a completá edificionan cu Julio César no a terminá, i a restorá hopi tempel. E Pax Romana (“Pas Romano”) cu el a introducí, a dura mas cu 200 aña. Dia 19 di augustus di aña 14 E.C., Augusto a muri na edad di 76 aña. Despues di esei nan a hacié un dios.

Augusto a broma cu el “a haña Roma di bloki i a bai lagu’e di marmer.” Dor cu e no tabata kier pa Roma bai bek n’e dianan yen di conflicto manera tabata e caso den e república anterior, e tabatin intencion di prepará e siguiente emperador. Pero e no tabatin masha opcion pa scoge un sucesor. Su subrino, dos nietu, un cuñá i un yu di criansa, tur a muri, lagando solamente su yu di criansa Tiberio pa tuma over.

ESUN “CU LO SER DESPRECIA”

Ménos cu un luna despues cu Augusto a muri, Senado romano a nombra Tiberio di 54 aña como emperador. Tiberio a biba i goberná te cu mart di aña 37 E.C. Pues, e tabata emperador di Roma durante henter e ministerio público di Jesus.

Como emperador, Tiberio tabatin birtud i tambe bicio. Un di su birtudnan tabata cu e no a gusta gasta placa na cos di luho. Como resultado, e imperio a prosperá i e tabatin fondo pa contribuí pa yuda hende recuperá den tempu pertá i di desaster. Otro cos bon di Tiberio tabata cu el a mira su mes como djis un hende, i a nenga di usa hopi título di onor, i por lo general a dirigí adoracion di emperador na Augusto en bes di na su mes. E no a duna un luna riba kalender su nomber, manera Augusto i Julio César a haci, ni e no a permití otro hende onr’é den e manera ei.

Sin embargo, Tiberio su bicionan a surpasá su birtudnan. E tabata masha desconfiá i hipócrita mes den su trato cu otro hende. Durante su reinado el a ordená yen di asesinato, anto hopi di su ex-amigunan tabata entre e víctimanan. El a extendé e ley di lèse-majesté (mahestad ofendí) pa incluí, ademas di actonan di rebelion, tambe simpel palabranan di difamacion contra su persona. Supuestamente a base dje ley aki, e hudiunan a preshoná e gobernadó romano Poncio Pilato pa laga mata Jesus.​—Juan 19:​12-16.

Tiberio a concentrá e Guardia Pretoriano den cercania di Roma, dor di construí baraknan fortificá pa nort dje murayanan dje stad. E presencia dje Guardia a intimidá e senado romano, cu tabata un menasa pa Tiberio su poder, i a mantené cualkier rebeldia entre e pueblo bou di control. Tambe Tiberio a promové e sistema di informante, i e último parti di su gobernacion tabata caracterisá pa teror.

Pa tempu cu el a muri, nan tabata considerá Tiberio un tirano. Ora el a muri, e romanonan a alegrá i Senado a nenga di hacié un dios. P’e motibunan aki i otro mas, nos ta mira den Tiberio un cumplimentu dje profecia cu a bisa cu “unu cu lo ser despreciá” lo lanta para como “e rey di nort.”​—Daniel 11:​15, 21.

KICO BO A SACA AFO?

• Con Octavio a bira e promé emperador di Roma?

• Kico nos por bisa dje logronan dje gobiernu di Augusto?

• Cua tabata e birtud i bicionan di Tiberio?

• Con e profecia tocante “unu cu lo ser despreciá” a cumpli den Tiberio?

[Plachi]

Tiberio

[Kuadro/Plachi na página 252-255]

ZENOBIA​—E REINA GUERERO DI PALMIRA

“E TABATA di color . . . Su djentenan tabata blancu manera perla, i su wowonan grandi pretu tabatin un briyo luminoso poco comun, suavisá cu un dulsura sumamente atractivo. Su bos tabata fuerte i armonioso. Su comprendimentu manera di un homber, a ser fortalecé i dorná dor di estudio. E tabata sa latin i tabata mes bon den e idiomanan griego, siriaco i egipcio.” Asina historiadó Edward Gibbon a elogiá Zenobia, e reina guerero dje stad sirio Palmira.

Odenato, esposo di Zenobia, tabata un habitante di noblesa di Palmira, cu nan a premia cu e rango di cònsul di Roma na aña 258 E.C., pasobra el a hiba un campaña exitoso contra Persia na fabor dje Imperio Romano. Dos aña despues, Odenato a ricibí di emperador romano Galieno e título corrector totius Orientis (gobernadó di henter Oriente). Esaki tabata como reconocimentu di su victoria riba rey Sapor I di Persia. Cu tempu, Odenato a duna su mes e título “rey di reynan.” Pa gran parti por atribuí e éxitonan aki di Odenato na Zenobia su curashi i prudencia.

ZENOBIA TA ASPIRA PA CREA UN IMPERIO

Na aña 267 E.C., n’e culminacion di su carera, Odenato i su heredero a ser asesiná. Zenobia a tuma e puesto di su casá over, ya cu su yu homber tabata muchu yong. Dor cu Zenobia tabata bunita, ambicioso, un administradó capas, custumbrá di haci atakenan militar huntu cu su esposo i vlot den diferente idioma, el a logra gana e respet i apoyo di su súbditonan. Zenobia tabata gusta siña i a soru p’e tin intelectualnan rondó di dje. Un di su conseheronan tabata e filósofo i maestro den palabra, Casio Longino, cu nan di tabata “un biblioteca bibu i un museo riba pia.” Den su buki Palmyra and Its Empire​—Zenobia’s Revolt Against Rome (Palmira i Su Imperio​—Revolucion di Zenobia Contra Roma), autor Richard Stoneman ta observá: “Durante e cincu añanan despues dje morto di Odenato . . . , Zenobia a pone su pueblo reconoc’é como la doña di Oriente.”

Na un banda di Zenobia su teritorio tabatin Persia, cu e i su casá a debilitá, i n’e otro banda tabatin Roma cu tabata cayendo den otro. Relacioná cu e condicion dje Imperio Romano n’e tempu ei, historiadó J. M. Roberts ta bisa: “Siglo 3 tabata . . . un época teribel pa Roma na su frontera oost i esun west, miéntras parti paden a cuminsá un periodo nobo di guera civil i di cambionan controversial di poder. Bintidos emperador (sin conta esnan cu a purba di yega na poder) a subi i baha.” Di otro banda, la doña di Siria, tabata un monarca fuertemente establecí i cu poder absoluto den su reino. “Dor di dominá e balansa entre e dos imperionan [di Persia i di Roma],” segun Stone­man, “e por a aspirá pa crea un di tres imperio cu lo a dominá nan tur dos.”

Na aña 269 E.C., Zenobia a haña oportunidad di expandé su poder real, ora un homber cu a pretendé di ta bringa pa haña e gobernacion romano a aparecé na Egipto. E ehército di Zenobia a marcha drenta Egipto lihé, a aplastá e rebelde i a tuma posesion dje pais. Zenobia a proclamá su mes reina di Egipto i a laga traha moneda cu su nomber ariba. Awor su reino a extendé for di riu Nilo te na riu Eufrátes. N’e etapa aki di su bida, Zenobia a bin ocupá e posicion di “e rey di zuid.”​—Daniel 11:​25, 26.

ZENOBIA SU STAD CAPITAL

Zenobia a fortalecé i dorna su capital, Palmira, asina tantu cu el a figurá entre e stadnan mas grandi dje mundu romano. Segun cálculo, su poblacion a alcansá mas cu 150.000 persona. Palmira, un stad cerá cu un muraya cu segun informe tabatin un omtrek di 21 kilometer, tabata yen di edificio público, tempel, hardin, pilar i monumentonan espléndido. A lo largu dje avenida principal tabatin un galeria di un 1.500 pilar di arkitectura griego antiguo, cada un mas cu 15 meter haltu. E stad tabata yen di estatua i busto di héroe i benefactornan ricu. Na aña 271 E.C., Zenobia a traha estatua di su mes i di su defuntu esposo.

E Tempel di Solo tabata un dje edificionan mas bunita di Palmira, i sin duda a dominá e esena religioso den e stad. Podisé Zenobia mes a adorá un dios asociá cu e dios-solo. Sin embargo, Siria di siglo 3 tabata un pais cu hopi religion. Den e teritorio di Zenobia tabatin hende cu a profesá di ta cristian, hudiu i adoradónan di solo i luna. Kico tabata su actitud pa cu e vários formanan aki di adoracion? Autor Stone­man ta bisa: “Un gobernante sabí lo no neglishá ningun custumber cu su pueblo ta haña bon. . . . Hende a spera cu a reuní e diosnan huntu n’e banda di Palmira.” Aparentemente, Zenobia no tabata contra otro religion.

Debí na su personalidad impresionante, Zenobia a gana e admiracion di hopi hende. Di mayor importancia tabata su papel den representá un entidad político cu e profecia di Daniel a pronosticá. Sin embargo, su reinado no a dura mas cu cincu aña. Emperador romano Aureliano a derotá Zenobia na aña 272 E.C., i despues a sakea Palmira di tal forma cu no por a reconstruyé mas. Zenobia a haña clemencia. Segun informe el a casa cu un senador romano i supuestamente a pasa e resto di su bida den retiro.

KICO BO A SACA AFO?

• Con hende a describí Zenobia su personalidad?

• Cua tabata algun dje hazañanan di Zenobia?

• Kico tabata Zenobia su actitud pa cu religion?

[Plachi]

Reina Zenobia papiando cu su soldánan

[Tabèl/Plachi na página 246]

REYNAN DEN DANIEL 11:20-26

Daniel 11:20 Augusto

Daniel 11:21-24 Tiberio

Daniel 11:25, 26 Aureliano Reina Zenobia

[Plachi]

Tiberio

[Plachi]

Aureliano

[Plachi]

Estatua chikitu di Karel e Grandi

[Plachi]

Augusto

[Plachi]

Barcu di guera británico di siglo 17

[Plachi di henter página 230]

[Plachi na página 233]

Augusto

[Plachi na página 234]

Tiberio

[Plachi na página 235]

Debí n’e decreto di Augusto, José cu Maria a biaha bai Betlehem

[Plachi na página 237]

Manera tabata profetisá, nan a “kibra” Jesus den morto

[Plachi na página 245]

1. Karel e Grandi 2. Napoleon I 3. Wilhelm I 4. Soldánan aleman, Guera Mundial I