Capitulo Cuater

E Lantamentu i Caida di un Imagen Inmenso

 1. Pakico nos lo mester ta interesá den un situacion cu a surgi un década despues cu rey Nabucodonosor a hiba Daniel i otronan den cautiverio?

UN DECADA a pasa desde cu rey Nabucodonosor a trece Daniel i otro “hombernan principal dje pais” di Huda den cautiverio na Babilonia. (2 Reynan 24:15) Hóben Daniel ta sirbiendo den palacio di rey, ora ta surgi un situacion di bida of morto. Pakico esaki mester interesá nos? Pasobra e manera cu Jehova Dios ta intervení den e asuntu no solamente ta salba bida di Daniel i otronan, sino tambe e ta duna nos un bista dje marcha di potencianan mundial di profecia bíblico cu ta hiba te den nos tempu.

UN MONARCA TA ENFRENTA UN PROBLEMA DIFICIL

 2. Na ki tempu Nabucodonosor a haña su promé soño profético?

² Profeta Daniel a skirbi: “Den e di dos aña dje gobernacion real di Nabucodonosor, Nabucodonosor a soña soñonan; i su spiritu a cuminsá sintié agitá, i asta e no por a pega soño mas.” (Daniel 2:1) E soñadó tabata Nabucodonosor, rey dje Imperio Babilónico. Bon mirá, el a bira gobernante mundial na aña 607 P.E.C. ora Jehova Dios a permitié destruí Jerusalem i su tempel. Den e segundo aña di Nabucodonosor su reinado como gobernante mundial (606/605 P.E.C.), Dios a dun’é un soño spantoso.

 3. Ken no por a interpretá e soño dje rey, i con Nabucodonosor a reaccioná?

³ E soño aki a angustiá Nabucodonosor asina tantu cu e no por a drumi. Claro cu e tabata ansioso pa sa su nificacion. Pero e rey poderoso a lubidá e soño! Di manera cu el a manda yama mago, tovenar i hacidónan di bruha di Babilonia, i el a exigí pa nan cont’é e soño i interpret’é. Esei tabata un cos fuera di nan alcanse. Nan inabilidad a pone Nabucodonosor rabia asina tantu, cu el a manda “destruí tur e sabionan di Babilonia.” E decreto aki lo a trece profeta Daniel cara-cara cu e ehecutor apuntá pa rey. Di con? Pasobra e cu su tres compañeronan hebreo—Hananías, Misael i Azarías—tabata contá entre e sabionan di Babilonia.—Daniel 2:2-14.

DANIEL TA BIN AL RESCATE

 4. (a) Con Daniel a haña sa e contenido i nificacion dje soño di Nabucodonosor? (b) Con Daniel a expresá gradicimentu na Jehova Dios?

⁴ Despues cu el a haña sa e motibu pakico Nabucodonosor a saca e decreto severo ei, “Daniel mes a drenta paden i a pidi rey dun’é tempu, special p’e mustra rey e interpretacion.” Rey a dun’é esei. Daniel a bai su cas bek, i a haci oracion huntu cu su tres amigunan hebreo, pidiendo “misericordia di parti dje Dios di shelu relacioná cu e secreto aki.” E anochi ei mes, Jehova a revelá e secreto dje soño na Daniel den un vision. Gradicidu, Daniel a bisa: “Laga e nomber di Dios sea bendicioná for di tempu indefiní, sí, te na tempu indefiní, pasobra sabiduria i poder—pasobra nan ta pertenecé na dje. I e ta cambia tempu i temporadanan, ta eliminá rey i ta pone rey, ta duna sabiduria n’e sabínan i conocimentu na esnan cu conocé dicernimentu. E ta revelá e cosnan profundo i e cosnan scondí, ya cu e sa kico tin den scuridad; i cuné di berdad lus ta biba.” Daniel a alabá Jehova pa e perspicacia ei.—Daniel 2:15-23.

 5. (a) Ora Daniel tabata dilanti rey, con el a duna crédito na Jehova? (b) Di con Daniel su splicacion ta di interes pa nos awe?

⁵ E siguiente dia, Daniel a acercá Arioc, hefe di wardaespalda, kende rey a nombra pa caba cu e sabionan di Babilonia. Ora Arioc a haña sa cu Daniel por a interpretá e soño, el a core hib’é cerca rey. Daniel no a tuma ningun crédito pa su mes, sino a bisa Nabucodonosor: “Ta existí un Dios den shelu cu ta un Revelador di secreto i el a laga rey Nabucodonosor sa loke tin cu sosodé den e parti final dje dianan.” Daniel tabata cla pa revelá, no solamente e futuro dje Imperio Babilónico, sino tambe pa describí sucesonan mundial for di Nabucodonosor su dia te den nos tempu, i mas despues.—Daniel 2:24-30.

REY TA CORDA E SOÑO

6, 7. Kico tabata e soño cu Daniel a pone rey corda?

⁶ Nabucodonosor a scucha cu atencion na Daniel su splicacion: “Abo, o rey, tabata contemplá, i, mira! tabatin un cierto imágen inmenso. E imágen ei, cu tabata grandi i di cua su splendor tabata extraordinario, tabata pará bo dilanti, i su aparencia tabata spantoso. Pa loke ta trata e imágen ei, su cabes tabata di bon oro, su pechu i su brasanan tabata di plata, su barica i su belnan tabata di koper, su pal’i pianan tabata di heru, su pianan tabata pa un parti di heru i pa un parti di klei formá. Bo a sigui wak te ora cu un piedra a ser cortá, no cu man, i el a dal e imágen na su pianan di heru i klei formá i a aplastá nan. E ora ei e heru, e klei formá, e koper, e plata i e oro, tur huntu a keda aplastá, i a bira manera bagas dje plenchi di bati cosecha den zomer, i bientu a hiba nan di manera cu no a haña ningun rastro di nan. I pa loke ta e piedra cu a dal e imágen, el a bira un ceru grandi i a yena henter e tera.”—Daniel 2:31-35.

⁷ Esta emocioná Nabucodonosor mester a keda ora el a tende Daniel revelá e soño! Pero warda! E sabionan di Babilonia lo a scapa solamente si Daniel a interpretá e soño tambe. Papiando pa su mes i su tres amigunan hebreo, Daniel a declará: “Esaki ta e soño, i su interpretacion nos lo bisa dilanti di rey.”—Daniel 2:36.

UN REINO SUMAMENTE DISTINGUI

 8. (a) Segun Daniel su interpretacion, ken of kico e cabes di oro tabata? (b) Na ki tempu e cabes di oro a bini na existencia?

⁸ “Abo, o rey, rey di reynan, abo na ken e Dios di shelu a duna e reino, e poder, i e fortalesa i e dignidad, i den ken su man el a duna—na unda cu e yunan di hende ta biba—e bestianan di mondi i e criaturanan di shelu cu ala, i ken el a haci gobernante riba nan tur, abo mes ta e cabes di oro.” (Daniel 2:37, 38) E palabranan aki a aplicá na Nabucodonosor despues cu Jehova a us’é pa destruí Jerusalem, na aña 607 P.E.C. Ta asina pasobra e reynan entronisá na Jerusalem tabata for dje liña di David, Jehova su rey ungí. Jerusalem tabata e capital di Huda, e reino típico di Dios cu a representá Jehova su soberania riba tera. Cu destruccion dje stad ei na aña 607 P.E.C., e reino típico aki di Dios a stop di existí. (1 Crónicanan 29:23; 2 Crónicanan 36:17-21) Awor e potencianan mundial cu a sigui otro, representá dor dje partinan di metal dje imágen, por a ehercé dominacion mundial sin interferencia di Dios su reino típico. Como e cabes di oro, e metal mas precioso conocí den tempu antiguo, Nabucodonosor a haña e distincion como esun cu a causa e caida dje reino ei dor di destruí Jerusalem.—Mira “Un Rey Guerero Ta Construí un Imperio,” na página 63.

 9. Kico e cabes di oro a representá?

⁹ Nabucodonosor, kende a reina pa 43 aña, a encabesá un dinastia cu a goberná riba e Imperio Babilónico. E dinastia ei a incluí su suegro Nabonido i su yu homber mayó, Evil-merodac, i a sigui existí pa 43 aña mas, te na morto di Bélsasar, yu di Nabonido, na aña 539 P.E.C. (2 Reynan 25:27; Daniel 5:30) Pues e cabes di oro dje imágen dje soño no a representá Nabucodonosor so, sino henter e liña dje dinastia babilónico.

10. (a) Con e soño di Nabucodonosor a indicá cu e Potencia Mundial Babilónico lo no a dura? (b) Kico profeta Isaías a predicí tocante e conkistadó di Babilonia? (c) Den ki sentido Medo-Persia tabata inferior na Babilonia?

¹⁰ Daniel a bisa Nabucodonosor: “Despues di bo lo lanta un otro reino inferior na bo.” (Daniel 2:39) Un reino simbolisá pa e pechu i brasanan di plata dje imágen, lo a bini despues dje dinastia di Nabucodonosor. Un 200 aña promé, Isaías a predicí dje reino aki, i el a asta duna nomber di su rey victorioso, esta, Ciro. (Isaías 13:1-17; 21:2-9; 44:24–45:7, 13) Esaki tabata e Imperio di Medo-Persia. Apesar di cu Medo-Persia tabatin un gran civilisacion cu no tabata inferior na esun dje Imperio Babilónico, tog ta representá e reino ei cu plata, un metal ménos precioso cu oro. E tabata inferior na e Potencia Mundial di Babilonia den e sentido cu e no tabatin e distincion di a causa e caida di Huda, e reino típico di Dios cu su capital na Jerusalem.

11. Na ki tempu e dinastia di Nabucodonosor a stop di existí?

¹¹ Un 60 aña despues di a interpretá e soño, Daniel tabata testigo dje fin dje dinastia di Nabucodonosor. Daniel tabata presente e anochi di 5 pa 6 di october 539 P.E.C., ora cu e ehército di Medo-Persia a conkistá Babilonia, e stad aparentemente invencibel, i a ehecutá rey Bélsasar. Cu morto di Bélsasar, e cabes di oro dje imágen dje soño—e Imperio Babilónico—a stop di existí.

UN REINO TA LIBRA E PUEBLO EXILIA

12. Con e decreto cu Ciro a saca na aña 537 P.E.C. a beneficiá hudiu exiliá?

¹² Medo-Persia a reemplasá e Imperio Babilónico como potencia mundial dominante na aña 539 P.E.C. Na edad di 62 aña, Dario e medo a bira e promé gobernante dje stad conkistá di Babilonia. (Daniel 5:30, 31) E cu Ciro e perso a reina pa un tempu corticu huntu riba e Imperio di Medo-Persia. Ora Dario a muri, Ciro a bira e único cabes dje Imperio Perso. Pa hudiu den Babilonia, e reinado di Ciro a nificá liberacion for di cautiverio. Na aña 537 P.E.C., Ciro a saca un decreto cu a permití exiliadonan hudiu na Babilonia regresá nan patria i reconstruí Jerusalem i e tempel di Jehova. Sin embargo, no a reestablecé e reino típico di Dios na Huda ni Jerusalem.—2 Crónicanan 36:22, 23; Esdras 1:1–2:2a.

13. Kico e pechu i brasanan di plata dje imágen dje soño di Nabucodonosor a representá?

¹³ E pechu i brasanan di plata dje imágen dje soño a representá e liña di reynan di Persia cuminsando cu Ciro e Grandi. E dinastia ei a dura pa mas cu 200 aña. Nan ta kere cu Ciro a muri durante un campaña militar, na aña 530 P.E.C. Di un 12 rey cu a siguié riba trono dje Imperio Perso, por lo ménos 2 a trata Jehova su pueblo scogí bon. Unu tabata Dario I (perso), i e otro tabata Artahérhes I.

14, 15. Ki yudansa Dario e Grandi i Artahérhes I a duna e hudiunan?

¹⁴ Dario I tabata di tres den e liña di reynan perso despues di Ciro e Grandi. E dosnan anterior tabata Cambises II i su ruman homber Bardiya (kende kisas tabata e mago Gaumata cu a pasa pa Bardiya). Pa ora cu Dario I, conocí tambe como Dario e Grandi, a subi trono na aña 521 P.E.C., e trabou di reconstruí e tempel na Jerusalem tabata bou di prohibicion. Ora cu Dario a haña e documento di Ciro su decreto den e archivonan na Ecbátana, el a haci mas cu kita e prohibicion na aña 520 P.E.C. El a duna fondo tambe for dje tesoreria real pa reconstruí e tempel.—Esdras 6:1-12.

¹⁵ E siguiente gobernante perso cu a yuda e hudiunan cu nan trabou di restoracion tabata Artahérhes I, kende a bira sucesor di su tata Asuero (Hérhes I) na aña 475 P.E.C. Artahérhes tabatin e bijnaam Longimano, pasobra su man drechi tabata mas largu cu su man robes. Durante e di 20 aña di su reinado, na aña 455 P.E.C., el a comisioná su copero hudiu Nehemías, pa ta gobernadó di Huda i pa reconstruí e murayanan di Jerusalem. E accion aki a marca comienso dje ‘setenta simannan di aña’ describí den Daniel capítulo 9, i a fiha e fechanan p’e aparicion i morto dje Mesías, of Cristo, esta, Jesus di Názaret.—Daniel 9:24-27; Nehemías 1:1; 2:1-18.

16. Na ki tempu e Potencia Mundial di Medo-Persia a terminá, i cua rey tabata na poder?

¹⁶ E último dje seis reynan cu a sigui Artahérhes I riba e trono dje Imperio Perso tabata Dario III. Su reinado a yega na un fin abrupto na aña 331 P.E.C., ora el a sufri un derota teribel na man di Alexander e Grandi na Gaugamela, cerca di antiguo Nínive. E derota aki a pone fin na e Potencia Mundial di Medo-Persia, cu e parti di plata dje imágen dje soño di Nabucodonosor a simbolisá. E potencia cu a sigui tabata superior den algun cos, pero inferior den otro cosnan. Scuchando e interpretacion cu Daniel a sigui duna dje soño di Nabucodonosor, nos ta comprendé esaki.

UN REINO EXTENSO PERO INFERIOR

17-19. (a) Cua potencia mundial e barica i belnan di koper a representá, i con extenso su gobernacion tabata? (b) Ken Alexander III tabata? (c) Con griego a bira un idioma internacional, i pa ki propósito el a sirbi bon?

¹⁷ Daniel a bisa Nabucodonosor cu e barica i belnan dje imágen inmenso tabata “un otro reino, un di tres, di koper, cu lo [a] goberná riba henter e tera.” (Daniel 2:32, 39) E di tres reino aki lo a bini despues di Babilonia i Medo-Persia. Mescos cu koper ta inferior na plata, e potencia mundial nobo aki lo ta inferior na Medo-Persia den e sentido cu lo e no ser onrá cu ningun privilegio manera por ehempel, libra e pueblo di Jehova. Sin embargo, e reino manera koper lo a “goberná riba henter e tera,” loke ta indicá cu lo el a bira mas extenso cu sea Babilonia of Medo-Persia. Kico historia ta confirmá tocante e potencia mundial aki?

¹⁸ Yen di ambicion, Alexander III, djis despues di a heredá e trono di Macedonia na aña 336 P.E.C. na edad di 20 aña, ta emprendé un campaña di conkista. Debí na su éxitonan militar, nan a yam’é despues Alexander e Grandi. El a logra un victoria tras di otro, i a sigui avansá den teritorio di Persia. Ora el a derotá Dario III den bataya na Gaugamela na aña 331 P.E.C., e Imperio Perso a cuminsá cai den otro i Alexander a establecé Grecia como e potencia mundial nobo.

¹⁹ Despues dje victoria na Gaugamela, Alexander a bai conkistá e capitalnan perso, cu ta Babilonia, Susa, Persépolis i Ecbátana. El a dominá e resto dje Imperio Perso, i a extendé su conkista te den west di India. A establecé colonianan griego den e paisnan conkistá. Dje manera ei e idioma i cultura griego a plama den henter su dominio. De echo, e Imperio Griego a bira mas grandi cu cualkier otro imperio promé cuné. Manera Daniel a predicí, e reino di koper a “goberná riba henter e tera.” Un resultado di esaki tabata cu griego (koine) a bira un idioma internacional. E idioma griego tin e capacidad di expresá cos cu exactitud. Esaki a pone cu el a sirbi bon pa skirbi e Scritura Griego Cristian i pa plama e bon nobo dje Reino di Dios.

20. Kico a para dje Imperio Griego despues di morto di Alexander e Grandi?

²⁰ Alexander e Grandi tabata gobernante mundial pa ocho aña so. Maske e tabata yong, cu 32 aña di edad, Alexander a bira malu despues di un bankete i a muri djis despues, dia 13 di juni 323 P.E.C. Cu tempu, su imperio extenso a parti den cuater teritorio, i cada un a ser goberná pa un di su generalnan. Asina, for di un solo reino grandi a sali cuater reino cu finalmente e Imperio Romano a conkistá. E potencia mundial manera koper a sigui existí te cu aña 30 P.E.C., ora cu e último dje cuater reinonan aki—e dinastia tolemaico cu tabata goberná na Egipto—a cai definitivamente den man di Roma.

UN REINO CU TA APLASTA I DESTROSA

21. Con Daniel a describí “e di cuater reino”?

²¹ Daniel a sigui cu su splicacion dje imágen dje soño: “Pa loke ta e di cuater reino [despues di Babilonia, Medo-Persia i Grecia], lo e resultá di ta fuerte manera heru. Mescos cu heru ta aplastá i garna tur otro cos, asina, manera heru cu ta destrosá, lo e aplastá i destrosá asta tur esakinan.” (Daniel 2:40) Pa loke ta su fortalesa i abilidad di aplastá, e potencia mundial aki lo tabata manera heru, mas fuerte cu e imperionan representá pa oro, plata of koper. E Imperio Romano tabata un potencia asina.

22. Con asina e Imperio Romano tabata manera heru?

²² Roma a aplastá i destrosá e Imperio Griego i a conkistá loke a sobra dje potencianan mundial di Medo-Persia i Babilonia. Roma a mustra un falta di respet p’e Reino di Dios cu Jesucristo a proclamá, dor di mat’é riba un staca di tormento na aña 33 E.C. Den un intento pa destrosá cristianismo berdadero, Roma a persiguí e disipelnan di Jesus. Ademas, e romanonan a destruí Jerusalem i su tempel na aña 70 E.C.

23, 24. Fuera dje Imperio Romano, kico mas e pal’i pianan dje imágen a representá?

²³ E pal’i pianan dje imágen dje soño di Nabucodonosor no a representá e Imperio Romano so, sino tambe e formacionnan político cu a sali for di dje. Considerá e palabranan aki skirbí na Revelacion 17:10: “Tin shete rey: cincu a cai, unu ta, i e otro no a yega ainda, pero ora e yega mes, e tin cu permanecé pa un tempu corticu.” Ora apostel Juan a skirbi e palabranan aki, e romanonan tabatin e den exilio riba e isla di Pátmos. E cincu reynan, of potencianan mundial, cu a cai tabata Egipto, Asiria, Babilonia, Medo-Persia i Grecia. E di seis—e Imperio Romano—tabata na poder ainda. Pero e tambe lo mester a cai, i e di shete rey lo a lanta for di entre un dje teritorionan cu Roma a capturá. Cua potencia mundial esei lo tabata?

²⁴ Un tempu Gran Bretania tabata forma e parti nortwest dje Imperio Romano. Pero pa aña 1763, el a bira e Imperio Británico—e Britania cu tabata manda riba e shete lamannan. Pa aña 1776, su 13 colonianan mericano a declará nan independencia pa asina establecé Estados Unidos di América. Sin embargo, den añanan despues, Gran Bretania i Estados Unidos a bira socio den tempu di guera i tambe den tempu di pas. Asina, e combinacion Anglo-Americano a bini na existencia como e di shete potencia mundial di profecia bíblico. Mescos cu e Imperio Romano, el a resultá di ta “fuerte manera heru,” eherciendo dominio duru manera heru. Pues e pal’i pianan di heru dje imágen dje soño ta encerá tantu e Imperio Romano como e potencia mundial dòbel Anglo-Americano.

UN MESCLA FRAGIL

25. Kico Daniel a bisa tocante e pia i tenchinan dje imágen?

²⁵ Anto Daniel a sigui bisa Nabucodonosor: “Manera bo a contemplá cu e pianan i e tenchinan tabata pa un parti klei formá di un trahadó di klei i pa un parti di heru, e reino mes lo resultá di ta dividí, pero algu dje duresa di heru lo resultá di ta den dje, mescos cu bo a contemplá e heru mesclá cu klei húmedo. I pa loke ta e tench’i pianan cu ta pa un parti di heru i pa un parti di klei formá, e reino lo resultá di ta un parti fuerte i lo resultá di ta un parti frágil. Manera bo a contemplá heru mesclá cu klei húmedo: nan lo ta mesclá cu e desendencia di hende; pero nan lo no resultá di ta pegá na otro, esun aki na esun ei, mescos cu heru no ta mescla cu klei formá.”—Daniel 2:41-43.

26. Na ki tempu e gobernacion representá p’e pia i tenchinan ta manifestá su mes?

²⁶ E marcha dje potencianan mundial, cu e vários partinan dje imágen den e soño di Nabucodonosor a representá, a cuminsá cu e cabes i a bai abou na e pianan. Ta lógico anto cu e pia i tenchinan di “heru mesclá cu klei húmedo” lo a simbolisá e último manifestacion di gobernacion humano cu lo a existí durante “e tempu di fin.”—Daniel 12:4.

27. (a) Ki situacion mundial e pia i tenchinan di heru mesclá cu klei ta representá? (b) Kico e dies tenchinan dje imágen ta representá?

²⁷ Na principio di siglo 20, e Imperio Británico a goberná riba un cuarta parti dje poblacion di tera. Otro imperionan europeo tambe a dominá miyones di hende. Pero Guera Mundial I a pone cu grupo di nacionnan a lanta na lugá di imperionan. Despues di Guera Mundial II, e tendencia aki a acelerá. Segun cu nacionalismo a sigui desaroyá, e cantidad di nacion na mundu a aumentá drásticamente. E dies tenchinan dje imágen ta representá tur e potencia i gobiernunan ei cu ta existí pareu, pasobra tin biaha den Bijbel, e number dies ta nificá cos terenal completo.—Compará cu Exodo 34:28; Mateo 25:1; Revelacion 2:10.

28, 29. (a) Segun Daniel, kico e klei a representá? (b) Kico nos por bisa dje mescla di heru cu klei?

²⁸ Awor cu nos ta den “e tempu di fin,” nos a yega n’e pianan dje imágen. Algun dje gobiernunan, representá dor dje imágen su pia i tenchinan di heru mesclá cu klei, ta manera heru, esta, ta autoritario of tiránico. Otronan ta manera klei. Den ki sentido? Daniel a asociá e klei cu “e desendencia di hende.” (Daniel 2:43) Apesar dje naturalesa frágil di klei, di cua e desendencia di hende ta trahá, gobernacionnan tradicional, duru manera heru, a haña nan obligá ta scucha mas i mas na e pueblo comun, cu kier tin algu di bisa den e gobiernunan cu ta manda riba nan. (Job 10:9) Pero no tin ningun union entre gobiernunan autoritario i pueblo comun, mescos cu bo no por uni heru cu klei. Ora e imágen ta ser destruí, e mundu lo ta tur dividí políticamente!

²⁹ E condicion desuní dje pia i tenchinan lo causa e caida di henter e imágen? Kico lo sosodé cu e imágen?

UN CULMINACION DRAMATICO!

30. Describí e culminacion dje soño di Nabucodonosor.

³⁰ Considerá e culminacion dje soño. Daniel a conta rey: “Bo a sigui wak te ora cu un piedra a ser cortá no cu man, i el a dal e imágen na su pianan di heru i klei formá i a aplastá nan. E ora ei e heru, e klei formá, e koper, e plata i e oro, tur huntu a keda aplastá, i a bira manera bagas dje plenchi di bati cosecha den zomer, i bientu a hiba nan di manera cu no a haña ningun rastro di nan. I pa loke ta e piedra cu a dal e imágen, el a bira un ceru grandi i a yena henter e tera.”—Daniel 2:34, 35.

31, 32. Kico e profecia a bisa relacioná cu e parti final dje soño di Nabucodonosor?

³¹ E profecia ta sigui duna un splicacion: “Den e dianan dje reynan ei e Dios di shelu lo establecé un reino cu nunca lo no ser reducí na ruina. I e reino mes lo no pasa na ningun otro pueblo. Lo e aplastá i pone un fin na tur e reinonan aki, i e mes lo permanecé te na tempu indefiní; ya cu bo a contemplá cu for dje ceru un piedra a ser cortá no cu man, i cu el a aplastá e heru, e koper, e klei formá, e plata i e oro. E Dios magnífico mes a laga rey sa loke tin cu sosodé despues di esaki. I e soño ta confiabel, i su interpretacion ta digno di confiansa.”—Daniel 2:44, 45.

³² Ora Nabucodonosor a comprendé cu Daniel a lagu’é corda su soño i a splik’é, el a reconocé cu ta Daniel su Dios so tabata “un Señor di reynan i un Revelador di secreto.” Tambe rey a duna Daniel i su tres compañeronan hebreo posicionnan di gran responsabilidad. (Daniel 2:46-49) Sin embargo, kico ta e nificacion actual di Daniel su ‘interpretacion digno di confiansa’?

‘UN CERU TA YENA E TERA’

33. For di cua “ceru” a corta e “piedra,” i na ki tempu i con esaki a sosodé?

³³ Ora “e tempu señalá dje nacionnan” a terminá na october 1914, “e Dios di shelu” a establecé e Reino celestial dor di entronisá su Yu ungí, Jesucristo, como “Rey di reynan i Señor di señornan.”a (Lucas 21:24; Revelacion 12:1-5; 19:16) Pues tabata mediante poder divino, i no mannan humano, cu a corta e “piedra” dje Reino Mesiánico for dje “ceru” di Jehova su soberania universal. E gobiernu celestial aki ta den man di Jesucristo, kende Dios a duna inmortalidad. (Romanonan 6:9; 1 Timoteo 6:15, 16) Pues anto, e ‘reino aki di nos Señor Dios i di su Cristo’—cu ta un expresion di Jehova su soberania universal—lo no pasa pa ningun otro persona. Lo e permanecé pa semper.—Revelacion 11:15.

34. Con e Reino di Dios a nace “den e dianan dje reynan ei”?

³⁴ Nacementu dje Reino a tuma lugá “den e dianan dje reynan ei.” (Daniel 2:44) E reynan ei no tabata solamente esnan representá dor dje dies tenchinan dje imágen, sino tambe esnan simbolisá dor di su partinan di heru, koper, plata i oro. Maske e imperionan di Babilonia, Persia, Grecia i Roma a disparcé como potencia mundial, nan restonan tabata existí ainda na 1914. E tempu ei e Imperio Turco Ottoman a ocupá e teritorio di Babilonia, i tabatin gobiernunan nacional ta funcioná na Persia (Iran), na Grecia i na Roma, Italia.

35. Na ki tempu e “piedra” lo dal e imágen, i te na ki grado lo deshací dje imágen?

³⁵ Djis aki Dios su Reino celestial lo dal e imágen simbólico na su pianan. Como resultado, tur e reinonan cu e imágen a representá lo kibra na filingrana, poniendo asina un fin na nan. Sí, na e “guera dje gran dia di Dios e Todopoderoso,” e “piedra” ei lo dal cu un impacto asina devastador, cu lo e garna e imágen na puiru i e bientu dje tormenta di Dios lo barié bai cuné manera bagas di un plenchi di bati cosecha. (Revelacion 16:14, 16) Anto, mescos cu e piedra cu a crece bira tamaño di un ceru i a yena e tera, e Reino di Dios lo bira e ceru gubernamental cu lo tin un efecto riba “henter e tera.”—Daniel 2:35.

36. Pakico nos por yama e Reino Mesiánico un gobiernu stabil?

³⁶ Aunke e Reino Mesiánico ta celestial, lo e ehercé su poder riba nos planeta pa bendicioná tur habitante obediente dje tera. E gobiernu stabil aki “nunca lo no ser reducí na ruina” ni lo “no pasa na ningun otro pueblo.” Distinto dje reinonan di gobernantenan humano muribundo, “e mes lo permanecé te na tempu indefiní,” esta, pa semper. (Daniel 2:44) Mare bo por tin e privilegio di ta un di su súbditonan pa eternidad.

[Nota]

KICO BO A SACA AFO?

• E vários partinan dje imágen inmenso dje soño di Nabucodonosor ta representá cua potencianan mundial?

• E pia i tenchinan di heru mesclá cu klei ta representá ki situacion mundial?

• Na ki tempu i for di cua “ceru” a corta e “piedra”?

• Na ki tempu e “piedra” lo dal e imágen?

[Kuadro/Plachi na página 63-67]

UN REY GUERERO TA CONSTRUI UN IMPERIO

BABILONIA su príncipe heredero i su ehército ta destrosá e forsanan egipcio di fárao Neko na Carkemis, Siria. E egipcionan derotá ta hui bai zuid den direccion di Egipto, i e babilonionan ta sigui nan tras. Pero un mensahe for di Babilonia ta obligá e príncipe victorioso bandoná su persecucion. Noticia a drenta cu su tata, Nabopolasar, a muri. Nabucodonosor ta encargá su generalnan cu e responsabilidad di trece e prezunan i e botin bek, anto e ta pura bai cas bek pa tuma posicion dje trono cu su tata a muri laga.

Asina Nabucodonosor a subi trono di Babilonia na aña 624 P.E.C. i a bira e di dos gobernante dje Imperio Neo-Babilónico. Durante su reinado di 43 aña, el a tuma posesion di teritorionan cu un tempu e Potencia Mundial Asirio a ocupá, i a extendé su dominio. Na parti nort el a conkistá Siria i parti west, Palestina, te cu e frontera di Egipto.​—Wak e mapa.

Den e di cuater aña di su reinado (620 P.E.C.), Nabucodonosor a haci Huda su reino subordiná. (2 Reynan 24:1) Tres aña despues, un rebelion di Huda a pone Babilonia sitia Jerusalem. Nabucodonosor a hiba Joakin, Daniel i otronan, prezu na Babilonia. Tambe e rey a hiba algun dje artículonan di uso dje tempel di Jehova. El a haci Joakin su tio, Sedekías, rey subordiná di Huda.​—2 Reynan 24:​2-17; Daniel 1:6, 7.

Poco tempu despues, Sedekías tambe a rebelá, i a bira aliado di Egipto. Nabucodonosor a sitia Jerusalem atrobe, i na aña 607 P.E.C., el a habri un buracu den su muraya, a kima e tempel i a destruí e stad. El a mata tur e yu hombernan di Sedekías i despues a ciega Sedekías i a mar’é pa hib’é Babilonia como prezu. Nabucodonosor a coge mayoria dje pueblo prezu i a transportá e sobrá artículonan di uso dje tempel pa Babilonia. “Asina Huda a bai den exilio for di riba su suela.”​—2 Reynan 24:​18–25:21.

Nabucodonosor a conkistá Tiro tambe dor di sitia e stad pa 13 aña largu. Den transcurso dje sitiamentu, cabes di su soldánan “a bira limpi” dor dje feilamentu di nan helm, i nan scoudernan a “feila habri” di carga material pa usa den construccion dje sitiamentu. (Ezekiel 29:18) Finalmente, Tiro a capitulá na e forsanan babilónico.

Ta evidente cu e rey di Babilonia tabata un strategista militar briyante. Tin obranan literario, foral di orígen babilónico, cu ta describié tambe como un rey hustu. Aunke Scritura no ta bisa specíficamente cu Nabucodonosor tabata hustu, profeta Jeremías a bisa cu maske Sedekías a rebelá, ‘si e sali bai na e prinsnan dje rey di Babilonia,’ nan lo a trat’é hustu. (Jeremías 38:​17, 18) I despues dje destruccion di Jerusalem, Nabucodonosor a trata Jeremías cu respet. Relacioná cu Jeremías, rey a manda: “Bai cuné i tene bo mes wowonan fihá riba dje, i no hacié nada malu. Pero manera e papia cu bo, haci asina cuné.”​—Jeremías 39:​11, 12; 40:​1-4.

Siendo un administradó, Nabucodonosor a reconocé unbes e cualidad i abilidadnan di Daniel i su tres compañeronan​—Sadrac, Mesac i Abednego​—kende nan nombernan hebreo tabata Hananías, Misael i Azarías. P’esei rey a usa nan den puestonan di responsabilidad den su reino.​—Daniel 1:​6, 7, 19-21; 2:49.

Nabucodonosor tabata un deboto foral di Marduk, e dios principal di Babilonia. E rey a duna Marduk e mérito pa tur su conkistanan. Na Babilonia, el a construí i a embeyecé e tempelnan di Marduk i di masha hopi otro dios babilónico. Kisas e imágen di oro cu el a traha riba e yanura di Dura tabata dedicá na Marduk. I ta parce cu Nabucodonosor a dependé pisá riba divinacion ora di planea su estrategianan militar.

Tambe Nabucodonosor tabata masha orguyoso di a restorá Babilonia, e stad cerá cu muraya mas grandi dje tempu ei. Dor di completá e stad su murayanan dòbel masivo, cu su tata a cuminsá construí, Nabucodonosor a haci e capital aparentemente invencibel. E rey a drecha un palacio bieu den curason dje stad, i un dos kilometer pa nort di dje, el a traha un palacio di zomer. Nan ta bisa cu pa satisfacé su reina di Media, kende tabatin heimwee pa e ceru i selvanan di su patria, Nabucodonosor a traha e hardinnan cologante, catalogá como un dje shete maraviyanan dje mundu antiguo.

“No ta Babilonia e Grandi esaki ta, cu mi mes a construí p’e cas real cu e fortalesa di mi poder i p’e dignidad di mi mahestad?” rey a broma un dia cu e tabata cana rond dje palacio real di Babilonia. “Miéntras cu e palabra ainda tabata den boca di rey,” locura a dal e. Incapas pa goberná pa shete aña, el a come vegetacion, manera Daniel a predicí. Na fin dje periodo ei, Nabucodonosor a ricibí su reino bek i el a reina te na su morto na aña 582 P.E.C.​—Daniel 4:​30-36.

KICO BO A SACA AFO?

Kico nos por bisa di Nabucodonosor como

• strategista militar?

• administradó?

• adoradó di Marduk?

• constructor?

[Mapa]

(Pa e teksto den su formato kompleto, wak e publikashon)

IMPERIO BABILONICO

LAMAN CORA

Jerusalem

Riu Eufrátes

Riu Tígris

Nínive

Susa

Babilonia

Ur

[Plachi]

Babilonia, e stad di mas grandi cerá cu muraya den su tempu

[Plachi]

Dragon tabata un símbolo di Marduk

[Plachi]

E famoso hardinnan cologante di Babilonia

[Diagram/Plachi na página 56]

(Pa e teksto den su formato kompleto, wak e publikashon)

POTENCIANAN MUNDIAL DJE PROFECIA DI DANIEL

E imágen inmenso (Daniel 2:31-45)

BABILONIA desde 607 P.E.C.

MEDO-PERSIA desde 539 P.E.C.

GRECIA desde 331 P.E.C.

ROMA desde 30 P.E.C.

POTENCIA MUNDIAL ANGLO-AMERICANO desde 1763 E.C.

MUNDU DIVIDI POLITICAMENTE den e tempu di fin

[Plachi di henter página 47]

[Plachi di henter página 58]