Capitulo Dieshete

Con pa Identificá Adoradónan Berdadero den e Tempu di Fin

 1. Segun Daniel capítulo 7, ki experencianan extraordinario un grupito di hende indefenso den nos tempu lo a pasa aden?

UN GRUPITO di hende indefenso ta cai bou di atake cruel di un potencia mundial poderoso. Nan ta sobrebibí intacto i ta asta rebibá bek, no debí na nan propio fortalesa, sino debí cu nan ta di balor pa Jehova. Daniel capítulo 7 a pronosticá e sucesonan aki, cu a tuma lugá na principio di siglo 20. Pero, ken e pueblo aki tabata? E mésun capítulo di Daniel a yama nan “e santunan dje Supremo,” Jehova Dios. E ta revelá tambe cu finalmente e personanan aki lo ta co-gobernante den e Reino Mesiánico!—Daniel 7:13, 14, 18, 21, 22, 25-27.

 2. (a) Kico ta Jehova su sintimentu pa cu su sirbidónan ungí? (b) Kico ta e cos sabí pa haci durante e tempu aki?

² Manera nos a siña den Daniel capítulo 11, e rey di nort lo contra cu su fin despues di menasá e tera spiritual cu tabata un lugá di siguridad p’e pueblo fiel aki. (Daniel 11:45; compará cu Ezekiel 38:18-23.) Sí, Jehova tin un actitud di protehá su ungínan fiel. Salmo 105:14 i 15 ta bisa nos: “Pa nan motibu [Jehova] a reprendé reynan, bisando: ‘Boso no mishi cu mi ungínan, i no haci nada malu contra mi profetanan.’” Bo no ta di acuerdo anto, cu den e tempu turbulento aki, lo ta sabí pa e creciente “multitud grandi” asociá mas estrechamente posibel cu e santunan aki? (Revelacion 7:9; Zacarías 8:23) Jesucristo a recomendá pa hende mansu manera carné haci net esei, esta, asociá cu su rumannan spiritual ungí dor di apoyá nan den nan trabou.—Mateo 25:31-46; Galationan 3:29.

 3. (a) Pakico no ta fácil pa haña Jesus su siguidónan ungí i keda cerca di nan? (b) Con Daniel capítulo 12 lo yuda nos cu esaki?

³ Sin embargo, Satanas, e Adversario di Dios, ta bringando un guera total contra e ungínan. El a fomentá religion falsu, i na un forma eficas a yena mundu cu cristiannan falsu. Como resultado, hopi hende a ser gañá. Tin hende cu gewoon a perde e speransa di un dia haña esnan cu ta representá e religion berdadero. (Mateo 7:15, 21-23; Revelacion 12:9, 17) Asta esnan cu haña e “trupa chikitu” i ta asociá cu nan, tin cu lucha pa mantené nan fe, pasobra e mundu aki constant ta busca manera pa caba cu hende su fe. (Lucas 12:32) Ki tal di abo? Bo a haña “e santunan dje Supremo,” i bo ta asociando cu nan? Bo sa cu tin evidencia sólido pa proba cu esnan cu bo a haña, di berdad ta esnan cu Dios a scoge? E clase di evidencia aki por reforsá bo fe. Tambe e por ekipá bo pa yuda otro hende pa nan no ser gañá dor dje confusion religioso dje mundu djawe. Daniel capítulo 12 ta contené un abundancia dje conocimentu aki cu ta salba bida.

E GRAN PRINS TA DRENTA DEN ACCION

 4. (a) Daniel 12:1 ta pronosticá cua dos cos distinto relacioná cu Miguel? (b) Kico e buki di Daniel kier men hopi bes ora e bisa cu un monarca ta “pará”?

⁴ Daniel 12:1 ta bisa: “Durante e tempu ei Miguel lo lanta para, e gran prins cu ta pará na fabor dje yunan di bo pueblo.” E versículo aki ta pronosticá dos cos distinto relacioná cu Miguel: unu, cu e “ta pará,” loke ta indicá un condicion cu ta extendé over di un periodo di tempu; dos, cu e “lo lanta para,” loke ta indicá un suceso durante e periodo di tempu ei. Promé, nos kier sa na ki periodo Miguel ta “pará na fabor dje yunan di [Daniel su] pueblo.” Corda cu Miguel ta e nomber duná na Jesus den su papel como Gobernante celestial. E echo cu ta bisa aki cu e “ta pará,” ta pone nos corda e manera cu ta usa e término aki den otro partinan di Daniel. Hopi bes e ta referí na e accion di un rey, por ehempel, ora e tuma poder real.—Daniel 11:2-4, 7, 20, 21.

5, 6. (a) Durante ki periodo di tempu Miguel ta pará? (b) Na ki tempu i con Miguel ta “lanta para,” i na kico esaki ta hiba?

⁵ Ta evidente cu e angel tabata señalá aki na un periodo di tempu specificá den otro parti di profecia bíblico. Jesus a yam’é su “presencia” (na griego, pa·rou·sí·a), ora cu lo e goberná como Rey den shelu. (Mateo 24:37-39) Tambe Bijbel ta yama e periodo di tempu aki “e último dianan” i “e tempu di fin.” (2 Timoteo 3:1; Daniel 12:4, 9) For di tempu cu e periodo ei a cuminsá na 1914, Miguel ta pará como Rey den shelu.—Compará cu Isaías 11:10; Revelacion 12:7-9.

⁶ Pero, na ki tempu Miguel ta “lanta para”? Ora e lanta pa tuma accion special. Jesus lo haci esaki den futuro. Revelacion 19:11-16 ta describí Jesus proféticamente como e poderoso Rey Mesiánico cu ta encabesá un ehército di angel i ta trece destruccion riba enemigunan di Dios. Daniel 12:1 ta sigui bisa: “I sigur lo sosodé un tempu di angustia tal como no a pone sosodé desde cu a yega di existí un nacion te n’e tempu ei.” Como Jehova su Ehecutor Principal, Cristo lo trece un fin na henter e sistema di cosnan malbado durante e “tribulacion grandi” pronosticá.—Mateo 24:21; Jeremías 25:33; 2 Tesalonicensenan 1:6-8; Revelacion 7:14; 16:14, 16.

 7. (a) Ki speransa tin pa tur e fielnan durante e binidero “tempu di angustia”? (b) Kico e buki di Jehova ta, i pakico ta vital pa nos nomber ta eiden?

⁷ Con lo bai cu hende cu ta ehercé fe durante e tempu scur aki? E angel a sigui bisa Daniel: “Durante e tempu ei bo pueblo lo scapa, tur cu haña skirbí den e buki.” (Compará cu Lucas 21:34-36.) Kico e buki aki ta? En esencia, e ta representá e echo cu Jehova Dios ta corda esnan cu ta haci su boluntad. (Malakías 3:16; Hebreonan 6:10) E personanan kende nan nomber ta skirbí den e buki aki di bida ta e hendenan mas safe na mundu, pasobra nan ta gosa di proteccion divino. Cualkier cos malu cu por sosodé cu nan, por i lo ser deshací. Asta si nan muri promé cu e binidero “tempu di angustia” aki, nan ta safe den Jehova su memoria ilimitá. Lo e corda nan i resucitá nan durante Jesucristo su Reinado di Mil Aña.—Echonan 24:15; Revelacion 20:4-6.

E SANTUNAN TA “SPIERTA”

 8. Ki dushi prospecto Daniel 12:2 ta ofrecé?

⁸ En berdad e speransa di resureccion ta un consuelo. Daniel 12:2 ta mencion’é, bisando: “Lo tin hopi di esnan drumí den suela di stòf cu lo spierta, esakinan pa bida di duracion indefiní i esnan ei pa desonra i repugnancia pa duracion indefiní.” (Compará cu Isaías 26:19.) Por ta e palabranan aki ta pone nos corda riba Jesucristo su promesa conmovedor di un resureccion general. (Juan 5:28, 29) Ki un speransa emocionante! Djis pensa riba con amigu i famianan stimá—cu awor ta morto—lo haña un chens di biba atrobe den futuro! Pero e promesa aki den e buki di Daniel ta referí principalmente na un otro clase di resureccion, unu cu a tuma lugá caba. Con por ta?

 9. (a) Pakico ta razonabel pa verwagt cu Daniel 12:2 lo cumpli durante e último dianan? (b) E profecia ta referí na ki clase di resureccion, i con nos sa esei?

⁹ Analisá e contexto. Manera nos a mira, e promé versículo di capítulo 12 ta aplicá no solamente na fin dje sistema aki di cosnan, sino tambe na henter e periodo dje último dianan. Bon mirá, mayor parti dje capítulo ta cumpli, no den e binidero paradijs terenal, sino durante e tempu di fin. Tabatin un resureccion durante e periodo aki? Apostel Pablo a skirbi cu e resureccion di “esnan cu ta pertenecé na Cristo” ta sosodé “durante su presencia.” Sin embargo, esnan cu ta resucitá pa bida den shelu ta lanta “incoruptibel.” (1 Corintionan 15:23, 52) Ningun di nan no ta lanta “pa desonra i repugnancia pa duracion indefiní” pronosticá na Daniel 12:2. Acaso tin un otro clase di resureccion? Den Bijbel, tin biaha resureccion tin un nificacion spiritual. Por ehempel, tantu Ezekiel como Revelacion ta contené pasashinan profético cu ta aplicá na rebibamentu, of resureccion, spiritual.—Ezekiel 37:1-14; Revelacion 11:3, 7, 11.

10. (a) Den ki sentido a resucitá e resto ungí durante e tempu di fin? (b) Con algun dje ungínan cu a ser rebibá, tog a spierta “pa desonra i repugnancia pa duracion indefiní”?

¹⁰ Dios su sirbidónan ungí a experenciá un rebibamentu spiritual asina den e tempu di fin? Sí! Ta un realidad histórico cu na aña 1918 un resto chikitu di cristiannan fiel a ser someté na un atake extraordinario cu a interumpí nan ministerio público organisá. Anto na 1919, maske esei a parce imposibel, nan a bolbe na bida den sentido spiritual. E echonan aki ta cuadra cu e descripcion dje resureccion pronosticá na Daniel 12:2. N’e tempu ei i despues, algun a “spierta” den sentido spiritual. Pero, lamentablemente, no ta tur a keda den un condicion spiritualmente bibu. Esnan cu despues di a spierta a scoge pa rechasá e Rey Mesiánico i cu a bandoná e sirbishi di Dios, a gana pa nan mes e “desonra i repugnancia pa duracion indefiní,” mencioná na Daniel 12:2. (Hebreonan 6:4-6) Sin embargo, e ungínan fiel a haci bon uso di nan condicion rebibá den sentido spiritual, i a apoyá e Rey Mesiánico lealmente. Manera e profecia ta declará, finalmente nan fieldad ta hiba na “bida di duracion indefiní.” Awe, nan vitalidad spiritual apesar di oposicion, ta yuda nos identificá nan.

NAN TA ‘BRIYA MANERA STREA’

11. Ken awe ta “esnan cu tin perspicacia,” i den ki sentido nan ta briya manera strea?

¹¹ E siguiente dos versículonan di Daniel capítulo 12 ta yuda nos asta mas ainda pa identificá “e santunan dje Supremo.” Den versículo 3 e angel ta bisa Daniel: “Esnan cu tin perspicacia lo briya manera e splendor dje firmamento; i esnan cu ta trece e hopinan na husticia, manera strea te na tempu indefiní, asta pa semper.” Ken awe ta “esnan cu tin perspicacia”? Atrobe, evidencia ta señalá na e mésun “santunan dje Supremo.” Ademas, ken fuera dje fiel resto ungí tabatin e perspicacia pa dicerní cu Miguel, e Gran Prins, a cuminsá para como Rey na 1914? Dor di predicá berdadnan manera esaki, i tambe dor di mantené conducta cristian, nan a ‘briya como iluminadó’ den e mundu aki cu ta den scuridad spiritual. (Filipensenan 2:15; Juan 8:12) Relacioná cu nan, Jesus a profetisá: “N’e tempu ei e hustunan lo briya mes briyante cu solo den e reino di nan Tata.”—Mateo 13:43.

12. (a) Durante e tempu di fin, con e ungínan tabata enbolbí den “trece e hopinan na husticia”? (b) Con e ungínan lo trece hopi hende na husticia i ‘briya manera strea’ durante Cristo su Reinado di Mil Aña?

¹² Daniel 12:3 ta asta conta nos ki trabou lo tene e cristiannan ungí aki ocupá den e tempu di fin. Nan lo ta “trece e hopinan na husticia.” E resto ungí a cuminsá recogé e cantidad cu a resta dje 144.000 co-herederonan di Cristo. (Romanonan 8:16, 17; Revelacion 7:3, 4) Ora nan a completá e trabou ei—evidentemente meimei di añanan ’30—nan a cuminsá recogé e “multitud grandi” di “otro carnénan.” (Revelacion 7:9; Juan 10:16) Esakinan tambe ta ehercé fe den Jesucristo su sacrificio di rescate. P’esei, nan tin un posicion limpi dilanti Jehova. Awe nan cantidad ta core den miyones, i nan ta atesorá e speransa di sobrebibí e binidero destruccion dje mundu malbado aki. Durante Cristo su Reinado di Mil Aña, Jesus i su 144.000 socionan rey i sacerdote lo aplicá e pleno beneficionan dje rescate na humanidad obediente riba tera, i asina yuda tur esnan cu ta ehercé fe pa deshací di delaster un rastro di picá heredá for di Adam. (2 Pedro 3:13; Revelacion 7:13, 14; 20:5, 6) Den e sentido mas completo, e ungínan lo participá e ora ei den “trece e hopinan na husticia” i lo ‘briya manera strea’ den shelu. Abo ta considerá e speransa di biba riba tera bou dje glorioso gobiernu celestial di Cristo cu su co-gobernantenan di gran balor? Esta un privilegio e ta pa participá cu “e santunan” den predicá e bon nobo aki dje Reino di Dios!—Mateo 24:14.

NAN TA “BAI P’AKI I P’AYA”

13. Den ki sentido a seya e palabranan dje buki di Daniel i a haci nan secreto?

¹³ Awor e angel ta concluí su declaracion na Daniel, cu a cuminsá for di Daniel 10:20, cu e palabranan conmovedor aki: “I pa loke ta abo, o Daniel, haci e palabranan secreto i seya e buki, te cu e tempu di fin. Hopi lo bai p’aki i p’aya, i berdadero conocimentu lo bira abundante.” (Daniel 12:4) Di berdad, gran parti di loke Daniel a keda inspirá pa skirbi a ser hací secreto i seyá, di manera cu hende no por a comprend’é. Sí, asta Daniel mes a skirbi mas despues: “Awor pa loke ta ami, mi a tende, pero mi no por a comprendé.” (Daniel 12:8) Den e sentido aki e buki di Daniel a keda seyá pa siglonan. Kico di awe?

14. (a) Durante “e tempu di fin,” ken a “bai p’aki i p’aya,” i na unda? (b) Ki evidencia tin cu Jehova a bendicioná e ‘baimentu p’aki i p’aya’?

¹⁴ Nos tin e privilegio di biba den “e tempu di fin” pronosticá den e buki di Daniel. Manera e buki a profetisá, hopi hende fiel a “bai p’aki i p’aya” den e páginanan dje Palabra di Dios. E resultado? Cu Jehova su bendicion, conocimentu berdadero a bira abundante. A bendicioná e fiel Testigonan ungí di Jehova cu perspicacia, loke a capacitá nan pa comprendé cu e Yu di hende a bira Rey na 1914, pa identificá e bestianan dje profecia di Daniel, pa duna spiertamentu contra “e cos repugnante cu ta causa desolacion”—anto esakinan ta djis un par di ehempel. (Daniel 11:31) Pues anto, e abundancia aki di conocimentu, ta un otro marca mas cu ta identificá “e santunan dje Supremo.” Pero Daniel a ricibí mas evidencia.

TA ‘APLASTA NAN NA PIDA-PIDA’

15. Ki pregunta un angel ta haci awor, i riba ken e pregunta aki ta pone nos corda?

¹⁵ Nos ta corda cu Daniel a ricibí e mensahenan angelical aki cantu “dje gran riu” Hidekel, conocí tambe como Tígris. (Daniel 10:4) Ei e ta mira awor tres criatura angelical i e ta bisa: “Mi a wak, ami Daniel, i, mira! tabatin dos otro pará, un na cantu aki dje riu i e otro na cantu aya dje riu. Anto unu a bisa e homber bistí na linen, cu tabata riba e awanan dje riu: ‘Cuantu tempu lo dura te na fin dje cosnan maraviyoso?’ ” (Daniel 12:5, 6) E pregunta cu e angel a plantia aki, atrobe por pone nos corda riba “e santunan dje Supremo.” Na comienso di “e tempu di fin,” na 1914, e pregunta, cuantu tempu mas falta pa e promesanan di Dios cumpli, tabata preocupá nan mashá. E contesta riba e pregunta aki ta laga nos ripará cu ta e santunan ta e punto central dje profecia aki.

16. Ki profecia e angel ta declará, i con e ta enfatisá cu e cumplimentu ta sigur?

¹⁶ E relato di Daniel ta sigui: “I mi a cuminsá tende e homber bistí na linen, cu tabata riba e awanan dje riu, ora el a hisa su man drechi i su man robes na shelu i hura pa Esun cu ta bibu pa tempu indefiní: ‘Lo ta pa un tempu señalá, tempunan señalá i mitar. I asina cu a pone un fin na aplastá e poder dje pueblo santu na pida-pida, tur e cosnan aki lo yega na nan fin.’” (Daniel 12:7) Esaki ta un asuntu solem. E angel ta hisa tur dos man den huramentu, kisas pa e dos angelnan na cada banda dje riu hanchu por a mira. Asina e ta enfatisá cu ta absolutamente sigur cu e profecia aki lo cumpli. Pero, ki dia e tempunan señalá aki ta? No ta dje difícil ei pa haña e contesta, manera kisas bo ta pensa.

17. (a) Ki paralelo nos ta haña den e profecianan registrá na Daniel 7:25, Daniel 12:7 i Revelacion 11:3, 7, 9? (b) Con largu e tres tempu i mei ta?

¹⁷ E profecia aki ta remarcablemente similar na dos otro profecia. Unu, cu nos a considerá den Capítulo 9 dje buki aki, nos ta haña na Daniel 7:25; e otro ta na Revelacion 11:3, 7, 9. Tuma nota di algun dje paralelonan. Cada un ta tuma lugá den e tempu di fin. Tur dos profecia tin di haci cu sirbidónan santu di Dios, i ta mustra cu nan ta ser persiguí i cu pa un tempu nan no por ni sikiera efectuá nan actividad di predicá públicamente. Cada profecia ta mustra cu e sirbidónan di Dios ta rebibá, anto ta reanudá nan trabou, i asina ta frustra plan di nan persiguidónan. I cada profecia ta mencioná e duracion dje tempu di prueba aki pa e santunan. Tur dos profecia den Daniel (7:25 i 12:7) ta referí na ‘un tempu, tempunan i mitar tempu.’ Por lo general, eruditonan riba tereno di Bijbel ta reconocé cu esaki ta nificá tres tempu i mei. Revelacion ta referí na e mésun periodo como 42 luna esta, 1.260 dia. (Revelacion 11:2, 3) Esaki ta confirmá cu e tres tempu i mei den Daniel ta referí na tres aña i mei di 360 dia cada un. Pero na ki tempu e 1.260 dianan aki a cuminsá core?

18. (a) Segun Daniel 12:7, kico lo marca fin dje 1.260 dianan? (b) Na ki tempu finalmente a aplastá “e poder dje pueblo santu” na pida-pida, i con esaki a sosodé? (c) Na ki tempu e 1.260 dianan a cuminsá, i con e ungínan a ‘profetisá bistí na paña di sacu’ durante e periodo ei?

¹⁸ E profecia ta bastante explícito tocante na ki tempu e 1.260 dia lo a terminá. Esei ta ora cu a “pone un fin na aplastá e poder dje pueblo santu na pida-pida.” Meimei di 1918, corte a condená miembronan prominente di Watch Tower Bible and Tract Society (incluso su presidente, J. F. Rutherford) bou di acusacionnan falsu, a sentenciá nan na castigunan largu di prizon i a encarcelá nan. En berdad e santunan di Dios a mira nan trabou ‘aplastá na pida-pida,’ i nan poder kibrá. Contando bai bek tres aña i mei for di meimei di 1918, ta hiba nos na fin di 1914. N’e tempu ei e grupito di ungínan tabata prepará nan mes pa e avalancha di persecucion. Guera Mundial I a cuminsá, i oposicion contra nan trabou tabata crece. Pa aña 1915, nan a asta basa nan texto di aña riba e pregunta aki cu Cristo a haci su siguidónan: “Boso lo por bebe di mi copa?” (Mateo 20:22, King James Version) Manera Revelacion 11:3 a predicí, e periodo di 1.260 dia cu a sigui despues tabata un tempu di tristesa profundo pa e ungínan. Tabata como si fuera nan tabata profetisá bistí na paña di sacu. Persecucion a bira pió. Algun a bai cerá, otronan a ser atacá dor di multitudnan desordená, i tabatin cu a ser torturá. Hopi ruman a keda desanimá cu morto dje promé presidente di Sociedad, C. T. Russell, na 1916. Pero, kico lo a sosodé despues cu e tempu scur aki a terminá cu matamentu dje santunan aki como un organisacion di predicadó?

19. Con e profecia na Revelacion capítulo 11 ta sigurá nos cu lo no a silenciá e ungínan pa hopi tempu?

¹⁹ E profecia paralelo na Revelacion 11:3, 9, 11 ta mustra cu despues cu mata e “dos testigonan,” nan ta keda morto bentá pa un periodo corticu di tempu so—tres dia i mei—te cu rebibá nan. Di igual manera, e profecia di Daniel capítulo 12 ta mustra cu e santunan lo no a keda ketu; tabatin mas trabou ta spera nan.

TA HACI NAN ‘LIMPI, BLANCU I REFINA’

20. Segun Daniel 12:10, ki bendicionnan lo a bini riba e ungínan despues di nan experencianan duru?

²⁰ Manera nos a mencioná anteriormente, Daniel a skirbi e cosnan aki, pero e no por a comprendé nan. Tog, lo e mester a puntra su mes si realmente e santunan lo a ser destruí na man di nan persiguidónan, pasobra el a puntra: “Kico lo ta e parti final dje cosnan aki?” E angel a contestá: “Bai, Daniel, pasobra e palabranan ta ser hací secreto i seyá te cu e tempu di fin. Hopi hende lo haci nan mes limpi i haci nan mes blancu i lo ser refiná. I sigur e malbadonan lo actua di un manera malbado, i absolutamente ningun malbado lo no comprendé; pero esnan cu tin perspicacia lo comprendé.” (Daniel 12:8-10) Tabatin un speransa sigur pa e santunan! En bes di ser destruí, lo haci nan blancu, es decir, lo bendicioná nan cu un posicion limpi dilanti Jehova Dios. (Malakías 3:1-3) Nan perspicacia den asuntunan spiritual lo a yuda nan keda limpi den bista di Dios. Na contraste, e malbadonan lo a nenga di comprendé cosnan spiritual. Pero na ki tempu tur esaki lo a sosodé?

21. (a) Ki condicionnan lo a marca comienso dje periodo di tempu pronosticá na Daniel 12:11? (b) Kico tabata “e rasgo constante,” i na ki tempu a kit’é? (Mira cuadro na página 298.)

²¹ E angel a bisa Daniel: “Desde e tempu cu a kita e rasgo constante i a pone e cos repugnante cu ta causa desolacion, lo tin mil doshentinobenta dia.” Pues e periodo aki lo a cuminsá ora cierto condicionnan a tuma lugá. Mester a kita “e rasgo constante”—of “e sacrificio continuo.”a (Daniel 12:11, nota na pia di página) Cua sacrificio e angel tabata kier men? No e sacrificionan di bestia ofrecé den un of otro tempel terenal. Sí, asta e tempel cu tabatin un tempu na Jerusalem tabata djis un “copia dje realidad,” esta, Jehova su gran tempel spiritual, cu a cuminsá operá ora Cristo a bira su Sumo Sacerdote na aña 29 E.C.! Den e tempel spiritual aki, cu ta representá Dios su areglo pa adoracion puru, no tin mester di ofrendanan di picá continuo, pasobra “Cristo a ser ofrecé una bes pa semper pa carga e picánan di hopi.” (Hebreonan 9:24-28) Sin embargo, tur cristian berdadero ta ofrecé sacrificio na e tempel aki. Apostel Pablo a skirbi: “Mediante [Cristo], laga nos semper ofrecé na Dios un sacrificio di alabansa, esta, e fruta di lipnan cu ta haci declaracion público di su nomber.” (Hebreonan 13:15) Pues e promé condicion aki dje profecia, esta, kitamentu di “e rasgo constante,” a tuma lugá meimei di 1918 ora cu a casi para e trabou di predicá.

22. (a) Kico ta e “cos repugnante cu ta causa desolacion,” i na ki tempu a instal’é? (b) Na ki tempu e periodo pronosticá na Daniel 12:11 a cuminsá, i na ki tempu el a terminá?

²² Pero, kico dje di dos condicion: e echo cu a “pone” of instalá, “e cos repugnante cu ta causa desolacion”? Manera nos a mira ora nos a considerá Daniel 11:31, e cos repugnante aki tabata promé e Liga di Nacionnan i despues a bolbe presentá como Nacionnan Uní. Tur dos ta repugnante dor cu a aclamá nan como e único speransa pa pas riba tera. Pues, den curason di hopi hende, e institucionnan aki en realidad ta tuma e lugá dje Reino di Dios! Oficialmente a proponé formacion dje Liga na januari 1919. N’e tempu ei anto, tur dos condicion di Daniel 12:11 a cumpli. Pues e 1.290 dianan a cuminsá na principio di 1919 i a core te cu otoño (n’e Hemisferio Nort) di 1922.

23. Con e santunan di Dios a progresá den direccion di un condicion limpi durante e 1.290 dianan pronosticá den Daniel capítulo 12?

²³ Durante e tempu ei, e santunan a haci progreso den direccion di bira blancu i limpi den bista di Dios? Sigur cu sí! Na mart 1919 a libra e presidente di Sociedad Watch Tower huntu cu su socionan for di prizon. Despues a exonerá nan di tur acusacion falsu contra nan. Conciente cu nan trabou tabata leu di a caba, nan a cuminsá traha mesora, organisando un congreso pa september 1919. Den e mésun aña ei, a cuminsá publicá un revista pa compañá E Toren di Vigilancia. Originalmente e tabata yama The Golden Age (awor Spierta!), i semper el a apoyá E Toren di Vigilancia den exponé sin miedu e corupcion dje mundu aki i den yuda e pueblo di Dios keda limpi. Na fin dje 1.290 dianan pronosticá, e santunan tabata hopi leu caba den alcansá un posicion limpi i restorá. Na september 1922, net rond di tempu cu e periodo aki a terminá, nan a tene un congreso histórico na Cedar Point, Ohio, Merca. E congreso ei a duna e trabou di predicá un tremendo empuhe. Sin embargo, ainda mas progreso tabata necesario. Esei a keda pa e siguiente periodo marcá.

FELICIDAD PA E SANTUNAN

24, 25. (a) Daniel 12:12 ta pronosticá cua periodo di tempu, i evidentemente na ki tempu el a cuminsá i a terminá? (b) Con e condicion spiritual dje resto ungí tabata na principio dje 1.335 dianan?

²⁴ E angel di Jehova ta concluí su profecia relacioná cu e santunan cu e palabranan aki: “Felis ta esun cu ta mantené su mes den expectativa i cu ta yega n’e mil treshentitrinticincu dianan!” (Daniel 12:12) E angel no ta duna ningun indicacion na ki tempu e periodo aki ta cuminsá of terminá. Manera historia teocrático a mustra, ta parce cu e periodo aki a djis sigui mesora tras dje periodo anterior. Den e caso ei lo el a core di otoño di 1922 te na final di primavera di 1926 (Hemisferio Nort). E santunan a yega na un estado di felicidad na fin dje periodo ei? Sí, den maneranan spiritual significativo.

²⁵ Asta despues dje congreso di 1922 (potret na página 302), ainda algun dje santunan di Dios tabata wak atras n’e pasado cu nostalgia. Ainda e material básico di studio pa nan reunionnan tabata Bijbel i e volúmennan di Studies in the Scriptures cu C. T. Russell, a skirbi. N’e tempu ei, tabatin un punto di bista general cu a señalá na 1925 como e aña cu resureccion lo tuma lugá i cu lo restorá Paradijs riba tera. Pues, hopi hende tabata sirbi cu un fecha fiho na mente. Debí na orguyo, algun a nenga di participá den e trabou di predicá na público. Esaki no tabata un situacion animador.

26. Con e condicion spiritual dje ungínan a cambia segun cu e 1.335 dianan tabata transcurí?

²⁶ Sin embargo, segun cu e 1.335 dianan tabata transcurí, tur esaki a cuminsá cambia. Predicacion a haña un lugá mas importante, dor cu a establecé areglonan regular pa tur hende participá den e ministerio di veld. A programá reunionnan pa studia E Toren di Vigilancia tur siman. E edicion di 1 di mart 1925, tabatin e artículo histórico “Nacementu dje Nacion,” cu a duna e pueblo di Dios un pleno comprendimentu di loke a sosodé durante e periodo di 1914-1919. Despues cu 1925 a pasa, e santunan no tabata sirbi Dios mas cu un fecha fiho i inmediato na bista. Mas bien, santificacion di Jehova su nomber a bira e cos mas importante. A destacá e berdad vital aki, manera nunca promé, den e edicion di 1 di januari 1926 di E Toren di Vigilancia cu e artículo “Ken Lo Onra Jehova?” Na e congreso na mei 1926, a presentá e buki Deliverance (Liberacion; mira página 302.). Esaki tabata un di un seri di buki nobo diseñá pa reemplasá e Studies in the Scriptures. E santunan no tabata anhelá p’e pasado mas. Cu confiansa nan tabata mira na futuro i na e trabou nan dilanti. P’esei, manera a ser profetisá, e 1.335 dianan a terminá cu e santunan den un estado felis.

27. Con un repaso di Daniel capítulo 12 ta yuda nos identificá e ungínan di Jehova inekibocablemente?

²⁷ Di mes, no ta tur a wanta atrabes dje era turbulento aki. Sin duda ta p’esei e angel a enfatisá e importancia di ‘keda den expectativa.’ Esnan cu a perseverá i a keda den expectativa a ricibí hopi bendicion. Un repaso di Daniel capítulo 12 ta haci esaki cla. Manera a ser pronosticá, a rebibá, of resucitá, e ungínan den un sentido spiritual. Nan a ricibí perspicacia sobresaliente den e Palabra di Dios, i a ser autorisá pa “bai p’aki i p’aya” den dje i, guiá pa spiritu santu, pa revelá e misterionan di siglonan bieu. Jehova a limpia nan i a laga nan briya spiritualmente, mes briyante cu strea. Como consecuencia, nan a trece hopi hende den un posicion hustu cerca Jehova Dios.

28, 29. Ki mester ta nos determinacion segun cu “e tempu di fin” ta yega na su conclusion?

²⁸ Awor cu nos tin tur e marcanan profético aki pa identificá “e santunan dje Supremo,” ki excuus nos por tin pa keda sin reconocé nan i asociá cu nan? Tin bendicionnan maraviyoso ta spera e multitud grandi, cu ta djoin e clase ungí menguante aki, den sirbi Jehova. Nos tur tin cu keda den expectativa dje cumplimentu dje promesanan di Dios. (Habacuc 2:3) Den nos tempu Miguel, e Gran Prins, tin décadanan pará na fabor dje pueblo di Dios. Djis aki lo e drenta den accion como Dios su ehecutor nombrá dje sistema di cosnan aki. Ora e haci esei, unda nos lo ta pará?

²⁹ E contesta riba e pregunta ei lo dependé di si nos ta scoge pa hiba un bida di integridad awor. Pa fortalecé nos determinacion pa haci esei segun cu “e tempu di fin” ta yega na su conclusion, laga nos considerá e último versículo dje buki di Daniel. E consideracion dje versículo aki den e siguiente capítulo lo yuda nos mira con Daniel tabata pará dilanti su Dios i con lo e para dilanti Dje den futuro.

[Nota]

KICO BO A SACA AFO?

• Durante ki periodo di tempu Miguel ta “pará,” i con i na ki tempu lo e “lanta para”?

• Daniel 12:2 ta referí na ki clase di resureccion?

• Cua fechanan ta marca comienso i fin di e

tres tempu i mei mencioná na Daniel 12:7?

1.290 dianan profetisá na Daniel 12:11?

1.335 dianan profetisá na Daniel 12:12?

• Con presta atencion na Daniel capítulo 12 ta yuda nos identificá Jehova su adoradónan berdadero?

[Kuadro na página 298]

KITAMENTU DJE RASGO CONSTANTE

Den e buki di Daniel, e término “rasgo constante” ta aparecé cincu biaha. E ta referí na un sacrificio di alabansa, “e fruta di lipnan,” cu Jehova Dios su sirbidónan ta ofrec’é cu regularidad. (Hebreonan 13:15) Daniel 8:11, 11:31 i 12:11 a pronosticá su kitamentu.

Durante tur dos guera mundial, e pueblo di Jehova a sufri di persecucion severo den teritorio di “e rey di nort” i di “e rey di zuid.” (Daniel 11:14, 15) Kitamentu di “e rasgo constante” a tuma lugá na cabamentu di Guera Mundial I, ora nan a casi para e trabou di predicá completamente meimei di aña 1918. (Daniel 12:7) Durante Guera Mundial II tambe e Potencia Mundial Anglo-Americano a “kita e rasgo constante” pa 2.300 dia. (Daniel 8:11-14; mira Capítulo 10 dje buki aki.) Ademas e “brasa” nazi a kit’é pa un periodo di tempu cu e Scritura no ta specificá.—Daniel 11:31; mira Capítulo 15 dje buki aki.

[Tabèl/Plachi na página 301]

PERIODONAN DI TEMPU PROFETICO DEN DANIEL

[Plachi na página 287]

A manda sirbidónan prominente di Jehova inhustamente n’e prizon federal na Atlanta, Georgia, Merca. Di robes pa drechi: (sintá) A. H. Macmillan, J. F. Rutherford, W. E. Van Amburgh; (pará) G. H. Fisher, R. J. Martin, G. DeCecca, F. H. Robison i C. J. Woodworth

[Plachi na página 299]

A tene congresonan histórico na Cedar Point, Ohio, Merca, na 1919 (ariba) i na 1922 (abou)

[Plachi di henter página 302]